18
1 ယွၤစံးဘၣ်စီၤအၤဟရိၣ်, “နၤဒီးနဖိခွါတဖၣ်, ဒီးပှၤလ့ၤဝံဖိတဖၣ်ကဘၣ်တူၢ်တၢ်ဒ်အကြၢးဝဲဘၣ်ဝဲဒီးတၢ်ကမၣ် တမံၤဂ့ၤတမံၤဂ့ၤလၢအဘၣ်ထွဲဒီးတၢ်မၤတၢ်လၢယအိၣ်ယဆိးအဒဲ စီဆှံအပူၤန့ၣ်လီၤ. ဘၣ်ဆၣ်ဒီးထဲနၤဒီးနဖိခွါတဖၣ်ဧိၤန့ၣ်ကတူၢ်ဘၣ်တၢ်ဒ်အကြၢး ဝဲဘၣ်ဝဲဒီးတၢ်မၤလၢအဘၣ်ထွဲဒီးပှၤလုၢ်တၢ်အခိၣ်န့ၣ်လီၤ.
2 ဟဲကိးနုာ်နဘူးနတံၢ်တဖၣ်, ပှၤလ့ၤဝံဖိအဒူၣ်, လၢအကမၤတၢ်ဒီးနၤဒီးမၤစၢၤနၤဖဲနၤဒီးနဖိခွါတဖၣ်မၤတၢ် လၢဒဲစီဆှံအပူၤအခါတက့ၢ်.
3 အဝဲသ့ၣ်ကဘၣ်မၤလၢပှဲၤအမူအဒါတဖၣ်လၢနဂီၢ်ဒီးအမူ အဒါတဖၣ်လၢဒဲစီဆှံအပူၤ, ဘၣ်ဆၣ်ဒီးအဝဲသ့ၣ်တဘၣ်ထိးဘူးတၢ်အပီးအလီစီဆှံတဖၣ်လၢတၢ် အလီၢ်စီဆှံအပူၤမ့ၢ်ဂ့ၤ, တၢ်လုၢ်လီၢ်မ့ၢ်ဂ့ၤန့ၣ်ဘၣ်. အဝဲသ့ၣ်မ့ၢ်ထိးဘၣ်ဝဲဒီးအဝဲသ့ၣ်မ့ၢ်ဂ့ၤနၤမ့ၢ်ဂ့ၤကဘၣ် တၢ်မၤသံကွံာ်အီၤန့ၣ်လီၤ.
4 အဝဲသ့ၣ်ကဘၣ်မၤတၢ်ဒီးနၤဒီးမၤလၢထီၣ်ပှဲၤထီၣ်အမူအဒါတဖၣ် လၢကယဲၢ်တၢ်မၤလၢဒဲစီဆှံပူၤအဂီၢ်, ဘၣ်ဆၣ်ဒီးပှၤလၢတကြၢးတဘၣ်တဖၣ်တဘၣ်မၤဃုာ်တၢ်ဒီးနၤဘၣ်.
5 ထဲနၤဒီးနဖိခွါတဖၣ်ဧိၤကဘၣ်မၤလၢထီၣ်ပှဲၤထီၣ်မူဒါတဖၣ်လၢ တၢ်အလီၢ်စီဆှံဂီၢ်ဒီးလၢတၢ်လုၢ်လီၢ်အဂီၢ်, ဒ်သိးယတၢ်သးဒိၣ်အသုတဟဲဖျိးထီၣ်ကဒီးထီဒါဘၣ်ကီၢ်အံၣ်စရ့ လးအပှၤဂီၢ်မုၢ်တဖၣ်တဂ့ၤအဂီၢ်န့ၣ်လီၤ.
