စံးထီၣ်ပတြၢၤ 118
1 အိ, ဟ့ၣ်ထီၣ်တၢ်စံးဘျုးစံးဖှိၣ်တဖၣ်ဆူ
ယွၤအအိၣ်န့ၣ်တက့ၢ်.
အဂ့ၢ်ဒ်အံၤ, ယွၤန့ၣ်ဂ့ၤဝဲလီၤ.
အဂ့ၢ်ဒ်အံၤ, အတၢ်အဲၣ်အိၣ်ဂၢၢ်ဆိးကျၢၤ
လီၤထူလီၤယိာ်လီၤ.
2 မ်ပှၤအံၣ်စရ့လးဖိတဖၣ်စံးဝဲ,
“အတၢ်အဲၣ်အိၣ်ဝဲလီၤထူလီၤယိာ်” န့ၣ်တက့ၢ်.
3 မ်ယွၤအပှၤလုၢ်တၢ်အခိၣ်တဖၣ်စံးဝဲ,
“အတၢ်အဲၣ်အိၣ်ဝဲလီၤထူလီၤယိာ်” န့ၣ်တက့ၢ်.
4 မ်ပှၤလၢအဘူၣ်ထီၣ်ဘါထီၣ်အီၤခဲလၢာ်စံးဝဲ,
“အတၢ်အဲၣ်အိၣ်ဝဲလီၤထူလီၤယိာ်” န့ၣ်တက့ၢ်.
5 ယကိးထီၣ်ယွၤလၢယတၢ်ကိၢ်တၢ်ဂီၤအပူၤလီၤ.
အဝဲဒၣ်စံးဆၢယၤဒီးမၤပူၤမၤဖျဲးယၤန့ၣ်လီၤ.
6 ယွၤအိၣ်ဒီးယၤဒီးယတပျံၤဘၣ်တၢ်ဘၣ်.
ပှၤကညီမၤယၤကသ့မနုၤလဲၣ်.
7 ယွၤအိၣ်လၢယအိၣ်တခီလၢကမၤစၢၤယၤလီၤ.
ဒီးယကထံၣ်ဘၣ် ယဒုၣ်ယဒါတဖၣ်
ဘၣ်တၢ်မၤဃၣ်ကွံာ်အီၤန့ၣ်လီၤ.
8 တၢ်ဃ့ၢ်ဆူယွၤအိၣ်န့ၣ်, ဂ့ၤန့ၢ်
တၢ်သန့ၤပသးလၢပှၤကညီတက့ၢ်န့ၣ်လီၤ.
9 တၢ်ဃ့ၢ်ဆူယွၤအအိၣ်နံၣ်ဂ့ၤန့ၢ်တၢ်သန့ၤပသးလၢပဒိၣ်ဖး ဒိၣ်တက့ၢ်န့ၣ်လီၤ.
10 ဒုၣ်ဒါအါဂၤအိၣ်ဝးတရံးယၤ,
ဘၣ်ဆၣ်ယမၤဟးဂီၤကွံာ်အဝဲသ့ၣ်လၢ
ယွၤအစိအကမီၤန့ၣ်လီၤ.
11 အဝဲသ့ၣ်ကဝီၤဃာ်ယၤကိးကပၤဒဲး
ဘၣ်ဆၣ်ယမၤဟးဂီၤကွံာ်အဝဲသ့ၣ်လၢ
ယွၤအစိအကမီၤလီၤ.
12 အဝဲသ့ၣ် အိၣ်ဖှိၣ်ဂီၢ်မုၢ်လၢယလိၤ ဒ်ကွဲဧိၤကနဲဧိၤအသိး,
ဘၣ်ဆၣ်ဒီး မ့ၣ်အူအီၣ်ကွံာ်အဝဲသ့ၣ်ချ့သဒံးဒ် မ့ၣ်အူအီၣ်တၤဆှုၣ်အသိး,
ယမၤဟးဂီၤကွံာ်အဝဲသ့ၣ်လၢ ယွၤအစိကမီၤအပူၤန့ၣ်လီၤ.
13 ယဘၣ်တၢ်ဆီၣ်လီၤတ့ၢ်ယၤနးမး
ဒ်သိးယကလီၤဃံၤလီၤ.
ဘၣ်ဆၣ်ယွၤမၤစၢၤတ့ၢ်လံယၤလံ.
14 ယွၤမ့ၢ်ယဂံၢ်ယဘါ, ဒီးယတၢ်သးဝံၣ်,
မ့ၢ်တ့ၢ်လံဝဲယတၢ်အုၣ်က့ၤခီၣ်က့ၤန့ၣ်လီၤ.
