26
(သိၣ်သီ.၇:၁၂-၂၄ , ၂၈:၁-၁၄)
1 ဒီးယွၤစံးဝဲဒၣ်, “တၢ်ဂီၤတၢ်ဖီၣ်မ့ၢ်ဂ့ၤ, တၢ်ဂီၤစိးပျၤအသးမ့ၢ်ဂ့ၤသုတတ့လၢသုဂီၢ်တဂ့ၤ. ဒီးသုတပာ်ဆၢထၢၣ်တၢ်ဂီၤအထူၣ်တဂ့ၤ, ဒီးသုတပာ်လၢၢ်အိၣ်ဒီး တၢ်ဂီၤလၢအလိၤလၢသုကီၢ်ပူၤဒ်သိးသုကဘါအီၤန့ၣ်တဂ့ၤ.
2 အဂ့ၢ်ဒ်အံၤ, ယဲဒၣ်အံၤယမ့ၢ်ယွၤသုကစၢ်ယွၤန့ၣ်လီၤ. သုဘၣ်တိၢ်န့ၢ်ယမုၢ်အိၣ်ဘှံးနံၤတဖၣ်ဒီးယူးယီၣ်ယလီၢ်စီဆှံလီၤ. ယဲဒၣ်အံၤယမ့ၢ်ယွၤလီၤ.
3 သုမ့ၢ်အိၣ်မူဒ်ယတၢ်သိၣ်တၢ်သီအသိးဒီးတိၢ်န့ၢ်ယတၢ်မၤလိာ်တဖၣ်န့ၣ်,
4 ယကဟ့ၣ်လီၤသုလၢတၢ်စူၤလၢအကတီၢ်ဒၣ်ဝဲဒ်သိးဟီၣ်ခိၣ်ကဟ့ၣ်ထီၣ် အတၢ်အါထီၣ်ဒီးသ့ၣ်ကသၣ်ထီၣ်အဂီၢ်လီၤ.
5 သုတၤသူတၤသၣ်တဖၣ်ကအိၣ်ပှဲၤလုၣ်ကွံာ်တုၤ, သုကကူးဒံးဘုဧိၤဟုဧိၤဖဲတၢ်ဒဲးစပံးသၣ်တဖၣ်အကတီၢ်, ဒီးသုကဒဲးဒံးစပံးသၣ်တဖၣ်ဖဲတၢ်သူၣ်လီၤဘုဧိၤဟုဧိၤအကတီၢ်န့ၣ်လီၤ. သုကအိၣ်ဒီးတၢ်လၢသုအဲၣ်ဒိးအီၣ်အီၤခဲလၢာ်, ဒီးသုကအိၣ်ဆိးပူၤဖျဲးလၢသုထံသုကီၢ်အပူၤန့ၣ်လီၤ.
6 ဒီးယကဟ့ၣ်လီၤသုလၢတၢ်ဃူတၢ်ဖိးလၢသုထံဧိၤကီၢ် ဧိၤအပူၤ, ဒီးသုကမံဒီးပှၤတမၤပျံၤမၤဖုးဘၣ်သုနီတဂၤဘၣ်. ဒီးယကဒုးဟးထီၣ်ကွံာ်ဆၣ်ဖိကီၢ်ဖိအအၢလၢသုကီၢ်ပူၤ, ဒီးတၢ်ဒုးတၢ်ယၤတအိၣ်လၢၤဘၣ်လၢသုကီၢ်ပူၤဘၣ်.
7 သုကမ့ၢ်ပှၤလၢအမၤနၢၤသုဒုၣ်သုဒါတဖၣ်လီၤ.
8 ဒီးပှၤယဲၢ်ဂၤလၢသုကျါကမၤနၢၤပှၤတကယၤ, ဒီးပှၤတကယၤကမၤနၢၤပှၤတကလးန့ၣ်လီၤ.
9 ဒီးယကဆိၣ်ဂ့ၤသုဒီးဟ့ၣ်သုလၢဖိတဖၣ်အါအါဂီၢ်ဂီၢ်လီၤ. ယကဟံးဃာ်ယတၢ်အၢၣ်လီၤအီလီၤလၢယမၤဒီးသုန့ၣ်လီၤ.
10 သုဘုဧိၤဟုဧိၤတဖၣ်ကအိၣ်အါအါကလဲာ်တုၤဒၣ်လဲာ်သုအီၣ်အီၤ ဒီတနံၣ်ညါတလၢာ်ဘၣ်အဃိသုကဘၣ်စူးကွံာ်အီၤဒ်သိးသုကပာ်ဖှိၣ် က့ၤသုဘုဧိၤဟုဧိၤအသီတဖၣ်အဂီၢ်န့ၣ်လီၤ.
