လံာ်တၢ်ဘူၣ်ထီၣ်ဘါထီၣ်
LEVITICUS
လံာ်အံၤအိၣ်ဒီးပှၤအံၣ်စရ့လးဖိလၢပျၢၤအတၢ်သိၣ်တၢ်ဘျၢတဖၣ် ဘၣ်ဃးဒီးတၢ်ဘူၣ်ထီၣ်ဘါထီၣ်ယွၤ, တၢ်ဘူၣ်တၢ်ဘါအလုၢ်အလၢ်တဖၣ်ဒီးပှၤလုၢ်တၢ်အခိၣ် လၢအဘၣ်မူဘၣ်ဒါတဖၣ်ဒ်သိးကမၤထွဲတၢ်မၤလိာ်တဖၣ်အံၤအဂ့ၢ်န့ၣ်လီၤ.
လံာ်တဘ့ၣ်အံၤအတၢ်ဂ့ၢ်မိၢ်ပှၢ်မ့ၢ်ဝဲကစၢ်ယွၤအတၢ်စီတၢ်ဆှံဒီးကျဲတဖၣ်လၢ အပှၤဂီၢ်မုၢ်ကဘူၣ်ထီၣ်ဘါထီၣ်အီၤဒီးကအိၣ်မူဝဲဒ်သိးကဟံးဃာ်အတၢ်ဘၣ်ထွဲဒီးအီၤ, အံၣ်စရ့လးအကစၢ်ယွၤစီဆှံန့ၣ်လီၤ. တၢ်ကတိၤလၢအဘၣ်တၢ်သ့ၣ်ညါအီၤအဂ့ၤကတၢၢ်လၢလံာ်ပူၤအံၤဖျါဖဲ ၁၉:၁၈, လၢကစၢ်ခရံာ်ကိးဝဲလၢတၢ်မၤလိာ်အဒိၣ်ကတၢၢ်ခံထံၣ်တထံၣ်, “အဲၣ်ပှၤလၢနဃၢၤဒ်နအဲၣ်လီၤနသးဒၣ်နဲအသိးတက့ၢ်” န့ၣ်လီၤ.
1
1 ယွၤကိးထီၣ်စီၤမိၤၡ့လၢတၢ်ဘူၣ်ထီၣ်ဘါထီၣ်ယွၤအဒဲပူၤဒီး ဟ့ၣ်လီၤအီၤတၢ်သိၣ်တၢ်သီတဖၣ်,
2 လၢပှၤအံၣ်စရ့လးဖိကတိၢ်နီၣ်မၤထွဲဝဲဖဲအလုၢ်ထီၣ်တၢ်လုၢ်တၢ် ပာ်တဖၣ်န့ၣ်လီၤ. ပှၤတဂၤလၢ်လၢ်မ့ၢ်လုၢ်ထီၣ်တၢ်လုၢ်တၢ်ပာ်ဘၣ်ဃးဒီးဆၣ်ဖိကီၢ်ဖိန့ၣ်, ကဘၣ်မ့ၢ်အဂီၤဖံး, မ့တမ့ၢ်အသိ, မ့တမ့ၢ်အမဲာ်တဲးလဲးအကျါတဒုန့ၣ်လီၤ.
3 အဝဲမ့ၢ်လုၢ်ထီၣ်အဂီၤဖံးအကျါတဒုဒ်တၢ်လုၢ်မ့ၣ်အူအသိးန့ၣ်, ကဘၣ်ဟဲစိာ်ဂီၤဖံးဖါတဒုလၢမဲၣ်သူမဲၣ်ဂီၤတအိၣ်ဘၣ်န့ၣ်လီၤ. အဝဲကဘၣ်ဟဲစိာ်ဝဲဆူတၢ်ဘူၣ်ထီၣ်ဘါထီၣ်ယွၤအဒဲအကျဲစၢၤဒ် သိးကဘၣ်တၢ်တူၢ်လိာ်အီၤလၢယွၤန့ၣ်လီၤ.
4 ကဘၣ်ပာ်အစုလၢဂီၤဖံးဖါအခိၣ်လိၤဒီးကဘၣ်တၢ်တူၢ်လိာ်အီၤဒ် တၢ်လုၢ်တၢ်ပာ်လၢအစိာ်ကွံာ်အတၢ်ဒဲးဘးအသိးန့ၣ်လီၤ.
5 ဒီးကဘၣ်မၤသံဂီၤဖံးဖါဖဲန့ၣ်, ဒီးပှၤလုၢ်တၢ်အခိၣ်လၢအလီၤစၢၤလီၤသွဲၣ် လၢစီၤအၤဟရိၣ်တဖၣ်ကလုၢ်ထီၣ်တၢ်သွံၣ်ဆူယွၤအအိၣ်ဒီးလူ လီၤတၢ်သွံၣ်ဝးတရံးတၢ်လုၢ်လီၢ်လၢအအိၣ်လၢတၢ်ဘူၣ်ထီၣ်ဘါထီၣ် ယွၤအဒဲအကျဲစၢၤန့ၣ်လီၤ.
6 ဒီးအဝဲကဘၣ်အုၣ်ကွံာ်ဝဲအဖံးဒီးဒီၣ်တဲာ်အီၤတကူာ်တကူာ်လီၤ.
