8
(မး.၁၅:၃၂-၃၉)
1 လၢခံတယံာ်ဘၣ်န့ၣ်, ပှၤဂီၢ်မုၢ်ဖးဒိၣ်ဟဲအဂၤတဖုပာ်ဖှိၣ်ထီၣ် ကဒီးအသးန့ၣ်လီၤ. တုၤမ့ၢ်အဝဲသ့ၣ်အတၢ်အီၣ်လၢာ်ကွံာ်ဒီး, ယ့ၣ်ၡူးကိးဃီၤအပျဲၢ်အဘီၣ်တဖၣ်ဆူအအိၣ်ဒီးစံးဝဲ,
2 “ယသးကညီၤဘၣ်ပှၤတဖၣ်အံၤမ့ၢ်လၢအဟဲအိၣ်တ့ၢ်ဝဲဒီးယၤသၢ သီလံ, ဒီးခဲကနံၣ်အံၤတၢ်အီၣ်လၢကအီၣ်ဝဲအဂီၢ်တအိၣ်လၢၤဘၣ်န့ၣ်လီၤ.
3 ဖဲအဝဲသ့ၣ်တၢ်သၣ်ဝံၤအသးအခါအံၤ, ယမ့ၢ်ပျဲက့ၤအီၤဆူအဟံၣ်အဃီဒၣ်ဝဲန့ၣ်, ကလီၤဘှါဒီးလီၤဃံၤလၢကျဲလီၤ. အဂ့ၢ်မ့ၢ်လၢအဝဲသ့ၣ်အကျါတနီၤဟဲဘၣ်ဝဲတၢ်ဒ့ၣ်စၢၤယံၤဒိၣ်မးအဃိလီၤ.”
4 အပျဲၢ်အဘီၣ်တဖၣ်စံးဆၢအီၤ, “လၢပကဒုးအီၣ်ပှၤတဖၣ်အံၤခဲလၢာ် ဖဲတၢ်လီၢ်လီၤဃီဒီးပှၤကညီတအိၣ်ဘၣ်အလီၢ်အံၤန့ၣ်, ပကလဲၤမၤန့ၢ်ကိၣ်ဖဲလဲၣ်.”
5 ယ့ၣ်ၡူးသံကွၢ်အဝဲသ့ၣ်, “သုကိၣ်အိၣ်ပှံၤဖျၢၣ်လဲၣ်.” အဝဲသ့ၣ်စံးဆၢက့ၤ, “နွံဖျၢၣ်လီၤ.”
6 အဝဲဒၣ်မၤလိာ်ပှၤဂီၢ်မုၢ်တဖၣ်လၢအကဆ့ၣ်နီၤလၢဟီၣ်ခိၣ်လိၤန့ၣ်လီၤ. အန့ၣ်ဝံၤ, ဟံးန့ၢ်ဝဲကိၣ်နွံဖျၢၣ်န့ၣ်ဒီးစံးထီၣ်ပတြၢၤကစၢ်ယွၤအဘျုး အဖှိၣ်လီၤ. အဝဲဒၣ်စိၢ်ဘျဲးကိၣ်ဒီးဟ့ၣ်လီၤဝဲအပျဲၢ်အဘီၣ်တဖၣ်, ဒီးအဝဲသ့ၣ်ဟ့ၣ်နီၤလီၤဝဲဆူပှၤဂီၢ်မုၢ်အအိၣ်န့ၣ်လီၤ.
7 လၢအဝဲသ့ၣ်အအိၣ်န့ၣ်, အိၣ်စ့ၢ်ကီးဒီးညၣ်ဖိစှၤဘ့ၣ်န့ၣ်လီၤ. ယ့ၣ်ၡူးစံးထီၣ်ပတြၢၤယွၤအဘျုးအဖှိၣ်ဝံၤမၤလိာ်အပျဲၢ်အဘီၣ် တဖၣ်လၢကနီၤဟ့ၣ်အီၣ်စ့ၢ်ကီးပှၤတဖၣ်န့ၣ်လီၤ.
