1 တၢ်မၤအသးတမံၤအံၤဝံၤအလီၢ်ခံန့ၣ်, ယထံၣ်ကလူးလွံၢ်ဂၤအိၣ်ဆၢထၢၣ်ဖဲဟီၣ်ခိၣ်အနၢၣ်လွံၢ်နၢၣ်, ဒီးဒ်သိးဟီၣ်ခိၣ်မ့ၢ်ဂ့ၤ, ပီၣ်လဲၣ်မ့ၢ်ဂ့ၤ, သ့ၣ်တထူၣ်ထူၣ်မ့ၢ်ဂ့ၤ, ကလံၤအသုတအူဘၣ်အီၤတဂ့ၤအဂီၢ်န့ၣ်တြီဃာ်ဝဲဒၣ်ကလံၤလွံၢ် ကျိၤန့ၣ်လီၤ. 2 ဒီးယထံၣ်ကလူးအဂၤတဂၤဟဲထီၣ်လၢမုၢ်ထီၣ်တခီအိၣ်ဃုာ်ဒီး ကစၢ်ယွၤလၢအမူဝဲတဂၤအတၢ်စဲပနီၣ်ဃာ်တဖျၢၣ်န့ၣ်လီၤ. အဝဲဒၣ်ကိးထီၣ်လၢအကလုၢ်ဖးဒိၣ်ဆူကလူးလွံၢ်ဂၤလၢ ကစၢ်ယွၤဟ့ၣ်တ့ၢ်အီၤတၢ်စိတၢ်ကမီၤလၢအကမၤဟးဂီၤဟီၣ်ခိၣ် ဒီးပီၣ်လဲၣ်တဖၣ်န့ၣ်လီၤ. 3 ကလူးန့ၣ်စံးဝဲ, “တချုးဒံးလၢပမၤပနီၣ်ဃာ်ပကစၢ်ယွၤအခ့ အပှၤတဖၣ်လၢတၢ်စဲပနီၣ်ဃာ်, လၢအခိၣ်တိသၣ်ဒံးဘၣ်န့ၣ်, တဘၣ်မၤဘၣ်ဒိဘၣ်ထံးဟီၣ်ခိၣ်မ့ၢ်ဂ့ၤ, ပီၣ်လဲၣ်မ့ၢ်ဂ့ၤ, သ့ၣ်ဧိၤဝၣ်ဧိၤတဖၣ်မ့ၢ်ဂ့ၤနီတမံၤဒံးတဂ့ၤ.” 4 ဒီးယဘၣ်တၢ်စံးဘၣ်တဲဘၣ်ယၤလၢပှၤတဖၣ်လၢတၢ်မၤပနီၣ် ကစၢ်ယွၤအတၢ်စဲပနီၣ်ဃာ်လၢအခိၣ်တိသၣ်အလိၤန့ၣ်, အနီၣ်ဂံၢ်အိၣ်ဝဲအဂၤ ၁၄၄,ဝ၀၀ န့ၣ်လီၤ. အဝဲသ့ၣ်တဖၣ်န့ၣ်ဟဲလၢအံၣ်စရ့လးအဒူၣ်တဆံခံဒူၣ်, 5 အဂၤတကလးခံကထိလၢစီၤယူဒၤအဒူၣ်, အဂၤတကလးခံကထိလၢစီၤရူၤဘ့ၣ်အဒူၣ်, အဂၤတကလးခံကထိလၢစီၤကးအဒူၣ်, 6 အဂၤတကလးခံကထိလၢစီၤအၤၡ့ၢ်အဒူၣ်, အဂၤတကလးခံကထိလၢစီၤနးသၤလံအဒူၣ်, အဂၤတကလးခံကထိလၢစီၤမနၤၡ့ၤအဒူၣ်, 7 အဂၤတကလးခံကထိလၢစီၤစူၤမ့းအိၣ်အဒူၣ်, အဂၤတကလးခံကထိလၢစီၤလ့ၤဝံအဒူၣ်, အဂၤတကလးခံကထိလၢစီၤယံးစၣ်ကၢ်အဒူၣ်, 8 အဂၤတကလးခံကထိလၢစီၤစဘူလိၣ်အဒူၣ်, အဂၤတကလးခံကထိလၢစီၤယိၤသးအဒူၣ်, ဒီးအဂၤတကလးခံကထိလၢစီၤဘံၣ်ယၤမံၣ်အဒူၣ် န့ၣ်လီၤ.

