11
1 လၢခံတနံၣ်ဖဲတၢ်မဲထီၣ်သီအကတီၢ်, ဖဲတၢ်ဆၢကတီၢ်လၢစီၤပၤ ညီနူုၢ်လဲၤထီၣ်ဆူတၢ်ဒုးတၢ်ယၤအခါန့ၣ်, စီၤဒၤဝံးဆှၢလီၤစီၤယိၤအာ်ဃုာ်ဒီးအသုးခိၣ်သုးနၢ်တဖၣ် ဒီးကီၢ်အံၣ်စရ့လးအသုးမုၢ်လၢကလဲၤထီၣ်ဒုးတၢ်အဂီၢ်န့ၣ်လီၤ. အဝဲသ့ၣ်မၤနၢၤကွံာ်ပှၤဧၣ်မိၣ်ဖိတဖၣ်, ဒီးကဝီၤဃးဝ့ၢ်ရးဘၤ န့ၣ်လီၤ. ဘၣ်ဆၣ်ဒီးစီၤဒၤဝံးအကစၢ်ဒၣ်ဝဲအိၣ်တ့ၢ်ဒၣ်လၢဝ့ၢ်ယရူၤၡလ့ၣ် အပူၤလီၤ.
2 ဘၣ်မုၢ်တနံၤ, ဖဲမုၢ်ဃ့ၢ်လီၤလၢဟါခီအကတီၢ်န့ၣ်, စီၤဒၤဝံးဂဲၤဆၢထၢၣ်ဝဲလၢအတၢ်မံတရ့ဝံၤဒီးလဲၤထီၣ်ဝဲဆူ အနူၢ်အစီၤအခိၣ်ဒုးလီၤ. ဖဲအဝဲဟးဝ့ၤဝီၤဖဲတၢ်ဖီခိၣ်အ ခါ, အဝဲထံၣ်ဘၣ်ပိာ်မုၣ်တဂၤလုၣ်ထံလၢအဟံၣ်ပူၤန့ၣ်လီၤ. ပိာ်မုၣ်န့ၣ်ဒိၣ်တၢ်ဃံလၤဒိၣ်မးလီၤ.
3 လၢတၢ်န့ၣ်အဃိ, အဝဲပျဲလီၤပှၤစိာ်တၢ်ကစီၣ်တဂၤဒ်သိးကလဲၤဃုသ့ၣ်ညါပိာ်မုၣ်န့ၣ်မ့ၢ်မတၤလဲၣ် ဒီးသ့ၣ်ညါဘၣ်ဝဲလၢပိာ်မုၣ်န့ၣ်မ့ၢ် စီၤအလံဧၣ်အဖိမုၣ်, ဒီးပှၤဃ့ၤသးဖိစီၤအူၤရံယၤအမါနီၢ်ဘၤသၡ့ဘၤန့ၣ်လီၤ.
4 စီၤဒၤဝံးပျဲလီၤအပှၤစိာ်တၢ်ကစီၣ်တဖၣ် လၢကလဲၤကိးပိာ်မုၣ်န့ၣ်လီၤ. အဝဲသ့ၣ်ဟဲက့ၤစိာ်ပိာ်မုၣ်န့ၣ်ဆူအဝဲအအိၣ်ဒီးအဝဲဒၣ်မံဃုာ်ဂဲၤဃုာ်ဒီးအီၤလီၤ. (ပိာ်မုၣ်န့ၣ်မၤကဆှီအသးဝံၤသီသီလၢပိာ်မုၣ်အလုၢ်အလၢ်တလါတဘျီန့ၣ်လီၤ.) အန့ၣ်ဝံၤဒီးပိာ်မုၣ်န့ၣ်က့ၤကဒါက့ၤဆူအဟံၣ်န့ၣ်လီၤ.
5 လၢခံဒီးပိာ်မုၣ်န့ၣ်သ့ၣ်ညါဘၣ်ဝဲလၢအဝဲအိၣ်ထီၣ်လံဒီးအဟုးအသး, ဒီးဆှၢလီၤတၢ်ကစီၣ်တမံၤဆူစီၤဒၤဝံးအအိၣ်လၢပှၤကတဲဘၣ်အီၤ အဂီၢ်န့ၣ်လီၤ.
