26
(၂စီၤပၤ ၁၄:၂၁-၂၂, ၁၅:၁-၇)
1 ကယဲၢ်ကီၢ်ယူဒၤအပှၤဂီၢ်မုၢ်ဃုထၢစီၤအမၤစယါအဖိခွါစီၤဧူး စံယါလၢအသးအိၣ်တဆံဃုနံၣ်တဂၤလၢကကဲထီၣ်စီၤပၤလၢအပၢ် အလီၢ်န့ၣ်လီၤ.
2 (တၢ်ဆၢကတီၢ်ဖဲစီၤဧူးစံယါဒုးန့ၢ်ကဒါက့ၤဝ့ၢ်ဧ့လးဒီးဘှီထီၣ် ကဒါက့ၤဝ့ၢ်န့ၣ်, မ့ၢ်လၢစီၤအမၤစယါသံဝံၤအလီၢ်ခံန့ၣ်လီၤ.)
3 စီၤဧူးစံယါကဲထီၣ်စီၤပၤဖဲအသးအိၣ်ဝဲတဆံဃုနံၣ်, ဒီးအဝဲပၢတ့ၢ်တၢ်ဖဲဝ့ၢ်ယရူၤၡလ့ၣ်အပူၤယဲၢ်ဆံခံနံၣ်န့ၣ် လီၤ. အဝဲအမိၢ်မ့ၢ်နီၢ်ယကိးလယၤ, လၢဝ့ၢ်ယရူၤၡလ့ၣ်န့ၣ်လီၤ.
4 ပိာ်ထွဲထီၣ်အဝဲအပၢ်အဒိအတဲာ်အခံန့ၣ်, အဝဲမၤတ့ၢ်တၢ်လၢအဘၣ် ယွၤအသးန့ၣ်လီၤ.
5 ဖဲအဝဲအတၢ်ဘူၣ်တၢ်ဘါအပှၤဟ့ၣ်ကူၣ်တၢ်စီၤစကၤရယၤအိၣ်မူဒံး အခါန့ၣ်စီၤဧူးစံယါမၤတ့ၢ်ယွၤအတၢ်လၢတၢ်သူၣ်တီသးရၤအပူၤ, ဒီးကစၢ်ယွၤဆိၣ်ဂ့ၤအီၤန့ၣ်လီၤ.
6 စီၤဧူးစံယါလဲၤထီၣ်ဒုးတၢ်ထီဒါပှၤဖလ့ၡသးဖိတဖၣ်န့ၣ် လီၤ. အဝဲမၤလီၤပှီၢ်ကွံာ်ဝ့ၢ်တဖၣ်လၢအမ့ၢ်ဝဲဝ့ၢ်ကၤသး, ဝ့ၢ်ယၤဘနၤဒီးဝ့ၢ်အၤစဒိာ်အတၢ်ဒူၣ်တဖၣ်ဒီးသူၣ်ထီၣ်ဝ့ၢ်တဖၣ် လၢအအိၣ်ဒီးတိာ်ဧိၤတာ်ဧိၤဘူးဒီးဝ့ၢ်အၤစဒိာ်ဒီးလၢကီၢ်ဖလ့ ၡသးအတၢ်လီၢ်အဂၤတဖၣ်န့ၣ်လီၤ.
7 ကစၢ်ယွၤမၤစၢၤအီၤလၢအကမၤနၢၤကွံာ်ပှၤဖလ့ၡသးဖိတဖၣ်, ပှၤဧ့ရ့းဖိတဖၣ်လၢအအိၣ်ဝဲဆိးဝဲလၢကူၢ်ဘဧၤလး, ဒီးပှၤမူနးဖိသ့ၣ်တဖၣ်န့ၣ်လီၤ.
8 ပှၤဧၣ်မိၣ်ဖိတဖၣ်ဟ့ၣ်စီၤဧူးစံယါလၢတၢ်ယူးယီၣ်အတၢ်ဟ့ၣ်ဒီး အဝဲအစိအကမီၤဒိၣ်ထီၣ်ဝဲအါမး, တုၤအတၢ်မံၤဟူသၣ်ဖျါအကစီၣ်ရၤလီၤအသးတုၤလၢကီၢ်အဲၤကူ ပတူးဒၣ်လဲာ်န့ၣ်လီၤ.
