ဒ်စီၤမးသဲ
ကွဲးဟ့ၣ်ယုၢ်လီၤဝဲအသိး
MATTHEW
လံာ်မးသဲတဲပှၤတၢ်သးခုအကစီၣ် လၢယ့ၣ်ၡူးမ့ၢ်ပှၤအုၣ်က့ၤခီၣ်က့ၤတၢ်တဂၤလၢအဘၣ်တၢ်စံးပာ်တ့ၢ်လၢ အဂ့ၢ်, ဒီးခီဖျိအီၤန့ၣ်ကစၢ်ယွၤမၤလၢထီၣ်ပှဲၤထီၣ်တၢ်စံးပာ်တဖၣ်လၢ အစံးပာ်တ့ၢ်ဝဲဒီးအပှၤဂီၢ်မုၢ်လၢလံာ်တၢ်အၢၣ်လီၤအီလီၤ အလီၢ်လံၤတကတြူၢ်အပူၤန့ၣ်လီၤ. တၢ်သးခုအကစီၣ်အံၤ တမ့ၢ်ဘၣ်ထဲပှၤယူဒၤဖိလၢယ့ၣ်ၡူးဟဲအိၣ်ဖျဲၣ်ထီၣ်ဒီးအိၣ် မူလၢအသိးအကျါအဂီၢ်ဧိၤဘၣ်. မ့ၢ်ဝဲလၢဟီၣ်ခိၣ်ဒီဘ့ၣ်အဂီၢ်လီၤ.
လံာ်မးသဲဘၣ်တၢ်ရဲၣ်လီၤကျဲၤလီၤအီၤလီၤတံၢ်လီၤဆဲးလီၤ. စးထီၣ်ဝဲလၢယ့ၣ်ၡူးအတၢ်အိၣ်ဖျဲၣ်ထီၣ်အဂ့ၢ်, တဲန့ၢ်ပှၤလၢအဝဲအတၢ်ဒိးဘျၢအသးဒီးတၢ်လ့ပစီဘၣ်အီၤ အဂ့ၢ်, ဝံၤစးထီၣ်တဲဝဲယ့ၣ်ၡူးအတၢ်စံၣ်တဲၤတဲလီၤ, အတၢ်သိၣ်လီၤသီလီၤဒီးအတၢ်မၤဘျါပှၤ အတၢ်ဖံးတၢ်မၤလၢကီၢ်ကၤလံၤလါအပူၤန့ၣ် လီၤ. တၢ်အံၤဝံၤအလီၢ်ခံလံာ်အံၤကွဲးဖျါဝဲယ့ၣ်ၡူး အတၢ်လဲၤလၢကီၢ်ကၤလံၤလါဆူဝ့ၢ်ယရူၤၡလ့ၣ်, ဒီးတၢ်မၤအသးတဖၣ်လၢယ့ၣ်ၡူးအမုၢ်နံၤမုၢ်သီလၢခံကတၢၢ်တနွံ အတီၢ်ပူၤဒီးမၤကတၢၢ်က့ၤဝဲလၢတၢ်ပျၤထီယ့ၣ်ၡူးလၢထူၣ်စုညါ အလိၤဒီးအတၢ်ဂဲၤဆၢထၢၣ်က့ၤလၢတၢ်သံအဂ့ၢ်န့ၣ်လီၤ.
လံာ်တၢ်သးခုအကစီၣ်တဘ့ၣ်အံၤ, ဒုးနဲၣ်ပှၤလၢသရၣ်ဖးဒိၣ် ယ့ၣ်ၡူး, လၢအအိၣ်ဒီးတၢ်စိတၢ်ကမီၤလၢအကထုးထီၣ်ကစၢ်ယွၤ အတၢ်သိၣ်တၢ်သီအခီပညီ, ဒီးလၢအသိၣ်လီၤသီလီၤတၢ်ဘၣ်ဃးကစၢ်ယွၤအဘီအမုၢ်အဂ့ၢ်န့ၣ်လီၤ. အဝဲအတၢ်သိၣ်လီၤသီလီၤအါမးဘၣ်တၢ်ပာ်ဖှိၣ်အီၤလၢ တၢ်ဂ့ၢ်မိၢ်ပှၢ်ယဲၢ်မံၤအပူၤန့ၣ်လီၤ.
