ဆူပှၤဖံလံးပံၤဖိတဖၣ်အအိၣ်
PHILIPPIANS
စီၤပီလူးအလံာ်ပရၢဆူပှၤခရံာ်ဖိဖဲဝ့ၢ်ဖံလံးပံၤအပူၤတဖၣ် အအိၣ်န့ၣ်မ့ၢ်ဝဲလံာ်ပရၢတဘ့ၣ်လၢအဘၣ်တၢ်ကွဲးအီၤဆူ တၢ်အိၣ်ဖှိၣ်အဆိကတၢၢ်တဖုလၢစီၤပီလူးဒုးအိၣ်ထီၣ်ဝဲလၢကီၢ် ယူရပၤအပူၤ, ဖဲကီၢ်မၤက့းဒနံဘၣ်ဃးဒီးပှၤရိမ့ၤဖိအတၢ်ပၢလီၤ. မ့ၢ်ဝဲလံာ်ပရၢတဘ့ၣ်လၢအဘၣ်တၢ်ကွဲးအီၤဖဲအဝဲဒၣ်အိၣ်လၢ ဃိာ်ပူၤ, ဖဲတၢ်ဆၢကတီၢ်လၢအဝဲဒၣ်အသးဘၣ်တံာ်တာ်လၢ ခရံာ်အပှၤမၤတၢ်ဖိအဂၤတဖၣ်အတၢ်ထီဒါအီၤအဃိ, ဒီးဖဲတၢ်ကီတၢ်ခဲဘၣ်အီၤဘၣ်ဃးဒီးတၢ်သိၣ်သီကမၣ်တဖၣ် ဖဲဝ့ၢ်ဖံလံးပံၤအတၢ်အိၣ်ဖှိၣ်အပူၤန့ၣ်လီၤ. မ့ၢ်နာ်သက့ဒ်န့ၣ်ဒီး လံာ်ပရၢတဘ့ၣ်အံၤဒုးသီၣ်ထီၣ်တၢ်ကတိၤလၢအမၤဖျါထီၣ် တၢ်သူၣ်ခုသးခုဒီးတၢ်နာ်လၢပတဲဖျါအဂ့ၢ်သ့ဒၣ်ထဲလၢခီဖျိ စီၤပီလူးအတၢ်စူၢ်တၢ်နာ်အဒိၣ်အယိာ်လၢယ့ၣ်ၡူးခရံာ်အပူၤ အဃိန့ၣ်လီၤ.
တၢ်တိာ်ပာ်မိၢ်ပှၢ်လၢလံာ်ပရၢတဘ့ၣ်အံၤဘၣ်တၢ်ကွဲးအီၤန့ၣ်, မ့ၢ်ဒ်သိးစီၤပီလူးကစံးဘျုးစံးဖှိၣ်ပှၤဖံလံးပံၤခရံာ်ဖိတဖၣ် လၢအဆှၢလီၤတၢ်ဟ့ၣ်ဆူအဝဲဒၣ်အအိၣ်, ဖဲအဝဲလိၣ်ဘၣ်တၢ်အဆၢကတီၢ်အဃိန့ၣ်လီၤ. အဝဲဒၣ်သူတၢ်အခွဲးအယာ်တမံၤအံၤလၢအကဒုးအိၣ်ထီၣ်က့ၤ တၢ်စူၢ်တၢ်နာ်လၢအဝဲသ့ၣ်အပူၤဒ်သိးဒီးအဝဲသ့ၣ်ကအိၣ် ဒီးတၢ်သးဒူဒီးတၢ်စူၢ်တၢ်နာ်အဂီၢ်န့ၣ်လီၤ. အဝဲဒၣ်ဃ့ကညးအဝဲသ့ၣ်ဒ်သိးအကအိၣ်ဒီးယ့ၣ်ၡူး အတၢ်ပာ်သူၣ်ပာ်သးလၢအမ့ၢ်တၢ်ဆီၣ်လီၤသးဒီးအသုတအိၣ် ဒီးတၢ်အဲၣ်လီၤသးခီဖျိအအိၣ်ဒီးတၢ်ပညိၣ်ကွၢ်စိအဒိၣ်အထီ လၢအနီၢ်ကစၢ်ဒၣ်ဝဲအဂီၢ်ဒီးအသုတအိၣ်ဒီးတၢ်ပာ်ကဖၢလၢပာ် ထီၣ်ထီအသးတဂ့ၤအဂီၢ်န့ၣ်လီၤ. အဝဲဒၣ်ဒုးသ့ၣ်နီၣ်ထီၣ်အဝဲသ့ၣ်လၢအတၢ်အိၣ်မူလၢခရံာ် အပူၤမ့ၢ်ဝဲတၢ်ဟ့ၣ်တမံၤလၢအဘၣ်ဃးဒီးကစၢ်ယွၤအဘျုးလၢ အဝဲသ့ၣ်ဒိးန့ၢ်တ့ၢ်ဝဲခီဖျိတၢ်စူၢ်တၢ်နာ်ဒီးတမ့ၢ်တၢ်အိၣ်မူပိာ်ထွဲ တၢ်ဘူၣ်တၢ်ဘါအလုၢ်အလၢ်ဘၣ်ဃးဒီးပှၤယူဒၤဖိအတၢ်သိၣ် တၢ်သီဘၣ်န့ၣ်လီၤ. အဝဲဒၣ်ကွဲးတၢ်ဘၣ်ဃးတၢ်သးခုဒီးတၢ်ဃူတၢ်ဖိးလၢ ကစၢ်ယွၤဟ့ၣ်ပှၤတဖၣ်လၢအအိၣ်မူလၢခရံာ်အပူၤန့ၣ်လီၤ.
လံာ်ပရၢတဘ့ၣ်အံၤအိၣ်ဒီးအတၢ်လီၤဆီလၢအပာ်ဖျါလီၤ ဆီဝဲဒၣ်တၢ်သးခု, တၢ်နာ်, တၢ်ပာ်သးတဖျၢၣ်ဃီ, ဒီးတၢ်သးစူၤလၢခရံာ်ဖိအတၢ်စူၢ်တၢ်နာ်ဒီးတၢ်အိၣ်မူအပူၤ န့ၣ်လီၤ. လံာ်ပရၢအဝဲအံၤလီၣ်ဖျါထီၣ်စ့ၢ်ကီးဝဲစီၤပီလူး အတၢ်အဲၣ်ဘၣ်တၢ်အိၣ်ဖှိၣ်ဖဲဝ့ၢ်ဖံလံးပံၤတဖုအံၤအဒိၣ် အယိာ်အဂ့ၢ်န့ၣ်လီၤ.
1
1 လၢ, စီၤပီလူးဒီးစီၤတံၤမသ့း, ယ့ၣ်ၡူးခရံာ်အခ့အပှၤတဖၣ် ဆူ, ကစၢ်ယွၤအပှၤဂီၢ်မုၢ် ဖဲဝ့ၢ်ဖံလံးပံၤခဲလၢာ်လၢအမ့ၢ် တၢ်တမံၤဃီဒီးယ့ၣ်ၡူးခရံာ်, ဃုာ်ဒီးတၢ်အိၣ်ဖှိၣ်အခိၣ်အနၢ်ဒီး ပှၤလၢအမၤစၢၤတၢ်တဖၣ်အအိၣ်,
2 မ်ပပၢ်ကစၢ်ယွၤဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုး တၢ်ဖှိၣ်ဒီးတၢ်ဃူတၢ်ဖိးတက့ၢ်.
3 တဘျီလၢ်လၢ်ဖဲယဆိကမိၣ်ထီၣ်သုဂ့ၢ်န့ၣ်, ယစံးဘျုးယကစၢ် ယွၤလၢသုဃိလီၤ.
