27
1 နီၢ်မၤလၤ, နီၢ်နိဧၤ, နီၢ်ဃၤကလၤ, နီၢ်မံးလကၤဒီးနီၢ်တံး ရစၢ်မ့ၢ်ဝဲစီၤစလၤဖဃးအဖိမုၣ်တဖၣ်လီၤ. စီၤစလၤဖဃးမ့ၢ်ဝဲစီၤဃ့ဖ့ၢ်အဖိခွါ, စီၤဃ့ဖ့ၢ်မ့ၢ်စီၤ ကံးလဧးအဖိခွါ, စီၤကံးလဧးမ့ၢ်စီၤမၤကံၢ်အဖိခွါစီၤမၤကံၢ်မ့ၢ်စီၤမနၤ ၡ့ၤအဖိခွါ, စီၤမနၤၡ့ၤမ့ၢ်စီၤယိၤသးအဖိခွါန့ၣ်လီၤ.
2 အဝဲသ့ၣ်လဲၤဒီးဆၢထၢၣ်ဝဲလၢစီၤမိၤၡ့ဒီးပှၤလုၢ်တၢ်အခိၣ် စီၤအလၤဧစၢ်, ပှၤခိၣ်ပှၤနၢ်တဖၣ်, ဒီးကမျၢၢ်ဒီကရူၢ် အမဲာ်ညါဖဲယွၤအိၣ်ဝဲဆိးဝဲအဒဲစီဆှံအကျဲစၢၤန့ၣ်ဒီးစံးဝဲ,
3 “ပပၢ်သံတ့ၢ်ဝဲလၢပှၢ်မုၢ်ကနၢအပူၤဒီးတပာ်တ့ၢ်အဖိခွါနီ တဂၤဘၣ်. အဝဲတမ့ၢ်ပှၤအိၣ်လၢပှၤပိာ်စီၤကိၤရးအခံတဖၣ်, လၢအပူထီၣ်ထီဒါယွၤအကျါန့ၣ်ဘၣ်. အဝဲသံဝဲဒၣ်လၢအတၢ်ဒဲးဘးဒၣ်ဝဲအဃိလီၤ.
4 လၢအဝဲတအိၣ်ဘၣ်ဒီးအဖိခွါနီတဂၤအဃိဧိၤန့ၣ်ဘၣ်မနုၤလၢပပၢ် အမံၤကဘၣ်ဟါမၢ်ကွံာ်လၢကီၢ်အံၣ်စရ့လးန့ၣ်လဲၣ်. ဟ့ၣ်ပှၤလၢတၢ်စုလီၢ်ခီၣ်ခိၣ်လၢပပၢ်အဘူးအတံၢ်တဖၣ်အကျါ တက့ၢ်.”
5 စီၤမိၤၡ့ဆှၢထီၣ်အဝဲသ့ၣ်အကွီၢ်ဆူယွၤအအိၣ်,
6-7 ဒီးယွၤစံးဘၣ်အီၤ, “တၢ်လၢစီၤစလၤဖဃးအဖိမုၣ်တဖၣ်ဃ့ဝဲန့ၢ်မ့ၢ်တၢ်အဘၣ်လီၤ. ဟ့ၣ်လီၤအဝဲသ့ၣ်လၢတၢ်စုလီၢ်ခီၣ်ခိၣ်လၢအပၢ်အဘူးအတံၢ်တဖၣ် အကျါတက့ၢ်. မ်အဝဲသ့ၣ်အပၢ်အတၢ်န့ၢ်သါဘၣ်တၢ်ဟ့ၣ်လီၤဆူအဝဲသ့ၣ်အအိၣ်တ က့ၢ်.
