22
(မး.၂၆:၁-၅; မၢ်.၁၄:၁-၂; ယိၤ.၁၁:၄၅-၅၃)
1 ဘူၣ်ကိၣ်တအိၣ်ဒီးကိၣ်မံၣ်လၢတၢ်ကိးအီၤလၢဘူၣ်လဲၤကပာ်န့ၣ်, အဆၢကတီၢ်ဘူးထီၣ်ဝဲဒၣ်လီၤ.
2 ပှၤလုၢ်တၢ်အခိၣ်အဒိၣ်တဖၣ်ဒီးပှၤသ့တၢ်ဘူၣ်တၢ်ဘါအတၢ် သိၣ်တၢ်သီတဖၣ်ဂုာ်ကျဲးစၢးဃုဝဲကျဲတဘိဘိလၢအကမၤသံ ယ့ၣ်ၡူးလၢတၢ်ခူသူၣ်လီၤ. အဂ့ၢ်မ့ၢ်လၢအဝဲသ့ၣ်ပျံၤပှၤဂီၢ်မုၢ်အဃိလီၤ.
(မး.၂၆:၁၄-၁၆; မၢ်.၁၄:၁၀-၁၁)
3 အန့ၣ်ဝံၤအလီၢ်ခံ, မုၣ်ကီၤလံၢ်လဲၤနုာ်လီၤဆူစီၤယူဒၤ, လၢတၢ်ကိးအီၤလၢအံၣ်စကၤရံၤအိာ်လၢအမ့ၢ်ပှၤတၢ်မၢဖိ တဆံခံဂၤအကျါတဂၤန့ၣ်အပူၤလီၤ.
4 လၢတၢ်န့ၣ်အဃိ, စီၤယူဒၤဟးထီၣ်ဒီးကတိၤတၢ်ဒီးပှၤလုၢ်တၢ် အခိၣ်အဒိၣ်တဖၣ်ဒီးတၢ်လုၢ်ဟံၣ်အပှၤခိးတၢ်ဖိအခိၣ်အနၢ်တဖၣ် ဘၣ်ဃးလၢအကဟ့ၣ်လီၤကွံာ်ယ့ၣ်ၡူးဒ်လဲၣ်ဒ်လဲၣ်အဂ့ၢ်န့ၣ်လီၤ.
5 အဝဲသ့ၣ်အသူၣ်ခုအသးခု, ဒီးအၢၣ်လီၤအီလီၤလၢအကဟ့ၣ်အီၤစ့လီၤ.
6 စီၤယူဒၤအၢၣ်လီၤတူၢ်လိာ်ဝဲ, ဒီးဃုခွဲးဂ့ၤယာ်ဘၣ်လၢအကဟ့ၣ်လီၤကွံာ်ယ့ၣ်ၡူးဆူအဝဲသ့ၣ် အစုပူၤဖဲပှၤဂီၢ်မုၢ်တသ့ၣ်ညါဝဲအဆၢကတီၢ်န့ၣ်လီၤ.
(မး.၂၆:၁၇-၂၅; မၢ်.၁၄:၁၂-၂၁; ယိၤ.၁၃:၂၁-၃၀)
7 မုၢ်နံၤမုၢ်သီဟဲတုၤအိၣ်ဝဲဒၣ်ဖဲဘူၣ်ကိၣ်တအိၣ်ဒီးကိၣ်မံၣ်အဆၢ ကတီၢ်, လၢသိဖိတဖၣ်ကဘၣ်တၢ်မၤသံအီၤလၢဘူၣ်လဲၤကပာ် အတၢ်အီၣ်အဂီၢ်လီၤ.
8 ယ့ၣ်ၡူးမၢလီၤစီၤပ့းတရူးဒီးစီၤယိၤဟၣ်ဒီးမၤလိာ်အဝဲသ့ၣ်ဒ်အံၤ, “လဲၤဒီးကတဲာ်ကတီၤပာ်ပဘူၣ်လဲၤကပာ်အတၢ်အီၣ်လၢ ပကအီၣ်အီၤအဂီၢ်န့ၣ်တက့ၢ်.”
9 အဝဲသ့ၣ်သံကွၢ်အီၤ, “နအဲၣ်ဒိးပကတဲာ်ကတီၤပာ်အီၤဖဲတၢ်လီၢ်မတၤတပူၤလဲၣ်.”
