19
(မၢ်ကူး ၁၀:၁-၁၂)
1 တုၤယ့ၣ်ၡူးစံးတၢ်တဖၣ်အံၤဝံၤဒီး, ဟးထီၣ်ကွံာ်ဝဲလၢကီၢ်ကၤလံၤလါ, ဒီးလဲၤနုာ်ဝဲဆူကီၢ်ယူဒၤလၢအအိၣ်လၢယၢ်ဒ့ၣ်အဝၢ်ဘးခီအပူၤ
န့ၣ်လီၤ.
2 ဒီးပှၤဂီၢ်မုၢ်ဖးဒိၣ်တဖၣ်ပိာ်ထီၣ်အခံ, ဒီးအဝဲဒၣ်မၤဘျါက့ၤအဝဲသ့ၣ်ဖဲန့ၣ်လီၤ.
3 ပှၤဖၤရံၤၡဲတနီၤဟဲဆူအအိၣ်, ဒီးဒ်သိးအကမၤကွၢ်အီၤအဂီၢ်န့ၣ်, သံကွၢ်တၢ်ဒီးစံးဝဲ, “မ့ၢ်ပတၢ်သိၣ်တၢ်သီဟ့ၣ်ပှၤကညီတၢ်ပျဲလၢအကပာ်မၢ်
အမါလၢတၢ်ဂ့ၢ်တမံၤဂ့ၤတမံၤဂ့ၤအဃိဧါ.”
4 ယ့ၣ်ၡူးစံးဆၢဝဲ, “ပှၤလၢအတ့လီၤပှၤကညီလၢအခီၣ်ထံးလံၤလံၤန့ၣ်, တ့လီၤအီၤပိာ်ခွါဒီးပိာ်မုၣ်န့ၣ်, မ့ၢ်သုတဖးဘၣ်ဘၣ်ဧါ.
5 ဒီးကစၢ်ယွၤစံးဝဲ, ‘လၢတၢ်န့ၣ်အဃိ, ပိာ်ခွါကဟးသဒၣ်ကွံာ်အမိၢ်ဒီးအပၢ်, ဒီးကဘျုးအသးဒီးအမါ,
ဒီးတၢ်လၢပှၤခံဂၤန့ၣ်ကကဲထီၣ်တၢ်တသွံၣ်ဃီတညၣ်ဃီလီၤ’
(ကဲထီၣ်.၂:၂၄).
6 မၤသးဒ်န့ၣ်ဒီး, အဝဲသ့ၣ်တမ့ၢ်လၢၤပှၤခံဂၤဘၣ်, မ့ၢ်တသွံၣ်ဃီတညၣ်ဃီလီၤ. လၢတၢ်န့ၣ်အဃိ,
တၢ်လၢကစၢ်ယွၤပာ်ဃုာ်ဝဲန့ၣ်, မ်ပှၤကညီသုတထုးဖှၣ်တဂ့ၤ.”
7 ပှၤဖၤရံၤၡဲတဖၣ်စံးဘၣ်အီၤ, “မ့မ့ၢ်ဒ်န့ၣ်ဒီး, ဘၣ်မနုၤစီၤမိၤၡ့ဟ့ၣ်တၢ်သိၣ်တၢ်သီလၢပှၤပိာ်ခွါကဟ့ၣ်
အမါလၢလံာ်လီၤဖှၣ်ဒီးကပာ်မၢ်အီၤန့ၣ်လဲၣ်.”
8 ယ့ၣ်ၡူးစံးဆၢအဝဲသ့ၣ်, “မ့ၢ်လၢပှၤသိၣ်က့ၤသီက့ၤသုကီဒိၣ်မးအဃိ, စီၤမိၤၡ့ဟ့ၣ်သုတၢ်ပျဲလၢသုကပာ်မၢ်သုမါလီၤ. ဘၣ်ဆၣ်ဒီး လၢယွၤတ့လီၤသီတၢ်အခီၣ်ထံးန့ၣ်, တမ့ၢ်ဘၣ်ဒ်န့ၣ်အသိးဘၣ်.
9 ဒီးယစံးဘၣ်သု, ပှၤတဂၤလၢ်လၢ်လၢအပာ်မၢ်ကွံာ်အမါလၢ အတမ့ၢ်ဘၣ်တၢ်အဲၣ်ဘၢဝၤအဃိ, ဝံၤအိၣ်ဃုာ်ဒီးပိာ်မုၣ်အဂၤတဂၤန့ၣ်,
မ့ၢ်ပှၤလၢအအဲၣ်ဘၢအမါလီၤ. (ဒီးပှၤလၢအအိၣ်ဃုာ်ဒီးပိာ်မုၣ်
လၢအဘၣ်တၢ်ပာ်မၢ်ကွံာ်အီၤန့ၣ်မၤကမၣ်ပှၤအမါလီၤ.)”
10 အပျဲၢ်အဘီၣ်တဖၣ်စံးဘၣ်အီၤ, “တၢ်မ့မ့ၢ်ဒ်အံၤလၢဝၤဒီးမါအဘၢၣ်စၢၤဒီး, ပှၤတဂ့ၤန့ၢ်မါန့ၢ်ဝၤဘၣ်လီၤ.”
11 ယ့ၣ်ၡူးစံးဆၢအဝဲသ့ၣ်, “တၢ်သိၣ်လီၤသီလီၤအံၤပှၤတူၢ်လိာ်တသ့ဘၣ်ခဲလၢာ်ဘၣ်. ပှၤတူၢ်လိာ်သ့ဒၣ်ထဲပှၤလၢကစၢ်ယွၤဟ့ၣ်လီၤအီၤတဖၣ်ဧိၤလီၤ.
12 အဂ့ၢ်ဒ်အံၤ, ပှၤတနီၤမ့ၢ်ပှၤဒ့ဒံၣ်ဖိလၢအမိၢ်အဟၢဖၢပူၤလံၤလံၤ, ဒီးပှၤတနီၤဘၣ်တၢ်ဒုးကဲထီၣ်အီၤလၢပှၤဒ့ဒံၣ်ဖိလၢပှၤကညီအစုပူၤ, ဒီးပှၤတနီၤဒုးကဲထီၣ်လီၤက့ၤအသးလၢပှၤဒ့ဒံၣ်ဖိလၢမူခိၣ် အဘီအမုၢ်အဃိလီၤ. ပှၤလၢအတူၢ်လိာ်တၢ်အံၤသ့န့ၣ်မ်အတူၢ်လိာ်ဒၣ်ဝဲတက့ၢ်.”
(မၢ်ကူး ၁၀:၁၃-၁၆; လူၤကၣ် ၁၈:၁၅-၁၇)
13 ပှၤတနီၤဟဲဆှၢဖိသၣ်တဖၣ်ဆူအအိၣ်, ဒ်သိးအကပာ်ထီၣ်အစုလၢ အလိၤ, ဒီးကဃ့ဘါထုကဖၣ်လၢအဂီၢ်လီၤ. ဘၣ်ဆၣ်အပျဲၢ်အဘီၣ်တဖၣ်ဒူပှၤတဖၣ်န့ၣ်အလိၤလီၤ.
14 ယ့ၣ်ၡူးစံးဝဲ, “ပျဲဖိသၣ်တဖၣ်န့ၣ်ဟဲဆူယအိၣ်တက့ၢ်. ဒီးတြီအီၤ တဂ့ၤ. အဂ့ၢ်ဒ်အံၤ မူခိၣ်အဘီအမုၢ်ဘၣ်ဃးဒီးပှၤဒ်ဖိသၣ်တဖၣ်အံၤ
အသိးန့ၣ်လီၤ.”
15 ဒီးအဝဲပာ်ထီၣ်အစုလၢအဝဲသ့ၣ်အလိၤ, ဝံၤဒီးဟးထီၣ်ကွံာ်ဝဲဖဲန့ၣ်လီၤ.