9 စီၤဧူးစံယါမၤဂၢၢ်ထီၣ်ကျၢၤထီၣ်ဝ့ၢ်ယရူၤၡလ့ၣ်အတိာ်ဧိၤတာ် ဧိၤတဖၣ်ခီဖျိသူၣ်ထီၣ်ဘှီထီၣ်ပှၤပၢၤတၢ်အလီၢ်တဖၣ်ဖဲတၢ်အနၢၣ် အတြဲၤ, ဖဲကစၢၢ်ကဆူးအတြဲၤဖးဒိၣ်, ဒီးဖဲတၢ်အခိၣ်ဒူ အသနၢၣ်န့ၣ်လီၤ.
10 အဝဲသူၣ်ထီၣ်စ့ၢ်ကီးပှၤပၢၤတၢ်အလီၢ်တိာ်ဧိၤတာ်ဧိၤတဖၣ်လၢတၢ် လီၢ်လီၤပျီဒီးခူၣ်လီၤစ့ၢ်ကီးထံပူၤအါပူၤ, မ့ၢ်လၢအဝဲအိၣ်ဒီးဆၣ်ဖိကီၢ်ဖိအဖုအဂီၢ်အါမး, လၢမုၢ်နုာ်ကစၢၢ်ခီၣ်ထံးမ့ၢ်ဂ့ၤ, ပျီပူၤတဖၣ်မ့ၢ်ဂ့ၤအဃိန့ၣ်လီၤ. မ့ၢ်လၢအဝဲအဲၣ်တၢ်သူၣ်တၢ်ဖျးအဃိ, အဝဲဟ့ၣ်ဂံၢ်ဟ့ၣ်ဘါပှၤဂီၢ် မုၢ်လၢကသူၣ်လီၤစပံးလီၢ်တဖၣ်လၢတၢ်လူၢ်တၢ်တြီၤတဖၣ်ဒီးထဲၣ် ထီၣ်တၢ်လီၢ်လၢဟီၣ်ခိၣ်ညၣ်ထ့ၣ်ဂ့ၤဝဲတဖၣ်န့ၣ်လီၤ.
11 အဝဲအိၣ်ဒီးအသုးမုၢ်ဖးဒိၣ်တဖုလၢအအိၣ်ကတဲာ်ကတီၤအသးလၢ ကဒုးတၢ်အဂီၢ်န့ၣ်လီၤ. တၢ်ကွဲးနီၣ်တဖၣ်လၢအဘၣ်ထွဲဒီးသုးမုၢ်ဖးဒိၣ်န့ၣ်, ဘၣ်တၢ်ပၢၤဃာ်အီၤလၢအပှၤကွဲးလံာ်တဖၣ်လၢအမ့ၢ်ဝဲ, စီၤယံၤအ့လးဒီးစီၤမၤစ့ယၤ, လၢအအိၣ်ဝဲလၢစီၤပၤအပှၤမၤ တၢ်ဖိတဂၤလၢအမ့ၢ်ဝဲစီၤဃနၤနယၤအတၢ်ပၢအဖီလာ်န့ၣ်လီၤ.
12 သုးမုၢ်န့ၣ်အိၣ်ဒီးအသုးခိၣ်သုးနၢ်လၢအပၢဆှၢအီၤအဂၤခံ ကထိဃုကယၤန့ၣ်လီၤ.
13 လၢအဝဲသ့ၣ်အဖီလာ်န့ၣ်ပှၤသုးဖိအိၣ်ဝဲအဂၤသၢကလီၢ်နွံကထိယဲၢ် ကယၤလၢဒုးတၢ်သ့မူၢ်မူၢ်နီၢ်နီၢ်လၢစီၤပၤအဂီၢ်, ထီဒါအဝဲအဒုၣ်အဒါတဖၣ်န့ၣ်လီၤ.