10 အဝဲဒၣ်စံးဝဲ, “ဒိကနၣ်တက့ၢ်. ဖဲသုလဲၤနုာ်ဆူဝ့ၢ်ပူၤန့ၣ်, ပှၤပိာ်ခွါတဂၤလၢအစိာ်ထံလၢသပၢၤထံတဖျၢၣ်အပူၤကသဂၢၢ်သုလီၤ. နုာ်လီၤပိာ်အခံဆူဟံၣ်လၢအဝဲနုာ်လီၤလၢအပူၤ
11 ဒီးစံးဘၣ်ဟံၣ်ကစၢ်န့ၣ်, ‘သရၣ်စံးဘၣ်နၤ, ဒၢးလၢယပျဲၢ်ယဘီၣ်ဒီးယၤ ပကအီၣ်ဘူၣ်လဲၤကပာ်အတၢ်အီၣ်အဂီၢ်န့ၣ်, အိၣ်ဖဲလဲၣ်.’
12 အဝဲဒၣ်ကဒုးနဲၣ်သုဒၢးဖးဒိၣ်လၢတၢ်ဖီခိၣ်တဒၢးအိၣ် ကတဲာ်ကတီၤပာ်အသးဂ့ၤဂ့ၤဘၣ်ဘၣ်ဒီးသုကဘၣ်ကတဲာ် ကတီၤတၢ်ခဲလၢာ်ခဲဆ့ဖဲန့ၣ်လီၤ.”
13 အဝဲသ့ၣ်ဟးထီၣ်ဒီးထံၣ်တၢ်ခဲလၢာ်ခဲဆ့ဒ်ယ့ၣ်ၡူးစံးဘၣ်တ့ၢ်အီၤ အသိး, ဒီးကတဲာ်ကတီၤပာ်ဘူၣ်လဲၤကပာ်အတၢ်အီၣ်န့ၣ်လီၤ.
(မး.၂၆:၂၆-၃၀; မၢ်.၁၄:၂၂-၂၆; ၁ ကရံၣ်.၁၁:၂၃-၂၅)
14 ဖဲဆၢကတီၢ်နၣ်ရံၣ်တုၤဃီၤန့ၣ်, ယ့ၣ်ၡူးဟံးန့ၢ်အလီၢ်ဖဲစီၢ်နီၤခိၣ်, ဃုာ်ဒီးတၢ်မၢဖိတဖၣ်န့ၣ်လီၤ.
15 အဝဲဒၣ်စံးဘၣ်အဝဲသ့ၣ်, “ယသးအိၣ်တ့ၢ်ယဲအဒိၣ်အအါလၢယကအီၣ်ဘၣ် ဘူၣ်လဲၤကပာ်အတၢ်အီၣ်တဘျီညါအံၤတပူၤဃီဒီးသု, တချုးယတူၢ်ဘၣ်တၢ်ဒံးဘၣ်န့ၣ်လီၤ.
16 အဂ့ၢ်ဒ်အံၤ, ယစံးဘၣ်တဲဘၣ်သု, တချုးဘူၣ်လဲၤကပာ်အတၢ်အီၣ်အဝဲအံၤ ဘၣ်တၢ်ပာ်ဖျါထီၣ်အခီပညီလၢလၢပှဲၤပှဲၤလၢကစၢ်ယွၤအဘီအမုၢ် အပူၤဒံးဘၣ်န့ၣ်, ယတအီၣ်လၢၤအီၤနီတစုဘၣ်.”
17 အန့ၣ်ဝံၤဒီးယ့ၣ်ၡူးဟံးထီၣ်လီခီ, စံးဘျုးစံးဖှိၣ်ကစၢ်ယွၤဒီးစံးဝဲ, “ဟံးန့ၢ်တၢ်အဝဲအံၤ, ဒီးနီၤလီၤအီၤလၢသုသိးသုကျါန့ၣ်တက့ၢ်.
18 အဂ့ၢ်ဒ်အံၤ, ယစံးဘၣ်တဲဘၣ်သုလၢ, စးထီၣ်ခဲအံၤဒီးတုၤလီၤလၢယွၤ အဘီအမုၢ်ဟဲဝဲတစုန့ၣ်, ယတအီလၢၤဘၣ်စပံးထံအံၤဘၣ်.”
