ပှၤရိမ့ၤဖိတဖၣ်အအိၣ်
ROMANS
စီၤပီလူးအလံာ်ပရၢဆူပှၤရိမ့ၤဖိတဖၣ်အအိၣ်အံၤဘၣ် တၢ်ကွဲးအီၤလၢတၢ်ကတဲာ်ကတီၤကျဲလၢအဝဲကလဲၤအိၣ် သကိးတၢ်အိၣ်ဖှိၣ်လၢဝ့ၢ်ရိမ့ၤအဂီၢ်န့ၣ်လီၤ. အတၢ်ရဲၣ်တၢ်ကျဲၤတခီမ့ၢ်လၢအကမၤတၢ်လၢ ပှၤခရံာ်ဖိဖဲန့ၣ်တဖၣ်အသိးအကျါတစိၢ်တလီၢ်ဝံၤဒီး, ခီဖျိအဝဲသ့ၣ်အတၢ်မၤစၢၤအီၤန့ၣ်ကလဲၤဝဲဆူညါ ဆူကီၢ်စပၤနံန့ၣ်လီၤ. အဝဲကွဲးဖျါထီၣ်အတၢ်နၢ်ပၢၢ်ဘၣ် ဃးပှၤခရံာ်ဖိအတၢ်စူၢ်တၢ်နာ်ဒီးတၢ်အိၣ်မူမၤထွဲအီၤ လၢပှၤခရံာ်ဖိတဖၣ်အတၢ်အိၣ်မူအပူၤအဂီၢ်န့ၣ်လီၤ. လံာ်အံၤအိၣ်လၢပှဲၤဒီးစီၤပီလူးအတၢ်ပာ်ဖျါအလၢ အပှဲၤဘၣ်ဃးအတၢ်ကစီၣ်လၢအသးအိၣ်ဟ့ၣ်နီၤလီၤဝဲ တဖၣ်န့ၣ်လီၤ.
အဝဲဆၢဂ့ၤဆၢဝါတၢ်အိၣ်ဖှိၣ်လၢဝ့ၢ်ရိမ့ၤဒီးတဲဘၣ် အဝဲသ့ၣ်လၢကဘါထုကဖၣ်လၢအဝဲသ့ၣ်အဂီၢ်ဝံၤဒီး, စီၤပီလူးပာ်ဖျါအလံာ်အတၢ်ဂ့ၢ်မိၢ်ပှၢ်လၢအမ့ၢ်ဝဲ, “တၢ်သးခုအကစီၣ်လီၣ်ဖျါထီၣ်ကစၢ်ယွၤအတၢ်ပာ်တီ ပာ်လိၤပှၤကညီဒီးအကစၢ်ဒၣ်ဝဲဒီးမၤဝဲခီဖျိတၢ်စူၢ်တၢ်နာ်, စးထီၣ်လၢအခီၣ်ထံးတုၤလၢအကတၢၢ်န့ၣ်လီၤ” (ရိမ့ၤ ၁:၁၇).
ဝံၤဒီးစီၤပီလူးတဲဖျါအါထီၣ်တၢ်ဂ့ၢ်မိၢ်ပှၢ်ဝဲအံၤန့ၣ်လီၤ. ပှၤဟီၣ်ခိၣ်ဖိခဲလၢာ်, ယူဒၤဖိတဖၣ်မ့ၢ်ဂ့ၤ, ပှၤကလုာ်ဂၤ တဖၣ်မ့ၢ်ဂ့ၤ, လိၣ်တၢ်မၤလိၤမၤဘၣ်က့ၤဒီးကစၢ်ယွၤ, မ့ၢ်လၢပှၤခဲလၢာ်အိၣ်လၢတၢ်ဒဲးဘးအစိကမီၤအဖီလာ် အဃိန့ၣ်လီၤ. ပှၤခဲလၢာ်ဘၣ်တၢ်မၤလိၤမၤဘၣ်က့ၤဒီး ကစၢ်ယွၤခီဖျိတၢ်နာ်လၢယ့ၣ်ၡူးခရံာ်အပူၤအဃိန့ၣ်လီၤ.
