26
1 တၢ်စံးထီၣ်ပတြၢၤပှၤအမၢးတဂၤန့ၣ်အလီၢ်တအိၣ်ဘၣ်. အမၤတၢ်န့ၣ်လီၤဂာ်ဒ်မူခိၣ်ဖီလီၤလၢတၢ်ကိၢ်ခါဒီး တၢ်ဟဲစူၤလီၤလၢကူးဘုအကတီၢ်အသိးန့ၣ်လီၤ.
2 နမ့ၢ်တကြၢးဒိးဘၣ်အီၤဒီး, တၢ်ဆိၣ်အၢတဖၣ်မၤဘၣ်ဒိဘၣ်ထံးနၤ တသ့ဘၣ်. တၢ်တဖၣ်န့ၣ်လီၤဂာ်ဒ်ထိၣ်တဖၣ်လၢအယူၤပူၤကွံာ်ဝဲဒီး တစီၢ်လီၤနီတဘျီဘၣ်အသိးန့ၣ်လီၤ.
3 နဘၣ်ဖျ့ကသ့ၣ်တဒု, နဘၣ်ဒုးအ့ၣ်ကသ့ၣ်ယီၤတဒုလၢအနိးပျံၤထး ဒီးနဘၣ်တီၢ်ပှၤအမၢးဖိတဂၤလီၤ.
4 နမ့ၢ်စံးဆၢပှၤဟးဂီၤဖိအတၢ်သံကွၢ်တဂိာ်တသီၣ်ဘၣ်တထံၣ်န့ၣ် ဒီး, နကစၢ်ဒၣ်နဲနမ့ၢ်ပှၤတဂိာ်တသီၣ်ဒ်ပှၤလၢအသံကွၢ်တၢ် တဂၤအသိးန့ၣ်လီၤ.
5 ဟ့ၣ်တၢ်စံးဆၢတဂိာ်တသီၣ်တမံၤဆူတၢ်သံကွၢ်တဂိာ်တသီၣ် တထံၣ်န့ၣ်တက့ၢ်. အန့ၣ်ဒီးပှၤလၢအသံကွၢ်တၢ်တဂၤန့ၣ်, ကသ့ၣ်ညါလီၤအသးလၢအဝဲတမ့ၢ်ပှၤအသ့ထဲသိးဒီးအဆိ ကမိၣ်လီၤအသးဘၣ်န့ၣ်လီၤ.
6 နမ့ၢ်မၢပှၤအမၢးတဂၤဟ့ၣ်တၢ်ကစီၣ်တမံၤဒီး, လီၤဂာ်ဒ်နကျီတဲာ်နခီၣ်ဒၣ်နဲဒီးနဃ့န့ၢ်တၢ်ကိၢ်တၢ်ဂီၤလၢ နဂီၢ်အသိးန့ၣ်လီၤ.
7 ပှၤအမၢးတဂၤသူတၢ်ကတိၤဒိတထံၣ်ဂ့ၤဂ့ၤဘၣ်ဘၣ်သ့ဝဲ ဒ်ပှၤတဂၤသူအခီၣ်လၢအဆၢလီၤတလံာ်တဖၣ်သ့ဝဲအသိးန့ၣ်လီၤ.
8 တၢ်စံးထီၣ်ပတြၢၤပှၤဟးဂီၤဖိတဂၤန့ၣ်အခီပညီမ့ၢ်ဒၣ်ဒ် တၢ်စၢဃာ်လၢၢ်တဖျၢၣ်လၢနီၣ်ဘျုးတခါအပူၤအသိးန့ၣ်လီၤ.
9 ပှၤအမၢးတဂၤယၢၤထီၣ်တၢ်ကူၣ်သ့အတၢ်ကတိၤတထံၣ်န့ၣ် ဒုးသ့ၣ်နီၣ်ထီၣ်ပှၤလၢပှၤအီမူၤသံးတဂၤကျဲးစၢးထဲးထီၣ် တၤဆှုၣ်တဘိလၢအစုပူၤန့ၣ်လီၤ.
10 တၢ်မၤအကစၢ်တဂၤလၢအဒိးလဲပှၤအမၢးတဂၤဂၤလၢအဟဲဘၣ်အတီၤန့ၣ်, မ့ၢ်ဒၣ်အမၤဘၣ်ဒိဆါပှၤခဲလၢာ်လၢအမၤသကိးတၢ်တဖၣ်ဧိၤန့ၣ်လီၤ.
11 ပှၤအမၢးတဂၤလၢအမၤကဒီးတၢ်ဟးဂီၤအတၢ်မၤခံစုတစုတစုန့ၣ်, လီၤဂာ်ဒ်ထွံၣ်တဒုက့ၤကဒါက့ၤဆူအတၢ်ဘှိးအသိးန့ၣ်လီၤ.
12 ပှၤဟးဂီၤဖိလၢအမၢးကတၢၢ်တဂၤန့ၣ်, ဂ့ၤဒိၣ်န့ၢ်ဒံးပှၤတဂၤလၢ အဆိကမိၣ်လီၤအသးလၢအကူၣ်တၢ်သ့ဖဲအတမ့ၢ်ဘၣ်အခါန့ၣ်လီၤ.
13 ဘၣ်မနုၤအဃိပှၤအကၢၣ်တဂၤတဟးထီၣ်လၢဟံၣ်ပူၤနီတဘျီ ဘၣ်န့ၣ်လဲၣ်. မ့ၢ်အပျံၤတၢ်မနုၤလဲၣ်. ခ့ယုၢ်တဖၣ်ဧါ.