19 အဝဲန့ၣ်ဝံၤအလီၢ်ခံ, အဝဲဒၣ်ဟံးန့ၢ်ကိၣ်, စံးဘျုးစံးဖှိၣ်ကစၢ်ယွၤ, စိၢ်ဘျဲးဝဲ, ဒီးဟ့ၣ်လီၤအီၤဆူအဝဲသ့ၣ်အအိၣ်ဒီးစံးဝဲ, “အဝဲအံၤမ့ၢ်ယနီၢ်ခိလၢအဘၣ်တၢ်ဟ့ၣ်လီၤအီၤလၢသုဂီၢ်လီၤ. မၤတၢ်အဝဲအံၤလၢတၢ်သ့ၣ်နီၣ်ထီၣ်က့ၤယၤအဂီၢ်န့ၣ်တက့ၢ်.”
20 ဒ်န့ၣ်အသိး, ဖဲအအီၣ်တၢ်လၢဟါအီၣ်ဝံၤန့ၣ်, အဝဲဒၣ်ဟ့ၣ်လီၤအဝဲသ့ၣ်လၢလီခီဒီးစံးဝဲ, “လီခီအံၤမ့ၢ်ကစၢ်ယွၤအတၢ်အၢၣ်လီၤအီလီၤအသီလၢ အဘၣ်တၢ်စဲပနီၣ်ဃာ်အီၤလၢယသွံၣ်, လၢအဘၣ်တၢ်လူလီၤဂၢ်လီၤအီၤလၢသုဂီၢ်န့ၣ်လီၤ.
21 ဘၣ်ဆၣ်ဒီးကွၢ်တက့ၢ်. ပှၤလၢအကဟ့ၣ်လီၤကွံာ်ယၤတဂၤန့ၣ်, အိၣ်ဒီးယၤလၢစီၢ်နီၤခိၣ်ဖဲအံၤလီၤ.
22 အဂ့ၢ်မ့ၢ်လၢပှၤကညီဖိခွါကသံဝဲဒ်ကစၢ်ယွၤတိာ်ပာ်တ့ၢ်ဝဲအသိးန့ၣ်လီၤ. ဘၣ်ဆၣ်ဒီး ပှၤလၢအကဟ့ၣ်လီၤကွံာ်အီၤတဂၤန့ၣ်, ဘၣ်အဖှီၣ်ဆံးဒိၣ်လဲၣ်.
23 တုၤနုၤတစုအဝဲသ့ၣ်သံကွၢ်လိာ်အသးတဂၤဒီးတဂၤ, လၢအဝဲသ့ၣ်အကျါမ့ၢ်မတၤတဂၤကဟ့ၣ်လီၤကွံာ်အီၤလဲၣ်န့ၣ်လီၤ.
24 တၢ်ဂ့ၢ်လိာ်ဘှီလိာ်အိၣ်ထီၣ်ဝဲလၢအပျဲၢ်အဘီၣ်သ့ၣ်တဖၣ် အကျါဘၣ်ဃးဒီးမတၤတဂၤကြၢးဘၣ်တၢ်ပာ်ကဲအီၤဒ် ပှၤအဒိၣ်ကတၢၢ်တဂၤလဲၣ်န့ၣ်လီၤ.
25 ယ့ၣ်ၡူးစံးဘၣ်အဝဲသ့ၣ်, “ပှၤကလုာ်ဂၤအစီၤပၤတဖၣ်အိၣ်ဒီးအစိ ကမီၤလၢအပှၤဂီၢ်မုၢ်တဖၣ်အဖီခိၣ်, ဒီးပှၤပၢတၢ်ပြးတၢ်တဖၣ် ဘၣ်တၢ်ကိးအီၤလၢပှၤမၤဘျုးတၢ်တဖၣ်လီၤ.
26 ဘၣ်ဆၣ်ဒီးသုဝဲသ့ၣ်တဖၣ်, သုတမ့ၢ်ဒ်န့ၣ်အသိးဘၣ်. မ့မ့ၢ်, ပှၤအဒိၣ်ကတၢၢ်လၢသုကျါကဘၣ်မ့ၢ်ဝဲဒ်ပှၤအဆံးကတၢၢ်တဂၤ အသိး, ဒီးပှၤအခိၣ်ကဘၣ်မ့ၢ်ဝဲဒ်တၢ်ခ့တၢ်ပှၤတဂၤအသိးန့ၣ်လီၤ.
