8
1 ခဲကနံၣ်အံၤ, ပှၤလၢအအိၣ်မူလၢယ့ၣ်ၡူးခရံာ်အပူၤတဖၣ်န့ၣ်, တၢ်စံၣ်ညီၣ်ဃၣ်တအိၣ်လၢအဂီၢ်ဘၣ်.
2 အဂ့ၢ်ဒ်လဲၣ်န့ၣ်ယွၤအသးအတၢ်သိၣ်တၢ်သီလၢအဟဲစိာ် န့ၢ်ပှၤတၢ်အိၣ်မူလၢယ့ၣ်ၡူးခရံာ်အပူၤန့ၣ်, မၤထူၣ်ဖျဲးကွံာ်လံယၤလၢတၢ်ဒဲးဘးဒီးတၢ်သံအတၢ်
သိၣ်တၢ်သီန့ၣ်လီၤ.
3 မ့ၢ်လၢပှၤကညီအန့ဆၢၣ်အဂံၢ်စၢ်ဘါစၢ်အဃိ, တၢ်လၢတၢ်သိၣ်တၢ်သီမၤတသ့ဘၣ်န့ၣ်ကစၢ်ယွၤမၤဝဲလီၤ. အဝဲစံၣ်ညီၣ်ဃၣ်တၢ်ဒဲးဘးလၢပှၤကညီအန့ဆၢၣ်အပူၤ, ခီဖျိအတၢ်ဆှၢလီၤအဖိခွါဒၣ်ဝဲအိၣ်ဒီးန့ဆၢၣ်လၢအမ့ၢ် ပှၤကညီအတၢ်ဒဲးဘးအန့ဆၢၣ်ဒ်သိးအကတြူာ်
ကွံာ်တၢ်ဒဲးဘးအဂီၢ်န့ၣ်လီၤ.
4 ကစၢ်ယွၤမၤတၢ်အံၤ မ့ၢ်ဒ်သိးဒီးတၢ်သိၣ်တၢ်သီအတၢ်မၤ လိာ်အတီအလိၤကလၢထီၣ်ပှဲၤထီၣ်ဝဲဒၣ်လၢပဝဲလၢအအိၣ်
မူဒ်ယွၤအသးအသိး, ဒီးတမ့ၢ်ဘၣ်ဒ်ဟီၣ်ခိၣ်ဖိအန့ဆၢၣ်
အသိးတဖၣ်အပူၤဘၣ်န့ၣ်လီၤ.
5 ပှၤလၢအအိၣ်မူဝဲဒ်အပှၤဟီၣ်ခိၣ်ဖိအန့ဆၢၣ်အတၢ်မၢအီၤ အသိးတဖၣ်န့ၣ်, အတၢ်ဆိကမိၣ်ဘၣ်တၢ်ပၢအီၤလၢဟီၣ်ခိၣ်ဖိ
အန့ဆၢၣ်အတၢ်မိၣ်န့ၢ်သးလီတဖၣ်န့ၣ်လီၤ. မ့မ့ၢ်, ပှၤလၢအအိၣ်မူဝဲဒ်ကစၢ်ယွၤအသးမၢအီၤအသိးတဖၣ်န့ၣ်, အတၢ်ဆိကမိၣ်ဘၣ်တၢ်ပၢအီၤလၢကစၢ်ယွၤအသးအတၢ်
အဲၣ်ဒိးတဖၣ်န့ၣ်လီၤ.
6 အဂ့ၢ်ဒ်အံၤ, တၢ်ဒိးပၢပသးလၢဟီၣ်ခိၣ်ဖိအန့ဆၢၣ် န့ၣ်အကတၢၢ်မ့ၢ်တၢ်သံန့ၣ်လီၤ. မ့မ့ၢ်, တၢ်ပျဲကစၢ်ယွၤအသးပၢပှၤန့ၣ်အကတၢၢ်မ့ၢ်တၢ်မူဒီး
တၢ်ဃူတၢ်ဖိးန့ၣ်လီၤ.
