10
1 ယဒီပုၢ်ဝဲၢ်သ့ၣ်ဧၢ, ယသးအတၢ်ဆၢန့ၢ်ဘၣ်လၢယသးဒီဖျၢၣ်ညါဒီး ယတၢ်ဃ့ထုကဖၣ်ကစၢ်ယွၤလၢယပှၤကလုာ်ဒၣ်ယဲအဂီၢ်, မ့ၢ်ဒၣ်ဒ်သိးအဝဲသ့ၣ်ကတုၤလၢတၢ်အုၣ်က့ၤခီၣ်က့ၤအဂီၢ်န့ၣ်လီၤ.
2 ယအုၣ်ယသးလၢအဝဲသ့ၣ်အဂီၢ်လၢအဝဲသ့ၣ်အဲၣ်ကစၢ်ယွၤ နီၢ်နီၢ်လီၤ. ဘၣ်ဆၣ်ဒီးအတၢ်အဲၣ်ကစၢ်ယွၤန့ၣ်တသန့ၤထီၣ်
အသးလၢတၢ်သ့ၣ်ညါအမ့ၢ်အတီအလိၤဘၣ်.
3 အဝဲသ့ၣ်တသ့ၣ်ညါကစၢ်ယွၤအတၢ်ပာ်တီပာ်လိၤပှၤ အကျဲဘၣ်ဒီးကျဲးစၢးဒုးအိၣ်ထီၣ်အကျဲဒၣ်ဝဲ, သတးဒီးအဝဲသ့ၣ်တဟ့ၣ်လီၤအသးဆူကစၢ်ယွၤအကျဲလၢ
အပာ်တီပာ်လိၤတၢ်အပူၤန့ၣ်ဘၣ်.
4 အဂ့ၢ်ဒ်လဲၣ်န့ၣ်, ခရံာ်ဒုးကတၢၢ်ကွံာ်တၢ်သိၣ်တၢ်သီဒ်သိးပှၤတဂၤ လၢ်လၢ်လၢအအိၣ်ဒီးတၢ်စူၢ်တၢ်နာ်န့ၣ်ကဘၣ်တၢ်ပာ်တီပာ်လိၤအီၤ
အဂီၢ်လီၤ.
5 စီၤမိၤၡ့ကွဲးတ့ၢ်တၢ်ဘၣ်ဃးတၢ်ပာ်တီပာ်လိၤပှၤခီဖျိ တၢ်တိၢ်န့ၢ်တၢ်သိၣ်တၢ်သီဒီးစံးဝဲ, “ပှၤတဂၤလၢ်လၢ်လၢအတိၢ်န့ၢ်တၢ်သိၣ်တၢ်သီအတၢ်မၤလိာ်
တဖၣ်န့ၣ်, ကမူဝဲလၢတၢ်န့ၣ်အဃိလီၤ” (ဘူၣ်ဘါ ၁၈:၅).
6 တၢ်ကွဲးအသးဘၣ်ဃးတၢ်ပာ်တီပာ်လိၤပှၤဒီးကစၢ်ယွၤခီ ဖျိတၢ်စူၢ်တၢ်နာ်စံးဝဲ, “တဘၣ်စံးလၢနသးကံၢ်ပူၤ, မတၤကလဲၤထီၣ်ဆူမူခိၣ်တဂၤလဲၣ်တဂ့ၤ”, (ဒ်ပစံးတၢ်
အသိး, ဒ်သိးကဟဲက့ၤကိးလီၤခရံာ်အဂီၢ်)
7 “တဘၣ်စံးစ့ၢ်ကီးလၢ, မတၤကလဲၤလီၤဆူဟီၣ်ခိၣ်တၢ်ယိာ်ပူၤ တဂၤလဲၣ်တဂ့ၤ,” (ဒ်ပစံးတၢ်အသိး, ဒ်သိးကဟဲက့ၤကိးထီၣ်ခရံာ်လၢတၢ်သံအဂီၢ်)
8 တၢ်လၢအစံးဝဲတခီမ့ၢ်တၢ်အံၤ, “ကစၢ်ယွၤအတၢ်ကစီၣ်အိၣ်ဘူး ဒီးနၤ, အိၣ်လၢနထးခိၣ်လိၤဒီးလၢနသးကံၢ်ပူၤ” ဒ်ပစံးတၢ်အသိး, တၢ်စူၢ်တၢ်နာ်အတၢ်ကစီၣ်လၢပစံၣ်တဲၤတဲလီၤအီၤန့ၣ်လီၤ
(သိၣ်သီ ၃၀:၁၂-၁၄).