6 ယမ့ၢ်ပှၤတဂၤလၢအဃုထၢတ့ၢ်နဘူးနတံၢ်ပှၤလ့ၤဝံဖိတဖၣ်လၢပှၤ အံၣ်စရ့လးဖိတဖၣ်အကျါဒ်တၢ်ဟ့ၣ်တမံၤဆူနအိၣ်လီၤ. အဝဲသ့ၣ်ဘၣ်တၢ်ပာ်စီဆှံထီၣ်အီၤဆူယအိၣ်, ဒ်သိးအဝဲသ့ၣ်မၤအမူအဒါတဖၣ်လၢဒဲစီဆှံအပူၤကသ့ဝဲဒၣ်န့ၣ် လီၤ.
7 ဘၣ်ဆၣ်ဒီးထဲနၤဒီးနဖိခွါတဖၣ်ဧိၤကဘၣ်မၤလၢထီၣ်ပှဲၤထီၣ်ပှၤ လုၢ်တၢ်အခိၣ်အမူအဒါတဖၣ်လၢအဘၣ်ဃးဒီးတၢ်လုၢ်လီၢ်ဒီးတၢ်အိၣ် လၢတၢ်အလီၢ်စီဆှံကတၢၢ်အပူၤန့ၣ်လီၤ. တၢ်တဖၣ်အံၤမ့ၢ်နမူနဒါတဖၣ်မ့ၢ်လၢယဟ့ၣ်တ့ၢ်နၤတၢ်ဟ့ၣ်ဘၣ်ဃး ဒီးပှၤလုၢ်တၢ်အခိၣ် အဃိန့ၣ်လီၤ. ပှၤလၢအတကြၢးတဘၣ်တဂၤလၢ်လၢ်လၢအဟဲဘူးဒီးတၢ်အပီးအလီစီဆှံ တဖၣ်န့ၣ်ကဘၣ်တၢ်မၤသံကွံာ်အီၤန့ၣ်လီၤ.”
8 ယွၤစံးဘၣ်စီၤအၤဟရိၣ်, “သ့ၣ်နီၣ်ထီၣ်လၢယဟ့ၣ်တ့ၢ်နၤတၢ် ဟ့ၣ်မၤဘူၣ်လီၤဆီခဲလၢာ်လၢအဘၣ်တၢ်လုၢ်ထီၣ်ပာ်ထီၣ်ဆူ ယအိၣ်, တၢ်လၢအတဘၣ်တၢ်ဆိၣ်ကဲၤထီၣ်အီၤဒ်တၢ်လုၢ်တၢ်ပာ် တဖၣ်အသိးန့ၣ်တက့ၢ်. ယဟ့ၣ်အီၤဆူနၤဒီးနစၢၤနသွဲၣ်တဖၣ်ဒ်တၢ်နီၤဖးလၢသုကဒိးန့ၢ် အီၤလီၤထူလီၤယိာ်န့ၣ်လီၤ.
9 လၢတၢ်လုၢ်စီဆှံကတၢၢ်တဖၣ်လၢတၢ်တဆိၣ်ကဲၤဘၣ်အီၤလၢတၢ်လုၢ် လီၢ်အဖီခိၣ်အကျါန့ၣ်, တၢ်လၢလာ်တဖၣ်အံၤဘၣ်ဃးဒီးနၤလီၤ. တၢ်လုၢ်ဘုဧိၤဟုဧိၤတဖၣ်, တၢ်လုၢ်တၢ်ပျၢ်တၢ်ဒဲးဘးတဖၣ်, ဒီးတၢ်လိးက့ၤအတၢ်လုၢ်တဖၣ်န့ၣ်လီၤ. တၢ်ကိးမံၤဒဲးလၢအဘၣ်တၢ်ဟ့ၣ်ထီၣ်ဆူ ယအိၣ်ဒ်တၢ်လုၢ်စီဆှံတဖၣ်န့ၣ်ဘၣ်ဃးဒီးနၤဒီးနဖိခွါတဖၣ်လီၤ.
