35
1 ယွၤကတိၤတၢ်ဒီးစီၤမိၤၡ့လၢကီၢ်မိၤအးအတၢ်ပျီပူၤတဖၣ်, လၢအအိၣ်သဃီၤဒီးဝ့ၢ်ယရံၤဃိလၢထံကျိယၢ်ဒ့ၣ်အဘးခီစံးဝဲ,
2 “တဲပှၤအံၣ်စရ့လးဖိတဖၣ်လၢ, တၢ်စုလီၢ်ခီၣ်ခိၣ်လၢအဝဲသ့ၣ် ဒိးန့ၢ်ဘၣ်ဝဲတဖၣ်အကျါန့ၣ်ကဘၣ်ဟ့ၣ်ပှၤလ့ၤဝံဖိတဖၣ်လၢဝ့ၢ် တနီၤဒ်သိးကအိၣ်ကဆိးဝဲလၢအပူၤဒီးတၢ်အီၣ်ဆၣ်အလီၢ်လၢဝ့ၢ် တဖၣ်အခိၣ်အဃၢၤန့ၣ်လီၤ.
3 ဝ့ၢ်တဖၣ်အံၤကဘၣ်ဃးဒီးပှၤလ့ၤဝံဖိတဖၣ်ဒီးအဝဲသ့ၣ်ကအိၣ်ဆိး ဖဲန့ၣ်လီၤ. တၢ်အီၣ်ဆၣ်အလီၢ်န့ၣ်ကမ့ၢ်ဝဲလၢအဝဲသ့ၣ်အဂီၤဘုၣ်ဂီၤဖံးဒီး ကယဲၢ်အဝဲသ့ၣ်ဆၣ်ဖိကီၢ်ဖိအအဂီၢ်န့ၣ်လီၤ.
4 တၢ်အီၣ်ဆၣ်အလီၢ်န့ၣ်ကဘၣ်တၢ်မၤလဲၢ်ထီၣ်အီၤစးထီၣ်လၢဝ့ၢ်ခိၣ် ဒူအချၢဆူညါအပျၢ်တကထိလၢတကျိၤဘၣ်တကျိၤစုာ်စုာ်,
5 ဒ်သိးတၢ်လီၢ်ကအိၣ်ဝဲတတီၤလၢအအိၣ်ဒီးအနီၣ်ထိၣ်လွံၢ်ကပၤဃူ ဃူ, တကပၤအတၢ်ထိၣ်အိၣ်ဝဲအပျၢ်ခံကထိစုာ်စုာ်, ဒီးဝ့ၢ်န့ၣ်ကအိၣ်လၢအခၢၣ်သးန့ၣ်လီၤ.
6 သုကဘၣ်ဟ့ၣ်လီၤပှၤလ့ၤဝံဖိတဖၣ်တၢ်ပူၤဖျဲးအဝ့ၢ်ဃုဝ့ၢ်ဒ် သိးပှၤတဂၤမ့ၢ်မၤသံဘၣ်ဖုးပှၤအဂၤတဂၤဂၤလၢတၢ်တပာ်သူၣ်ပာ် သးအပူၤဒီးလဲၤဃ့ၢ်ပူၤဖျဲးအသးကသ့အဂီၢ်န့ၣ်လီၤ. လၢန့ၣ် အမဲာ်ညါဟ့ၣ်အဝဲသ့ၣ်ဝ့ၢ်အဂၤလွံၢ်ဆံခံဝ့ၢ်,
7 ဃုာ်ဒီးအတၢ်အီၣ်ဆၣ်အလီၢ်တဖၣ်ဒ်သိးဝ့ၢ်ခဲလၢာ်အနီၣ်ဂံၢ် ကထီၣ်ဘးလွံၢ်ဆံဃိးဝ့ၢ်အဂီၢ်တက့ၢ်.
8 ပှၤလ့ၤဝံဖိအဝ့ၢ်တဖၣ်အနီၣ်ဂံၢ်လၢတဒူၣ်စုာ်စုာ်အပူၤန့ၣ်ကဘၣ် တၢ်စံၣ်ညီၣ်နီၤဖးအီၤလၢဟီၣ်ခိၣ်ကဝီၤအအံၣ်အလဲၢ်အဖီခိၣ်န့ၣ် လီၤ.
