စံးထီၣ်ပတြၢၤ 89
1 ယွၤဧၢ, ယကသးဝံၣ်ထီၣ်နတၢ်အဲၣ်ဂၢၢ်ကျၢၤ
လီၤထူလီၤယိာ်,
ယကဘိးဘၣ်သ့ၣ်ညါနတၢ်သူၣ်တီသးလိၤလၢ
ကယဲၢ်စိၤခဲလၢာ်လၢယထးခိၣ်လီၤ.
2 အဂ့ၢ်ဒ်အံၤ, နတၢ်အဲၣ်ဂၢၢ်ကျၢၤအိၣ်ဝဲ
အစိၤစိၤအဃၣ်ဃၣ်ဒီး
နတၢ်သူၣ်တီသးလိၤအိၣ်ဂၢၢ်ဆိးကျၢၤဝဲဒ်
မူခိၣ်အသိးလီၤ.
3 နစံးတ့ၢ်နဲ,
“ယမၤတ့ၢ်တၢ်အၢၣ်လီၤဒီးယပှၤဃုထၢဖိတဂၤ,
ယဆိၣ်တၢ်ဒီးယခ့ယပှၤစီၤဒၤဝံးလၢ,
4 အစၢၤအသွဲၣ်တဂၤကမ့ၢ်စီၤပၤ
ထီဘိတထံၣ်ဃီဒီး
ယကဒုးအိၣ်ဂၢၢ်ကျၢၤအဘီအမုၢ်
အစိၤစိၤအဃၣ်ဃၣ်န့ၣ်လီၤ. ” စ့လၤ
5 ယွၤဧၢ, မ်မူခိၣ်စံးထီၣ်ပတြၢၤနတၢ်မၤလီၤလးဒီး
နတၢ်သူၣ်တီသးလိၤလၢ
ပှၤစီဆှံအတၢ်အိၣ်ဖှိၣ်ရိဖှိၣ်အပူၤတက့ၢ်.
6 အဂ့ၢ်ဒ်အံၤ, မ့ၢ်မတၤအိၣ်လၢမူခိၣ်လၢပက
ထိၣ်သတြီၤအီၤဒီးယွၤန့ၣ်လဲၣ်.
လၢပှၤမူခိၣ်ဖိတဖၣ်အကျါန့ၣ်,
မ့ၢ်မတၤလီၤဂာ်ဒီးယွၤန့ၣ်လဲၣ်.
7 ယွၤမ့ၢ်တၢ်ပျံၤအလီၢ်လၢပှၤစီဆှံအတၢ်အိၣ်ဖှိၣ်အပူၤ,
ဒီးအဝဲသ့ၣ်ခဲလၢာ် ကဆၢထၢၣ်လၢတၢ်ယူးယီၣ်
8 ယွၤ, သ့တၢ်လၢာ်အကစၢ်ယွၤဧၢ,
မ့ၢ်မတၤအိၣ်ဒီးအစိအကမီၤဒ်နၤအသိးတဂၤလဲၣ်,
ယွၤဧၢ, နတၢ်သူၣ်တီသးလိၤအိၣ်ဝးတရံးနၤလီၤ.
9 နပၢပီၣ်လဲၣ်အလပီမုၢ်ဒိၣ်
နဒုးအိၣ်ဂၢၢ်အလၢတဖၣ်ဖဲအဟဲထီၣ်န့ၣ်လီၤ.
10 နမၤလီၤသဘှံးတၢ်မုၢ်ဃၢ်ရၤဃး
ဒီးမၤသံကွံာ်အီၤဒီး လၢနဂံၢ်ဆူၣ်ဘါဆူၣ်န့ၣ်,
နမၤဃၣ်ကွံာ်နဒုၣ်နဒါတဖၣ်လီၤ.
11 မူခိၣ်မ့ၢ်နတၢ်, ဟီၣ်ခိၣ်စ့ၢ်ကီးမ့ၢ်နတၢ်,
ဟီၣ်ခိၣ်ဒီးတၢ်လၢအအိၣ်လၢအပူၤခဲလၢာ်န့ၣ်
နပာ်လီၤအခီၣ်ထံးလီၤ.
12 နတ့လီၤကယဲၢ်တၢ်အိၣ်လၢကလံၤစိးဒီးကလံၤထံး,
ဒီးကစၢၢ်တၤဘိၢ်ဒီးကစၢၢ်ဃ့ရမိၣ်န့ၣ်
စံးထီၣ်ပတြၢၤနမံၤလၢတၢ်သးခုအပူၤလီၤ.