6 အန့ၣ်တစု, စီၤဒၤဝံးဆှၢလီၤတၢ်ကစီၣ်တမံၤဆူစီၤယိၤအာ် အအိၣ်စံးဝဲ, “ဆှၢလီၤန့ၢ်ယၤပှၤဃ့ၤသးဖိစီၤအူၤရံယၤတက့ၢ်.” လၢတၢ်န့ၣ်အဃိ, စီၤယိၤအာ်ဆှၢလီၤအီၤဆူစီၤဒၤဝံးအအိၣ်န့ၣ်လီၤ.
7 ဖဲစီၤအူၤရံယၤဟဲက့ၤတုၤဝဲန့ၣ်, စီၤဒၤဝံးသံကွၢ်အီၤလၢ, မ့ၢ်စီၤယိၤအာ်ဒီးသုးဖိသံၣ်ဖိတဖၣ်အိၣ်မုာ်အိၣ်ခုၣ်ကစီဒီဧါ ဒီးတၢ်ဒုးတၢ်ယၤမၤအသးဒ်လဲၣ်အဂ့ၢ်န့ၣ်လီၤ.
8 အန့ၣ်ဝံၤဒီး, အဝဲစံးဘၣ်စီၤအူၤရံယၤ, က့ၤဆူနဟံၣ်ဒီးအိၣ်ဘှံးတစိၢ်တလီၢ်တက့ၢ်. စီၤအူၤရံယၤဟးထီၣ်ဝဲ ဒီးစီၤဒၤဝံးဆှၢလီၤတၢ်ဟ့ၣ်တမံၤဆူအဟံၣ်န့ၣ်လီၤ.
9 ဘၣ်ဆၣ်ဒီးစီၤအူၤရံယၤတက့ၤဆူအဟံၣ်ဘၣ်. အခိၣ်တလိာ်အဝဲမံသကိးဖဲစီၤပၤအနီအကျဲစၢၤဒီးစီၤပၤအပှၤပၢၤတၢ်တဖၣ်န့ၣ်လီၤ.
10 ဖဲစီၤပၤနၢ်ဟူဘၣ်လၢစီၤအူၤရံယၤတက့ၤဆူအဟံၣ်ဘၣ်န့ၣ်အဝဲသံကွၢ်အီၤ, “နဟဲက့ၤကဒါဒံးဒၣ်သီသီလၢနဟးဖးယံၤဒီးနဟံၣ်ဖးယံာ်ဝံၤ အလီၢ်ခံလီၤ. ဘၣ်မနုၤနတက့ၤဆူနဟံၣ်န့ၣ်လဲၣ်.”
11 စီၤအူၤရံယၤစံးဆၢဝဲဒၣ်, “ကီၢ်အံၣ်စရ့လးဒီးကီၢ်ယူဒၤအသုးဖိတဖၣ်အိၣ်ယံၤဝဲလၢတၢ်ဒုးပျီအပူၤ, ဒီးယွၤအတၢ်အၢၣ်လီၤအီလီၤအတလါစီဆှံအိၣ်ဒီးအဝဲသ့ၣ်လီၤ. ယသုးခိၣ်ကျၢၢ်စီၤယိၤအာ်ဒီးအသုးခိၣ်သုးနၢ်တဖၣ်သူၣ်အဒဲလၢ တၢ်ပျီပူၤန့ၣ်လီၤ. ယကက့ၤဆူဟံၣ်ဒီးအီၣ်တၢ်အီတၢ်ဒီးမံဃုာ်ဒီးယမါကသ့ဒ်လဲၣ်. ယဆိၣ်လီၤယသးလၢတၢ်စီတၢ်ဆှံအပူၤလၢယမၤတၢ်ဒ်န့ၣ်တမံၤတသ့နီတစဲးဘၣ်.”
12 မၤသးဒ်န့ၣ်ဒီးစီၤဒၤဝံးစံးဝဲ, “မ့မ့ၢ်ဒ်န့ၣ်အဃိဒီး, တၢ်ဆၢကတီၢ်လၢအအိၣ်ဒံးဝဲလၢတနံၤအံၤန့ၣ်အိၣ်ဖဲအံၤတက့ၢ်. ဒီးခဲမုၢ်ဆ့ၣ်တနံၤန့ၣ်ယကဆှၢကဒါက့ၤနၤလီၤ. လၢတၢ်န့ၣ်အဃိစီၤအူၤရံယၤအိၣ်ဝဲလၢဝ့ၢ်ယရူၤၡလ့ၣ်အပူၤလၢ မုၢ်တနံၤန့ၣ်ဒီးလၢခံတနံၤလီၤ.