7 လၢတၢ်န့ၣ်အဃိ, ပှၤဟီၣ်ခိၣ်ဖိတဂၤကဲထီၣ်ကစၢ်ယွၤ အဒုၣ်အဒါဖဲအဝဲအတၢ်ဆိကမိၣ်ဆိကမးဘၣ်တၢ်ပၢ
ဆှၢအီၤလၢပှၤဟီၣ်ခိၣ်ဖိအန့ဆၢၣ်န့ၣ်လီၤ. အဂ့ၢ်ဒ်လဲၣ်န့ၣ်
အဝဲတကစၢ်ယွၤအတၢ်သိၣ်တၢ်သီဘၣ်. နီၢ်နီၢ်န့ၣ်စူၢ်ဝဲ
တကဲဘၣ်န့ၣ်လီၤ.
8 ပှၤတဖၣ်လၢအဒိးပၢအသးလၢဟီၣ်ခိၣ်ဖိအန့ဆၢၣ်န့ၣ်, မၤတၢ်ဘၣ်ကစၢ်ယွၤအသးတသ့ဘၣ်.
9 ဘၣ်ဆၣ်ဒီးယွၤအသးမ့ၢ်မူလၢသုပူၤနီၢ်နီၢ်န့ၣ်, သုတအိၣ်မူဒ်ဟီၣ်ခိၣ်ဖိအန့ဆၢၣ်အတၢ်မၢသု အသိးန့ၣ်ဘၣ်. သုအိၣ်မူဒ်ကစၢ်ယွၤအသးအတၢ်မၢသု
အသိးန့ၣ်လီၤ. ပှၤတဂၤလၢ်လၢ်လၢခရံာ်အသးတအိၣ်
လၢအပူၤဘၣ်န့ၣ်, တဘၣ်ဃးဒီးခရံာ်ဘၣ်.
10 ဘၣ်ဆၣ်, ခရံာ်မ့ၢ်မူလၢသုပူၤဒီး, လၢတၢ်ဒဲးဘးအဃိသုနီၢ်ခိတဖၣ်မ့ၢ်သံသနာ်က့, ယွၤအသးမ့ၢ်တၢ်မူလၢသုဂီၢ်အဂ့ၢ်မ့ၢ်လၢသုဘၣ် တၢ်ပာ်တီပာ်လိၤသုအဃိန့ၣ်လီၤ.
11 ကစၢ်ယွၤအသးလၢအဒုးဂဲၤဆၢထၢၣ်သမူထီၣ်က့ၤယ့ၣ်ၡူး လၢတၢ်သံန့ၣ်, မ့ၢ်မူလၢသုပူၤဒီး, ပှၤလၢအဒုးဂဲၤဆၢထၢၣ်
သမူထီၣ်က့ၤခရံာ်လၢတၢ်သံန့ၣ်ကဟ့ၣ်လီၤစ့ၢ်ကီးသုနီၢ်ခိလၢ
အသံသ့တဖၣ်အံၤလၢတၢ်မူခီဖျိယွၤအသးလၢအအိၣ်
ဝဲဆိးဝဲလၢသုပူၤန့ၣ်လီၤ.
12 လၢတၢ်န့ၣ်အဃိယဒီပုၢ်ဝဲၢ်သ့ၣ်ဧၢ, တၢ်လီၤဘၣ်ပှၤလၢပသုတအိၣ်မူဒ်ပပှၤဟီၣ်ခိၣ်ဖိအန့ဆၢၣ်မၢပှၤ အသိးတဂ့ၤန့ၣ်လီၤ.
13 အဂ့ၢ်ဒ်အံၤ, သုမ့ၢ်အိၣ်မူဒ်ဟီၣ်ခိၣ်ဖိအန့ဆၢၣ်မၢသု အသိးဒီးသုကသံလီၤ. ဘၣ်ဆၣ်ဒီးခီဖျိလၢယွၤအသးန့ၣ်
သုမ့ၢ်မၤသံကွံာ်သုတၢ်ဒဲးဘးအတၢ်ဖံးတၢ်မၤတဖၣ်န့ၣ်
ဒီးသုကမူလီၤ.
