35
(၂စီၤပၤ ၂၃:၂၁-၂၃)
1 စီၤပၤယိၤၡံယၤမၤဘူၣ်လဲၤကပာ်လၢဝ့ၢ်ယရူၤၡလ့ၣ်အပူၤ, လၢတၢ်မၤလၤကပီၤယွၤအဂီၢ်န့ၣ်လီၤ. လၢလါအခီၣ်ထံးကတၢၢ်တလါတဆံလွံၢ်သီတသီန့ၣ် အဝဲသ့ၣ်မၤသံဆၣ်ဖိကီၢ်ဖိတဖၣ်လၢဘူၣ်အဂီၢ်န့ၣ်လီၤ.
2 အဝဲပာ်လီၤန့ၢ်ပှၤလုၢ်တၢ်အခိၣ်တဖၣ်လၢမူဒါတဖၣ်လၢအဝဲသ့ၣ် ကဘၣ်မၤဝဲလၢယွၤအတၢ်လုၢ်ဟံၣ်အပူၤ, ဒီးဟ့ၣ်ဂံၢ်ဟ့ၣ်ဘါအဝဲသ့ၣ်ဒ်သိးကမၤဝဲဂ့ၤဂ့ၤဘၣ်ဘၣ် အဂီၢ်န့ၣ်လီၤ.
3 အဝဲဟ့ၣ်လီၤစ့ၢ်ကီးတၢ်သိၣ်လိနဲၣ်ယုၤတဖၣ်အံၤဆူပှၤလ့ၤဝံ ဖိတဖၣ်, အံၣ်စရ့လးအသရၣ်တဖၣ်, ပှၤလၢအပာ်စီဆှံထီၣ်တ့ၢ်အသးဆူ ယွၤအအိၣ်, စံးဝဲ, “ဒၢနုာ်ယွၤအတၢ်အၢၣ်လီၤအီလီၤအတလါစီဆှံဆူယွၤ အတၢ်လုၢ်ဟံၣ်လၢစီၤဒၤဝံးအဖိခွါစီၤပၤၡလိၤမိၤဘှီထီၣ် အပူၤန့ၣ်တက့ၢ်. သုတဘၣ်စိာ်လၢၤအီၤလၢတၢ်လီၢ်တပူၤဆူတၢ်လီၢ်အဂၤတပူၤ လၢၤတဂ့ၤ. မ့မ့ၢ်သုကဘၣ်မၤယွၤသုကစၢ်ယွၤဒီးအပှၤဂီၢ်မုၢ်အံၣ်စရ့လး အတၢ်မၤန့ၣ်လီၤ.
4 ဟံးန့ၢ်သုလီၢ်တဖၣ်လၢယွၤအတၢ်လုၢ်ဟံၣ်အပူၤ, ဒ်သုဒူၣ်ထၢတဖၣ်အိၣ်ဝဲအသိး, လီၤပလိာ်ဒီးမူဒါတဖၣ်လၢစီၤဒၤဝံးဒီးအဝဲအဖိခွါ စီၤပၤၡလိၤမိၤဟ့ၣ်လီၤတ့ၢ်သု,
5 ဒီးကျဲၤလိာ်သုသးဒ်သိးသုဝဲတနီၤနီၤမၤစၢၤအံၣ်စရ့လး အပှၤဂီၢ်မုၢ်အဟံၣ်ဒူၣ်ဃီထၢတဒူၣ်ဘၣ်တဒူၣ်ကသ့ဝဲ အဂီၢ်တက့ၢ်.
6 သုကဘၣ်မၤသံဘူၣ်လဲၤကပာ်အသိတဖၣ်ဒီးမဲာ်တဲးလဲးတဖၣ်န့ၣ် လီၤ. ခဲကနံၣ်အံၤမၤကဆှီထီၣ်သုသးဒ်တၢ်ဘူၣ်တၢ်ဘါအလုၢ် အလၢ်အိၣ်ဝဲအသိးဒီးကတဲာ်ကတီၤတၢ်လုၢ်တဖၣ်ဒ်သိးပှၤ အံၣ်စရ့လးဖိကဒဲကဒဲဒီးသုကပိာ်ထွဲတၢ်သိၣ်လိနဲၣ်ယုၤ တဖၣ်လၢယွၤဟ့ၣ်လီၤဝဲခီဖျိစီၤမိၤၡ့အဂီၢ်န့ၣ်တက့ၢ်.”