ဝံၤဒီးစီၤပီလူးပာ်ဖျါတၢ်မူအသီလၢခရံာ်အပူၤလၢ အအိၣ်ထီၣ်ဝဲခီဖျိတၢ်ရ့လိာ်မုာ်လိာ်အသီဒီးကစၢ်ယွၤ န့ၣ်လီၤ. ပှၤစူၢ်က့ၤနာ်က့ၤတၢ်အိၣ်ဒီးတၢ်ဃူတၢ်ဖိးဒီး ကစၢ်ယွၤ, ဒီးဘၣ်တၢ်မၤထူၣ်ဖျဲးအီၤလၢကစၢ်ယွၤအသး လၢတၢ်ဒဲးဘးဒီးတၢ်သံအစိကမီၤအဖီလာ်န့ၣ်လီၤ. လၢအဆၢဒိၣ် ၅-၈ န့ၣ်, စီၤပီလူးကတိၤသကိးတၢ်ဘၣ်ဃး ကစၢ်ယွၤအတၢ်သိၣ်တၢ်သီအတၢ်တိာ်ဒီးကစၢ်ယွၤအသး အစိကမီၤလၢပှၤစူၢ်က့ၤနာ်က့ၤတၢ်အတၢ်အိၣ်မူပူၤန့ၣ်လီၤ. ဝံၤဒီး, စီၤပီလူးကျဲးစၢးစံးဆၢတၢ်သံကွၢ်လၢ ပှၤယူဒၤဖိဒီးပှၤကလုာ်ဂၤတဖၣ်နုာ်လီၤဘၣ်လၢ ကစၢ်ယွၤအတၢ်ရဲၣ်တၢ်ကျဲၤလၢပှၤဟီၣ်ခိၣ်ဖိအဂီၢ်ဒ်လဲၣ် အဂ့ၢ်န့ၣ်လီၤ. အဝဲထံၣ်သ့ၣ်ညါဝဲလၢပှၤယူဒၤဖိတဖၣ် အတၢ်တတူၢ်လိာ်ယ့ၣ်ၡူးအံၤမ့ၢ်ယွၤအတၢ်ရဲၣ်တၢ်ကျဲၤ တနီၤလၢကထုးဖှိၣ်က့ၤပှၤဟီၣ်ခိၣ်ဖိခဲလၢာ်လၢကတုၤဃီၤ ဘၣ်လၢကစၢ်ယွၤအဘျုးအဖှိၣ်လၢယ့ၣ်ၡူးခရံာ်အပူၤအဂီၢ် န့ၣ်လီၤ. ဒီးအဝဲနာ်စ့ၢ်ကီးဝဲဒၣ်လၢပှၤယူဒၤဖိတဖၣ်တမ့ၢ် လၢအကသမၢယ့ၣ်ၡူးထီဘိဘၣ်န့ၣ်လီၤ.
လၢခံကတၢၢ်န့ၣ်, စီၤပီလူးကွဲးတၢ်ဘၣ်ဃးတၢ်ကဘၣ်အိၣ်မူ ခရံာ်ဖိအတၢ်အိၣ်မူဒ်လဲၣ်, လီၤဆီဒၣ်တၢ်ဘၣ်ဃးဒီးတၢ်အဲၣ် တၢ်ကွံအကျဲလၢတၢ်ရ့လိာ်မုာ်လိာ်ဒီးပှၤအဂၤတဖၣ်န့ၣ် လီၤ. အဝဲယၢၤထီၣ်စ့ၢ်ကီးတၢ်ဂ့ၢ်အဂၤတဖၣ်ဘၣ်ထွဲဒီး တၢ်မၤယွၤအတၢ်မၤ, ပှၤခရံာ်ဖိတဖၣ်အမူအဒါဘၣ်ထွဲဒီး ထံကီၢ်မ့ၢ်ဂ့ၤ, ဘၣ်ထွဲဒီးပှၤကဒဲကဒဲမ့ၢ်ဂ့ၤဒီးတၢ်သံကွၢ် တဖၣ်ဘၣ်ထွဲဒီးသးလၢအသ့ၣ်ညါဒၣ်တၢ်န့ၣ်လီၤ. အဝဲမၤကတၢၢ်က့ၤအလံာ်ပရၢလၢအနီၢ်ကစၢ်ဒၣ်ဝဲအတၢ် ကစီၣ်တဖၣ်ဒီးတၢ်ကတိၤစံးထီၣ်ပတြၢၤကစၢ်ယွၤန့ၣ်လီၤ.