4 ဒီးတဘျီလၢ်လၢ်ဖဲယဃ့ဘါထုကဖၣ်တၢ်လၢသုဂီၢ်န့ၣ်, ယဘါထုကဖၣ်လၢတၢ်သးခုအပူၤ,
5 မ့ၢ်လၢသုတၢ်မၤစၢၤတ့ၢ်ယၤလၢတၢ်သးခုကစီၣ်အတၢ်ဖံး တၢ်မၤအပူၤစးထီၣ်လၢမုၢ်နံၤအခီၣ်ထံးကတၢၢ်တနံၤတုၤခဲအံၤ အဃိန့ၣ်လီၤ.
6 ဒီးလၢတၢ်န့ၣ်အဃိယနာ်ယဲဒၣ်လၢကစၢ်ယွၤ, လၢအစးထီၣ်အတၢ်မၤအဂ့ၤတမံၤအံၤလၢသုပူၤန့ၣ်, ကမၤဒံးဝဲဆူညါတုၤအလၢထီၣ်ပှဲၤထီၣ်ဝဲတစုဖဲယ့ၣ်ၡူးခရံာ် အမုၢ်တနံၤန့ၣ်လီၤ.
7 သုအိၣ်လၢယသးပူၤထီဘိလီၤ. လၢတၢ်န့ၣ်အဃိ, ယပာ်ယသးလၢသုဖီခိၣ်ဒ်အံၤန့ၣ်မ့ၢ်တၢ်လၢအဘၣ်လီၤ. အဂ့ၢ်ဒ်အံၤ, တၢ်ဘျုးတၢ်ဖှိၣ်လၢကစၢ်ယွၤဟ့ၣ်လီၤယၤန့ၣ် သုဒိးန့ၢ်ဃုာ်အီၤဒီးယၤ, ဖဲယအိၣ်လၢဃိာ်ပူၤအဆၢကတီၢ် ခဲအံၤမ့ၢ်ဂ့ၤ, ဒီးဖဲယအိၣ်ဒီးတၢ်သဘျ့လၢယကကတိၤဒီဒၣ်ဒီး မၤဂၢၢ်မၤကျၢၤတၢ်သးခုကစီၣ်အခါမ့ၢ်ဂ့ၤန့ၣ်လီၤ.
8 ကစၢ်ယွၤမ့ၢ်ပှၤအုၣ်အသးလၢယကတိၤတၢ်မ့ၢ်တၢ်တီ, ဖဲယစံးယဲလၢယတၢ်အဲၣ်ဘၣ်သုခဲလၢာ်န့ၣ်ဟဲထီၣ်ဝဲဒၣ်လၢ ယ့ၣ်ၡူးခရံာ်အကစၢ်ဒၣ်ဝဲအသးပူၤန့ၣ်လီၤ.
9 ယဃ့ဘါထုကဖၣ်ဒ်သိးသုတၢ်အဲၣ်တၢ်ကွံကဒိၣ်ထီၣ် အါထီၣ်ဆူညါကွ့ၢ်ကွ့ၢ်, ဃုာ်ဒီးတၢ်သ့ၣ်ညါအမ့ၢ်အတီ ဒီးတၢ်စံၣ်ညီၣ်ပဲာ်ဖးနီၤဖးတၢ်ဘၣ်အပူၤ,
10 ဒ်သိးသုကသ့ဃုထၢတၢ်အဂ့ၤကတၢၢ်န့ၣ်လီၤ. အန့ၣ်တစုသုကပူၤဖျဲးဒီးတၢ်တစီတဆှံခဲလၢာ်, ဒီးတၢ်ပာ်တၢ်ကမၣ်လၢသုလိၤဖဲခရံာ်အမုၢ်တနံၤ န့ၣ်လီၤ.