14 ဒ်တြဲၤတဘ့ၣ်ဝံၢ်တရံးအသးလၢအသံၣ်ကျိၤတဖၣ်အလိၤအသိးန့ၣ်ပှၤ အကၢၣ်တဂၤဃၣ်အသးလၢအလီၢ်မံပူၤဒ်န့ၣ်အသိးလီၤ.
15 ပှၤတနီၤကၢၣ်ကဲၣ်ဆိးတုၤကဒၢနုာ်တၢ်အီၣ်ဆူအကိာ်ပူၤဒၣ်ဝဲန့ၣ်လီၤ.
16 ပှၤအကၢၣ်တဂၤကဆိကမိၣ်ဝဲလၢအဝဲကူၣ်တၢ်သ့ဒိၣ်န့ၢ်ဒံး ပှၤနွံဂၤလၢအသ့ဟ့ၣ်ထီၣ်အတၢ်ဆိကမိၣ်တဖၣ်လၢတၢ်ဘၣ်ဘျီးဘၣ်ဒါ အဂီၢ်န့ၣ်လီၤ.
17 တၢ်မၤဃါဃုာ်ပသးလၢတၢ်ဂ့ၢ်လိာ်ဘှီလိာ်တမံၤလၢအတဘၣ်ဃးဒီး ပှၤအပူၤန့ၣ်လီၤဂာ်ဒ်တၢ်လဲၤလီၤဆူကျဲပူၤဒီးစှီၤထွံၣ်တဒုဖဲအနၢ် အသိးန့ၣ်လီၤ.
18 ပှၤတဂၤလၢအလီန့ၢ်ပှၤအဂၤတဂၤအတၢ်ဒီးစံးဝဲလၢမ့ၢ်ဒၣ် လိာ်လ့တၢ်ဧိၤန့ၣ်,
19 မ့ၢ်ပှၤတဂၤလၢအလီၤဂာ်ဒီးပှၤအပျုၢ်တဂၤလၢအလိာ်ကွဲဒီးတၢ်စု ကဝဲၤလၢအမၤသံတၢ်သ့န့ၣ်လီၤ.
20 သ့ၣ်မုၣ်တအိၣ်ဘၣ်ဒီးမ့ၣ်အူလီၤပံာ်ဝဲလီၤ. တၢ်ကတိၤသီၣ်ဝံသဲကလၤတအိၣ်ဘၣ်န့ၣ်, တၢ်အ့ၣ်လိာ်ဆိးက့လိာ်ဆိကတီၢ်အသးလီၤ.
21 သွဲၣ်လးဒုးအိၣ်ထီၣ်မ့ၣ်အူအ့ၣ်ကဲၤကဖး, သ့ၣ်မုၣ်ဒုးကပျီၤ ထီၣ်မ့ၣ်အူလၣ်, ဒီးပှၤလၢအမၤကီမၤခဲတၢ်တဖၣ်တဒုးဆိတ့ၢ်တၢ် အ့ၣ်လိာ်ဆိးက့လိာ်တဖၣ်ဘၣ်.
22 တၢ်သီၣ်ဝံသဲကလၤမ့ၢ်တၢ်ဝံၣ်သိဝံၣ်ဘဲးဒိၣ်မးတုၤပသးအိၣ် ယူၢ်လီၤကွံာ်အီၤမးလဲၣ်.
23 တၢ်ကတိၤပာ်မၤအသးလၢအပာ်ခူသူၣ်နတၢ်ဆိကမိၣ်နီၢ်နီၢ်န့ၣ်, လီၤဂာ်ဒီးစ့အအ့ၣ်အိၣ်လၢသပၢၤဟီၣ်ခိၣ်လၢအလုၢ်အပှ့ၤတအိၣ်ဘၣ် တဖျၢၣ်အဖီခိၣ်အသိးန့ၣ်လီၤ.
24 ပှၤပာ်မၤအသးတဂၤန့ၣ်ပာ်ခူသူၣ်အတၢ်သးဟ့လၢအတၢ်ကတိၤလွဲန့ၢ် တၢ်တဖၣ်အပူၤလီၤ.
25 သီၣ်ကမုာ်ဒိၣ်မးလီၤ.ဘၣ်ဆၣ်နာ်အီၤတဂ့ၤ. အဂ့ၢ်ဒ်အံၤ, အသးပူၤပှဲၤဆၢၣ်ကလာ်ဒီးတၢ်သးဟ့န့ၣ်လီၤ.
26 အဝဲကပျိာ်လီၤဆီအတၢ်သးဟ့, ဘၣ်ဆၣ်ပှၤကိးဂၤဒဲးကထံၣ်တၢ်အၢ တၢ်သီတဖၣ်လၢအမၤဝဲန့ၣ်လီၤ.
27 ပှၤလၢအပာ်လီၤထုတဖၣ်လၢပှၤဂၤအဂီၢ်န့ၣ်, အကစၢ်ဒၣ်ဝဲကဘၣ်က့ၤထုလီၤ. ပှၤလၢအဒုးအိၣ်ထီၣ်ဟီၣ်ခိၣ်အတၢ်လီၤလာ်န့ၣ်, အကစၢ်ဒၣ်ဝဲတၢ်ကလီၤလာ်ဒိးသံအီၤန့ၣ်လီၤ.
28 ပျ့ၤလၢအလီတၢ်န့ၣ်သးဟ့ပှၤလၢအဒိးဘၣ်တၢ်မၤနၢၤအီၤတဖၣ်န့ၣ် လီၤ. ဒီးတၢ်ကတိၤပာ်မၤအသးန့ၣ်ဟဲစိာ်တၢ်ကလီ ကလီဒီးတၢ်ဟးဂီၤန့ၣ်လီၤ.