9 နမ့ၢ်အၢၣ်လီၤလၢနထးခိၣ်လၢယ့ၣ်ၡူးမ့ၢ်ကစၢ်လီၤ, ဒီးနမ့ၢ်နာ်လၢနသးကံၢ်ပူၤလၢကစၢ်ယွၤဒုးဂဲၤဆၢထၢၣ်က့ၤအီၤ လၢတၢ်သံန့ၣ်ဒီး, နကဘၣ်တၢ်အုၣ်က့ၤခီၣ်က့ၤနၤလီၤ.
10 အဂ့ၢ်ဒ်လဲၣ်န့ၣ်, ခီဖျိပနာ်တၢ်လၢပသးကံၢ်ပူၤန့ၣ်ပဘၣ်တၢ်ပာ် တီပာ်လိၤပှၤဒီးကစၢ်ယွၤ, ဒီးခီဖျိပအၢၣ်လီၤလၢပထးခိၣ်န့ၣ်ပတုၤလၢတၢ်အုၣ်က့ၤခီၣ်က့ၤပှၤ
န့ၣ်လီၤ.
11 တၢ်ကွဲးအသးစီဆှံစံးဝဲ, “ပှၤလၢအစူၢ်က့ၤနာ်က့ၤအီၤတဂၤ လၢ်လၢ်န့ၣ်အသးတဟးဂီၤဘၣ်ဝဲဘၣ်” (ၡါ ၂၈:၁၆).
12 တၢ်အံၤဘၣ်ဃးဒီးပှၤကိးဂၤဒဲး, မ့ၢ်လၢတၢ်လီၤဆီတအိၣ် လၢပှၤယူဒၤဖိဒီးပှၤကလုာ်ဂၤတဖၣ်အဘၢၣ်စၢၤဘၣ်အဃိလီၤ. ကစၢ်ယွၤမ့ၢ်ကစၢ်တဂၤဃီလၢပှၤခဲလၢာ်အဂီၢ်ဒီးပှၤလၢအကိး
ထီၣ်အီၤန့ၣ် ဆိၣ်ဂ့ၤဝဲထူးထူးတီၤတီၤခဲလၢာ်လီၤ.
13 ဒ်တၢ်ကွဲးအသးစီဆှံစံးဝဲအသိး, “ကယဲၢ်ပှၤလၢအကိးထီၣ် ကစၢ်အမံၤန့ၣ်, ကတုၤလၢတၢ်အုၣ်က့ၤခီၣ်က့ၤအီၤလီၤ”
(အ့ ၂:၃၂).
14 ဘၣ်ဆၣ်ဒီးအဝဲသ့ၣ်မ့ၢ်တနာ်တၢ်ဘၣ်ဒီးကိးထီၣ်အီၤ ကသ့ဒ်လဲၣ်. ဒီးအဝဲဒၣ်မ့ၢ်တနၢ်ဟူဘၣ်တၢ်ကစီၣ်ဘၣ်ဒီး,
နာ်တၢ်ကသ့ဒ်လဲၣ်. ဒီးတၢ်ကစီၣ်မ့ၢ်တဘၣ်တၢ်စံၣ်တဲၤတဲ
လီၤအီၤဘၣ်ဒီး, နၢ်ဟူတၢ်ကသ့ဒ်လဲၣ်.