1
1 လၢစီၤပီလူး, ယ့ၣ်ၡူးခရံာ်အခ့အပှၤဒီးတၢ်မၢဖိတဂၤ လၢအဘၣ်တၢ်ဃုထၢဒီးကိးထီၣ်အီၤလၢကစၢ်ယွၤဒ်သိး ကစံၣ်တဲၤတဲလီၤတၢ်သးခုကစီၣ်အဂီၢ်အအိၣ်န့ၣ်လီၤ.
2 တၢ်သးခုအကစီၣ်အံၤဘၣ်တၢ်စံးပာ်တ့ၢ်အီၤလၢကစၢ်ယွၤခီ ဖျိအဝံတဖၣ်ယံာ်မးလံ, ဒ်အဘၣ်တၢ်ကွဲးဃာ်အီၤလၢလံာ်စီဆှံ အပူၤအသိးန့ၣ်လီၤ.
3 တၢ်ကွဲးအံၤဘၣ်ဃးဒီးအဖိခွါပကစၢ်ယ့ၣ်ၡူးခရံာ်, လၢသွံၣ်ထံဖံးညၣ်န့ၣ်အိၣ်ဖျဲၣ်ထီၣ်ဝဲဒ်စီၤဒၤဝံးအစၢၤ အသွဲၣ်တဂၤအသိးန့ၣ်လီၤ.
4 မ့မ့ၢ်ယွၤအတၢ်စီတၢ်ဆှံလၢအအိၣ်လၢအပူၤန့ၣ်, ပာ်ဖျါထီၣ်အီၤဒ်အမ့ၢ်ကစၢ်ယွၤအဖိခွါအိၣ်ဒီးတၢ်စိတၢ် ကမီၤဖးဒိၣ်, ခီဖျိတၢ်ဒုးဂဲၤဆၢထၢၣ်က့ၤအီၤလၢတၢ်သံ အပူၤန့ၣ်လီၤ.
5 ခီဖျိအီၤန့ၣ်, ကစၢ်ယွၤဟ့ၣ်ယၤတၢ်ဘျုးတၢ်ဖှိၣ်ဒီးတၢ် ခွဲးတၢ်ယာ်လၢယကကဲထီၣ်ဘၣ်တၢ်မၢဖိတဂၤလၢခရံာ် အဂီၢ်, ဒ်သိးယကဆှၢက့ၤပှၤကလုာ်တဖၣ်ခဲလၢာ်ဆူ တၢ်စူၢ်က့ၤနာ်က့ၤအီၤအဂီၢ်န့ၣ်လီၤ.
6 တၢ်အံၤပၣ်ဃုာ်ဒီးသုဝဲလၢအအိၣ်လၢဝ့ၢ်ရိမ့ၤအပူၤ တဖၣ်, လၢကစၢ်ယွၤကိးထီၣ်တ့ၢ်အီၤဒ်သိးအကဘၣ် ဃးက့ၤဒီးယ့ၣ်ၡူးခရံာ်အဂီၢ်န့ၣ်လီၤ.
7 လၢတၢ်န့ၣ်အဃိယကွဲးတၢ်ဆူသုဝဲခဲလၢာ်လၢအအိၣ် လၢဝ့ၢ်ရိမ့ၤအပူၤ, ပှၤလၢကစၢ်ယွၤအဲၣ်ဘၣ်အီၤဒီးကိးထီၣ်အီၤလၢ အကမ့ၢ်အပှၤဂီၢ်မုၢ်ဒၣ်ဝဲတဖၣ်အဂီၢ်အအိၣ်န့ၣ်လီၤ.
ပပၢ်ကစၢ်ယွၤပပၢ်ဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုး တၢ်ဖှိၣ်ဒီးတၢ်ဃူတၢ်ဖိးတက့ၢ်.
8 အဆိကတၢၢ်န့ၣ်, ယစံးဘျုးယကစၢ်ယွၤခီဖျိယ့ၣ်ၡူးခရံာ်လၢ သုဝဲခဲလၢာ်အဃိ, မ့ၢ်လၢသုတၢ်စူၢ်တၢ်နာ်အဂ့ၢ်ဟူထီၣ်သါလီၤလၢဟီၣ်ခိၣ်ဒီဘ့ၣ် အဃိန့ၣ်လီၤ.