13 စီၤဒၤဝံးကွဲအီၤဆူဟါအတၢ်အီၣ်ဒီးဒုးအီမူၤအီၤလၢသံးလီၤ. ဘၣ်ဆၣ်ဒီးအနၤအဝဲန့ၣ်စ့ၢ်ကီးစီၤအူၤရံယၤတက့ၤဆူအဟံၣ်ဘၣ်. အခိၣ်တလိာ်, အဝဲမံဒၣ်လၢအလီၢ်မံအဖီခိၣ်လၢစီၤပၤအနူၢ်ပူၤဖဲပှၤခိးတၢ်ဖိအဒၢးပူၤန့ၣ်လီၤ.
14 မုၢ်ဆ့ၣ်ထီၣ်တဂီၤန့ၣ်, စီၤဒၤဝံးကွဲးတၢ်ပရၢတဘ့ၣ်ဆူစီၤယိၤအာ်အအိၣ် ဒီးဆှၢလီၤအီၤခီဖျိစီၤအူၤရံယၤန့ၣ်လီၤ.
15 အဝဲကွဲးဝဲဒၣ်, “ပာ်လီၤစီၤအူၤရံယၤလၢတၢ်မဲာ်ညါဖဲတၢ်ဒုးဆူၣ်ကတၢၢ်အလီၢ်, ဒီးဂုၤက့ၤသုဝဲဆူတၢ်လီၢ်ခံဒီးပျဲတၢ်မၤသံကွံာ်အီၤတက့ၢ်.”
16 လၢတၢ်န့ၣ်အဃိ, ဖဲစီၤယိၤအာ်ကဝီၤဃာ်ဝ့ၢ်တဖျၢၣ်အခါန့ၣ်, အဝဲဆှၢလီၤစီၤအူၤရံယၤဆူတၢ်လီၢ်တတီၤလၢအသ့ၣ်ညါဝဲလၢ မ့ၢ်တၢ်လီၢ်ဖဲဒုၣ်ဒါအဂံၢ်အဘါဆူၣ်ဝဲအလီၢ်န့ၣ်လီၤ.
17 ဒုၣ်ဒါအသုးဖိတဖၣ်ဟဲထီၣ်လၢဝ့ၢ်ပူၤဒီးဒုးစီၤယိၤအာ်အသုးမုၢ်တဖၣ်န့ၣ်လီၤ. စီၤဒၤဝံးအသုးခိၣ်တနီၤသံဝဲဒီးစီၤအူၤရံယၤစ့ၢ်ကီးသံဝဲဒၣ်န့ၣ်လီၤ.
18 အန့ၣ်တစု, စီၤယိၤအာ်ဆှၢလီၤတၢ်ဒုးတၢ်ယၤအတၢ်ကစီၣ်အလၢအပှဲၤဆူစီၤဒၤဝံးအအိၣ်,
19 ဒီးအဝဲမၤလိာ်ပှၤစိာ်တၢ်ကစီၣ်ဒ်အံၤ, “ဖဲနတဲဘၣ်စီၤပၤလၢကယဲၢ်တၢ်ဒုးတၢ်ယၤအဂီၢ်ဝံၤန့ၣ်,
20 အဝဲကသးဒိၣ်ထီၣ်တၢ်ဒီးသံကွၢ်နၤလၢ, ဘၣ်မနုၤအဃိသုလဲၤဘူးကဲာ်ဆိးဒီးဝ့ၢ် လၢသုကဒုးအီၤအဂီၢ်န့ၣ်လဲၣ်. မ့ၢ်သုတထံၣ်သ့ၣ်ညါဘၣ်လၢအဝဲသ့ၣ်ကခးလီၤပျၢ်တဖၣ်လၢဝ့ၢ်ခိၣ်ဒူတဖၣ်န့ၣ်ဘၣ်ဧါ.