(၁) တၢ်စံၣ်တဲၤတဲလီၤလၢတၢ်လူၢ်ဒီခိၣ်ဘၣ်ထွဲဒီး ပှၤမူခိၣ်ဘီဖိမုၢ်ဖိတဖၣ်အသကဲာ်ပဝး, အမူအဒါ, အခွဲးအယာ်ဒီးအတၢ်အကတၢၢ်န့ၣ်လီၤ(အဆၢဒိၣ် ၅-၇),
(၂) တၢ်သိၣ်လိသီလိအပျဲၢ်အဘီၣ်တဆံခံဂၤလၢ အဝဲသ့ၣ်အတၢ်ဖံးတၢ်မၤအဂ့ၢ်အကျိၤတဖၣ်(အဆၢဒိၣ် ၁၀),
(၃) တၢ်ကတိၤဒိဘၣ်ဃးမူခိၣ်ဘီမုၢ်အဂ့ၢ်(အဆၢဒိၣ် ၁၃),
(၄) တၢ်သိၣ်လီၤသီလီၤဘၣ်ဃးတၢ်ကဲထီၣ်ယ့ၣ်ၡူးအပျဲၢ်အဘီၣ် အခီပညီ(အဆၢဒိၣ် ၁၈),
(၅) တၢ်သိၣ်လီၤသီလီၤဘၣ်ဃးဒီးတၢ်အစိၤခဲအံၤအကတၢၢ် ဒီးမူခိၣ်ဘီမုၢ်အတၢ်ကဟဲအဂ့ၢ်(အဆၢဒိၣ် ၂၄-၂၅).
1
(လူၤကၣ် ၃:၂၃-၃၈)
1 အအံၤမ့ၢ်တၢ်ကွဲးဖျါထီၣ်ယ့ၣ်ၡူးခရံာ်အတၢ်ဟဲလီၤစၢၤ အဂ့ၢ်လီၤ. အဝဲမ့ၢ်ပှၤဟဲလီၤစၢၤလၢစီၤဒၤဝံးလၢအဟဲလီၤစၢၤလၢစီၤ အၤဘြၣ်ဟၣ်လီၤ.
2 စးထီၣ်လၢစီၤအၤဘြၤဟၣ်တုၤလီၤလၢစီၤပၤဒၤဝံးန့ၣ်, ပှၤလၢအဟဲလီၤစၢၤတစိၤဘၣ်တစိၤမ့ၢ်ဒ်အဖီလာ်အသိးလီၤ. စီၤအၤဘြၤဟၣ်,
3 စီၤအံၤစဲး, စီၤယၤကိာ်, စီၤယူဒၤဒီးအဒီပုၢ်ဝဲၢ်တဖၣ်,
4 စီၤဖ့ၤရ့းဒီးစီၤစ့ၤရ့း (အမိၢ်မ့ၢ်နီၢ်တၤမၤ), စီၤဃ့ၤစရိၣ်, စီၤအ့ရၣ်
5 (ဘၣ်တၢ်ကိးစ့ၢ်ကီးလၢစီၤရၣ် - ရူၤသး ၄:၁၉), စီၤဧးမံၤနဒး, စီၤနးၡိၣ်, စီၤစၤလမိၣ်,
6 စီၤဘိၤဧး (အမိၢ်မ့ၢ်နီၢ်ရၤဃး), စီၤဧိၤဘ့း (အမိၢ်မ့ၢ်နီၢ်ရူၤသး), စီၤယံးၡဲ, စီၤပၤဒၤဝံးလီၤ.
