စံးထီၣ်ပတြၢၤ 105
(၁ကွဲး.၁၆:၈-၂၂)
1 စံးဘျုးစံးဖှိၣ်ယွၤ, ကိးထီၣ်အမံၤ,
ဒီးဒုးသ့ၣ်ညါအတၢ်မၤတဖၣ်လၢ
အပှၤဂီၢ်မုၢ်အကျါတက့ၢ်.
2 သးဝံၣ်ထီၣ်အီၤ, သးဝံၣ်စံးထီၣ်ပတြၢၤအီၤတက့ၢ်.
တဲဖျါထီၣ်ကယဲၢ်အတၢ်မၤလီၤလး
ခဲလၢာ်န့ၣ်တက့ၢ်.
3 တၢ်လၤတၢ်ကပီၤအိၣ်ဝဲလၢအမံၤစီဆှံအပူၤန့ၣ်လီၤ. မ်ပှၤလၢအဃုယွၤသူၣ်ဖှံသးညီတက့ၢ်.
4 ဃုယွၤဒီးအဂံၢ်အဘါတက့ၢ်.
ဃုအမဲာ်တထံၣ်ဃီတက့ၢ်.
5 သ့ၣ်နီၣ်ထီၣ်က့ၤတၢ်လီၤလးတဖၣ်လၢအမၤတ့ၢ်ဝဲ,
အတၢ်မၤလီၤလးတဖၣ်, ဒီးတၢ်စံၣ်ညီၣ်လၢ အဟ့ၣ်လီၤဝဲန့ၣ်တက့ၢ်.
6 အခ့အပှၤစီၤအၤဘြၤဟၣ်အချံအသၣ်,
ပှၤလၢအဃုထၢတ့ၢ်ဝဲ စီၤယၤကိာ်အဖိအလံၤသ့ၣ်ဧၢ,
7 အဝဲဒၣ်န့ၣ်မ့ၢ်ယွၤ, ပကစၢ်ယွၤ,
အတၢ်စံၣ်ညီၣ်တဖၣ်အိၣ်ဝဲလၢ
ဟီၣ်ခိၣ်ဒီဘ့ၣ်ညါလီၤ.
8 အဝဲသ့ၣ်နီၣ်ထီၣ်က့ၤ
အတၢ်အၢၣ်လီၤအီလီၤအထူအယိာ်,
အတၢ်ကတိၤလၢအမၤလိာ်ဝဲအစိၤတကထိလီၤ.
9 အဝဲကဟံးဃာ် အတၢ်အၢၣ်လီၤ လိာ်သးလၢ အမၤတ့ၢ်ဝဲဒီး စီၤအၤဘြၤဟၣ်,
ဒီးတၢ်လၢအအၢၣ်လီၤစီၤအံၤစဲးန့ၣ်လီၤ.
10 ယွၤမၤတၢ်အၢၣ်လီၤအီလီၤတမံၤဒီး
စီၤယၤကိာ်,
တၢ်အၢၣ်လီၤအီလီၤတမံၤလၢ
ကအိၣ်ဂၢၢ်ဆိးကျၢၤလီၤထူလီၤယိာ်န့ၣ်လီၤ.
11 အဝဲစံးဝဲ, “ယကဟ့ၣ်လီၤနၤလၢ ကီၢ်ကနၤဧၣ်,
ဒီး တၢ်န့ၣ်ကမ့ၢ်နတၢ်န့ၢ်သါဒၣ်နဲလီၤ.”
12 ကစၢ်ယွၤအပှၤဂီၢ်မုၢ်အနီၣ်ဂံၢ်စှၤဝဲ,
မ့ၢ်ပှၤတမှံၤလၢကီၢ်ကနၤဧၣ်အပူၤလီၤ.
13 အဝဲသ့ၣ်ဟးဝ့းဝီၤလၢ ကီၢ်တဘ့ၣ်ဘၣ်တဘ့ၣ်,
ဒီး လၢဘီမုၢ်တဘ့ၣ်ဆူ အဂၤတဘ့ၣ်န့ၣ်လီၤ.
14 ဘၣ်ဆၣ် ကစၢ်ယွၤတပျဲပှၤမၤနးမၤဖှီၣ် အဝဲသ့ၣ်နီတဂၤဘၣ်.
အဝဲဟ့ၣ်ပလီၢ်စီၤပၤတဖၣ်, လၢတၢ်ကဟုကယာ်အပှၤဂီၢ်မုၢ်အဂီၢ်, စံးဝဲ
15 “မၤဘၣ်ဒိဆါယခ့ယပှၤလၢ ယဃုထၢအီၤတဖၣ်တဂ့ၤ.
16 ယွၤဒုးလီၤဘၣ်တၢ်သၣ်ဝံၤလီၤဒိလၢ
အဝဲသ့ၣ်အထံအကီၢ်,
ဒီးစိာ်ထီၣ်ကွံာ်အတၢ်အီၣ်တၢ်အီခဲလၢာ်လီၤ.