14 ပှၤတဖၣ်လၢအဘၣ်တၢ်ပၢဆှၢအီၤလၢကစၢ်ယွၤအသး န့ၣ်မ့ၢ်ကစၢ်ယွၤအဖိတဖၣ်လီၤ.
15 အဂ့ၢ်ဒ်လဲၣ်န့ၣ်, ကစၢ်ယွၤအသးလၢအဘၣ်တၢ်ဟ့ၣ်လီၤ သုန့ၣ်တဒုးကဲထီၣ်သုလၢကုၢ်ဒီးဒုးအိၣ်ထီၣ်တၢ်ပျံၤတၢ်ဖုး
လၢသုပူၤန့ၣ်ဘၣ်. မ့မ့ၢ်ကစၢ်ယွၤအသးဒုးကဲထီၣ်သုလၢ
ကစၢ်ယွၤအဖိတဖၣ်ဒီးလၢအသးအစိကမီၤအပူၤပကိးထီၣ်
ကစၢ်ယွၤ, “ပၢ်ဧၢ, ယပၢ်ဧၢ” န့ၣ်လီၤ.
16 ကစၢ်ယွၤအသးအုၣ်ဃုာ်အသးဒီးပသးလၢပမ့ၢ်ကစၢ်ယွၤ အဖိတဖၣ်န့ၣ်လီၤ.
17 မ့ၢ်လၢပမ့ၢ်အဖိတဖၣ်အဃိ, ပကန့ၢ်သါတၢ်ဆိၣ်ဂ့ၤတဖၣ် လၢအပာ်ဃာ်ဝဲလၢအပှၤဂီၢ်မုၢ်အဂီၢ်, ဒီးပကန့ၢ်သါဃုာ်
ဒီးခရံာ်တၢ်လၢကစၢ်ယွၤပာ်ဃာ်လၢအဝဲအဂီၢ်စ့ၢ်ကီးန့ၣ်
လီၤ. အဂ့ၢ်ဒ်လဲၣ်န့ၣ်, ပမ့ၢ်ဒိးဃုာ်တၢ်နးတၢ်ဖှီၣ်ဒီးခရံာ်
ဒီးပကဘၣ်ဃုာ်တၢ်လၤတၢ်ကပီၤဒီးအီၤစ့ၢ်ကီးလီၤ.
18 ယပာ်ယသးလၢတၢ်နးတၢ်ဖှီၣ်လၢပတူၢ်ဘၣ်အီၤလၢ ဆၢကတီၢ်ခဲအံၤန့ၣ်, ပထိၣ်သတြီၤအီၤဒီးတၢ်လၤကပီၤလၢ
အကဘၣ်တၢ်လီၣ်ဖျါထီၣ်န့ၢ်ပှၤန့ၣ်တသ့လ့ၤတက့ၤဘၣ်န့ၣ်လီၤ.
19 လၢတၢ်သူၣ်ဆူၣ်သးဂဲၤအပူၤ, တၢ်ဘၣ်တ့ခဲလၢာ်အိၣ်ခိးကွၢ်လၢ်ကစၢ်ယွၤကလီၣ်ဖျါထီၣ် အဖိခွါတဖၣ်န့ၣ်လီၤ.
20 အဂ့ၢ်ဒ်လဲၣ်န့ၣ်, တၢ်ဘၣ်တ့ဘၣ်တၢ်စံၣ်ညီၣ်ဃၣ်အီၤလၢ အတၢ်တိာ်ကကဲထီၣ်တၢ်ကလီကလီ, တမ့ၢ်ဖဲအသးဒၣ်ဝဲဘၣ်.
