10
1 တၢ်မၤအသးတမံၤအံၤဝံၤအလီၢ်ခံန့ၣ်, ကစၢ်ယ့ၣ်ၡူးဃုထၢထီၣ်ကဒီးပှၤအသီနွံဆံဂၤ, ဒီးမၢလီၤအဝဲသ့ၣ်ခံဂၤတပူၤခံဂၤတပူၤ, ဒ်သိးအကလဲၤဆိလၢအဝဲဒၣ်အမဲာ်ညါဆူခူဝ့ၢ်ဒီး တၢ်လီၢ်ကိးပူၤဒဲးဖဲအဝဲဒၣ်ကလဲၤဝဲအလီၢ်န့ၣ်လီၤ.
2 အဝဲဒၣ်စံးဘၣ်အဝဲသ့ၣ်, “ဘုလၢတၢ်ကဘၣ်ကူးအီၤအိၣ်ဝဲဒၣ်အါမးလီၤ. ဘၣ်ဆၣ်ဒီးပှၤမၤတၢ်ဖိလၢအကကူးဒီးထၢဖှိၣ်တၢ်န့ၣ်အိၣ်ဝဲစှၤဒိၣ်မးလီၤ.
ဃ့ထုကဖၣ်လၢကူးဘုအကစၢ်လၢအကဆှၢလီၤပှၤမၤတၢ်ဖိတဖၣ်ဒ်သိး
အကကူးဒီးထၢဖှိၣ်က့ၤအဝဲအဘုတဖၣ်အဂီၢ်န့ၣ်တက့ၢ်.
3 လဲၤတက့ၢ်. ယမၢလီၤသုဒ်သိတဖၣ်လၢထွံၣ်မံၤတဖၣ်အကျါအသိးန့ၣ်လီၤ.
4 စ့အထၢၣ်မ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, ခီၣ်ဖံးတဖၣ်မ့ၢ်ဂ့ၤ, တဘၣ်စိာ်အီၤနီတမံၤတဂ့ၤ. တဘၣ်အိၣ်ကတီၢ်ဒ်သိး သုကကတိၤဆၢဂ့ၤဆၢဝါပှၤလၢကျဲလိၤနီတဂၤတဂ့ၤ.
5 တဘျီလၢ်လၢ်ဖဲသုလဲၤနုာ်လီၤဆူဟံၣ်တဖျၢၣ်အပူၤန့ၣ်, စံးဆိသုဝဲ, ‘မ်တၢ်ဃူတၢ်ဖိးအိၣ်လၢဟံၣ်တဖျၢၣ်အံၤအပူၤတက့ၢ်.’
6 ပှၤလၢအအဲၣ်တၢ်ဃူတၢ်ဖိးမ့ၢ်အိၣ်ဖဲန့ၣ်န့ၣ်, ပျဲနတၢ်ဃူတၢ်ဖိးအတၢ်ဆၢဂ့ၤဆၢဝါအိၣ်တ့ၢ်လၢအလိၤတက့ၢ်. ပှၤလၢအအဲၣ်တၢ်ဃူတၢ်ဖိးမ့ၢ်တအိၣ်ဘၣ်ဒီး, ဟံးန့ၢ်က့ၤနတၢ်ဃူတၢ်ဖိးအတၢ်ဆၢဂ့ၤဆၢဝါန့ၣ်တက့ၢ်.
7 အိၣ်ဖဲဟံၣ်တဖျၢၣ်ဃီန့ၣ်, ဒီးအီၣ်တၢ်အီတၢ်လၢအဝဲသ့ၣ် ဟ့ၣ်သုန့ၣ်တက့ၢ်. အဂ့ၢ်ဒ်အံၤ, ပှၤမၤတၢ်ဖိတဂၤကြၢးဘၣ်တၢ်ဟ့ၣ်အီၤလၢအဘူးအလဲလီၤ. တဘၣ်ဟးဝ့ၤဝီၤလၢဟံၣ်တဖျၢၣ်ဆူအဂၤတဖျၢၣ်န့ၣ်တဂ့ၤ.
8 တဘျီလၢ်လၢ်ဖဲသုလဲၤဆူဝ့ၢ်တဖျၢၣ်အပူၤဒီးတၢ်တူၢ်လိာ်ခီၣ်ဆၢသုန့ၣ်, အီၣ်တၢ်လၢအဘၣ်တၢ်ပာ်လီၤအီၤလၢသုမဲာ်ညါန့ၣ်တက့ၢ်.
