24
(ဟးထီၣ်.၂၇:၂၀-၂၁)
1-2 ဒီးယွၤကတိၤတၢ်ဒီးစီၤမိၤၡ့ဒီးစံးဝဲဒၣ်, “မၤလိာ်ပှၤအံၣ်စရ့လးဖိလၢအကဟဲစိာ်န့ၢ်နၤသ့ၣ် စၤယံးအသိအဂ့ၤကတၢၢ်လၢအမ့ၣ်အူဒၢလၢအအိၣ် လၢတၢ်ဘူၣ်ထီၣ်ဘါထီၣ်ယွၤအဒဲအပူၤ, ဒ်သိးအကဒုးကဲၤထီၣ်မ့ၣ်အူဒၢတထံၣ်ဃီတက့ၢ်.
3 ဒီးစီၤအၤဟရိၣ်ကဘၣ်ဒွဲၣ်ကပီၤ ထီၣ်အီၤတလါဘၣ်တလါတုၤမုၢ်ဆ့ၣ်ထီၣ်တစု, လၢယွၤအမဲာ်ညါ, လၢယၣ်ဘျးသဒၢအမဲာ်ညါ, လၢတၢ်အၢၣ်လီၤအီလီၤတလါအမဲာ်ညါ, လၢအမ့ၢ်တၢ်လီၢ်စီဆှံကတၢၢ်န့ၣ်လီၤ. တၢ်သိၣ်တၢ်ဘျၢအံၤသုကဘၣ်တိၢ်န့ၢ်အီၤအစိၤစိၤအဃၣ်ဃၣ်န့ၣ် လီၤ.
4 စီၤအၤဟရိၣ်ကဘၣ်ကွၢ်ထွဲမ့ၣ်အူဒၢတဖၣ်လၢအအိၣ်လၢမ့ၣ်အူဒၢ အထူၣ်လၢအဘၣ်တၢ်မၤအီၤလၢထူအလိၤ, ဒ်သိးကကပီၤဝဲလၢယွၤအမဲာ်ညါတထံၣ်ဃီန့ၣ်လီၤ.
5 ဒီးနဘၣ်ဟံးန့ၢ်ကိၣ်ကမူၣ်အဂ့ၤအဃၢလီၤတယၢၢ်ခံအ့စရိၣ်ဒီးကုၢ်ကိၣ်တဆံခံလိၣ်လီၤ.
6 ဒီးနကဘၣ်ရဲၣ်လီၤကိၣ်ခံဂ့ၢ်, တဂ့ၢ်န့ၣ်ကိၣ်ဃုဖျၢၣ်စုာ်စုာ်, လၢစီၢ်နီၤခိၣ်စီဆှံအဖီခိၣ်လၢယွၤအမဲာ်ညါန့ၣ်လီၤ.
7 နဘၣ်ပာ်လီၤတၢ်နၢမူလီၢ်ဘၣ်လၢကိၣ်တဂ့ၢ်ဘၣ်တဂ့ၢ် အဖီခိၣ်ဒ်အမ့ၢ်တၢ်ပနီၣ်လၢတၢ်အီၣ်အတၢ်လုၢ်ဆူယွၤအအိၣ်လၢကိၣ်တဖၣ်အလီၢ်န့ၣ်လီၤ.
8 မုၢ်အိၣ်ဘှံးနံၤကိးနံၤဒဲးန့ၣ်နဘၣ်ပာ်လီၤ ကိၣ်လၢယွၤအမဲာ်ညါတထံၣ်ဃီလၢပှၤအံၣ်စရ့လးဖိအဂီၢ်န့ၣ်လီၤ. အအံၤမ့ၢ်ပှၤအံၣ်စရ့လးဖိအမူအဒါအစိၤစိၤအဃၣ်ဃၣ်န့ၣ်လီၤ.
