22
1-2 ဒီးယွၤမၤလိာ်စီၤမိၤၡ့, လၢကတဲဘၣ်စီၤအၤဟရိၣ်ဒီးအဖိခွါတဖၣ်, “သုတဘၣ်မၤမဲာ်ဆှးယမံၤစီဆှံန့ၣ်ဘၣ်. မၤသးဒ်န့ၣ်ဒီး, ပာ်ကဲတၢ်လုၢ်တၢ်ပာ်စီဆှံ လၢပှၤအံၣ်စရ့လးဖိတဖၣ်လုၢ်ထီၣ်ဆူယအိၣ်တက့ၢ်. ယဲဒၣ်အံၤယမ့ၢ်ယွၤလီၤ.
3 သုစၢၤသုသွဲၣ်တဂၤဂၤလၢအတကဆှီဘၣ်ဒ်တၢ်ဘူၣ်တၢ်ဘါအလုၢ်အလၢ် အိၣ်ဝဲအသိး,မ့ၢ်ဟဲဘူးဒီးတၢ်လုၢ်တၢ်ပာ်စီဆှံတဖၣ်လၢပှၤအံၣ်စရ့လးဖိ လုၢ်ထီၣ်ဆူယအိၣ်န့ၣ်, အဝဲလုၢ်တၢ်ပာ်တၢ်တသ့နီတဘျီလၢၤဘၣ်တစိၤသးန့ၣ်လီၤ. ယဲဒၣ်အံၤယမ့ၢ်ယွၤလီၤ.
4 စီၤအၤဟရိၣ်အစၢၤအသွဲၣ်လၢအအိၣ်ဒီးတၢ်ဆါအၢမ့တမ့ၢ်တၢ်ယွၤ လီၤလၢအဆံၣ်ကျိၤတဂၤလၢ်လၢ်န့ၣ်တဘၣ်အီၣ်တၢ်လုၢ်စီဆှံတုၤလီၤ လၢအဝဲကဆှီထီၣ်က့ၤဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးနီ တဂၤဘၣ်. ပှၤလုၢ်တၢ်အခိၣ်တဂၤလၢ်လၢ်ကဲထီၣ်ပှၤတကဆှီဘၣ်ခီဖျိတၢ်ထိးဘၣ် တၢ်သံစိၣ်မ့ၢ်ဂ့ၤ, အနီၢ်ကစၢ်ဒၣ်ဝဲအိၣ်ဒီးတၢ်ယွၤလီၤလၢအဆံၣ်ကျိၤမ့ၢ်ဂ့ၤ,
5 အဝဲထိးဘၣ်ဆၣ်ဖိကီၢ်ဖိလၢအတကဆှီဘၣ်မ့ၢ်ဂ့ၤ, ပှၤလၢအတကဆှီဘၣ်မ့ၢ်ဂ့ၤန့ၣ်လီၤ.
6 ပှၤလုၢ်တၢ်အခိၣ်တဂၤလၢ်လၢ်လၢအထိးဘၣ်တၢ်သ့ၣ်တဖၣ်န့ၣ်တကဆှီဘၣ် ဝဲတုၤမုၢ်ဟါလီၤန့ၣ်လီၤ. ဒီးအဝဲမ့ၢ်တလုၢ်ထံဘၣ်ဒီးတဘၣ်အီၣ်တၢ်လုၢ်စီဆှံတဖၣ်န့ၣ်ဘၣ်.
7 တုၤမုၢ်လီၤနုာ်ဝံၤဒီးအဝဲကကဆှီထီၣ်က့ၤဝဲဒီးကအီၣ်ဘၣ်ဝဲ တၢ်လုၢ်စီဆှံတဖၣ်လၢအမ့ၢ်တၢ်အီၣ်တၢ်အီန့ၣ်လီၤ.