(မၢ်ကူး ၁၀:၁၇-၃၁; လူၤကၣ် ၁၈:၁၈-၃၀)
16 ဘၣ်တဘျီပှၤတဂၤဟဲဆူယ့ၣ်ၡူးအအိၣ်ဒီးစံးဝဲ, “သရၣ်ဧၢ, ဒ်သိးယကဒိးန့ၢ်ဘၣ်တၢ်မူအထူအယိာ်န့ၣ်, ယကဘၣ်မၤတၢ်ဂ့ၤမနုၤတမံၤလဲၣ်.”
17 ယ့ၣ်ၡူးစံးဆၢအီၤ, “ဘၣ်မနုၤလၢနသံကွၢ်ယၤဘၣ်ဃးဒီးတၢ်ဂ့ၤန့ၣ်လဲၣ်. ပှၤအဂ့ၤအိၣ်ဒၣ်ထဲယွၤတဂၤဧိၤလီၤ. နမ့ၢ်အဲၣ်ဒိးလဲၤနုာ်လီၤဆူတၢ်မူအထူအယိာ်အပူၤဒီး, တိၢ်န့ၢ်တၢ်မၤလိာ်တဖၣ်န့ၣ်တက့ၢ်.”
18 အဝဲသံကွၢ်တၢ်ဒီးစံး, “တၢ်မၤလိာ်မနုၤတဖၣ်လဲၣ်.”
ဒီးယ့ၣ်ၡူးစံးဆၢအီၤ, “မၤသံပှၤကညီတဂ့ၤ. အဲၣ်ဘၢမါအဲၣ်ဘၢဝၤတဂ့ၤ. ဟုၣ်တၢ်တဂ့ၤ. အုၣ်နသးကဘျံးကဘျၣ်တဂ့ၤ.
19 ယူးယီၣ်နမိၢ်ဒီးနပၢ်တက့ၢ်. ဒီးအဲၣ်ပှၤလၢနဃၢၤဒ်နအဲၣ်လီၤနသးဒၣ်နဲ အသိးန့ၣ်တက့ၢ်”
(ဟးထီၣ်.၂၀:၁၂-၁၆).
20 ဒီးပှၤဖိၣ်သၣ်ခွါန့ၣ်စံးဘၣ်ယ့ၣ်ၡူး, “တၢ်မၤလိာ်တဖၣ်အံၤ, ယတိၢ်န့ၢ်ဒီးမူထွဲအီၤခဲလၢာ်လံ. မ့ၢ်ယကဘၣ်မၤဒံးတၢ်အဂၤမနုၤလဲၣ်.”
21 ယ့ၣ်ၡူးစံးဘၣ်အီၤ, “နမ့ၢ်သးအိၣ်လၢနကလၢထီၣ်ပှဲၤထီၣ်န့ၣ်, လဲၤဒီးဆါလီၤကွံာ်တၢ်လၢအအိၣ်ဒီးနၤခဲလၢာ်, ဒီးဟ့ၣ်လီၤနကျိၣ်နစ့ဆူပှၤဖှီၣ်ဖိယာ်ဖိတက့ၢ်. တုၤနုၤတစု နကအိၣ်ဒီးတၢ်ထူးတၢ်တီၤလၢမူခိၣ်လီၤ. အန့ၣ်ဝံၤ, ဟဲဒီးကဲဘၣ်ယပျဲၢ်ယဘီၣ်တက့ၢ်.”
22 တုၤပှၤဖိၣ်သၣ်ခွါနၢ်ဟူတၢ်ကတိၤအံၤဒီး, ဟးထီၣ်ကွံာ်ဝဲလၢတၢ်သးအုးအပူၤလီၤ. အဂ့ၢ်ဒ်အံၤ, အဝဲအိၣ်ဒီးတၢ်ထူးတၢ်တီၤအါအါကလဲာ်လီၤ.
23 တုၤနုၤတစု, ယ့ၣ်ၡူးစံးဘၣ်အပျဲၢ်အဘီၣ်တဖၣ်, “နာ်ယၤတက့ၢ်. ယစံးဘၣ်သု, ပှၤထူးပှၤတီၤကလဲၤနုာ်ဆူမူခိၣ်အဘီအမုၢ်ပူၤန့ၣ်, မ့ၢ်တၢ်ကီဒိၣ်မးလီၤ.