9 မၤဘျါပှၤဆူးပှၤဆါဖဲဝ့ၢ်တဖျၢၣ်န့ၣ်အပူၤ, ဒီးစံးဘၣ်ပှၤအိၣ်ဖဲန့ၣ်တဖၣ်, ‘ကစၢ်ယွၤအဘီအမုၢ်ဟဲဘူးဒီးသုလံ.’
10 ဘၣ်ဆၣ်ဒီးတဘျီလၢ်လၢ်ဖဲသုလဲၤလၢဝ့ၢ်တဖျၢၣ်အပူၤဒီးသု တဘၣ်တၢ်တူၢ်လိာ်ခီၣ်ဆၢသုဖဲန့ၣ်န့ၣ်, လဲၤလီၤဆူကျဲမုၢ်ခိၣ်ဒီးစံး,
11 ‘ဖၣ်ကမူၣ်ဖၣ်ဆါလၢသုဝ့ၢ်ပူၤလၢအအိၣ်ထီဝဲလၢပခီၣ်လၣ် အလိၤတဖၣ်ဒၣ်လဲာ်န့ၣ်, ပတြူာ်ကွံာ်ပဝဲထီဒါသုလီၤ.
ဘၣ်ဆၣ်ဒီး, သ့ၣ်နီၣ်ထီၣ်တၢ်အဝဲအံၤတက့ၢ်. ကစၢ်ယွၤအဘီအမုၢ်ဟဲဘူးဒီးသုလံ.’
12 ယစံးဘၣ်တဲဘၣ်သု, ဖဲမုၢ်စံၣ်ညီၣ်အနံၤန့ၣ်, ကစၢ်ယွၤကပာ်ဖျါထီၣ်တၢ်သးကညီၤလၢ ဝ့ၢ်စဒိၣ်အဖီခိၣ်အါန့ၢ်ဒံးဝ့ၢ်တဖျၢၣ်န့ၣ်တက့ၢ်လီၤ.
(မး.၁၁:၂၀-၂၄)
13 “ဝ့ၢ်ဃရၤစံၣ်ဧၢ, တၢ်ကနးကဖှီၣ်လၢနဂီၢ်ဆံးဒိၣ်လဲၣ်. နၤစ့ၢ်ကီး, ဝ့ၢ်ဘ့ၤသစဲဒၤဧၢ, တၢ်ကနးကဖှီၣ်လၢနဂီၢ်ဆံးဒိၣ်လဲၣ်. တၢ်လီၤလးလၢအဘၣ်တၢ်မၤတ့ၢ်အီၤလၢသုပူၤတဖၣ် မ့ၢ်ဘၣ်တၢ်မၤတ့ၢ်အီၤလၢဝ့ၢ်ထါယၢၣ်ဒီးဝ့ၢ်စံဒိၣ်န့ၣ်, ပှၤထံဖိကီၢ်ဖိတဖၣ်ကဆ့ၣ်နီၤဝဲအိၣ်ဒီးတၢ်ကူထီၣ်သိးထီၣ်
ထၢၣ်တၢ်ကံးယာ်ဒီးဖှံလီၤက့ၤဖၣ်ဆါလၢအလိၤဒ်သိး
အကပာ်ဖျါလၢအဝဲသ့ၣ်ပီၢ်ယၢ်လီၤက့ၤအသးဃဲးဃဲးလံန့ၣ်လီၤ.
14 ဖဲမုၢ်စံၣ်ညီၣ်အနံၤန့ၣ်, ကစၢ်ယွၤကပာ်ဖျါထီၣ်တၢ်သးကညီၤ လၢဝ့ၢ်ထါယၢၣ်ဒီးဝ့ၢ်စံဒိၣ်အဖီခိၣ်အါန့ၢ်လၢသုဖီခိၣ်တက့ၢ်လီၤ.
15 မ့မ့ၢ်နဲဒၣ်ဝ့ၢ်ကပ့းရနီၣ်ဧၢ, နသးအိၣ်ယူာ်ထီၣ်ထီနသးဆူမူခိၣ်, မ့ၢ်ဧါ. နကဘၣ်တၢ်တ့ၢ်လီၤနၤဆူလရာ်အပူၤလီၤ.”
16 ယ့ၣ်ၡူးစံးဘၣ်အပျဲၢ်အဘီၣ်တဖၣ်, “ပှၤတဂၤလၢ်လၢ်လၢအဒိကနၣ်သုတၢ်ကတိၤန့ၣ်, မ့ၢ်အဒိကနၣ်ယတၢ်ကတိၤလီၤ. ပှၤတဂၤလၢ်လၢ်လၢအညိကွံာ်သုန့ၣ်, မ့ၢ်အညိကွံာ်ယၤ, ဒီးပှၤတဂၤလၢ်လၢ်လၢအညိကွံာ်ယၤန့ၣ်မ့ၢ်အညိကွံာ်ပှၤလၢ အမၢလီၤယၤတဂၤန့ၣ်လီၤ.”