8 တဘၣ်အီၣ်ဝဲတၢ်ဖံးတၢ်ညၣ်လၢဆၣ်ဖိကီၢ်ဖိလၢအသံဒၣ်ဝဲ မ့တမ့ၢ်ဘၣ်တၢ်မၤသံအီၤလၢတၢ်မံၤလာ်အဒူတဖၣ်န့ၣ်ဘၣ်. ကဒုးကဲထီၣ်အီၤလၢတၢ်တကဆှီဘၣ်န့ၣ်လီၤ. ယဲဒၣ်အံၤယမ့ၢ်ယွၤလီၤ.
9 ပှၤလုၢ်တၢ်အခိၣ်ခဲလၢာ်ကဘၣ်တိၢ်န့ၢ်တၢ်သိၣ်တၢ်ဘျၢလၢယမၤလိာ် တ့ၢ်တဖၣ်န့ၣ်လီၤ. မ့တမ့ၢ်ဘၣ်ဒီးအဝဲသ့ၣ်ကကဲထီၣ်ပှၤလၢအတၢ်ကမၣ်အိၣ်ဒီးကသံဝဲ ဒၣ်လီၤ. အဂ့ၢ်ဒ်အံၤ, မ့ၢ်လၢအဝဲသ့ၣ်တတိၢ်န့ၢ်ဘၣ်တၢ်သိၣ်တၢ်သီစီဆှံတဖၣ်အဃိလီၤ. ယဲဒၣ်အံၤယမ့ၢ်ယွၤဒီးယမၤကဆှီအဝဲသ့ၣ်န့ၣ်လီၤ.
10 ထဲပှၤလုၢ်တၢ်အခိၣ်အဒူၣ်ဖိထၢဖိတဖၣ်ဧိၤကအီၣ်ဘၣ်တၢ်လုၢ်စီဆှံတဖၣ်န့ၣ်လီၤ. မ့မ့ၢ်ပှၤအဂၤလၢအမ့ၢ်ပှၤလၢအအိၣ်ဒီးပှၤလုၢ်တၢ်အခိၣ်တဂၤဂၤမ့ၢ်ဂ့ၤ, ပှၤဘၣ်တၢ်ဒိးလဲအီၤလၢပှၤလုၢ်တၢ်အခိၣ်မ့ၢ်ဂ့ၤတဘၣ်အီၣ်ဝဲဘၣ်.
11 မ့မ့ၢ်ကုၢ်လၢပှၤလုၢ်တၢ်အခိၣ်ပှ့ၤအီၤလၢအတိၢ်ဒၣ်ဝဲဒ်အကုၢ် အသိးမ့ၢ်ဂ့ၤ, အိၣ်ဖျဲၣ်ထီၣ်လၢအဟံၣ်ပူၤမ့ၢ်ဂ့ၤကအီၣ်ဘၣ် တၢ်အီၣ်လၢပှၤလုၢ်တၢ်အခိၣ်ဒိးန့ၢ်ဘၣ်ဝဲတဖၣ်န့ၣ်လီၤ.
12 ပှၤလုၢ်တၢ်အခိၣ်အဖိမုၣ်လၢအဟံးန့ၢ်ပှၤလၢအတမ့ၢ်ဘၣ်ပှၤလုၢ်တၢ် အခိၣ်န့ၣ်တဘၣ်အီၣ်တၢ်လုၢ်စီဆှံနီတစဲးဘၣ်.
13 မ့မ့ၢ်ပှၤလုၢ်တၢ်အခိၣ်အဖိမုၣ်မ့မ့ၢ်မုၣ်ကမဲမ့ၢ်ဂ့ၤ, မ့ၢ်လီၤဖှၣ်ဒီးအဝၤလၢအဖိတအိၣ်ဘၣ်နီတဂၤမ့ၢ်ဂ့ၤ, လၢအဟဲက့ၤအိၣ်လၢအပၢ်အဟံၣ်ဒီးသန့ၤသးလၢအီၤတဂၤန့ၣ် ကအီၣ်ဘၣ်တၢ်အီၣ်လၢအပၢ်ဒီးန့ၢ်ဘၣ်ဝဲဒ်ပှၤလုၢ်တၢ်အခိၣ်တဂၤ အသိးန့ၣ်လီၤ. ထဲပှၤလုၢ်တၢ်အခိၣ်အဒူၣ်ဖိထၢဖိတဖၣ်ဧိၤကအီၣ်ဘၣ်တၢ်လုၢ်စီဆှံတဖၣ်န့ၣ်လီၤ.