24 ယစံးဘၣ်ကဒီးသု, ကီၤလၤအူးတဒုဝၣ်ဖျိထးအမဲၢ်ခံန့ၣ်, ညီဒိၣ်န့ၢ်ဒံးပှၤထူးပှၤတီၤတဂၤကလဲၤနုာ်ဆူမူခိၣ်ဘီမုၢ် အပူၤတက့ၢ်လီၤ.”
25 တုၤအပျဲၢ်အဘီၣ်တဖၣ်နၢ်ဟူတၢ်ကတိၤအံၤဒီး, ကမၢကမၣ်ဝဲဒိၣ်ဒိၣ်ကလဲာ်, ဒီးသံကွၢ်တၢ်ဒီးစံးဝဲ, “မ့မ့ၢ်ဒ်န့ၣ်ဒီးမ့ၢ်မတၤဒိးန့ၢ်ဘၣ်တၢ်အုၣ်က့ၤခီၣ်က့ၤ ကသ့တဂၤလဲၣ်.”
26 ယ့ၣ်ၡူးကွၢ်အဝဲသ့ၣ်လိၤလိၤဒီးစံး, “လၢပှၤကညီအဂီၢ်တၢ်အံၤမ့ၢ်တၢ်လၢအမၤအသးတသ့ဘၣ်လီၤ. ဘၣ်ဆၣ်လၢကစၢ်ယွၤအဂီၢ်န့ၣ်တၢ်ခဲလၢာ်မၤအသးသ့ဝဲလီၤ.”
27 တုၤနုၤတစု စီၤပ့းတရူးကတိၤထီၣ်တၢ်ဒီးစံးဝဲ, “ပဝဲဒၣ်အံၤပပာ်တ့ၢ်တၢ်ခဲလၢာ်, ဒီးပပိာ်တ့ၢ်နခံလံ, မ့ၢ်ပကဒိးန့ၢ်ဘၣ်တၢ်မနုၤလဲၣ်.”
28 ယ့ၣ်ၡူးစံးဘၣ်အဝဲသ့ၣ်, “နာ်ယၤတက့ၢ်. လၢစိၤအသီအပူၤ, ဖဲပှၤကညီဖိခွါကဆ့ၣ်နီၤလၢအလီၢ်ပစိာ်လၢအအိၣ်ဒီး အလၤကပီၤအဖီခိၣ်န့ၣ်, သုဝဲလၢအပိာ်တ့ၢ်ယခံတဖၣ်, သုကဆ့ၣ်နီၤလၢလီၢ်ပစိာ်တဆံခံဖျၢၣ်အဖီခိၣ်, ဒီးပၢဘၣ်ပှၤအံၣ်စရ့လးဖိတဆံခံဒူၣ်န့ၣ်လီၤ.
29 ဒီးပှၤတဂၤလၢ်လၢ်လၢအပာ်တ့ၢ်အဟံၣ်တဖၣ်မ့ၢ်ဂ့ၤ, အဒီပုၢ်ဝဲၢ်ခွါမ့ၢ်ဂ့ၤ, အဒီပုၢ်ဝဲၢ်မုၣ်မ့ၢ်ဂ့ၤ, အပၢ်မ့ၢ်ဂ့ၤ, အမိၢ်မ့ၢ်ဂ့ၤ, အဖိအလံၤမ့ၢ်ဂ့ၤ, အဟီၣ်ခိၣ်မ့ၢ်ဂ့ၤ, လၢယမံၤအဃိန့ၣ်, ကဒိးန့ၢ်အါထီၣ်က့ၤဝဲအစးတကယၤဒီးကန့ၢ်သါဘၣ်တၢ်မူအထူ
အယိာ်လီၤ.
30 ဘၣ်ဆၣ်ဒီး, ပှၤအိၣ်ဝဲလၢညါကတၢၢ်ခဲအံၤအါဂၤ, ကအိၣ်က့ၤလၢခံကတၢၢ်, ဒီးပှၤအိၣ်လၢခံကတၢၢ်ခဲအံၤအါဂၤ, ကအိၣ်က့ၤလၢညါကတၢၢ်လီၤ.