13
1 စီၤဒၤဝံးအဖိခွါစီၤအးဘၡါလိၣ်အိၣ်ဒီးအဒီပုၢ်ဝဲၢ်မုၣ်, မုၣ်ကနီၤဃံလၤတဂၤလၢအမံၤမ့ၢ်ဝဲနီၢ်တၤမၢ်န့ၣ်လီၤ. စီၤဒၤဝံးအဖိခွါအဂၤတဂၤလၢအမံၤမ့ၢ်ဝဲစီၤအၤမနိၣ် အဲၣ်ဘၣ်ဝဲဒၣ်ပိာ်မုၣ်န့ၣ်လီၤ.
2 အဝဲဒၣ်အဲၣ်ဘၣ်အီၤတုၤဒၣ်လဲာ်အဆါထီၣ်ဘၣ်မးအသးန့ၣ်လီၤ. အဂ့ၢ်ဒ်အံၤ, ဖျါလၢအဝဲအဂီၢ်လၢတညီလၢကမၤန့ၢ်အီၤဘၣ်. ဒ်မုၣ်ကနီၤတဂၤအသိးအဝဲဘၣ်တၢ်တြီအီၤ ဒ်သိးအသုတထံၣ်လိာ်ဒီးပိာ်ခွါတဖၣ်တဂ့ၤန့ၣ်လီၤ.
3 ဘၣ်ဆၣ်ဒီးအဝဲအိၣ်ဒီးအတံၤသကိးတဂၤလၢအဘူးဒီးအီၤ ဒီးအသးဒူမးလၢအမံၤမ့ၢ်ဝဲစီၤယိၤနဒာ်, စီၤဒၤဝံးအဒီပုၢ်ဝဲၢ်ခွါစီၤၡံမၤအဖိခွါန့ၣ်လီၤ.
4 စီၤယိၤနဒာ်စံးဘၣ်စီၤအၤမနိၣ်ဒ်အံၤ, “နမ့ၢ်စီၤပၤအဖိခွါတဂၤ, ဘၣ်ဆၣ်ဒီးယကွၢ်နၤတနံၤဘၣ်တနံၤန့ၣ်နဖျါသူၣ်အုးသးအုးနဲလီၤ. ဘၣ်မနုၤအဃိလဲၣ်.”
အဝဲစံးဆၢဝဲဒၣ်, “ယအဲၣ်ဘၣ်နီၢ်တၤမၢ်လၢအမ့ၢ်ယဒီပုၢ်ဝဲၢ်ခွါလၢအမိၢ်လီၤဆီဒီးယမိၢ်, စီၤအးဘၡါလိၣ်အဒီပုၢ်ဝဲၢ်မုၣ်န့ၣ်လီၤ.”
5 စီၤယိနဒာ်စံးဘၣ်အီၤ, “ပာ်မၤနသးဒ်နဆူးနဆါအသိးဒီးမံလီၤလၢလီၢ်မံဖီခိၣ်တက့ၢ်. ဖဲနပၢ်ဟဲဒ်သိးကကွၢ်နၤန့ၣ်တဲဘၣ်အီၤလၢ ဝံသးစူၤမၢယဒီပုၢ်ဝဲၢ်မုၣ်နီၢ်တၤမၢ်ဟဲဒီးဒုးအီၣ်ယၤတၢ်အီၣ်တက့ၢ်. ယအဲၣ်ဒိးလၢအဝဲကကတဲာ်ကတီၤတၢ်အီၣ်တၢ်အီဖဲအံၤ, ဖဲယထံၣ်ဘၣ်အီၤသ့ဒီးဒုးအီၣ်ယၤလၢအနီၢ်ကစၢ်ဒၣ်ဝဲန့ၣ်လီၤ.”
6 လၢတၢ်န့ၣ်အဃိ, စီၤအၤမနိၣ်ပာ်မၤအသးဒ်အဆူးဝဲဆါဝဲအသိးဒီး မံဝဲလၢအလီၢ်မံဖီခိၣ်န့ၣ်လီၤ.