9 အဂ့ၢ်ဒ်အံၤ, ကစၢ်ယွၤလၢယမၤအတၢ်လၢယသးဒီဖျၢၣ်ညါ ခီဖျိတၢ်စံၣ်တဲၤတဲလီၤတၢ်သးခုကစီၣ်ဘၣ်ဃးဒီးအဖိခွါန့ၣ်, မ့ၢ်ပှၤအုၣ်အသးလၢတၢ်လၢယစံးတဖၣ်မ့ၢ်ဝဲတီဝဲန့ၣ်လီၤ. ကစၢ်ယွၤသ့ၣ်ညါလၢယသ့ၣ်နီၣ်ထီၣ်သုထီဘိလၢယတၢ် ထုကဖၣ်အပူၤန့ၣ်လီၤ.
10 ယဃ့ကစၢ်ယွၤလၢမ့ၢ်ဘၣ်အသးဒီးယကလဲၤအိၣ်သကိးဘၣ် သုခဲအံၤအဂီၢ်န့ၣ်လီၤ.
11 အဂ့ၢ်မ့ၢ်လၢ, ယသးအိၣ်ထံၣ်ဘၣ်သုဒိၣ်မးဒ်သိးယကနီၤ ဟ့ၣ်သုလၢသးအတၢ်ဆိၣ်ဂ့ၤလၢတၢ်မၤဆူၣ်ထီၣ်သုဂံၢ် သုဘါအဂီၢ်န့ၣ်လီၤ.
12 ဒ်ပစံးတၢ်အသိး, ပတၢ်ထံၣ်လိာ်ပသးကကဲထီၣ်တၢ်မၤစၢၤတဘျီဃီလၢသုဂီၢ်ဒီး ယဂီၢ်န့ၣ်လီၤ. ယတၢ်စူၢ်တၢ်နာ်ကမၤစၢၤသု, ဒီးသုတၢ်စူၢ်တၢ်နာ်ကမၤစၢၤယၤန့ၣ်လီၤ.
13 ယဒီပုၢ်ဝဲၢ်သ့ၣ်ဧၢ, သုကဘၣ်သ့ၣ်နီၣ်ထီၣ်လၢအါစုအါဘျီ ယတိာ်ပာ်လၢယကလဲၤဆူသုအိၣ်, ဘၣ်ဆၣ်တၢ်မၤတံာ်တာ်ယကျဲအိၣ်ထီၣ်ဝဲထီဘိလီၤ. ယသးအိၣ်မၤန့ၢ်စ့ၢ်ကီးသးသမူတဖၣ်လၢသုကျါ, ဒ်ယမၤန့ၢ်လၢပှၤကလုာ်ဂၤတဖၣ်အကျါအသိးန့ၣ်လီၤ.
14 အဂ့ၢ်ဒ်အံၤ, ယဒ့ၣ်ကမၢ်အိၣ်လၢပှၤကိးကလုာ်ဒဲး, ပှၤကြံးခ်ဖိမ့ၢ်ဂ့ၤ, ပှၤပှၢ်လၢ်ကျါမ့ၢ်ဂ့ၤ, ပှၤကူၣ်တၢ်သ့မ့ၢ်ဂ့ၤ, ပှၤကူၣ်တၢ်တသ့မ့ၢ်ဂ့ၤန့ၣ်လီၤ.
15 လၢတၢ်န့ၣ်အဃိ, ယသးဆူၣ်စံၣ်တဲၤတဲလီၤတၢ်သးခုကစီၣ်လၢ သုဝဲလၢအအိၣ်လၢဝ့ၢ်ရိမ့ၤအပူၤတဖၣ်အဂီၢ်စ့ၢ်ကီးန့ၣ်လီၤ.
