လံာ်ကွဲးနီၣ်တၢ်ခံဘ့ၣ်တဘ့ၣ်
CHRONICLES
လံာ်ကွဲးနီၣ်တၢ်ခံဘ့ၣ်တဘ့ၣ်စးထီၣ်အသးဖဲလံာ်ကွဲးနီၣ်တၢ် အခီၣ်ထံးတဘ့ၣ်အကတၢၢ်အခါန့ၣ်လီၤ. လံာ်အံၤပာ်ဖျါထီၣ်စီၤပၤၡလိၤမိၤအတၢ်ပၢ, ကွဲးနီၣ်ကွဲးဃါ ကလံၤစိးအဒူၣ်တဖၣ်အတၢ်ပူထီၣ်လၢအဘၣ်တၢ်တီခိၣ်ရိၣ်မဲအီၤလၢ စီၤယၤရၤဘၣ်လၢအထီဒါစီၤရဃၤဘၣ်လၢအမ့ၢ်စီၤပၤၡလိၤမိၤ အဖိခွါဒီးပှၤလၢအထီၣ်အလီၢ်, ဒီးကွဲးထွဲတၢ်ကွဲးနီၣ်တခါလၢအဘၣ်ထွဲဒီးယူဒၤအဘီအမုၢ် အတၢ်စံၣ်စိၤတဲစိၤ, တုၤလီၤလၢဝ့ၢ်ယရူၤၡလ့ၣ်အတၢ်လီၤဘၣ်ဆူဒုၣ်ဒါအစုပူၤဖဲ ချ. ခ.န ၅၈၆ နံၣ်န့ၣ်လီၤ.
1
(၁စီၤပၤ ၃:၁-၁၅ )
1 စီၤပၤဒၤဝံးအဖိခွါစီၤၡလိၤမိၤဟံးဃာ်ဂၢၢ်ကျၢၤဒီးပၢၤ အံၣ်စရ့လးအဘီအမုၢ်, ဒီးယွၤ, အကစၢ်ယွၤဆိၣ်ဂ့ၤတ့ၢ်အီၤဒီးဒုးကဲထီၣ်အီၤလၢပှၤ လၢအစိဒိၣ်ကမီၤထီဒိၣ်မးန့ၣ်လီၤ.
2 စီၤပၤၡလိၤမိၤဟ့ၣ်လီၤအကလုၢ်ဆူကယဲၢ်သုးခိၣ်သုးနၢ်တဖၣ်လၢ အအိၣ်မူအိၣ်ဒါလၢပှၤတကထိအဖီခိၣ်, ပှၤတကယၤအဖီခိၣ်, ကယဲၢ်တၢ်ပၢတၢ်ပြးအပဒိၣ်တဖၣ်, ကယဲၢ်ဟံၣ်ဖိဃီဖိအခိၣ်အနၢ်တ ဖၣ်, ဒီးဆူကယဲၢ်ပှၤဂီၢ်မုၢ်အိၣ်လီၤတဲာ်အဂၤတဖၣ်,
3 မၤလိာ်ဝဲလၢအဝဲသ့ၣ်ကလဲၤသကိးတၢ်ဒီးအီၤဆူတၢ်ဘူၣ်ထီၣ်ဘါ ထီၣ်ယွၤအလီၢ်လၢအအိၣ်လၢဝ့ၢ်ကံးဘိၣ်န့ၣ်လီၤ. အဝဲသ့ၣ်လဲၤတၢ်ဖဲန့ၣ်မ့ၢ်လၢတၢ်လီၢ်န့ၣ်မ့ၢ်တၢ်လီၢ်ဖဲယွၤအဒဲ စီဆှံလၢယွၤအိၣ်ဝဲ, အိၣ်သူၣ်လီၤတ့ၢ်အသးအဃိလီၤ. ဒဲန့ၣ်မ့ၢ်ဒဲတဖျၢၣ်လၢယွၤအခ့အပှၤစီၤမိၤၡ့သူၣ်ထီၣ်တ့ၢ် အီၤလၢပှၢ်မုၢ်ကနၢအပူၤန့ၣ်လီၤ.
4 ဘၣ်ဆၣ်ဒီးယွၤအတၢ်အၢၣ်လီၤအီလီၤအတလါစီဆှံအိၣ်လံလၢဝ့ၢ် ယရူၤၡလ့ၣ်အပူၤ, ဒီးဘၣ်တၢ်ပာ်အီၤလၢဒဲတဖျၢၣ်အပူၤ, ဒဲလၢစီၤပၤဒၤဝံးသူၣ် ထီၣ်တ့ၢ်ဝဲဖဲအဝဲဟဲက့ၤစိာ်က့ၤတလါစီဆှံန့ၣ်လၢဝ့ၢ်ကံး ရယးယဧၢရံၣ်န့ၣ်လီၤ.
