12
1 ပှၤတဂၤလၢ်လၢ်လၢအအဲၣ်တၢ်သ့ၣ်ညါနၢ်ပၢၢ်န့ၣ်သးအိၣ်လၢပှၤကစံး ဘၣ်တဲဘၣ်အီၤဖဲအဝဲမၤကမၣ်တၢ်န့ၣ်လီၤ. တၢ်သးဟ့တၢ်သိၣ်ဃီၣ်န့ၣ်မ့ၢ်တၢ်သူၣ်တထံသးတဆးလီၤ.
2 ယွၤဘၣ်အသးလၢပှၤအဂ့ၤတဖၣ်န့ၣ်လီၤ. မ့မ့ၢ်စံၣ်ညီၣ်ဃၣ်ပှၤလၢအကူၣ်ထီၣ်တၢ်အၢတၢ်သီလီၤ.
3 တၢ်တတီတလိၤတဟ့ၣ်တၢ်အိၣ်ဂၢၢ်ဆိးကျၢၤဘၣ်. မ့မ့ၢ်ပှၤတီပှၤလိၤတဖၣ်ဆၢထၢၣ်ဂၢၢ်ကျၢၤဝဲလီၤ.
4 မါလၢအဂ့ၤတဂၤန့ၣ်မ့ၢ်အဝၤအလၤကပီၤဒီးတၢ်သးခုလီၤ. မ့မ့ၢ်မါလၢအမၤမဲာ်ဆှးအဝၤန့ၣ်, လီၤဂာ်ဒ်တၢ်ဆါအုၣ်ကျၣ်လၢ အဃံတဖၣ်အပူၤအသိးန့ၣ်လီၤ.
5 ပှၤအတီအလိၤတဖၣ်ကမၤဘျုးမၤဂ့ၤနၤတီတီလီၤ. မ့မ့ၢ်ပှၤတတီတလိၤသးအိၣ်ထဲကကူၣ်လီအီၣ်နၤန့ၣ်လီၤ.
6 ပှၤတတီတလိၤတဖၣ်အတၢ်ကတိၤကူၣ်ထီၣ်တၢ်မၤသံမၤဝီလီၤ. မ့မ့ၢ်, ပှၤတီပှၤလိၤအတၢ်ကတိၤတဖၣ်န့ၣ်အုၣ်က့ၤခီၣ်က့ၤပှၤလၢ အဘၣ်တၢ်မၤပျံၤမၤဖုးအီၤတဖၣ်လီၤ.
7 ပှၤတတီတလိၤဘၣ်သဂၢၢ်အတၢ်လီၤပှီၢ်ဒီးအစၢၤအသွဲၣ်တအိၣ်လီၤ တဲာ်တ့ၢ်နီတဂၤဘၣ်. မ့မ့ၢ်, ပှၤတီပှၤလိၤအဒူၣ်ဖိထၢဖိ တဖၣ်ကအိၣ်မူဝဲဆူညါလီၤ.
8 နမ့မ့ၢ်ပှၤအိၣ်ဒီးတၢ်ကူၣ်တၢ်ဆးတဂၤဒီး, နကဘၣ်တၢ်စံးထီၣ် ပတြၢၤနၤလီၤ. နတၢ်သူၣ်ထံသးဆးမ့ၢ်တအိၣ်ဘၣ်ဒီး, ပှၤကကွၢ်တလီၤနၤလီၤ.
9 တၢ်မ့ၢ်ပှၤဖံးအီၣ်မၤအီၣ်တၢ်တဂၤလၢတၢ်လုၢ်အီၣ်သးသမူ အဂီၢ်န့ၣ်, ဂ့ၤဒိၣ်န့ၢ်ဒံး, တၢ်အိၣ်မူဒ်ပှၤဒိၣ်ပှၤသွါတဂၤအသိး ဘၣ်ဆၣ်ဒီးလီၤဒိဝဲဒၣ်န့ၣ်လီၤ.
