2
1 ပှၤလၢအဆိကမိၣ်ထီၣ်တၢ်တတီတလိၤဒီးကူၣ် ထီၣ်တၢ်အၢလၢအလီၢ်မံပူၤတဖၣ်န့ၣ်, လီၤပျံၤလီၤဖုးဆံးဒိၣ်လဲၣ်. တုၤမုၢ်ဆ့ၣ်ဝါထီၣ်ဒီးအဝဲမၤန့ၢ်ဘၣ်တၢ်ခွဲးတၢ်ယာ်တဘျီဃီန့ၣ်, မၤတၢ်အၢဒ်ကူၣ်ကျဲၤပာ်ဝဲအသိးလီၤ.
2 ဖဲအသးလီစံာ်ဧိၤပှဲၤဧိၤတဖၣ်န့ၣ်, ဂုာ်န့ၢ်ဆူၣ်ဝဲလီၤ. ဖဲအသးလီဟံၣ်ဧိၤဃီဧိၤတဖၣ်န့ၣ်ဟံးန့ၢ်ကွံာ်ဝဲလီၤ. တပျဲပူၤဘၣ်ပှၤအဟံၣ်အဃီဒီးအစုလီၢ်ခီၣ်ခိၣ်နီတဂၤဘၣ်.
3 မၤသးဒ်န့ၣ်ဒီးယွၤစံးဝဲဒၣ်, “ယကူၣ်ထီၣ်ကျဲၤလီၤလၢယက ဟဲစိာ်တၢ်နးတၢ်ဖှီၣ်လၢသုလိၤ, ဒီးသုဂုာ်ထူၣ်ဖျဲးလၢအီၤ တသ့ဘၣ်. သုကထံၣ်လီၤသုသးလၢသုအိၣ်လၢတၢ်ကီတၢ်ခဲ အပူၤသတးဒီးသုတဟးလၢၤဘၣ်လၢတၢ်သးထီၣ်ထီအပူၤနီတစုဘၣ်.
4 ဖဲတၢ်ဆၢကတီၢ်န့ၣ်ဟဲတုၤဝဲဒီး, ပှၤကသူတၢ်တဲပူဘၣ်ဃးဒီးသုဂ့ၢ်ဒ်တၢ်ဟးဂူာ်ဟးဂီၤအဒိအတဲာ် တမံၤ, ဒီးအဝဲသ့ၣ်ကသးဝံၣ်တၢ်သးဟးဂီၤအတၢ် သးဝံၣ်ဘၣ်ဃးဒီးသုတၢ်လဲၤခီဖျိအဂ့ၢ်ဒ်အံၤလီၤ. ပဟးဂီၤလၢာ်လၢာ်ဆ့ဆ့လံ. ယွၤဟံးထီၣ်ကွံာ်ပစံာ်လီၢ်ပှဲၤလီၢ်တဖၣ်. ဒီးဟ့ၣ်လီၤကွံာ်အီၤဆူပှၤလၢအစိာ်မၢကဲကုၢ်ပှၤတဖၣ်အအိၣ်န့ၣ်လီၤ.”
5 မၤသးဒ်န့ၣ်ဒီး, ဖဲအကတီၢ်တုၤဝဲလၢစံာ်လီၢ်ပှဲၤလီၢ်တဖၣ်ဘၣ်တၢ် ဟ့ၣ်ကဒါက့ၤဆူယွၤအပှၤဂီၢ်မုၢ်န့ၣ်, တၢ်နီၤဖးတအိၣ်နီတမံၤလၢသုဂီၢ်နီတဂၤဘၣ်.
6 ပှၤဂီၢ်မုၢ်ကတိၤကလီကလီတၢ်ဒီးယၤဒီးစံး, “စံၣ်တဲၤတဲလီၤတၢ်လၢပှၤတဂ့ၤ. စံၣ်တဲၤတဲလီၤကယဲၢ်တၢ်ဂ့ၢ်တဖၣ်န့ၣ်တဂ့ၤ. ကစၢ်ယွၤတမၤမဲာ်ဆှးဘၣ်ပှၤဘၣ်.
