13
(သိၣ်သီ.၁:၁၉- ၃၃)
1-2 ယွၤစံးဘၣ်စီၤမိၤၡ့, “လၢခိၣ်နၢ်တဖၣ်အကျါန့ၣ်ဃုထၢထီၣ်ပှၤတဒူၣ်, တဂၤစုာ်စုာ်လၢပှၤတဆံခံဒူၣ်အကျါဒီးဆှၢလီၤအဝဲသ့ၣ်ဒ်ပှၤ ကွၢ်ဟုၣ်ကွၢ်စုးတၢ်တဖၣ်အသိးလၢကလဲၤဃုထံၣ်သ့ၣ်ညါကီၢ်ကနၤ ဧၣ်, လၢယကဟ့ၣ်ပှၤအံၣ်စရ့လးဖိတဖၣ်အဂီၢ်န့ၣ်တက့ၢ်.”
3-15 စီၤမိၤၡ့စူၢ်တၢ်ဒီးလၢပၤရၣ်အပှၢ်မုၢ်ကနၢန့ၣ်အဝဲဆှၢလီၤ ပှၤခိၣ်ပှၤနၢ်တဖၣ်ဒ်လၢလာ်အံၤအသိးန့ၣ်လီၤ.
16 အဝဲသ့ၣ်မ့ၢ်ပှၤကွၢ်ဟုၣ်ကွၢ်စုးတၢ်လၢစီၤမိၤၡ့မၢလီၤအီၤဒ် သိးကလဲၤဃုထံၣ်သ့ၣ်ညါကီၢ်အဂ့ၢ်န့ၣ်လီၤ. အဝဲလဲလိာ်ကွံာ်စီၤနိၣ်အဖိခွါစီၤဟိၤၡံအမံၤဆူစီၤယိၤ ၡူန့ၣ်လီၤ.
17 ဖဲစီၤမိၤၡ့ဆှၢလီၤအဝဲသ့ၣ်န့ၣ်အဝဲစံးဘၣ်အဝဲသ့ၣ်, “လဲၤတၢ်ဖဲအံၤဆူကလံၤစိးတခီတုၤဆူကီၢ်ကနၤဧၣ်န့ၣ် အကလံၤထံးအပူၤဝံၤဒီး, လဲၤဆူကီၢ်အိၣ်လၢတၢ်လူၢ်ခိၣ်တဖၣ်အဒီခိၣ်တက့ၢ်.
18 ဃုထံၣ်အီၤလၢအမ့ၢ်ထံကီၢ်ဒ်လဲၣ်တကီၢ်, ထံဖိကီၢ်ဖိအိၣ်ဖဲန့ၣ်ပှံၤဂၤလဲၣ်, ဒီးအဝဲသ့ၣ်အဂံၢ်အဘါဆူၣ်ဆံးအါလဲၣ်အဂ့ၢ်န့ၣ်တက့ၢ်.
19 ဃုသ့ၣ်ညါလၢကီၢ်တဘ့ၣ်န့ၣ်ဂ့ၤဧါ, မ့တမ့ၢ်တဂ့ၤဧါဒီးပှၤအိၣ်ဖဲန့ၣ်တဖၣ်အိၣ်လၢဝ့ၢ်တဖၣ်လၢအခိၣ် ဒူတအိၣ်အပူၤမ့တမ့ၢ်ဝ့ၢ်တဖၣ်လၢခိၣ်ဒူအိၣ်ဂၢၢ်ဂၢၢ်ကျၢၤကျၢၤ အပူၤဧါ, န့ၣ်တက့ၢ်.
20 ဃုသ့ၣ်ညါလၢဟီၣ်ခိၣ်ညၣ်ထ့ၣ်ဂ့ၤဧါ, ဒီးကီၢ်န့ၣ်သ့ၣ်ပှၢ်အိၣ်အါဧါအဂ့ၢ်တက့ၢ်. ဒီးမၤလီၤတံၢ်လၢသုကဟဲက့ၤစိာ်သ့ၣ်သူဝၣ်သၣ်တနီၤလၢအမဲ ထီၣ်ဒီးသၣ်ထီၣ်ဖဲန့ၣ်တက့ၢ်.” (အကတီၢ်ဖဲန့ၣ်မ့ၢ်ဝဲဖဲစပံးသၣ်တဖၣ်စးထီၣ်မံထီၣ်ဝဲအကတီၢ် န့ၣ်လီၤ.)