11 သုတၢ်အိၣ်မူတဖၣ်ကဘၣ်တၢ်မၤပှဲၤအီၤဒီးတၢ်ဂ့ၤ တၢ်ဝါနီၢ်နီၢ်တဖၣ်လၢထဲဒၣ်ယ့ၣ်ၡူးခရံာ်ဒုးအိၣ်ထီၣ် အီၤသ့, လၢယွၤလၤကပီၤဒီးတၢ်စံးထီၣ်ပတြၢၤကစၢ်ယွၤ အဂီၢ်န့ၣ်လီၤ.
12 ယဒီပုၢ်ဝဲၢ်သ့ၣ်ဧၢ, ယအဲၣ်ဒိးသုသ့ၣ်ညါလၢတၢ်လၢအမၤတ့ၢ်အသးဒီးယၤ တဖၣ်, ကဲထီၣ်တၢ်မၤစၢၤနီၢ်နီၢ်လၢတၢ်သးခုကစီၣ် အတၢ်လဲၤထီၣ်လဲၤထီအဂီၢ်လီၤ.
13 လၢတၢ်အံၤအဃိ, သုးဖိလၢအခိးစီၤပၤအနူၢ်အစီၤကိးဂၤဒဲး, ဒီးပှၤဂၤတဖၣ်လၢအအိၣ်ဝဲဖဲအံၤခဲလၢာ်သ့ၣ်ညါဝဲလၢ ယအိၣ်ဘၣ်လၢဃိာ်ပူၤန့ၣ်မ့ၢ်လၢယမ့ၢ်ခရံာ်အခ့အပှၤတဂၤ အဃိလီၤ.
14 ဒီးယတၢ်ဘၣ်အိၣ်လၢဃိာ်ပူၤအံၤဟ့ၣ်အါထီၣ်ယဒီပုၢ်ဝဲၢ် တဖၣ်အတၢ်နာ်လၢကစၢ်အပူၤသတးဒီး, အဝဲသ့ၣ်အသးဒူဒိၣ်ထီၣ်ကိးဆၢကိးကတီၢ်ဒဲးလၢအကစံၣ် တဲၤတဲလီၤယွၤအတၢ်ကစီၣ်လၢတၢ်သးဒူအပူၤန့ၣ်လီၤ.
15 မ့ၢ်ဒၣ်ကယၢာ်, အဝဲသ့ၣ်တနီၤစံၣ်တဲၤတဲလီၤခရံာ်အဂ့ၢ်မ့ၢ်လၢ အဝဲသ့ၣ်အသးက့ၣ်, ဒီးအ့ၣ်လိာ်ဆိးက့လိာ်အသး, ဘၣ်ဆၣ်ဒီးအဂၤတနီၤစံၣ်တဲၤတဲလီၤတၢ်လၢတၢ်ပာ်လီၤ သးတီတီလိၤလိၤအပူၤန့ၣ်လီၤ.
16 အဝဲသ့ၣ်မၤတၢ်အံၤလၢတၢ်အဲၣ်တၢ်ကွံအဃိလီၤ. အဂ့ၢ်ဒ်အံၤ, အဝဲသ့ၣ်သ့ၣ်ညါလၢကစၢ်ယွၤဟ့ၣ်ယၤတၢ်မၤဘၣ်ဃးဒီး တၢ်ဒီဒၣ်တၢ်သးခုကစီၣ်န့ၣ်လီၤ.
17 ပှၤအဂၤတဖၣ်တစံၣ်တဲၤတဲလီၤခရံာ်အဂ့ၢ်လၢတၢ်သးတီ အပူၤဘၣ်, မ့မ့ၢ်တခီ, လၢအသးဆူၣ်မၤန့ၢ်တၢ်လၢအကစၢ်ဒၣ်ဝဲအဘျုးအဂီၢ်န့ၣ်လီၤ. အဝဲသ့ၣ်ဆိကမိၣ်ဝဲလၢအကမၤအါထီၣ်တၢ်ကီတၢ်ခဲလၢ ယဂီၢ်ဖဲယအိၣ်လၢဃိာ်ပူၤအဆၢကတီၢ်န့ၣ်လီၤ.