17 ပှၤနွံဆံဂၤဟဲက့ၤဝဲလၢတၢ်သူၣ်ဖှံသးညီဖးဒိၣ်အပူၤလီၤ. အဝဲသ့ၣ်စံးဝဲ, “ကစၢ်ဧၢ, တၢ်ဝံတၢ်နါတဖၣ်ဒၣ်လဲာ် စူၢ်ပကလုၢ်လၢနမံၤအဃိလီၤ.”
18 ယ့ၣ်ၡူးစံးဆၢအဝဲသ့ၣ်, “ယထံၣ်မုၣ်ကီၤလံၢ်ဟဲလီၤတဲာ်လၢမူခိၣ်ဒ်လီဝၢ်ဒံးအသိးလီၤ.
19 ကနၣ်တက့ၢ်. ယဟ့ၣ်စိဟ့ၣ်ကမီၤလံသုဒ်သိးသုယီၢ်သုခါဂုၢ်ဧိၤဒးဧိၤတဖၣ်, ပတ့ၤချဲးတဖၣ်ဒီးဒုၣ်ဒါအစိကမီၤခဲလၢာ်ကသ့ဝဲအဂီၢ် ဒီးတၢ်တမၤဆူးမၤဆါသုနီတမံၤဘၣ်လီၤ.
20 ဘၣ်ဆၣ်ဒီး, တဘၣ်သူၣ်ခုသးခုလၢတၢ်ဝံတၢ်နါတဖၣ်စူၢ်သု ကလုၢ်အဃိတဂ့ၤ. မ့မ့ၢ်, သူၣ်ခုသးခုလၢသုမံၤတဖၣ်ဘၣ်တၢ်ကွဲးလီၤပာ်အီၤလၢမူခိၣ်
အဃိန့ၣ်တက့ၢ်.”
(မး.၁၁:၂၅-၂၇; ၁၃:၁၆-၁၇)
21 ဖဲအဆၢကတီၢ်ဝဲန့ၣ်, ယ့ၣ်ၡူးလၢပှဲၤဒီးတၢ်သးခုခီဖျိသးစီဆှံဒီးစံးဝဲ, “မူခိၣ်ဒီးဟီၣ်ခိၣ်အကစၢ်, ပၢ်ယွၤဧၢ, ယစံးဘျုးနၤမ့ၢ်လၢနပာ်ဖျါထီၣ်တၢ်သ့ၣ်တဖၣ်အံၤလၢ နပာ်တဒၢအီၤလၢပှၤကူၣ်ဘၣ်ကူၣ်သ့ဒီးပှၤမၤလိမၤဒိးဘၣ်တၢ်တဖၣ်, ဆူပှၤလၢအတမၤလိမၤဒိးဘၣ်တၢ်တဖၣ်အဃိန့ၣ်လီၤ. မ့ၢ်လီၤ, ပၢ်ဧၢ, တၢ်အဝဲအံၤဘၣ်တၢ်မၤအီၤလၢနတၢ်ဘၣ်နသးဒၣ်ဝဲအဃိလီၤ.
22 ယပၢ်ဟ့ၣ်လီၤလံယၤလၢတၢ်ကိးမံၤဒဲးလံ. ဖိခွါမ့ၢ်မတၤလဲၣ်န့ၣ်ပှၤတသ့ၣ်ညါနီတဂၤဘၣ်. ပှၤသ့ၣ်ညါမ့ၢ်ထဲပၢ်တဂၤဧိၤလီၤ.
ဒီးပၢ်မ့ၢ်မတၤလဲၣ်န့ၣ်ပှၤတသ့ၣ်ညါနီတဂၤဘၣ်.
ပှၤသ့ၣ်ညါမ့ၢ်ဝဲထဲဖိခွါဒီးပှၤသ့ၣ်တဖၣ်လၢဖိခွါသးအိၣ်
ပာ်ဖျါထီၣ်ပၢ်လၢအီၤန့ၣ်လီၤ.”
23 တုၤနုၤတစုယ့ၣ်ၡူးဃၣ်ဃီၤအသးဆူအပျဲၢ်အဘီၣ်သ့ၣ်တဖၣ်အအိၣ်ဒီး စံးဘၣ်အဝဲသ့ၣ်ကစုဒု, “သုထံၣ်တၢ်လၢသုကဘၣ်ထံၣ်သ့ၣ်တဖၣ်
အံၤဒီး, သုဘၣ်ဆိၣ်ဂ့ၤဆိၣ်ဝါသုဝဲဆံးဒိၣ်လဲၣ်.
