လံာ်သးသယုၢ်တၢ်
LAMENTATIONS
လံာ်သးသယုၢ်တၢ်အံၤမ့ၢ်တၢ်ထၢဖှိၣ်ထါယဲၢ်ယုၢ်ဘၣ်ဃးဒီးတၢ်ဘၣ် မိၣ်ဘၣ်မးလၢဝ့ၢ်ယရူၤၡလ့ၣ်ဘၣ်တၢ်မၤဟးဂီၤအီၤဖဲချ ခန ၅၈၆ အဃိ, ဒီးတၢ်လၢအမၤထွဲတ့ၢ်အသးတဖၣ်ဖဲ အလီၤပှီၢ်ဒီးဘၣ်တၢ်စိာ်မၢကဲကုၢ်အီၤအလီၢ်ခံအဂ့ၢ်န့ၣ်လီၤ. လံာ်အံၤအန့ဆၢၣ်အါတက့ၢ်မ့ၢ်တၢ်ပှဲၤဒီးတၢ်ကအုကစွါဒၣ်လဲာ် န့ၣ်အိၣ်စ့ၢ်ကီးဒီးတၢ်ကွဲးဘၣ်ဃးတၢ်စူၢ်တၢ်နာ်ကစၢ်ယွၤဒီး တၢ်မုၢ်လၢ်လၢခါဆူညါအဂီၢ်လီၤ. ထါတဖၣ်အံၤဘၣ်တၢ်သူအီၤလၢပှၤယူဒၤဖိတဖၣ်လၢတနံၣ်တဘျီ အတၢ်ဘူၣ်တၢ်ဘါအိၣ်ဒီးတၢ်ဒုၣ်တၢ်အီၣ်ဒီးတၢ်သးအုးဒ်သိးအကမၤ တၢ်သ့ၣ်နီၣ်ပှၤကလုာ်အတၢ်နးတၢ်ဖှီၣ်ဖဲချခန ၅၈၆န့ၣ်လီၤ.
1
1 ဝ့ၢ်ယရူၤၡလ့ၣ်လၢတဘျီအခါအပှဲၤတ့ၢ်မးဒီးပှၤဂီၢ်မုၢ်န့ၣ်, အိၣ်သယုၢ်သညိမးလဲၣ်.
တဘျီန့ၣ်ဘၣ်တၢ်ပာ်ဒိၣ်ပာ်ကဲတ့ၢ်အီၤလၢဟီၣ်ခိၣ်, ခဲအံၤမၤအသးဒ်မုၣ်ကမဲတဂၤအသိးမးလဲၣ်.
လၢညါလီၤဂာ်ဒီးနီၢ်ပၤမုၣ်ဖိလၢအပၢဘၣ်ကီၢ်စဲၣ်ကီၢ်ဆၣ်တဖၣ် လီၤ. မ့မ့ၢ်ခဲအံၤလီၤတဲာ်ကွံာ်ဆူတၢ်မၢကဲကုၢ်အလီၢ်လံ.
2 ဟီၣ်ဝဲယၢၤဝဲသီတနၤကျၢၤ, ဒီးမဲာ်ထံမဲာ်နိတဖၣ်ယွၤလီၤဝဲ လၢအဘိးပၤတဖၣ်လီၤ.
ကယဲၢ်အတံၤသကိးလၢညါတဖၣ်အကျါပှၤ တအိၣ်လီၤတဲာ်ဘၣ်နီတဂၤလၢကမၤမုာ်ထီၣ်အီၤဘၣ်.
အဒီသိၣ်ဒီမှံၤတဖၣ်ဟ့ၣ်လီၤကွံာ်အီၤဒီးခဲအံၤအဝဲသ့ၣ်ထီ ဒါအီၤလီၤ.
3 ကီၢ်ယူဒၤအပှၤဂီၢ်မုၢ်ဘၣ်တၢ်နီၣ်ထီၣ်ဆူၣ်အီၤယံၤဒီးအဟံၣ် အဃီဒီးကဲထီၣ်ကုၢ်တဖၣ်လၢအစုကတၢၢ်ခီၣ်ကတၢၢ်န့ၣ်လီၤ.
အဝဲသ့ၣ်အိၣ်ဝဲလၢထံဂုၤကီၢ်ဂၤတဖၣ်အပူၤဒီး တၢ်အလီၢ်တအိၣ်ဘၣ် နီတပူၤလၢကကိးဝဲလၢအတၢ်ဒၣ်ဝဲဘၣ်.
ဘၣ်တၢ်ကဝီၤဃာ်အီၤလၢအဒုၣ်အဒါတဖၣ်ဒီး တၢ်ထူၣ်ဖျဲးအကျဲတအိၣ်နီတဘိဘၣ်.