6-11 စးထီၣ်လၢစီၤဒၤဝံးတုၤလီၤလၢပှၤအံၣ်စရ့လးဖိတဖၣ် ဘၣ်တၢ်စိာ်မၢကဲကုၢ်အီၤဆူကီၢ်ဘၤဘူၤလိၣ် (ချ ခ န ၅၉၈-၅၉၇), ပှၤလၢအဟဲလီၤစၢၤတစိၤဘၣ်တစိၤမ့ၢ်ဒ်အံၤလီၤ. စီၤဒၤဝံး, စီၤၡလိၤမိၤ (အမိၢ်မ့ၢ်တ့ၢ်စီၤအူၤရံယၤ အမါ), စီၤရဃၤဘၣ်, စီၤအဘံယၤ, စီၤအၤစါ, စီၤယဟိၤၡၤဖး, စီၤယဟိၤရၣ်, စီၤဧူးစံယၤ, စီၤယိၤသၣ်, စီၤအၤဃး, စီၤဃံးစကံယၤ, စီၤမနၤၡ့ၤ, စီၤအၤမိၣ်, စီၤယိၤၡံယၤ, စီၤယံးကၤနံယၤဒီးအဒီပုၢ်ဝဲၢ်တဖၣ်လီၤ.
12-16 စးထီၣ်လၢတၢ်စိာ်မၢကဲကုၢ်လၢဘၤဘူၤလိၣ်ဝံၤအလီၢ်ခံတုၤ ယ့ၣ်ၡူးခရံာ်ဟဲအိၣ်ဖျဲၣ်ထီၣ်အဆၢကတီၢ်န့ၣ်, တၢ်ဟဲလီၤစၢၤ တဆီဘၣ်တဆီဘၣ်တၢ်ယၢၤထီၣ်အီၤဒ်အံၤလီၤ. စီၤယံးကၤနံယၤ, စီၤၡၤလတံၤအ့လး, စီၤစရူဘၤဘ့လး, စီၤအဘံဟူာ်, စီၤအ့ၤလယါကံၣ်, စီၤဧၤစၢ်, စီၤစၤဒိး, စီၤအါဃံၣ်, စီၤအ့းလံအူာ်, စီၤအလၤဧစၢ်, စီၤမးသၣ်, စီၤယၤကိာ်, စီၤယိၤသးလၢအဒိးတ့ဒိးဖျီအသးဒီးနီၢ်မၤရံလၢအဆံးစၢ်န့ၢ်ယ့ၣ်ၡူး, လၢအဘၣ်တၢ်ကိးအီၤလၢခရံာ်, ပှၤလၢယွၤဃုထၢအီၤတဂၤန့ၣ်လီၤ.
17 စးထီၣ်လၢစီၤအၤဘြၤဟၣ်တုၤလီၤလၢစီၤဒၤဝံးန့ၣ် တၢ်ဟဲလီၤစၢၤအိၣ်တဆံလွံၢ်စိၤ, ဒီးစီၤဒၤဝံးတုၤလီၤလၢတၢ် စိာ်မၢကဲကုၢ်ဆူဘၤဘူၤလိၣ်အဆၢကတီၢ်န့ၣ်အိၣ်ဝဲတဆံလွံၢ်စိၤ ဒီးစးထီၣ်လၢတၢ်စိာ်မၢကဲကုၢ်တုၤလၢ ယ့ၣ်ၡူးခရံာ်အိၣ်ဖျဲၣ်ထီၣ်န့ၣ်အိၣ်တဆံလွံၢ်စိၤလီၤ.