5 တၢ်လုၢ်လီၢ်တိၢ်ဘီလၢအဘၣ်တၢ်မၤအီၤလၢစီၤဃူၢ်အလံၤခွါ, စီၤအူရံၤအဖိခွါစီၤဘစၤလအ့လးန့ၣ်အိၣ်စ့ၢ်ကီးဝဲလၢယွၤ အဒဲစီဆှံလၢယွၤအိၣ်ဝဲ, အမဲာ်ညါ, လၢဝ့ၢ်ကံးဘိၣ်အပူၤန့ၣ်လီၤ. စီၤပၤၡလိၤမိၤဒီးကယဲၢ်ပှၤဂီၢ်မုၢ်ခဲလၢာ်ဘူၣ်ထီၣ်ဘါထီၣ် ယွၤဖဲန့ၣ်လီၤ.
6 လၢယွၤအဒဲစီဆှံအမဲာ်ညါန့ၣ်စီၤပၤဘူၣ်ထီၣ်ဘါထီၣ်ယွၤခီ ဖျိလုၢ်ထီၣ်ပာ်ထီၣ်တၢ်လုၢ်တၢ်ပာ်တဖၣ်လၢတၢ်လုၢ်လီၢ်တိၢ်ဘီအဖိ ခိၣ်န့ၣ်လီၤ. အဝဲအိၣ်ဒီးဆၣ်ဖိကီၢ်ဖိအဒုတကထိ လၢအဘၣ်တၢ်မၤသံအီၤဒီးဆူးကဲၤထီၣ်အီၤဒီတဒုခဲလၢာ်လၢတၢ် လုၢ်လီၢ်အဖီခိၣ်န့ၣ်လီၤ.
7 လၢမုၢ်တနၤန့ၣ်ကစၢ်ယွၤလီၣ်ဖျါထီၣ်အသးဆူစီၤၡလိၤမိၤဒီး သံကွၢ်အီၤ, “နအဲၣ်ဒိးလၢယကဘၣ်ဟ့ၣ်နၤမနုၤလဲၣ်.”
8 စီၤၡလိၤမိၤစံးဆၢဝဲ, “ထီဘိနဒုးနဲၣ်နတၢ်အဲၣ်ဖးဒိၣ်လၢ ယပၢ်စီၤဒၤဝံးအဂီၢ်, ဒီးခဲကနံၣ်အံၤ, နပျဲယကဲထီၣ်စီၤပၤလၢအဝဲအလီၢ်န့ၣ်လီၤ.
9 အိယွၤ, ကစၢ်ယွၤဧၢ, မၤလၢပှဲၤတၢ်အၢၣ်လီၤလၢနမၤတ့ၢ်ဒီးယပၢ် န့ၣ်တက့ၢ်. နဒုးကဲထီၣ်ယၤစီၤပၤလၢပှၤဂီၢ်မုၢ်အါအါဂီၢ်ဂီၢ်လၢတၢ်ဂံၢ် အီၤတသ့ဘၣ်တဖၣ်အဖီခိၣ်,
10 သတးဒီးဟ့ၣ်ယၤတၢ်ကူၣ်သ့ဒီးတၢ်သ့ၣ်ညါလၢယလိၣ်ဘၣ်အီၤဒ်သိး ယကပၢတၢ်လၢအဝဲသ့ၣ်အဖီခိၣ်န့ၣ်တက့ၢ်. မ့တမ့ၢ်ဒ်န့ၣ်ဘၣ်ဒီး, ယပၢနပှၤဂီၢ်မုၢ်ဖးဒိၣ်အံၤကသ့တစုစုဒ်လဲၣ်.”
11 ကစၢ်ယွၤစံးဆၢစီၤၡလိၤမိၤ, “နဃုထၢတ့ၢ်လံတၢ်လၢအဘၣ်လီၤ. လၢနကဃ့တၢ်ထူးတၢ်တီၤမ့ၢ်ဂ့ၤ, တၢ်လုၢ်ဒိၣ်ပှ့ၤဒိၣ်မ့ၢ်ဂ့ၤ, တၢ်မံၤဟူသၣ်ဖျါမ့ၢ်ဂ့ၤ, နဒုၣ်ဒါတဖၣ်အတၢ်သံမ့ၢ်ဂ့ၤ, ဒီးလၢနကစၢ်ဒၣ်နဲအတၢ်အိၣ်ကၢအိၣ်ခိးအဂီၢ်မ့ၢ်ဂ့ၤ, အလီၢ်န့ၣ်နဃ့တၢ်ကူၣ်သ့ဒီးတၢ်သ့ၣ်ညါဒ်သိးနကပၢယပှၤဂီၢ်မုၢ် လၢယဒုးကဲထီၣ်နၤလၢစီၤပၤလၢအဝဲသ့ၣ်အဖီခိၣ်, ကသ့န့ၣ်လီၤ.