14 ပှၤတဂၤလၢ်လၢ်လၢအတမ့ၢ်ဘၣ်ပှၤလုၢ်တၢ်အခိၣ်အဒူၣ်ဖိ ထၢဖိမ့ၢ်အီၣ်ဘၣ်တၢ်လုၢ်စီဆှံလၢတၢ်တပာ်သူၣ်ပာ်သးအပူၤန့ၣ်, ကဘၣ်လိးက့ၤဝဲတၢ်အပှ့ၤခဲလၢာ်ဃုာ်ဒီးအပှ့ၤယဲၢ်ပူတပူဆူ ပှၤလုၢ်တၢ်အခိၣ်အအိၣ်န့ၣ်လီၤ.
15 ပှၤလုၢ်တၢ်အခိၣ်န့ၣ်တဘၣ်မၤဘၣ်အၢတၢ်လုၢ်တၢ်ပာ်စီဆှံတဖၣ်
16 ခီဖျိအပျဲပှၤလၢအတကြၢးဝဲဘၣ်ဝဲတဖၣ်အီၣ်ဘၣ်တၢ်လုၢ်တၢ်ပာ်စီ ဆှံတဖၣ်န့ၣ်ဘၣ်. တၢ်အံၤကဒုးကဲထီၣ်တၢ်ကမၣ်ဒီးတၢ်စံၣ်ညီၣ်လၢပှၤလၢအအီၣ်ဘၣ် တဂၤအလိၤန့ၣ်လီၤ. ယဲဒၣ်အံၤယမ့ၢ်ယွၤဒီးယမၤစီဆှံတၢ်လုၢ်တၢ်ပာ်တဖၣ်န့ၣ်လီၤ.”
17-18 ယွၤမၤလိာ်စီၤမိၤၡ့လၢကဟ့ၣ်လီၤစီၤအၤဟရိၣ်ဒီးအဖိခွါတဖၣ်, ဒီးအံၣ်စရ့လးအပှၤဂီၢ်မုၢ်လၢတၢ်သိၣ်တၢ်ဘျၢတဖၣ် ဒ်လၢလာ်အံၤအသိးန့ၣ်လီၤ. ဖဲဒၣ်ပှၤလၢပှၤအံၣ်စရ့လးဖိအကျါမ့ၢ်ဂ့ၤ, ပှၤတခီဘီမုၢ်ဖိအိၣ်လၢပှၤအံၣ်စရ့လးအကီၢ်ပူၤအကျါမ့ၢ်ဂ့ၤ, မ့ၢ်လုၢ်ထီၣ်တၢ်လုၢ်မ့ၣ်အူလၢတၢ်မၤလၢပှဲၤအတၢ်အၢၣ်လီၤအီလီၤအဂီၢ်မ့ၢ်ဂ့ၤ, လၢအတၢ်သးဆူၣ်ဒၣ်ဝဲအဃိမ့ၢ်ဂ့ၤ, ဆၣ်ဖိကီၢ်ဖိလၢအကလုၢ်ထီၣ်ဝဲန့ၣ်အနီၢ်ခိအတၢ်လီၤတူာ်လီၤကာ် တဘၣ်အိၣ်ဘၣ်.
19 ဒ်သိးအကဘၣ်တၢ်တူၢ်လိာ်အီၤအဂီၢ်န့ၣ်ကဘၣ်မ့ၢ်ဆၣ်ဖိကီၢ်ဖိအဖါ တဒုလၢအတအိၣ်ဒီးအနီၢ်ခိအတၢ်လီၤတူာ်လီၤကာ်ဘၣ်န့ၣ်လီၤ.