7 လၢပှၤဂီၢ်မုၢ်ကသူဝဲလၢဘူၣ်လဲၤကပာ်အဂီၢ်န့ၣ်, စီၤပၤယိၤၡံယၤဟ့ၣ်မၤဘူၣ်လီၤသိ, သိဖိတဖၣ်, မဲာ်တဲးလဲးဖိ တဖၣ်ခဲလၢာ်အဒု သၢကလး ဒီးဂီၤဖံးဖါအဒု သၢကယၤ လၢအဆၣ်ဖိကီၢ်ဖိဒီးအသိအဖုအဂီၢ်ဒၣ်ဝဲ အကျါန့ၣ်လီၤ.
8 အဝဲအပဒိၣ်ပပှၢ်တဖၣ်ဟ့ၣ်လီၤစ့ၢ်ကီးတၢ်မၤဘူၣ်တဖၣ်လၢပှၤဂီၢ် မုၢ်, ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်ကသူဝဲအဂီၢ်စ့ၢ်ကီး န့ၣ်လီၤ. ဒီးယွၤအတၢ်လုၢ်ဟံၣ်အပှၤအခိၣ်အဒိၣ်ကတၢၢ်တဖၣ်လၢအမ့ၢ်ဝဲ, ပှၤလုၢ်တၢ်အခိၣ်အဒိၣ်ကတၢၢ်စီၤဃံးလကံယၤ, စီၤစကၤရယၤဒီးစီၤယဃံအ့လးလၢအမ့ၢ်ပှၤကွၢ်ထွဲပၢဆှၢတၢ်တဖၣ်, ဟ့ၣ်လီၤဝဲပှၤလုၢ်တၢ်အခိၣ်တဖၣ်လၢသိဖိဒီးမဲာ်တဲးလဲးဖိအဒု ခံကထိဃုကယၤ ဒီးဂီၤဖံးဖါအဒု သၢကယၤလၢဘူၣ်လဲၤက ပာ်အတၢ်လုၢ်တၢ်ပာ်တဖၣ်အဂီၢ်န့ၣ်လီၤ.
9 ပှၤလ့ၤဝံဖိအခိၣ်အနၢ်တဖၣ်လၢအမ့ၢ်ဝဲ, စီၤကနၤနယၤ, စီၤၡမါယၤဒီးအဒီပုၢ်ဝဲၢ်ခွါစီၤနၤသန့လး, စီၤဃၡၤဘယၤ, စီၤယဃ့ၤအ့လးဒီးစီၤယိၤစဘးတဖၣ်ဟ့ၣ်မၤဘူၣ်လီၤသိဖိဒီး မဲာ်တဲးလဲးအဒုယဲၢ်ကထိ ဒီးဂီၤဖံးဖါအဒု ယဲၢ်ကယၤ လၢပှၤလ့ၤဝံဖိတဖၣ်ကလုၢ်ထီၣ်အီၤဒ်တၢ်လုၢ်တၢ်ပာ်တဖၣ် အသိးအဂီၢ်န့ၣ်လီၤ.
10 တုၤကယဲၢ်တၢ်ခဲလၢာ်ဘၣ်တၢ်ကတဲာ်ကတီၤအီၤလၢဘူၣ်လဲၤကပာ်အဂီၢ် ဝံၤန့ၣ်, ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်ဟံးန့ၢ်အလီၢ်ဒ်စီၤ ပၤမၤလိာ်တ့ၢ်ဝဲအသိးန့ၣ်လီၤ.
11 တုၤသိဖိတဖၣ်ဒီးမဲာ်တဲးလဲးတဖၣ်ဘၣ်တၢ်မၤသံအီၤဝံၤန့ၣ်, ပှၤလ့ၤဝံဖိတဖၣ်အုၣ်ကွံာ်အဖံး, ဒီးပှၤလုၢ်တၢ်အခိၣ်တဖၣ်ဖှံ လီၤတၢ်သွံၣ်လၢတၢ်လုၢ်လီၢ်အဖီခိၣ်န့ၣ်လီၤ.