11 ယကအိၣ်လၢသုကျါလၢယဒဲစီဆှံ အပူၤဒီးယတဃၣ်ကွံာ်ယသးလၢသုနီတစုဘၣ်.
12 ဒီးယကအိၣ်ဒီးသု, ယကမ့ၢ်သုကစၢ်ယွၤဒီးသုကမ့ၢ်ယပှၤဂီၢ်မုၢ်လီၤ.
13 ယဲဒၣ်အံၤယမ့ၢ်ယွၤ, သုကစၢ်ယွၤလၢအဒုးဟးထီၣ်ကွံာ်သုလၢကီၢ်အဲၤကူပတူးပူၤ, ဒ်သိးသုသုတမ့ၢ်လၢၤအဝဲသ့ၣ်အကုၢ်အပှၤတဂ့ၤလီၤ. ဒီးယမၤကၢ်လံသုနီၣ်ယိးအဘိတဖၣ်ဒီးဒုးလဲၤသု တၢ်ထူၣ်ကလာ်လီၤ.”
(သိၣ်သီ.၂၈:၁၅-၆၈)
14 ဒီးယွၤစံးဝဲဒၣ်, “သုမ့ၢ်တဒိကနၣ်ယတၢ်မၤလိာ်တဖၣ်န့ၣ်သုကဘၣ်တၢ်စံၣ်ညီၣ်န့ၣ်လီၤ.
15 သုမ့ၢ်တဒိကနၣ်ယတၢ်သိၣ်တၢ်သီဒီးယတၢ်မၤလိာ်, ဒီးလုၢ်သ့ၣ်ခါပတာ်ယတၢ်အၢၣ်လီၤအီလီၤလၢယမၤဒီးသုန့ၣ်,
16 ယကစံၣ်ညီၣ်သုလီၤ. ယကဟဲစိာ်တၢ်နးတၢ်ဖှီၣ်လၢသုလိၤဒ်တၢ်ဆါလၢအဘျါတသ့, တၢ်လိၤကိၢ်လၢအကမၤဘျီၣ်သုမဲာ်, ဒီးဟံးထီၣ်ကွံာ်သုသးသမူန့ၣ်လီၤ. သုကသူၣ်လီၤဖျးလီၤဘုဧိၤဟုဧိၤဘၣ်ဆၣ်ကကဲထီၣ်တၢ်ကလီကလီလီၤ. အဂ့ၢ်ဒ်အံၤ, သုဒုၣ်သုဒါကမၤနၢၤသုဒီးအီၣ်ကွံာ်တၢ်လၢသုသူၣ်လီၤတဖၣ်န့ၣ်လီၤ.
17 ဒီးယကဃၣ်ဒူချၢယသးလၢသုဒ်သိးသုကဘၣ်တၢ်မၤနၢၤသု ဒီးပှၤလၢအသးဟ့သုကပၢသုလီၤ. သုကပျံၤတၢ်ဖုးတၢ်တုၤဒၣ်လဲာ်ပှၤမ့ၢ်တလူၤသုဘၣ်ဆၣ်, သုကဃ့ၢ်လီၤ.
18 ဒီးတၢ်စံၣ်ညီၣ်လၢထးတဖၣ်အံၤဘၣ်သုဒၣ်လဲာ်န့ၣ်သုမ့ၢ်တဒိ ကနၣ်ဘၣ်ယၤဒီး, ယကမၤအါထီၣ်တၢ်စံၣ်ညီၣ်နွံဘျီလၢသုဂီၢ်လီၤ.
19 ဒီးယကမၤကၢ်ကွံာ်သုသးထီၣ်ထီန့ၣ်လီၤ. တၢ်တစူၤလၢၤဘၣ်ဒီးသုဟီၣ်ခိၣ်ကဃ့ထီကွံာ်ဝဲဒ်ထးအသိးန့ၣ်လီၤ.
20 ဒီးသုတၢ်မၤတၢ်လၢာ်ဂံၢ်လၢာ်ဘါကမ့ၢ်တၢ်ကလီကလီလီၤ. အဂ့ၢ်ဒ်အံၤ, သုဟီၣ်ခိၣ်တဟ့ၣ်ထီၣ်တၤသူတၤသၣ်နီတမံၤ ဘၣ်ဒီးသုသ့ၣ်အထံးတဖၣ်တသၣ်ထီၣ်ဝဲဒၣ်ဘၣ်.
