4
1 ဖဲစီၤစီလူးအဖိခွါစီၤအံၤၡဘိၡ့းနၢ်ဟူလၢစီၤအဘံန့ၢ် ဘၣ်တၢ်မၤသံကွံာ်အီၤလၢဝ့ၢ်ဃ့ဘြိၣ်န့ၣ်အဝဲပျံၤတၢ်, ဒီးကယဲၢ်ကီၢ်အံၣ်စရ့လးအပှၤဂီၢ်မုၢ်ဖုးသံပျီၢ်သံဘၣ်မးအသးလီၤ.
2 စီၤအံၤၡဘိၡ့းအိၣ်ဒီးအသုးခိၣ်ခံဂၤလၢအမ့ၢ်သုးဖိခံဖု အခိၣ်, ပှၤဘအ့ရိးဖိလၢဘံၣ်ယၤမံၣ်အဒူၣ်ပူၤ, စီၤရံးမိၣ်အဖိခွါ, စီၤဘၤနါဒီးစီၤရ့ကးတဖၣ်လီၤ. (ပှၤဘအ့ရိးဘၣ်တၢ်ဂံၢ်ဃုာ်အီၤလၢဘံၣ်ယၤမံၣ်အဒူၣ်အကျါလီၤ.
3 အဝဲသ့ၣ်တဖၣ်မ့ၢ်ပှၤဃ့ၢ်ပူၤဖျဲးအသးဆူဝ့ၢ်ကံးတယၣ်, တၢ်လီၢ်ဖဲအဝဲသ့ၣ်အိၣ်ဆိးတ့ၢ်ဝဲ, စးထီၣ်လၢန့ၣ်လံၤလံၤလီၤ.)
4 စီၤစီလူးအစၢၤအသွဲၣ်အဂၤတဂၤမ့ၢ်ဝဲ စီၤယိနၤသၣ်အဖိခွါ စီၤမဖံဘိၡ့းလၢအသးအိၣ်ဝဲယဲၢ်နံၣ်, ဖဲစီၤစီလူးဒီးစီၤယိနၤသၣ်ဘၣ်တၢ်မၤသံအီၤအခါန့ၣ်လီၤ. ဖဲတၢ်ကစီၣ်လၢအဝဲသ့ၣ်သံအဂ့ၢ်ဟဲတုၤဝဲဆူဝ့ၢ်ယံးစရ့လးန့ၣ်, ပှၤပိာ်မုၣ်လၢအအံးထွဲကွၢ်ထွဲအီၤစိာ်ထီၣ်အီၤဒီးထွးထီၣ်ဃ့ၢ်ဝဲ, ဘၣ်ဆၣ်မ့ၢ်လၢအမၤအသးချ့ဒံးချ့ဒူးကဲာ်ဆိးအဃိ, ဖိသၣ်န့ၣ်လီၤတဲာ်ဒီးအခီၣ်ဟးဂီၤကွံာ်ဝဲဒၣ်လီၤ.
5 စီၤရ့ကးဒီးစီၤဘၤနါဟးထီၣ်လဲၤဆူစီၤအံၤၡဘိၡ့းအဟံၣ် ဒီးလဲၤတုၤဝဲဖဲန့ၣ်ဖဲမုၢ်ထူၣ်ဃၣ်ဃၣ်, ဖဲစီၤအံၤၡဘိၡ့းမံလီၤဟံးန့ၢ်မုၢ်ထူၣ်အတၢ်အိၣ်ဘှံးအိၣ် သါအခါန့ၣ်လီၤ.
6 ပိာ်မုၣ်လၢအခိးတြဲၤမံခ့တုၤအမံဘၣ်အသးဖဲအဃၤဘုကၠူၣ်အခါ န့ၣ်လီၤ. လၢတၢ်န့ၣ်အဃိစီၤရ့ကးဒီးစီၤဘၤနါလဲၤနုာ်ခူသူၣ်ဆူဟံၣ် ပူၤန့ၣ်လီၤ.
7 တုၤလၢတၢ်အိပူၤတဘျီဃီအဝဲသ့ၣ်လဲၤနုာ်ဆူစီၤအံၤၡဘိၡ့း အမံဒၢးပူၤ, ဖဲအဝဲမံဘၣ်အသးဒီးအနၢ်လီၤဝဲအခါ, ဒီးမၤသံကွံာ်အီၤန့ၣ်လီၤ. အန့ၣ်ဒီးအဝဲသ့ၣ်ကျီတဲာ်ကွံာ်အခိၣ်ဒီး က့ၤစိာ်ဝဲဒီးလဲၤတၢ်သီတနၤကျၢၤလၢထံကျိယၢ်ဒ့ၣ် အတၢ်တြီၤပူၤန့ၣ်လီၤ.
