10
1 တၢ်န့ၣ်ဝံၤအလီၢ်ခံ, ယထံၣ်ဘၣ်ကလူးလၢအဂံၢ်ဆူၣ်ဘါဆူၣ်အဂၤတဂၤဟဲလီၤ လၢမူခိၣ်န့ၣ်လီၤ. အဝဲဒၣ်ဘၣ်တၢ်ကးဘၢဃာ်အီၤလၢတၢ်အၢၣ်
တလိၣ်, ဒီးအိၣ်ဝဲဒီးတၢၢ်ကွဲၤတဘိလၢအအိၣ်ဝးတရံးအဝဲဒၣ်
အခိၣ်န့ၣ်လီၤ. အဝဲအမဲာ်သၣ်လီၤဂာ်လၢမုၢ်, ဒီးအခီၣ်လီၤဂာ်လၢမ့ၣ်အူအထူၣ်တဖၣ်လီၤ.
2 အဝဲအိၣ်ဒီးလံာ်ထူဖိတဘ့ၣ်လၢအအိၣ်အိးထီၣ်အသးလၢ အစုပူၤလီၤ. အဝဲပာ်အခီၣ်ထွဲတခီလၢပီၣ်လဲၣ်အဖီခိၣ်, ဒီးအခီၣ်စ့ၣ်တခီလၢခိသူခိၣ်,
3 ဒီးကိးထီၣ်လၢအကလုၢ်ဖးဒိၣ်လၢအသီၣ်လီၤဂာ်ဒီးခ့ယုၢ် တဖၣ်အတၢ်ကညီၤအသီၣ်န့ၣ်လီၤ. ဖဲအဝဲဒၣ်ကိးထီၣ်ဝံၤန့ၣ်, ဘၣ်တၢ်စံးဆၢအီၤလၢလီသီၣ်နွံဘီလီၤ.
4 လီသီၣ်နွံဘီဟ့ၣ်တၢ်စံးဆၢတဘျီဃီ, ယသါကကွဲးလီၤတၢ်လီၤ. ဘၣ်ဆၣ်, ယနၢ်ဟူတၢ်ကလုၢ်သီၣ်ထီၣ်လၢမူခိၣ်ဒီးစံးဝဲ, “ပာ်ခူသူၣ်တၢ်လၢလီသီၣ်နွံဘီစံးတ့ၢ်ဝဲန့ၣ်တက့ၢ်, တဘၣ်ကွဲးလီၤအီၤတဂ့ၤ.”
5 တုၤနုၤတစုကလူးလၢယထံၣ်အဆၢထၢၣ်လၢပီၣ်လဲၣ်ဒီးခိသူခိၣ် အလိၤတဂၤန့ၣ်ယူာ်ထီၣ်အစုထွဲဆူမူခိၣ်,
6 ဒီးဆိၣ်လီၤအသးလၢကစၢ်ယွၤအမံၤ, ကစၢ်ယွၤလၢအမူဝဲ လီၤထူလီၤယိာ်, လၢအတ့လီၤမူခိၣ်ဟီၣ်ခိၣ်, ဒီးပီၣ်လဲၣ်ဒီးတၢ်ခဲလၢာ်ခဲဆ့လၢအအိၣ်လၢအပူၤန့ၣ်လီၤ.
ကလူးန့ၣ်စံးဝဲ, “တၢ်တမၤယံာ်မၤနီၢ်တၢ်လၢၤဘၣ်.
7 မ့မ့ၢ်ဖဲကလူးနွံဂၤတဂၤအူထီၣ်ကွဲၤန့ၣ်, ကစၢ်ယွၤကမၤလၢထီၣ်ပှဲၤထီၣ်အတၢ်ကူၣ်ထီၣ်ဖးလီၤခူသူၣ်, ဒ်အဝဲဒၣ်ဘိးဘၣ်သ့ၣ်ညါတ့ၢ်ဝဲအခ့အပှၤဝံတဖၣ် အသိး န့ၣ်လီၤ.”
8 တုၤနုၤတစုတၢ်ကလုၢ်လၢယနၢ်ဟူတ့ၢ်အကတိၤတၢ်လၢမူခိၣ်န့ၣ်, ကတိၤကဒီးတၢ်ဆူယအိၣ်, ဒီးစံးဝဲ, “လဲၤဒီးဟံးန့ၢ်လံာ်ထူလၢအအိၣ်အိးထီၣ်အသး, လၢအအိၣ်လၢကလူးအိၣ်ဆၢထၢၣ်လၢပီၣ်လဲၣ်ဒီးခိသူခိၣ် တဂၤန့ၣ်အစုပူၤတက့ၢ်.”
9 သတးဒီး, ယလဲၤဆူကလူးတဂၤန့ၣ်အအိၣ်, ဒီးမၢအဟ့ၣ်ယၤလံာ်ထူဖိတဘ့ၣ်န့ၣ်လီၤ. အဝဲဒၣ်စံးဘၣ်ယၤ, “ဟံးန့ၢ်ဒီးအီၣ်အီၤတက့ၢ်. ကဆံၣ်ထီၣ်ဝဲလၢနဟၢဖၢပူၤ, မ့မ့ၢ်လၢနကိာ်ပူၤန့ၣ် ကဆၢဝဲဒ်ကနဲစီအသိးလီၤ.”
10 ယဟံးန့ၢ်လံာ်ထူဖိဝဲန့ၣ်လၢအစုပူၤ, ဒီးအီၣ်အီၤ, ဒီးဆၢဝဲဒ်ကနဲစီအသိးလၢယကိာ်ပူၤလီၤ. ဘၣ်ဆၣ်ဒီးဖဲယယူၢ်လီၤအီၤဝံၤန့ၣ်, ဆံၣ်ထီၣ်ဝဲဒၣ်လၢ
ယဟၢဖၢပူၤလီၤ.
11 အန့ၣ်ဝံၤအလီၢ်ခံ ယဘၣ်တၢ်စံးဘၣ်ယၤ, “မၤကဒီးတစုနကဘၣ်ကတိၤကဒီးတၢ်လၢဝံ အကျိာ်ဘၣ်ဃးကီၢ်အါဘ့ၣ်, ပှၤကလုာ်အါကလုာ်, ကျိာ်အါကျိာ်ဒီးစီၤလိၣ်စီၤပၤအါဂၤအဂ့ၢ်လီၤ.”