9
1 ဘၣ်မုၢ်တနံၤန့ၣ်စီၤဒၤဝံးသံကွၢ်ဝဲ, “လၢစီၤစီလူးအပှၤဟံၣ်ဖိ ဃီဖိအကျါန့ၣ်မ့ၢ်ပှၤအိၣ်လီၤတဲာ်တ့ၢ်ဒံးတဂၤဂၤဧါ. မ့ၢ်အိၣ်ဒီး, ယသးအိၣ်ဒုးနဲၣ်ယတၢ်သးကညီၤဘၣ်အီၤလၢစီၤယိနၤ သၣ်အဃိန့ၣ်လီၤ.”
2 တၢ်ခ့တၢ်ပှၤအိၣ်ဝဲဒၣ်တဂၤလၢစီၤစီလူးအပှၤဟံၣ်ဖိဃီဖိ အကျါလၢအမံၤမ့ၢ်ဝဲစီၤစံဘၤ, ဒီးအဝဲဒၣ်ဘၣ်တၢ်တဲ ဘၣ်အီၤလၢအကလဲၤဆူစီၤဒၤဝံးအအိၣ်န့ၣ်လီၤ. စီၤပၤသံကွၢ်အီၤ, “နမ့ၢ်စီၤစံဘၤဧါ.” အဝဲစံးဆၢဝဲ, “ကစၢ်ဧၢ, နကုၢ်နပှၤလီၤ.”
3 စီၤပၤသံကွၢ်အီၤ, “မ့ၢ်ပှၤအိၣ်လီၤတဲာ်ဒံးဝဲတဂၤဂၤလၢ စီၤစီလူးအဟံၣ်ဖိဃီဖိအကျါလၢယဒုးနဲၣ်အီၤယတၢ်သူၣ်တီသး ရၤဒီးတၢ်သူၣ်ကညီၤသးကညီၤကသ့ဝဲဒ်ယအၢၣ်လီၤတ့ၢ်ကစၢ်ယွၤလၢ ယကမၤအီၤအသိးန့ၣ်ဧါ.”
စီၤစံဘၤစံးဆၢဝဲဒၣ်, “ပှၤအိၣ်ဒံးဝဲတဂၤလၢစီၤယိနၤသၣ် အဖိခွါတဖၣ်အကျါန့ၣ်လီၤ. အဝဲဒၣ်အခီၣ်ဟးဂီၤလီၤ.”
4 စီၤပၤသံကွၢ်ဝဲ, “အဝဲအိၣ်ဖဲလဲၣ်.”
စီၤစံဘၤစံးဆၢဝဲဒၣ်, “အိၣ်လၢဝ့ၢ်လိဒဘၢ်လၢစီၤဧမံၤအ့လးအဖိခွါစီၤမၤကံၢ် အဟံၣ်န့ၣ်လီၤ.”
5 လၢတၢ်န့ၣ်အဃိစီၤပၤစီၤဒၤဝံးမၢပှၤလဲၤကိးအီၤန့ၣ်လီၤ.
6 ဖဲစီၤစီလူးအလံၤခွါ, စီၤယိနၤသၣ်အဖိခွါ, စီၤမဖံဘိၤၡ့းဟဲတုၤဝဲန့ၣ်, အဝဲတီၤလီၤလၢစီၤဒၤဝံး အမဲာ်ညါလၢတၢ်ယူးယီၣ်အပူၤလီၤ. စီၤဒၤဝံးစံးဝဲဒၣ်, “စီၤမဖံဘိၤၡ့းဧၢ,” ဒီးအဝဲဒၣ်စံးဆၢဝဲဒၣ်, “ကစၢ်ဧၢ, နကုၢ်နပှၤလီၤ.”
7 စီၤဒၤဝံးစံးဝဲဒၣ်, “ပျံၤတၢ်တဂ့ၤ. ယကသူၣ်ကညီၤသးကညီၤ နၤလၢနပၢ်စီၤယိနၤသၣ်အဃိန့ၣ်လီၤ. ယကဟ့ၣ်ကဒါက့ၤနၤဟီၣ်ခိၣ်ကဝီၤလၢအမ့ၢ်တ့ၢ်နဖုစီၤစီလူးအတၢ် ခဲလၢာ်ဒီးနကဘၣ်တၢ်တူၢ်လိာ်မုာ်နၤလၢယတၢ်အီၣ်အစီၢ်နီၤခိၣ် တဘိယူၢ်ဃီန့ၣ်လီၤ.”
