16
(မၢ်ကူး ၈:၁၁-၁၃; လူၤကၣ် ၁၂:၅၄-၅၆)
1 ဒီးပှၤဖၤရံၤၡဲ ဒီးပှၤစးဒူၤကဲနီၤဟဲဆူယ့ၣ်ၡူးအအိၣ်, ဒီးဒ်သိးကမၤကွၢ်အီၤအဂီၢ်န့ၣ်, မၢအဒုးနဲၣ်အဝဲသ့ၣ်လၢတၢ်လီၤလးတမံၤလၢအဟဲလီၤလၢမူခိၣ်တ
ခီ, ဒ်သိးကဒုးနဲၣ်အဝဲသ့ၣ်လၢကစၢ်ယွၤဘၣ်အသးလီၤဆီလၢအီၤအဂီၢ်လီၤ.
2 အဝဲစံးဆၢအဝဲသ့ၣ်, “တုၤမုၢ်ဟါလီၤဒီး မူကပိာ်လိၤဂီၤဝဲန့ၣ်သုစံးလၢ, လၢခံတနံၤတၢ်ကယီၤ ဒီးမူခိၣ်ကကဆှဲကဆှီလီၤ.
3 တုၤမုၢ်ဆ့ၣ်ထီၣ်ဂီၤဂီၤတခီ, မူကပိာ်လိၤမ့ၢ်ဂီၤဒီးတၢ်အၢၣ်မ့ၢ်ခံးသူဝဲန့ၣ်, သုစံးလၢတနံၤအံၤ ကလံၤမုၢ်ကလီၤဝဲလီၤ. သုကွၢ်မူကပိာ်လိၤ,
ဒီးဖးမူခိၣ်ကလံၤသီၣ်ဂီၤသ့မးလီၤ. ဘၣ်ဆၣ်တၢ်အပနီၣ်ဘၣ်ဃးဒီးတၢ်လၢအကမၤအသးတဖၣ်န့ၣ်,
သုဖးတသ့ဘၣ်.
4 ပှၤတစိၤလၢအအၢအသီဒီးအကလုၢ်တတီဒီးယွၤတဖၣ်ဃ့တၢ်လီၤလး, ဘၣ်ဆၣ်ဒီးတၢ်လီၤလးအဂၤတဘၣ်တၢ်ဟ့ၣ်လီၤအီၤဘၣ်. ကဘၣ်တၢ်ဟ့ၣ်လီၤအီၤထဲစီၤယိၤနါအတၢ်လီၤလးတမံၤဧိၤလီၤ.”
စံးတၢ်န့ၣ်ဝံၤဒီးဟးဖးဒီးအဝဲသ့ၣ်လီၤ.
(မၢ်ကူး ၈:၁၄-၂၁)
5 ဖဲယ့ၣ်ၡူးဒီးအပျဲၢ်အဘီၣ်တဖၣ်လဲၤခီဂာ်ဝဲဆူဝၢ်ဘးခီန့ၣ်, သးပ့ၤနီၣ်လဲၤစိာ်ဃုာ်ကိၣ်လီၤ.
6 ယ့ၣ်ၡူးစံးဘၣ်အဝဲသ့ၣ်, “ပလီၢ်ပဒီသုသးလၢ ပှၤဖၤရံၤၡဲဒီးပှၤစးဒူၤကဲအကိၣ်မံၣ်တက့ၢ်.”
7 ဒီးအဝဲသ့ၣ်ကတိၤလိာ်အသးသကိးသကိးဒီးစံး, “အဝဲစံးတၢ်အံၤမ့ၢ်လၢပတဟဲစိာ်ဘၣ်ကိၣ်အဃိလီၤ.”
8 ယ့ၣ်ၡူးသ့ၣ်ညါဆိတၢ်လၢအဝဲသ့ၣ်ကတိၤသကိးဒီးစံး, “သုနာ်တၢ်စှၤမးလဲၣ်. ဘၣ်မနုၤလၢသုကတိၤသကိးဘၣ်ဃးဒီးသုကိၣ်တအိၣ်ဘၣ်
အဂ့ၢ်န့ၣ်လဲၣ်.
9 သုတနၢ်ပၢၢ်ဒံးဘၣ်ဧါ. မ့ၢ်သုတသ့ၣ်နီၣ်ထီၣ်ကိၣ်ယဲၢ်ဖျၢၣ်လၢပှၤယဲၢ် ကထိအဂီၢ်, ဒီးသုထၢဖှိၣ်က့ၤတၢ်အဘျဲၣ်အစဲၢ်န့ၢ်ကုပှံၤဒုအဂ့ၢ်န့ၣ်ဘၣ်ဧါ.
10 မၤကဒီးကိၣ်နွံဖျၢၣ်လၢပှၤလွံၢ်ကထိအဂီၢ်, ဒီးသုထၢဖှိၣ်က့ၤတၢ်အဘျဲၣ်အစဲၢ် န့ၢ်ကုပှံၤဒုလဲၣ်န့ၣ်, မ့ၢ်သုတသ့ၣ်နီၣ်ထီၣ်ဘၣ်ဧါ.