13 နအိၣ်ဒီးနစုဒုၣ်လၢအဂံၢ်ဆူၣ်ဘါဆူၣ်,
နစုန့ၣ်ဆူၣ်ဝဲဒီးနစုထွဲအိၣ်ထီၣ်ထီလီၤ.
14 တၢ်တီတၢ်လိၤဒီးတၢ်စံၣ်ညီၣ်တီန့ၣ်
မ့ၢ်နလီၢ်ပစိာ်အခီၣ်ထံးလီၤ.
တၢ်အဲၣ်ဂၢၢ်ကျၢၤဒီးတၢ်သူၣ်တီသးလိၤ
15 ပှၤဂီၢ်မုၢ်လၢအဘါထီၣ်နၤ
အိၣ်ဒီးတၢ်သးဝံၣ်တဖၣ်,
လၢအအိၣ်လၢနတၢ်သးကညီၤအတၢ်ကပီၤ
အပူၤန့ၣ်ဘၣ်ဆိၣ်ဂ့ၤဝဲလီၤ.
16 လၢနဃိန့ၣ် အဝဲသ့ၣ်သးခုဒီ တနံၤညါဒီး
စံးထီၣ်ပတြၢၤနၤလၢ နတၢ်ဂ့ၤတၢ်ဝါအဃိလီၤ.
17 နဟ့ၣ်ပှၤလၢ
တၢ်မၤနၢၤဖးဒိၣ်တဖၣ်
ဒီးလၢနတၢ်အဲၣ်အပူၤန့ၣ်
နဒုးမၤနၢၤပှၤတၢ်န့ၣ်လီၤ.
18 နဲဒၣ်ယွၤဧၢ, နဃုထၢပှၤ, ဒီဒၣ်အိၣ်ပှိၤပှၤ,
နဲဒၣ်အံၣ်စရ့လးအကစၢ်ယွၤစီဆှံဧၢ, ဟ့ၣ်ပှၤပစီၤပၤတ က့ၢ်.
19 လၢပျၢၤ, နကတိၤတၢ်ဒီးနပှၤတီပှၤလိၤတဖၣ်လၢ
တၢ်ထံၣ်လၢညါခီအပူၤ,
ဒီးနစံး, “ယဟ့ၣ်လီၤလံပှၤသုးဖိ
မံၤဟူသၣ်ဖျါတဂၤလၢ တၢ်မၤစၢၤ,
ယဟ့ၣ်လီၤလံလီၢ်ပစိာ်ဆူပှၤတဂၤ
လၢယဃုထၢအီၤလၢ ပှၤဂီၤမုၢ်အကျါလံ.
20 ယထံၣ်န့ၢ်ယခ့ယပှၤစီၤဒၤဝံး,
ယဖှူအီၤလၢယသိစီဆှံ,
21 ဒ်သိးယစုကအိၣ်ဂၢၢ်ဆိးကျၢၤဒီးအီၤထီဘိ,
ဒီးယစုဒုၣ်ကဒုးဆူၣ်ထီၣ်အီၤစ့ၢ်ကီးန့ၣ်လီၤ.
22 အဒုၣ်အဒါတမၤနၢၤအီၤနီတစုဘၣ်.
ပှၤတတီတလိၤတမၤနးမၤဖှီၣ်အီၤဘၣ်.
23 ယကမၤဟးဂီၤအဒုၣ်အဒါလၢအမဲာ်ညါ
ဒီးယကမၤလီၤဃံၤပှၤလၢအသးဟ့အီၤလီၤ.
24 ယတၢ်သူၣ်တီသးလိၤ
ဒီးယတၢ်အဲၣ်ဂၢၢ်ကျၢၤကအိၣ်ဒီးအီၤ
ယကဟ့ၣ်အီၤတၢ်မၤနၢၤထီဘိလီၤ.
25 ယကမၤလဲၢ်ထီၣ်အဘီအမုၢ်, စးထီၣ်လၢပီၣ်လဲၣ်ဖးဒိၣ်
မဲးဒံးထၢၣ်ရ့နယၢၣ်ဒီး တုၤလၢထံကျိဖရၤသးန့ၣ်လီၤ.