27 မတၤဒိၣ်လဲၣ်. ပှၤတဂၤလၢအဆ့ၣ်နီၤအီၣ်တၢ်ဧါ. မ့တမ့ၢ်ပှၤတဂၤလၢအမၤတၢ်ခ့တၢ်ပှၤအတၢ်မၤလၢ ပှၤဆ့ၣ်နီၤအီၣ်တၢ်အဂီၢ်န့ၣ်လဲၣ်. သပှၢ်ကတၢၢ်, ပှၤလၢအဆ့ၣ်နီၤအီၣ်တၢ်န့ၣ်လီၤ. ဘၣ်ဆၣ်ဒီးယအိၣ်လၢသုသိးသုကျါ ဒ်ပှၤလၢအမၤတၢ်ခ့တၢ်ပှၤအတၢ်မၤတဂၤအသိးလီၤ.
28 လၢတၢ်မၤကွၢ်လၢအဟဲဘၣ်ယၤဒီဆၢဒီကတီၢ်အပူၤန့ၣ်, သုဝဲသ့ၣ်တဖၣ်သုအိၣ်ဒံးသုဝဲဒီးယၤလီၤ.
29 ဒီးဒ်ယပၢ်ဟ့ၣ်စိဟ့ၣ်ကမီၤယၤလၢယကပၢဘၣ်တၢ်အသိးန့ၣ်, ယကဟ့ၣ်သုတၢ်တမံၤဃီန့ၣ်လီၤ.
30 သုကအီၣ်တၢ်အီတၢ်လၢယစီၢ်နီၤခိၣ်လၢယဘီယမုၢ်အပူၤ, ဒီးသုကဆ့ၣ်နီၤလၢလီၢ်ပစိာ်အဖီခိၣ်ဒ်သိးသုကပၢပှၤ အံၣ်စရ့လးဖိတဆံခံဒူၣ်န့ၣ်လီၤ.
(မး.၂၆:၃၁-၃၅; မၢ်.၁၄:၂၇-၃၁; ယိၤ.၁၃:၃၆-၃၈)
31 စီၤၡံမိၣ်ဧၢ, စီၤၡံမိၣ်ဧၢ, ဒိကနၣ်တက့ၢ်. မုၣ်ကီၤလံၢ်ဒိးန့ၢ်လံတၢ်ပျဲလၢအကမၤကွၢ်သုဝဲကိးဂၤဒဲး, လၢအကနီၤဖးတၢ်ဂ့ၤဒီးတၢ်အၢ, ဒ်ပှၤထူစံာ်ဖိတဂၤဂုၤဘုအသိးန့ၣ်လီၤ.
32 ဘၣ်ဆၣ်ဒီးယဃ့ဘါထုကဖၣ်တ့ၢ်ယဲလၢနဂီၢ်, စီၤၡံမိၣ်ဧၢ, ဒ်သိးနတၢ်စူၢ်တၢ်နာ်သုတဟးဂီၤတဂ့ၤအဂီၢ်လီၤ. ဒီးဖဲနဃၣ်ကဒါက့ၤနသးဆူယအိၣ်န့ၣ်, နကဘၣ်ဟ့ၣ်ဂံၢ်ဟ့ၣ်ဘါနဒီပုၢ်ဝဲၢ်တဖၣ်လီၤ.”
33 စီၤပ့းတရူးစံးဆၢဝဲ, “ကစၢ်ဧၢ, ယအိၣ်ကတဲာ်ကတီၤယသးလၢယကလဲၤဆူဃိာ်ပူၤဒီးနၤ ဒီးယကသံဃုာ်ဒီးနၤန့ၣ်လီၤ.”
34 ယ့ၣ်ၡူးစံးဆၢဝဲ, “ယစံးဘၣ်နၤ, စီၤပ့းတရူးဧၢ, တနၤအံၤ, နတချုးသမၢဒံးယၤသၢစုဒံးဘၣ်ဒီး ဆီဖါကီၢ်တအိၣ်အိဘၣ်ဝဲဘၣ်.”
35 အန့ၣ်ဝံၤအလီၢ်ခံ, ယ့ၣ်ၡူးစံးဘၣ်အဝဲသ့ၣ်, “တဘျီဖဲယမၢလီၤသု, တအိၣ်ဒီးစ့ထၢၣ်မ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, ခီၣ်ဖံးမ့ၢ်ဂ့ၤန့ၣ်, တၢ်တလၢတပှဲၤလၢသုဂီၢ်အိၣ်ဝဲတမံၤမံၤဒံးဧါ.”