8 ပှၤကိးဂၤဒဲးအီၣ်ဝဲတုၤအဘျဲးအီၣ်, ဒီးအပျဲၢ်အဘီၣ်တဖၣ်ထၢဖှိၣ်က့ၤတၢ်အိၣ်ဘျဲၣ်အိၣ်စဲၢ် ပှဲၤကုနွံဒုန့ၣ်လီၤ.
9 ပှၤအီၣ်တၢ်ဖဲန့ၣ်အိၣ်အဂၤလွံၢ်ကထိဃၣ်ဃၣ်ညါန့ၣ်လီၤ.
10 ယ့ၣ်ၡူးပျဲက့ၤကွံာ်ပှၤတဖၣ်ဝံၤတဘျီဃီလဲၤနုာ်ဝဲဆူချံတဘ့ၣ် အပူၤဃုာ်ဒီးအပျဲၢ်အဘီၣ်တဖၣ်, ဒီးလဲၤဝဲဆူကီၢ်ဒၤလမၤနူၤသၤလီၤ.
(မး.၁၆:၁-၄)
11 ပှၤဖၤရံၤၡဲတနီၤဟဲဆူယ့ၣ်ၡူးအအိၣ်ဝံၤဂ့ၢ်လိာ်ဘှီလိာ်တၢ် ဒီးအီၤလီၤ. အဝဲသ့ၣ်အဲၣ်ဒိးမၤကွၢ်အီၤသတးဒီးမၢ အဝဲဒၣ်မၤဖျါထီၣ်တၢ်ပနီၣ်လီၤလးတမံၤမံၤလၢအဟဲလီၤလၢမူခိၣ် တခီ, ဒ်သိးကဒုးနဲၣ်အဝဲသ့ၣ်လၢကစၢ်ယွၤဘၣ်အသးလီၤဆီလၢအီၤ အဂီၢ်လီၤ.
12 ဘၣ်ဆၣ်ယ့ၣ်ၡူးကအုထီၣ် လၢအသးကံၢ်ပူၤဒီးစံးဝဲဒၣ်, “ဘၣ်မနုၤအဃိပှၤတစိၤအံၤဃ့လၢအကထံၣ်ဘၣ်တၢ်ပနီၣ်လီၤ လးန့ၣ်လဲၣ်. ယစံးဘၣ်သုတီတီလိၤလိၤ, တၢ်တဒုးနဲၣ်ဖျါထီၣ်တၢ်ပနီၣ်လီၤလးလၢပှၤ တစိၤအံၤကထံၣ်ဘၣ်အီၤအဂီၢ်နီတမံၤဘၣ်.”
13 အဝဲဒၣ်ဟးထီၣ်ကွံာ်လၢအဝဲသ့ၣ်အအိၣ်ဝံၤ, ဒိးထီၣ်က့ၤချံန့ၣ်ဒီးခီဃီၤဝဲဆူပီၣ်လဲၣ်ဝၢ်ဘးခီလီၤ.
(မး.၁၆:၅-၁၂)
14 အပျဲၢ်အဘီၣ်တဖၣ်သးပ့ၤနီၣ်လဲၤစိာ်ကိၣ်လၢလၢလီၣ်လီၣ် လၢအတၢ်လဲၤတဘျီအံၤအဂီၢ်, ဒီးအကိၣ်အိၣ်ထဲတဖျၢၣ်ဧိၤလၢချံပူၤန့ၣ်လီၤ.
15 ယ့ၣ်ၡူးမၤလိာ်အဝဲသ့ၣ်ဒီးစံးဝဲ, “ပလီၢ်သုသးဒီးစီၣ်မဲာ်စီၣ်နါဘၣ်ဃး ပှၤဖၤရံၤၡဲတဖၣ်အကိၣ်မံၣ်ဒီးစီၤပၤဟ့ၤရိာ်အကိၣ်မံၣ်န့ၣ်တ က့ၢ်.”
16 အဝဲသ့ၣ်ကတိၤလိာ်အသးကဒဲကဒဲဒီးစံး, “အဝဲဒၣ်စံးတၢ်ဒ်အံၤ မ့ၢ်လၢပကိၣ်တအိၣ်ဘၣ်အဃိလီၤ.”