21 မၤသးဒ်န့ၣ်ဒီး, ပှၤတဖၣ်န့ၣ်လဲၤထီၣ်ဆူကလံၤစိးဒီးဃုသ့ၣ်ညါ ကီၢ်န့ၣ်အဂ့ၢ်စးထီၣ်လၢကီၢ်အကလံၤထံးပှၢ်မုၢ်ကနၢစံၣ်ဒီးကျဲ ဒီဘိတုၤဆူရဃိာ်အိၣ်ဘူးဒီးကျဲဆူဃမါသးကလံၤစိးတခီန့ၣ် လီၤ.
22 အဆိကတၢၢ်အဝဲသ့ၣ်လဲၤဆူကီၢ်န့ၣ်အကလံၤထံးတကပၤ တုၤဆူဝ့ၢ်ဃ့ဘြိၣ်, တၢ်လီၢ်ဖဲစီၤအဃံမ့ၣ်, စီၤၡ့ၤၡဲ, ဒီးစီၤတးလမဲအဒူၣ်ထၢတဖၣ်ပှၤဟဲလီၤစၢၤလၢပှၤတကလုာ်လၢအနီၢ် ဒိၣ်နီၢ်သွါတဖၣ်လၢပှၤကိးအီၤလၢပှၤဧနးဖိအိၣ်ဝဲဆိးဝဲအလီၢ်န့ၣ်လီၤ. (ဝ့ၢ်ဃ့ဘြိၣ်န့ၣ်ဘၣ်တၢ်သူၣ်ထီၣ်အီၤဆိန့ၣ်ဝ့ၢ်စိၤဧၢ်လၢကီၢ် အဲၤကူပတူးအပူၤနွံနံၣ်န့ၣ်လီၤ.)
23 အဝဲသ့ၣ်ဟဲတုၤလၢအ့ၡကိၤလးအတၢ်တြီၤဒီးဖဲန့ၣ်အဝဲသ့ၣ်ကျီ တဲာ်သ့ၣ်ဒ့တဒ့လၢအအိၣ်ဒီးစပံးသၣ်အချံၣ်ဖးဒိၣ်လၢအဃၢဝဲ တချံၣ်တုၤပှၤခံဂၤဘၣ်ယိးအီၤလၢသ့ၣ်တဘိလၢညါတဂၤဒီးလၢခံ တဂၤန့ၣ်လီၤ. အဝဲသ့ၣ်ဟဲက့ၤစိာ်စ့ၢ်ကီးသလဲသၣ်ဒီးချၢၣ်ဒၢသၣ်တနီၤန့ၣ် လီၤ.
24 (တၢ်လီၢ်န့ၣ်ဘၣ်တၢ်ကိးအီၤလၢအ့ၡကိၤလးအတၢ်တြီၤမ့ၢ်လၢပှၤ အံၣ်စရ့လးဖိတဖၣ်ကျီတဲာ်စပံးသၣ်အချံၣ်ဖးဒိၣ်တချံၣ်ဖဲတၢ် လီၢ်န့ၣ်အဃိလီၤ.)
25 တုၤအဝဲသ့ၣ်ဃုသ့ၣ်ညါကီၢ်န့ၣ်အသီလွံၢ်ဆံဝံၤဒီး, ပှၤကွၢ်ဟုၣ်ကွၢ်စူးတၢ်တဖၣ်ဟဲက့ၤကဒါက့ၤဝဲ,
26 ဆူစီၤမိၤၡ့, စီၤအၤဟရိၣ်, ဒီးကီၢ်အံၣ်စရ့လးအပှၤဒီတဖု လၢအအိၣ်သကိးတပူၤဃီအအိၣ်, ဖဲကၤဒ့ၣ်လၢပၤရၣ်အပှၢ်မုၢ်ကနၢ အပူၤန့ၣ်လီၤ. အဝဲသ့ၣ်တဲဖျါထီၣ်တၢ်လၢအဝဲသ့ၣ်ထံၣ်တ့ၢ်ဝဲဒီးဒုးနဲၣ် အဝဲသ့ၣ်တၤသူတၤသၣ်လၢအဝဲသ့ၣ်ဟဲက့ၤစိာ်ဝဲန့ၣ်လီၤ.
27 အဝဲသ့ၣ်စံးဘၣ်စီၤမိၤၡ့, “ပလဲၤဃုထံၣ်သ့ၣ်ညါတ့ၢ်ကီၢ်န့ၣ် ဒီးပထံၣ်လၢအထူးအတီၤဒီးဟီၣ်ခိၣ်ညၣ်ထ့ၣ်ဂ့ၤဝဲလီၤ. ဒီးအအံၤမ့ၢ်အတၤသူတၤသၣ်တနီၤန့ၣ်လီၤ.