စီၤပၤဒၤဝံးလဲၤကွၢ်အီၤဒီးစီၤအၤမနိၣ်တဲဘၣ်အီၤဒ်အံၤ, “ဝံသးစူၤပျဲနီၢ်တၤမၢ်ဟဲမၤန့ၢ်ယၤကိၣ်တနီၤဖဲအံၤ, ဖဲယထံၣ်ဘၣ်အီၤသ့ဝံၤဒီးဒုးအီၣ်ယၤကိၣ်န့ၣ်လၢအနီၢ်ကစၢ်ဒၣ်ဝဲတက့ၢ်.”
7 အန့ၣ်ဒီး, စီၤဒၤဝံးမၢပှၤလဲၤတဲဘၣ်နီၢ်တၤမၢ်လၢအအိၣ်လၢ စီၤပၤအနူၢ်ပူၤစီၤပူၤန့ၣ်, လၢကလဲၤဆူစီၤအၤမနိၣ်အဟံၣ် ဒီးကတဲာ်ကတီၤန့ၢ်အီၤတၢ်အီၣ်တၢ်အီတနီၤန့ၣ်လီၤ.
8 ပိာ်မုၣ်န့ၣ်လဲၤဝဲဖဲန့ၣ်ဒီးထံၣ်စီၤအၤမနိၣ်လၢအမံလီၤလၢလီၢ်မံခိၣ်လီၤ. အဝဲဟံးန့ၢ်ကိၣ်ကမူၣ်တနီၤ, ကတဲာ်ကတီၤအီၤ, ဝံၤဒီးမၤကိၣ်တနီၤဖဲန့ၣ်, ဖဲအဝဲထံၣ်အီၤသ့အလီၢ်န့ၣ်လီၤ. အန့ၣ်ဝံၤဒီးအဝဲကုၢ်ထီၣ်ကိၣ်တဖၣ်န့ၣ်,
9 ဒီးထုးထီၣ်ကိၣ်တဖၣ်န့ၣ်လၢသပၢၤဘံၣ်သဘၣ်အပူၤလၢစီၤအၤမနိၣ် ကအီၣ်ဝဲအဂီၢ်န့ၣ်လီၤ. ဘၣ်ဆၣ်ဒီးအဝဲတအီၣ်ဝဲဘၣ်. အဝဲစံးဝဲဒၣ်, “မၢပှၤကိးဂၤဟးထီၣ်ကွံာ်တက့ၢ်.” ဒီးပှၤကိးဂၤဒဲးဟးထီၣ်ကွံာ်ဝဲလီၤ.
10 တုၤနုၤတစုအဝဲဒၣ်စံးဘၣ်ပိာ်မုၣ်န့ၣ်, “ဟဲစိာ်ကိၣ်တဖၣ်ဖဲ အံၤဆူယလီၢ်မံဒီးဒုးအီၣ်ယၤလၢနနီၢ်ကစၢ်ဒၣ်နဲတက့ၢ်.” ပိာ်မုၣ်န့ၣ်စိာ်ထီၣ်ကိၣ်တဖၣ်ဒီးလဲၤဆူအဝဲအအိၣ်လီၤ.
11 ဖဲအဝဲဟ့ၣ်အီၤလၢကိၣ်တဖၣ်အခါန့ၣ်, စီၤအၤမနိၣ်စှီၤတံၢ်ဃးအီၤဒီးစံးဝဲဒၣ်, “ဟဲမံဃုာ်ဒီးယၤတက့ၢ်.”
12 နီၢ်တၤမၢ်စံးဝဲဒၣ်, “တသ့ဘၣ်. မၤဆူၣ်မၤနၢၤယၤဒ်သိးယကမၤ တၢ်လီၤရၢၢ်လီၤစၢၢ်တမံၤန့ၣ်တဂ့ၤ. တၢ်န့ၣ်မ့ၢ်တၢ်ဒဲးဘးလၢအလီၤပျံၤဒိၣ်မးလီၤ.