14 စီၤဧူးစံယါဟ့ၣ်ဝဲအသုးမုၢ်လၢတၢ်လိၣ်တဖၣ်ဒ်, ကတီၤတဖၣ်, ဘီတဖၣ်, ခိၣ်ကုာ်သုးတဖၣ်, သဃိးတဖၣ်ချံၣ်တဖၣ်ဒီးပျၢ် တဖၣ်ဒီးလၢၢ်တဖၣ်လၢနီၣ်ခးတၢ်အဂီၢ်န့ၣ်လီၤ.
15 လၢဝ့ၢ်ယရူၤၡလ့ၣ်အပူၤန့ၣ်, အဝဲအပှၤမၤကဲထီၣ်တၢ်တဖၣ်, မၤတၢ်ပီးတၢ်လီတဖၣ်လၢတၢ်ခးပျၢ်အဂီၢ်, ဒီးလၢတၢ်ကွံာ်လၢၢ်ဖးဒိၣ်လၢပှၤပၢၤတၢ်အလီၢ်တဖၣ်ဒီးဝ့ၢ်ခိၣ် ဒူအသနၢၣ်တဖၣ်အဂီၢ်န့ၣ်လီၤ. အဝဲအတၢ်မံၤဟူသၣ်ဖျါရၤလီၤအသးသတုၤဆးဒးဒီးအဝဲအစိ အကမီၤဒိၣ်ထီၣ်ဝဲဒိၣ်ဒိၣ်ကလဲာ်မ့ၢ်လၢတၢ်မၤစၢၤလၢအမၤန့ၢ်ဝဲ လၢကစၢ်ယွၤအအိၣ်အဃိန့ၣ်လီၤ.
16 ဘၣ်ဆၣ်, တုၤစီၤပၤစီၤဧူးစံယါအဂံၢ်အဘါဆူၣ်ထီၣ်ဝဲန့ၣ်, အဝဲအတၢ်သးထီၣ်ထီဒိၣ်ထီၣ်ဝဲ, ဒီးတၢ်န့ၣ်ဆှၢဃီၤအီၤဆူ အတၢ်ဟးဂီၤအပူၤန့ၣ်လီၤ. အဝဲခီၣ်ဆၢယွၤ, ကစၢ်ယွၤ, ခီဖျိအတၢ်လဲၤနုာ်ဆူယွၤအတၢ်လုၢ်ဟံၣ်လၢအကဆူးကဲၤ တၢ်နၢမူဖဲတၢ်လုၢ်လီၢ်လၢတၢ်ဆူးကဲၤတၢ်နၢမူန့ၣ်လီၤ.
17 ပှၤလုၢ်တၢ်အခိၣ်စီၤဧစၤရယၤဃုာ်ဒီးပှၤလုၢ်တၢ်အခိၣ်တဖၣ်လၢ အဂံၢ်ဆူၣ်ဘါဆူၣ်ဒီးအိၣ်ဒီးတၢ်သူၣ်ဒူသးဒူအဂၤဃိးဆံ, လဲၤပိာ်ထီၣ်စီၤပၤအခံ, လၢကတြီဆၢအီၤအဂီၢ်န့ၣ်လီၤ.
18 အဝဲသ့ၣ်စံးဝဲ, “စီၤဧူးစံယါဧၢ, နတၢ်ခွဲးတၢ်ယာ်တအိၣ်နီ တမံၤလၢနကဆူးကဲၤထီၣ်တၢ်နၢမူဆူယွၤအအိၣ်န့ၣ်ဘၣ်. ထဲပှၤလုၢ်တၢ်အခိၣ်တဖၣ်လၢအဟဲလီၤစၢၤလီၤသွဲၣ်လၢစီၤအၤဟရိၣ် ဧိၤန့ၣ်ဘၣ်တၢ်ပာ်စီဆှံတ့ၢ်အီၤလၢကမၤတၢ်အံၤန့ၣ်လီၤ. ဟးထီၣ်ကွံာ်လၢတၢ်လီၢ်စီဆှံအပူၤအံၤတက့ၢ်. နမၤကမၣ်တ့ၢ်ယွၤ, ကစၢ်ယွၤ, ဒီးနတဒိးန့ၢ်လၢၤဘၣ်အတၢ်ဆိၣ်ဂ့ၤနီတစုဘၣ်.”