10 ပှၤအဂ့ၤတဂၤကဟုကယာ်အဆၣ်ဖိကီၢ်ဖိတဖၣ်လီၤ. မ့မ့ၢ်, ပှၤအၢပှၤသီတဖၣ်အၢသီလၢအဆၣ်ဖိကီၢ်ဖိအဖီခိၣ်န့ၣ် လီၤ.
11 ပှၤထူစံာ်ဖိလၢအမၤတၢ်ဆူၣ်ဆူၣ်တဂၤအိၣ်ဒီးတၢ်အီၣ်တၢ်အီ လၢလၢပှဲၤပှဲၤလီၤ. မ့မ့ၢ်တၢ်မၤလၢာ်တၢ်ဆၢကတီၢ်လၢတၢ်မၤတဂီာ် တသီၣ်တဖၣ်အဂီၢ်န့ၣ်မ့ၢ်တၢ်သူၣ်တထံသးတဆးန့ၣ်လီၤ.
12 ကယဲၢ်တၢ်လၢပှၤတတီတလိၤတဖၣ်သးအိၣ်ဝဲန့ၣ်မ့ၢ်တၢ်ဃုမၤတၢ် အၢတၢ်သီတဖၣ်လီၤ. မ့မ့ၢ်, ပှၤတီပှၤလိၤဆၢထၢၣ်ဂၢၢ်ကျၢၤဝဲလီၤ.
13 ပှၤတတီတလိၤတဂၤန့ၣ်ဘၣ်တၢ်ဖီၣ်န့ၢ်အီၤလၢအတၢ်ကတိၤဒၣ်ဝဲလီၤ. မ့မ့ၢ်ပှၤအတီအလိၤတဂၤန့ၣ်မၤထူၣ်ဖျဲးထီၣ်အသးလၢတၢ်ကီတၢ် ခဲအပူၤလီၤ.
14 ခိၣ်ဖးလၢနဂီၢ်သန့ၤထီၣ်အသးလၢတၢ်လၢနကတိၤဒီးတၢ်လၢနမၤအီၤ န့ၣ်လီၤ. နကဒိးန့ၢ်ဘၣ်တၢ်လၢအကြၢးဒီးနၤန့ၣ်လီၤ.
15 ပှၤလၢအသူၣ်တထံအသးတဆးတဖၣ်ဆိကမိၣ်ဝဲထီဘိလၢအကျဲန့ၣ်ဘၣ် ဝဲလီၤ. ပှၤကူၣ်သ့တဖၣ်န့ၣ်, ဒိကနၣ်တၢ်ဟ့ၣ်ကူၣ်ဟ့ၣ်ဖးလီၤ.
16 ဖဲပှၤဟးဂီၤဖိအသးဘၣ်တံာ်တာ်န့ၣ်, လီၣ်ဖျါထီၣ်ဝဲချ့သဒံး လီၤ. မ့မ့ၢ်ပှၤလၢအအိၣ်ဒီးတၢ်သ့ၣ်ညါနၢ်ပၢၢ်တဖၣ်န့ၣ်, ကွၢ်ကပာ်ကွံာ်တၢ်ကတိၤဒုၣ်ဒွဲၣ်တမံၤလီၤ.
17 ဖဲနကတိၤတၢ်မ့ၢ်တၢ်တီန့ၣ်, တၢ်စံၣ်ညီၣ်တီမၤအသးလီၤ. မ့မ့ၢ်တၢ်လီတၢ်ဝ့ၤတဖၣ်ဆှၢတၢ်ဆူတၢ်စံၣ်ညီၣ်လီန့ၣ်လီၤ.
18 တၢ်ကတိၤတၢ်လၢတအိၣ်ဒီးတၢ်ဆိကမိၣ်ဆိကမးဘၣ်န့ၣ်မၤဆါတၢ်ယိာ် ဝဲထဲသိးသိးနးတဘ့ၣ်လၢ်လၢ်ဆဲးတၢ်န့ၣ်လီၤ. မ့မ့ၢ်တၢ်ကတိၤတၢ်လၢတၢ်ကူၣ်သ့ကူၣ်ဘၣ်အပူၤန့ၣ်, မၤဘျါက့ၤတၢ်သ့လီၤ.