13 ယကမိာ်ထီၣ်ယခိၣ်လၢပှၤကမျၢၢ်အမဲာ်ညါကသ့ကဒီးဒ်လဲၣ်. ဒီးနဲဒၣ်, နကဘၣ်တၢ်မဲာ်ဆှးလၢာ်လၢာ်ဆ့ဆ့ လၢကီၢ်အံၣ်စရ့လးအပူၤန့ၣ်လီၤ. ဝံသးစူၤကတိၤတၢ်ဒီးစီၤပၤတက့ၢ်. ယနာ်သပှၢ်တၢၢ်လၢအဝဲကဟ့ၣ်လီၤယၤဆူနအိၣ်န့ၣ်လီၤ.”
14 ဘၣ်ဆၣ်ဒီးအဝဲတကနၣ်ဘၣ်ပိာ်မုၣ်န့ၣ်ဘၣ်. ဒီးမ့ၢ်လၢအဝဲအဂံၢ်အဘါဆူၣ်န့ၢ်ပိာ်မုၣ်န့ၣ်အဃိ အဝဲမၤနၢၤကွံာ်အီၤဒီးမၤဆူၣ်မၤစိးအီၤန့ၣ်လီၤ.
15 တၢ်န့ၣ်အလီၢ်ခံ, စီၤအၤမနိၣ်ပှဲၤဒီးတၢ်သးဟ့ပိာ်မုၣ်န့ၣ်ဒိၣ်မးလီၤ. အဝဲအတၢ်သးဟ့အီၤခဲအံၤန့ၣ်, အါန့ၢ်ဒံးအဝဲအတၢ်အဲၣ်တ့ၢ်အီၤ လၢညါန့ၣ်လီၤ. အဝဲစံးဘၣ်ပိာ်မုၣ်န့ၣ်, “ဟးထီၣ်ကွံာ်တက့ၢ်.”
16 နီၢ်တၤမၢ်စံးဆၢအီၤ, “တသ့ဘၣ်. တၢ်ဒုးဟးထီၣ်ကွံာ်ယၤဒ်သိးအံၤန့ၣ် မ့ၢ်တၢ်ကမၣ်လၢအဒိၣ်န့ၢ်ဒံးတၢ်လၢနမၤတ့ၢ်လံအီၤန့ၣ်လီၤ.”
ဘၣ်ဆၣ်ဒီးစီၤအၤမနိၣ်တကနၣ်ဃုာ်အီၤဘၣ်.
17 စီၤအၤမနိၣ်ကိးနုာ်အခ့အပှၤဒၣ်ဝဲဒီးစံးဒၣ်, “ထုးထီၣ်ကွံာ်ပိာ်မုၣ်အံၤလၢယမဲာ်ညါတက့ၢ်. ဟီထီၣ်ကွံာ်အီၤဆူတၢ်ချၢဃံဒီးသိးတံာ်ဃာ်တြဲၤတက့ၢ်.”
18 တၢ်ခ့တၢ်ပှၤတဖၣ်ထုးထီၣ်ကွံာ်ပိာ်မုၣ်န့ၣ်ဒီးသိးဃာ်တြဲၤန့ၣ်လီၤ. နီၢ်တၤမၢ်ကူသိးဝဲဆ့ကၤဖးထီတဘ့ၣ်လၢအအိၣ်ဒီးအစုဖးထီ, လၢညီနူၢ်နီၢ်ပၤမုၣ်ဖိမုၣ်ကနီၤတဂၤဖဲစိၤအဝဲန့ၣ်, ကူသိးဝဲန့ၣ်လီၤ.
19 အဝဲဖှံလီၤဖၣ်ဆါတဖၣ်လၢအခိၣ်လိၤ, ဖှီယာ်အဆ့ကၤဖးထီ ဒီးမၤဘၢအမဲာ်သၣ်လၢအစုတဖၣ်ဒီးဟးထီၣ်ကွံာ်လၢတၢ်ဟီၣ်တၢ်ယၢၤ အပူၤန့ၣ်လီၤ.
