25
1 တုၤနုၤတစု, မူခိၣ်အဘီအမုၢ်န့ၣ်ကမၤအသးဒ်အံၤလီၤ. တဘျီပှၤမုၣ်ကနီၤအိၣ်ဝဲအဂၤတဆံ, လၢအဟံးန့ၢ်အမ့ၣ်အူဒၢ,
ဒီးဟးထီၣ်လဲၤသဂၢၢ်တလးမူးပိာ်ခွါတဂၤန့ၣ်လီၤ.
2 အဝဲသ့ၣ်အကျါယဲၢ်ဂၤမ့ၢ်ပှၤလၢအသးတဆးဘၣ်, ဒီးအဂၤယဲၢ်ဂၤမ့ၢ်ပှၤလၢအသူၣ်ဆးအသးဆးတဖၣ်လီၤ.
3 မုၣ်ကနီၤလၢအသးတဆးတဖၣ်န့ၣ်, လဲၤစိာ်အမ့ၣ်အူဒၢတဖၣ်ဘၣ်ဆၣ် တလဲၤစိာ်ဃုာ်ဒီးသိဘၣ်.
4 မုၣ်ကနီၤလၢအသူၣ်ဆးအသးဆးတဖၣ်န့ၣ်, လဲၤစိာ်ဃုာ်ဒီးသိပှဲၤတၢ်ပူၤတၢ်တ့ၤအဂၤတခါအပူၤလီၤ.
5 တလးမူးပိာ်ခွါန့ၣ်စဲၤခံဝဲသတးဒီး, အဝဲသ့ၣ်မံခ့မံသပ့ၤ, ဒီးမံဘၣ်အသးခဲလၢာ်လီၤ.
6 ဒီးလၢဖးဖီမုၢ်န့ၣ်, တၢ်ကိးသတြီထီၣ်ဝဲ, ‘တလးမူးပိာ်ခွါဟဲလံ, ဟဲဒီးသဂၢၢ်အီၤတက့ၢ်.’
7 တုၤနုၤတစု, မုၣ်ကနီၤဆံဆဲၣ်ဂၤန့ၣ်ပၢၢ်ထီၣ်ဒီးမၤဂ့ၤထီၣ် အမ့ၣ်အူဒၢတဖၣ်လီၤ.
8 တုၤနုၤတစု, မုၣ်ကနီၤလၢအသးတဆးတဖၣ်စံးဘၣ်ပှၤလၢအသးဆး တဖၣ်, ‘ဟ့ၣ်ပှၤလၢသုသိတနီၤတက့ၢ်. အဂ့ၢ်ဒ်အံၤပမ့ၣ်အူဒၢတဖၣ်
ကလီၤပံာ်လီၤ.’
9 ပှၤအသူၣ်ဆးအသးဆးတဖၣ်စံးဆၢဝဲ, ‘တသ့ဘၣ်. ပသိတအိၣ်လၢအိၣ်လီၣ်လၢသုဂီၢ်ဒီးပဂီၢ်ဘၣ်. လဲၤဆူတၢ်ဆါတၢ်ပှ့ၤအကျးဒီးပှ့ၤန့ၢ်သိလၢ သုဂီၢ်ဒၣ်သုဝဲတက့ၢ်.’
10 လၢတၢ်န့ၣ်အဃိ, မုၣ်ကနီၤလၢအသးတဆးတဖၣ်လဲၤဝဲဒ်သိး ကပှ့ၤန့ၢ်သိလီၤ. ဒီးဖဲအလဲၤတၢ်အဖၢမုၢ်န့ၣ်, တလးမူးပိာ်ခွါဟဲတုၤဝဲလီၤ.
မုၣ်ကနီၤဖိလၢအသးဆးယဲၢ်ဂၤန့ၣ် အိၣ်ကတဲာ်ကတီၤအသးအဃိ
လဲၤနုာ်ဃုာ်ဒီးတလးမူးပိာ်ခွါဆူတၢ်ဖျီအမူးပူၤန့ၣ်လီၤ. ဒီးတြဲၤဘၣ်တၢ်ကးတံာ်ဃာ်အီၤလီၤ.
11 လၢခံ, မုၣ်ကနီၤအဂၤတဖၣ်ဟဲတုၤစ့ၢ်ကီးဝဲ, ဒီးကိးပသူထီၣ်ဝဲဒီး စံး, ‘ကစၢ်ဧၢ, ကစၢ်ဧၢ, ပျဲလဲၤနုာ်ပှၤတက့ၢ်.’