36 အဝဲသ့ၣ်စံးဆၢဝဲ, “တအိၣ်နီတမံၤဘၣ်.” “ဘၣ်ဆၣ်ဒီးခဲကနံၣ်အံၤ,” ယ့ၣ်ၡူးစံးဆၢဝဲ, “ပှၤတဂၤလၢ်လၢ်လၢအအိၣ်ဒီးစ့ထၢၣ်တဖျၢၣ်မ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, မ်အကဟံးန့ၢ်အီၤတက့ၢ်. ဒီးပှၤတဂၤဂၤလၢအတအိၣ်ဒီးနးတဘ့ၣ်န့ၣ် မ်အကဆါကွံာ်အဆ့ကၤဖီခိၣ်ဒီးပှ့ၤန့ၢ်အီၤတက့ၢ်.
37 အဂ့ၢ်ဒ်အံၤ, ယစံးဘၣ်တဲဘၣ်သုတၢ်တမံၤအံၤ, တၢ်ကွဲးအသးလၢအစံးဝဲ, ‘အဝဲဘၣ်တၢ်ဂံၢ်ဃုာ်အီၤလၢပှၤလုၣ်သ့ၣ်ခါပတာ်ထံကီၢ် အတၢ်သိၣ်တၢ်သီတဖၣ်အသိးအကျါ,’ တတီၤန့ၣ်, ကဘၣ်ဟဲလၢထီၣ်ပှဲၤထီၣ်ဝဲလၢယၤလီၤ. အဂ့ၢ်ဒ်အံၤ, တၢ်လၢအဘၣ်တၢ်ကွဲးတ့ၢ်အီၤလၢယဂ့ၢ်န့ၣ် ဟဲလၢထီၣ်ပှဲၤထီၣ်ဝဲဒၣ်လီၤ.”
38 အပျဲၢ်အဘီၣ်တဖၣ်စံးဝဲ, “ကွၢ်လၢအံၤ, ကစၢ်ဧၢ, နးအိၣ်ဝဲဒၣ်ဖဲအံၤခံဘ့ၣ်လီၤ.”
ဒီးအဝဲဒၣ်စံးဝဲ, “ဘၣ်လံ.”
(မး.၂၆:၃၆-၄၆; မၢ်.၁၄:၃၂-၄၂)
39 ယ့ၣ်ၡူးဟးထီၣ်လၢဝ့ၢ်ပူၤဒီးလဲၤဝဲဒ်အညီနုၢ်အသိးဆူကစၢၢ်သ့ၣ်စၤယံး, ဒီးအပျဲၢ်အဘီၣ်တဖၣ်လဲၤဃုာ်ဒီးအီၤလီၤ.
40 ဖဲအဝဲဒၣ်ဟဲတုၤတၢ်လီၢ်အဝဲန့ၣ်, စံးဘၣ်အဝဲသ့ၣ်, “ဃ့ဘါထုကဖၣ်ဒ်သိး သုသုတလီၤနုာ်ဆူတၢ်လ့ပစီအပူၤတဂ့ၤ န့ၣ်တက့ၢ်.”
41 အန့ၣ်ဝံၤဒီးအဝဲဒၣ်ဟးစီၤစုၤဒီးအဝဲသ့ၣ်ကဘၣ်တကွံာ်လၢၢ်, ဒီးတီၤလီၤဒီးဃ့ဘါထုကဖၣ်တၢ်လီၤ.
42 “ပၢ်ဧၢ,” အဝဲဒၣ်စံးဝဲ, “မ့ၢ်ဘၣ်နသးဒီးထုးကွံာ်လၢ်လီခီအံၤလၢယအိၣ်တက့ၢ်. ဘၣ်ဆၣ်ဒီး, တမ့ၢ်ဖဲဒၣ်ယသးဘၣ်. မ်နတၢ်ဘၣ်နသးဘၣ်တၢ်မၤလၢထီၣ်ပှဲၤထီၣ်အီၤတက့ၢ်.”
43 ကလူးလၢမူခိၣ်တဂၤဟဲလီၣ်ဖျါထီၣ်အသးလၢအီၤ, ဒီးဟ့ၣ်ဂံၢ်ဟ့ၣ်ဘါအီၤလီၤ.