7 မ့ၢ်သုဆိကမိၣ်လၢအံၣ်စရ့လးအပှၤဂီၢ်မုၢ်အိၣ်လၢတၢ်ဆိၣ် အၢတမံၤအဖီလာ်ဧါ. မ့ၢ်ယွၤအတၢ်ဝံသးစူၤလီၤမၢ်ကွံာ်လံဧါ. မ့ၢ်အဝဲကမၤတၢ်တဖၣ်န့ၣ်သပှၢ်တၢၢ်ဧါ. မ့ၢ်ယွၤတကတိၤတၢ်မုာ်မုာ်ဒီးပှၤလၢအမၤတၢ်အလိၤအဘၣ်တဖၣ်ဘၣ် ဧါ.”
8 ယွၤစံးဝဲ, “သုဒုးတၢ်ထီဒါယပှၤဂီၢ်မုၢ်ဒ်ဒုၣ်ဒါတဖၣ်အသိးလီၤ. ပှၤဟဲက့ၤလၢတၢ်ဒုးတဖၣ်, ဆိကမိၣ်ဝဲတၢ်ပူၤဖျဲးအိၣ်လၢဟံၣ် လီၤ. ဘၣ်ဆၣ်သုခိးတၢ်ဖဲန့ၣ်ဒ်သိးသုကဂုာ်န့ၢ်အတၢ်ကူ တၢ်သိးတဖၣ်လၢအလိၤလီၤ.
9 သုနီၣ်ကွံာ်ယပှၤဂီၢ်မုၢ်အပိာ်မုၣ်တဖၣ်လၢအဟံၣ်မုာ်ဒီးသုတြီ တ့ၢ်အဖိအလံၤတဖၣ်တဘိယူာ်ဃီလၢကအိၣ်ဒီးယတၢ်ဆိၣ်ဂ့ၤ တဖၣ်လီၤ.
10 ဂဲၤဆၢထၢၣ်ဒီးဟးထီၣ်ကွံာ်တက့ၢ်. တၢ်ပူၤဖျဲးတအိၣ်လၢၤဘၣ်ဖဲအံၤဘၣ်. သုတၢ်ဒဲးဘးတဖၣ်ဒုးလီၤဘၣ်တၢ်စံၣ်ညီၣ်ဃါမနၤဖဲတၢ်လီၢ်အံၤဆူ တၢ်ဟးဂူာ်ဟးဂီၤလီၤ.
11 ပှၤဂီၢ်မုၢ်တဖၣ်အံၤအဲၣ်ဒိးဝဲဒၣ်ဝံတကလုာ်လၢအလဲၤဝ့ၤဝီၤတၢ်, အိၣ်ပှဲၤဒီးတၢ်လီတၢ်ဝ့ၤဒီးတၢ်ကဘျံးကဘျၣ်ဒီးစံး, “ယကတိၤဝံအကျိာ်ဒ်သိးစပံးထံဒီးသံးကယွၤလီၤလၢသုဂီၢ် လီၤ”.
12 “ဘၣ်ဆၣ်ဒီးယကထၢဖှိၣ်က့ၤကီၢ်အံၣ်စရ့လးအပှၤဂီၢ်မုၢ်လၢ အအိၣ်လီၤတဲာ်တ့ၢ်တဖၣ်တပူၤဃီလီၤ. ယကဟဲက့ၤစိာ်သုဆူ တၢ်လီၢ်တပူၤဃီဒ်သိလၢအဟဲက့ၤဆူသိကရၢၢ်ပူၤအသိးလီၤ. ဒ်အီၣ်ဆၣ်အလီၢ်တဖၣ်အိၣ်ပှဲၤဝဲလၢသိတဖၣ်အသိးန့ၣ်သု ကီၢ်အံၤကပှဲၤကဒီးတဘျီလၢပှၤဂီၢ်မုၢ်တဖၣ်လီၤ”.
13 ယွၤကအိးထီၣ်ကျဲလၢအဝဲသ့ၣ်အဂီၢ်ဒီးဆှၢပူၤထီၣ်အီၤလၢတၢ် စိာ်မၢကဲကုၢ်အလီၢ်န့ၣ်လီၤ. အဝဲသ့ၣ်ကလဲၤဖျိကွံာ်ဝ့ၢ်အတြဲၤတဖၣ်ဒီးဟးထီၣ်လၢတၢ်သဘျ့ အပူၤလီၤ. အဝဲသ့ၣ်အစီၤပၤ, ယွၤအနီၢ်ကစၢ်ဒၣ်ဝဲကဆှၢထီၣ်အီၤလီၤ.