16 အဂ့ၢ်ဒ်အံၤ, ယမဲာ်တဆှးဘၣ်လၢခရံာ်အတၢ်သးခုကစီၣ်အဃိဘၣ်. မ့ၢ်ကစၢ်ယွၤအစိကမီၤလၢကအုၣ်က့ၤခီၣ်က့ၤပှၤလၢအစူၢ်က့ၤနာ် က့ၤတၢ်ခဲလၢာ်, ပှၤယူဒၤဖိတဖၣ်လၢအဆိဒီး ပှၤကြံးခ်ဖိတဖၣ်စ့ၢ်ကီးန့ၣ်လီၤ.
17 အဂ့ၢ်ဒ်အံၤ, တၢ်သးခုအကစီၣ်လီၣ်ဖျါထီၣ်ကစၢ်ယွၤအတၢ် ပာ်တီပာ်လိၤပှၤကညီဒ်လဲၣ်အဂ့ၢ်န့ၣ်လီၤ. မၤဝဲခီဖျိတၢ်စူၢ်တၢ်နာ်, စးထီၣ်လၢအခီၣ်ထံးတုၤလၢအကတၢၢ်လီၤ. ဒ်တၢ်ကွဲးအသးစီဆှံစံးဝဲ အသိး, “ပှၤလၢအဘၣ်တၢ်ပာ်တီပာ်လိၤအီၤလၢကစၢ်ယွၤခီဖျိတၢ်စူၢ် တၢ်နာ်န့ၣ်, ကမူဝဲလီၤ.”
18 ကစၢ်ယွၤအတၢ်သးဒိၣ်ဘၣ်တၢ်လီၣ်ဖျါထီၣ်အီၤလၢအဟဲလၢ မူခိၣ်ထီဒါပှၤဟီၣ်ခိၣ်ဖိအတၢ်ဒဲးဘးဒီးအတၢ်အၢတၢ်သီခဲလၢာ် န့ၣ်လီၤ. ပှၤဟီၣ်ခိၣ်ဖိအကျဲအအၢအသီတဖၣ်တြီဃာ်အတၢ် သ့ၣ်ညါနၢ်ပၢၢ်တၢ်မ့ၢ်တၢ်တီန့ၣ်လီၤ.
19 အဂ့ၢ်ဒ်အံၤ, မ့ၢ်လၢတၢ်လၢပှၤကညီသ့ၣ်ညါနၢ်ပၢၢ်သ့ဘၣ်ဃးဒီး ကစၢ်ယွၤန့ၣ်, အိၣ်ဖျါတြၢၢ်ကလာ်လၢအဝဲသ့ၣ်အမဲာ်ညါအဃိန့ၣ်လီၤ. အဂ့ၢ်ဒ်အံၤ, ယွၤအကစၢ်ဒၣ်ဝဲမၤဖျါအီၤတြၢၢ်ကလာ်လၢအဝဲသ့ၣ် အဂီၢ်လီၤ.
20 စးထီၣ်လၢကစၢ်ယွၤတ့လီၤဟီၣ်ခိၣ်လံၤလံၤန့ၣ်, အတၢ်စိကမီၤအထူအယိာ်ဒီးအတၢ်မ့ၢ်ကစၢ်ယွၤအန့ဆၢၣ်လၢ ပှၤထံၣ်အီၤတသ့ဘၣ်တဖၣ်အံၤန့ၣ်, ဘၣ်တၢ်သ့ၣ်ညါနၢ်ပၢၢ်အီၤဆှံဆှံသ့ဝဲခီဖျိတၢ်လၢကစၢ် ယွၤတ့လီၤဝဲသ့ၣ်တဖၣ်အပူၤန့ၣ်လီၤ. လၢတၢ်န့ၣ်အဃိ, အဝဲသ့ၣ်ကတိၤပူၤဖျဲးအသးတသ့ဘၣ်န့ၣ်လီၤ.
21 အဝဲသ့ၣ် သ့ၣ်ညါကစၢ်ယွၤ, ဘၣ်ဆၣ်အဝဲသ့ၣ်တဟ့ၣ်အီၤတၢ်လၤကပီၤဒ်ကစၢ်ယွၤအသိးဘၣ်ဒီး တစံးထီၣ်ပတြၢၤအီၤစ့ၢ်ကီးဘၣ်န့ၣ်လီၤ. မ့မ့ၢ်, အတၢ်ဆိကမိၣ်တဖၣ်ကဲထီၣ်တၢ်လၢအခီပညီတအိၣ် လၢာ်လၢာ်ဆ့ဆ့ဒီးအဝဲသ့ၣ်ဆိကမိၣ်တၢ်တဘၣ်ဘၣ်ဒီး အသးန့ၣ်ခံးလီၤဝဲလီၤ.