17 ယ့ၣ်ၡူးသ့ၣ်ညါတ့ၢ်တၢ်လၢအဝဲသ့ၣ်စံးလိာ်အသးသတးဒီး သံကွၢ်အဝဲသ့ၣ်တဖၣ်န့ၣ်, “ဘၣ်မနုၤသုဘၣ်စံးကတိၤလိာ်သုသးဘၣ်ဃး သုကိၣ်တအိၣ်ဘၣ်အဂ့ၢ်န့ၣ်လဲၣ်. မ့ၢ်သုတသ့ၣ်ညါဒီးသုတနၢ်ပၢၢ်ဒံး ဘၣ်ဧါ. သုတၢ်နၢ်ပၢၢ်လီၤတိၢ်ထဲန့ၣ်ညါဧါ.
18 သုအိၣ်ဒီးသုမဲာ်ချံကစီဒီ, မ့ၢ်သုတထံၣ်တၢ်ဘၣ်ဧါ. သုအိၣ်ဒီးသုနၢ်တဖၣ်ကစီဒီ, မ့ၢ်သုတနၢ်ဟူတၢ်ဘၣ်ဧါ. သုတသ့ၣ်နီၣ်လၢၤဘၣ်ဧါ.
19 အကတီၢ်ဖဲယစိၢ်ဘျဲးကိၣ်ယဲၢ်ဖျၢၣ်လၢပှၤယဲၢ်ကထိအဂီၢ်အခါန့ၣ်, သုထၢဖှိၣ်က့ၤတၢ်အိၣ်ဘျဲၣ်အိၣ်စဲၢ်ပှဲၤကုပှံၤဒုလဲၣ်.”
အဝဲသ့ၣ်စံးဆၢက့ၤအီၤ, “တဆံခံဒုလီၤ.”
20 “အကတီၢ်ဖဲယစိၢ်ဘျဲးကိၣ်နွံဖျၢၣ်လၢပှၤလွံၢ်ကထိအဂီၢ်အခါ န့ၣ်, သုထၢဖှိၣ်က့ၤတၢ်အိၣ်ဘျဲၣ်အိၣ်စဲၢ်ပှဲၤကုပှံၤဒုလဲၣ်.”
အဝဲသ့ၣ်စံးဆၢက့ၤအီၤ, “နွံဒုလီၤ.”
21 အန့ၣ်ဒီးအဝဲဒၣ်သံကွၢ်အဝဲသ့ၣ်, “အအံၤဒၣ်လဲာ်သုတနၢ်ပၢၢ်ဒံးဘၣ်ဧါ.”
22 ယ့ၣ်ၡူးဒီးအပျဲၢ်အဘီၣ်တဖၣ်လဲၤတုၤဝဲလၢသဝီဘ့ၤသစဲဒၤ ဒီးပှၤတနီၤဟဲစိာ်ပှၤမဲာ်ဘျီၣ်တဂၤဆူယ့ၣ်ၡူးအအိၣ်ဒီးဃ့ ကညးအီၤလၢအကထိးဘၣ်ပှၤတဂၤအံၤလၢအစုန့ၣ်လီၤ.
23 ယ့ၣ်ၡူးဟံးန့ၢ်ပှၤမဲာ်ဘျီၣ်န့ၣ်အစုဒီးမိၤထီၣ်အီၤဆူသဝီ အချၢဒီးထူးပှဲာ်ဝဲဒၣ်အမဲာ်ချံတဖၣ်ဝံၤပာ်ထီၣ်အစုလၢ အလိၤဒီးသံကွၢ်အီၤ, “နထံၣ်တၢ်တမံၤမံၤဧါ.”
24 ဒီးအဝဲကွၢ်ထီၣ်တၢ်ဒီးစံးဝဲ, “ယထံၣ်ယဲပှၤကညီတဖၣ်, ဘၣ်ဆၣ်ဖျါလီၤဂာ်ဒီးသ့ၣ်အထူၣ်တဖၣ်လၢ အဟးထီၣ်ဟးလီၤဝဲန့ၣ်လီၤ.”