4 ခဲကနံၣ်အံၤပှၤကဟဲဆူတၢ်လုၢ်ဟံၣ်ဒ်သိးကဘူၣ်ထီၣ်ဘါထီၣ်တၢ်လၢ မုၢ်နံၤစီဆှံတဖၣ်န့ၣ်တအိၣ်ဘၣ်နီတဂၤဘၣ်.
ဖိသၣ်ပိာ်မုၣ်လၢအသးဝံၣ်တ့ၢ်တၢ်ဖဲန့ၣ်တဖၣ်တူၢ်ဘၣ်တၢ်ဒီးပှၤ လုၢ်တၢ်အခိၣ်တဖၣ်မၤသ့ထဲတၢ်ကအုကစွါဧိၤလီၤ.
ဝ့ၢ်အတြဲၤတဖၣ်ဆၢထၢၣ်အိၣ်ကလီဒီးကစၢၢ်စံယိၣ်အိၣ်လၢတၢ်ကိၢ် တၢ်ဂီၤဖးဒိၣ်အပူၤလီၤ.
5 အဒုၣ်အဒါတဖၣ်မၤနၢၤကွံာ်အီၤဒီးအိၣ်ဝဲဘီၣ်ထီၣ်ညီထီၣ်ဝဲ လီၤ.
အဂ့ၢ်ဒ်အံၤ, ကစၢ်ယွၤဒုးတူၢ်ဘၣ်အီၤတၢ်လၢကယဲၢ်အတၢ်ဒဲးဘး တဖၣ်အဃိလီၤ.
အဖိအလံၤတဖၣ်ဘၣ်တၢ်ဖီၣ်န့ၢ်အီၤဒီးစိာ်ကွံာ်အီၤဆူတၢ်မၢကဲ ကုၢ်အလီၢ်လီၤ.
6 ဝ့ၢ်ယရူၤၡလ့ၣ်အတၢ်ကဟုကညီၢ်န့ၣ်မ့ၢ်တၢ်လၢအမၤတ့ၢ်အသးတမံၤ လီၤ.
အပှၤခိၣ်ပှၤနၢ်တဖၣ်လီၤဂာ်ဒီးတၤဟိဖါလၢအဂံၢ်စၢ်ဘါစၢ်လၢ အသၣ်ဝံၤလီၤဒိအဃိ
ဒီးအဂံၢ်အဘါဘူးကလၢာ်ကွံာ်လၢအဘၣ်ဃ့ၢ်ပူၤဖျဲးအသးလၢပှၤခး တၢ်ဖိတဖၣ်အဃိန့ၣ်လီၤ.
7 ဝ့ၢ်ယရူၤၡလ့ၣ်လၢအလီၤပှီၢ်အိၣ်သယုၢ်အံၤခဲအံၤသ့ၣ်နီၣ်ထီၣ် က့ၤအတၢ်ကဟုကညီၢ်လၢပျၢၤန့ၣ်လီၤ.
ဖဲအလီၤတ့ၢ်ဆူဒုၣ်ဒါတဖၣ်အစုပူၤန့ၣ်, ပှၤတအိၣ်နီတဂၤလၢ အကမၤစၢၤအီၤဘၣ်.
ပှၤလၢအမၤနၢၤအီၤတဖၣ်နံၤဘၣ်ဖၣ်လဲတ့ၢ် အတၢ်လီၤပှီၢ်န့ၣ်လီၤ.
8 အလၤကပီၤလီၤမၢ်ကွံာ်, အိၣ်ဘ့ၣ်ဆ့ဒၢဒီးလီၤသးဘၣ်အၢလံ.
ကအုကစွါဝဲဒီးပာ်သဒၢအမဲာ်လၢတၢ်မဲာ်ဆှးအပူၤလီၤ.
ဝ့ၢ်ယရူၤၡလ့ၣ်မၤဘၣ်အၢဘၣ်သီတ့ၢ်အသးဒီး တၢ်ဒဲးဘးအအၢအသီန့ၣ်လီၤ.
9 အတၢ်တကဆှီဘၣ်န့ၣ်ဘၣ်တၢ်ထံၣ်အီၤညီကဒၣ်, ဘၣ်ဆၣ်ဒီးတပာ်သူၣ်ပာ်သးလၢတၢ်ကစံၣ်ညီၣ်အီၤဃါမနၤအဂ့ၢ်ဘၣ်.
အတၢ်လီၤပှီၢ်မ့ၢ်တၢ်လီၤပျံၤလီၤဖုးလီၤ. ပှၤမၤမုာ်ထီၣ်အီၤတသ့နီတဂၤဘၣ်.
အဒုၣ်အဒါတဖၣ်မၤနၢၤတၢ်လံ. ဒီးကိးပသူထီၣ်ဝဲဆူယွၤအအိၣ်လၢတၢ်သးကညီၤအဂီၢ်လီၤ.
