4
(မး.၁၃:၁-၉; လူၤ.၈:၄-၈)
1 ယ့ၣ်ၡူးသိၣ်လီၤသီလီၤကဒီးတၢ်လၢပီၣ်လဲၣ်ကၤလံၤလါအနံၤ လီၤ. ပှၤဂီၢ်မုၢ်ဟဲပာ်ဖှိၣ်အသးဝးတရံးအီၤအါဝဲတုၤဒၣ်လဲာ်ယ့ၣ်ၡူး လဲၤနုာ်ဆူချံတဘ့ၣ်အပူၤဒီးဆ့ၣ်နီၤဝဲလီၤ. ချံန့ၣ်အိၣ်ဝဲလၢပီၣ်လဲၣ်ထံဖံးခိၣ်ဒီးပှၤဂီၢ်မုၢ်အိၣ်ဆၢ ထၢၣ်ဒိကနၣ်အီၤလၢပီၣ်လဲၣ်အနံၤန့ၣ်လီၤ.
2 အဝဲဒၣ်သိၣ်လီၤသီလီၤအဝဲသ့ၣ်တဖၣ်လၢတၢ်အါမံၤအါကလုာ်ခီ ဖျိတၢ်ကတိၤဒိတဖၣ်ဒီးလၢအတၢ်သိၣ်လီၤသီလီၤတၢ်အပူၤ, စံးဘၣ်အဝဲသ့ၣ်,
3 “ကနၣ်တက့ၢ်. ဘၣ်တဘျီပှၤအိၣ်ဝဲတဂၤလၢအဟးထီၣ်ဒီးလဲၤဖှံလီၤတၢ်ချံလီၤ.
4 ဖဲအဝဲဖှံလီၤတၢ်ချံအကတီၢ်န့ၣ်, တၢ်ချံတနီၤလီၤဘၣ်ဝဲလၢကျဲသရ့ၤ ထံးဒီးထိၣ်ဖိလံၣ်ဖိတဖၣ်ဟဲဒီးအီၣ်ကွံာ်တၢ်ချံတဖၣ်န့ၣ်လီၤ.
5 တၢ်ချံတနီၤလီၤဘၣ်ဝဲလၢလၢၢ်ကျါလ့ကျါဖဲဟီၣ်ခိၣ်အိၣ်ဒၣ်ထဲ လၢတၢ်ဖံးခိၣ်တစဲးဧိၤန့ၣ်လီၤ. ဟီၣ်ခိၣ်ညၣ်ထ့ၣ်အဂ့ၤအိၣ်ဘူတလါအဃိဒီးတယံာ်ဘၣ်န့ၣ် တၢ်ချံတဖၣ်ဟဲမဲထီၣ်ဝဲဒၣ်န့ၣ်လီၤ.
6 တုၤမုၢ်ဟဲထီၣ်ထီထီၣ်ဒီးတၢ်ကိၢ်ဆူၣ်ထီၣ်န့ၣ်, တၢ်အမုၢ်ဖိလၢအဟဲမဲထီၣ်တဖၣ်အဂံၢ်စဲၤလီၤအသးတယိာ်ဘၣ်အဃိ, ဃ့ထီကွံာ်ဝဲဒၣ်လီၤ.
7 တၢ်ချံတနီၤလီၤဘၣ်လၢတၤဆှုၣ်တၤမဲတဖၣ်အကျါလီၤ. တုၤတၤဆှုၣ်တၤမဲ အထံးဖိတဖၣ်ဒိၣ်ထီၣ်ဒီးခဲဘၢကွံာ်တၢ် အမုၢ်အဆံးဖိတဖၣ်န့ၣ်, ဒီးအဝဲသ့ၣ်ဒၢထီၣ်သၣ်ထီၣ်တန့ၢ်လၢၤဘၣ်န့ၣ်လီၤ.