(သိၣ်သီ.၁၉:၁-၁၃, ၡူ.၂၀:၁-၉)
9-10 ယွၤစံးဘၣ်စီၤမိၤၡ့, လၢကတဲဘၣ်ကီၢ်အံၣ်စရ့လးအပှၤဂီၢ်မုၢ်ဒ်အံၤ, “ဖဲသုခီဂာ်ထံကျိယၢ်ဒ့ၣ်ဒီးလဲၤနုာ်ဆူကီၢ်ကနၤဧၣ်အပူၤန့ၣ်,
11 သုကဘၣ်ဃုထၢတၢ်ပူၤဖျဲးအဝ့ၢ်တဖၣ်, လၢပှၤတဂၤလၢအမၤသံဘၣ် ပှၤအဂၤတဂၤလၢတၢ်တပာ်သူၣ်ပာ်သးအပူၤန့ၣ်လဲၤဃ့ၢ်ပူၤဖျဲးအသး ကသ့အဂီၢ်န့ၣ်လီၤ.
12 ဖဲန့ၣ်အဝဲကပူၤဖျဲးဝဲဒီးပှၤသံတဂၤအဘူးအတံၢ်လၢအဃုတၢ် ဟ့ၣ်ကၣ်ကဒါက့ၤန့ၣ်လီၤ. မ့တမ့ၢ်ဘၣ်လၢကမျၢၢ်အကွီၢ်ဘၣ်တၢ်သမံသမိးအီၤဘၣ်န့ၣ်ပှၤတဂၤ လၢဘၣ်တၢ်စံးအီၤလၢအမၤသံတ့ၢ်ပှၤကညီန့ၣ်တၢ်တဘၣ်မၤသံအီၤ ဘၣ်.
13-14 ဃုထၢဝ့ၢ်ဃုဝ့ၢ်, ဝ့ၢ်သၢဝ့ၢ်လၢထံကျိယၢ်ဒ့ၣ်အမုၢ်ထီၣ်တကပၤဒီးအဂၤသၢဝ့ၢ်လၢ ကီၢ်ကနၤဧၣ်အပူၤတက့ၢ်.
15 ဝ့ၢ်တဖၣ်အံၤကမ့ၢ်တၢ်ပူၤဖျဲးအဝ့ၢ်တဖၣ်လၢပှၤအံၣ်စရ့လးဖိ တဖၣ်အဂီၢ်မ့ၢ်ဂ့ၤ, ပှၤတခီဘီမုၢ်ဖိလၢအအိၣ်တစိၢ်တလီၢ်အဂီၢ်မ့ၢ်ဂ့ၤ, အိၣ်ဆိးဂၢၢ်ကျၢၤအဂီၢ်မ့ၢ်ဂ့ၤ, ဒီးပှၤတဂၤလၢ်လၢ်လၢအမၤသံဘၣ်ပှၤအဂၤတဂၤဂၤလၢတၢ်တပာ်သူၣ်ပာ် သးအပူၤမ့ၢ်ဂ့ၤဃ့ၢ်ပူၤဖျဲးအသးဆူဝ့ၢ်တဖျၢၣ်ဖျၢၣ်အံၤကသ့ဝဲဒၣ်လီၤ.
16-18 ဒ်လဲၣ်ဒ်လဲၣ်ဂ့ၤန့ၣ်, ပှၤတဂၤမ့ၢ်သူတၢ်စုကဝဲၤထးမ့ၢ်ဂ့ၤ, လၢၢ်မ့ၢ်ဂ့ၤ, သ့ၣ်မ့ၢ်ဂ့ၤဒ်သိးကမၤသံဘၣ်ပှၤတဂၤဂၤဒီး, အဝဲအတၢ်ကမၣ်အိၣ်လၢအမၤသံတၢ်အဃိ, ဒီးကဘၣ်တၢ်မၤသံကွံာ်အီၤ န့ၣ်လီၤ.
19 ပှၤသံတဂၤအဘူးအတံၢ်အဘူးကတၢၢ်အမူအဒါအိၣ်လၢကမၤသံကွံာ်ပှၤ လၢအမၤသံတၢ်တဂၤန့ၣ်လီၤ. ဖဲအဝဲထံၣ်ပှၤတဂၤန့ၣ်ဒီးအဝဲကဘၣ်မၤသံကွံာ်အီၤန့ၣ်လီၤ.