9 တၢ်မၤအသးဒ်အံၤဝံၤအလီၢ်ခံန့ၣ်, ယကွၢ်တၢ်, ဒီးပှၤဂီၢ်မုၢ်ဖးဒိၣ်တဖုအိၣ်ဝဲဒၣ်လီၤ. ပှၤဂံၢ်အနီၣ်ဂံၢ် တသ့ဘၣ်နီတဂၤဘၣ်. အဝဲသ့ၣ်ဟဲလၢကလုာ်ကိး ကလုာ်ဒဲး, ဒူၣ်ဖိထၢဖိကိးဒူၣ်ဒဲး, ထံကီၢ်ကိးဘ့ၣ်ဒဲး, ဒီးပှၤကတိၤကျိာ်ကိးကျိာ်ဒဲးအကျါန့ၣ်လီၤ. ဒီးအဝဲသ့ၣ်အိၣ်ဆၢထၢၣ်လၢလီၢ်ပစိာ်ဒီးသိဖိအမဲာ်ညါ, ကူသိးဆ့ကၤအဝါဒီးဟံးဃာ်လိၣ်ဒၢအဒ့တဖၣ်လၢ အစုပူၤန့ၣ်လီၤ. 10 အဝဲသ့ၣ်ကိးထီၣ်လၢအကလုၢ်ဖးဒိၣ်, “တၢ်အုၣ်က့ၤခီၣ်က့ၤ ဟဲလၢပကစၢ်ယွၤ, လၢအဆ့ၣ်နီၤလၢလီၢ်ပစိာ်အလိၤ, ဒီးလၢသိဖိတဒုန့ၣ်အအိၣ်လီၤ.” 11 ကလူးခဲလၢာ်ခဲဆ့ဆၢထၢၣ်ဝးတရံးလီၢ်ပစိာ်, ပှၤသူၣ်က့သးပှၢ် တဖၣ်, ဒီးတၢ်သးသမူအိၣ်လွံၢ်ဒုန့ၣ်လီၤ. တုၤနုၤတစုအဝဲသ့ၣ်ထိၣ်လီၤပှီၤအသးလၢလီၢ်ပစိာ် အမဲာ်ညါဒီးဘူၣ်ထီၣ်ဘါထီၣ်ကစၢ်ယွၤ 12 ဒီးစံးဝဲ, “အၤမ့ၣ်. တၢ်စံးထီၣ်ပတြၢၤတၢ်လၤကပီၤ, တၢ်ကူၣ်ဘၣ်ကူၣ်သ့, တၢ်စံးဘျုးစံးဖှိၣ်, တၢ်ယူးယီၣ်, တၢ်စိကမီၤ, ဒီးတၢ်ဂံၢ်တၢ်ဘါန့ၣ် မ့ၢ်ပကစၢ်ယွၤအတၢ် အစိၤစိၤအဃၣ်ဃၣ်လီၤ. အၤမ့ၣ်.”

13 ပှၤသူၣ်က့သးပှၢ်အကျါတဂၤသံကွၢ်ယၤ, “ပှၤသ့ၣ်တဖၣ်အံၤလၢအကူအသိးဆ့ကၤဖးထီ အဝါန့ၣ်, မ့ၢ်မတၤတဖၣ်လဲၣ်, ဒီးအဝဲသ့ၣ်ဟဲလၢလဲၣ်.”

14 “ယတသ့ၣ်ညါဘၣ်, တၢ်ဒိၣ်ဧၢ, နသ့ၣ်ညါနဲလီၤ” ယစံးဆၢယဲ.

အဝဲဒၣ်စံးဘၣ်ယၤ, “ပှၤသ့ၣ်တဖၣ်အံၤမ့ၢ်ပှၤတဖၣ်လၢ အလဲၤခီဖျိဘၣ်တၢ်မၤအၢမၤနးလီၤပျံၤလီၤဖုးတမံၤန့ၣ်လီၤ. အဝဲသ့ၣ်သ့စီကွံာ်တ့ၢ်ဝဲအဆ့ကၤဖးထီတဖၣ်, ဒီးမၤဝါထီၣ်အီၤလၢသိဖိတဒုန့ၣ်အသွံၣ်လီၤ. 15 လၢတၢ်န့ၣ်အဃိ, အဝဲသ့ၣ်အိၣ်ဆၢထၢၣ်ဝဲလၢကစၢ်ယွၤ အလီၢ်ပစိာ်အမဲာ်ညါဒီးမၤအဝဲဒၣ်အတၢ်မၤမုၢ်ဆါမုၢ်နၤလၢ အဝဲဒၣ်အတၢ်လုၢ်ဟံၣ်အပူၤလီၤ. ပှၤလၢအဆ့ၣ်နီၤဝဲလၢလီၢ် ပစိာ်အလိၤတဂၤန့ၣ်, ကကဟုကယာ်အဝဲသ့ၣ်ခီဖျိအဝဲဒၣ်အတၢ်အိၣ်ဒီးအဝဲသ့ၣ် န့ၣ်လီၤ. 16 အဝဲသ့ၣ်တသၣ်ဝံၤသၣ်စ့ၤ, ဒီးတၢ်တသူစ့ၢ်ကီးအသးလၢထံနီ တစုလၢၤဘၣ်, မုၢ်မ့ၢ်ဂ့ၤ, တၢ်ကိၢ်ဆူၣ်မ့ၢ်ဂ့ၤတမၤဘၣ်ဒိ အဝဲသ့ၣ်ဘၣ်. 17 အဂ့ၢ်ဒ်အံၤ, သိဖိတဒုလၢအအိၣ်ဝဲလၢလီၢ်ပစိာ်အခၢၣ်သးန့ၣ် ကမ့ၢ်အဝဲသ့ၣ်အပှၤကွၢ်သိ, ဒီးအဝဲဒၣ်ကဆှၢအဝဲသ့ၣ်ဆူထံ မူထီၣ်ပၢၢ်န့ၣ်လီၤ. ဒီးကစၢ်ယွၤကထွါကွံာ်မဲာ်ထံကိးဖျၢၣ်ဒဲးလၢ အမဲာ်ချံပူၤန့ၣ်လီၤ.”