8 မ့မ့ၢ်တၢ်ချံတနီၤလီၤဘၣ်ဝဲလၢဟီၣ်ခိၣ်လၢအဂ့ၤဝဲအလီၢ်သတး ဒီး, တၢ်အမုၢ်အဆံးဖိတဖၣ်ဟဲမဲထီၣ်ဒီးဒိၣ်ထီၣ်ဂ့ၤဂ့ၤကလဲာ် ဒီးသၣ်ထီၣ်ဂ့ၤမးလီၤ. အထံးတနီၤအသၣ်အိၣ်လၢအလိၤ အဖျၢၣ်သၢဆံ, အဂၤတနီၤအဖျၢၣ်ဃုဆံ, ဒီးအဂၤတဖၣ်အဖျၢၣ်လၢအကယၤန့ၣ်လီၤ.”
9 လၢခံကတၢၢ်ယ့ၣ်ၡူးစံးဝဲဒၣ်, “ပှၤလၢအအိၣ်ဒီးအနၢ်လၢ အနၢ်ဟူတၢ်သ့န့ၣ်, မ်အဒိကနၣ်တၢ်တက့ၢ်.”
(မး.၁၃:၁၀-၁၇; လူၤ.၈:၉-၁၀)
10 ဖဲယ့ၣ်ၡူးအိၣ်ဝဲထဲတဂၤဧိၤအခါ, ပှၤတနီၤလၢအနၢ်ဟူတ့ၢ်အတၢ်စံးတၢ်ကတိၤန့ၣ် ဟဲဆူအအိၣ်ဃုာ်ဒီးတၢ်မၢဖိတဆံခံဂၤဒီးသံကွၢ်အီၤတၢ် ကတိၤဒိတဖၣ်အခီပညီအိၣ်ဝဲဒ်လဲၣ်န့ၣ်လီၤ.
11 ယ့ၣ်ၡူးစံးဆၢက့ၤအဝဲသ့ၣ်, “သုဝဲသ့ၣ်အံၤတၢ်ဒုးသ့ၣ်ညါ တ့ၢ်သုတၢ်ခူသူၣ်ဘၣ်ဃးဒီးကစၢ်ယွၤအဘီအမုၢ်န့ၣ်လံ. မ့မ့ၢ်ပှၤအိၣ်လၢတၢ်ချၢတဖၣ်န့ၣ်နၢ်ဟူဒၣ်ထဲတၢ်ကတိၤဒိ တဖၣ်ဧိၤလီၤ.
12 လၢတၢ်န့ၣ်အဃိအဝဲသ့ၣ်ကကွၢ်ဝံၤကကွၢ်က့ၤကဒီး, ဘၣ်ဆၣ် တထံၣ်ဝဲဘၣ်.
အဝဲသ့ၣ်ကကနၣ်ဝံၤကနၣ်က့ၤကဒီး, ဘၣ်ဆၣ်တနၢ်ပၢၢ်ဝဲဘၣ်.
အဂ့ၢ်ဒ်အံၤ, အဝဲသ့ၣ်မ့ၢ်ထံၣ်ဒီးနၢ်ပၢၢ်ဝဲတခီကဃၣ်က့ၤ အသးဆူကစၢ်ယွၤအအိၣ်, ဒီးအဝဲဒၣ်ကပျၢ်ကွံာ်အတၢ်သရူး အတၢ်ကမၣ်လီၤ.”
(မး.၁၃:၁၈-၂၃; လူၤ.၈:၁၁-၁၅)
13 အန့ၣ်ဒီး ယ့ၣ်ၡူးသံကွၢ်အဝဲသ့ၣ်, “တၢ်ကတိၤဒိအဝဲအံၤမ့ၢ်သုတနၢ်ပၢၢ်ဘၣ်ဧါ. သုမ့ၢ်တနၢ်ပၢၢ်ဘၣ်ဒီးတၢ်ကတိၤဒိအဂၤတခါဂ့ၤတခါဂ့ၤသုနၢ် ပၢၢ်ကသ့ဒ်လဲၣ်.