20 ပှၤတဂၤမ့ၢ်သးဟ့ပှၤအဂၤတဂၤဂၤဒီးမၤသံကွံာ်အီၤခီဖျိတၢ် ဆီၣ်လီၤတဲာ်အီၤမ့ၢ်ဂ့ၤ, ကွံာ်အီၤလၢတၢ်တမံၤမံၤမ့ၢ်ဂ့ၤ,
21 ပသီတံၢ်အီၤလၢအစုခိၣ်မ့ၢ်ဂ့ၤန့ၣ်ဒီးအဝဲအတၢ်ကမၣ်အိၣ်လၢတၢ် မၤသံတၢ်ဒီးကဘၣ်တၢ်မၤသံကွံာ်အီၤန့ၣ်လီၤ. ပှၤသံတဂၤအဘူးအတံၢ်အဘူးကတၢၢ်အိၣ်ဒီးအမူအဒါလၢကမၤသံကွံာ် ပှၤမၤသံတၢ်န့ၣ်လီၤ. ဖဲအဝဲထံၣ်ပှၤတဂၤန့ၣ်ဒီးအဝဲကဘၣ်မၤသံအီၤန့ၣ်လီၤ.
22 ဘၣ်ဆၣ်ပစံးဒၣ်ကလိာ်, ပှၤတဂၤကမၤသံဘၣ်ပှၤတဂၤဂၤလၢအတသးဟ့ ဘၣ်ဝဲန့ၣ်လၢတၢ်တပာ်သူၣ်ပာ်သးအပူၤ, ခီဖျိလၢတၢ်ဆီၣ်လီၤတဲာ်အီၤမ့ၢ်ဂ့ၤ, ကွံာ်အီၤလၢတၢ်တမံၤမံၤမ့ၢ်ဂ့ၤန့ၣ်လီၤ.
23 မ့တမ့ၢ်ဘၣ်ဒီးပစံးဒၣ်ကလိာ်အဒိ, ပှၤတဂၤတကွၢ်ဝဲဘၣ်ဒီးကွံာ် လၢၢ်တဖျၢၣ်လၢအမၤသံဘၣ်ပှၤတဂၤဂၤလၢအတတိာ်သူၣ်ပာ်သးလၢကမၤ ဆါဝဲမ့ၢ်ဂ့ၤ, တမ့ၢ်ဘၣ်အဒုၣ်အဒါဘၣ်မ့ၢ်ဂ့ၤန့ၣ်လီၤ.
24 လၢကွီၢ်ဒ်သိးအံၤတဖၣ်အပူၤ, ကမျၢၢ်ဒူၣ်ထၢကဘၣ်စံၣ်ညီၣ်ကွၢ် မဲာ်ပှၤလၢအမၤသံဘၣ်တၢ်တဂၤဒီးတဘၣ်ကွၢ်မဲာ်ပှၤသံတဂၤအဘူး အတံၢ်လၢအဃုတၢ်ဟ့ၣ်ကၣ်န့ၣ်ဘၣ်.
25 ကမျၢၢ်ဒူၣ်ထၢကဘၣ်အုၣ်က့ၤခီၣ်က့ၤပှၤတဂၤလၢအမၤကမၣ်တၢ်လၢ အမၤသံဘၣ်ပှၤအဃိန့ၣ်, လၢပှၤသံတဂၤအဘူးအတံၢ်အစုပူၤ, ဒီးအဝဲသ့ၣ်ကဘၣ်ဆှၢကဒါက့ၤအီၤဆူဝ့ၢ်တၢ်ပူၤဖျဲးလၢ အဝဲအိၣ်ပူၤဖျဲးအလီၢ်န့ၣ်လီၤ. အဝဲကဘၣ်အိၣ်ဖဲန့ၣ်တုၤလၢ, ပှၤတဂၤလၢဖဲန့ၣ်အခါမ့ၢ်ပှၤလုၢ်တၢ်အခိၣ်အဒိၣ်, သံဝဲတစုန့ၣ်လီၤ.
26 ပှၤတဂၤလၢအတၢ်ကမၣ်အိၣ်ဝဲလၢအမၤသံဘၣ်ပှၤအဃိန့ၣ်မ့ၢ်ဟးထီၣ် ဝဲလၢဝ့ၢ်တၢ်ပူၤဖျဲး, ဖဲအဝဲဒၣ်အိၣ်ပူၤဖျဲးဝဲန့ၣ်,
27 ပှၤသံတဂၤအဘူးအတံၢ်မ့ၢ်ထံၣ်န့ၢ်အီၤဒီးမၤသံအီၤန့ၣ်, တၢ်ဟ့ၣ်ကၣ်အံၤတမ့ၢ်တၢ်မၤသံတၢ်ဘၣ်.