44 လၢတၢ်သူၣ်ကိၢ်သးဂီၤဖးဒိၣ်အပူၤ, အဝဲဃ့ဘါထုကဖၣ်တၢ်လၢတၢ်ပာ်အသးသပှၢ်ပှၢ်အပူၤ, ဒိၣ်န့ၢ်အလီၢ်လီၤ. အဝဲဒၣ်အကပၢၤယွၤလီၤဒ်တၢ်သွံၣ်အလီၤစီၤ တဖၣ်အသိး, လၢဟီၣ်ခိၣ်လိၤလီၤ.
45 ဖဲအဝဲဒၣ်ဃ့ဘါထုကဖၣ်တၢ်ဝံၤ, ဂဲၤဆၢထၢၣ်ဒီးက့ၤက့ၤဆူအပျဲၢ်အဘီၣ်တဖၣ်အအိၣ်န့ၣ်, ထံၣ်ဝဲလၢအမံဘၣ်အသး, မ့ၢ်လၢအလီၤဘှံးလီၤတီၤလၢအတၢ်သူၣ်အုးသးအုးအဃိလီၤ.
46 ဒီးအဝဲဒၣ်စံးဘၣ်အဝဲသ့ၣ်, “ဘၣ်မနုၤအဃိသုမံလဲၣ်. ဂဲၤဆၢထၢၣ်ဒီးဃ့ဘါထုကဖၣ်ဒ်သိး သုသုတလီၤနုာ်ဆူတၢ်လ့ပစီအပူၤတဂ့ၤန့ၣ်တက့ၢ်.”
(မး.၂၆:၄၇-၅၆; မၢ်.၁၄:၄၃-၅၀; ယိၤ.၁၈:၃-၁၁)
47 ဖဲယ့ၣ်ၡူးကတိၤဒံးတၢ်အဖၢမုၢ်န့ၣ်, ပှၤဂီၢ်မုၢ်တဖုဟဲတုၤဝဲဒၣ်လီၤ. စီၤယူဒၤလၢအမ့ၢ်ပှၤတၢ်မၢဖိတဆံခံဂၤအကျါတဂၤန့ၣ်ဆှၢအဝဲသ့ၣ်, ဒီးအဝဲဒၣ်ဟဲထီၣ်ဆူယ့ၣ်ၡူးအအိၣ်ဒ်သိးအကနၢမူအီၤလီၤ.
48 ဘၣ်ဆၣ်ဒီးယ့ၣ်ၡူးစံးဝဲဒၣ်, “စီၤယူဒၤဧၢ, မ့ၢ်နဟ့ၣ်လီၤကွံာ်ပှၤကညီဖိခွါလၢတၢ်နၢမူတဘီန့ၣ်ဧါ.”
49 ဖဲအပျဲၢ်အဘီၣ်လၢအအိၣ်ဒီးယ့ၣ်ၡူးတဖၣ်ထံၣ်တၢ်လၢအကမၤ အသးန့ၣ်အဝဲသ့ၣ်စံးဝဲ, “ကစၢ်ဧၢမ့ၢ်ပကဘၣ်ကျီလၢပနးတဖၣ်န့ၣ်ဧါ.”
50 ဒီးအဝဲသ့ၣ်အကျါတဂၤကျီပှၤလုၢ်တၢ်အခိၣ်အဒိၣ်ကတၢၢ်အကုၢ်, ဒီးအနၢ်လၢအထွဲတခီတဲာ်ကွံာ်ဝဲဒၣ်လီၤ.
51 ဘၣ်ဆၣ်ဒီးယ့ၣ်ၡူးစံးဝဲ, “ထဲန့ၣ်ဘၣ်လံ” အဝဲဒၣ်ထိးပှၤတဂၤန့ၣ်အနၢ်ဒီးမၤဘျါက့ၤအီၤလီၤ.
52 တုၤနုၤတစုယ့ၣ်ၡူးစံးဘၣ်ပှၤလုၢ်တၢ်အခိၣ်အဒိၣ်တဖၣ် ဒီးတၢ်လုၢ်ဟံၣ်အပှၤခိးတၢ်ဖိအခိၣ်အနၢ်တဖၣ်ဒီးပှၤ ယူဒၤဖိကရၢအခိၣ်အနၢ်တဖၣ်လၢအဟဲတ့ၢ်ဝဲဖဲန့ၣ်ဒ်သိးအကဖီၣ်အီၤန့ၣ်, “မ့ၢ်သုဘၣ်ဟဲလၢနးဒီးနီၣ်တီၢ်, မၤမးအသးဒ်ယမ့ၢ်ပှၤလၢ အလုၣ်သ့ၣ်ခါပတာ်ထံကီၢ်အတၢ်သိၣ်တၢ်သီတဂၤအသိးန့ၣ်ဧါ.