14 တၢ်လၢပှၤဖှံလီၤတၢ်ချံတဂၤဖှံလီၤဝဲန့ၣ်မ့ၢ်ကစၢ်ယွၤအကလုၢ်ကထါလီၤ.
15 ပှၤတနီၤန့ၣ်လီၤဂာ်ဒီးတၢ်ချံလၢအလီၤဘၣ်လၢကျဲသရ့ၤထံး န့ၣ်လီၤ. မ့ၢ်ပှၤတဖၣ်လၢတုၤအနၢ်ဟူဘၣ်တၢ်ကစီၣ်ဝံၤတကီၢ် ခါမုၣ်ကီၤလံၢ်ဟဲဒီးစိာ်ကွံာ်ယွၤအကလုၢ်ကထါလၢအလီၤ ဘၣ်လၢအဝဲသ့ၣ်အပူၤလီၤ.
16 အဂၤတနီၤလီၤဂာ်ဒီး တၢ်ချံလၢအလီၤဘၣ်လၢလၢၢ်ကျါလ့ကျါ အသိးဒီးမ့ၢ်ပှၤတဖၣ်လၢတုၤမ့ၢ်အနၢ်ဟူဘၣ်တၢ်ကစီၣ်န့ၣ်, တူၢ်လိာ်ဝဲချ့သဒံးပှဲၤဒီးတၢ်သူၣ်ခုသးခုလီၤ.
17 ဘၣ်ဆၣ်ဒီးယွၤအကလုၢ်ကထါန့ၣ်တပျဲနုာ်ဝဲယိာ်ယိာ်လၢ အပူၤဘၣ်သတးဒီး, တအိၣ်ကၢအိၣ်ခိးယံာ်ယံာ်ဘၣ်. တုၤမ့ၢ်တၢ်မၤကွၢ်ဒီးတၢ်မၤအၢမၤနးဟဲတုၤအိၣ်အဝဲသ့ၣ် လၢတၢ်တူၢ်လိာ်ယွၤအကလုၢ်ကထါအဃိဒီး, အဝဲသ့ၣ်ညိကွံာ်တၢ်ကစီၣ်န့ၣ်တဘျီဃီလီၤ.
18 အန့ၣ်ဝံၤပှၤအိၣ်ဒံးအဂၤတနီၤလၢအလီၤဂာ်ဒီးတၢ်ချံလၢ အလီၤဘၣ်ဖဲတၤဆှုၣ်တၤမဲအကျါန့ၣ်လီၤ. အဝဲသ့ၣ်အံၤမ့ၢ်ပှၤတဖၣ်လၢအနၢ်ဟူဘၣ်ယွၤအကလုၢ်ကထါ,
19 ဘၣ်ဆၣ်ဒီးတၢ်ကိၢ်တၢ်ဂီၤဘၣ်ဃးဟီၣ်ခိၣ်တစိၤအံၤ, တၢ်မိၣ်န့ၢ်သးလီတၢ်ထူးတၢ်တီၤဒီးကယဲၢ်တၢ်မိၣ်န့ၢ်သးလီတၢ် အဂုၤအဂၤတဖၣ်ခဲလၢာ်န့ၣ်ခဲဘၢကွံာ်ယွၤ အကလုၢ်ကထါဒီးသူထီၣ်သၣ်ထီၣ်တသ့လၢၤဘၣ်န့ၣ်လီၤ.
20 မ့မ့ၢ်ပှၤအဂၤတဖၣ်လီၤဂာ်ဒီးတၢ်ချံလၢအလီၤဘၣ်ဖဲဟီၣ်ခိၣ် လၢအဂ့ၤဝဲအလီၢ်လီၤ. တုၤအဝဲသ့ၣ်နၢ်ဟူယွၤအကလုၢ်ကထါ ဒီး တူၢ်လိာ်ဝဲဝံၤသူထီၣ်သၣ်ထီၣ်ဝဲလီၤ. အထံးတနီၤသၣ်ထီၣ်ဝဲ အဖျၢၣ်သၢဆံ, တနီၤအဖျၢၣ်ဃုဆံဒီးတနီၤအဖျၢၣ်တကယၤလီၤ.