12 ဘၣ်ဆၣ်ဒီး, တလးမူးပိာ်ခွါစံးဆၢအဝဲသ့ၣ်, ‘တသ့လ့ၤတက့ၤဘၣ်. ယတသ့ၣ်ညါသုဘၣ်.’ ”
13 ဒီးယ့ၣ်ၡူးမၤကတၢၢ်က့ၤအတၢ်ကတိၤဒီးစံး, “ဆိးသီတက့ၢ်. အဂ့ၢ်ဒ်အံၤ, မုၢ်နံၤမ့ၢ်ဂ့ၤ, နၣ်ရံၣ်မ့ၢ်ဂ့ၤသုတသ့ၣ်ညါဘၣ်.
(လူၤကၣ် ၁၉:၁၁-၂၇)
14 တုၤနုၤတစု, မူခိၣ်အဘီအမုၢ်ကလီၤဂာ်ဒီးတၢ်အံၤလီၤ. တဘျီပှၤအိၣ်တဂၤလၢအသါကဟးထီၣ်လၢအဟံၣ်ဒီး လဲၤတၢ်လီၤ. အဝဲကိးန့ၢ်အခ့အပှၤတဖၣ်, ဒီးဟ့ၣ်လီၤအဝဲသ့ၣ်မူဒါလၢ
အကကွၢ်ထွဲအတၢ်ဖိတၢ်လံၤတဖၣ်လီၤ.
15 အဝဲဟ့ၣ်လီၤဝဲအခ့အပှၤတဖၣ်ဒ်အတၢ်သ့တၢ်ဘၣ်အိၣ်ဝဲအသိးလီၤ. အခီၣ်ထံးတဂၤန့ၣ်ဟ့ၣ်ဝဲယဲၢ်တၤလၣ်, လၢခံတဂၤန့ၣ်ဟ့ၣ်ဝဲခံတၤလၣ်, ဒီးအဂၤတဂၤန့ၣ်တတၤလၣ်လီၤ. တုၤနုၤတစုအဝဲဟးထီၣ်ဒီးလဲၤတၢ်လီၤ.
16 တၢ်အခ့အပှၤလၢအဒိးန့ၢ်စ့ယဲၢ်တၤလၣ်တဂၤန့ၣ်, လဲၤဒီးကၤတၢ်တဘျီဃီဒီးအဝဲမၤန့ၢ်အါထီၣ်စ့ယဲၢ်တၤလၣ်န့ၣ် လီၤ.
17 ပှၤလၢအဒိးန့ၢ်စ့ခံတၤလၣ်တဂၤန့ၣ်, မၤစ့ၢ်ကီးဝဲဒၣ်ဒ်န့ၣ်ဒီးဒိးန့ၢ်အါထီၣ်စ့ခံတၤလၣ်န့ၣ် လီၤ.
18 မ့မ့ၢ်ပှၤလၢအဒိးန့ၢ်စ့တတၤလၣ်တဂၤန့ၣ်, လဲၤဒီးခူၣ်န့ၢ်တၢ်ပူၤတပူၤလၢဟီၣ်ခိၣ်လာ်, ဒီးပာ်ခူသူၣ်အကစၢ်အစ့ဖဲန့ၣ်လီၤ.
19 ဆၢကတီၢ်ဖးယံာ်ဝံၤအလီၢ်ခံ, တၢ်အခ့အပှၤတဖၣ်အံၤအကစၢ်ဟဲက့ၤ, ဒီးသုးကျဲၤမၤဘၣ်လိာ်ဘၣ်စးက့ၤအစ့စရီလၢအခ့အပှၤတဖၣ် လီၤ.
20 တၢ်အခ့အပှၤလၢအဒိးန့ၢ်ဘၣ်စ့ယဲၢ်တၤလၣ်တဂၤဟဲဆူအကစၢ် အအိၣ်စိာ်ဃုာ်ဒီးအစ့အဂၤယဲၢ်တၤလၣ်လၢအမၤန့ၢ်အါထီၣ်ဝဲဒီးဟ့ၣ်
လီၤဝဲဆူအကစၢ်အစုပူၤဒီးစံး, ‘ကစၢ်ဧၢ, နဟ့ၣ်တ့ၢ်ယၤစ့ယဲၢ်တၤလၣ်လီၤ.
အအံၤမ့ၢ်အဂၤယဲၢ်တၤလၣ်လၢယမၤအါထီၣ်န့ၣ်လီၤ.’