15 ဒီးပှၤစိာ်တၢ်ကစီၣ်တဖၣ်မ့ၢ်တဘၣ်တၢ်မၢလီၤအီၤဘၣ်ဒီး, တၢ်ကစီၣ်ဘၣ်တၢ်စံၣ်တဲၤတဲလီၤအီၤကသ့ဒ်လဲၣ်. ဒ်တၢ်ကွဲးအသးစီဆှံစံးဝဲအသိး, “ပှၤလၢအစံၣ်တဲၤတဲလီၤတၢ်သးခုအကစီၣ်တဖၣ် အတၢ်ဟဲမ့ၢ်တၢ်လၢအဂ့ၤဆံးဒိၣ်လဲၣ်” (ၡါ ၅၂:၇)
16 ဘၣ်ဆၣ်ဒီး, ပှၤတတူၢ်လိာ်တၢ်သးခုအကစီၣ်အံၤကိးဂၤ ဒဲးဘၣ်. ဝံယၡါယၤအကစၢ်ဒၣ်ဝဲစံး, “ကစၢ်ဧၢ, မ့ၢ်မတၤစူၢ်က့ၤနာ်က့ၤပတၢ်ကစီၣ်လဲၣ်” (ၡါ ၅၃:၁)
17 သတးဒီး, တၢ်စူၢ်တၢ်နာ်အိၣ်ထီၣ်ဝဲလၢတၢ်နၢ်ဟူဘၣ်တၢ် ကစီၣ်အဃိ, ဒီးတၢ်ကစီၣ်အံၤဟဲခီဖျိတၢ်စံၣ်တဲၤတဲလီၤခရံာ်
န့ၣ်လီၤ.
18 ဘၣ်ဆၣ်ဒီးယစံး, အဝဲသ့ၣ်တနၢ်ဟူဘၣ်တၢ်ကစီၣ် န့ၣ်မ့ၢ်ဝဲတီဝဲကစီဒီဧါ. အဝဲသ့ၣ်နၢ်ဟူဝဲကစီဒီလီၤ. အဂ့ၢ်ဒ်လဲၣ်န့ၣ်တၢ်ကွဲးအသးစီဆှံစံးဝဲ,
“အဝဲသ့ၣ်အကလုၢ်တဖၣ်သီၣ်ထီၣ်ဝဲသကုၤဟီၣ်ခိၣ်ချၢဒီး
အတၢ်ကတိၤတဖၣ်တုၤဃီၤဝဲလၢ
ဟီၣ်ခိၣ်အကတၢၢ်န့ၣ်လီၤ” (စံး ၁၉:၄).
19 ကစံးကဒီးယဲ, ပှၤအံၣ်စရ့လးဖိတဖၣ်တနၢ်ပၢၢ်ဝဲဘၣ်ဧါ. စီၤမိၤၡ့အကစၢ်ဒၣ်ဝဲမ့ၢ်ပှၤအဆိကတၢၢ်တဂၤလၢအစံးဆၢတၢ်ဒီး စံးဝဲ,
“ယကထိၣ်ဂဲၤသုတၢ်သးက့ၣ်ခီဖျိပှၤတဖၣ်လၢ
အတမ့ၢ်ဘၣ်ပှၤတကလုာ်ဘၣ်န့ၣ်လီၤ.
ယကမၤသးထီၣ်သုခီဖျိပှၤတကလုာ်လၢ
အတၢ်နူၤပၢၢ်နၢ်ဘှါတအိၣ်ဘၣ်န့ၣ်လီၤ.”
20 ဒီး ဝံယၡါယၤ မ့ၢ်ပှၤအဒူတက့ၢ်ဒီးစံးဝဲ,
“ယဘၣ်တၢ်ထံၣ်န့ၢ်ယၤလၢပှၤလၢ
အတဃုယၤတဖၣ်,
ဒီးယလီၣ်ဖျါထီၣ်ယသးလၢပှၤလၢ
အတသံကွၢ်ယဂ့ၢ်တဖၣ်န့ၣ်လီၤ.”
21 မ့မ့ၢ်တၢ်ဘၣ်ဃးဒီးအံၣ်စရ့လးန့ၣ်အဝဲစံး, “ယယူာ်ဃီၤယစု ဆူပှၤလၢအတဒိကနၣ်တၢ်ဒီးပူထီၣ်လီထီၣ်တၢ်တကလုာ်အအိၣ်
သ့တနံၤကျၢၤန့ၣ်လီၤ.”