10 နကဘၣ်အီၣ်တၢ်တဖၣ်အံၤလၢတၢ်အလီၢ်စီဆှံအပူၤ, ဒီးထဲပှၤပိာ်ခွါတဖၣ်ဧိၤအီၣ်တၢ်အံၤသ့ဝဲလီၤ. ပာ်သူၣ်ပာ်သးလၢတၢ်အံၤမ့ၢ်တၢ်စီဆှံတက့ၢ်.
11 လၢတၢ်န့ၣ်အမဲာ်ညါ, တၢ်မၤဘူၣ်လီၤဆီအဂၤတဖၣ်လၢပှၤအံၣ်စရ့လး ဖိတဖၣ်ဟ့ၣ်ထီၣ်ဆူယအိၣ်န့ၣ်ကမ့ၢ်နတၢ်လီၤ. ယဟ့ၣ်တၢ်တဖၣ်န့ၣ်ဆူနၤဒီးနဖိခွါတဖၣ်ဒီးနဖိမုၣ်တဖၣ်အစိၤ စိၤအဃၣ်ဃၣ်န့ၣ်လီၤ. ပှၤကိးဂၤဒဲးလၢနဟံၣ်ဖိဃီဖိအကျါလၢအကဆှီဝဲဒ်တၢ်ဘူၣ်တၢ် ဘါအလုၢ်အလၢ်အိၣ်ဝဲအသိးန့ၣ်အီၣ်အီၤသ့လီၤ.
12 ကယဲၢ်တၤသၣ်ဆိအဂ့ၤကတၢၢ်လၢပှၤအံၣ်စရ့လးဖိတဖၣ်ဟ့ၣ်ထီၣ်ယၤ ကိးနံၣ်ဒဲးလၢအမ့ၢ်သ့ၣ်စၤယံးအသိ, စပံးထံ, ဒီးဘုဧိၤဟုဧိၤတဖၣ်န့ၣ်ယဟ့ၣ်နၤလီၤ.
13 တၢ်န့ၣ်ဘၣ်ဃးဒီးနၤလီၤ. ပှၤကိးဂၤဒဲးလၢနဟံၣ်ဖိဃီဖိတဖၣ်အကျါလၢအကဆှီဝဲဒ်တၢ်ဘူၣ် တၢ်ဘါအလုၢ်အလၢ်အသိးန့ၣ်အီၣ်အီၤသ့ဝဲလီၤ.
14 တၢ်ကိးမံၤဒဲးလၢအအိၣ်လၢကီၢ်အံၣ်စရ့လးအပူၤလၢအဘၣ်တၢ်ပာ် စီဆှံထီၣ်အီၤဆူယအိၣ်လၢတၢ်သူၣ်အိၣ်သးအိၣ်အပူၤန့ၣ်ဘၣ်ဃး ဒီးနၤလီၤ.
15 ဖိဝဲၢ်ကိကိးဂၤဒဲးမ့ၢ်ဂ့ၤဆၣ်ဖိကီၢ်ဖိအဝဲၢ်ကိကိးဒုဒဲး မ့ၢ်ဂ့ၤလၢပှၤအံၣ်စရ့လးဖိဟ့ၣ်ထီၣ်ဆူယအိၣ်န့ၣ်ဘၣ်ဃးဒီးနၤ လီၤ. ဘၣ်ဆၣ်ဒီးနကဘၣ်တူၢ်လိာ်တၢ်လၢတၢ်ကပှ့ၤကဒါက့ၤဖိဝဲၢ်ကိကိး ဂၤဒဲးအဂီၢ်ဒီးနဘၣ်တူၢ်လိာ်စ့ၢ်ကီးတၢ်လိးက့ၤတၢ်အပှ့ၤလၢ ကယဲၢ်ဆၣ်ဖိကီၢ်ဖိအဝဲၢ်ကိ, ကိးဒုးဒဲးလၢအတကဆှီဘၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိး အဂီၢ်န့ၣ်လီၤ.