26 အဝဲဒၣ်ကကိးထီၣ်ဆူယအိၣ်
“နဲဒၣ်အံၤနမ့ၢ်ယပၢ်, ယကစၢ်ယွၤ,
ဒီးတၢ်အုၣ်က့ၤခီၣ်က့ၤယၤအလၢၢ်လီၤ.”
27 ဒီးယကပာ်အီၤလၢယဖိခွါဝဲၢ်ကိ,
ပှၤအဒိၣ်ကတၢၢ်လၢ
စီၤပၤခဲလၢာ်အကျါန့ၣ်လီၤ.
28 ယကပၢၤဃာ်ယတၢ်အဲၣ်ဂၢၢ်ကျၢၤလၢအဂီၢ်
အစိၤစိၤအဃၣ်ဃၣ်,
ဒီးယတၢ်အၢၣ်လီၤအီလီၤန့ၣ်
ကအိၣ်ဂၢၢ်ဆိးကျၢၤလၢအဂီၢ်လီၤ.
29 အဝဲအစီၤပၤအစၢၤအသွဲၣ်အတၢ်ပၢဘၣ်န့ၣ်
ကအိၣ်ဂၢၢ်ကျၢၤဝဲဒ်မူခိၣ်အသိး,
ထီဘိအဝဲအစၢၤအသွဲၣ်တဂၤ ကကဲဘၣ်စီၤပၤန့ၣ်လီၤ.
30 ဘၣ်ဆၣ်အဖိတဖၣ်မ့ၢ်လဲၤသဒၣ်ယတၢ်သိၣ်တၢ်သီ,
ဒီးတလဲၤတၢ်လၢယတၢ်စံၣ်ညီၣ်အပူၤ,
31 မ့ၢ်လုၣ်သ့ၣ်ခါပတာ်ယတၢ်သိၣ်တၢ်သီဒီး
မ့ၢ်တတိၢ်န့ၢ်ယတၢ်မၤလိာ်ဘၣ်န့ၣ်ဒီး
32 ယကသိၣ်ဃီၣ်အဝဲသ့ၣ်လၢနီၣ်တီၢ်
လၢအတၢ်ကမၣ်အဃိ
ဒီးအတၢ်အၢလၢတၢ်တီၢ်န့ၣ်လီၤ
33 ဘၣ်ဆၣ်
ယတသုးကွံာ်ယတၢ်အဲၣ်ဂၢၢ်ကျၢၤလၢအီၤ,
မ့တမ့ၢ်ယတပျဲဟးဂီၤယတၢ်သူၣ်တီသးလိၤန့ၣ်ဘၣ်.
34 ယတမၤဟးဂီၤဘၣ်ယတၢ်အၢၣ်လီၤအီလီၤ.
မ့တမ့ၢ်ယတဟံးန့ၢ်က့ၤတၢ်ကတိၤလၢ
အထီၣ်ဖျဲးလၢယထးခိၣ်န့ၣ်ဘၣ်.
35 ယဆိၣ်တၢ်ထဲတဘျီဒီး အဝံၤလၢ ယမံၤစီဆှံအပူၤ,
ယတကတိၤဘၣ်တၢ်ကဘျံးကဘျၣ်ဒီး
စီၤဒၤဝံးဘၣ်.
36 ထီဘိအဝဲကအိၣ်ဒီးအစၢၤအသွဲတဖၣ်
ဒီးယကအံးလီၤကွၢ်လီၤအဘီအမုၢ် ယံာ်ဝဲထဲသိးမုၢ်အတၢ်ကပီၤအိၣ်ဝဲန့ၣ်လီၤ.
37 ဒ်လါအသိးန့ၣ်ကအိၣ်ဂၢၢ်ဆိးကျၢၤလီၤထူလီၤယိာ်
ဒ်တၢ်အုၣ်အသးအတီလၢမူခိၣ်အသိးန့ၣ်လီၤ.” စ့လၤ
38 ဘၣ်ဆၣ်, ခဲအံၤနသးထီၣ်ဘၣ်ပှၤလၢနဖှူအီၤ,
နလဲၤသဒၣ်ဒီးညိကွံာ်လံအီၤလံ.
39 နမၤဟးဂီၤနတၢ်အၢၣ်လီၤအီလီၤဒီးနခ့နပှၤ,
ဒီးနတ့ၢ်လီၤကွံာ် အခိၣ်သလုးဆူ
ကပံာ်ကျါလီၤ.