မ့မ့ၢ်, မ့ၢ်လၢကစၢ်ယွၤဘၣ်အသးလၢအကမ့ၢ်တၢ်ဒ်န့ၣ်အသိး
အဃိလီၤ. နာ်သက့တၢ်မုၢ်လၢ်အိၣ်ဒံးဝဲ,
21 လၢမုၢ်ကအိၣ်ဝဲတနံၤဖဲတၢ်ဘၣ်တ့ကဘၣ်တၢ်မၤထူၣ်ဖျဲးထီၣ် ကွံာ်အီၤလၢတၢ်ကဲကုၢ်လၢတၢ်ဟးဂူာ်ဟးဂီၤအဖီလာ်, ဒီးကန့ၢ်သါဃုာ်ကစၢ်ယွၤအဖိတဖၣ်အတၢ်သဘျ့လၢ
အလၢအပှဲၤဒီးတၢ်လၤကပီၤန့ၣ်လီၤ.
22 အဂ့ၢ်ဒ်လဲၣ်န့ၣ်, ပသ့ၣ်ညါလၢတုၤဆၢကတီၢ်ခဲအံၤန့ၣ်, တၢ်ဘၣ်တ့ခဲလၢာ်ကအုကစွါလၢတၢ်ဆူးတၢ်ဆါ အပူၤဒ်မိၢ်တဂၤအဟုးဆါဒီးကအုကစွါဝဲအသိးန့ၣ်လီၤ.
23 ဒီးတၢ်အံၤတမ့ၢ်ထဲတၢ်ဘၣ်တ့ဧိၤန့ၣ်ဘၣ်. ပဝဲလၢအအိၣ် ဒီးယွၤအသးလၢအမ့ၢ်ကစၢ်ယွၤအတၢ်ဟ့ၣ်အခီၣ်ထံးကတၢၢ်
တမံၤစ့ၢ်ကီး, ပကအုကစွါလၢပသးကံၢ်ပူၤဖဲပအိၣ်ခိးကွၢ်လၢ်
ယွၤအတၢ်ဒုးကဲထီၣ်ပှၤလၢအဖိတဖၣ်ဒီးအတၢ်မၤထူၣ်ဖျဲး
ပနီၢ်ခိဒီဂၤညါအခါန့ၣ်လီၤ.
24 အဂ့ၢ်ဒ်အံၤ, ခီဖျိတၢ်မုၢ်လၢ်န့ၣ်ပဘၣ်တၢ်အုၣ်က့ၤခီၣ် က့ၤပှၤန့ၣ်လီၤ. ဘၣ်ဆၣ်ပမ့ၢ်ထံၣ်တၢ်လၢပမုၢ်လၢ်န့ၣ်ဒီး,
တၢ်န့ၣ်တမ့ၢ်တၢ်မုၢ်လၢ်နီၢ်နီၢ်ဒံးဘၣ်. အဂ့ၢ်ဒ်လဲၣ်န့ၣ်, မ့ၢ်မတၤတဂၤမုၢ်လၢ်ဒံးတၢ်လၢအထံၣ်ဝဲန့ၣ်လဲၣ်.
25 ဘၣ်ဆၣ်ဒီးတၢ်လၢပတထံၣ်ဘၣ်အီၤန့ၣ်ပမ့ၢ်မုၢ်လၢ်အီၤဒီး, ပအိၣ်ခိးကွၢ်လၢ်အီၤလၢတၢ်ဝံသးစူၤအပူၤန့ၣ်လီၤ.
26 ဒ်န့ၣ်အသိးယွၤအသးစ့ၢ်ကီးဟဲလၢကမၤစၢၤပှၤအဂီၢ်, ဒ်ပမ့ၢ်ပှၤဂံၢ်စၢ်ဘါစၢ်တဖၣ်အသိးလီၤ. အဂ့ၢ်ဒ်လဲၣ်န့ၣ်, ပကြၢးဃ့ထုကဖၣ်တၢ်ဒ်လဲၣ်န့ၣ်ပတသ့ၣ်ညါဘၣ်. ယွၤအသးဒၣ်ဝဲဃ့သကွံၢ်ကညးကစၢ်ယွၤလၢပဂီၢ်လၢတၢ်
ကအုကစွါဖးဒိၣ်လၢပတဲဖျါလၢတၢ်ကတိၤတသ့ဒၣ်လဲာ်ဘၣ်
အပူၤန့ၣ်လီၤ.