22 အဝဲသ့ၣ်စံးလီၤအသးလၢအကူၣ်တၢ်သ့, ဘၣ်ဆၣ်အဝဲသ့ၣ်မ့ၢ်ဒၣ်ပှၤဟးဂီၤဖိတဖၣ်န့ၣ်လီၤ.
23 လၢကဘူၣ်ထီၣ်ဘါထီၣ်ကစၢ်ယွၤလၢအသံတသ့ဘၣ်အလီၢ်န့ၣ်, အဝဲသ့ၣ်ဘါထီၣ်တၢ်ဂီၤတၢ်ဖီၣ်တဖၣ်လၢအလီၤဂာ်ဒီးပှၤကညီ လၢအသံသ့, မ့တမ့ၢ်ထိၣ်ဧိၤလံာ်ဧိၤ, မ့တမ့ၢ်ဆၣ်ဖိကီၢ်ဖိ တဖၣ်, မ့တမ့ၢ်ဂုၢ်ဧိၤဒးဧိၤတဖၣ်တခီန့ၣ်လီၤ.
24 လၢတၢ်အံၤအဃိ, ကစၢ်ယွၤဟ့ၣ်လီၤကွံာ်အဝဲသ့ၣ်ဆူ တၢ်ဘၣ်အၢဘၣ်သီတဖၣ်လၢအဝဲသ့ၣ်သးအိၣ်မၤဝဲအအိၣ်, ဒီးတၢ်လၢအဝဲသ့ၣ်မၤလိာ်အသးတဂၤဒီးတဂၤတဖၣ်န့ၣ်, လီၤမဲာ်ဆှးမးန့ၣ်လီၤ.
25 အဝဲသ့ၣ်ဆီတလဲကစၢ်ယွၤအတၢ်မ့ၢ်တၢ်တီလၢတၢ်ကဘျံးကဘျၣ်, ဒီးလၢအဝဲသ့ၣ်ကဘူၣ်ထီၣ်ဘါထီၣ်တၢ်ဘၣ်တ့ကစၢ်လၢအကြၢး ဒီးတၢ်စံးထီၣ်ပတြၢၤအီၤလီၤစိၤလီၤထီတဂၤအလီၢ်န့ၣ်, အဝဲသ့ၣ်ဘူၣ်ထီၣ်ဘါထီၣ်တၢ်ဘၣ်တ့တဖၣ်ဒီးမၤအတၢ်မၤန့ၣ်လီၤ.
26 မ့ၢ်လၢပှၤကညီမၤတၢ်အံၤအဃိဒီး, ကစၢ်ယွၤဟ့ၣ်လီၤကွံာ်အဝဲသ့ၣ်ဆူတၢ်သူၣ်ကတၢသးကတၢလၢ အလီၤမဲာ်ဆှးတဖၣ်အပူၤန့ၣ်လီၤ. ပိာ်မုၣ်တဖၣ်ဒၣ်လဲာ်ဘိးဃၣ်ကဒါ ကွံာ်တၢ်သူပိာ်မုၣ်အက့ၢ်အဂီၤလၢကျဲအဘၣ်ဆူတၢ်သူအီၤလၢ အတမ့ၢ်ဘၣ်န့ဆၢၣ်အကျဲအကပူၤန့ၣ်လီၤ.
27 ဒ်န့ၣ်အသိး, ပိာ်ခွါတဖၣ်စ့ၢ်ကီးဃၣ်ကွံာ်အသးလၢတၢ်မံဃုာ် အိၣ်ဃုာ်ဒီးပိာ်မုၣ်ပိာ်မၢၤဒ်တၢ်ဘၣ်တ့အကျဲအိၣ်ဝဲအသိး, ဒီးအဝဲသ့ၣ်ကွၢ်လိာ်အသးကဒဲကဒဲအိၣ်ဒီးတၢ်သးကတၢ န့ၣ်လီၤ. တၢ်လၢပိာ်ခွါတဖၣ်မၤလိာ်အသးတဂၤဒီးတဂၤန့ၣ်, မ့ၢ်တၢ်လၢအလီၤမဲာ်ဆှးဒိၣ်မး, ဒီးလၢတၢ်အံၤအဃိ, အဝဲသ့ၣ်ဘၣ်တၢ်စံၣ်ညီၣ်အီၤဒ်အကြၢးတူၢ်ဘၣ်ဝဲလၢအမၤ ကမၣ်တၢ်အသိးန့ၣ်လီၤ.