12 ဝံၤဒီး, အဝဲသ့ၣ်နီၤဖးလီၤဆၣ်ဖိကီၢ်ဖိလၢတၢ်လုၢ်မ့ၣ်အူ အဂီၢ်တဖၣ်ဆူပှၤဂီၢ်မုၢ်တဖၣ်အအိၣ်, ဒ်အဝဲသ့ၣ်အဟံၣ်ဒူၣ်ဃီထၢအကရူၢ်အိၣ်ဝဲအသိးဒ်သိးအဝဲသ့ၣ်လုၢ် ထီၣ်အီၤကသ့ဝဲဒ်ယူဒၤအတၢ်သိၣ်တၢ်သီလၢစီၤမိၤၡ့ဟ့ၣ်လီၤဝဲ အတၢ်သိၣ်လိနဲၣ်ယုၤန့ၣ်လီၤ.
13 ပှၤလ့ၤဝံဖိတဖၣ်ကၣ်ထီၣ်ဘူၣ်လဲၤကပာ်အတၢ်လုၢ်တၢ်ပာ်တဖၣ်လၢမ့ၣ် အူအဖီခိၣ်ဒ်တၢ်ဘူၣ်တၢ်ဘါအသနူတဖၣ်အိၣ်ဝဲအသိး, ဒီးချီထီၣ်တၢ်လုၢ်တၢ်ပာ်စီဆှံတဖၣ်လၢသပၢၤတဖၣ်, သပၢၤချီတၢ်တဖၣ်, ဒီးလၢသပၢၤဘံၣ်သလၣ်တဖၣ်အပူၤ, ဒီးဟ့ၣ်နီၤလီၤဝဲတၢ်ညၣ်ချ့ချ့ဆူပှၤဂီၢ်မုၢ်တဖၣ်အအိၣ်န့ၣ်လီၤ.
14 တုၤတၢ်အံၤမၤအသးဝံၤန့ၣ်, ပှၤလ့ၤဝံဖိတဖၣ်ကတဲာ်ကတီၤတၢ်ညၣ် လၢအဝဲသ့ၣ်အကစၢ်ဒၣ်ဝဲအဂီၢ်ဒီးလၢပှၤလုၢ်တၢ်အခိၣ်တဖၣ်လၢအဟဲ လီၤစၢၤလီၤသွဲၣ်လၢစီၤအၤဟရိၣ်အဂီၢ်, မ့ၢ်လၢပှၤလုၢ်တၢ်အခိၣ်တဖၣ်အတၢ်မၤအါဝဲလၢတၢ်ဆူးကဲၤထီၣ်ဆၣ် ဖိကီၢ်ဖိတဖၣ်လၢအဘၣ်တၢ်ဆူးကဲၤအီၤဒီတဒုဒီးတၢ်လုၢ်တၢ်ပာ် တဖၣ်အသိတုၤလၢမုၢ်နၤအဃိန့ၣ်လီၤ.
15 ပှၤဒ့တၢ်အူတၢ်ဖိဒီးပှၤသူၣ်ဝံၣ်သးဆၢတၢ်ဖိတဖၣ်လၢလ့ၤဝံ အဒူၣ်ထၢလၢအဟဲလီၤစၢၤလၢစီၤအၤစာ်န့ၣ်, ဘၣ်အိၣ်ဖဲတၢ်လီၢ်တဖၣ်လၢစီၤပၤဒၤဝံးအတၢ်သိၣ်လိနဲၣ်ယုၤပာ် လီၤန့ၢ်အီၤန့ၣ်လီၤ. အဝဲသ့ၣ်တဖၣ်န့ၣ်မ့ၢ်ဝဲ, စီၤအၤစာ်, စီၤဟ့မၣ်ဒီးစီၤပၤအဝံစီၤယဒူသူၣ်န့ၣ်လီၤ. ပှၤခိးယွၤအတၢ်လုၢ်ဟံၣ်အတြဲၤတဖၣ်အလီၢ် တအိၣ်ဘၣ်လၢကဘၣ်သုးအသးလၢအမူအဒါအလီၢ်တဖၣ်ဘၣ်. မ့ၢ်လၢပှၤလ့ၤဝံဖိအဂၤတဖၣ်ကတဲာ်ကတီၤဘူၣ်လဲၤကပာ်လၢအဂီၢ် အဃိန့ၣ်လီၤ.