18 ဒ်လဲၣ်ဂ့ၤဒ်လဲၣ်ဂ့ၤန့ၣ်, တဘၣ်တၢ်နီတမံၤဘၣ်. ယသးခုယဲလၢတၢ်မၤတ့ၢ်အသးတဖၣ်အဃိလီၤ. တၢ်ပာ်သူၣ်ပာ်သးကမၣ်မ့ၢ်ဂ့ၤ, ဘၣ်မ့ၢ်ဂ့ၤ, ခရံာ်အဂ့ၢ်မ့ၢ်ဘၣ်တၢ်စံၣ်တဲၤတဲလီၤအီၤတသ့ဖဲအသ့လၢကျဲ တဘိဂ့ၤတဘိဂ့ၤန့ၣ်ဒီး, ယကသးခုဒံးယဲဆူညါန့ၣ်လီၤ.
19 အဂ့ၢ်ဒ်အံၤယသ့ၣ်ညါယဲဒၣ်လၢခီဖျိသုတၢ်ထုကဖၣ်ဒီးတၢ်မၤ စၢၤလၢအဟဲလၢယ့ၣ်ၡူးခရံာ်အသးန့ၣ်, ယကဘၣ်တၢ်မၤထူၣ် ဖျဲးယၤန့ၣ်လီၤ.
20 ယတၢ်အဲၣ်ဒိးဒီးတၢ်မုၢ်လၢ်အဒိၣ်အယိာ်မ့ၢ်ဒ်သိးယသု တလီၤတိၢ်လၢယမူဒါတဂ့ၤ, မ့မ့ၢ်ကိးဆၢကတီၢ်ဒဲးဒီးလီၤဆီဒၣ် တၢ်ခဲကနံၣ်အံၤ, ယကလၢပှဲၤဒီးတၢ်သးဒူ, ဒ်သိးယမူမ့ၢ်ဂ့ၤ, ယသံမ့ၢ်ဂ့ၤခရံာ်ကဘၣ်တၢ်မၤလၤကပီၤအီၤလၢယနီၢ်ဒီဂၤညါန့ၣ်လီၤ.
21 အဂ့ၢ်ဒ်အံၤတၢ်မူမ့ၢ်တၢ်မနုၤလဲၣ်. လၢယဂီၢ်, မ့ၢ်ခရံာ်န့ၣ်လီၤ. မ့မ့ၢ်ဒ်န့ၣ်ဒီး, တၢ်သံကဟဲစိာ်တၢ်ဘျုးအါဒိၣ်တက့ၢ်လီၤ.
22 ဘၣ်ဆၣ်ဒီး, လၢယအိၣ်မူဒံးယဲဆူညါအဃိ, ယမၤတၢ်လၢအဘျုးအိၣ်တဖၣ်မ့ၢ်သ့ဒိၣ်တက့ၢ်န့ၣ်, ယကြၢးဃုထၢဖဲလဲၣ်တမံၤလဲၣ်န့ၣ်ယတသ့ၣ်ညါလီၤတံၢ်ဘၣ်.
23 ယဘၣ်တၢ်ဆီၣ်သနံးယၤလၢတၢ်ခံမံၤအဘၢၣ်စၢၤလီၤ. ယသးအိၣ်ဒိၣ်မးလၢယကပာ်တီၢ်တၢ်အိၣ်မူအံၤဒီးက့ၤအိၣ်မူဘၣ် ဒီးခရံာ်လီၤ. အန့ၣ်မ့ၢ်တၢ်လၢအဂ့ၤဒိၣ်ဒၣ်တၢ်တက့ၢ်လီၤ.
24 ဘၣ်ဆၣ်ဒီး, ဒ်သိးယမၤစၢၤသုကသ့န့ၣ်အကါဒိၣ်တက့ၢ်လၢ ယအိၣ်မူဒံးယဲန့ၣ်လီၤ.