19 တၢ်လီတၢ်ဝ့ၤတမံၤအိၣ်ဒီးတၢ်အိၣ်မူလၢအဖုၣ်လီၤ. မ့မ့ၢ်, တၢ်မ့ၢ်တၢ်တီမူဝဲဆူညါအစိၤစိၤအဃၣ်ဃၣ်လီၤ.
20 တၢ်လီတၢ်ဝ့ၤအိၣ်ဝဲလၢပှၤလၢအကူၣ်အၢတၢ်တဖၣ်အသးပူၤလီၤ. မ့မ့ၢ်ပှၤလၢအမၤတၢ်လၢတၢ်ဂ့ၤအဂီၢ်တဖၣ်န့ၣ်ကထံၣ်န့ၢ်တၢ်သးခုလီၤ.
21 တၢ်အၢတဘၣ်ဘၣ်ပှၤတီပှၤလိၤနီတမံၤဘၣ်. မ့မ့ၢ်ပှၤတတီတလိၤတဖၣ်ပှဲၤဝဲဒီးတၢ်ကီတၢ်ခဲန့ၣ်လီၤ.
22 ယွၤအသးဟ့ပှၤလီတၢ်တဖၣ်လီၤ. မ့မ့ၢ်ဘၣ်သူၣ်ဘၣ်သးဝဲလၢပှၤ တဖၣ်လၢအမၤတီအကလုၢ်န့ၣ်လီၤ.
23 ပှၤလၢအသူၣ်ထံအသးဆးတဖၣ်န့ၣ်အိၣ်ဘှီၣ်ဝဲဘၣ်ဃးတၢ်လၢအသ့ၣ်ညါ ဝဲအဂ့ၢ်လီၤ. မ့မ့ၢ်ပှၤလၢအသူၣ်တထံအသးတဆးတဖၣ်န့ၣ်ဒုးဟူထီၣ်သါလီၤ အတၢ်တမၤလိမၤဒိးဘၣ်တၢ်န့ၣ်လီၤ.
24 တၢ်မၤတၢ်ဆူၣ်ဆူၣ်န့ၣ်ကဟ့ၣ်နၤတၢ်စိကမီၤလီၤ. တၢ်အိၣ်ကၢၣ်အိၣ်ကျုန့ၣ်ကဒုးကဲထီၣ်နၤလၢကုၢ်တဂၤလီၤ.
25 တၢ်ကိၢ်တၢ်ဂီၤန့ၣ်ကဂုာ်ကွံာ်တၢ်သးခုလၢနအိၣ်လီၤ. မ့မ့ၢ်တၢ်ကတိၤအမုာ်တဖၣ်န့ၣ်ကမၤသူၣ်ခုသးခုထီၣ်နၤလီၤ.
26 ပှၤတီပှၤလိၤတဂၤန့ၣ်မ့ၢ်ပှၤနဲၣ်ကျဲလၢအတံၤသကိးအဂီၢ်လီၤ. မ့မ့ၢ်ပှၤတတီတလိၤအကျဲန့ၣ်ကဆှၢကမၣ်ကွံာ်အဝဲသ့ၣ်လီၤ.
27 နမ့ၢ်ကၢၣ်ဒီးတၢ်လၢနသးလီန့ၣ်နတန့ၢ်ဘၣ်နီတစုဘၣ်. ဘၣ်ဆၣ်ဒီးနမ့ၢ်မၤတၢ်ဆူၣ်ဆူၣ်န့ၣ်, နကမၤန့ၢ်တၢ်စုလီၢ်ခီၣ်ခိၣ် အါမးလီၤ.
28 တၢ်တီတၢ်လိၤန့ၣ်မ့ၢ်ကျဲဆူတၢ်မူ, ဒီးတၢ်တတီတလိၤန့ၣ်မ့ၢ် ကျဲဆူတၢ်သံလီၤ.