25 ယ့ၣ်ၡူးပာ်ထီၣ်ကဒီးအစုလၢပှၤတဂၤန့ၣ်အမဲာ်ချံအလိၤလီၤ. ပှၤတဂၤန့ၣ်ဂုာ်ကျဲးစၢးကွၢ်တၢ်သပှၢ်ပှၢ်ဒီးအမဲာ်ကပီၤထီၣ်က့ၤ ဒီးထံၣ်ထီၣ်က့ၤတၢ်ကိးမံၤဒဲးဂ့ၤဂ့ၤဘၣ်ဘၣ်လီၤ.
26 ယ့ၣ်ၡူးမၢအက့ၤက့ၤဆူအဟံၣ်ဒီးမၤလိာ်အီၤဒ်သိး အသုတက့ၤနုာ်ကဒါက့ၤဆူသဝီပူၤတဂ့ၤအဂီၢ်န့ၣ်လီၤ.
(မး.၁၆:၁၃-၂၀; လူၤ.၉:၁၈-၂၁)
27 အန့ၣ်ဝံၤယ့ၣ်ၡူးဒီးအပျဲၢ်အဘီၣ်တဖၣ်လဲၤဝဲဆူ သဝီတဖၣ်လၢကီၢ်ဖံလံးပံၤကဲၤစါရံၤန့ၣ်လီၤ. ဖဲအလဲၤဝဲလၢကျဲအဖၢမုၢ်န့ၣ်, အဝဲဒၣ်သံကွၢ်အပျဲၢ်အဘီၣ်တ ဖၣ်, “ပှၤကညီတဖၣ်စံးဝဲလၢယမ့ၢ်မတၤတဂၤလဲၣ်.”
28 အဝဲသ့ၣ်စံးဆၢက့ၤအီၤ, “တနီၤစံးဝဲလၢနမ့ၢ်ပှၤဘျၢတၢ် စီၤယိၤဟၣ်, အဂၤတနီၤစံးဝဲလၢနမ့ၢ်ဝံအ့ၤလံယၤ, ဒီးအဂၤတနီၤစံးဝဲလၢနမ့ၢ်ဝံတဂၤဂၤလီၤ.”
29 ဒီးအဝဲဒၣ်သံကွၢ်အဝဲသ့ၣ်, “မ့မ့ၢ်သုဝဲသ့ၣ်တဖၣ်သုစံးလၢယမ့ၢ်မတၤတဂၤလဲၣ်.”
ဒီးစီၤပ့းတရူးစံးဆၢက့ၤအီၤ, “နမ့ၢ်ခရံာ်န့ၣ်လီၤ.”
30 အန့ၣ်ဒီးယ့ၣ်ၡူးမၤလိာ်အဝဲသ့ၣ်လၢ ဘၣ်ဃးဒီးအဝဲဒၣ်အဂ့ၢ်အံၤ, အသုတစံးဘၣ်တဲဘၣ်ပှၤနီတဂၤတဂ့ၤလီၤ.
(မး.၁၆:၂၁-၂၈; လူၤ.၉:၂၂-၂၇)
31 အန့ၣ်ဝံၤယ့ၣ်ၡူးသိၣ်လိအပျဲၢ်အဘီၣ်တဖၣ်ဒီးစံးဝဲ, “ပှၤကညီဖိခွါအံၤကဘၣ်တူၢ်တၢ်နးတၢ်ဖှီၣ်အကလုာ်ကလုာ် ဒီးပှၤယူဒၤဖိကရၢအခိၣ်အနၢ်တဖၣ်, ပှၤလုၢ်တၢ်အခိၣ်အဒိၣ်တဖၣ် ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ကညိကွံာ်အီၤလီၤ. ကဘၣ်တၢ်မၤသံအီၤဘၣ်ဆၣ်ဒီးသၢသီတသီန့ၣ်ကဂဲၤ ဆၢထၢၣ်က့ၤလၢတၢ်သံလီၤ.”