21 အကစၢ်စံးဘၣ်အီၤ, ‘နမၤတၢ်ဂ့ၤမးလီၤ. တၢ်အခ့အပှၤလၢအဂ့ၤဒီးအကလုၢ်တီတဂၤဧၢ, နကလုၢ်တီလၢတၢ်ပၢၤဘၣ်တၢ်အဆံးအစှၤအပူၤအဃိ ယကပာ်နၤလၢတၢ်ပၢၤဘၣ်တၢ်အဒိၣ်အအါအလီၢ်လီၤ. ဟဲနုာ်ဒီးသးခုဃုာ်ဒီးယၤတက့ၢ်.’
22 တၢ်အခ့အပှၤလၢအဒိးန့ၢ်စ့ခံတၤလၣ်တဂၤစ့ၢ်ကီးဟဲဝဲဒီး စံး, ‘ကစၢ်ဧၢ, နဟ့ၣ်ယၤစ့ခံတၤလၣ်လီၤ. အအံၤတခီမ့ၢ်စ့အဂၤခံတၤလၣ်လၢယမၤအါထီၣ်န့ၣ်လီၤ.’
23 အကစၢ်စံးဘၣ်အီၤ, ‘နမၤတၢ်ဂ့ၤမးလီၤ. တၢ်အခ့အပှၤလၢအဂ့ၤဒီးအကလုၢ်တီတဂၤဧၢ, နကလုၢ်တီလၢတၢ်ပၢၤဘၣ်တၢ်အဆံးအစှၤအပူၤအဃိ ယကပာ်နၤလၢတၢ်ပၢၤဘၣ်တၢ်အဒိၣ်အအါအလီၢ်လီၤ.
ဟဲနုာ်ဒီးသးခုဃုာ်ဒီးယၤတက့ၢ်.’
24 တၢ်အခ့အပှၤလၢအဒိးန့ၢ်စ့တတၤလၣ်တဂၤစ့ၢ်ကီး ဟဲဝဲဒီးစံး, ‘ကစၢ်ဧၢ, ယသ့ၣ်ညါလၢနမ့ၢ်ပှၤလၢအကီတဂၤလီၤ.
နကူးအီၣ်တၤသူတၤသၣ်ဖဲနတသူၣ်လီၤဖျးလီၤဘၣ်တၢ်အလီၢ်,
ဒီးနထၢဖှိၣ်က့ၤတၢ်ဖဲနတဖှံလီၤတၢ်အချံအလီၢ်န့ၣ်လီၤ.
25 လၢတၢ်န့ၣ်အဃိယပျံၤတၢ်, ဒီးလဲၤပာ်ခူသူၣ်နစ့အံၤလၢဟီၣ်ခိၣ် လာ်လီၤ. ကွၢ်အအံၤမ့ၢ်တၢ်လၢအမ့ၢ်နတၢ်ဒၣ်နဲလီၤ.’
26 ဘၣ်ဆၣ်အကစၢ်စံးဆၢတၢ်ဒီးစံး, ‘တၢ်အခ့အပှၤလၢအအၢဒီးအကၢၣ်မးတဂၤဧၢ, လၢယမ့ၢ်ပှၤလၢအကူးအီၣ်က့ၤတၢ်လၢယတသူၣ်တၢ်အလီၢ်, ဒီးထၢဖှိၣ်က့ၤတၢ်လၢယတဖှံလီၤတၢ်အလီၢ်န့ၣ်, နသ့ၣ်ညါကစီဒီမးလဲၣ်.
27 မ့မ့ၢ်ဒ်န့ၣ်ဒီး, ကြၢးမးလၢနလဲၤပာ်ယစ့လၢစ့တၢးအပူၤလီၤ. ဒီးတုၤယဟဲက့ၤအဆၢကတီၢ်န့ၣ်, ယကဒိးန့ၢ်ဘၣ်က့ၤယစ့ဃုာ်ဒီးအအ့ၣ်ခဲလၢာ်လီၤ.
28 ခဲအံၤ, ဟံးန့ၢ်စ့လၢအအိၣ်ဒီးပှၤတဂၤအံၤ, ဒီးဟ့ၣ်လီၤအီၤဆူပှၤလၢအစ့အိၣ်အတၤလၣ်တဆံတဂၤအစုပူၤ တက့ၢ်.
29 အဂ့ၢ်ဒ်အံၤ, ပှၤလၢအတၢ်အိၣ်တဖၣ်တၢ်ကဟ့ၣ်အါထီၣ် အီၤတၢ်ကိးဂၤဒဲး, ဒီးအတၢ်ကအိၣ်အါအါကလဲာ်လီၤ.
