14
1 ပှၤလၢသုကျါလၢအတၢ်နာ်အဂံၢ်အဘါစၢ်တဖၣ်န့ၣ်တူၢ်လိာ်အီၤ တက့ၢ်. ဘၣ်ဆၣ်ဒီးတဘၣ်ဂ့ၢ်လိာ်ဒီးအီၤဘၣ်ဃးအတၢ်ဆိကမိၣ်
ဆိကမးတဖၣ်န့ၣ်တဂ့ၤ.
2 ပှၤတဂၤအတၢ်နာ်ဟ့ၣ်အီၤအခွဲးလၢကအီၣ်တၢ်ကိးမံၤဒဲးဘၣ်ဆၣ်, ပှၤတဂၤလၢအတၢ်နာ်စၢ်ဝဲန့ၣ်အီၣ်ဒၣ်ထဲတၢ်ဒိးတၢ်လၣ်ဧိၤလီၤ.
3 ပှၤတဂၤလၢကအီၣ်တၢ်ကိးမံၤဒဲးန့ၣ်, မ်အသုတကွၢ်တလီၤပှၤလၢအတအီၣ်တၢ်န့ၣ်တဂ့ၤ. ဒီးပှၤလၢအအီၣ်ထဲတၢ်ဒိးတၢ်လၣ်တဂၤန့ၣ်, မ်အသုတစံၣ်ညီၣ် ပှၤလၢအအီၣ်တၢ်ခဲလၢာ်တဂၤန့ၣ်တဂ့ၤ. အဂ့ၢ်ဒ်အံၤ, ကစၢ်ယွၤတူၢ်လိာ်တ့ၢ်လံအီၤလံ.
4 နမ့ၢ်မတၤတဂၤလၢအကစံၣ်ညီၣ်ပှၤအဂၤတဂၤအခ့အပှၤန့ၣ်လဲၣ်. အတၢ်မၤကဲထီၣ်မ့ၢ်ဂ့ၤ, တကဲထီၣ်မ့ၢ်ဂ့ၤန့ၣ် အကစၢ်လၢအမ့ၢ်ယွၤကစံၣ်ညီၣ်ဒၣ်ဝဲလီၤ. ဒီးအတၢ်မၤကကဲထီၣ်လိၣ်ထီၣ်ဝဲ, မ့ၢ်လၢယွၤဒုးကဲထီၣ်လိၣ်ထီၣ်အီၤသ့ဝဲဒၣ်အဃိန့ၣ်လီၤ.
5 ဖဲပှၤတဂၤဆိကမိၣ်ဝဲလၢမုၢ်နံၤတနံၤန့ၣ်အကါဒိၣ်န့ၢ်ဒံးမုၢ်နံၤ အဂၤတဖၣ်န့ၣ်, ပှၤအဂၤကဒီးတဂၤဆိကမိၣ်ဝဲလၢမုၢ်နံၤခဲလၢာ်
မ့ၢ်ဒၣ်ဒ်သိးသိးန့ၣ်လီၤ. မ်ပှၤတဂၤဒီးတဂၤ ဟံးဃာ်တၢ်ဒ်အဆိကမိၣ်ဒၣ်ဝဲအသိးန့ၣ်တက့ၢ်.
6 ပှၤတဂၤဂ့ၤတဂၤဂ့ၤလၢအဆိကမိၣ်ပာ်ဒိၣ်မုၢ်နံၤတနံၤနံၤန့ၣ်မၤ ဝဲလၢတၢ်မၤလၤကပီၤကစၢ်အပူၤန့ၣ်လီၤ. ပှၤတဂၤဂ့ၤတဂၤဂ့ၤလၢအအီၣ်တၢ်တမံၤလၢ်လၢ်န့ၣ်
မၤဝဲလၢတၢ်မၤလၤမၤကပီၤကစၢ်အပူၤ, မ့ၢ်လၢအဝဲစံးဘျုး
ကစၢ်ယွၤလၢတၢ်အီၣ်အဂီၢ်အဃိလီၤ. မတၤတဂၤဂ့ၤတဂၤဂ့ၤလၢအတအီၣ်တၢ်အီၣ်တနီၤနီၤန့ၣ်မၤ
ဝဲလၢတၢ်မၤလၤမၤကပီၤကစၢ်အပူၤ, ဒီးစံးထီၣ်ပတြၢၤကစၢ်ယွၤအဘျုးအဖှိၣ်လီၤ.
7 ပတမူလၢပဂီၢ်ဒၣ်ပဝဲနီတဂၤဘၣ်, ဒီးပတသံလၢပဂီၢ်ဒၣ် ပဝဲနီတဂၤဘၣ်.