(လူၤ.၈:၁၆-၁၈)
21 ယ့ၣ်ၡူးစံးဘၣ်ကဒီးအဝဲသ့ၣ်, “မ့ၢ်ပှၤဟဲစိာ်နုာ်မ့ၣ်အူဒၢတဖျၢၣ်ဆူဒၢးပူၤ ဒီးပာ်အီၤလၢနာ်တဖျၢၣ်မ့တမ့ၢ်လီၢ်မံခးတဖျၢၣ်အဖီလာ်န့ၣ်ဧါ. မ့ၢ်အတပာ်ထီၣ်အီၤလၢမ့ၣ်အူဒၢအလီၢ်န့ၣ်ဘၣ်ဧါ.
22 တၢ်တမံၤလၢ်လၢ်လၢတၢ်ပာ်ခူသူၣ်ဃာ်အီၤန့ၣ်ကဘၣ်တၢ်ထုးဖျါထီၣ်အီၤ, ဒီးတၢ်တမံၤလၢ်လၢ်လၢအဘၣ်တၢ်ကျၢၢ်ဘၢဃာ်အီၤန့ၣ် အခိၣ်ကၢၢ်ကဘၣ်တၢ်ထုးကွံာ်အီၤဒီးကအိၣ်ဖျါလၢခိလီၤ.
23 ပှၤလၢအအိၣ်ဒီးအနၢ်လၢအနၢ်ဟူတၢ်သ့န့ၣ်, မ်အဒိကနၣ်တၢ်တက့ၢ်.”
24 အဝဲဒၣ်စံးဘၣ်စ့ၢ်ကီးအဝဲသ့ၣ်, “တၢ်လၢသုနၢ်ဟူဘၣ်အံၤန့ၣ်ကနၣ်အီၤထံထံဆးဆးတက့ၢ်. သုအိၣ်ဒီးနီၣ်ထိၣ်တဖၣ်လၢသုကစံၣ်ညီၣ်ပှၤဂၤတဖၣ်အဂီၢ်လီၤ. ကစၢ်ယွၤကစံၣ်ညီၣ်သုဒ်သုနီၣ်ထိၣ်န့ၣ်အသိးဒီးကဆူၣ်န့ၢ်ဒံး အဝဲန့ၣ်တက့ၢ်လီၤ.
25 ပှၤလၢအတၢ်အိၣ်တဂၤန့ၣ်တၢ်ကဟ့ၣ်အါထီၣ်အီၤတၢ်လီၤ. ဒီးပှၤလၢအတၢ်တအိၣ်ဘၣ်တဂၤန့ၣ်, တၢ်တစဲးဖိလၢအအိၣ်ဒီးအီၤဒၣ်လဲာ်, ကဘၣ်တၢ်ဟံးထီၣ်ကွံာ်လၢအအိၣ်လီၤ.”
26 ယ့ၣ်ၡူးစံးကဒီးဝဲ, “တၢ်လၢကစၢ်ယွၤအဘီအမုၢ်န့ၣ်မၤအသးဒ်အံၤလီၤ. ပှၤကညီတဂၤဖှံလီၤတၢ်ချံလၢအဟီၣ်ခိၣ်အလိၤလီၤ.
27 လၢမုၢ်နၤအဝဲဒၣ်မံဝဲ, ဒီးလၢမုၢ်ဆ့ၣ်ထီၣ်န့ၣ်ဂဲၤဆၢထၢၣ်ဝဲဒီးလဲၤက့ၤဖံးမၤတၢ်ဒီနံၤညါလီၤ. ဒီးဖဲန့ၣ်ဒီကတီၢ်ညါတၢ်ချံန့ၣ်မဲထီၣ်ဒီးအထံးဖိဒိၣ်ထီၣ်ထီထီၣ်ဝဲလီၤ. သနာ်က့တၢ်ကဲထီၣ်အသးဒ်အံၤဟဲလၢကျဲဒ်လဲၣ်န့ၣ်တသ့ၣ်ညါဝဲဘၣ်.