20 နမ့ၢ်လုၢ်ထီၣ်ဆၣ်ဖိကီၢ်ဖိအိၣ်ဒီးအနီၢ်ခိအတၢ်လီၤတူာ်လီၤကာ်န့ၣ်ယွၤတတူၢ်လိာ်ဘၣ်အီၤဘၣ်.
21 ဖဲဒၣ်ပှၤလၢအလုၢ်ထီၣ်တၢ်လုၢ်မၤဃူမၤဖိးဆူယွၤအအိၣ်, လၢတၢ်မၤလၢထီၣ်ပှဲၤထီၣ်တၢ်အၢၣ်လီၤအီလီၤအဂီၢ်မ့ၢ်ဂ့ၤ, လၢအတၢ်သးဆူၣ်ဒၣ်ဝဲအဃိမ့ၢ်ဂ့ၤ, ဒ်သိးကဘၣ်တၢ်တူၢ်လိာ်အီၤ န့ၣ်ကဘၣ်မ့ၢ်ဆၣ်ဖိကီၢ်ဖိလၢအတအိၣ်ဘၣ်ဒီးနီၢ်ခိအတၢ်လီၤတူာ် လီၤကာ်ဘၣ်န့ၣ်လီၤ.
22 လုၢ်ထီၣ်ဆၣ်ဖိကီၢ်ဖိလၢအမဲာ်ဘျီၣ်မ့ၢ်ဂ့ၤ, အစုတဂ့ၤခီၣ်တဂ့ၤမ့ၢ်ဂ့ၤ, အက့ၢ်အဂီၤဟးဂီၤမ့ၢ်ဂ့ၤ, အပူၤလီၢ်အဖံယွၤလီၤမ့ၢ်ဂ့ၤ, တၢ်သးဃ့အီၣ်အီၤမ့ၢ်ဂ့ၤန့ၣ်ဆူယွၤအအိၣ်တဂ့ၤ. ဆၣ်ဖိကီၢ်ဖိဒ်န့ၣ်အသိးတဖၣ်န့ၣ်လုၢ်ထီၣ်အီၤ လၢတၢ်လုၢ်လီၢ်ဖီခိၣ်ဒ်တၢ်လုၢ်မ့ၣ်အူဆူယွၤအအိၣ်န့ၣ်တဂ့ၤ.
23 ဒ်တၢ်သးဆူၣ်အတၢ်လုၢ်တၢ်ပာ်အသိး, ဆၣ်ဖိကီၢ်ဖိလၢအ နီၢ်ခိက့ၢ်ဂီၤတဘၣ်လိာ်ဘၣ်စးတဖၣ်န့ၣ်သုလုၢ်ထီၣ်အီၤသ့လီၤ. ဘၣ်ဆၣ်ဒီးတဘၣ်တၢ်တူၢ်လိာ်အီၤဒ်တၢ်မၤလၢထီၣ်ပှဲၤထီၣ်တၢ်အၢၣ် လီၤအီလီၤအသိးဘၣ်.
24 ဆၣ်ဖိကီၢ်ဖိလၢအဒံၣ်သဘှံးမ့ၢ်ဂ့ၤ, ဘၣ်ဒီၣ်တဲာ်မ့ၢ်ဂ့ၤ, ဘၣ်တၢ်ဂဲာ်မ့ၢ်ဂ့ၤဒီးဘၣ်ကူးဘၣ်ကါမ့ၢ်ဂ့ၤတဖၣ်န့ၣ်လုၢ်ထီၣ် အီၤဆူယွၤအအိၣ်တဂ့ၤ. လုၢ်ထီၣ်ဆၣ်ဖိကီၢ်ဖိဒ်သိးအံၤလၢ သုကီၢ်ပူၤတဂ့ၤ.