40 နမၤလီၤပှီၢ်ကွံာ်အဝ့ၢ်ခိၣ်ဒူတဖၣ်ခဲလၢာ်
ဒီးနမၤဟးဂီၤတ့ၢ်လံအတိာ်ဧိၤတာ်ဧိၤန့ၣ်လံလီၤ.
41 ကယဲၢ်ပှၤလၢအလဲၤခီဂာ်အီၤန့ၣ်ဂုာ်န့ၢ်အတၢ်ဒီး
အဝဲကဲထီၣ်တ့ၢ်လံတၢ်ဒုၣ်ဒွဲၣ်အလီၢ်လၢ
ပှၤလၢအဃၢၤတဖၣ်အဂီၢ်န့ၣ်လီၤ.
42 နပာ်ထီၣ်ထီပှၤထီဒါအီၤအစုထွဲ,
နဒုးသးခုအဒုၣ်အဒါခဲလၢာ်လီၤ.
43 နဒုးကဲထီၣ်အစုကဝဲၤတဖၣ်ဆူ တၢ်ကလီကလီ
ဒီးပျဲအဘၣ်တၢ်မၤဃၣ်အီၤလၢ
တၢ်ဒုးအပူၤလီၤ.
44 နဟံးထီၣ်ကွံာ်အစီၤပၤအနီၣ်ထိး
ဒီးနမၤလီၤဃံၤအလီၢ်ပစိာ်ပၢၢ်လၢဟီၣ်ခိၣ်လိၤလီၤ.
45 နဒုးဖျါပှၢ်အီၤန့ၢ်ဒံးအနံၣ်အလါ အမ့ၢ်အတီ
ဒီးလုၣ်ဘၢအီၤဒီး တၢ်လီၤမဲာ်ဆှးန့ၣ်လီၤ. စ့လၤ
46 ဆံးယံာ်လဲၣ်, ယွၤဧၢ,
မ့ၢ်နကပာ်တဒၢနသးလီၤထူလီၤယိာ်လီၤဧါ.
မ့ၢ်နတၢ်သးထီၣ်
ကအီၣ်တၢ်ဒ်မ့ၣ်အူအသိးဆံးယံာ်လဲၣ်.
47 ယွၤဧၢ, ယဆၢကတီၢ်ဖုၣ်ဆံးဒိၣ်လဲၣ်န့ၣ်
သ့ၣ်နီၣ်ထီၣ်တက့ၢ်.
ဒီးနတ့လီၤပှၤကညီဖိလၢအသံသ့န့ၣ်
သ့ၣ်နီၣ်ထီၣ်တက့ၢ်.
48 ပှၤလၢအမူဝဲဒီးတထံၣ်န့ၢ်တၢ်သံနီတဘျီ
ဒီးကမၤပူၤဖျဲးအသးသမူသ့လၢ
တၢ်သံအစိအကမီၤန့ၣ်, မ့ၢ်မတၤတဂၤလဲၣ်. စ့လၤ
49 ယွၤဧၢ, နတၢ်အဲၣ်ဂၢၢ်ကျၢၤလၢပျၢၤ
ဒီးနဆိၣ်တ့ၢ်တၢ်ဒီးစီၤဒၤဝံးလၢ
တၢ်သူၣ်တီသးလိၤအပူၤန့ၣ်,
မ့ၢ်အအိၣ်ဖဲလဲၣ်.
50 ယွၤဧၢ, သ့ၣ်နီၣ်ထီၣ်က့ၤနခ့နပှၤဘၣ်တၢ်ဒုၣ်ဒွဲၣ်ဒ်လဲၣ်,
ဒီးယစိာ်ပှၤအါကလုာ်အတၢ်ဒုၣ်ဒွဲၣ်လၢ
ယသးနါပှၢ်အပူၤဒ်လဲၣ်န့ၣ်တက့ၢ်.
51 ယွၤဧၢ,
နဒုၣ်နဒါတဖၣ်ဒုၣ်ဒွဲၣ်စီၤပၤလၢနဃုထၢအီၤလီၤ.
အဝဲသ့ၣ်ဒုၣ်ဒွဲၣ်အီၤဖဲ
အလဲၤတၢ်တပူၤလၢ်လၢ်န့ၣ်လီၤ.
52 မ်ယွၤဘၣ်တၢ်စံးထီၣ်ပတြၢၤလီၤထူလီၤယိာ်တက့ၢ်.
အၤမ့ၣ်, ဒီးအၤမ့ၣ်.
လံာ်လွံၢ်ဘ့ၣ်တဘ့ၣ်