စံးထီၣ်ပတြၢၤ 50
1 ယွၤ,
တၢ်အစိဒိၣ်ကမီၤထီကစၢ်ယွၤကတိၤတၢ်လီၤ.
ကိးပှၤဟီၣ်ခိၣ်ဖိလၢမုၢ်ထီၣ်ပၢၢ်လၢမုၢ်နုာ်လီၤ.
2 လၢစံယိၣ်အတၢ်ဃံတၢ်လၤအလၢအပှဲၤအပူၤန့ၣ်,
3 ပကစၢ်ယွၤဟဲ,
ဘၣ်ဆၣ်တမ့ၢ်လၢတၢ်ဘှ့ၣ်တၢ်ဘှီၣ်အပူၤဘၣ်.
မ့ၣ်အူအီၣ်တၢ်လၢအမဲာ်ညါဒီး
ကလံၤမုၢ်တွၤဆူၣ်ဆူၣ်ကလဲာ်အိၣ်ဝးတရံးအီၤလီၤ.
4 အဝဲကိးဖှိၣ်မူခိၣ်ဒီးဟီၣ်ခိၣ်ဒ်ပှၤအုၣ်အသးတဖၣ်အသိး လၢကကွၢ်အဝဲ
ကစံၣ်ညီၣ်အပှၤဂီၢ်မုၢ်အဂီၢ်န့ၣ်လီၤ.
5 အဝဲစံးဝဲ, “ပာ်ဖှိၣ်ပှၤလၢအသးတီဒီးယၤ,
ပှၤလၢအမၤတၢ်အၢၣ်လီၤအီလီၤဒီးယၤခီဖျိ
တၢ်လုၢ်ထီၣ်အတၢ်လုၢ်န့ၣ်တက့ၢ်.”
6 ဒီးမူခိၣ်ဒုးနဲၣ်အတၢ်တီတၢ်လိၤလီၤ. အဂ့ၢ်ဒ်အံၤ, ကစၢ်ယွၤ,
အကစၢ်ဒၣ်ဝဲန့ၣ်မ့ၢ်ပှၤစံၣ်ညီၣ်ကွီၢ်တဂၤလီၤ. စ့လၤ
7 ဒိကနၣ်, ယပှၤဂီၢ်မုၢ်သ့ၣ်ဧၢ, ဒီးယကတိၤတၢ်,
အံၣ်စရ့လးဧၢ, ယကအုၣ်ယသးထီဒါနၤလီၤ.
ယဲဒၣ်အံၤယမ့ၢ်ကစၢ်ယွၤ, နကစၢ်ယွၤလီၤ.
8 ယတသိၣ်ဃီၣ်နၤလၢ နတၢ်လုၢ်တဖၣ်
မ့တမ့ၢ်နတၢ်လုၢ်မ့ၣ်အူတဖၣ်လၢ
အအိၣ်လၢယမဲာ်ညါတထံၣ်ဃီအဃိန့ၣ်ဘၣ်
9 ယတတူၢ်လိာ်ဘၣ်ဂီၤဖံးဖါလၢနကပိၤပူၤမ့ၢ်ဂ့ၤ,
မဲာ်တဲးလဲးဖါလၢနကရၢပူၤမ့ၢ်ဂ့ၤန့ၣ်ဘၣ်.
10 အဂ့ၢ်ဒ်အံၤ, ဆၣ်ဖိကီၢ်ဖိအမံၤလၢပှၢ်လၢ်ကျါဒီး
ဆၣ်ဖိကီၢ်ဖိအဒၢလၢကစၢၢ်ကလိအလိၤလၢအအိၣ်, အကထိကထိတဖၣ်န့ၣ်,
မ့ၢ်ယတၢ်လီၤ.
11 ယသ့ၣ်ညါထိၣ်ဧိၤလံာ်ဧိၤလၢကစၢၢ်ကလိခဲလၢာ်
ဒီးကယဲၢ်တၢ်ဒူတၢ်ဃိၤလၢပျီပူၤခဲလၢာ်န့ၣ်
12 တၢ်မ့ၢ်သၣ်ဝံၤယသးဒီးယတစံးဘၣ်နၤဘၣ်.