11 ဖဲယစံးဘၣ်သု, ပလီၢ်သုသးလၢပှၤဖၤရံၤၡဲဒီး ပှၤစးဒူၤကဲအကိၣ်မံၣ်န့ၣ်, ယတကတိၤတၢ်ဘၣ်ဃးဒီးကိၣ်ဘၣ်န့ၣ်,
ဘၣ်မနုၤလၢသုတနၢ်ပၢၢ်ဘၣ်လဲၣ်.”
12 တုၤနုၤတစုအပျဲၢ်အဘီၣ်တဖၣ်နၢ်ပၢၢ်ဝဲလၢ, တၢ်လၢယ့ၣ်ၡူးတဲပလီၢ်အဝဲသ့ၣ်လၢအကတဒီတဒါအသးန့ၣ်,
တမ့ၢ်ဘၣ်ကိၣ်မံၣ်လၢတၢ်သူအီၤပှၤမၤကိၣ်န့ၣ်ဘၣ်. မ့မ့ၢ်,
မ့ၢ်လၢပှၤဖၤရံၤၡဲဒီးပှၤစးဒူၤကဲတဖၣ်အတၢ်သိၣ်လီၤသီလီၤန့ၣ်လီၤ.
(မၢ်ကူး ၈:၂၇-၃၀; လူၤကၣ် ၉:၁၈-၂၁)
13 တုၤယ့ၣ်ၡူးဒီးအပျဲၢ်အဘီၣ်တဖၣ်လဲၤတုၤဝဲဆူဝ့ၢ်ဖံလံးပံၤ ကဲၤစါရံၤအခိၣ်အဃၢၤဒီး, အဝဲသံကွၢ်အပျဲၢ်အဘီၣ်ဒီးစံးဝဲဒၣ်, “ပှၤစံးလၢပှၤကညီဖိခွါအံၤမ့ၢ်မတၤတဂၤလဲၣ်.”
14 ဒီးအဝဲသ့ၣ်စံးဝဲဒၣ်, “ပှၤတနီၤစံးလၢနမ့ၢ်ပှၤဘျၢတၢ်စီၤယိၤဟၣ်, တနီၤစံးလၢစီၤအ့ၤလံယၤ, ဒီးအဂၤတနီၤစံးဝဲမ့ၢ်စီၤယံးရမံယၤ, မ့တမ့ၢ်ဘၣ်ဒီးဝံအဂၤတဂၤဂၤလီၤ.”
15 ယ့ၣ်ၡူးသံကွၢ်အဝဲသ့ၣ်, “မ့မ့ၢ်သုဝဲသုစံးလၢယမ့ၢ်မတၤတဂၤလဲၣ်.”
16 စီၤၡံမိၣ်ပ့းတရူးစံးဆၢဝဲ, “နမ့ၢ်ခရံာ်, ကစၢ်ယွၤလၢအမူဝဲတဂၤအဖိခွါလီၤ.”
17 ယ့ၣ်ၡူးစံးဆၢအီၤ, “စီၤယိၤနါအဖိခွါစီၤၡံမိၣ်ဧၢ, နဘၣ်ဆိၣ်ဂ့ၤနီၢ်နီၢ်လီၤ. အဂ့ၢ်ဒ်အံၤ, တၢ်သ့ၣ်ညါအံၤတဟဲလၢပှၤကညီအအိၣ်ဘၣ်. မ့မ့ၢ်, ဘၣ်တၢ်လီၣ်ဖျါထီၣ်န့ၢ်နၤလၢယပၢ်လၢအအိၣ်လၢမူခိၣ်န့ၣ်လီၤ.
18 ဒီးယဲဒၣ်အံၤယစံးလၢနမ့ၢ်ပ့းတရူး, လၢၢ်တဖျၢၣ်, ဒီးလၢလၢၢ်အံၤအဖီခိၣ်န့ၣ်, ယကသူၣ်ထီၣ်ယတၢ်အိၣ်ဖှိၣ်,
ဒီးတၢ်သံအစိကမီၤဒၣ်လဲာ်မၤနၢၤအီၤတန့ၢ်ဘၣ်လီၤ.
19 ယကဟ့ၣ်နၤလၢမူခိၣ်ဘီမုၢ်အနီၣ်ဝံာ်ခံတဖၣ်လီၤ. ဖဲဒၣ်တၢ်လၢနတြီဃာ်တမံၤမံၤလၢပှၤသုတမၤလၢဟီၣ်ခိၣ်ချၢ တဂ့ၤန့ၣ်, ကဘၣ်တၢ်တြီဃာ်အီၤလၢမူခိၣ်, ဒီးဖဲဒၣ်တၢ်လၢနပျဲတမံၤမံၤလၢပှၤကမၤလၢဟီၣ်ခိၣ်ချၢအံၤ
န့ၣ်, ကဘၣ်တၢ်ပျဲမၤအီၤလၢမူခိၣ်လီၤ.”
20 ယ့ၣ်ၡူးတြီအပျဲၢ်အဘီၣ်တဖၣ်ဃံးဃံး, လၢအသုတတဲပှၤနီတဂၤလၢအဝဲမ့ၢ်ခရံာ်တဂ့ၤန့ၣ်လီၤ.