8 တဲဘၣ်ကီၢ်အံၣ်စရ့လးအပှၤဂီၢ်မုၢ်လၢ, တဘျီလၢ်လၢ်ဖဲ ပှၤတဂၤသံဝဲဒီးတပာ်လီၤတဲာ်ဘၣ်အဖိခွါနီတဂၤဘၣ်န့ၣ်, အဖိမုၣ်ကဘၣ်န့ၢ်သါအတၢ်စုလီၢ်ခီၣ်ခိၣ်န့ၣ်လီၤ.
9 အဝဲအဖိမုၣ်မ့ၢ်တအိၣ်ဘၣ်နီတဂၤဘၣ်ဒီးအဒီပုၢ်ဝဲၢ်ခွါတဖၣ် ကဘၣ်န့ၢ်သါအီၤလီၤ.
10 အဝဲအဒီပုၢ်ဝဲၢ်ခွါမ့ၢ်တအိၣ်နီတဂၤဘၣ်ဒီး, အဝဲအပၢ်အဒီပုၢ်ဝဲၢ်ခွါတဖၣ်ကဘၣ်န့ၢ်သါအီၤန့ၣ်လီၤ.
11 အဝဲအဒီပုၢ်ဝဲၢ်ခွါမ့ၢ်ဂ့ၤ, အဖါတံၢ်မ့ၢ်ဂ့ၤမ့ၢ်တအိၣ်နီတဂၤ ဘၣ်ဒီး, အဝဲအဘူးအတံၢ်အဘူးကတၢၢ်ဒီးအီၤကဘၣ်န့ၢ်သါအီၤဒီး, ဟံးဃာ်အီၤဒ်အတၢ်စုလီၢ်ခီၣ်ခိၣ်ဒၣ်ဝဲအသိးန့ၣ်လီၤ. ကီၢ်အံၣ်စရ့လးအပှၤဂီၢ်မုၢ်ကဘၣ်တိၢ်န့ၢ်တၢ်အံၤဒ်တၢ်သိၣ်တၢ်သီ လၢတၢ်လိၣ်ဘၣ်အီၤအသိးဒ်ယၤ, ယွၤမၤလိာ်တ့ၢ်နၤန့ၣ်လီၤ.”
(ဘူၣ်ဘါ.၃၁:၁-၈ )
12 ဒီးယွၤစံးဘၣ်စီၤမိၤၡ့, “လဲၤထီၣ်ဆူကစၢၢ်ဧဘါရံၣ်ဒီး ကွၢ်ဃီၤဆူကီၢ်တဘ့ၣ်လၢယကဟ့ၣ်လီၤပှၤအံၣ်စရ့လးဖိတဖၣ်န့ၣ်တ က့ၢ်.
13 တုၤနထံၣ်ဘၣ်အီၤဝံၤလံဒီး, နကသံနဲ, ဒ်နဒီပုၢ်ဝဲၢ်စီၤအၤ ဟရိၣ်အသိး,
14 မ့ၢ်လၢသုဝဲခံဂၤလိာ်သုပူထီၣ်ထီဒါယတၢ်မၤလိာ်လၢပှၢ်မုၢ် ကနၢစံၣ်အပူၤအဃိန့ၣ်လီၤ. ဖဲပှၤဂီၢ်မုၢ်ဒီကရူၢ်ကဒူးကဒ့ၣ်ထီဒါယၤလၢမရံၤဘါန့ၣ်, သုဂ့ၢ်လိာ်သ့ၣ်ညါပာ်ကဲယစိကမီၤစီဆှံလၢအဝဲသ့ၣ်အမဲာ်ညါ လီၤ.” (မရံၤဘါမ့ၢ်ထံထီၣ်ပၢၢ်လၢဝ့ၢ်ကၤဒ့ၣ်, လၢပှၢ်မုၢ်ကနၢစံၣ်အပူၤန့ၣ်လီၤ.)