(လူၤကၣ် ၂:၁-၇)
18 ယ့ၣ်ၡူးခရံာ်အတၢ်အိၣ်ဖျဲၣ်ထီၣ်မၤအသးဒ်အံၤလီၤ. အမိၢ်နီၢ်မၤရံ ဘၣ်တၢ်အဲၣ်တီတ့ၢ်အီၤဒီးစီၤယိၤသးလီၤ. ဘၣ်ဆၣ်တချုးလၢအဝဲသ့ၣ်အိၣ်ဃုာ်ဒံးဘၣ်ဒ်နီၢ်ဒီမိဝၤအသိးန့ၣ်, တၢ်မၤအသးလၢနီၢ်မၤရံအိၣ်ထီၣ်ဒီးအဟုးအသးခီဖျိသးစီဆှံ အစိကမီၤန့ၣ်လီၤ.
19 စီၤယိၤသးမ့ၢ်ပှၤအတီအလိၤတဂၤအဃိ, အသးတအိၣ်လၢ အကမၤမဲာ်ဆှးဘၣ်နီၢ်မၤရံလၢပှၤအါဂၤအမဲာ်ညါဘၣ်. ဒီးအဝဲပာ်လီၤအသးလၢကထုးဖးကွံာ်အသးဒီးအီၤကစုဒုလီၤ.
20 ဘၣ်ဆၣ်ဒီး ဖဲအဝဲဆိကမိၣ်တၢ်ဂ့ၢ်အံၤအဖၢမုၢ်န့ၣ်, ယွၤအကလူးတဂၤလီၣ်ဖျါထီၣ်အသးလၢတၢ်မံမီၢ်အပူၤဒီးစံးဘၣ် အီၤ, “စီၤဒၤဝံးအဖိခွါစီၤယိၤသးဧၢ, တဘၣ်ပျံၤလၢနကဟံးန့ၢ်နီၢ်မၤရံဒ်နမါအသိးတဂ့ၤ. အဂ့ၢ်ဒ်အံၤအဝဲဒၢထီၣ်ဒၣ်လၢသးစီဆှံအစိကမီၤလီၤ.
21 အဝဲကဆံးစၢ်န့ၢ်ဖိခွါတဂၤဒီးနကဘၣ်ယုၢ်န့ၢ်အမံၤလၢယ့ၣ်ၡူး လီၤ. အဂ့ၢ်မ့ၢ်လၢအဝဲကအုၣ်က့ၤခီၣ်က့ၤအပှၤဂီၢ်မုၢ်လၢအဝဲသ့ၣ် အတၢ်ဒဲးဘးအပူၤလီၤ.”
22 တၢ်မၤအသးခဲလၢာ်အံၤမ့ၢ်ဒ်သိးတၢ်ကတိၤတဖၣ်လၢ ကစၢ်စံးတ့ၢ်ဝဲခီဖျိဝံတဂၤန့ၣ်, ကလၢထီၣ်ပှဲၤထီၣ်ဝဲအဂီၢ်လီၤ.
23 “မုၣ်ကနီၤတဂၤကဒၢထီၣ်ဒီးကဆံးစၢ်န့ၢ်အဖိခွါတဂၤဒီး အဝဲကဘၣ်တၢ်ကိးအီၤလၢဧံးမၤနူၤအ့လး” (အခီပညီန့ၣ်ကစၢ်ယွၤအိၣ်ဒီးပှၤ)လီၤ(ၡါ.၇:၁၄).
24 တုၤစီၤယိၤသးမံပၢၢ်ထီၣ်ဒီး မၤဝဲဒ်ကစၢ်အကလူးစံးဘၣ်တ့ၢ်အီၤ အသိး, ဒီးဟံးန့ၢ်နီၢ်မၤရံဒ်အမါအသိးလီၤ.
25 ဘၣ်ဆၣ်ဒီးတချုးလၢအဆံးစၢ်န့ၢ်အဖိခွါဘၣ်န့ၣ်, စီၤယိၤသးတမံဃုာ်ဒီးအမါဘၣ်. စီၤယိၤသးယုၢ်န့ၢ်ဖိသၣ်အမံၤလၢယ့ၣ်ၡူးလီၤ.