20 ဖဲအဒီပုၢ်ဝဲၢ်ခွါစီၤအၤဘၡါလိၣ်ထံၣ်အီၤန့ၣ်အဝဲသံကွၢ်အီၤ, “မ့ၢ်စီၤအၤမနိၣ်မၤတရီတပါနၤန့ၣ်ဧါ. ဝံသးစူၤလီၤ, ပျဲတၢ်မၤအသးန့ၣ်မၤတံာ်တာ်နသးနးကဲၣ်ဆိးတဂ့ၤ, ယဒီပုၢ်ဝဲၢ်မုၣ်ဧၢ. အဝဲမ့ၢ်နဒီပုၢ်ဝဲၢ်ခွါလၢအမိၢ်တမ့ၢ်တမိၢ်ဃီဘၣ်အဃိ, တဲဘၣ်ပှၤနီတဂၤလၢတၢ်ဂ့ၢ်အံၤတဂ့ၤ.” လၢတၢ်န့ၣ်အဃိ, နီၢ်တၤမၢ်အိၣ်ဆိးဝဲလၢစီၤအးဘၡါလိၣ်အဟံၣ်ပူၤ, ပှဲၤဒီးတၢ်သူၣ်အုးသးအုးဒီးတၢ်သယုၢ်သညိန့ၣ်လီၤ.
21 ဖဲစီၤပၤဒၤဝံးနၢ်ဟူဘၣ်တၢ်လၢအမၤတ့ၢ်အသးန့ၣ်, အဝဲအသးထီၣ်ကဲၤဝဲနးနးကလဲာ်န့ၣ်လီၤ.
22 ဒီးစီၤအးဘၡါလိၣ်သးဟ့ကွံာ်ဝဲစီၤအၤမနိၣ်နးမး, လၢအမၤတရီတပါအပုၢ်ပိာ်မုၣ်နီၢ်တၤမၢ်အဃိ, တုၤဒၣ်လဲာ်တကတိၤလၢၤတၢ်ဒီးအီၤနီတစုလၢၤဘၣ်န့ၣ်လီၤ.
23 ခံနံၣ်ပူၤကွံာ်အလီၢ်ခံန့ၣ် စီၤအးဘၡါလိၣ်အိၣ်ဒီးအတၢ်တံာ်အသိတဖၣ်အဆူၣ်ဖဲဝ့ၢ်ဘဧၤလးဃါစိၢ်, ဘူးဒီးဝ့ၢ်အ့ဖရဲၣ်အဃၢၤဒီး အဝဲကွဲမုာ်ကယဲၢ်စီၤပၤအဖိခွါတဖၣ်လၢအကဟဲဖဲန့ၣ်လီၤ.
24 အဝဲလဲၤဝဲဆူစီၤပၤဒၤဝံးအအိၣ်, ဒီးစံးဝဲဒၣ်, “နဲဒၣ်တၢ်ဒိၣ်ကစၢ်စီၤပၤဧၢ, ပှၤတံာ်သိဆူၣ်တဖၣ်ဟဲဝဲလၢ ကတံာ်န့ၢ်ယၤလၢယသိတဖၣ်အဆူၣ်လီၤ. မ့ၢ်နၤဒီးနပဒိၣ်ပပှၢ်တဖၣ်ကဟဲဝဲဒီးမၤဃုာ်သကိးတၢ်ဒီးယၤလၢ မူးတဖၣ်အံၤအပူၤဧါ.”
25 စီၤပၤစံးဆၢဝဲဒၣ်, “တသ့ဘၣ်, ယဖိခွါဧၢ, ပမ့ၢ်လဲၤခဲလၢာ်ဒီးကကဲထီၣ်တၢ်ကီတၢ်ခဲဒိၣ်ကဲာ်ဆိးလၢနဂီၢ်န့ၣ်လီၤ.” စီၤအးဘၡါလိၣ်တဲအီၤသပှၢ်ပှၢ်ဘၣ်ဆၣ်ဒီး စီၤပၤတအၢၣ်လီၤဝဲဘၣ်. ဒီးအဝဲမၢစီၤအးဘၡါလိၣ်ဟးထီၣ်ကွံာ်ဝဲန့ၣ်လီၤ.
26 ဘၣ်ဆၣ်, စီၤအးဘၡါလိၣ်စံးအီၤ, “ဂ့ၤလံ. မ့မ့ၢ်ဒ်န့ၣ်ဒီး, အစှၤကတၢၢ်မ်နကပျဲယဒီပုၢ်ဝဲၢ်ခွါစီၤအၤမနိၣ်ဟဲတက့ၢ်.” စီၤပၤသံကွၢ်အီၤ,
“ဘၣ်မနုၤလၢအဝဲကဘၣ်လဲၤဝဲန့ၣ်လဲၣ်.”