8 ပမ့ၢ်မူဒီးမ့ၢ်ပမူလၢကစၢ်အဂီၢ်, ဒီးပမ့ၢ်သံဒီးမ့ၢ်ပသံလၢကစၢ် အဂီၢ်လီၤ. မ့မ့ၢ်ဒ်န့ၣ်ဒီး, ပမူမ့ၢ်ဂ့ၤပသံမ့ၢ်ဂ့ၤ, ပမ့ၢ်ကစၢ်အတၢ်န့ၣ်လီၤ.
9 အဂ့ၢ်ဒ်လဲၣ်န့ၣ်, ခရံာ်သံဝဲဒီးဂဲၤဆၢထၢၣ်သမူထီၣ်က့ၤ မ့ၢ်ဒ်သိးကကဲထီၣ်ကစၢ်လၢပှၤအမူဒီးပှၤအသံတဖၣ်အဂီၢ်န့ၣ်လီၤ.
10 မ့မ့ၢ်ဒ်န့ၣ်ဒီး, နဲဒၣ်အံၤနစံၣ်ညီၣ်နဒီပုၢ်ဝဲၢ်ဘၣ်မနုၤလဲၣ်. ဒီးနဲဒၣ်အံၤ, နကွၢ်တလီၤနဒီပုၢ်ဝဲၢ်ဘၣ်မနုၤလဲၣ်. ပဝဲဒၣ်ခဲလၢာ်ပကဆၢထၢၣ်လၢကစၢ်ယွၤအမဲာ်ညါလၢအဝဲကစံၣ်ညီၣ် ပှၤအဂီၢ်လီၤ.
11 အဂ့ၢ်ဒ်လဲၣ်န့ၣ်, တၢ်ကွဲးအသးစံးဝဲ,
“ကစၢ်စံးဝဲဒၣ်, ဒ်ယမ့ၢ်ကစၢ်ယွၤလၢအမူဝဲအသိး
ပှၤကိးဂၤဒဲးကချံးခီၣ်တီၤလီၤလၢယမဲာ်ညါ
ဒီးပှၤကိးဂၤဒဲးကအၢၣ်လီၤအီလီၤလၢယမ့ၢ်ကစၢ်ယွၤန့ၣ်လီၤ.”
12 မ့မ့ၢ်ဒ်န့ၣ်ဒီး, ပဝဲကိးဂၤဒဲးပကဘၣ်ဟ့ၣ်တၢ်စံးဆၢလၢ ကစၢ်ယွၤလၢပကစၢ်ဒၣ်ပဝဲအဂ့ၢ်န့ၣ်လီၤ.
13 မၤသးဒ်န့ၣ်ဒီး, မ်ပကဆိကတီၢ်လၢတၢ်စံၣ်ညီၣ်လိာ်ပသး တဂၤဒီးတဂၤန့ၣ်တက့ၢ်. အခိၣ်တလိာ်နကြၢးပာ်လီၤနသး, လၢနသုတမၤတၢ်လၢအကဒုးလီၤဃံၤနဒီပုၢ်ဝဲၢ်မ့ၢ်ဂ့ၤ, လၢအကဒုးလီၤအီၤဆူတၢ်ဒဲးဘးအပူၤမ့ၢ်ဂ့ၤနီတမံၤတဂ့ၤ
အဂီၢ်တခီန့ၣ်လီၤ.
14 ဒ်ယအိၣ်လၢကစၢ်ယ့ၣ်ၡူးအပူၤအသိးန့ၣ်, ယသ့ၣ်ညါလီၤတံၢ်လၢတၢ်အီၣ်လၢအတကဆှီဒၣ်အတၢ်တအိၣ်နီ တမံၤဘၣ်. ဘၣ်ဆၣ်ဒီး, တုၤပှၤတဂၤနာ်ဝဲလၢတၢ်တမံၤမံၤအံၤ
တကဆှီဘၣ်ဒီး, တၢ်တမံၤန့ၣ်ကဲထီၣ်တၢ်တကဆှီဘၣ်လၢအဝဲဒၣ်
အဂီၢ်န့ၣ်လီၤ.
15 သုမ့ၢ်မၤတံာ်တာ်ဘၣ်သုဒီပုၢ်ဝဲၢ်အသးလၢသုတၢ်အီၣ်တမံၤမံၤ အဃိဒီး, သုမၤတၢ်အံၤတမ့ၢ်လၢတၢ်အဲၣ်တၢ်ကွံအပူၤလၢၤဘၣ်. သုတပျဲတၢ်အီၣ်လၢသုအီၣ်မၤဟးဂီၤကွံာ်ပှၤတဂၤလၢခရံာ်
သံလၢအဂီၢ်န့ၣ်တဂ့ၤ.