10 အဒုၣ်အဒါတဖၣ်ဂုာ်န့ၢ်အတၢ်လုၢ်ဒိၣ်ပှ့ၤဒိၣ်လၢအအိၣ်ဒီးအီၤ တဖၣ်ခဲလၢာ်လီၤ.
ထံၣ်ဘၣ်တ့ၢ်ဝဲအဒုၣ်အဒါတဖၣ်နုာ်လီၤဆူ တၢ်လုၢ်ဟံၣ်အပူၤ,
တၢ်လီၢ်ဖဲယွၤတြီပှၤကလုာ်ဂၤတဖၣ်လၢ အသုတလဲၤနုာ်တဂ့ၤန့ၣ်လီၤ.
11 အပှၤဂီၢ်မုၢ်ကအုကစွါဖဲအဟးဃုန့ၢ်တၢ်တမံၤမံၤလၢကအီၣ်ဝဲ အဂီၢ်
ဒီးဟ့ၣ်လဲလိာ်အတၢ်ထူးတၢ်တီၤတဖၣ်လၢတၢ်အီၣ် အဂီၢ်ဒ်သိးကအိၣ်မူဘၣ်ဒံးဝဲအဂီၢ်လီၤ. ဝ့ၢ်ယရူၤၡလ့ၣ်ကိးထီၣ် ဝဲ,
“ကွၢ်ဃီၤယၤ, ယွၤဧၢ, ထံၣ်ယၤလၢယတၢ်ကိၢ်တၢ်ဂီၤအပူၤတက့ၢ်.”
12 ကိးပသူထီၣ်ဝဲဆူကယဲၢ်ပှၤလဲၤတြူာ် လၢကျဲပူၤတဖၣ်အအိၣ်,
“ကွၢ်ဃီၤယၤတက့ၢ်. ပှၤတဘၣ်ဒိဆါတ့ၢ်ဒ်ယၤနီတဂၤဘၣ်.
တၢ်ဘၣ်ဒိဆါအံၤယွၤဒုးလီၤဘၣ်လၢယလိၤ ဖဲအသးဒိၣ်ဝဲအကတီၢ်န့ၣ်လီၤ.
13 ဆှၢလီၤဝဲမ့ၣ်အူလၢမူခိၣ်, မ့ၣ်အူလၢအအီၣ်တၢ်လၢယပူၤန့ၣ်လီၤ.
အဝဲဆဲထီၣ်ထုလၢယဂီၢ်ဒီးဒုးလီၤဃံၤယၤ လၢဟီၣ်ခိၣ်လိၤလီၤ.
အန့ၣ်ဝံၤဒီးညိကွံာ်တ့ၢ်ယၤ, ဒီးပာ်တ့ၢ်ယၤလၢ တၢ်ဆါတပယူာ်ဃီအပူၤန့ၣ်လီၤ.
14 အဝဲကွဲးနီၣ်တ့ၢ်ကယဲၢ်ယတၢ်ဒဲးဘးတဖၣ်ဒီးစၢတံၢ်အီၤတပူၤဃီဒ် သိးသိး,
ဒီးဘျးလီၤစဲၤတ့ၢ်အီၤဝးတရံးယကိာ်, ဒီးယဂံၢ်ယဘါလီၤစၢ်တ့ၢ်ဝဲလၢတၢ်ဝံတၢ်ယိးအဖီလာ်န့ၣ်လီၤ.
ယွၤဟ့ၣ်လီၤတ့ၢ်ယၤဆူယဒုၣ်ယဒါတဖၣ်အစုပူၤဒီး တၢ်မၤစၢၤယၤတအိၣ်နီတမံၤလၢယကထီဒါအဝဲသ့ၣ်အဂီၢ်ဘၣ်.
15 ယွၤနံၤဘၣ်ဖၣ်လဲတ့ၢ်ကယဲၢ်ယသုးမုၢ်သံၣ်ဘိလၢအဆူၣ်ကတၢၢ်တဖၣ် လီၤ.
ဆှၢလီၤတ့ၢ်ဝဲသုးမုၢ်တဖုဒ်သိးကမၤဟးဂီၤယပှၤသးစၢ်တဖၣ်န့ၣ် လီၤ.
မၤဟးဂီၤတ့ၢ်ကီၢ်ယူဒၤအကဟုကညီၢ်ဒ်စပံးသၣ်တဖၣ်အိၣ်လၢနီၣ် စံၢ်စပံးသၣ်အကျိးပူၤအသိးန့ၣ်လီၤ.
16 လၢတၢ်န့ၣ်အဃိဒီးယမဲာ်ချံတဖၣ်ပုာ်ထီၣ်ယွၤလီၤလၢယမဲာ်ထံ မဲာ်နိန့ၣ်လီၤ.