12 ယကဟ့ၣ်လီၤနၤတၢ်ကူၣ်သ့ဒီးတၢ်သ့ၣ်ညါန့ၣ်လီၤ. အါန့ၢ်အန့ၣ်ယကဟ့ၣ်နၤတၢ်ထူးတၢ်တီၤ, တၢ်လုၢ်ဒိၣ်ပှ့ၤဒိၣ်, ဒီးတၢ်မံၤဟူသၣ်ဖျါအါန့ၢ်ဒံးစီၤပၤတဂၤလၢ်လၢ်လၢနမဲာ်ညါ မၤန့ၢ်တ့ၢ်မ့ၢ်ဂ့ၤ, စီၤပၤတဂၤလၢ်လၢ်လၢနလီၢ်ခံကမၤန့ၢ်ကဒီးဝဲမ့ၢ်ဂ့ၤ, န့ၣ်လီၤ.”
(၁စီၤပၤ ၁၀:၂၆-၂၉)
13 လၢတၢ်န့ၣ်အဃိ, စီၤၡလိၤမိၤဟးထီၣ်ကွံာ်ဖဲတၢ်ဘူၣ်ထီၣ်ဘါ ထီၣ်ယွၤအလီၢ်လၢဝ့ၢ်ကံးဘိၣ်, ဖဲယွၤအဒဲစီဆှံလၢယွၤအိၣ်ဝဲ ဆိးဝဲန့ၣ်, ဒီးဟဲက့ၤကဒါက့ၤဆူဝ့ၢ်ယရူၤၡလ့ၣ်န့ၣ်လီၤ. ဖဲန့ၣ်အဝဲပၢတၢ်လၢအံၣ်စရ့လးအဖီခိၣ်န့ၣ်လီၤ.
14 အဝဲမၤထီၣ်လ့ၣ်ကဟၣ်သုးအဆိတကထိလွံၢ်ကယၤ, ဒီးဃုထၢထီၣ်ပှၤဒိးကသ့ၣ်, သုးဖိတကလးခံကထိဂၤန့ၣ်လီၤ. အကျါတနီၤန့ၣ်ပာ်ဝဲဖဲဝ့ၢ်ယရူၤၡလ့ၣ်အပူၤဒီးအဂၤတဖၣ်ပာ်လီၤ ဝဲလၢဝ့ၢ်အဂၤတဖၣ်အပူၤစုာ်စုာ်န့ၣ်လီၤ.
15 ဖဲအဝဲပၢတၢ်အကတီၢ်န့ၣ်, စ့ဒီးထူတဖၣ်ကဲထီၣ်တၢ်လၢတမ့ၢ်တၢ် လီၤဆီလၢၤဘၣ်ဒ်ဒၣ်လၢၢ်တဖၣ်လၢဝ့ၢ်ယရူၤၡလ့ၣ်အပူၤအသိး, ဒီးသ့ၣ်ဆှိအ့ရ့းတဖၣ်အိၣ်ဝဲအါအါကလဲာ်ဒ်ဒၣ်သိးဝံၣ်ဒၢမုၢ် ဆ့ၣ်မုၢ်ဂီၤလၢအအိၣ်လၢယူဒၤအကစၢၢ်ကလိတဖၣ်အခီၣ်ထံး အသိးန့ၣ်လီၤ.
16 စီၤပၤအခၢၣ်စးပှၤကၤတၢ်ဖိတဖၣ်ဟံးဃာ်ဖီၣ်ဃာ်တၢ်ဟဲစိာ်ဆါ ကသ့ၣ်တဖၣ်လၢကီၢ်မူးစရံၣ် (ကီၢ်အဲၤကူပတူး) ဒီးကီၢ်ကံၤလကံ,
17 ဒီးတၢ်ဟဲစိာ်ဆါလ့ၣ်ကဟၣ်တဖၣ်လၢကီၢ်အဲၤကူပတူးန့ၣ်လီၤ. အဝဲသ့ၣ်မၤစၢၤကီၢ်ဃ့ၤသးဒီးကီၢ်စူၤရံအစီၤပၤတဖၣ်လၢကသ့ၣ် တဖၣ်ဒီးလ့ၣ်ကဟၣ်တဖၣ်, ဆါန့ၢ်ဝဲလ့ၣ်ကဟၣ်တဖၣ်လၢတဆိစ့အဘ့ၣ်ဃုကယၤစုာ်စုာ်, ဒီးကသ့ၣ်တဖၣ်လၢတဒုစ့အဘ့ၣ်တကယၤယဲၢ်ဆံစုာ်စုာ်န့ၣ်လီၤ.