24 ယစံးဘၣ်တဲဘၣ်သု, ဝံဒီးစီၤလိၣ်စီၤပၤတဖၣ်သးအိၣ်ထံၣ်ဘၣ် တၢ်လၢသုထံၣ်, ဘၣ်ဆၣ်တထံၣ်ဘၣ်ဝဲဘၣ်. ဒီးသးအိၣ်နၢ်ဟူဘၣ်တၢ်လၢသုနၢ်ဟူ, ဘၣ်ဆၣ်တနၢ်ဟူဘၣ်ဝဲဘၣ်.”
25 ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဂၤဂဲၤဆၢထၢၣ်ဒီး ဂုာ်ကျဲးစၢးဝဲဒ်သိးအကဖီၣ်န့ၢ်ယ့ၣ်ၡူးလၢအတၢ်ကတိၤဒၣ်ဝဲလီၤ. အဝဲဒၣ်သံကွၢ်ယ့ၣ်ၡူး, “သရၣ်ဧၢ, ဒ်သိးယကဒိးန့ၢ်ဘၣ်တၢ်မူအထူအယိာ်န့ၣ်ယကဘၣ်မၤဒ်လဲၣ်.”
26 ယ့ၣ်ၡူးစံးဆၢအီၤ, “တၢ်ကွဲးအသးစီဆှံတဖၣ်စံးဝဲဒ်လဲၣ်. နထုးထီၣ်နဲအခီပညီဒ်လဲၣ်.”
27 ပှၤတဂၤန့ၣ်စံးဆၢတၢ်ဒီးစံးဝဲ, “နကဘၣ်အဲၣ်ကစၢ်ယွၤနကစၢ်လၢနသူၣ်ကံၢ်သးလဲ, လၢနသးဒီဖျၢၣ်, လၢနဂံၢ်နဘါခဲလၢာ်, ဒီးလၢနတၢ်ကူၣ်တၢ်ဆးခဲလၢာ်, ဒီးနကဘၣ်အဲၣ်ပှၤလၢနဃၢၤဒ်နအဲၣ်လီၤနသးဒၣ်နဲအသိးလီၤ.”
28 ယ့ၣ်ၡူးစံးဆၢအီၤ, “နတၢ်စံးဆၢဘၣ်မးလီၤ. အိၣ်မူထွဲအခံ, ဒီးနကမူနဲလီၤ.”
29 ဘၣ်ဆၣ်ဒီး, ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဂၤအံၤသးအိၣ် ပာ်တီပာ်လိၤအသးသတးဒီးသံကွၢ်ယ့ၣ်ၡူး, “ပှၤလၢယဃၢၤမ့ၢ်မတၤတဂၤလဲၣ်.”
30 ယ့ၣ်ၡူးစံးဆၢဝဲ, “တဘျီပှၤအိၣ်ဝဲဒၣ်တဂၤ, ဒီးဖဲအဝဲလဲၤလီၤလၢဝ့ၢ်ယရူၤၡလ့ၣ်ဆူဝ့ၢ်ယရံၤဃိန့ၣ်, လီၤဘၣ်လၢတမျာ်အကျါ, ဒီးအဝဲသ့ၣ်ဘ့ၣ်လီၤကွံာ်အကူအသိး, ဟံးန့ၢ်အတၢ်ခဲလၢာ်, တီၢ်အီၤဘူးအကသံဒီးပာ်တ့ၢ်အီၤန့ၣ်လီၤ.
31 တၢ်မၤအသးလၢပှၤလုၢ်တၢ်အခိၣ်တဂၤလဲၤဘၣ်အတီၤဖဲကျဲအဝဲန့ၣ်လီၤ. ဖဲအဝဲဒၣ်ထံၣ်ပှၤတဂၤန့ၣ်, အဝဲဒၣ်လဲၤပူၤကွံာ်အီၤလၢကျဲအဂၤတကပၤလီၤ.
32 ဒ်န့ၣ်အသိး, ပှၤလ့ၤဝံဖိတဂၤဟဲဖဲန့ၣ်စ့ၢ်ကီး, လဲၤဃီၤဝဲ, ဒီးကွၢ်ပှၤတဂၤန့ၣ်ဒီး လဲၤပူၤကွံာ်အီၤလၢကျဲအဂၤတကပၤန့ၣ်လီၤ.