53 ယအိၣ်ဒီးသုလၢတၢ်လုၢ်ဟံၣ်ပူၤကိးနံၤဒဲး, ဒီးသုတဂုာ်ကျဲးစၢးဖီၣ်ယၤဘၣ်. ဘၣ်ဆၣ်ဒီးအဝဲအံၤမ့ၢ်ဆၢကတီၢ်နၣ်ရံၣ်လၢ သုကမၤတၢ်တမံၤအံၤအဂီၢ်, ဖဲတၢ်ခံးတၢ်နၤအစိကမီၤပၢတၢ်န့ၣ်လီၤ.
(မး.၂၆:၅၇-၅၈, ၆၉-၇၅; မၢ်.၁၄:၅၃-၅၄, ၆၆-၇၂; ယိၤ.၁၈:၁၂-၁၈, ၂၅-၂၇)
54 တုၤနုၤတစုအဝဲသ့ၣ်ဖီၣ်ယ့ၣ်ၡူးဒီးစိာ်ကွံာ်အီၤဆူပှၤလုၢ်တၢ် အခိၣ်အဒိၣ်ကတၢၢ်အဟံၣ်ပူၤ, ဒီးစီၤပ့းတရူးပိာ်ထီၣ်သကွ့ၤအခံလီၤ.
55 ပှၤမၤကဲၤထီၣ်မ့ၣ်အူလၢကွီၢ်ဘျီၣ်အဂၢၤအခၢၣ်သး, ဒီးစီၤပ့းတရူးလဲၤဆ့ၣ်နီၤဃုာ်ဒီးပှၤလၢအဆ့ၣ်နီၤဝးတရံးမ့ၣ်အူ တဖၣ်န့ၣ်လီၤ.
56 ဖဲတၢ်ခ့တၢ်ပှၤပိာ်မုၣ်အကျါတဂၤထံၣ်အဝဲဒၣ်ဆ့ၣ်နီၤဖဲမ့ၣ်အူ အမဲာ်ညါန့ၣ်, အဝဲဒၣ်ကွၢ်ဃီၤအီၤလိၤလိၤဒီးစံးဝဲ, “ပှၤတဂၤအံၤစ့ၢ်ကီးပိာ်ယ့ၣ်ၡူးအခံလီၤ.”
57 ဘၣ်ဆၣ်ဒီး, စီၤပ့းတရူးသမၢဝဲဒီးစံး, “ပိာ်မုၣ်ဧၢ, ယတသ့ၣ်ညါဒၣ်လဲာ်အီၤဘၣ်.”
58 တစိၢ်ဖိအလီၢ်ခံန့ၣ်ပှၤပိာ်ခွါတဂၤပာ်သူၣ်ပာ်သးလၢအီၤဒီးစံး, “နမ့ၢ်အဝဲသ့ၣ်အကျါတဂၤစ့ၢ်ကီးလီၤ.”
ဘၣ်ဆၣ်ဒီးစီၤပ့းတရူးစံးဆၢဝဲ, “ပှၤတဂၤဧၢ, ယတမ့ၢ်ဘၣ်.”
59 ဒီးကဘၣ်တနၣ်ရံၣ်ဝံၤအလီၢ်ခံန့ၣ်ပှၤအဂၤတဂၤစံးဝဲသပှၢ်ပှၢ်, လၢအကလုၢ်ဆူၣ်ဆူၣ်အပူၤ, “တၢ်သးဒ့ဒီအလီၢ်တအိၣ်ဝဲနီတစဲးလၢပှၤတဂၤအံၤ ပိာ်ယ့ၣ်ၡူးအခံန့ၣ်ဘၣ်. အဂ့ၢ်ဒ်အံၤ, အဝဲဒၣ်စ့ၢ်ကီးမ့ၢ်ပှၤကၤလံၤလါဖိတဂၤန့ၣ်လီၤ.”
60 ဘၣ်ဆၣ်ဒီးစီၤပ့းတရူးစံးဆၢဝဲ, “ပှၤတဂၤဧၢ, နတဲတၢ်မနုၤလဲၣ်န့ၣ်ယတသ့ၣ်ညါဘၣ်.”
တဘျီဃီဖဲအဝဲဒၣ်ကတိၤဒံးတၢ်အဖၢမုၢ်န့ၣ်, ဆီဖါကီၢ်တဘ့ၣ်အိၣ်အိထီၣ်ဝဲန့ၣ်လီၤ.