ပှၤမၤမုာ်ထီၣ်ယသးတသ့ဘၣ်နီတဂၤဘၣ်. ပှၤဟ့ၣ်ဆူၣ်ထီၣ်ယဂံၢ်ယဘါတသ့ဘၣ်နီတဂၤဘၣ်.
ဒုၣ်ဒါတဖၣ်မၤနၢၤတ့ၢ်ယၤလံ. တၢ်တအိၣ်လီၤတဲာ်ဘၣ်ဒီးယပှၤဂီၢ် မုၢ်လၢတၢ်နီတမံၤလၢၤဘၣ်.
17 ယယူာ်ထီၣ်ယစုတဖၣ်ဘၣ်ဆၣ်ဒီးတမ့ၢ်လၢပှၤကမၤစၢၤယၤနီ တဂၤဘၣ်.
ယွၤကိးထီၣ်တ့ၢ်ဒုၣ်ဒါတဖၣ်ဒ်သိးကထီဒါယၤကိးကပၤဒဲးလီၤ.
အဝဲသ့ၣ်ပာ်ယၤဒ်တၢ်လီၤသးဘၣ်အၢတနီၤအသိးလီၤ.
18 ဘၣ်ဆၣ်ဒီးယွၤန့ၣ်မၤတၢ်တီလီၤ. အဂ့ၢ်ဒ်အံၤ, ယတဒိကနၣ်တ့ၢ်ဘၣ်အီၤဘၣ်.
ဒိကနၣ်ယၤ, ပှၤဂီၢ်မုၢ်လၢတၢ်အလီၢ်ကိးပူၤဒဲးသ့ၣ်ဧၢ, ကွၢ်ဃီၤယၤလၢယတၢ်ဘၣ်ဒိဆါအံၤတက့ၢ်.
ယပှၤပိာ်ခွါသးစၢ်ဒီးပိာ်မုၣ်သးစၢ်တဖၣ်ဘၣ်တၢ်စိာ်မၢကဲကုၢ် ကွံာ်လံအီၤလံ.
19 ယကိးထီၣ်တ့ၢ်ယဒီသိၣ်ဒီမှံၤတဖၣ်, ဘၣ်ဆၣ်ဒီးဂ့ၢ်လိာ်တ့ၢ်ဝဲ လၢကမၤစၢၤယၤအဂီၢ်လီၤ.
ပှၤလုၢ်တၢ်အခိၣ်တဖၣ်ဒီးပှၤခိၣ်ပှၤနၢ်တဖၣ်သံဝဲလၢဝ့ၢ်အကျဲ တဖၣ်အပူၤ,
ဖဲအဟးဃုတၢ်အီၣ်တၢ်အီလၢကဒုးမူဒံးအဝဲသ့ၣ်အဂီၢ်န့ၣ်လီၤ.
20 ယွၤဧၢ, ကွၢ်ဃီၤယတၢ်ကိၢ်တၢ်ဂီၤ, ဒီးယသးအတၢ်နးတၢ်ဖှီၣ်တ က့ၢ်.
ယသးသ့ၣ်ဖးတ့ၢ်လၢတၢ်သူၣ်အုးသးအုးလၢယတၢ်ဒဲးဘးတဖၣ် အဃိလီၤ.
တၢ်မၤသံမၤဝီအိၣ်လၢကျဲတဖၣ်အပူၤ, ဒီးလၢဟံၣ်ပူၤဒၣ်လဲာ်တၢ်သံအိၣ်ဝဲလီၤ.
21 ဒိကနၣ်လၢ်ယတၢ်ကအုကစွါတက့ၢ်. ပှၤလၢကမၤမုာ်ထီၣ်ယၤတအိၣ်ဘၣ် နီတဂၤဘၣ်.
ယဒုၣ်ယဒါတဖၣ်သးခုဝဲလၢနဟဲစိာ်တၢ်နးတၢ်ဖှီၣ်လၢယလိၤအဃိ လီၤ.
ဟဲစိာ်မုၢ်တနံၤလၢနအၢၣ်လီၤအီလီၤတ့ၢ်ဒီးဒုးတူၢ်ဘၣ်ယဒုၣ် ယဒါတဖၣ်ဒ်ယတူၢ်ဘၣ်တၢ်အသိးတက့ၢ်.
22 အုၣ်နသးထီဒါအဝဲသ့ၣ်လၢကယဲၢ်အတၢ်တတီတလိၤတဖၣ် အဃိတက့ၢ်.
စံၣ်ညီၣ်အဝဲသ့ၣ်ဒ်နစံၣ်ညီၣ်တ့ၢ်ယၤလၢယတၢ်ဒဲးဘးတဖၣ်အဃိန့ၣ် တက့ၢ်.
ယကအုကစွါလၢယတၢ်နးတၢ်ဖှီၣ်အပူၤဒီးယသးဆိးက့ဝဲလီၤ.”