24
1 စးထီၣ်ခဲအံၤ, စီၤဘံးလၣ်သ့ၣ်ညါဝဲလၢယွၤအဲၣ်ဒိးအီၤလၢ အကဆိၣ်ဂ့ၤကီၢ်အံၣ်စရ့လးအပှၤဂီၢ်မုၢ်လီၤ. အဃိအဝဲဒၣ်တလဲၤဃုထံၣ်ပှၤအူတၢ်သမူတၢ်တဖၣ်ဒ် အညီနုၢ်မၤန့ၢ်ဝဲလၢညါအသိးလၢၤဘၣ်.
2 အဝဲကွၢ်ဃီၤတၢ်လိၤလိၤဆူမဲးမုၢ်ခိၣ်ဒီးထံၣ်ဘၣ်ကီၢ်အံၣ်စရ့လး အပှၤဂီၢ်မုၢ်သူၣ်ဒဲတဒူၣ်ဘၣ်တဒူၣ်န့ၣ်လီၤ. ကစၢ်ယွၤအသးလီၤ ဘၣ်လၢအလိၤ,
3 ဒီးအဝဲဒၣ်အဲးထီၣ်အထးခိၣ်လၢဝံအကျိာ်ဒ်အံၤလီၤ.
“စီၤဘဧိၢ်အဖိခွါစီၤဘံးလၣ်အတၢ်ကစီၣ်, ပှၤတဂၤလၢအထံၣ်တၢ်ဆှံဆှံအတၢ်ကတိၤတဖၣ်,
4 မတၤနၢ်ဟူတၢ်လၢကစၢ်ယွၤစံးဝဲသ့န့ၣ်လဲၣ်. လၢမဲာ်ချံစီၣ်ဝဲၤ ကဲၤတဖၣ်န့ၣ်ယထံၣ်တၢ်လၢသးတမံၤ, တၢ်ထံၣ်လၢညါခီတမံၤလၢအဟဲလၢသ့တၢ်လၢာ်ကစၢ်ယွၤတဂၤ အအိၣ်န့ၣ်လီၤ.
5 ပှၤအံၣ်စရ့လးဖိအဒဲတဖၣ်ဃံလၤဝဲ,
6 လီၤဂာ်မးဒ်သ့ၣ်စူၣ်ပလိၣ်အကျိၤဖးထီတဖၣ်မ့ၢ်ဂ့ၤ, တၤသၣ်လီၢ်တဖၣ်လၢထံကျိတဘိအဃၢၤမ့ၢ်ဂ့ၤ, လီၤဂာ်မးဒ်သ့ၣ်အကၠီၣ်လၢယွၤသူၣ်လီၤတ့ၢ်ဝဲအသိးမ့ၢ်ဂ့ၤ, ဒ်သ့ၣ်ဆှိးအ့ရ့းတဖၣ်လၢထံနံၤအသိးမ့ၢ်ဂ့ၤန့ၣ်လီၤ.
7 အဝဲသ့ၣ်ကဒိးန့ၢ်မူခိၣ်စူၤလၢလၢပှဲၤပှဲၤဒီးသူၣ်လီၤ အတၢ်ချံလၢဟီၣ်ခိၣ်စုၣ်စီၣ်ဝဲဂ့ၤဂ့ၤအပျီတဖၣ် အပူၤန့ၣ်လီၤ.
အဝဲသ့ၣ်အစီၤပၤကဒိၣ်န့ၢ်ဒံးစီၤအၤကးဒီးအတၢ်ပၢကသလၣ်လီၤ အသးဖးယံၤဖးလဲၢ်န့ၣ်လီၤ.
8 ကစၢ်ယွၤထုးထီၣ်တ့ၢ်အဝဲသ့ၣ်လၢကီၢ်အဲၤကူပတူးဒီးအဝဲဒုး တၢ်လၢအဂီၢ်ဒ်ကျီၢ်ဖါတံၢ်အမံၤတဒုအသိးန့ၣ်လီၤ. အဝဲသ့ၣ်အ့ၣ်ဖှီကွံာ်အဒုၣ်အဒါတဖၣ်, မၤကၢ်ကွံာ်အဃံအကွဲ တဖၣ်, ဒီးတီၢ်သဘှံးအပျၢ်တဖၣ်န့ၣ်လီၤ.
9 ပှၤတကလုာ်န့ၣ်လီၤဂာ်ဒ်ခ့ယုၢ်လၢအဂံၢ်ဆူၣ်ဘါဆူၣ်တဒုအသိး လီၤ. ဖဲအမံဝဲအခါန့ၣ်, ပှၤမၤပၢၢ်ထီၣ်အီၤတဘူၣ်ဘၣ်နီတဂၤဘၣ်.