27 ဘၣ်ဆၣ်ဒီးစီၤအးဘၡါလိၣ်တခီတဲထွဲဒံးအီၤသပှၢ်ပှၢ်, တုၤဒၣ်လဲာ်လၢခံကတၢၢ်န့ၣ်, စီၤပၤဒၤဝံးပျဲစီၤအၤမနိၣ်ဒီး အဖိခွါအဂၤတဖၣ်ခဲလၢာ်လဲၤဃုာ်တၢ်ဒီးစီၤအးဘၡါလိၣ်န့ၣ်လီၤ. စီၤအးဘၡါလိၣ်ကတဲာ်ကတီၤတၢ်အီၣ်အမူးတမူး လၢအကြၢးဝဲလၢစီၤပၤတဂၤအဂီၢ်,
28 ဒီးမၤလိာ်ပိာ်လီၤအခ့အပှၤတဖၣ်ဒ်အံၤ, ဖဲစီၤအၤမနိၣ် မုာ်လၤလၢတၢ်အီစပံးထံအါမးအခါန့ၣ်, ပာ်သူၣ်ပာ်သး, ဒီးတုၤယဟ့ၣ်လီၤယကလုၢ်န့ၣ်, မၤသံကွံာ်အီၤတက့ၢ်. ပျံၤတၢ်တဂ့ၤ. ယကဟံးန့ၢ်မူဒါလၢယနီၢ်ကစၢ်ဒၣ်ယဲလီၤ. အိၣ်ဒီးတၢ်သးဒူဒီးမၤသုသးယၢ်တံၢ်ယၢ်တၢၤတဂ့ၤ.
29 လၢတၢ်န့ၣ်အဃိတၢ်ခ့တၢ်ပှၤတဖၣ်မၤထွဲစီၤအၤဘၡါလိၣ်အတၢ်မၤလိာ်ပိာ်လီၤတဖၣ် ဒီးမၤသံကွံာ်စီၤအၤမနိၣ်န့ၣ်လီၤ. ကယဲၢ်စီၤဒၤဝံးအဖိခွါအဂၤတဖၣ်ဒိးထီၣ်အကသ့ၣ်ဒီးထွးထီၣ်ဃ့ၢ်ကွံာ်ဝဲဒၣ်န့ၣ်လီၤ.
30 ဖဲအဝဲသ့ၣ်အိၣ်လၢကျဲလၢတၢ်က့ၤဆူဟံၣ်အဖၢမုၢ်န့ၣ်, စီၤဒၤဝံးဘၣ်တၢ်တဲအီၤ, “စီၤအးဘၡါလိၣ်မၤသံကွံာ်နဖိခွါခဲလၢာ်လံ. တအိၣ်တ့ၢ်နီတဂၤလၢၤဘၣ်.”
31 စီၤပၤဂဲၤဆၢထၢၣ်ဝဲ, ဖှီအကူအသိးတဖၣ်လၢတၢ်သးအုးအပူၤဒီး စုးလီၤအသးဆူဟီၣ်ခိၣ်လိၤန့ၣ်လီၤ. တၢ်ခ့တၢ်ပှၤတဖၣ်လၢအအိၣ်ဒီးအီၤဖဲန့ၣ်စ့ၢ်ကီးဖှီအကူအသိးတဖၣ်န့ၣ်လီၤ.
32 ဘၣ်ဆၣ်ဒီးစီၤဒၤဝံးအဒီပုၢ်ဝဲခွါစီၤၡံမၤအဖိခွါစီၤယိၤနဒာ်စံးဝဲဒၣ်, “နဲဒၣ်တၢ်ဒိၣ်ကစၢ်စီၤပၤဧၢ, အဝဲတမၤသံကွံာ်ဘၣ်နဖိခွါခဲလၢာ်ဘၣ်. ထဲဒၣ်စီၤအၤမနိၣ်တဂၤဧိၤသံဝဲလီၤ. ခီဖျိနကွၢ်ဃီၤစီၤအးဘၡါလိၣ်န့ၣ်, နတဲသ့လၢအဝဲပာ်လီၤတ့ၢ်လံအသးလၢကမၤတၢ်အံၤစးထီၣ်ဒၣ်လဲာ်လၢ စီၤအၤမနိၣ်မၤဆူၣ်မၤစိးအဝဲအဒီပုၢ်ဝဲၢ်မုၣ်နီၢ်တၤမၢ်အကတီၢ်လံၤလံၤန့ၣ်လီၤ.