16 တဘၣ်ပျဲတၢ်လၢနဆိကမိၣ်လၢအမ့ၢ်တၢ်ဂ့ၤကဲထီၣ် တၢ်အၢလၢပှၤဂၤအဂီၢ်တဂ့ၤ.
17 အဂ့ၢ်ဒ်လဲၣ်န့ၣ်, ယွၤအဘီအမုၢ်တမ့ၢ်တၢ်လၢအဘၣ်ဃးဒီး တၢ်အီၣ်တၢ်အီဘၣ်. မ့မ့ၢ်ဘၣ်ဃးဒီးတၢ်တီတၢ်လိၤ,
တၢ်ဃူတၢ်ဖိး, ဒီးတၢ်သးခုလၢသးစီဆှံဟ့ၣ်ဝဲန့ၣ်လီၤ.
18 ဒီးပှၤလၢအမၤခရံာ်အတၢ်မၤလၢကျဲဒ်အံၤတဂၤန့ၣ်, ကဒုးသးခုယွၤဒီးကဒိးန့ၢ်ဘၣ်ပှၤကညီအတၢ်ဘၣ်သူၣ်ဘၣ်သးန့ၣ်လီၤ.
19 မၤသးဒ်န့ၣ်ဒီး, ပကဘၣ်ပညိၣ်ဃီၤပသးထီဘိဒီးမၤတၢ်တဖၣ် လၢအဟဲစိာ်တၢ်ဃူတၢ်ဖိးဒီးကဲထီၣ်တၢ်ဟ့ၣ်ဂံၢ်ဟ့ၣ်ဘါလိာ်သး
တဂၤဒီးတဂၤန့ၣ်လီၤ.
20 လၢတၢ်အီၣ်အဃိန့ၣ်, တဘၣ်မၤဟးဂီၤတၢ်လၢကစၢ်ယွၤမၤတ့ၢ် လံဝဲန့ၣ်တဂ့ၤ. တၢ်အီၣ်ခဲလၢာ်ကဆှီဝဲဒီးပအီၣ်သ့လီၤ. ဘၣ်ဆၣ်ဒီး
ပအီၣ်တၢ်တမံၤဂ့ၤတမံၤဂ့ၤမ့ၢ်ကဲထီၣ်တၢ်ဒဲးဘးလၢပှၤအဂၤ
တဂၤအဂီၢ်ဒီးမ့ၢ်တၢ်လၢအကမၣ်န့ၣ်လီၤ.
21 တၢ်လၢအဘၣ်မ့ၢ်ဝဲတၢ်ဟးဆှဲးတၢ်အီၣ်တၢ်ဖံးတၢ်ညၣ်, တၢ်အီစပံးထံ, ဒီးတၢ်မၤတၢ်အဂၤတမံၤလၢအကဒုးလီၤဃံၤနဒီပုၢ်ဝဲၢ်န့ၣ်လီၤ.
22 ပၢၤဃာ်တၢ်လၢနနာ်ဘၣ်ထွဲဒီးတၢ်ဂ့ၢ်အံၤလၢနကစၢ်ဒၣ်နဲ ဒီးကစၢ်ယွၤအဘၢၣ်စၢၤန့ၣ်တက့ၢ်. ပှၤလၢအတစံၣ်ညီၣ်ဃၣ်လီၤအသးဖဲအမၤတၢ်လၢအဆိ
ကမိၣ်ဝဲလၢအဘၣ်န့ၣ်, မ့ၢ်ပှၤတဂၤလၢအသးခုနီၢ်နီၢ်န့ၣ်လီၤ.
23 ဘၣ်ဆၣ်ဒီး ပှၤတဂၤလၢအအီၣ်တၢ်လၢတၢ်သးဒ့ဒီအပူၤ န့ၣ်ကစၢ်ယွၤစံၣ်ညီၣ်အီၤဖဲအအီၣ်တၢ်အခါန့ၣ်လီၤ. အဂ့ၢ်ဒ်အံၤတၢ်မၤန့ၣ်တသန့ၤထီၣ်အသးလၢတၢ်နာ်အလိၤဘၣ်. ဒီးတၢ်တမံၤဂ့ၤတမံၤဂ့ၤလၢအတသန့ၤထီၣ်အသးလၢတၢ်နာ်
န့ၣ်မ့ၢ်တၢ်ဒဲးဘးလီၤ.