17 ဘၣ်ဆၣ် အဝဲဆှၢလီၤဆိ ပှၤတဂၤလၢ အဝဲသ့ၣ်အမဲာ်ညါ,
စီၤယိၤသး,
ပှၤလၢအဘၣ်တၢ်ဆါကွံာ်အီၤ ဒ်ကုၢ်တဂၤအသိးန့ၣ်လီၤ.
18 အဝဲအခီၣ်တဖၣ်ဘၣ်တၢ်စၢဃာ်အီၤလၢ ထးသွဲတဖၣ်
ဒီးအကိာ်ဘၣ်တၢ်ကွီၤဃာ်အီၤလၢ ထးကွီၤ,
19 တုၤလီၤလၢ တၢ်လၢ အဝဲတဲဆိပာ်စၢၤဝဲလၢထီၣ်ပှဲၤထီၣ်န့ၣ်လီၤ.
ယွၤအကလုၢ်အုၣ်အသးလၢ အဝဲအတၢ်ဘၣ်ဝဲတီဝဲ အဂ့ၢ်န့ၣ်လီၤ.
20 အန့ၣ်ဒီး, အဲၤကူပတူးအစီၤပၤပျဲဟးထီၣ်အီၤ,
ဒီး ပှၤကလုာ်တဖၣ် အပှၤပၢတၢ်ပျၢ်ဖျဲးကွံာ်အီၤလီၤ.
21 အဝဲပာ်အီၤလၢအတၢ်ပၢတၢ်ပြးအခိၣ်,
ဒီးဒုးကဲထီၣ်အီၤလၢ ပှၤပၢထံကီၢ်ဒီဘ့ၣ်,
22 အိၣ်ဒီး တၢ်စိတၢ်ကမီၤလၢ စီၤပၤအပဒိၣ်တဖၣ်
အဖီခိၣ်ဒီး တၢ်န့ၢ်စိန့ၢ်ကမီၤလၢ
ကသိၣ်လိနဲၣ်ယုၤအပှၤဟ့ၣ်ကူၣ်တၢ်တဖၣ်န့ၣ်လီၤ.
23 တုၤစီၤယၤကိာ်လဲၤဆူ ကီၢ်အဲၤကူပတူး
ဒီးအိၣ်ဝဲဆိးဝဲဖဲ ကီၢ်န့ၣ်အပူၤလီၤ.
24 ယွၤဟ့ၣ်လီၤအပှၤဂီၢ်မုၢ်လၢ ဖိတဖၣ်အါဒံ
အါဂၤဒီး မၤဂံၢ်ဆူၣ်ဘါဆူၣ်ထီၣ်အီၤ အါန့ၢ်ဒံး အဒုၣ်အဒါတဖၣ်လီၤ.
25 အဝဲဒုးသးဟ့ပှၤအဲၤကူပတူးဖိတဖၣ်လၢ
အပှၤဂီၢ်မုၢ်ဒီး မၤအခ့အပှၤတဖၣ်လၢ တၢ်လီတၢ်ဝ့ၤအပူၤန့ၣ်လီၤ.
26 အန့ၣ်ဒီး, အဝဲမၢလီၤအခ့အပှၤစီၤမိၤၡ့
ဒီးစီၤအၤဟရိၣ်လၢအဃုထၢတ့ၢ်ဝဲန့ၣ်လီၤ.
27 အဝဲသ့ၣ်မၤတ့ၢ်ကစၢ်ယွၤအတၢ်မၤဖးဒိၣ်တဖၣ်
ဒီးမၤတၢ်လီၤလးတဖၣ်လၢ ကီၢ်အဲၤကူပတူးအပူၤလီၤ.
28 ကစၢ်ယွၤဆှၢလီၤတၢ်ခံးတၢ်နၤလၢ ကီၢ်အလိၤ,
ဘၣ်ဆၣ် ပှၤအဲၤကူပတူးဖိတဖၣ်
တစူၢ်ဘၣ်အတၢ်မၤလိာ်ဘၣ်.
29 အဝဲဒုးကဲထီၣ်အဝဲသ့ၣ်အထံကျိတဖၣ်,
ဆူတၢ်သွံၣ်ဒီး မၤသံကွံာ်အညၣ်တဖၣ်ခဲလၢာ်လီၤ.
30 အထံအကီၢ်အိၣ်ပှဲၤဒီးဒ့ၣ်တဖၣ်
ဒီးတုၤလၢအစီၤပၤအနီဒၣ်လဲာ် ပှဲၤဒီးဒ့ၣ်တဖၣ်န့ၣ်လီၤ.
31 ကစၢ်ယွၤဟ့ၣ်လီၤအကလုၢ်ဒီး သၣ်ဘုလါတဖၣ်,
ဃးသူဃးလါဒီဖုဒီဂီၢ်အိၣ် ပှဲၤကီၢ်ဒီဘ့ၣ်ညါလီၤ.