15-16 စီၤမိၤၡ့ဘါထုကဖၣ်တၢ်စံးဝဲ, “ယွၤ, ကစၢ်ယွၤ, တၢ်မူခဲလၢာ်အဂံၢ်ထံးဧၢ, ယဃ့ဘါထုကဖၣ်နၤ, ပာ်ထီၣ်ပှၤတဂၤလၢအဆှၢပှၤဂီၢ်မုၢ်သ့,
17 ဒီးကဘၣ်မ့ၢ်ဝဲပှၤလၢအပၢဆှၢအဝဲသ့ၣ်လၢတၢ်ဒုးတၢ်ယၤ အပူၤဒ်သိးနပှၤဂီၢ်မုၢ်အသုတကဲထီၣ်ဒ်သိတဖၣ်လၢအပှၤကွၢ်သိ တအိၣ်ဘၣ်ဝဲအသိးန့ၣ်တဂ့ၤ.”
18 ယွၤစံးဘၣ်စီၤမိၤၡ့, “ကိးန့ၢ်စီၤနိၣ်အဖိခွါပှၤတဂၤလၢ အကူၣ်သ့ကူၣ်ဘၣ်မၤတၢ်သ့, စီၤယိၤၡူ, ဒီးပာ်နစုတဖၣ်လၢအခိၣ်လိၤတက့ၢ်.
19 ဒုးဆၢထၢၣ်အီၤလၢပှၤလုၢ်တၢ်အခိၣ်စီၤအလၤဧစၢ်ဒီးကမျၢၢ်ဒီဖု ညါအမဲာ်ညါ, ဒီးဖဲန့ၣ်လၢအဝဲသ့ၣ်ခဲလၢာ်အမဲာ်ညါ န့ၣ်ဘိးဘၣ်သ့ၣ်ညါထီၣ်အီၤဒ်ပှၤလၢကထီၣ်က့ၤနလီၢ်န့ၣ်တက့ၢ်.
20 ဟ့ၣ်အီၤလၢနတၢ်စိတၢ်ကမီၤဒၣ်နဲတနီၤ, ဒ်သိးကီၢ်အံၣ်စရ့လး အကမျၢၢ်ဒီဖုကစူၢ်အကလုၢ်န့ၣ်တက့ၢ်.
21 အဝဲကဘၣ်သန့ၤအသးလၢပှၤလုၢ်တၢ်အခိၣ်စီၤအလၤဧစၢ်, ပှၤတဂၤလၢအကမၤလိတၢ်ဘၣ်ယသးခီဖျိအူရံၣ်ဒီးထူမံၣ်န့ၣ်လီၤ. လၢကျဲဒ်အံၤန့ၣ်စီၤအလၤဧစၢ်ကနဲၣ်န့ၢ်စီၤယိၤၡူဒီးကီၢ်အံၣ်စရ့လး အကမျၢၢ်ဒီဖုန့ၣ်အကျဲလၢကယဲၢ်အတၢ်ဂ့ၢ်တၢ် ကျိၤခဲလၢာ်အပူၤန့ၣ်လီၤ.”
22 စီၤမိၤၡ့မၤတ့ၢ်ဝဲဒ်ယွၤမၤလိာ်အီၤအသိးန့ၣ်လီၤ. အဝဲဒုးဆၢထၢၣ်စီၤယိၤၡူလၢပှၤလုၢ်တၢ်အခိၣ်စီၤအလၤဧစၢ်ဒီး ကမျၢၢ်ဒီဒူၣ်ဒီထၢအမဲာ်ညါန့ၣ်လီၤ.
23 ဒ်ယွၤမၤလိာ်တ့ၢ်ဝဲအသိး, စီၤမိၤၡ့ပာ်ထီၣ်အစုတဖၣ်လၢစီၤ ယိၤၡူအခိၣ်ဖီခိၣ်ဒီးဘိးဘၣ်သ့ၣ်ညါထီၣ်အီၤဒ်ပှၤတဂၤလၢ ကထီၣ်က့ၤလၢအလီၢ်န့ၣ်လီၤ.