21 သုတသ့ၣ်နီၣ်ဘၣ်လၢစီၤကံးဒဧိၣ် (စီၤယရူၤဘၡ့း) အဖိခွါစီၤအဘံၤမ့လ့း ဘၣ်တၢ်မၤသံအီၤဒ်လဲၣ်အဂ့ၢ်ဘၣ်ဧါ. တၢ်န့ၣ်မ့ၢ်ဖဲဝ့ၢ်သံဘ့း (တ့ဘ့း) , ဖဲပိာ်မုၣ်တဂၤတ့ၢ်လီၤဆၢၣ်ဂူာ်လၢၢ်တဖျၢၣ်လၢဝ့ၢ်ခိၣ်ဒူဒီးမၤသံအီၤန့ၣ်လီၤ. မ့မ့ၢ်ဒ်န့ၣ်ဒီးဘၣ်မနုၤအဃိသုဘၣ်လဲၤဘူးကဲာ်ဆိးဒီးဝ့ၢ် ခိၣ်ဒူန့ၣ်လဲၣ်. စီၤပၤမ့ၢ်သံကွၢ်နၤတၢ်အံၤဒီးတဲဘၣ်အီၤလၢ, နသုးခိၣ်စီၤအူၤရံယၤစ့ၢ်ကီးသံလံ, န့ၣ်တက့ၢ်.”
22 မၤသးဒ်န့ၣ်, ဒီးပှၤစိာ်တၢ်ကစီၣ်န့ၣ်လဲၤဆူစီၤဒၤဝံးအအိၣ် ဒီးတဲဘၣ်အီၤတၢ်လၢစီၤယိၤအာ်မၤလိာ်အီၤလၢကဘၣ်တဲဝဲတဖၣ်န့ၣ်လီၤ.
23 အဝဲဒၣ်စံး, “ပဒုၣ်ပဒါတဖၣ်အဂံၢ်အဘါဆူၣ်န့ၢ်ပှၤတက့ၢ်, ဒီးဟဲထီၣ်ဆူဝ့ၢ်အချၢဒ်သိးကဒုးပှၤလၢတၢ်ပျီပူၤအဂီၢ်, ဘၣ်ဆၣ်ဒီးပနီၣ်ကဒါက့ၤအီၤဆူဝ့ၢ်အတြဲၤန့ၣ်လီၤ.
24 အန့ၣ်တစုအဝဲသ့ၣ်ခးလီၤပျၢ်တဖၣ်ဆူပအိၣ်လၢဝ့ၢ်ခိၣ်ဒူတဖၣ်အလိၤဒီး ကစၢ်စီၤပၤအသုးခိၣ်သုးနၢ်တနီၤသံဝဲလီၤ. နသုးခိၣ်စီၤအူၤရံယၤစ့ၢ်ကီးသံဝဲဒၣ်လီၤ.”
25 စီၤဒၤဝံးစံးဘၣ်ပှၤစိာ်တၢ်ကစီၣ်န့ၣ်, “ဟ့ၣ်ဆူၣ်ထီၣ်စီၤယိၤအာ်အဂံၢ်အဘါ ဒီးတဲဘၣ်အီၤလၢအသုတသးဘၣ်တံာ်တာ်တဂ့ၤ. အဂ့ၢ်ဒ်အံၤ, မတၤမတၤကသံလၢတၢ်ဒုးတၢ်ယၤအပူၤလဲၣ်န့ၣ်နတဲတသ့ဘၣ်. တဲဘၣ်အီၤလၢကမၤဆူၣ်အါထီၣ်တၢ်ဒုးတဘျီလၢဝ့ၢ်န့ၣ်အဖီခိၣ် ဒီးမၤန့ၢ်ကွံာ်အီၤန့ၣ်တက့ၢ်.”
26 ဖဲနီၢ်ဘၤသၡ့ဘၤနၢ်ဟူဘၣ်လၢအဝၤဘၣ်တၢ်မၤသံကွံာ်အီၤန့ၣ် အဝဲဟီၣ်တၢ်ယၢၤတၢ်လၢအဝၤအတၢ်သံအဃိန့ၣ်လီၤ.
27 ဖဲတၢ်ဟီၣ်တၢ်ယၢၤအကတီၢ်ဝံၤဝဲန့ၣ် စီၤဒၤဝံးမၢပှၤဟဲကိးပိာ်မုၣ်န့ၣ်ဆူနီပူၤလီၤ. ပိာ်မုၣ်န့ၣ်ကဲထီၣ်အမါဒီးဆံးစၢ်န့ၢ်အီၤဖိခွါတဂၤလီၤ. ဘၣ်ဆၣ်ဒီးတၢ်လၢစီၤဒၤဝံးမၤတ့ၢ်အံၤ တဘၣ်ယွၤအသးဘၣ်.