အဂ့ၢ်ဒ်အံၤ, ဟီၣ်ခိၣ်ဒီးတၢ်ခဲလၢာ်လၢအပူၤန့ၣ်
မ့ၢ်ယတၢ်လီၤ.
13 မ့ၢ်ယအီၣ်ဂီၤဖံးအညၣ်
ဒီးအီမဲာ်တဲးလဲးအသွံၣ်န့ၣ်ဧါ.
14 မ်တၢ်စံးဘျုးစံးဖှိၣ်အတၢ်ဟ့ၣ်န့ၣ်
မ့ၢ်နတၢ်လုၢ်ထီၣ်ဆူကစၢ်ယွၤ,
ဒီးဟ့ၣ်သ့တၢ်လၢာ်တဂၤလၢ
ကယဲၢ်နတၢ်အၢၣ်လီၤခဲလၢာ်န့ၣ်တက့ၢ်.
15 လၢတၢ်ကိၢ်တၢ်ဂီၤအမုၢ်တနံၤန့ၣ်ကိးထီၣ်ယၤတက့ၢ်.
ယကမၤပူၤဖျဲးနၤ ဒီးနကမၤလၤကပီၤယၤလီၤ.
16 မ့မ့ၢ်ပှၤတတီတလိၤန့ၣ်ကစၢ်ယွၤစံးဘၣ်အီၤ,
“ဘၣ်မနုၤလၢနကစံၣ်တဲၤတဲလီၤယတၢ်မၤလိာ်,
ဒီးဘၣ်မနုၤလၢနကစံးကတိၤ
ယတၢ်အၢၣ်လီၤအီလီၤအဂ့ၢ်န့ၣ်လဲၣ်.”
17 အဂ့ၢ်ဒ်အံၤ, နသးဟ့ယတၢ်သိၣ်တၢ်သီ,
ဒီးနကွံာ်တ့ၢ်ကွံာ်ယကလုၢ်ကထါလၢ
နလီၢ်ခံန့ၣ်လီၤ.
18 နကဲထီၣ်ကယဲၢ်ပှၤဟုၣ်တၢ်တဂၤလၢ်လၢ်လၢ နထံၣ်အီၤအတံၤသကိး
ဒီးနမၤသကိးတၢ်ဒီးပှၤအဲၣ်ဘၢတၢ်တဖၣ်လီၤ.
19 နဟ့ၣ်နထးခိၣ်ဆူတၢ်အၢတၢ်သီ,
ဒီးနပျုၤဆူတၢ်လီတၢ်ဝ့ၤအပူၤန့ၣ်လီၤ.
20 နကတိၤထီဒါ နဒီပုၢ်ဝဲတထံၣ်ဃီဒီး
နဒုၣ်ဒွဲၣ်နမိၢ်အဖိခွါလီၤ.
21 နမၤတ့ၢ်တၢ်သ့ၣ်တဖၣ်အံၤဒီးယအိၣ်ဃိကလာ်လီၤ.
နဆိကမိၣ်လၢယဒ်သိးဒီးနကစၢ်ဒၣ်နဲလီၤ.
ဘၣ်ဆၣ်ယသိၣ်ဃီၣ်နၤခဲအံၤ
ဒီးပာ်လီၤတၢ်ကမၣ်လၢနမဲာ်ညါလီၤ.
22 “ကွၢ်ဆိကမိၣ်တၢ်အံၤ, ပှၤလၢအသးပ့ၤနီၣ်ကစၢ်ယွၤသ့ၣ်ဧၢ,
ယကအ့ၣ်ဖှီဘၣ်ဖုးသု
ဒီးပှၤမၤပူၤဖျဲးတၢ်တအိၣ်ဘၣ်နီတဂၤဘၣ်.
23 ပှၤလၢအဟဲစိာ်တၢ်စံးဘျုးစံးဖှိၣ်ဒ်တၢ်လုၢ်အသိးန့ၣ်
မၤလၤကပီၤယၤလီၤ.
ဒီးပှၤလၢအကတဲာ်ကတီၤအကျဲန့ၣ်
ယကဒုးနဲၣ်အီၤလၢ
ယတၢ်အုၣ်က့ၤခီၣ်က့ၤလီၤ.”