8 စီၤမဖံဘိၤၡ့းတီၤလီၤကဒီးဝဲဒီးစံးဝဲ, “တၢ်ဒိၣ်ဧၢ, ယတဂ့ၤန့ၢ်ဒံးထွံၣ်လၢအသံတဒုဘၣ်. ဘၣ်မနုၤအဃိနဘၣ်ဂ့ၤလၢယဖီခိၣ်ထဲအံၤညါန့ၣ်လဲၣ်.”
9 အန့ၣ်ဝံၤဒီးစီၤပၤကိးဃီၤစီၤစီလူးအခ့အပှၤစီၤစံဘၤ, ဒီးစံးဝဲဒၣ်, “ယဟ့ၣ်လီၤနကစၢ်အလံၤခွါစီၤမဖံဘိၤၡ့းလၢကယဲၢ်တၢ်ကိးမံၤ လၢအဘၣ်ဃးတ့ၢ်ဝဲဒီးစီၤစီလူးဒီးအဟံၣ်ဖိဃီဖိန့ၣ်လီၤ.
10 နဲဒၣ်, နဖိခွါတဖၣ်, ဒီးနကုၢ်နပှၤတဖၣ်ကထူဟီၣ်ခိၣ်ကဝီၤန့ၣ် လၢနကစၢ်စီၤစီလူးအဟံၣ်ဖိဃီဖိအဂီၢ်ဒီးဟဲစိာ်နုာ် တၢ်ကူးက့ၤအတၤသူတၤသၣ်တဖၣ်လၢကဟ့ၣ်အဝဲသ့ၣ်တၢ်အီၣ်တၢ်အီ အဂီၢ်န့ၣ်လီၤ. မ့မ့ၢ်စီၤမဖံဘိၤၡ့းအနီၢ်ကစၢ်ဒၣ်ဝဲန့ၣ်, ကမ့ၢ်ပှၤသမှံၤတဂၤလၢယတၢ်အီၣ်တၢ်အီအစီၢ်နီၤခိၣ်တဘိယူၢ်ဃီလီၤ.” (စီၤစံဘၤအိၣ်ဒီးအဖိခွါတဆံယဲၢ်ဂၤဒီးအခ့အပှၤအဂၤခံဆံ န့ၣ်လီၤ.)
11 စီၤစံဘၤစံးဆၢဝဲဒၣ်, “ယကမၤတၢ်ကိးမံၤဒဲးဒ်နဲဒၣ်ကစၢ်စီၤပၤဖးဒိၣ်ဟ့ၣ်လီၤအကလုၢ်အသိးန့ၣ်လီၤ.”
လၢတၢ်န့ၣ်အဃိ, စီၤမဖံဘိၤၡ့းအီၣ်တၢ်လၢစီၤပၤအတၢ်အီၣ်စီၢ်နီၤခိၣ်, ဒ်စီၤပၤအဖိခွါတဖၣ်အကျါတဂၤအသိးန့ၣ်လီၤ.
12 စီၤမဖံဘိၤၡ့းအိၣ်ဒီးအဖိခွါသးစၢ်တဂၤလၢအမံၤမ့ၢ်ဝဲ စီၤမံၤကါန့ၣ်လီၤ. ကယဲၢ်စီၤစံဘၤအဒူၣ်ဖိထၢဖိခဲလၢာ်ကဲထီၣ်စီၤမဖံဘိၤၡ့း အခ့အပှၤတဖၣ်န့ၣ်လီၤ.
13 မၤသးဒ်န့ၣ်ဒီး, စီၤမဖံဘိၤၡ့းလၢအခီၣ်ဟးဂီၤခံခီလိာ်န့ၣ်, အိၣ်ဝဲဆိးဝဲလၢဝ့ၢ်ယရူၤၡလ့ၣ်အပူၤ ဒီးအီၣ်အတၢ်အီၣ်ကိးဘျီဒဲးလၢစီၤပၤအစီၢ်နီၤခိၣ်န့ၣ်လီၤ.