28 ဘၣ်ဆၣ်ဒီးပှၤဂီၢ်မုၢ်လၢအအိၣ်ဖဲန့ၣ်တဖၣ်အဂံၢ်အဘါဆူၣ်ဝဲ, ဒီးအခူအဝ့ၢ်တဖၣ်ဒိၣ်ဝဲဒီးအခိၣ်ဒူအိၣ်ကျၢၤဝဲဂ့ၤဂ့ၤလီၤ. အၢန့ၢ်အန့ၣ်ဒၣ်လဲာ်ပထံၣ်တ့ၢ်ပှၤနီၢ်ဒိၣ်နီၢ်သွါအစၢၤအသွဲၣ် တဖၣ်ဖဲန့ၣ်လီၤ.
29 ပှၤဧမၤလ့းဖိတဖၣ်အိၣ်လၢကီၢ်န့ၣ်အကလံၤထံးတခီ, ပှၤဃ့ၤသးဖိ, ပှၤယဘူၣ်ဖိ, ပှၤအမိၢ်ဖိတဖၣ်အိၣ်လၢကီၢ်အတၢ်လူၢ် ဒီခိၣ်ဒီးပှၤကနၤဧၣ်ဖိတဖၣ်အိၣ်လၢပီၣ်လဲၣ်ဖးဒိၣ်မဲးဒံး ထၢၣ်ရ့နယၢၣ်အဃၢၤဒီးထံကျိယၢ်ဒ့ၣ်အကၢၢ်နံၤဒီတရဲၣ်ညါန့ၣ် လီၤ.”
30 စီၤကၤလ့းဒုးအိၣ်ဘှီၣ်ပှၤဂီၢ်မုၢ်လၢအကဒူးကဒ့ၣ်တၢ်ထီဒါ စီၤမိၤၡ့ဒီးစံးဝဲဒၣ်, “ပကြၢးလဲၤထီၣ်ဒုးတၢ်ခဲအံၤဒီးမၤန့ၢ်ကီၢ်န့ၣ်လီၤ. ပဂံၢ်ပဘါအိၣ်လၢလၢပှဲၤပှဲၤလၢပကမၤနၢၤအီၤအဂီၢ်လီၤ.”
31 ဘၣ်ဆၣ်ဒီးပှၤတဖၣ်လၢအလဲၤဃုာ်တ့ၢ်တၢ်ဒီးစီၤကၤလ့းစံးဝဲ ဒၣ်, “တမ့ၢ်ဘၣ်. ပဂံၢ်ပဘါတလၢ, လၢပကလဲၤထီၣ်ဒုးအဝဲသ့ၣ်အဂီၢ်ဘၣ်. ပှၤအိၣ်ဖဲန့ၣ်တဖၣ်အဂံၢ်အဘါဆူၣ်ဒိၣ်န့ၢ်ပှၤတက့ၢ်လီၤ.”
32 မၤသးဒ်န့ၣ်ဒီးအဝဲသ့ၣ်ရၤလီၤတၢ်ကစီၣ်လၢအတတီလၢပှၤအံၣ်စရ့ လးဖိတဖၣ်အကျါဘၣ်ဃးဒီးကီၢ်လၢအဝဲသ့ၣ်လဲၤဃုထံၣ်သ့ၣ်ညါဝဲ အဂ့ၢ်န့ၣ်လီၤ. အဝဲသ့ၣ်စံးဝဲဒၣ်, “ကီၢ်အဝဲန့ၣ်ဟ့ၣ်ထီၣ်အတၤသၣ်တလၢဝဲလၢပှၤအိၣ်ဖဲန့ၣ်တဖၣ် အဂီၢ်ဒၣ်လဲာ်ဘၣ်. ပှၤကိးဂၤဒဲးလၢပထံၣ်ဘၣ်တ့ၢ်အီၤန့ၣ်အဂီၤထီဒိၣ်မး,
33 ဒီးပထံၣ်ဒၣ်လဲာ်ပှၤနီၢ်ဒိၣ်နီၢ်သွါတဖၣ်ဖဲန့ၣ်, စီၤဧနးအစၢၤအသွဲၣ်တဖၣ်န့ၣ်လီၤ. ပကွၢ်လီၤပသးလီၤဂာ်မးဒ်ဒွဲၣ်ဖိတြၤဖိတဖၣ်ဒီးပကဖျါလီၤဂာ် စ့ၢ်ကီးဒ်န့ၣ်, လၢအဝဲသ့ၣ်အမဲာ်ညါန့ၣ်လီၤ.”