8 အဝဲသ့ၣ်က့ၤဟ့ၣ်ထီၣ်ခိၣ်သၣ်ဃံန့ၣ်ဆူစီၤပၤစီၤဒၤဝံးအအိၣ် ဖဲဝ့ၢ်ဃ့ဘြိၣ်, ဒီးစံးဘၣ်အီၤ, “အအံၤမ့ၢ်, နဒုၣ်နဒါစီၤစီလူးလၢအဃုမၤသံနၤ, အဖိခွါစီၤအံၤၡဘိၡ့း အခိၣ်န့ၣ်လီၤ. တနံၤအံၤယွၤဟ့ၣ်တၢ်ပျဲလၢကစၢ်စီၤပၤကဟ့ၣ်ကၣ် စီၤစီလူးဒီးအစၢၤအသွဲၣ်တဖၣ်အဂီၢ်န့ၣ်လီၤ.”
9 စီၤဒၤဝံးစံးဆၢအဝဲသ့ၣ်, “ယဆိၣ်တၢ်တမံၤလၢယွၤလၢအမူဝဲ, လၢအအုၣ်က့ၤခီၣ်က့ၤယၤလၢကယဲၢ်တၢ်ဘၣ်ယိၣ်ဘၣ်ဘီခဲလၢာ်တဂၤ အမံၤအပူၤလီၤ.
10 ပှၤစိာ်တၢ်ကစီၣ်တဂၤလၢအဟဲဆူယအိၣ်ဖဲဝ့ၢ်စိကလး ဒီးတဲဘၣ်တ့ၢ်ယၤလၢစီၤစီလူးအတၢ်သံအဂ့ၢ်န့ၣ် အဝဲဆိကမိၣ်ဝဲလၢအဟဲစိာ်န့ၢ်ယၤတၢ်ကစီၣ်အဂ့ၤန့ၣ်လီၤ. ယဖီၣ်အီၤဒီးမၢတၢ်မၤသံကွံာ်အီၤန့ၣ်လီၤ. တၢ်န့ၣ်မ့ၢ်ယတၢ်ဟ့ၣ်ဘျုးက့ၤအီၤလၢအဝဲတၢ်ကစီၣ်အဂ့ၤအဃိန့ၣ်လီၤ.
11 ပှၤအၢဖိတဖၣ်လၢအမၤသံကွံာ် ပှၤတဂၤလၢအတၢ်ကမၣ်တအိၣ်ဘၣ်ဒီးမံဘၣ်အသးလၢအဟံၣ်ဒၣ်ဝဲအပူၤန့ၣ်, တၢ်ကဘၣ်အီၤနးန့ၢ်အန့ၣ်တက့ၢ်ဆံးဒိၣ်လဲၣ်. ခဲအံၤယကဟ့ၣ်ကၣ်သုလၢသုတၢ်မၤသံအီၤအဃိဒီး တြူာ်ကွံာ်သုလၢဟီၣ်ခိၣ်အမဲာ်ဖံးခိၣ်န့ၣ်လီၤ.”
12 စီၤဒၤဝံးဟ့ၣ်လီၤအကလုၢ်ဒီးအဝဲအပှၤသုးဖိတဖၣ်မၤသံကွံာ် စီၤရ့ကးဒီးစီၤဘၤနါ, ဒီးဒီၣ်တဲာ်ကွံာ်အဝဲသ့ၣ်အစုတဖၣ်ဒီးအခိၣ်တဖၣ်ဒီးဘျးထီၣ် အဝဲသ့ၣ်အစိၣ်တဖၣ်လၢနိၣ်အိၣ်လၢဝ့ၢ်ဃ့ဘြိၣ်အပူၤအကပၤန့ၣ် လီၤ. အဝဲသ့ၣ်ဟံးထီၣ်စီၤအံၤၡဘိၡ့းအခိၣ်ဒီးဘျၢလီၤအီၤဖဲ စီၤအဘံန့ၢ်အသွၣ်ခိၣ်လၢဝ့ၢ်ဃ့ဘြိၣ်အပူၤန့ၣ်လီၤ.