21 သုမ့ၢ်ထီဒါဒံးယၤဒီးတဒိကနၣ်ဘၣ်ယၤန့ၣ်, ယကမၤအါထီၣ်ကဒီးတၢ်စံၣ်ညီၣ်နွံဘျီန့ၣ်လီၤ.
22 ဒီးယကဆှၢလီၤဆၣ်ဖိကီၢ်ဖိအမံၤလၢသုကျါဒီးကမၤသံသုဖိ သုလံၤ, ဒီးမၤဟးဂီၤကွံာ်သုဆၣ်ဖိကီၢ်ဖိအဒၢဒီးမၤစှၤလီၤသု ဒ်သိးသုကျဲတဖၣ်ကအိၣ်သယုၢ်အဂီၢ်လီၤ.
23 ဒီးတၢ်စံၣ်ညီၣ်လၢထးတဖၣ်အံၤ ဘၣ်သုဒၣ်လဲာ်န့ၣ်သုမ့ၢ်တဒိကနၣ်ဒံးဘၣ်ယၤဒီးထီဒါယၤန့ၣ်,
24 ယကဃၣ်ဒူချၢယသး လၢသုဒီးစံၣ်ညီၣ်သုနးန့ၢ်ဒံးတၢ်စံၣ်ညီၣ်လၢညါနွံဘျီန့ၣ်လီၤ.
25 ဒီးယကဟဲစိာ်တၢ်ဒုးတၢ်ယၤလၢအမ့ၢ်တၢ်စံၣ်ညီၣ်သုလၢသု လုၢ်သ့ၣ်ခါပတာ်ယတၢ်အၢၣ်လီၤအီလီၤအဃိန့ၣ်လီၤ. ဒီးသုမ့ၢ်ပာ်ဖှိၣ်ထီၣ်သုသးလၢသုဝ့ၢ်တဖၣ်အပူၤလၢ တၢ်ပူၤဖျဲးအဂီၢ်ဒီးယကဆှၢလီၤတၢ်ဆါသံသတြိာ်လၢသုကျါဒီး သုကဘၣ်တၢ်မၤဆူၣ်သုဒီးဟ့ၣ်လီၤကွံာ်သုဆူသုဒုၣ်သုဒါအစုပူၤန့ၣ်လီၤ.
26 ယကဆိကတီၢ်ကွံာ်တၢ်ဟ့ၣ်လီၤသုတၢ်အီၣ်တၢ်အီတုၤဒၣ်လဲာ် ပိာ်မုၣ်ဆံဆဲၣ်ဂၤကကုၢ်ကိၣ်လၢဖၣ်ကပူၤတပူၤဃီအပူၤလီၤ. အဝဲသ့ၣ်ကစီၤန့ၢ်ဒီးနီၤလီၤသုလၢကိၣ်ဒီးသုကအီၣ်အီၤဘၣ်ဆၣ်သုတဘျဲးအီၣ်ဘၣ်န့ၣ်လီၤ.
27 ဒီးလၢတၢ်အံၤအဃိဒၣ်လဲာ်သုမ့ၢ်တဒိကနၣ်ယတၢ်မၤလိာ်တဖၣ်ဒီးထီဒါယၤဒံးန့ၣ်,
28 ယကဃၣ်ယသးဆူသုအိၣ်လၢတၢ်သးထီၣ်အပူၤဒီးစံၣ်ညီၣ်သုအၢန့ၢ်ဒံးအလီၢ်နွံဘျီန့ၣ်လီၤ.
29 ဒီးတၢ်ကသၣ်ဝံၤသုသးတုၤဒၣ် လဲာ်သုကအီၣ်က့ၤသုဖိဒၣ်သုဝဲလီၤ.
30 ယကမၤဟးဂီၤကွံာ်သုတၢ်ဘူၣ်တၢ်ဘါအလီၢ်တဖၣ်လၢကစၢၢ်အလိၤ, ယကကူၢ်လီၤကွံာ်သုတၢ်လုၢ်နၢမူအလီၢ်တဖၣ်ဒီးကွံာ်လီၤသုစိၣ် တဖၣ်လၢတၢ်ဂီၤတၢ်ဖီၣ်တဖၣ်အလိၤန့ၣ်လီၤ. ဒီးယကသးဘၣ်အၢသုလီၤ.