19 စီၤဧူးစံယါဆၢထၢၣ်ဝဲဖဲန့ၣ်လၢယွၤအတၢ်လုၢ်ဟံၣ်အပူၤဖဲတၢ် လုၢ်လီၢ်လၢပှၤဆူးကဲၤတၢ်နၢမူအကပၤ, ဒီးစိာ်ဃာ်ဝဲတၢ်လုၢ်နၢမူအသပၢၤတဖျၢၣ်လီၤ. အဝဲအသးဒိၣ်ထီၣ်ဘၣ်ပှၤလုၢ်တၢ်အခိၣ်တဖၣ်, ဒီးတကီၢ်ခါန့ၣ်တၢ်ဆါအၢလၢအလီၤပျံၤမးတမံၤဟဲ အိၣ်ဖျါထီၣ်လၢအခိၣ်တိသၣ်အလိၤန့ၣ်လီၤ.
20 စီၤဧစၤရယၤဒီးပှၤလုၢ်တၢ်အခိၣ်အဂၤတဖၣ်ကွၢ်စူၢ်စီၤပၤအခိၣ် တိသၣ်လၢတၢ်ပျံၤတၢ်ဖုးအပူၤဝံၤဒီးမၢဆူၣ်အီၤလၢအကဟးထီၣ် ကွံာ်လၢယွၤအတၢ်လုၢ်ဟံၣ်အပူၤန့ၣ်လီၤ. အဝဲမၤချ့ချ့လၢအကဟးထီၣ်ဝဲမ့ၢ်လၢယွၤစံၣ်ညီၣ်လံအီၤအဃိ န့ၣ်လီၤ.
21 လၢအဝဲအတၢ်အိၣ်မူအိၣ်လီၤတဲာ်တ့ၢ်အကတီၢ်န့ၣ်, စီၤပၤဧူးစံယါကဲထီၣ်ပှၤတကဆှီဘၣ်ဒ်တၢ်အလုၢ်အလၢ်အိၣ်ဝဲ အသိးမ့ၢ်လၢအတၢ်ဆါအဃိန့ၣ်လီၤ. အဝဲလဲၤနုာ်ကဒီးဆူယွၤအတၢ်လုၢ်ဟံၣ်အပူၤတသ့လၢၤဘၣ်အဃိအဝဲ အိၣ်ဆိးလၢအဟံၣ်ဒၣ်ဝဲအပူၤ, ဘၣ်တၢ်ဆိကတီၢ်ကွံာ်အီၤလၢအမူအဒါခဲလၢာ်, ဖဲအဝဲအဖိခွါစီၤယိၤသၣ်ပၢက့ၤဝဲထံကီၢ်အခါန့ၣ်လီၤ.
22 စီၤအၤမိာ်အဖိခွါဝံယၡါယၤကွဲးနီၣ်ကွဲးဃါကယဲၢ်တၢ်အဂၤ တဖၣ်လၢစီၤဧူးစံယါမၤတ့ၢ်ဝဲဖဲအဝဲပၢတၢ်အကတီၢ်န့ၣ်လီၤ.
23 စီၤဧူးစံယါသံဝဲဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ် သွၣ်ခိၣ်အဟီၣ်ခိၣ်အပူၤန့ၣ်လီၤ. ဘၣ်ဆၣ်မ့ၢ်လၢအတၢ်ဆါအဃိတဘၣ်တၢ်ခူၣ်လီၤအီၤလၢစီၤပၤအတၢ်သွၣ် ခိၣ်တဖၣ်အပူၤန့ၣ်ဘၣ်. အဖိခွါစီၤယိၤသၣ်ကဲထီၣ်စီၤပၤလၢအလီၢ်န့ၣ်လီၤ.