ဘၣ်ဆၣ်ဒီး, ပှၤလၢအတၢ်တအိၣ်ဘၣ်တဂၤန့ၣ်, တၢ်တစဲးဖိလၢအအိၣ်ဒီးအီၤဒၣ်လဲာ်ကဘၣ်တၢ်ဟံးန့ၢ်ကွံာ်လၢ
အအိၣ်လီၤ.
30 မ့မ့ၢ်တၢ်အခ့အပှၤလၢအဘျုးတအိၣ်တဂၤအံၤ, ဟီထီၣ်ကွံာ်အီၤဆူတၢ်ချၢလၢတၢ်ခံးကျါတက့ၢ်. ဖဲန့ၣ်ကဟီၣ်ကယၢၤတၢ် ဒီးကအ့ၣ်စဃံးအမဲလီၤ.’
31 တုၤပှၤကညီဖိခွါဟဲဝဲအိၣ်ဒီးအလၤကပီၤဒ်စီၤပၤတဂၤအသိး ဃုာ်ဒီးအကလူးခဲလၢာ်န့ၣ်, ကဆ့ၣ်နီၤဝဲလၢအလီၢ်ပစိာ်ကဟုကညီၢ်တဖျၢၣ်အဖီခိၣ်,
32 ဒီးပှၤကလုာ်ခဲလၢာ်ကအိၣ်ဖှိၣ်ရိဖှိၣ်လၢအဝဲအမဲာ်ညါလီၤ. တုၤနုၤတစုအဝဲကနီၤဖးလီၤအဝဲသ့ၣ်ခံဖု, ဒ်ပှၤကွၢ်သိတဂၤနီၤဖးအသိဒီးမဲာ်တဲးလဲးတဖၣ်အသိး န့ၣ်လီၤ.
33 ဒီးကပာ်သိတဖၣ်လၢအစုထွဲတခီ, မ့မ့ၢ်မဲာ်တဲးလဲးတဖၣ် လၢအစုစ့ၣ်တခီလီၤ.
34 တုၤနုၤတစု, စီၤပၤကစံးဘၣ်ပှၤအိၣ်လၢအစုထွဲတဖၣ်ဒ်အံၤ, ‘ဟဲ, သုလၢအဘၣ်ဆိၣ်ဂ့ၤလၢယပၢ်သ့ၣ်ဧၢ, ဟဲဒီးန့ၢ်သါဘၣ်ဘီမုၢ်လၢအဘၣ်တၢ်ကတဲာ်ကတီၤပာ်န့ၢ်လၢသု ဂီၢ်, စးထီၣ်လၢဟီၣ်ခိၣ်ဘၣ်တၢ်တ့လီၤအီၤလံၤလံၤန့ၣ်တက့ၢ်.
35 အဂ့ၢ်ဒ်အံၤ, တၢ်သၣ်ဝံၤယသးဒီးသုဟ့ၣ်အီၣ်ဟ့ၣ်အီယၤ, တၢ်သူယသးလၢထံဒီးသုဒုးအီယၤ, ယမ့ၢ်ပှၤသမှံၤတဂၤဒီးသုတူၢ်လိာ်ယၤလၢသုဟံၣ်သုဃီတဖၣ် အပူၤ,
36 ယအိၣ်ဘ့ၣ်ဆ့ဒီးသုဒုးကူဒုးသိးယၤ, ယဘၣ်ဆူးဘၣ်ဆါဒီးသုအံးက့ၤကွၢ်က့ၤယၤ, ယအိၣ်လၢဃိာ်ပူၤဒီးသုဟဲအိၣ်သကိးယၤလီၤ.’
37 တုၤနုၤတစု, ပှၤအတီအလိၤတဖၣ်ကစံးဆၢအီၤ, ‘ကစၢ်ဧၢ, မ့ၢ်ပထံၣ်ဘၣ်တၢ်သၣ်ဝံၤနသးဒီးပဟ့ၣ်အီၣ်ဟ့ၣ်အီနၤမ့ၢ်ဂ့ၤ, တၢ်သူနသးလၢထံဒီးပဒုးအီနၤမ့ၢ်ဂ့ၤအခါဖဲလဲၣ်.
38 မ့ၢ်ပထံၣ်ဘၣ်နမ့ၢ်ပှၤသမှံၤတဂၤဒီးတူၢ်လိာ်နၤလၢပဟံၣ် တဖၣ်အပူၤမ့ၢ်ဂ့ၤ, နအိၣ်ဘ့ၣ်ဆ့ဒီးပဒုးကူဒုးသိးနၤမ့ၢ်ဂ့ၤအခါဖဲလဲၣ်.