31 ဒီးယကမၤဟးဂီၤကွံာ်သုဝ့ၢ်တဖၣ်, သုတၢ်ဘူၣ်တၢ်ဘါအလီၢ်တဖၣ် ဒီးယတတူၢ်လိာ်သုတၢ်လုၢ်တၢ်ပာ်တဖၣ်န့ၣ်ဘၣ်.
32 ဒီးယကမၤဟးဂီၤကွံာ်သုထံဧိၤကီၢ်ဧိၤလၢာ်လၢာ်ဆ့ဆ့တုၤ ဒၣ်လဲာ်သုဒုၣ်သုဒါတဖၣ်လၢအမၤန့ၢ်အီၤန့ၣ်ကကမၢကမၣ်ဝဲလီၤ.
33 ဒီးယကဟဲစိာ်တၢ်ဒုးတၢ်ယၤဒီးသုကလီၤပြ လီၤပြါဆူပှၤကလုာ်ဂၤအကျါလီၤ. သုထံဧိၤကီၢ်ဧိၤကအိၣ်သယုၢ်ဒီးသုဝ့ၢ်တဖၣ်ကအိၣ်လၢတၢ်ဟးဂီၤ အပူၤန့ၣ်လီၤ. လီၤပြါဆူပှၤကလုာ်ဂၤအကျါလီၤ. သုထံဧိၤကီၢ်ဧိၤကအိၣ်သယုၢ်ဒီးသုဝ့ၢ်တဖၣ်ကအိၣ်လၢတၢ်ဟးဂီၤ အပူၤန့ၣ်လီၤ.
34 တုၤနုၤတစုထံကီၢ်ကမုာ်လၤသးခုလၢအနံၣ်အိၣ်ဘှံးအလၢအပှဲၤ တဖၣ်အပူၤ, လၢသုတဟ့ၣ်အီၤဘၣ်န့ၣ်လီၤ.
35 ကီၢ်န့ၣ်ကဘၣ်တၢ်ပာ်လီၤတဲာ်တ့ၢ်အီၤဒီးမၤန့ၢ်အတၢ်အိၣ်ဘှံးဖဲ သုအိၣ်လၢတၢ်စိာ်မၢကဲကုၢ်အပူၤလၢသုဒုၣ်သုဒါတဖၣ်အကီၢ်ပူၤ အခါန့ၣ်လီၤ.
36 ဒီးသုဝဲပှၤလၢအအိၣ်လၢဒုၣ်ဒါအကီၢ်ပူၤတဖၣ်န့ၣ်ယကမၤပျံၤမၤဖုးသုတုၤဒၣ်လဲာ်သ့ၣ်လၣ်ဟူး ဝးအသီၣ်န့ၣ်ကဒုးထွးထီၣ်ဃ့ၢ်သုန့ၣ်လီၤ. သုကဃ့ၢ်ဒ်သုဘၣ်တၢ်လူၤဖီၣ်န့ၢ်သုလၢတၢ်ဒုးတၢ်ယၤအပူၤအသိး, ဒီးသုကလီၤဃံၤဝဲဖဲသုဒုၣ်သုဒါတလူၤဘၣ်သုအခါဒၣ်လဲာ်န့ၣ်လီၤ.
37 ဖဲပှၤတလူၤဘၣ်သုနီတဂၤအခါဒၣ်လဲာ်န့ၣ်သုကလီၤဃံၤဒိးလိာ်သု သးတဂၤလၢတဂၤအဖီခိၣ်, ဒီးသုဒုးဆၢကဒါက့ၤသုဒုၣ်သုဒါတကဲဘၣ်န့ၣ်လီၤ.
38 သုကသံလၢသုဒုၣ်သုဒါအကီၢ်ပူၤ ဒီးသုကဘၣ်တၢ်ခူၣ်လီၤကွံာ်သုလၢသုဒုၣ်သုဒါအကီၢ်ပူၤန့ၣ်လီၤ.
39 ဒီးသုပှၤလၢအိၣ်လီၤတဲာ်တဖၣ်ကဟးဂူာ်ဟးဂီၤ ကွံာ်လၢသုဒုၣ်သုဒါအကီၢ်ပူၤမ့ၢ်လၢသုတၢ်ဒဲးဘးဒၣ်သုဝဲ အဃိဒီးပှၤလၢသုဟဲလီၤစၢၤလီၤသွဲၣ်လၢအီၤတဖၣ်အတၢ်ဒဲးဘးအဃိန့ၣ်လီၤ.