28 တၢ်အမုၢ်ဖိတဖၣ်န့ၣ်ဟီၣ်ခိၣ်ဒုးမဲထီၣ်ဒီးဒုးသၣ်ထီၣ်ဒၣ်အတၢ်လီၤ. အဆိန့ၣ်အပျိာ်ဟဲထီၣ်, အန့ၣ်ဝံၤအစဲၤ, ဒီးလၢခံကတၢၢ်အသၣ်အိၣ်ပှဲၤ အစဲၤလိၤလီၤ.
29 တုၤအသၣ်တဖၣ်ဂီၤထီၣ်ဒီး အဝဲစိာ်ထီၣ်အထါဂဲာ်ဒီးလဲၤကူးဝဲဒၣ်, မ့ၢ်လၢကူးဘုအဆၢကတီၢ်ဘၣ်လံအဃိလီၤ.
(မး.၁၃:၃၁-၃၂,၃၄; လူၤ.၁၃:၁၈-၁၉)
30 ယ့ၣ်ၡူးစံးစ့ၢ်ကီးဝဲ, “တၢ်လၢကစၢ်ယွၤအဘီအမုၢ်အံၤ မ့ၢ်ပကစံးလၢအလီၤဂာ်ဒီးတၢ်မနုၤတမံၤလဲၣ်. ပကသူတၢ်ကတိၤဒိမနုၤလၢပကတဲဖျါအဂ့ၢ်အဂီၢ်လဲၣ်.
31 မ့ၢ်အမၤအသးဒ်သဘၣ်ချံဖိတဖျၢၣ်လၢအမ့ၢ်တၢ်ချံအဆံး ကတၢၢ်လၢတၢ်ချံခဲလၢာ်အကျါလၢအဘၣ်တၢ်ဖှံလီၤ အီၤလၢဟီၣ်ခိၣ်အလိၤလီၤ.
32 သနာ်က့တုၤမ့ၢ်အမဲထီၣ်ဒီးဒိၣ်ထီၣ်န့ၣ်ကဲထီၣ်ဝဲတၢ် အမုၢ်အဒိၣ်ကတၢၢ်လၢတၢ်မုၢ်တၢ်ဘိခဲလၢာ်တဖၣ်အကျါ န့ၣ်လီၤ. အဒ့ဖးဒိၣ်တဖၣ်ဟဲထီၣ်လၢအလိၤတုၤဒၣ်လဲာ် ထိၣ်ဖိလံၣ်ဖိတဖၣ်ဟဲမၤအသွံလၢအဒ့တဖၣ်အလိၤသ့ဝဲန့ၣ် လီၤ.”
33 ယ့ၣ်ၡူးစံးဘၣ်တဲဘၣ်အဝဲသ့ၣ်လၢယွၤအကလုၢ်အကထါ ဒီးသူဝဲတၢ်ကတိၤဒိဒ်သိးအံၤတဖၣ်အါမးဖဲအဝဲသ့ၣ်နၢ်ပၢၢ် ဝဲသ့အတီၤန့ၣ်လီၤ.
34 မ့တမ့ၢ်ဘၣ်လၢတၢ်ကတိၤဒိတဖၣ်ဘၣ်ဒီး, အဝဲဒၣ်တသိၣ်လီၤသီလီၤအဝဲသ့ၣ်လၢတၢ်နီတမံၤဘၣ်. မ့မ့ၢ်တုၤအအိၣ်ဒၣ်ထဲအဝဲဒၣ်ဒီးအပျဲၢ်အဘီၣ်တဖၣ်န့ၣ်, ကတိၤဖျါထီၣ်တၢ်အခီပညီတဖၣ်ခဲလၢာ်လၢအဝဲသ့ၣ်လီၤ.