32 လၢတၢ်စူၤအလီၢ်န့ၣ် အဝဲဟ့ၣ်လီၤသူၣ်
ဒီးလီဝၢ်ဒံးလၢ ထံကီၢ်အဖီခိၣ်လီၤ.
33 အဝဲမၤဟးဂီၤအသ့ၣ်စပံးမုၢ်တဖၣ်, ဒီးအချၢၣ်ဒၢထူၣ်တဖၣ်,
ဒီးမၤကၢ်လီၤကွံာ်အသ့ၣ်ခဲလၢာ်န့ၣ်လီၤ.
34 အဝဲဟ့ၣ်လီၤအကလုၢ်ဒီးဒွဲၣ်တဖၣ်ဟဲထီၣ်ဝဲ,
အိၣ်အကကွဲၢ်တဖၣ်လၢ
တၢ်ဂံၢ်တသ့ဘၣ်,
35 အဝဲသ့ၣ်အီၣ်ကွံာ်တၢ်မုၢ်တၢ်ဘိလၢ ကီၢ်ပူၤခဲလၢာ်,
အီၣ်ကွံာ်ကယဲၢ်တၤသူတၤသၣ်တဖၣ်လီၤ.
36 အဝဲမၤသံကွံာ်ကယဲၢ်ကီၢ်အဲၤကူပတူးအဟံၣ်ဒူၣ်ဃီထၢတဖၣ်,
အဖိခွါဝဲၢ်ကိခဲလၢာ်န့ၣ်လီၤ.
37 အန့ၣ်ဝံၤဒီး အဝဲဒုးဟးထီၣ်ကွံာ်ပှၤအံၣ်စရ့လးဖိတဖၣ်,
အဝဲသ့ၣ်စိာ်ဃုာ်ဒီး စ့ဒီထူ,
ဒီးအဝဲသ့ၣ်ခဲလၢာ်အိၣ်ဒီး တၢ်အိၣ်ဆူၣ်အိၣ်ချ့
ဒီးဂံၢ်ဆူၣ်ဘါဆူၣ်ဝဲဒၣ်လီၤ.
38 ပှၤအဲၤကူပတူးဖိတဖၣ် ပျံၤအဝဲသ့ၣ်ဒီး
သးခုဝဲဖဲအဝဲသ့ၣ်ဟးထီၣ်ကွံာ်ဝဲန့ၣ်လီၤ.
39 ကစၢ်ယွၤသလၣ်ထီၣ်တၢ်အၢၣ်လၢ
အပှၤဂီၢ်မုၢ်အဖီခိၣ်ဒီး ဟ့ၣ်လီၤအီၤ မ့ၣ်အူလၢ
မုၢ်နၤဒ်သိးကဟ့ၣ်အဝဲသ့ၣ်လၢတၢ်ကပီၤန့ၣ်လီၤ.
40 အဝဲသ့ၣ်ဃ့တၢ်, ဒီးယွၤဆှၢလီၤထိၣ်ဘှၢၣ်တဖၣ်,
အဝဲဒၣ်ဟ့ၣ်လီၤတၢ်အီၣ်လၢ မူခိၣ်လၢကဒုးဘျဲးအီၣ် အဝဲသ့ၣ်အဂီၢ်လီၤ.
41 အဝဲအိးထီၣ်လၢၢ်တဖျၢၣ်ဒီး
ထံဟဲဖှိးသဖှိထီၣ်, ယွၤလီၤခီဂာ်ပှၢ်မုၢ်ကနၢ
ဒ်ထံကျိတဘိအသိးန့ၣ်လီၤ.
42 အဂ့ၢ်ဒ်အံၤ,
အဝဲသ့ၣ်နီၣ်ထီၣ်က့ၤအတၢ်အၢၣ်လီၤအီလီၤစီဆှံ
ဆူအခ့အပှၤစီၤအၤဘြၤဟၣ်န့ၣ်လီၤ.
43 လၢတၢ်န့ၣ်အဃိအဝဲဆှၢပူၤဖျဲးထီၣ် ပှၤဂီၢ်မုၢ် လၢအဃုထၢဝဲ,
ဒီးအဝဲသ့ၣ် သူၣ်ဝံၣ်သးဆၢဒီး
ကိးသတြီထီၣ်လၢ
တၢ်သးခုအပူၤန့ၣ်လီၤ.
44 အဝဲဒၣ်ဟ့ၣ်အဝဲသ့ၣ်လၢ
ပှၤဂီၢ်မုၢ်အဂၤအထံအကီၢ်တဖၣ်,
ဒီးပျဲအဟံးန့ၢ်ကွံာ်အစံာ်ဧိၤပှဲၤဧိၤတဖၣ်,
45 ဒ်သိးအပှၤဂီၢ်မုၢ်ကစူၢ်အတၢ်သိၣ်တၢ်သီတဖၣ်ဒီး
တိၢ်န့ၢ်ဖံးဃာ်အတၢ်မၤလိာ်ခဲလၢာ်န့ၣ်လီၤ.
စံးထီၣ်ပတြၢၤယွၤတက့ၢ်.