စံးထီၣ်ပတြၢၤ 84
1 တၢ်သုးမုၢ်ဂီၢ်မုၢ်အယွၤဧၢ,
နတၢ်အိၣ်တၢ်ဆိးအလီၢ်အံၤ
ယအဲၣ်ယကွံအီၤဆံးဒိၣ်လဲၣ်.
2 ယသးဆၢလဲၤဘၣ်ဆူယွၤအဂၢၤတဖၣ်အပူၤ,
တုၤယလီၤဘှါဝဲဒၣ်န့ၣ်လီၤ.
ယသးဒီးယညၣ်သးဝံၣ်တၢ်လၢတၢ်သူၣ်ခုသးခု
ဆူကစၢ်ယွၤလၢအမူဝဲတဂၤအအိၣ်န့ၣ်လီၤ.
3 ယွၤ, သ့တၢ်လၢာ်ကစၢ်, ယစီၤပၤဒီးယကစၢ်ယွၤဧၢ,
မ့ၢ်မးထိၣ်ဖှံးဖိတဖၣ်ဘှီထီၣ်အဟံၣ်ဒီး
ထိၣ်ဘျ့ၣ်ဘျီၣ်တဖၣ်အိၣ်ဒီးအသွံလၢအဂီၢ်ဒၣ်ဝဲ
လၢအကပာ်လီၤအဖိလၢ
လၢတၢ်လုၢ်လီၢ်တဖၣ်အကပၤဒၣ်လဲာ်လီၤ.
4 ပှၤလၢအအိၣ်ဝဲဆိးဝဲလၢနတၢ်လုၢ်ဟံၣ်ပူၤဒီး
ထီဘိသးဝံၣ်စံးထီၣ်ပတြၢၤနၤန့ၣ်
5 ပှၤလၢအဂံၢ်အဘါအိၣ်လၢနပူၤ,
ဒီးအသးဆူၣ်လဲၤဆူၣ်တၢ်ဘါတၢ်လၢ ကစၢၢ်စံယိၣ်န့ၣ်
ဘၣ်ဆိၣ်ဂ့ၤဝဲလီၤ.
6 ဖဲအဝဲသ့ၣ်လဲၤခီဂာ်မဲာ်ထံအကစၢၢ်ကဆူး
တြီၤလၢအဃ့ထီန့ၣ်, တၢ်လီၢ်န့ၣ်
ကဲထီၣ်ထံထီၣ်ပၢၢ်တဖၣ်လီၤ.
တၢ်ဟဲစူၤဆိမၤပှဲၤတၢ်လီၢ်န့ၣ်
ဒီးကမါတဖၣ်လီၤ.
7 အဝဲသ့ၣ်တဖၣ်န့ၣ်ဒံးလဲၤတၢ်, အဂံၢ်အဘါဒံးဆူၣ်ထီၣ်
ဒီးအဝဲသ့ၣ်ကထံၣ်ဘၣ်ကစၢ်တဖၣ် အကစၢ်ယွၤ
8 ယွၤ, သ့တၢ်လၢာ်အကစၢ်ယွၤဧၢ,
ဒိကနၣ်ယဘါထုကဖၣ်တၢ်တက့ၢ်.
စီၤယၤကိာ်အကစၢ်ယွၤဧၢ, ဒိကနၣ်လၢ်တက့ၢ်. စ့လၤ
9 ကစၢ်ယွၤဧၢ, ဆိၣ်ဂ့ၤပစီၤပၤ
စီၤပၤတဂၤလၢ နဃုထၢတ့ၢ်အီၤန့ၣ်တက့ၢ်.
10 အဂ့ၢ်ဒ်အံၤ,
ပအိၣ်ပဆိးလၢနဂၢၤတဖၣ်အပူၤတနံၤန့ၣ်,
ဂ့ၤန့ၢ်ပအိၣ်ပဆိးလၢတၢ်လီၢ်အဂၤ
အနံၤတကထိတက့ၢ်လီၤ.
ယဃုထၢတၢ်ပၢၤကျဲစၢၤအလီၢ်လၢ
ယကစၢ်ယွၤအဟံၣ်ပူၤန့ၣ် ဂ့ၤဒိၣ်န့ၢ်
ယအိၣ်ယဆိးလၢပှၤတတီတလိၤ
အဟံၣ်တဖၣ်အပူၤတက့ၢ်လီၤ.
11 အဂ့ၢ်ဒ်အံၤ, ယွၤ, ကစၢ်ယွၤန့ၣ်မ့ၢ်မုၢ်, ဒီးကတီၤတဘ့ၣ်လီၤ.
အဝဲဟ့ၣ်လီၤတၢ်ဘျုးတၢ်ဖှိၣ်ဒီး
တၢ်လၤတၢ်ကပီၤလီၤ.
တတြီဘၣ်တၢ်ဂ့ၤလၢပှၤလဲၤတၢ်
တီတီလိၤလိၤတဖၣ်န့ၣ်နီတမံၤဘၣ်.
12 ယွၤ, သ့တၢ်လၢာ်ကစၢ်ဧၢ,
ပှၤလၢအသန့ၤအသးလၢနၤန့ၣ်
ဘၣ်ဆိၣ်ဂ့ၤဝဲလီၤ.