9 ဒီးကိၣ်န့ၣ်ကကဲထီၣ်စီၤအၤဟရိၣ်ဒီးအစၢၤအ သွဲၣ်တဖၣ်အတၢ်ဒီးကဘၣ်အီၣ်ဝဲလၢတၢ်လီၢ်စီဆှံအပူၤန့ၣ်လီၤ. အဂ့ၢ်ဒ်အံၤမ့ၢ်တၢ်စီဆှံကတၢၢ်လၢအဂီၢ်လၢတၢ်လုၢ်မ့ၣ်အူ အကျါန့ၣ်လီၤ.”
10-11 ဒီးပှၤအိၣ်ဝဲဒၣ်တဂၤလၢအပၢ်မ့ၢ်ပှၤ အဲၤကူပတူးဖိဒီးအမိၢ်မ့ၢ်ပှၤအံၣ်စရ့လးမုၣ်ဖိနီၢ်ၡလိမံး (စီၤဒၣ်အဒူၣ်ဖိစီၤဘရံၤအဖိမုၣ်) န့ၣ်လီၤ. ဒီးပှၤတဂၤအံၤအ့ၣ်လိာ်အသးဒီးပှၤအံၣ်စရ့လးဖိတဂၤလၢပှၤအံၣ်စရ့လးဖိသူၣ်ဒဲအလီၢ်ပူၤ န့ၣ်လီၤ. ဒီးပှၤအံၤဒုၣ်ဒွဲၣ်ယွၤအမံၤဒီးဆိၣ်အၢတၢ်, ဒီးပှၤလဲၤဆှၢအီၤဆူစီၤမိၤၡ့အအိၣ်န့ၣ်လီၤ.
12 ဒီးတၢ်ပာ်အီၤလၢတၢ်စၢဃာ်အလီၢ်တုၤလၢယွၤဒုးနဲၣ်အတၢ်ဘၣ်အသး ဆူအဝဲသ့ၣ်တစုလၢကဘၣ်မၤအီၤဒ်လဲၣ်န့ၣ်လီၤ.
13-14 ဒီးယွၤကတိၤတၢ်ဒီးစီၤမိၤၡ့ဒီးစံးဝဲဒၣ်, “ဟဲစိာ်ထီၣ်ပှၤလၢအဆိၣ်အၢတၢ်တဂၤန့ၣ်ဆူပှၤအံၣ်စရ့လးဖိ အသူၣ်ဒဲလီၢ်အချၢတက့ၢ်. ဒီးကယဲၢ်ပှၤလၢအနၢ်ဟူအဆိၣ်အၢတၢ်တဖၣ်န့ၣ်ကပာ်ထီၣ်အစုလၢအ ခိၣ်လိၤလၢတၢ်အုၣ်အသးလၢအတၢ်ကမၣ်အိၣ်ဝဲ, ဒီးမ်ပှၤအိၣ်ဝဲဖဲန့ၣ်ခဲလၢာ်ကကွံာ်သံအီၤလၢလၢၢ်န့ၣ်တက့ၢ်.
15 ဒီးနဘၣ်စံးဘၣ်ပှၤအံၣ်စရ့လးဖိ, ဖဲဒၣ်ပှၤလၢအဆိၣ်အၢကစၢ်ယွၤန့ၣ်ကတူၢ်ဘၣ်အတၢ်ဒဲးဘးန့ၣ်လီၤ.
16 ဒီးပှၤလၢအဒုၣ်ဒွဲၣ်ယွၤအမံၤန့ၣ်ကဘၣ်တၢ်မၤသံ ကွံာ်အီၤန့ၣ်လီၤ. ကယဲၢ်ပှၤအံၣ်စရ့လးဖိတဂၤဂၤမ့ၢ်ဂ့ၤပှၤတခီဘီ မုၢ်ဖိတဂၤဂၤမ့ၢ်ဂ့ၤလၢအဆိၣ်အၢယွၤန့ၣ်ကဘၣ်တၢ်ကွံာ်သံအီၤ လၢလၢၢ်လၢပှၤကမျၢၢ်န့ၣ်လီၤ.