27 ဒီးကစၢ်ယွၤလၢအထံၣ်တုာ်ကွၢ်ဖျါပှၤကညီအသးကံၢ်ပူၤ န့ၣ်, သ့ၣ်ညါယွၤအသးအတၢ်ဆိကမိၣ်မ့ၢ်တၢ်မနုၤလဲၣ်
န့ၣ်လီၤ. အဂ့ၢ်ဒ်အံၤ, ကစၢ်ယွၤအသးဃ့သကွံၢ်ကညးတၢ်ဒီး
ကစၢ်ယွၤလၢအပှၤဂီၢ်မုၢ်တဖၣ်အဂီၢ်, ဒီးဒ်အတၢ်ဘၣ်
အသးအသိးန့ၣ်လီၤ.
28 ဒီးပသ့ၣ်ညါလၢပှၤလၢအအဲၣ်ကစၢ်ယွၤ, ပှၤလၢအဘၣ်တၢ် ကိးထီၣ်အီၤဒ်အတၢ်ကူၣ်ပာ်အသိးန့ၣ်, ကစၢ်ယွၤမၤဃုာ်တၢ်
ဒီးအီၤလၢတၢ်ခဲလၢာ်အပူၤလၢတၢ်ဂ့ၤအဂီၢ်လီၤ.
29 ပှၤလၢကစၢ်ယွၤဃုထၢပာ်ဝဲတဖၣ်န့ၣ်, ပာ်လီၤဆီဝဲလၢအကကဲထီၣ်ပှၤလၢအလီၤဂာ်ဒီးအဖိခွါ, ဒ်သိးအဖိခွါကကဲထီၣ်ဝဲၢ်ကိလၢဒီပုၢ်ဝဲၢ်အါဂၤအကျါ န့ၣ်လီၤ.
30 ဒီးလၢတၢ်န့ၣ်အဃိ ကစၢ်ယွၤကိးထီၣ်ပှၤလၢအပာ်လီၤ ဆီတ့ၢ်လံဝဲတဖၣ်, ဒီးပှၤတဖၣ်လၢအကိးထီၣ်ဝဲန့ၣ်အဝဲဒၣ်
ပာ်တီပာ်လိၤဝဲဒီးအီၤ, ဒီးပှၤတဖၣ်လၢအပာ်တီပာ်လိၤ
ဝဲန့ၣ်ဟ့ၣ်နီၤလီၤဝဲလၢအလၤအကပီၤစ့ၢ်ကီးန့ၣ်လီၤ.
31 လၢတၢ်အံၤအဃိ, ပစံးမနုၤကသ့လဲၣ်. ကစၢ်ယွၤမ့ၢ်အိၣ် လၢပဂီၢ်ဒီး, မ့ၢ်မတၤကထီဒါပှၤတဂၤလဲၣ်.
32 အဝဲတဟံးဃာ်က့ၤအဖိခွါဒၣ်ဝဲဒၣ်လဲာ်ဘၣ်, မ့မ့ၢ်လုၢ်ထီၣ် အီၤဒ်တၢ်လုၢ်အသိးလၢပဝဲခဲလၢာ်အဂီၢ်န့ၣ်လီၤ. အဝဲဒၣ်ဟ့ၣ်လီၤပှၤအဖိခွါဒၣ်ဝဲလံသတးဒီး, မ့ၢ်အတဟ့ၣ်ကလီစ့ၢ်ကီးပှၤလၢတၢ်အဂၤခဲလၢာ်န့ၣ်ဘၣ်ဧါ.