40 မ့မ့ၢ်သုစၢၤသုသွဲၣ်တဖၣ်ကအၢၣ်လီၤအတၢ်ဒဲးဘးဒီးပှၤလၢအဝဲ သ့ၣ်ဟဲလီၤစၢၤလီၤသွဲၣ်လၢအီၤတဖၣ်အတၢ်ဒဲးဘးတဖၣ်လၢ အမၤကမၣ်ယၤဒီးပူထီၣ်ထီဒါယၤ,
41 ဒ်သိးယကဃၣ်ယသးထီဒါအီၤဒီးဆှၢအီၤဆူအဒုၣ်အဒါတဖၣ်အကီၢ်ပူၤန့ၣ်လီၤ. လၢခံကတၢၢ်ဖဲသုစၢၤသုသွဲၣ်တဖၣ်ဆီၣ်လီၤက့ၤအသးဒီးဟ့ၣ်က့ၤ တၢ်အဘူးအလဲလၢအဝဲသ့ၣ်အတၢ် ဒဲးဘးဒီးတၢ်ပူထီၣ်ထီဒါအဂီၢ်ဒီး,
42 ယကသ့ၣ်နီၣ်ထီၣ်က့ၤယတၢ်အၢၣ်လီၤဒီးစီၤယၤကိာ်, ဒီးစီၤအံၤစဲးဒီးစီၤအၤဘြၤဟၣ်, ဒီးယကမၤသီထီၣ်က့ၤယတၢ်အၢၣ်လီၤလၢယကဟ့ၣ်ယပှၤဂီၢ်မုၢ်လၢထံဧိၤကီၢ်ဧိၤန့ၣ်လီၤ.
43 ဘၣ်ဆၣ်ဒီး, အဆိကတၢၢ်ထံကီၢ်ကဘၣ်တၢ်မၤပျီကွံာ်အီၤဒီးအပှၤဂီၢ်မုၢ်, ဒ်သိးအကမုာ်လၤသးခုဘၣ်ဒီးတၢ်အိၣ်ဘှံးအလၢအပှဲၤ, ဒီးအဝဲသ့ၣ်ကဘၣ်ဟ့ၣ်တၢ်အဘူးအလဲအလၢအပှဲၤလၢအလုၢ်သ့ၣ်ခါပတာ် ယတၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီးယတၢ်မၤလိာ်တဖၣ်အဃိန့ၣ်လီၤ.
44 ဘၣ်ဆၣ်ဒီး, အန့ၣ်ဒၣ်လဲာ်, ဖဲအဝဲသ့ၣ်အိၣ်ဒံးလၢအဒုၣ်အဒါတဖၣ် အကီၢ်ပူၤအခါန့ၣ်, ယတညိကွံာ်ဒီးမၤဟးဂီၤအဝဲသ့ၣ်လၢာ်လၢာ်ဆ့ဆ့ဘၣ်. တၢ်န့ၣ်ကမၤကတၢၢ်ကွံာ်ယတၢ်အၢၣ်လီၤအီလီၤဒီးအဝဲသ့ၣ်ဒီးယတၢ်မ့ၢ်ယွၤ, အဝဲသ့ၣ်အကစၢ်ယွၤန့ၣ်လီၤ.
45 ယကမၤသီထီၣ်က့ၤယတၢ်အၢၣ်လီၤအီလီၤလၢယမၤတ့ၢ်ဒီးအဝဲသ့ၣ် အမိၢ်ပၢ်ဖံဖုလၢပျၢၤတဖၣ်ဖဲယဒုးနဲၣ် ကယဲၢ်ပှၤကလုာ်တဖၣ်လၢယစိကမီၤခီဖျိတၢ်ထုးထီၣ်ယပှၤ ဂီၢ်မုၢ်လၢကီၢ်အဲၤကူပတူးအပူၤ, ဒ်သိးယၤ, ယွၤအံၤ ကမ့ၢ်အဝဲသ့ၣ်အကစၢ်ယွၤန့ၣ်လီၤ.”
46 တၢ်ခဲလၢာ်အံၤမ့ၢ်တၢ်သိၣ်တၢ်သီဒီးတၢ်မၤ လိာ်တဖၣ်လၢယွၤဟ့ၣ်လီၤဆူစီၤမိၤၡ့လၢကစၢၢ်စံၤနါအလိၤ, လၢအံၣ်စရ့လးအပှၤဂီၢ်မုၢ်အဂီၢ်န့ၣ်လီၤ.