ပှၤတဂၤလၢ်လၢ်လၢအဆိၣ်ဂ့ၤကီၢ်အံၣ်စရ့လးန့ၣ်ကဘၣ်တၢ်ဆိၣ်ဂ့ၤ, ဒီးပှၤတဂၤလၢ်လၢ်လၢအဆိၣ်အၢကီၢ်အံၣ်စရ့လးန့ၣ်ကဘၣ်တၢ်ဆိၣ် အၢန့ၣ်လီၤ.”
10 စီၤဘၤလးစှီၤအစုခိၣ်တဖၣ်လၢတၢ်သးဒိၣ်အပူၤဒီးစံးဘၣ်စီၤ ဘံးလၣ်, “ယကိးတ့ၢ်နၤလၢနကဆိၣ်အၢယဒုၣ်ယဒါတဖၣ်အဂီၢ်လီၤ. မ့မ့ၢ်ခဲအံၤတခီနဆိၣ်ဂ့ၤအီၤဒၣ်လဲာ်သၢစုန့ၣ်လီၤ.
11 ခဲအံၤ, က့ၤဆူဟံၣ်တက့ၢ်. ယအၢၣ်လီၤအီၤလီၤတ့ၢ်နၤလၢယကဟ့ၣ် နၤတၢ်ဘျုးတၢ်ဖှိၣ်, ဘၣ်ဆၣ်ဒီး, ယွၤတြီကွံာ်နၤလၢနကဒိးန့ၢ်တၢ်ဆိၣ်ဂ့ၤအဂီၢ်န့ၣ်လီၤ.”
12 စီၤဘံးလၣ်စံးဆၢဝဲ, “ယတဲဘၣ်တ့ၢ်ပှၤစိာ်တၢ်ကစီၣ်တဖၣ်လၢ နဆှၢလီၤတ့ၢ်အီၤန့ၣ်လၢ,
13 နမ့ၢ်ဟ့ၣ်ယၤကယဲၢ်စ့ဒီးထူအိၣ်လၢနနူၢ်ပူၤစီၤပူၤခဲလၢာ်ဒၣ် လဲာ်န့ၣ်, ယဂ့ၢ်လိာ်စူၢ်ယွၤအတၢ်မၤလိာ်ခီဖျိမၤတၢ်တမံၤလၢ်လၢ်ဖဲ ယသးတသ့ဘၣ်လီၤ. ယကစံးဒၣ်တၢ်လၢယွၤတဲဝဲလၢ ယကဘၣ်စံးဧိၤန့ၣ်လီၤ.”
14 စီၤဘံးလၣ်စံးဘၣ်စီၤဘၤလး, “ခဲအံၤ, ယကက့ၤကဒါက့ၤဆူယပှၤဂီၢ်မုၢ်ဒၣ်ယဲအအိၣ်, ဘၣ်ဆၣ်ဒီးတချုးလၢယက့ၤဒံးဘၣ်န့ၣ်, ယဟ့ၣ်ပလီၢ်နၤတၢ်လၢခဲ ကိာ်ကီၢ်အံၣ်စရ့လးအပှၤဂီၢ်မုၢ်ကမၤဘၣ်နပှၤဂီၢ်မုၢ်ဒ်လဲၣ်အဂ့ၢ် န့ၣ်လီၤ.
15 အန့ၣ်ဝံၤဒီးအဝဲအဲးထီၣ်အထးခိၣ်လၢဝံအကျိာ်ဒ်အံၤလီၤ.
“စီၤဘဧိၢ်အဖိခွါစီၤဘံးလၣ်အတၢ်ကစီၣ်, ပှၤတဂၤလၢအထံၣ်တၢ်ဆှံဆှံအတၢ်ကတိၤတဖၣ်,
16 မတၤနၢ်ဟူတၢ်လၢကစၢ်ယွၤစံးဝဲဒီးဒိးန့ၢ်တၢ်သ့ၣ်ညါလၢအဟဲ လၢတၢ်ထီကတၢၢ်တဂၤအအိၣ်သ့န့ၣ်လဲၣ်
လၢမဲာ်ချံစီၣ်ဝဲၤကဲၤတဖၣ်အပူၤ, ယထံၣ်တၢ်လၢသးတမံၤ, တၢ်ထံၣ်လၢညါခီလၢအဟဲလၢသ့တၢ်လၢာ်ကစၢ်ယွၤအအိၣ်န့ၣ်လီၤ.
17 ယကွၢ်တၢ်ဆူခါဆူညါအပူၤ, ဒီးယထံၣ်အံၣ်စရ့လးအပှၤကလုာ်, စီၤပၤတဂၤ, လီၤဂာ်ဒီးဆၣ်လၢအကပီၤတဖျၢၣ်ကဟဲထီၣ်လၢပှၤကလုာ် န့ၣ်အပူၤလီၤ.