25 ဆၣ်ဖိကီၢ်ဖိလၢတၢ်ပှ့ၤန့ၢ်အီၤလၢ ပှၤတခီဘီမုၢ်ဖိတဖၣ်အအိၣ်န့ၣ်လုၢ်ထီၣ်အီၤဆူယွၤအအိၣ်တဂ့ၤ. ဆၣ်ဖိကီၢ်ဖိဒ်န့ၣ်သိးတဖၣ်န့ၣ်ဘၣ်တၢ်ပာ်အီၤဒ်ဆၣ်ဖိကီၢ်ဖိလၢ အအိၣ်ဒီးတၢ်လီၤတူာ်လီၤကာ်ဒီးတဘၣ်တၢ်တူၢ်လိာ်ဘၣ်အီၤဘၣ်.
26-27 ဒီးယွၤစံးဘၣ်စီၤမိၤၡ့, “ဖဲဂီၤဖံးဖိမ့ၢ်ဂ့ၤ, သိမ့ၢ်ဂ့ၤမဲာ်တဲးလဲးမ့ၢ်ဂ့ၤဖှံလီၤ န့ၣ်တၢ်တဘၣ်ထုးဖးအီၤဒီးအမိၢ်ပှၢ်ဖဲတချုးအပှဲၤထီၣ်ဒံးဘၣ်နွံသီန့ၣ် ဘၣ်. ဘၣ်ဆၣ်ဒီးနွံသီဝံၤအလီၢ်ခံန့ၣ်ကဘၣ်တၢ်တူၢ်လိာ်အီၤဒ်တၢ်လုၢ် မ့ၣ်အူအသိးန့ၣ်လီၤ.
28 ဂီၤဖံးမိၢ်ဒီးအဖိမ့ၢ်ဂ့ၤ, သိအမိၢ်ဒီးအဖိမ့ၢ်ဂ့ၤ, မဲာ်တဲးလဲးအမိၢ်ဒီးအဖိမ့ၢ်ဂ့ၤ, လုၢ်ထီၣ်အီၤလၢတနံၣ်ဃီအတီၢ်ပူၤတဂ့ၤ.
29 ဒီးတုၤသုလုၢ်ထီၣ်တၢ်လုၢ်စံးထီၣ်ပတြၢၤဆူယွၤအအိၣ်န့ၣ်, မၤအီၤဒ်တၢ်မၤလိာ်အသိးလၢသုကဘၣ်တၢ်တူၢ်လိာ်သုအဂီၢ်န့ၣ်တက့ၢ်.
30 သုဘၣ်အီၣ်ကွံာ်အီၤလၢမုၢ်တနံၤဃီလီၤ. ဒီးသုတဘၣ်ပာ်လီၤတဲာ်တုၤမုၢ်ဆ့ၣ်ထီၣ်တနံၤနီတစဲးဘၣ်. ယဲဒၣ်အံၤယမ့ၢ်ယွၤလီၤ.
31 ဒီးသုဘၣ်တိၢ်န့ၢ်ယတၢ်မၤလိာ်တဖၣ်ဒီးမၤအီၤလီၤ. ယဲဒၣ်အံၤယမ့ၢ်ယွၤလီၤ.
32 ဒီးသုတမၤမဲာ်ဆှးယမံၤစီဆှံတဂ့ၤ. မ့မ့ၢ်ယကဘၣ်တၢ်ပာ်စီဆှံယၤလၢပှၤအံၣ်စရ့လးဖိအကျါလီၤ. ယဲဒၣ်အံၤယမ့ၢ်ယွၤလၢအမၤစီဆှံသု,
33 ဒီးဟံးထီၣ်ကွံာ်သုလၢကီၢ်အဲၤကူပတူးအပူၤဒ်သိးယကမ့ၢ်သုကစၢ်ယွၤလီၤ. ယဲဒၣ်အံၤယမ့ၢ်ယွၤလီၤ.”