16 လၢတၢ်န့ၣ်အဃိ, ဒ်စီၤပၤယိၤၡံယၤမၤလိာ်တ့ၢ်ဝဲအသိးန့ၣ်, တၢ်ခဲလၢာ်ဘၣ်တၢ်မၤဝံၤအီၤဖဲမုၢ်တနံၤဃီန့ၣ်, လၢတၢ်ဘူၣ်ထီၣ်ဘါထီၣ်ယွၤအဂီၢ်, တၢ်တိာ်န့ၢ်မၤထွဲဘူၣ်လဲၤ ကပာ်ဒီးတၢ်လုၢ်ထီၣ်တၢ်လုၢ်မ့ၣ်အူတဖၣ်လၢတၢ်လုၢ်လီၢ်အဖီခိၣ် အဂီၢ်န့ၣ်လီၤ.
17 အံၣ်စရ့လးအပှၤဂီၢ်မုၢ်လၢအအိၣ်ဖဲန့ၣ်, မၤဘူၣ်လဲၤကပာ်ဒီး ဘူၣ်ကိၣ်တအိၣ်ဘၣ်ဒီးကိၣ်မံၣ်လၢနွံသီအတီၢ်ပူၤန့ၣ်လီၤ.
18 စးထီၣ်လၢဝံၡမူၤအ့လးအမုၢ်နံၤတဖၣ်န့ၣ်, ဘူၣ်လဲၤကပာ်တဘၣ်တၢ်မၤအီၤဒ်သိးအံၤနီတစုဘၣ်. ဘူၣ်လဲၤကပာ်ဒ်သိးအံၤလၢအဘၣ်တၢ်မၤအီၤလၢစီၤပၤယိၤၡံယၤ, ပှၤလုၢ်တၢ်အခိၣ်တဖၣ်, ပှၤလ့ၤဝံဖိတဖၣ်ဒီး, ပှၤဂီၢ်မုၢ်လၢကီၢ်ယူဒၤ, ကီၢ်အံၣ်စရ့လးဒီးဝ့ၢ်ယရူၤၡလ့ၣ်န့ၣ်, စီၤပၤလၢအပူၤကွံာ်တဖၣ်တမၤတ့ၢ်ဝဲနီတဂၤနီတစုဘၣ်.
19 ဘူၣ်လဲၤကပာ်အံၤဘၣ်တၢ်မၤတ့ၢ်အီၤဖဲစီၤယိၤၡံယၤပၢတၢ်တဆံ ဃိးနံၣ်တနံၣ်အပူၤန့ၣ်လီၤ.
(၂စီၤပၤ ၂၃:၂၈-၃၀)
20 တုၤစီၤပၤယိၤၡံယၤမၤတၢ်တဖၣ်အံၤခဲလၢာ်လၢယွၤအတၢ်လုၢ်ဟံၣ် အဂီၢ်ဝံၤန့ၣ်, ကီၢ်အဲၤကူပတူးအစီၤပၤနကိၤဆှၢအသုးမုၢ်တဖုလၢ အကဟဲဒုးတၢ်ဖဲဝ့ၢ်ကၢ်ကမံၣ်လၢအအိၣ်လၢထံကျိဖရၤသးအနံၤ န့ၣ်လီၤ. စီၤယိၤၡံယၤဂုာ်ကျဲးစၢးတြီအီၤ,
21 ဘၣ်ဆၣ်စီၤပၤနကိၤဆှၢလီၤန့ၢ်စီၤယိၤၡံယၤလၢတၢ်ကစီၣ်အံၤ စံးဝဲ, “တၢ်ဒုးလၢယဒုးအံၤ, တဘၣ်ထွဲဒီးနၤ, ကီၢ်ယူဒၤအစီၤပၤဘၣ်. မ့မ့ၢ်ယဟဲဒ်သိးယကဒုးယဒုၣ်ယဒါတဖၣ်, ဒီးကစၢ်ယွၤတဲဘၣ်တ့ၢ်ယၤလၢယကဘၣ်မၤချ့ချ့န့ၣ်လီၤ. ကစၢ်ယွၤအိၣ်လၢယအိၣ်တကပၤလီၤ. လၢတၢ်န့ၣ်အဃိ ထီဒါယၤတဂ့ၤ. မ့တမ့ၢ်ဘၣ်ဒီးအဝဲကမၤဟးဂီၤနၤန့ၣ်လီၤ.”