15 ဒိကနၣ်တၢ်သးခုအတၢ်သးဝံၣ်လၢတၢ်မၤနၢၤအဂီၢ်
လၢကစၢ်ယွၤအပှၤဂီၢ်မုၢ်အဒဲတဖၣ်အပူၤတက့ၢ်,
“ယွၤအစိအကမီၤဖးဒိၣ်မၤဝံၤတ့ၢ်လံတၢ်လံ.
16 အတၢ်စိတၢ်ကမီၤဟဲစိာ်န့ၢ်ပှၤတၢ်မၤနၢၤ,
အစိအကမီၤဖးဒိၣ်လၢတၢ်ဒုးတၢ်ယၤအပူၤလီၤ.”
17 ယတသံဘၣ်. မ့ၢ်ယကမူဒီး
စံၣ်တဲၤတဲလီၤယွၤအတၢ်မၤတဖၣ်လီၤ.
18 ယွၤသိၣ်ဃီၣ်ယၤနးမးလီၤ. ဘၣ်ဆၣ်ဒီး
တဟ့ၣ်လီၤကွံာ်ယၤဆူတၢ်သံဘၣ်.
19 အိးထီၣ်န့ၢ်ယၤလၢတၢ်လုၢ်ဟံၣ်
အတြဲၤတဖၣ်န့ၣ်တက့ၢ်.
ယကလဲၤနုာ်ဆူအပူၤဒီးစံးဘျုးစံးဖှိၣ်ယွၤန့ၣ်လီၤ.
20 အအံၤမ့ၢ်ယွၤအတြဲၤလၢ
ထဲဒၣ်ပှၤအတီအလိၤဧိၤလဲၤနုာ်သ့ဝဲဒၣ်န့ၣ်လီၤ.
21 ယစံးထီၣ်ပတြၢၤနၤ, ယွၤဧၢ.
အဂ့ၢ်ဒ်အံၤ, နနၢ်ဟူယၤ, အဂ့ၢ်ဒ်အံၤ, နဟ့ၣ်လီၤယၤတၢ်မၤနၢၤလီၤ.
22 လၢၢ်လၢပှၤသူၣ်ထီၣ်တၢ်ဖိတဖၣ်ညိကွံာ် ဝဲဒ်တၢ်ကလီကလီအသိးန့ၣ်,
ကဲထီၣ်လၢၢ်လၢအကါဒိၣ်ကတၢၢ်န့ၣ်လံ.
23 တၢ်အံၤမ့ၢ်တၢ်လၢယွၤမၤဝဲ
ဒီးမ့ၢ်တၢ်လီၤလးလၢ
ပထံၣ်ဘၣ်တ့ၢ်လံအီၤလၢပမဲာ်န့ၣ်လီၤ.
24 တၢ်လၢမုၢ်တနံၤအံၤယွၤတ့ဝဲလီၤ.
ပကသူၣ်ဖှံသးညီဒီးသူၣ်ခုသးခုလၢအပူၤလီၤ.
25 ယွၤဧၢ, အုၣ်က့ၤခီၣ်က့ၤပှၤတက့ၢ်.
ယွၤဧၢ, ဟ့ၣ်ပှၤတၢ်မၤနၢၤတက့ၢ်.
26 ပှၤတဂၤလၢအဟဲလၢယွၤအမံၤန့ၣ်
မ်အဘၣ်တၢ်ဆိၣ်ဂ့ၤတက့ၢ်.
ပဆိၣ်ဂ့ၤသုလၢယွၤအဟံၣ်ပူၤလီၤ.
27 ယွၤမ့ၢ်ကစၢ်ယွၤလီၤ. အဝဲမ့ၢ်တၢ်ဂ့ၤလၢပဂီၢ်လီၤ.
စးထီၣ်တၢ်သးခုအဘူၣ်လၢသုစုပူၤ,
ဒီးလဲၤတရံးတၢ်လုၢ်လီၢ်န့ၣ်တက့ၢ်.
28 နမ့ၢ်ယကစၢ်ယွၤဒီးယစံးဘျုးစံးဖှိၣ်နၤလီၤ.
ယကတဲဖျါထီၣ်နတၢ်ဒိၣ်တၢ်မုၢ်န့ၣ်လီၤ.
29 စံးဘျုးစံးဖှိၣ်ယွၤတက့ၢ်.
အဂ့ၢ်ဒ်အံၤ, အဝဲဒၣ်န့ၣ်ဂ့ၤဝဲလီၤ.
အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ
အိၣ်ဝဲလီၤထူလီၤယိာ်လီၤ.