39 မ့ၢ်ပထံၣ်ဘၣ်နၤလၢနဘၣ်ဆူးဘၣ်ဆါမ့ၢ်ဂ့ၤ, အိၣ်လၢဃိာ်ပူၤမ့ၢ်ဂ့ၤဒီး လဲၤအိၣ်သကိးနၤအခါဖဲလဲၣ်.’
40 စီၤပၤကစံးဆၢက့ၤအဝဲသ့ၣ်, ‘ယစံးဘၣ်တဲဘၣ်သုတီတီ, တဘျီလၢ်လၢ်ဖဲသုမၤဘၣ်တၢ်အံၤလၢပှၤအဆံးကတၢၢ်လၢယဒီပုၢ် ဝဲၢ်တဖၣ်အံၤအကျါတဂၤဂၤဒီးမ့ၢ်သုမၤဘၣ်ယၤန့ၣ်လီၤ.’
41 တုၤနုၤတစု, စီၤပၤကစံးဘၣ်ပှၤအိၣ်လၢအစုစ့ၣ်တဖၣ်ဒ်အံၤ, ‘ဟးဖးဒီးယၤတက့ၢ်. ပှၤလၢအဘၣ်ကစၢ်ယွၤအတၢ်ဆိၣ်အၢသ့ၣ်ဧၢ, လဲၤနုာ်ဆူမ့ၣ်အူလၢအတလီၤပံာ်ဘၣ်နီတဘျီဘၣ်, လၢအဘၣ်တၢ်ကတဲာ်ကတီၤပာ်စၢၤလၢမုၣ်ကီၤလံၢ်ဒီးအကလူးတဖၣ် အဂီၢ်, အပူၤန့ၣ်တက့ၢ်.
42 တၢ်သၣ်ဝံၤယသးဘၣ်ဆၣ်သုတဟ့ၣ်အီၣ်ဟ့ၣ်အီယၤဘၣ်. တၢ်သူယသးလၢထံဘၣ်ဆၣ်သုတဒုးအီယၤဘၣ်.
43 ယမ့ၢ်ပှၤသမှံၤဘၣ်ဆၣ် သုတတူၢ်လိာ်ယၤလၢသုဟံၣ်သုဃီဘၣ်. ယအိၣ်ဘ့ၣ်ဆ့ဘၣ်ဆၣ်သုတဒုးကူဒုးသိးယၤဘၣ်. ယဘၣ်ဆူးဘၣ်ဆါဒီးအိၣ်လၢဃိာ်ပူၤဘၣ်ဆၣ်သု
တအံးက့ၤကွၢ်က့ၤယၤဘၣ်.’
44 တုၤနုၤတစုအဝဲသ့ၣ်စံးဆၢက့ၤစီၤပၤဒီးစံး, ‘ကစၢ်ဧၢ, မ့ၢ်ပထံၣ်ဘၣ်တၢ်သၣ်ဝံၤနသးမ့ၢ်ဂ့ၤ, တၢ်သူနသးလၢထံမ့ၢ်ဂ့ၤ, နမ့ၢ်ပှၤသမှံၤမ့ၢ်ဂ့ၤ, နအိၣ်ဘ့ၣ်ဆ့မ့ၢ်ဂ့ၤ, နဆူးနဆါမ့ၢ်ဂ့ၤ,
နအိၣ်လၢဃိာ်ပူၤမ့ၢ်ဂ့ၤဒီးပတမၤစၢၤဘၣ်နၤန့ၣ်, မ့ၢ်အခါဖဲလဲၣ်.’
45 စီၤပၤကစံးဆၢတၢ်ဒီးစံး, ‘ယစံးဘၣ်တဲဘၣ်သုတီတီ, တဘျီလၢ်လၢ်ဖဲသုတမၤစၢၤဘၣ်ပှၤအဆံးကတၢၢ်လၢယဒီပုၢ်ဝဲၢ်
အကျါတဂၤဂၤန့ၣ်, မ့ၢ်သုတမၤစၢၤဘၣ်ယၤန့ၣ်လီၤ.’
46 တုၤနုၤတစု, ပှၤတဖၣ်အံၤကလဲၤနုာ်ဆူတၢ်စံၣ်ညီၣ်အထူ အယိာ်အပူၤ, မ့မ့ၢ်ပှၤအတီအလိၤတဖၣ်ကလဲၤနုာ်ဆူ
တၢ်မူအထူအယိာ်အပူၤလီၤ.”