17 ဒီးကယဲၢ်ပှၤတဂၤလၢ်လၢ်လၢအမၤသံပှၤတဂၤဂၤန့ၣ်ကဘၣ်တၢ်မၤသံအီၤန့ၣ်လီၤ.
18 ဒီးကယဲၢ်ပှၤတဂၤလၢ်လၢ်လၢအမၤသံပှၤတဂၤဂၤအဆၣ်ဖိ ကီၢ်ဖိန့ၣ်ကဘၣ်လိးက့ၤဝဲန့ၣ်လီၤ.
19 ဒီးကယဲၢ်ပှၤတဂၤလၢ်လၢ်လၢအမၤဆါဘၣ်ပှၤအဂၤတဂၤဂၤန့ၣ်ဒ်အမၤ ဝဲအသိးန့ၣ်ကဘၣ်တၢ်မၤဆၢက့ၤအီၤန့ၣ်လီၤ.
20 ဒီးကယဲၢ်ပှၤတဂၤလၢ်လၢ်လၢအမၤကၢ်ဝဲပှၤ အဃံတဘိဘိန့ၣ်အနီၢ်ကစၢ်ဒၣ်ဝဲအဃံတဘိကဘၣ်တၢ်မၤကၢ်ကွံာ်အီၤ, မ့ၢ်မၤဖျိးထီၣ်ဘၣ်ပှၤမဲာ်ချံတတိၣ်န့ၣ်အနီၢ်ကစၢ် ဒၣ်ဝဲအမဲာ်ချံတတိၣ်ကဘၣ်တၢ်ထုးထီၣ်ကွံာ်အီၤ, ဒီးမ့ၢ်မၤလီၤဖျုပှၤမဲတဘ့ၣ်န့ၣ်အနီၢ်ကစၢ်ဒၣ်ဝဲအမဲတဘ့ၣ် ကဘၣ်တၢ်မၤလီၤဖျုအီၤန့ၣ်လီၤ. ဒ်အမၤဆါဘၣ်ပှၤဂၤအသိးန့ၣ်အဝဲကဘၣ်တၢ်မၤဆါကဒါက့ၤအီၤန့ၣ်လီၤ.
21 ဒီးပှၤတဂၤလၢ်လၢ်လၢအမၤသံဆၣ်ဖိကီၢ်ဖိတဒုန့ၣ်ကဘၣ်လိးက့ၤဝဲ, မ့မ့ၢ်ပှၤတဂၤ လၢ်လၢ်လၢအမၤသံပှၤကညီန့ၣ်ကဘၣ်တၢ်မၤသံကွံာ်အီၤန့ၣ်လီၤ.
22 ဒီးတၢ်သိၣ်တၢ်ဘျၢအံၤမ့ၢ်လၢပှၤအံၣ်စရ့လးဖိတဖၣ်အဂီၢ်ဒီးပှၤ တခီဘီမုၢ်ဖိတဖၣ်အဂီၢ်န့ၣ်လီၤ. အဂ့ၢ်ဒ်အံၤ, ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.”
23 ဒီးဖဲစီၤမိၤၡ့စံးဘၣ်တဲဘၣ်ပှၤအံၣ်စရ့လးဖိဝံၤဝဲန့ၣ်, အဝဲသ့ၣ်ဟဲစိာ်ထီၣ်ပှၤတဂၤလၢအဆိၣ် အၢယွၤန့ၣ်ဆူတၢ်သူၣ်ဒဲလီၢ်အချၢဒီးကွံာ်သံအီၤလၢလၢၢ်န့ၣ်လီၤ. အအံၤမ့ၢ်တၢ်လၢပှၤအံၣ်စရ့လးဖိမၤဝဲဒ်ယွၤမၤလိာ်စီၤမိၤၡ့အသိးန့ၣ်လီၤ.