16 ဖိသၣ်တဖၣ်လၢအသးအိၣ်တလါန့ၣ်ကဘၣ်တၢ်ပှ့ၤက့ၤအီၤလၢတၢ်အပှ့ၤဒ် တၢ်ပာ်လီၤအီၤလၢစ့နီၣ်ယဲၢ်ဘ့ၣ်လီၤတံၢ်လီၤဆဲးဒ်တၢ်သိၣ်တၢ်သီ အနီၣ်ထိၣ်အသိးန့ၣ်လီၤ.
17 ဘၣ်ဆၣ်ဒီးဂီၤဖံးမိၢ်တဖၣ်အဖိဝဲၢ်ကိ, သိတဖၣ်အဖိဝဲၢ်ကိ, ဒီးမဲာ်တဲးလဲးတဖၣ်အဖိဝဲၢ်ကိန့ၣ်တဘၣ်တၢ်ပှ့ၤက့ၤဘၣ်အီၤဘၣ်. အဝဲသ့ၣ်ဘၣ်ဃးဒီးယၤလၢာ်လၢာ်ဆ့ဆ့ဒီးကဘၣ်တၢ်လုၢ်ထီၣ်ပာ်ထီၣ် အီၤန့ၣ်လီၤ. လူလီၤအသွံၣ်လၢတၢ်လုၢ်လီၢ်အဖီခိၣ်ဒီးဆိၣ်ကဲၤအသိဒ် တၢ်လုၢ်တၢ်အီၣ်အသိးလၢအမ့ၢ်တၢ်နၢမူမၤမုာ်ယသးန့ၣ်တက့ၢ်.
18 တၢ်လုၢ်တဖၣ်န့ၣ်အတၢ်ဖံးတၢ်ညၣ်, ဒ်တၢ်ညၣ်လၢအသးနါပှၢ်ဒီးအခီၣ် ကံၣ်ဒုၣ်အထွဲလၢအမ့ၢ်တၢ်လုၢ်တၢ်ပာ်လီၤဆီန့ၣ်ဘၣ်ဃးဒီးနၤလီၤ.
19 ကယဲၢ်တၢ်မၤဘူၣ်လီၤဆီလၢပှၤအံၣ်စရ့လးဖိတဖၣ်ဟ့ၣ်ထီၣ်ဆူ ယအိၣ်န့ၣ်ယဟ့ၣ်လီၤနၤ, နဖိခွါတဖၣ်ဒီးနဖိမုၣ်တဖၣ်အစိၤစိၤ အဃၣ်ဃၣ်လီၤ. တၢ်အံၤမ့ၢ်တၢ်အၢၣ်လီၤအီလီၤတမံၤလၢ တၢ်မၤဟးဂီၤကွံာ်အီၤတသ့ဘၣ်လၢယမၤတ့ၢ်ဒီးနစၢၤနသွဲၣ်တဖၣ် န့ၣ်လီၤ.”
20 ယွၤစံးဘၣ်စီၤအၤဟရိၣ်, “တၢ်စုလီၢ်ခီၣ်ခိၣ်လၢတၢ်န့ၢ်သါ အီၤသ့ဝဲတဖၣ်န့ၣ်နတဒိးန့ၢ်ဘၣ်အီၤဘၣ်. တၢ်တဟ့ၣ်ဘၣ်နၤလၢကီၢ်အံၣ်စရ့လးအဟီၣ်ခိၣ်နီတကဝီၤဘၣ်. ယၤ, ယွၤမ့ၢ်ကယဲၢ်တၢ်လၢနလိၣ်ဘၣ်အီၤန့ၣ်လီၤ.”