ဒ်ဆၣ်မဲၢ်ထီၣ်တဖျၢၣ်အသိးန့ၣ်အဝဲကဟဲထီၣ်လၢကီၢ်အံၣ်စရ့လး အပူၤလီၤ. အဝဲကတီၢ်ကီၢ်မိၤအးအခိၣ်အနၢ်တဖၣ်, ဒီးဒိလီၤပှီၢ်ကယဲၢ်စ့ဧၢ်အပှၤဂီၢ်မုၢ်န့ၣ်လီၤ.
18 အဝဲကမၤနၢၤကွံာ်အဒုၣ်အဒါတဖၣ်လၢကီၢ်အဒိၣ်အပူၤ, ဒီးဒုးကဲထီၣ်အဝဲသ့ၣ်အကီၢ်လၢအတၢ်ဖဲကီၢ်အံၣ်စရ့လးမၤနၢၤ ထွဲဒံးတၢ်ဆူညါအခါန့ၣ်လီၤ.
19 ကီၢ်အံၣ်စရ့လးအပှၤကလုာ်ကယီၢ်တံၢ်လီၤကွံာ် အဝဲသ့ၣ်,
ဒီးမၤပျီကွံာ်ပှၤအိၣ်မူတ့ၢ်ဒံးလၢခံတဖၣ်န့ၣ်လီၤ.”
20 အန့ၣ်ဝံၤဒီး, လၢအတၢ်ထံၣ်လၢညါခီအပူၤန့ၣ်စီၤဘံးလၣ်ထံၣ်ဘၣ် ပှၤဧမၤလ့းဖိတဖၣ်ဒီးအဲးထီၣ်အထးခိၣ်လၢဝံအကျိာ်ဒ်အံၤလီၤ.
“ကီၢ်ဧမၤလ့းမ့ၢ်ပှၤတကလုာ်လၢအဂံၢ်အဘါဆူၣ်ကတၢၢ်လၢပှၤ ကလုာ်ခဲလၢာ်အကျါ,
ဘၣ်ဆၣ်ဒီးလၢခံကတၢၢ်န့ၣ်ကဟးဂီၤ လီၤထူလီၤယိာ်လီၤ.”
21 လၢအတၢ်ထံၣ်လၢညါခီအပူၤန့ၣ်အဝဲထံၣ်ဘၣ်ပှၤက့ၣ်ဖိတဖၣ်ဒီး အဲးထီၣ်အထးခိၣ်လၢဝံအကျိာ်ဒ်အံၤလီၤ.
“တၢ်လီၢ်ဖဲသုအိၣ်ဆိးန့ၣ်အိၣ်လၢတၢ်ပူၤဖျဲးအပူၤ, အိၣ်ဘံၣ်အိၣ်ဘၢဒ်ထိၣ်အသွံတခါလၢအအိၣ်လၢလ့ဖးထီအဒီခိၣ်,
22 ဘၣ်ဆၣ်ဒီးသုဝဲပှၤက့ၣ်ဖိတဖၣ်ကဘၣ်တၢ်မၤဟးဂီၤကွံာ်အီၤဖဲ ကီၢ်အၤၡူၢ်က့ၤစိာ်မၢကဲကုၢ်သုန့ၣ်လီၤ.”
23 စီၤဘံးလၣ်အဲးထီၣ်အထးခိၣ်လၢဝံအကျိာ်ဒ်အံၤ, “ပှၤဂီၢ်မုၢ်လၢအပာ်ဖှိၣ်ထီၣ်အသးလၢကလံၤစိးန့ၣ်မ့ၢ်မတၤ တဖၣ်လဲၣ်.
24 ပှၤဟဲနုာ်လီၤဒုးတၢ်တဖၣ်ကဟဲဒီးကဘီလၢကီးကူပြူးလီၤ. အဝဲသ့ၣ်ကမၤနၢၤကွံာ်ကီၢ်အၤၡူၢ်ဒီးကီၢ်ဧၤဘ့ၢ်လီၤ. ဘၣ်ဆၣ်ဒီး, အဝဲသ့ၣ်ကဘၣ်တၢ်မၤဟးဂီၤကဒါက့ၤအီၤလီၤထူလီၤ ယိာ်လီၤ.”
25 အန့ၣ်ဝံၤဒီးစီၤဘံးလၣ်ကတဲာ်ကတီၤအသးဒီးက့ၤကဒါက့ၤဆူ အဟံၣ်ဒီးစီၤဘၤလးလဲၤဆူညါလၢအကျဲဒၣ်ဝဲန့ၣ်လီၤ.