25 ယသးတဒ့ဒီလၢတၢ်ဂ့ၢ်အံၤဘၣ်. ဒီးလၢတၢ်န့ၣ်အဃိယသ့ၣ်ညါလၢယကအိၣ်မူဒံးလီၤ. ယကအိၣ်မူဒံးဒီးသုခဲလၢာ်ဒ်သိးကမၤအါထီၣ်သုတၢ်လဲၤထီၣ် လဲၤထီဒီးသုတၢ်သးခုလၢတၢ်စူၢ်တၢ်နာ်အပူၤန့ၣ်လီၤ.
26 ဒ်သိးဖဲယလဲၤကဒီးဆူသုအိၣ်န့ၣ်, သုကဒိးန့ၢ်အါထီၣ်တၢ်ဂ့ၢ်လၢသုကပာ်ကဖၢလၢသုသးလၢ ယဃိလၢသုတၢ်အိၣ်မူလၢယ့ၣ်ၡူးခရံာ်အပူၤန့ၣ်လီၤ.
27 အခဲအံၤ, တၢ်လၢအကါဒိၣ်န့ၣ်မ့ၢ်ဝဲသုတၢ်အိၣ်မူအကျဲကြၢးမ့ၢ်ဝဲဒ် ခရံာ်အတၢ်သးခုကစီၣ်လိၣ်ဘၣ်ဝဲအသိး, ဒ်သိးယလဲၤထံၣ်လိာ် သုသ့မ့ၢ်ဂ့ၤ, တသ့မ့ၢ်ဂ့ၤ, ယကနၢ်ဟူဘၣ်ယဲလၢသုဆၢထၢၣ်ဂၢၢ်ကျၢၤအိၣ်ဒီးတၢ်တိာ်ပာ် တမံၤဃီဒီးလၢတၢ်အဲၣ်ဒိးတမံၤဃီအပူၤ, သုဒုးသကိးတၢ်လၢတၢ်စူၢ်တၢ်နာ်ဘၣ်ဃးဒီးတၢ်သးခုကစီၣ် အဂီၢ်န့ၣ်လီၤ.
28 တဘၣ်ပျံၤသုဒုၣ်သုဒါတဖၣ်တဂ့ၤ. အိၣ်ဒီးတၢ်သူၣ်ဒူသးဒူ ထီဘိ, ဒီးတၢ်အံၤကဒုးထံၣ်သ့ၣ်ညါအဝဲသ့ၣ်လၢအဝဲသ့ၣ် ကဃၣ်ကွံာ်, ဒီးသုဝဲသုကမၤနၢၤတၢ်လီၤ. အဂ့ၢ်ဒ်အံၤ, ကစၢ်ယွၤမ့ၢ်ပှၤလၢအဟ့ၣ်သုတၢ်မၤနၢၤန့ၣ်လီၤ.
29 သုဘၣ်တၢ်ဟ့ၣ်သုအခွဲးအယာ်လၢသုကဖံးတၢ်မၤတၢ်လၢ ခရံာ်အဂီၢ်, တမ့ၢ်ထဲလၢသုစူၢ်သုနာ်အီၤအဂီၢ်ဘၣ်, မ့မ့ၢ်လၢသုကတူၢ်တၢ်လၢအဂီၢ်စ့ၢ်ကီးန့ၣ်လီၤ.
30 သုဝဲဒီးယၤ ပအိၣ်ဒီးတၢ်ဒုးတၢ်ယၤတမံၤဃီလီၤ. မ့ၢ်တၢ်ဒုးတၢ်ယၤတမံၤဃီလၢသုထံၣ်ယဒုးတ့ၢ်အီၤလၢ အပူၤကွံာ်, ဒီးဒ်သုနၢ်ဟူတ့ၢ်အသိး, ယဒုးဒံးယဲခဲအံၤန့ၣ်လီၤ.