(မၢ်ကူး ၈:၃၁-၉:၁; လူၤကၣ် ၉:၂၂-၂၇)
21 စးထီၣ်ဖဲအကတီၢ်န့ၣ်, ယ့ၣ်ၡူးတဲနၢ်ပၢၢ်အပျဲၢ်အဘီၣ်တဖၣ်, လၢအဝဲကဘၣ်လဲၤဆူဝ့ၢ်ယရူၤၡလ့ၣ်, ဒီးတူၢ်ဘၣ်
ပှၤယူဒၤဖိကရၢအခိၣ်အနၢ်တဖၣ်, ဒီးပှၤလုၢ်တၢ်အခိၣ်အဒိၣ်တဖၣ်, ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်အတၢ်မၤနးမၤဖှီၣ်
အီၤအါမံၤ, ဒီးလၢအကဘၣ်တၢ်မၤသံအီၤဒီးလၢသၢသီတသီန့ၣ်
ယွၤကဒုးဂဲၤဆၢထၢၣ်က့ၤအီၤန့ၣ်လီၤ.
22 ဒီးစီၤပ့းတရူးကိးန့ၢ်အီၤဆူတၢ်ချၢဒီးဒူအလိၤဒီးစံး, “ကစၢ်ယွၤဧၢ, မ်ယွၤအသုတဒုးဘၣ်နၤလၢတၢ်အံၤတဂ့ၤ.
တၢ်အံၤတဘၣ်ဘၣ်နၤလ့ၤတက့ၤဘၣ်.”
23 ယ့ၣ်ၡူးဃၣ်အသးဒီးစံးဘၣ်စီၤပ့းတရူး, “မုၣ်ကီၤလံၢ်ဧၢ, ဟးဖးဒီးယၤတက့ၢ်. နမ့ၢ်ပှၤလၢအမၤတံာ်တာ်ယကျဲလီၤ.
အဂ့ၢ်ဒ်အံၤ, နတၢ်ဆိကမိၣ်အံၤတမ့ၢ်တၢ်ဟဲလၢယွၤအအိၣ်ဘၣ်. မ့ၢ်တၢ်ဘၣ်ဃးဒီးပှၤကညီလီၤ.”
24 တုၤနုၤတစုယ့ၣ်ၡူးစံးဘၣ်အပျဲၢ်အဘီၣ်တဖၣ်, “ပှၤတဂၤဂၤမ့ၢ်အဲၣ်ဒိးကဲယပျဲၢ်ယဘီၣ်ဒီး, မ်အညိကွံာ်အသးဒၣ်ဝဲ, ဒီးယိးထီၣ်အထူၣ်စုညါ, ဒီးပိာ်ယခံတက့ၢ်.
25 အဂ့ၢ်ဒ်အံၤ, ပှၤတဂၤလၢ်လၢ်လၢအသးအိၣ်ဟံးဃာ်ဒီးမၤပူၤဖျဲး အသးသမူဒၣ်ဝဲန့ၣ်, အတၢ်မူနီၢ်နီၢ်ကလီၤမၢ်န့ၢ်အီၤလီၤ.
ဒီးပှၤတဂၤလၢ်လၢ်လၢအဒုးလီၤမၢ်ကွံာ်အသးသမူလၢယဃိန့ၣ်,
ကထံၣ်န့ၢ်တၢ်မူနီၢ်နီၢ်လီၤ.
26 ပှၤကညီမ့ၢ်န့ၢ်ဘၣ်ဟီၣ်ခိၣ်ဒီဘ့ၣ်ဘၣ်ဆၣ်, အသးသမူမ့ၢ်လီၤမၢ်ကွံာ်န့ၢ်အီၤဒီး, ကန့ၢ်ဘျုးမနုၤလဲၣ်.
ပှၤကညီကဟ့ၣ်တၢ်အပှ့ၤမနုၤတမံၤလၢအသးသမူအဂီၢ်လဲၣ်.
27 အဂ့ၢ်ဒ်အံၤ, ပှၤကညီဖိခွါအံၤကဟဲဝဲဒီးပၢ်အလၤကပီၤ, အိၣ်ဃုာ်ဒီးအကလူးတဖၣ်လီၤ. တုၤနုၤတစု, ကဟ့ၣ်ဘူးဟ့ၣ်လဲ
ပှၤကညီကိးဂၤဒဲးဒ်အကြၢးဒီးတၢ်လၢအဝဲသ့ၣ်မၤတ့ၢ်ဝဲအသိးန့ၣ်လီၤ.
28 ယစံးဘၣ်တဲဘၣ်သုတၢ်မ့ၢ်တၢ်တီ, ပှၤလၢအဆၢထၢၣ်ဖဲအံၤတနီၤန့ၣ်, တချုးလၢအထံၣ်ဘၣ်ပှၤကညီဖိခွါဟဲလၢ အဘီအမုၢ်အပူၤဒံးဘၣ်န့ၣ်, တသံဘၣ်ဝဲဘၣ်.”