28 မ့ၢ်လၢပှၤကညီတတူၢ်လိာ်ပာ်လၢအသးပူၤ, တၢ်သ့ၣ်ညါအမ့ၢ်အတီဘၣ်ဃးဒီးကစၢ်ယွၤလၢအသးပူၤအဃိ, တၢ်ဟ့ၣ်လီၤအဝဲသ့ၣ်ဆူတၢ်ဆိကမိၣ်ဟးဂီၤတဖၣ်အပူၤဒ်သိး အဝဲသ့ၣ်ကမၤတၢ်လၢအတကြၢး မၤဝဲတဖၣ်န့ၣ်လီၤ.
29 အဝဲသ့ၣ်လၢပှဲၤဝဲဒီးတၢ်လၢအအၢအသီအကလုာ် ကလုာ်, တၢ်အၢတၢ်သီ, တၢ်သူၣ်လီသးကွံဒီးတၢ်လုၢ်အၢလၢ်သီ တဖၣ်န့ၣ်လီၤ. အဝဲသ့ၣ်လၢပှဲၤဝဲဒီးတၢ်သူၣ်က့ၣ်သးကါ, တၢ်မၤသံပှၤကညီ, တၢ်အ့ၣ်လိာ်ဆိးက့, တၢ်လီတၢ်ဝ့ၤဒီးတၢ်ဆၢအၢဆၢသီတဖၣ်န့ၣ်လီၤ.
30 အဝဲသ့ၣ်သီၣ်ဝံသဲကလၤ, ကတိၤအၢကတိၤသီလိာ်သးတဂၤဒီးတဂၤ န့ၣ်လီၤ. အဝဲသ့ၣ်သူၣ်ဟ့သးဟ့ကစၢ်ယွၤ, တယူးယီၣ်ပာ်ကဲတၢ်ဘၣ်, ပာ်ကဖၢလၢအသးဒီးတဲဒိၣ်တဲသွါလီၤအသးန့ၣ်လီၤ. အဝဲသ့ၣ်ဃုဆိကမိၣ်အါထီၣ်ကျဲလၢအကမၤတၢ်အၢတၢ်သီဒီး တဒိကနၣ်အမိၢ်အပၢ်တဖၣ်အကလုၢ်န့ၣ်ဘၣ်.
31 အဝဲသ့ၣ်အသးလၢအသ့ၣ်ညါဒၣ်တၢ်တအိၣ်ဘၣ်. အဝဲသ့ၣ်တမၤလၢပှဲၤအတၢ်အၢၣ်လီၤအီလီၤတဖၣ်ဘၣ်, ဒီးတဒုးနဲၣ်တၢ်သူၣ်ဂ့ၤသးဝါမ့ၢ်ဂ့ၤ, တၢ်သးကညီၤမ့ၢ်ဂ့ၤဆူပှၤဂၤ တဖၣ်န့ၣ်ဘၣ်.
32 အဝဲသ့ၣ် သ့ၣ်ညါဝဲလၢကစၢ်ယွၤအတၢ်သိၣ်တၢ်သီစံးဝဲလၢပှၤလၢအအိၣ် မူလၢကျဲဒ်အံၤန့ၣ်ကြၢးသံဝဲလီၤ. အန့ၣ်ဒၣ်လဲာ်, တမ့ၢ်ထဲအဝဲသ့ၣ်မၤထွဲတၢ်သ့ၣ်တဖၣ်အံၤဧိၤန့ၣ်ဘၣ်, မ့မ့ၢ်အဝဲသ့ၣ်ဘၣ်သူၣ်ဘၣ်သးလၢပှၤလၢအမၤတၢ်ဒ်အံၤ တဖၣ်န့ၣ်လီၤ.