စံးထီၣ်ပတြၢၤ 72
1 ကစၢ်ယွၤဧၢ, ဟ့ၣ်လီၤနတၢ်စံၣ်ညီၣ်ဆူစီၤပၤ,
ဒီးနတၢ်တီတၢ်လိၤဆူစီၤပၤအဖိခွါတက့ၢ်.
2 မ်အစံၣ်ညီၣ်နပှၤဂီၢ်မုၢ်လၢတၢ်တီတၢ်လိၤ
ဒီးနပှၤဖှီၣ်ဖိယာ်ဖိလၢတၢ်စံၣ်ညီၣ်တီန့ၣ်တက့ၢ်.
3 မ်ကစၢၢ်ကလိကဟဲစိာ်တၢ်ဘီၣ်တၢ်ညီ
လၢပှၤဂီၢ်မုၢ်အဂီၢ်,
ဒီးတၢ်လူၢ်တဖၣ်ဟဲစိာ်
တၢ်တီတၢ်လိၤအတၤသၣ်န့ၣ်တက့ၢ်.
4 မ်စီၤပၤကအိၣ်ဂၢၢ်ဆိးကျၢၤဝဲ
ကအုၣ်က့ၤခီၣ်က့ၤပှၤလၢ
အလိၣ်ဘၣ်တၢ်သ့ၣ်တဖၣ်
ဒီးကမၤလီၤကလဲပှၤမၤနးမၤဖှီၣ်
တၢ်တဖၣ်န့ၣ်တက့ၢ်.
5 မ်ပှၤကပျံၤနၤဖဲမုၢ်ဒီးလါအိၣ်ဝဲအဖၢမုၢ်
6 မ်စီၤပၤကလီၤဂာ်ဒ်တၢ်စူၤလၢအဟဲလီၤလၢ
စံာ်ပျီလၢတၢ်ကူးအီၤဝံၤ
ဒ်တၢ်သဖှံၣ်လီၤလၢအမၤဘၣ်စီၣ်
ဟီၣ်ခိၣ်အသိးန့ၣ်တက့ၢ်.
7 လၢအမုၢ်နံၤတဖၣ်အပူၤန့ၣ်,
ပှၤတီပှၤလိၤကဘီၣ်ထီၣ်ညီထီၣ်,
ဒီးတၢ်ဃူတၢ်ဖိးကအိၣ်တုၤ
8 မ်ကပၢဘၣ်ဝဲပီၣ်လဲၣ်တုၤလၢပီၣ်လဲၣ်,
ဒီးလၢထံကျိဖရၤသးပၢၢ်တုၤလၢဟီၣ်ခိၣ်
အကတၢၢ်တဖၣ်န့ၣ်တက့ၢ်.
9 မ်ပှၤပှၢ်လၢ်ကျါဖိကဆုးလီၤအခိၣ်လၢအမဲာ်ညါ,
ဒီးအဒုၣ်အဒါတဖၣ်ကလ့ၣ်
ဟီၣ်ခိၣ်အကမူၣ်န့ၣ်တက့ၢ်.
10 မ်ကီၢ်စပၤနံဒီးကီးတဖၣ်အစီၤပၤတဖၣ်
ဟ့ၣ်အီၤလၢတၢ်ဟ့ၣ်,
မ်ၡဘၤဒီးစဘၤအစီၤပၤတဖၣ်
ဟဲစိာ်တၢ်ဟ့ၣ်တဖၣ်တက့ၢ်.
11 မ်စီၤပၤခဲလၢာ်ကဘါထီၣ်အီၤ
ဒီးပှၤကလုာ်ခဲလၢာ်ကမၤအတၢ်တက့ၢ်.
12 အဂ့ၢ်ဒ်အံၤအဝဲမၤပူၤဖျဲးဝဲပှၤဖှီၣ်ဖိယာ်ဖိ,
ပှၤဘၣ်နးဘၣ်ဖှီၣ်ဒီးပှၤလၢ
တၢ်မၤစၢၤအီၤတအိၣ်ဘၣ်
ဖဲအဝဲသ့ၣ်ကိးထီၣ်ဝဲန့ၣ်လီၤ.
13 အဝဲသးကညီၤပှၤဂံၢ်စၢ်ဘါစၢ်ဒီးပှၤဖှီၣ်ဖိယာ်ဖိ
ဒီးအုၣ်က့ၤခီၣ်က့ၤပှၤဖှီၣ်ဖိယာ်ဖိအသးသမူလီၤ.
14 အဝဲပှ့ၤက့ၤအဝဲသ့ၣ်အသးသမူလၢ
ပှၤမၤနးမၤဖှီၣ်တၢ်အစုပူၤ
ဒီးအသွံၣ်န့ၣ်မ့ၢ်တၢ်လုၢ်ဒိၣ်ပှ့ၤဒိၣ်
15 မ်စီၤပၤကအိၣ်ကၢအိၣ်ခိးဝဲ,
မ်တၢ်ကဟ့ၣ်အီၤလၢၡဘၤအထူ,
မ်ပှၤဂီၢ်မုၢ်ကဘါထုကဖၣ်န့ၢ်တၢ်လၢအဂီၢ်တထံၣ်ဃီ
ဒီးကဘၣ်တၢ်စံးထီၣ်ပတြၢၤအီၤ
ကိးမုၢ်နံၤန့ၣ်တက့ၢ်.
16 မ်ဘုဧိၤဟုဧိၤကအိၣ်လၢပှဲၤဝဲလၢထံကီၢ်အပူၤ,
ဒီးတၢ်လူၢ်တဖၣ် အဒီခိၣ်န့ၣ်ကဟူးဝးဝဲဒ်လဘၤနိၣ်အသိး
မ်အသၣ်ထီၣ်အါအါဂီၢ်ဂီၢ်ဒ်
လဘၤနိၣ်အတၤသၣ်တဖၣ်အသိးတက့ၢ်.
မ်အဂုၤထီၣ်ပသီထီၣ်ဒ် နီၣ်ဧိၤမံၤဧိၤလၢစံာ်ပျီပူၤအသိးတက့ၢ်.
17 မ်စီၤပၤအမံၤကအိၣ်လီၤထူလီၤယိာ်,
အတၢ်မံၤဟူသၣ်ဖျါကအိၣ်ဝဲတထံၣ်ဃီ
ဒ်မုၢ်အိၣ်ဝဲအသိး,
မ်ပှၤကိးကလုာ်ဒဲးဘၣ်ဆိၣ်ဂ့ၤခီဖျိအီၤဒီးအဝဲသ့ၣ် ကကိးအီၤလၢ ပှၤဘၣ်ဆိၣ်ဂ့ၤန့ၣ်လီၤ.
18 စံးထီၣ်ပတြၢၤယွၤ, အံၣ်စရ့လးအကစၢ်ယွၤ
လၢအမၤတၢ်လီၤလးထဲတဂၤဧိၤန့ၣ်တက့ၢ်.
19 အမံၤလၤသၣ်ကပီၤန့ၣ် မ်အဘၣ်တၢ်စံးထီၣ်ပတြၢၤ
လီၤထူလီၤယိာ်တက့ၢ်.
မ်ဟီၣ်ခိၣ်ဒီဘ့ၣ်ညါပှဲၤဝဲဒီးအလၤကပီၤတက့ၢ်.
20 စီၤယံးၡဲအဖိခွါစီၤဒၤဝံးအတၢ်ထုကဖၣ်န့ၣ်ဝံၤလံ.
လံာ်သၢဘ့ၣ်တဘ့ၣ်