21 ယွၤစံးဝဲဒၣ်, “ကယဲၢ်တၢ်ဆံဆဲၣ်ပူၤတပူလၢကီၢ်အံၣ်စရ့လး အပှၤဂီၢ်မုၢ်ဟ့ၣ်ထီၣ်ယၤန့ၣ်ယဟ့ၣ်လီၤအီၤဆူပှၤလ့ၤဝံဖိတဖၣ် အအိၣ်လီၤ. တၢ်အံၤမ့ၢ်တၢ်အဘူးအလဲလၢအဝဲသ့ၣ်မၤတၢ်အခ့အပှၤအတၢ်မၤ လၢတၢ်အံးထွဲကွၢ်ထွဲယအိၣ်ယဆိးအဒဲစီဆှံအဂီၢ်န့ၣ်လီၤ.
22 ပှၤအံၣ်စရ့လးဖိအဂၤတဖၣ်တဘၣ်သုးဘူးအသးဆူဒဲစီဆှံ အအိၣ်နီတစုလၢၤဘၣ်. လၢကျဲဒ်အံၤအဃိန့ၣ်အဝဲသ့ၣ်ကဒုးလီၤဘၣ်တၢ်စံၣ်ညီၣ်သံလၢအဖီ ခိၣ်ဒၣ်ဝဲန့ၣ်လီၤ.
23 စးထီၣ်လၢမုၢ်မဆါတနံၤအံၤထဲပှၤလ့ၤဝံဖိတဖၣ်ဧိၤကအံးထွဲ ကွၢ်ထွဲဒဲစီဆှံဒီးဟံးန့ၢ်မူဒါလၢလၢပှဲၤပှဲၤလၢဒဲစီဆှံန့ၣ်အဂီၢ်လီၤ. တၢ်အံၤမ့ၢ်တၢ်သိၣ်တၢ်သီအဂၢၢ်အကျၢၤတမံၤလၢအဘၣ်ထွဲ စ့ၢ်ကီးဒီးနစၢၤနသွဲၣ်တဖၣ်န့ၣ်လီၤ. ပှၤလ့ၤဝံဖိတဖၣ်န့ၣ်တဘၣ်အိၣ်ဒီးတၢ်စုလီၢ်ခီၣ်ခိၣ်အဂၢၢ် အကျၢၤနီတမံၤလၢကီၢ်အံၣ်စရ့လးအပူၤဘၣ်.
24 အဂ့ၢ်ဒ်အံၤ, ဟ့ၣ်လီၤတ့ၢ်လံအဝဲသ့ၣ်လၢတၢ်ဆံဆဲၣ်ပူတပူလၢပှၤ အံၣ်စရ့လးဖိတဖၣ်ဟ့ၣ်ထီၣ်ဆူယအိၣ်ဒ်တၢ်ဟ့ၣ်လီၤဆီတမံၤအသိး န့ၣ်လၢအဝဲသ့ၣ်အတၢ်န့ၢ်သါအဂီၢ်လံလီၤ. လၢတၢ်န့ၣ်အဃိယစံးတ့ၢ်အဝဲသ့ၣ်လၢအဝဲသ့ၣ်တဘၣ်အိၣ်ဒီးတၢ်စု လီၢ်ခီၣ်ခိၣ်အဂၢၢ်အကျၢၤနီတမံၤလၢကီၢ်အံၣ်စရ့လး အပူၤဘၣ်န့ၣ်လီၤ.”
25-26 ယွၤမၤလိာ်တ့ၢ်စီၤမိၤၡ့, လၢကတဲဘၣ်ပှၤလ့ၤဝံဖိတဖၣ်ဒ်အံၤ, “ဖဲသုဒိးန့ၢ်တၢ်ဆံဆဲၣ် ပူတပူလၢယွၤဟ့ၣ်သုဒ်သုတၢ်န့ၢ်သါအသိး, လၢပှၤအံၣ်စရ့လးဖိတဖၣ်အအိၣ်န့ၣ်, သုကဘၣ်ဟ့ၣ်ထီၣ်တၢ်ဆံဆဲၣ် ပူတပူဒ်တၢ်ဟ့ၣ်လီၤဆီတမံၤဆူယွၤအအိၣ်န့ၣ်လီၤ.