33 မ့ၢ်မတၤကပာ်တၢ်ကမၣ်လၢပှၤလၢကစၢ်ယွၤဃုထၢအီၤ တဖၣ်အလိၤန့ၣ်လဲၣ်. ကစၢ်ယွၤအနီၢ်ကစၢ်ဒၣ်ဝဲမ့ၢ်ပှၤလၢ
အပာ်တီပာ်လိၤအဝဲသ့ၣ်န့ၣ်လီၤ.
34 မ့မ့ၢ်ဒ်န့ၣ်ဒီး, မ့ၢ်မတၤကစံၣ်ညီၣ်ဃၣ်အဝဲသ့ၣ်တဂၤဂၤန့ၣ်လဲၣ်. တမ့ၢ်ယ့ၣ်ၡူးခရံာ်လၢအသံတ့ၢ်, ဘၣ်ဆၣ်တၢ်ဒုးဂဲၤဆၢထၢၣ် သမူထီၣ်က့ၤအီၤဒီးခဲအံၤအိၣ်ဝဲဒၣ်လၢယွၤအစုထွဲတခီ
တဂၤန့ၣ်ဘၣ်ဧါ. အဝဲဒၣ်ဃ့သကွံၢ်ကညးတၢ်ဒီးယွၤလၢ
ပဂီၢ်န့ၣ်လီၤ.
35 မ့ၢ်မတၤမၤလီၤဖးပှၤဒီးခရံာ်အတၢ်အဲၣ်တၢ်ကွံကသ့ တဂၤန့ၣ်လဲၣ်. မ့ၢ်တၢ်ကီတၢ်ခဲမၤကသ့ဧါ, မ့တမ့ၢ်တၢ်ကိၢ်
တၢ်ဂီၤ, တၢ်မၤအၢမၤနးပှၤ, တၢ်သၣ်ဝံၤလီၤဒိ, တၢ်အိၣ်ဘ့ၣ်ဆ့, တၢ်လီၤပျံၤလီၤဖုး, တၢ်သံ, မၤကသ့ဧါ.
36 ဒ်တၢ်ကွဲးအသးစီဆှံစံးဝဲအသိး,
“ပဝဲဒၣ်အံၤ ပဘၣ်တၢ်မၤသံပှၤလၢနဃိသ့သ့တနံၤလီၤ.
တၢ်ပာ်ပှၤဒ်သိလၢအကဘၣ်တၢ်မၤသံအီၤ
အသိးန့ၣ်လီၤ (စံး ၄၄:၂၂).
37 မ့မ့ၢ်လၢတၢ်န့ၣ်တဖၣ်ခဲလၢာ်အပူၤပမ့ၢ်ပှၤလၢအမၤ နၢၤတၢ်လၢလၢပှဲၤပှဲၤခီဖျိပှၤလၢအအဲၣ်ပှၤအဃိလီၤ.
38 အဂ့ၢ်ဒ်လဲၣ်န့ၣ်, ယနာ်လၢတၢ်သံမ့ၢ်ဂ့ၤ, တၢ်မူမ့ၢ်ဂ့ၤ, ကလူးတဖၣ်မ့ၢ်ဂ့ၤ, မူခိၣ်အပှၤပၢတၢ်တဂၤတဖၣ်မ့ၢ်ဂ့ၤ,
တၢ်အစိကမီၤတဖၣ်မ့ၢ်ဂ့ၤ, တၢ်အိၣ်ခဲအံၤမ့ၢ်ဂ့ၤ,
တၢ်လၢအကအိၣ်ဆူညါမ့ၢ်ဂ့ၤ,
39 တၢ်လၢထးမ့ၢ်ဂ့ၤ, တၢ်လၢလာ်မ့ၢ်ဂ့ၤ, တၢ်ဘၣ်တ့အဂုၤ အဂၤခဲလၢာ်မ့ၢ်ဂ့ၤ, မၤလီၤဖးပှၤဒီးကစၢ်ယွၤအတၢ်အဲၣ်
တၢ်ကွံလၢအအိၣ်လၢပကစၢ်ယ့ၣ်ၡူးခရံာ်အပူၤန့ၣ်တသ့ဘၣ်လီၤ.