32 တၢ်တဖၣ်အံၤခဲလၢာ်ကတိၤဝဲဖျါဖျါလီၤ. အန့ၣ်ဒီး စီၤပ့းတရူးမိၤအီၤယံၤထီၣ်ဒီးအပျဲၢ်အဘီၣ်အဂၤတဖၣ် ဒီးဒူအလိၤလီၤ.
33 ဘၣ်ဆၣ်ယ့ၣ်ၡူးဃၣ်ကဒါအသး, ကွၢ်ဃီၤအပျဲၢ်အဘီၣ်တဖၣ်အမဲာ်ဝံၤ, ဒူစီၤပ့းတရူးအလိၤဒီးစံးဝဲ, “မုၣ်ကီၤလံၢ်ဧၢ, ဟးကွံာ်လၢယအိၣ်တက့ၢ်. နတၢ်ဆိကမိၣ်တဖၣ်တဟဲလၢကစၢ်ယွၤအအိၣ်ဘၣ်. မ့မ့ၢ်ဟဲလၢပှၤကညီအအိၣ်တခီန့ၣ်လီၤ.”
34 ဝံၤဒီးယ့ၣ်ၡူးကိးဃီၤပှၤဂီၢ်မုၢ်ဃုာ်ဒီးအပျဲၢ်အဘီၣ်တဖၣ် ဆူအအိၣ်ဒီးစံးဘၣ်အဝဲသ့ၣ်, “ပှၤတဂၤလၢ်လၢ်လၢအသးအိၣ်ကဲထီၣ်ယပျဲၢ်ယဘီၣ်န့ၣ်, ကဘၣ်ညိကွံာ်အသးဒၣ်ဝဲ, ဟံးထီၣ်ဒီးယိးထီၣ်အထူၣ်စုညါ, ဒီးပိာ်ထီၣ်ယခံန့ၣ်လီၤ.
35 အဂ့ၢ်ဒ်အံၤ, ပှၤတဂၤလၢ်လၢ်လၢအအဲၣ်ဒိးအုၣ်က့ၤခီၣ်က့ၤအသး သမူဒၣ်ဝဲန့ၣ်, အသးသမူကလီၤမၢ်န့ၢ်အီၤလီၤ. မ့မ့ၢ်ပှၤတဂၤလၢ်လၢ်လၢအဒုးလီၤမၢ်ကွံာ်အသးသမူလၢယဃိ ဒီးလၢတၢ်သးခုကစီၣ်အဃိန့ၣ်, ကမူဝဲနီၢ်နီၢ်လီၤ.
36 ပှၤကညီတဂၤမ့ၢ်န့ၢ်ဘၣ်ဟီၣ်ခိၣ်ဒီဘ့ၣ်ညါဘၣ်ဆၣ်ဒီး အသးသမူနီၢ်နီၢ်မ့ၢ်လီၤမၢ်ကွံာ်န့ၢ်အီၤန့ၣ်, တၢ်ဘျုးလၢအဂီၢ်ကအိၣ်ဒံးမနုၤလဲၣ်.
37 ပှၤကညီတဂၤကဟ့ၣ်တၢ်အပှ့ၤမနုၤတမံၤလၢ ကမၤန့ၢ်က့ၤအသးသမူနီၢ်နီၢ်အဂီၢ်န့ၣ်လဲၣ်.
38 ပှၤတဂၤဂၤမ့ၢ်မဲာ်ဆှးယၤဒီးယတၢ်သိၣ်လိသီလိလၢစိၤလၢ အပှဲၤဒီးတၢ်တစူၢ်တနာ်ယွၤဒီးတၢ်အၢတၢ်သီအံၤန့ၣ်, ပှၤကညီဖိခွါကမဲာ်ဆှးအီၤဖဲအဝဲဟဲသကိးဒီးမူခိၣ်ကလူး စီဆှံတဖၣ်ပှဲၤဒီးပၢ်အလၤကပီၤအဆၢကတီၢ်န့ၣ်လီၤ.