33 လၢတၢ်န့ၣ်အဃိ, နာ်တၢ်ကစီၣ်လၢအစံးဝဲလၢ နဖိခွါခဲလၢာ်သံလံန့ၣ်တဂ့ၤ. ပှၤဘၣ်တၢ်မၤသံအီၤထဲစီၤအၤမနိၣ်တဂၤဧိၤန့ၣ်လီၤ.”
34 အကတီၢ်ဖဲန့ၣ်, စီၤအးဘၡါလိၣ်ထွးထီၣ်ဃ့ၢ်ကွံာ်ဝဲဒၣ်န့ၣ်လီၤ.
တကီၢ်ခါဖဲန့ၣ်, ပှၤသုးဖိတဂၤလၢအမူဒါလီၤဝဲလၢခိးတၢ်အလီၢ်န့ၣ်, ထံၣ်ဘၣ်ပှၤဂီၢ်မုၢ်ဖးဒိၣ်တဖုဟဲလီၤလၢတၢ်လူၢ်ဒီခိၣ်လၢကျဲ လၢအဟဲဝဲလၢဝ့ၢ်ဃိရနဲၣ်တခီန့ၣ်လီၤ. အဝဲလဲၤဆူစီၤပၤအအိၣ်ဒီးတဲသ့ၣ်ညါအီၤတၢ်လၢအထံၣ်ဘၣ်တ့ၢ်ဝဲတဖၣ်န့ၣ်လီၤ.
35 စီၤယိၤနဒာ်စံးဘၣ်စီၤဒၤဝံး, “ပှၤဟဲလၢန့ၣ်တဖၣ်န့ၢ်မ့ၢ်နဖိခွါတဖၣ်, ဒ်ယတဲတ့ၢ်နၤလၢအဝဲသ့ၣ်ကဟဲက့ၤဝဲအသိးန့ၣ်လီၤ.”
36 ဖဲအဝဲကတိၤတၢ်အံၤဝံၤတဘျီဃီန့ၣ်, စီၤဒၤဝံးအဖိခွါတဖၣ်ဟဲက့ၤနုာ်လီၤဝဲလီၤ. အဝဲသ့ၣ်စးထီၣ်ဟီၣ်ဝဲယၢၤဝဲ, ဒီးစီၤဒၤဝံးဒီးအပဒိၣ်ပပှၢ်တဖၣ်ဟီၣ်စ့ၢ်ကီးဝဲနးမးလီၤ.
37 စီၤအးဘၡါလိၣ်ဃ့ၢ်ပူၤဖျဲးအသးဒီးလဲၤဝဲဆူစီၤဧးမံၤဟူးအဖိခွါ, ဝ့ၢ်ကၡူၢ်အစီၤပၤ, စီၤတးလမဲအအိၣ်န့ၣ်လီၤ.
38 အဝဲလဲၤအိၣ်ဖဲန့ၣ်သၢနံၣ်န့ၣ်လီၤ. စီၤဒၤဝံးဟီၣ်ဝဲယၢၤဝဲလၢတၢ်သးအုးအပူၤဖးယံာ်, လၢအဖိခွါစီၤအၤမနိၣ်အဃိန့ၣ်လီၤ.
39 ဘၣ်ဆၣ်ဒီးဖဲအဝဲအသးမုာ်ထီၣ်က့ၤလၢစီၤအၤမနိၣ်အတၢ်သံဝံၤန့ၣ်, အဝဲအသးပူၤပှဲၤဒီးတၢ်သးသယုၢ်ဘၣ်အဖိခွါစီၤအးဘၡါလိၣ်န့ၣ်လီၤ.