7 ဒီးပှၤလုၢ်တၢ်အခိၣ်တဖၣ်ကပာ်လီၤသ့ၣ်မုၣ်လၢတၢ်လုၢ်လီၢ်အဖီခိၣ်, ဒီးမၤကဲၤထီၣ်မ့ၣ်အူန့ၣ်လီၤ.
8 ဒီးအဝဲသ့ၣ်ကဘၣ်ပာ်လီၤဂီၤဖံးအကူာ်တဖၣ်, အိၣ်ဃုာ်ဒီးအခိၣ်ဒီးအသိလၢအဂ့ၢ်အဝီန့ၣ်လီၤ.
9 မ့မ့ၢ်,ပှၤလၢအကလုၢ်တၢ်တဂၤန့ၣ်, ကဘၣ်သ့စီကွံာ်တၢ်အပှံာ်တဖၣ် ဒီးတၢ်အခီၣ်တဖၣ်န့ၣ်လီၤ. ဒီးပှၤလုၢ်တၢ်အခိၣ်လၢအဘၣ်မူဘၣ်ဒါတဂၤန့ၣ်, ကဆိၣ်ကဲၤထီၣ်တၢ်လုၢ်ခဲလၢာ်လၢတၢ်လုၢ်လီၢ်အဖီခိၣ်န့ၣ်လီၤ. တၢ်လုၢ်အတၢ်နၢမူအံၤမၤမုာ်ယွၤအသးန့ၣ်လီၤ.
10 ဒီးပှၤတဂၤအံၤမ့ၢ်လုၢ်ထီၣ်အသိ, မ့တမ့ၢ်အမဲာ်တဲးလဲးအကျါတဒုန့ၣ်, ကဘၣ်မ့ၢ်အဖါလၢမဲၣ်သူမဲၣ် ဂီၤတအိၣ်ဘၣ်န့ၣ်လီၤ.
11 ဒီးအဝဲကမၤသံအီၤလၢတၢ်လုၢ်လီၢ်အကလံၤစိးတကပၤ, ဒီးပှၤလုၢ်တၢ်အခိၣ်တဖၣ်ကလူလီၤတၢ်သွံၣ်ဝးတရံးတၢ်လုၢ်လီၢ် န့ၣ်လီၤ.
12 ဒီးအဝဲဒီၣ်တဲာ်ဝဲတကူာ်ဘၣ်တကူာ်ဝံၤအလီၢ်ခံန့ၣ်, ပှၤလုၢ်တၢ်အခိၣ်လၢအဘၣ်မူဘၣ်ဒါတဂၤကပာ်လီၤအီၤခဲလၢာ်ဃုာ် ဒီးအခိၣ်ဒီးအသိလၢမ့ၣ်အူအဖီခိၣ်လၢအဂ့ၢ်အဝီန့ၣ်လီၤ.
13 မ့မ့ၢ်ပှၤလၢအကလုၢ်တၢ်တဂၤန့ၣ်ကဘၣ်သ့စီကွံာ်တၢ်အပှံာ်ဒီးတၢ် အခီၣ်တဖၣ်ဒီးပှၤလုၢ်တၢ်အခိၣ်ကဘၣ်ပာ်ထီၣ်တၢ်လုၢ်ဆူ ယွၤအအိၣ်ဒီးဆိၣ်ကဲၤထီၣ်အီၤခဲလၢာ်လၢတၢ်လုၢ်လီၢ်အဖီ ခိၣ်လီၤ. တၢ်လုၢ်အတၢ်နၢမူအံၤမၤမုာ်ယွၤအသးန့ၣ်လီၤ.
14 ဒီးပှၤတဂၤအံၤမ့ၢ်လုၢ်ထီၣ်ထိၣ်ဒ်တၢ်လုၢ်မ့ၣ်အူအသိးန့ၣ်ကဘၣ် မ့ၢ်ထိၣ်လွံၢ်ဘုၣ်, မ့တမ့ၢ်ထိၣ်ကးက့ၣ်ဖိန့ၣ်လီၤ.
15 ဒီးပှၤလုၢ်တၢ်အခိၣ်ကပာ်ထီၣ်ဝဲလၢတၢ်လုၢ်လီၢ်အဖီခိၣ်, ကဝံာ်ကၢ်ဝဲအကိာ်, ဒီးဆိၣ်ကဲၤအခိၣ်လၢတၢ်လုၢ်လီၢ်အဖီ ခိၣ်န့ၣ်လီၤ. ဒီးအသွံၣ်ကဘၣ်တၢ်စံၢ်ကွံာ်အီၤလၢတၢ်လုၢ်လီၢ် အကပၤလီၤ.
16 ဒီးအဝဲကဘၣ်ထုးကွံာ်အကနံဒီးတၢ်အိၣ်လၢအပူၤခဲလၢာ်ဒီးစူး ကွံာ်အီၤဆူတၢ်လုၢ်လီၢ်အမုၢ်ထီၣ်တကပၤ, ဖဲဖၣ်ဆါအိၣ်အလီၢ်န့ၣ်လီၤ.
17 ဒီးကဘၣ်ဖီၣ်ဝဲလၢအဒံးဆ့ဒီးဖှီသ့ၣ်ဖးအီၤဘၣ်ဆၣ်, တဘၣ်မၤတဲာ်ကွံာ်အဒံးဆ့ဘၣ်. ဒီးကဘၣ်ဆိၣ်ကဲၤထီၣ်အီၤခဲလၢာ် လၢတၢ်လုၢ်လီၢ်အဖီခိၣ်န့ၣ်လီၤ.