စံးထီၣ်ပတြၢၤ 92
1 ယွၤဧၢ, တၢ်စံးဘျုးစံးဖှိၣ်နၤ,
တၢ်သးဝံၣ်မၤလၤကပီၤ
တၢ်ထီကတၢၢ်ကစၢ်ယွၤ,
2 တၢ်တဲဖျါထီၣ်နတၢ်အဲၣ်ဂၢၢ်ကျၢၤကိးမုၢ်ဂီၤ,
ဒီးနတၢ်သူၣ်တီသးလိၤကိးမုၢ်နၤ,
3 အိၣ်ဒီးတၢ်ဒ့သနၢ်လၢ အပျံၤအိၣ်ဆံဆဲၣ်ဘိဒီး
တၢ်သးဝံၣ်မုာ်လၢသီတူၢ်အလိၤန့ၣ်, မ့ၢ်အဂ့ၤဆံးဒိၣ်လဲၣ်.
4 ယွၤဧၢ, အဂ့ၢ်ဒ်အံၤ
နဒုးသးခုတ့ၢ်လံယၤလၢနတၢ်မၤဖးဒိၣ်တဖၣ်အဃိ,
ဒီးနစုအတၢ်ဖံးတၢ်မၤတဖၣ်န့ၣ်
ယကသးဝံၣ်ထီၣ်အီၤလၢတၢ်သူၣ်ဖှံသးညီလီၤ.
5 ယွၤဧၢ, နတၢ်မၤတဖၣ်န့ၣ်ဒိၣ်ဆံးဒိၣ်လဲၣ်.
နတၢ်ဆိကမိၣ်တဖၣ်န့ၣ်ယိာ်မးလီၤ.
6 ပှၤလၢအတၢ်သ့ၣ်ညါတအိၣ်,
သ့ၣ်ညါတၢ်အံၤတသ့ဘၣ်.
ဒီးပှၤဟးဂီၤဖိ, နၢ်ပၢၢ်တၢ်အံၤတသ့ဘၣ်.
7 ပှၤတတီတလိၤမဲထီၣ်ဒ်နီၣ်ဧိၤမံၤဧိၤအသိး,
ပှၤမၤတၢ်အၢဖိတဖၣ်ဘီၣ်ထီၣ်ညီထီၣ်,
ဘၣ်ဆၣ်အဝဲသ့ၣ်ကတုၤလၢတၢ်ဟးဂီၤ
လီၤစိၤလီၤထီလီၤ.
8 ဘၣ်ဆၣ်နဲဒၣ်ယွၤဧၢ,
နအိၣ်လၢတၢ်လီၢ်ထီၣ်ထီလီၤစိၤလီၤထီလီၤ.
9 ယွၤဧၢ, အဂ့ၢ်ဒ်အံၤ
ကွၢ်ကွၢ်နဒုၣ်နဒါတဖၣ်, ကဟးဂီၤကွံာ်ဝဲ
ဒီးကယဲၢ်ပှၤမၤတၢ်အၢခဲလၢာ်
ကလီၤပြံလီၤပြါဝဲဒၣ်န့ၣ်လီၤ.
10 နဒုးဂံၢ်ဆူၣ်ဘါဆူၣ်ယၤထဲသိးတၤဖးရံၣ်တဒု
နဆိၣ်ဂ့ၤယၤဒီးတၢ်သူၣ်ဖှံသးညီလီၤ.
11 ယမဲာ်ထံၣ်တ့ၢ်လံယဒုၣ်ယဒါတဖၣ်
ဘၣ်တၢ်မၤနၢၤကွံာ်အီၤ
ဒီးယနၢ်ဟူတ့ၢ်လံ
ပှၤတတီတလိၤတဖၣ်အတၢ်ကိးထီၣ်န့ၣ်လီၤ.
12 ပှၤတီပှၤလိၤကဂုၤထီၣ်ပသီထီၣ်ဒ်သ့ၣ်စူၣ်ပလိၣ်အသိး,
ဒီးမဲထီၣ်ဒ်သ့ၣ်ဆှိအ့ရ့းလၢ
လဘၤနိၣ်အသိးန့ၣ်လီၤ.
13 အဝဲသ့ၣ်လီၤဂာ်ဒ်
သ့ၣ်တဖၣ်လၢအဘၣ်တၢ်သူၣ်လီၤအီၤလၢ
ယွၤအဟံၣ်ပူၤအသိး
လၢအဂုၤထီၣ်ပသီထီၣ်လၢ
ပကစၢ်ယွၤအတၢ်လုၢ်ဟံၣ်အပူၤအသိး,
14 လၢအသၣ်ထီၣ်တုၤလီၤလၢ
အသးပှၢ်အကတီၢ်ဒၣ်လဲာ်,
ဒီးလါဟ့ဒီးသံကစဲာ်ဝဲထီဘိန့ၣ်လီၤ.
15 တၢ်အံၤဒုးနဲၣ်ဝဲလၢယွၤန့ၣ်တီဝဲလိၤဝဲ,
ဒီးယပှၤကဟုကယာ်ယၤန့ၣ်
အတၢ်ကမၣ်တအိၣ်ဘၣ်န့ၣ်လီၤ.