(မး.၈:၂၃-၂၇; လူၤ.၈:၂၂-၂၅)
35 တနံၤဃီအဝဲန့ၣ်လၢဟါခီအကတီၢ်, ယ့ၣ်ၡူးစံးဘၣ်အပျဲၢ်အဘီၣ် တဖၣ်, “မ်ပကလဲၤခီဃီၤဆူပီၣ်လဲၣ်ဝၢ်ဘးခီတက့ၢ်.”
36 အန့ၣ်ဝံၤအဝဲသ့ၣ်ဟးထီၣ်ကွံာ်လၢပှၤဂီၢ်မုၢ်အကျါလီၤ. အပျဲၢ်အဘီၣ်တဖၣ်ဒိးထီၣ်ချံတဘ့ၣ်ဃီလၢယ့ၣ်ၡူးအိၣ်ပာ်တ့ၢ်လံ လၢအပူၤဒီးခီသကိးပီၣ်လဲၣ်ဒီးအီၤလီၤ. ချံအဂၤတဖၣ် အိၣ်စ့ၢ်ကီးဖဲန့ၣ်လီၤ.
37 သတူၢ်ကလာ်ကလံၤမုၢ်တွၤဖးဒိၣ်လီၤဝဲဒၣ်ဒီးပီၣ်လဲၣ်လပီတဖၣ် စံၣ်စုးဘၣ်ချံန့ၣ်တုၤဒၣ်လဲာ်ထံဟဲနုာ်ဘူးကပှဲၤမးချံအပူၤန့ၣ်လီၤ.
38 ယ့ၣ်ၡူးအိၣ်ဝဲလၢချံခံတခီ, ပာ်လီၤအခိၣ်လၢခိၣ်တခၢၣ်တဖျၢၣ်အလိၤဒီးမံဘၣ်အသးလီၤ. အပျဲၢ်အဘီၣ်တဖၣ်ထိၣ်ဂဲၤထၢၣ်အီၤဒီးစံးဘၣ်အီၤ, “သရၣ်ဧၢ, ပကသံဘၣ်ပသးအံၤန့ၣ်မ့ၢ်နဲနတကိၢ်တဂီၤဘၣ်ဧါ.”
39 ယ့ၣ်ၡူးဂဲၤဆၢထၢၣ်ဒီးဒူကလံၤအလိၤဒီးစံးဘၣ်ပီၣ်လဲၣ်ဒီးလပီန့ၣ်, “အိၣ်ဘှီၣ်ဒီးအိၣ်ဂၢၢ်တက့ၢ်.” ဒီးကလံၤမုၢ်န့ၣ်တုာ်ဝဲဒီးတၢ်ခဲလၢာ်အိၣ်က့ၤဂၢၢ်တပၢၢ်လီၤ.
40 ယ့ၣ်ၡူးစံးဘၣ်အပျဲၢ်အဘီၣ်တဖၣ်န့ၣ်, “ဘၣ်မနုၤလၢသုပျံၤတၢ်လဲၣ်. တုၤခဲအံၤသုတၢ်နာ်ဘၣ်မနုၤလၢအတအိၣ်ဘၣ်န့ၣ်လဲၣ်.”
41 မ့မ့ၢ်အဝဲသ့ၣ်တဖၣ်ပျံၤတၢ်ဒိၣ်ဒိၣ်ကလဲာ်ဒီးစံးလိာ်အသးတဂၤဒီးတဂၤ, “ပှၤတဂၤအံၤ မ့ၢ်ပှၤဒ်လဲၣ်တဂၤလဲၣ်. ကလံၤသီၣ်ဂီၤဒီးပီၣ်လဲၣ်လပီတဖၣ်ဒၣ်လဲာ်ဒိကနၣ်အကလုၢ်လီၤမးလဲၣ်.”