28 ပှၤလၢအတၢ်ကမၣ်အိၣ်ဝဲလၢအမၤသံဘၣ်ပှၤတဂၤန့ၣ်ကဘၣ်အိၣ်ဝဲလၢ ဝ့ၢ်တၢ်ပူၤဖျဲးအပူၤတုၤလၢပှၤလုၢ်တၢ်အခိၣ်အဒိၣ်သံတစုလီၤ. အန့ၣ်ဝံၤဒီးက့ၤကဒါက့ၤဝဲဆူအဟံၣ်သ့ဝဲဒၣ်န့ၣ်လီၤ.
29 တၢ်သိၣ်တၢ်သီတဖၣ်အံၤမ့ၢ်လၢသုဝဲဒီးသုစၢၤသုသွဲၣ်တဖၣ် အဂီၢ်ဖဲသုအိၣ်ဆိးတပူၤပူၤန့ၣ်လီၤ.
30 ပှၤတဂၤလၢပှၤပာ်ဒ့ၣ်ပာ်ကမၣ်အီၤလၢအမၤသံတၢ်န့ၣ်, တၢ်ကထံၣ်ဘၣ်လၢအဝဲအတၢ်ကမၣ်အိၣ်ဝဲဒီးကဘၣ်တၢ်မၤသံဒၣ်အီၤဖဲ ဒၣ်ပှၤအုၣ်အသးအိၣ်ဝဲခံဂၤမ့တမ့ၢ်အါန့ၢ်ခံဂၤအဃိန့ၣ်လီၤ. ပှၤအုၣ်အသးအိၣ်ဝဲထဲတဂၤဧိၤန့ၣ်တလၢတပှဲၤလၢကဆီၣ်ထွဲတၢ် ကတိၤပာ်ဒ့ၣ်ပာ်ကမၣ်ဘၣ်ဃးတၢ်မၤသံအဂ့ၢ်န့ၣ်ဘၣ်.
31 ပှၤမၤသံတၢ်တဂၤန့ၣ်ကဘၣ်တၢ်မၤသံအီၤလီၤ. အဝဲပူၤဖျဲးဒီးတၢ်စံၣ်ညီၣ်အံၤခီဖျိတၢ်ဟ့ၣ်တၢ်အပှ့ၤလၢ ကျိၣ်ဧိၤစ့ဧိၤတသ့ဝဲဘၣ်.
32 ပှၤတဂၤန့ၣ်မ့ၢ်ဃ့ၢ်ပူၤဖျဲးအသးဆူဝ့ၢ်တၢ်ပူၤဖျဲးအဝ့ၢ်တဝ့ၢ် ဒီး, တချုးဒံးဘၣ်လၢပှၤလုၢ်တၢ်အခိၣ်အဒိၣ်သံဒံးဘၣ်န့ၣ်ပျဲ အီၤလၢအကဟ့ၣ်ကျိၣ်ဧိၤစ့ဧိၤလၢကက့ၤဆူအဟံၣ်အဂီၢ်တဂ့ၤ.
33 သုမ့ၢ်ပျဲတၢ်အံၤဒီး, သုကမၤဘၣ်အၢကီၢ်လၢသုအိၣ်ဝဲန့ၣ် လီၤ. တၢ်မၤသံတၢ်န့ၣ်မၤဘၣ်အၢကီၢ်ဒီးမ့တမ့ၢ်ဘၣ်လၢပှၤမၤသံတၢ်, သံဝဲဘၣ်ဒီးကျဲတအိၣ်နီတဘိလၢကီၢ်တဘ့ၣ်န့ၣ်အဂီၢ်, ဖဲပှၤတဂၤဘၣ်တၢ်မၤသံအီၤလၢတၢ်ကမၤကဆှီထီၣ်က့ၤအီၤဒ်တၢ် ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်ဘၣ်.
34 မၤဘၣ်အၢကီၢ်လၢသုအိၣ်လၢအပူၤန့ၣ်တဂ့ၤ. အဂ့ၢ်ဒ်အံၤ, ယမ့ၢ်ယွၤဒီးယအိၣ်ဆိးလၢကီၢ်အံၣ်စရ့လးအပှၤဂီၢ်မုၢ်အကျါန့ၣ်လီၤ.”