61 ကစၢ်ဃၣ်တရံးအသးဒီးကွၢ်ဃီၤတၢ်လိၤလိၤဆူစီၤပ့းတရူးအအိၣ်, ဒီးစီၤပ့းတရူးသ့ၣ်နီၣ်ထီၣ်ကစၢ်အတၢ်ကတိၤလၢအစံးဘၣ်တ့ၢ်အီၤ, “တနၤအံၤတချုးဆီဖါကီၢ်အိၣ်အိထီၣ်န့ၣ်, နကသမၢယၤသၢစုန့ၣ်လီၤ.”
62 စီၤပ့းတရူးဟးထီၣ်, ဒီးဟီၣ်ဝဲဒၣ်နးနးကလဲာ်လီၤ.
(မး.၂၆:၆၇-၆၈; မၢ်.၁၄:၆၅)
63 ပှၤလၢအအိၣ်ခိးကွၢ်ဟုၣ်ယ့ၣ်ၡူးတဖၣ်မၤအီၤကလိာ်ကလာ် ဒီးတီၢ်အီၤလီၤ.
64 အဝဲသ့ၣ်ဘိၣ်ဘၢဃာ်ဝဲအမဲာ်ဒီးသံကွၢ်အီၤ, “မတၤတီၢ်နၤလဲၣ်. တယာ်ဒီးတဲတက့ၢ်.”
65 ဒီးအဝဲသ့ၣ်ကတိၤဒုၣ်ဒွဲၣ်ကတိၤဆါအီၤလၢတၢ်ကတိၤအဂၤ အါထံၣ်လီၤ.
(မး.၂၆:၅၉-၆၆; မၢ်.၁၄:၅၅-၆၄; ယိၤ.၁၈:၁၉-၂၄)
66 ဖဲမုၢ်ဆ့ၣ်ဝါထီၣ်န့ၣ်, ပှၤယူဒၤဖိကရၢအခိၣ်အနၢ်တဖၣ်, ပှၤလုၢ်တၢ်အခိၣ်အဒိၣ်တဖၣ်, ဒီးပှၤသ့တၢ်ဘူၣ်တၢ်ဘါ အတၢ်သိၣ်တၢ်သီတဖၣ်ပာ်ဖှိၣ်ထီၣ်အသးတပူၤဃီ, ဒီးယ့ၣ်ၡူးဘၣ်တၢ်ဟဲစိာ်ထီၣ်အီၤဆူအဝဲသ့ၣ်အကီၣ်ကးန့ၣ်လီၤ.
67 အဝဲသ့ၣ်စံးဝဲ, “စံးဘၣ်ပှၤတက့ၢ်နမ့ၢ်ခရံာ်န့ၣ်ဧါ.”
အဝဲဒၣ်စံးဆၢဝဲ, “ယမ့ၢ်စံးဘၣ်သုဒီးသုတနာ်ယၤဘၣ်.
68 ဒီးယမ့ၢ်သံကွၢ်သုတၢ်သံကွၢ်တထံၣ်န့ၣ်သုတစံးဆၢယၤဘၣ်.
69 ဘၣ်ဆၣ်ဒီးစးထီၣ်ခဲကနံၣ်အံၤဒီးဆူညါန့ၣ်, ပှၤကညီဖိခွါအံၤကဘၣ်တၢ်ဒုးဆ့ၣ်နီၤအီၤဖဲ ကစၢ်ယွၤသ့တၢ်လၢာ်တဂၤအစုထွဲတကပၤလီၤ.”
70 အဝဲသ့ၣ်ကိးဂၤဒဲးစံးဝဲ, “မ့မ့ၢ်ဒ်န့ၣ်ဒီး, နမ့ၢ်နဲကစၢ်ယွၤအဖိခွါဧါ.”
အဝဲဒၣ်စံးဆၢအဝဲသ့ၣ်, “သုစံးလၢယမ့ၢ်လီၤ.”
71 အဝဲသ့ၣ်စံးဝဲ, “ပတလိၣ်ဘၣ်ပှၤအုၣ်အသးနီတဂၤဘၣ်. ပနီၢ်ကစၢ်ဒၣ်ပဝဲ ပနၢ်ဟူဘၣ်လံအဝဲအတၢ်ကတိၤဒၣ်ဝဲတဖၣ်လံ.”