27 တၢ်မၤဘူၣ်လီၤဆီအံၤကဘၣ်တၢ်ပာ်အီၤဒ်တၢ်ထဲသိးသိးဒီးအတၢ် လုၢ်တၢ်ပာ်လၢပှၤထူစံာ်ဖိတဖၣ်မၤဝဲဖဲဘုဆိဒီးစပံးထံအဆိ အကတီၢ်န့ၣ်လီၤ.
28 လၢကျဲဒ်အံၤန့ၣ်သုဝဲစ့ၢ်ကီးသုကဘၣ်ဟ့ၣ်ထီၣ်တၢ်မၤဘူၣ်လီၤ ဆီလၢအဘၣ်ဃးဒီးယွၤ, လၢကယဲၢ်တၢ်ဆံဆဲၣ်ပူတပူလၢသုဒိးန့ၢ်လၢပှၤအံၣ်စရ့လးဖိ တဖၣ်အအိၣ်အကျါန့ၣ်လီၤ. တၢ်မၤဘူၣ်လီၤဆီလၢယွၤအဂီၢ်အံၤသုကဘၣ်ဟ့ၣ်အီၤဆူပှၤလုၢ်တၢ် အခိၣ်စီၤအၤဟရိၣ်အအိၣ်န့ၣ်လီၤ.
29 ဟ့ၣ်တၢ်အဂ့ၤကတၢၢ်လၢသုဒိးန့ၢ်အီၤအကျါန့ၣ်တက့ၢ်.
30 ဖဲသုဟ့ၣ်ထီၣ်တၢ်နီၤဖးအဂ့ၤကတၢၢ်ဝံၤန့ၣ်, တၢ်လၢအအိၣ်တ့ၢ်န့ၣ်သုပာ်အီၤလၢသုဂီၢ်သ့ဝဲ, ဒ်ပှၤထူစံာ်ဖိ ပာ်တၢ်အိၣ်လီၤတဲာ်တဖၣ်ဖဲအလုၢ်ထီၣ်ပာ်ထီၣ်တၢ်ဝံၤဝဲအကတီၢ်န့ၣ် လီၤ.
31 သုဝဲဒီးသုဟံၣ်ဖိဃီဖိတဖၣ်အီၣ်တၢ်အိၣ်တ့ၢ်န့ၣ်ဖဲတၢ်လီၢ် တပူၤဂ့ၤတပူၤဂ့ၤသ့ဝဲလီၤ. မ့ၢ်လၢတၢ်န့ၣ်မ့ၢ်တၢ်အဘူးအလဲလၢသုမၤတၢ်ခ့တၢ်ပှၤအတၢ်မၤလၢ ဒဲစီဆှံပူၤအဂီၢ်အဃိန့ၣ်လီၤ.
32 ဖဲသုဟ့ၣ်ထီၣ်တၢ်နီၤဖးအဂ့ၤကတၢၢ်ဆူယွၤဝံၤတစုန့ၣ်တုၤသု အီၣ်တၢ်ဒီးတၢ်ကမၣ်တကဲထီၣ်လၢသုဂီၢ်ဘၣ်. ဘၣ်ဆၣ်ဒီးပလီၢ်သုသးလၢသုသုတမၤဘၣ်အၢတၢ်ဟ့ၣ်စီဆှံတဖၣ်လၢ ပှၤအံၣ်စရ့လးဖိတဖၣ်ဟ့ၣ်ဝဲခီဖျိတၢ်အီၣ်တၢ်ဟ့ၣ်တဖၣ်တမံၤ ဂ့ၤတမံၤဂ့ၤ, တချုးဖဲသုလုၢ်ထီၣ်ပာ်ထီၣ်ဘၣ်ဒံးတၢ်နီၤဖးအဂ့ၤ ကတၢၢ်န့ၣ်တဂ့ၤ. သုမ့ၢ်မၤဒီးသုကဘၣ်တၢ်မၤသံကွံာ်သုန့ၣ်လီၤ.”