22 ဘၣ်ဆၣ်စီၤယိၤၡံယၤပာ်လီၤတ့ၢ်အသးလၢကဒုးတၢ်န့ၣ်လီၤ. အဝဲဂ့ၢ်လိာ်လၢကဒိကနၣ်တၢ်လၢကစၢ်ယွၤစံးဝဲခီဖျိစီၤပၤနကိၤန့ၣ်လီၤ. လၢတၢ်န့ၣ်အဃိအဝဲပျိာ်လီၤဆီအသးဒီးလဲၤဝဲဆူတၢ်ဒုး အပူၤလၢမကံးဒိၤအပျီပူၤန့ၣ်လီၤ.
23 လၢတၢ်ဒုးအကတီၢ်န့ၣ်, စီၤပၤယိၤၡံယၤဘၣ်ဒိလၢပှၤအဲၤကူ ပတူးဖိအပျၢ်တဖၣ်န့ၣ်လီၤ. အဝဲဟ့ၣ်လီၤအကလုၢ်ဆူအခ့အပှၤတဖၣ်စံးဝဲ, “စိာ်ကွံာ်ယၤတက့ၢ်. ယဘၣ်ဒိနးမးလီၤ.”
24 အဝဲသ့ၣ်စိာ်ထီၣ်ကွံာ်အီၤလၢအဝဲအလ့ၣ်ကဟၣ်အပူၤဒီးပာ်လီၤအီၤ လၢလ့ၣ်ကဟၣ်ခံဆိတဆိလၢအအိၣ်ဖဲန့ၣ်အပူၤ, ဒီးက့ၤစိာ်အီၤဆူဝ့ၢ်ယရူၤၡလ့ၣ်န့ၣ်လီၤ. ဖဲန့ၣ်အဝဲသံ, ဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ်သွၣ် ခိၣ်တဖၣ်အပူၤန့ၣ်လီၤ. ကယဲၢ်ကီၢ်ယူဒၤဒီးဝ့ၢ်ယရူၤၡလ့ၣ်အပှၤဂီၢ်မုၢ်ခဲလၢာ်ဟီၣ်တၢ် ယၢၤတၢ်လၢအဝဲအတၢ်သံအဃိန့ၣ်လီၤ.
25 ဝံယံးရမံယၤကွဲးထုးထီၣ်ထါသးသယုၢ်တၢ်တယုၢ်လၢစီၤပၤယိၤ ၡံယၤအဂီၢ်န့ၣ်လီၤ. တၢ်န့ၣ်ကဲထီၣ်တၢ်လုၢ်တၢ်လၢ်တမံၤလၢကီၢ်အံၣ်စရ့လးအပူၤ, လၢပှၤသးဝံၣ်တၢ်ဖိပိာ်ခွါတဖၣ်ဒီးပိာ်မုၣ်တဖၣ်အဂီၢ်လၢကသူ ထါသးဝံၣ်အံၤဖဲအဝဲသ့ၣ်ဟီၣ်တၢ်ယၢၤတၢ်လၢအဝဲအဂီၢ်န့ၣ်လီၤ. တၢ်သးဝံၣ်အံၤဘၣ်တၢ်ထံၣ်န့ၢ်အီၤလၢလံာ်သးသယုၢ်တၢ်တဖၣ်အတၢ်ပာ် ဖှိၣ်အပူၤန့ၣ်လီၤ.
26 ကယဲၢ်တၢ်ခဲလၢာ်လၢစီၤယိၤၡံယၤမၤတ့ၢ်ဝဲလၢအမ့ၢ်, အဝဲအတၢ်အဲၣ်ထူအဲၣ်ယွၤ, အတၢ်စူၢ်ယူဒၤအတၢ်သိၣ်တၢ်သီ,
27 ဒီးအဝဲအတၢ်စံၣ်စိၤတဲစိၤစးထီၣ်လၢအခီၣ်ထံးတုၤလၢအကတၢၢ်, ခဲလၢာ်န့ၣ်ဘၣ်တၢ်ကွဲးနီၣ်ကွဲးဃါအီၤလၢကီၢ်အံၣ်စရ့လးဒီး ကီၢ်ယူဒၤအစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.