33 မ့မ့ၢ်ပှၤၡၤမရံဖိတဂၤ, ဖဲအဝဲဒၣ်လဲၤတၢ်, ဒီးဟဲဘၣ်ဖဲပှၤတဂၤအိၣ်ဝဲအလီၢ်ဒီးထံၣ်ဘၣ်အီၤန့ၣ်, အဝဲဒၣ်သးကညီၤဘၣ်အီၤလီၤ.
34 အဝဲဒၣ်လဲၤဃီၤဆူအအိၣ်, လူလီၤသိဒီးစပံးထံလၢအပူၤလီၢ်ပူၤကျဲတဖၣ်အလိၤ, ဒီးဘိၣ်ဘံထီၣ်ဝဲလီၤ. အန့ၣ်ဝံၤအလီၢ်ခံအဝဲဒၣ်ပာ်ထီၣ်အီၤလၢအနီၢ်ကစၢ်ဒၣ်ဝဲအဆၣ်ဖိကီၢ်ဖိ
အလိၤ, ဒီးဆှၢအီၤဆူပှၤသမှံၤအဘျီၣ်တဖျၢၣ်ဒီးအံးထွဲကွၢ်ထွဲအီၤဖဲန့ၣ်လီၤ.
35 မုၢ်ဆ့ၣ်ထီၣ်တနံၤန့ၣ်, အဝဲဒၣ်ထုးထီၣ်စ့ဒန့ၤရံခံဘ့ၣ်, ဒီးဟ့ၣ်ဝဲဘျီၣ်ခိၣ်, ဒီးစံးဘၣ်အီၤ, ‘အံးထွဲကွၢ်ထွဲအီၤတက့ၢ်. ဒီးဖဲယဟဲက့ၤန့ၣ်, ယကဟ့ၣ်ကဒါက့ၤနၤကယဲၢ်တၢ်လၢနဘၣ်လၢာ်အါထီၣ်နဲလၢ အဝဲဒၣ်အဂီၢ်န့ၣ်လီၤ.’ ”
36 ဒီးယ့ၣ်ၡူးမၤကတၢၢ်အတၢ်ကတိၤဒီးစံးဝဲ, “လၢနတၢ်ထံၣ်န့ၣ်, ပှၤသၢဂၤအံၤအကျါ, ပှၤမၤဘၣ်ပှၤလၢတမျာ်ဒိအီၤတဂၤဒ်ပှၤလၢအဃၢၤတဂၤအသိးန့ၣ်, မ့ၢ်ဖဲလဲၣ်တဂၤလဲၣ်.”
37 ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဂၤအံၤစံးဆၢဝဲ, “မ့ၢ်ပှၤလၢအဂ့ၤလၢအဝဲဒၣ်အဖီခိၣ်တဂၤန့ၣ်လီၤ.”
ယ့ၣ်ၡူးစံးဆၢဝဲ, “လဲၤ ဒီးမၤနဲဒ်န့ၣ်အသိးတက့ၢ်.”
38 ဖဲယ့ၣ်ၡူးဒီးအပျဲၢ်အဘီၣ်တဖၣ်လဲၤကဒီးတၢ်ဆူညါန့ၣ်, အဝဲသ့ၣ်လဲၤတုၤလၢသဝီတဖျၢၣ်ဖဲပိာ်မုၣ်တဂၤလၢအမံၤမ့ၢ် နီၢ်မၢ်သၤ, တူၢ်လိာ်ခီၣ်ဆၢအီၤလၢအဝဲဒၣ်အဟံၣ်ပူၤလီၤ.
39 အဝဲဒၣ်အိၣ်ဒီးအဒီပုၢ်ဝဲၢ်မုၣ်တဂၤလၢအမံၤမ့ၢ်နီၢ်မၤရံ, လၢအဆ့ၣ်နီၤဖဲကစၢ်အခီၣ်ထံးဒီးဒိကနၣ်အဝဲအတၢ်သိၣ် လီၤသီလီၤတၢ်န့ၣ်လီၤ.
40 နီၢ်မၢ်သၤအသးဘၣ်တံာ်တာ်လၢတၢ်ဖံးတၢ်မၤခဲလၢာ်လၢ အဘၣ်မၤဝဲတဖၣ်အဃိလီၤ. လၢတၢ်န့ၣ်အဃိအဝဲဒၣ်လဲၤဃီၤဆူ
အအိၣ်ဒီးစံးဝဲ, “ကစၢ်ဧၢ, ယဒီပုၢ်ဝဲၢ်မုၣ်ဒုးမၤယၤတၢ်မၤခဲလၢာ်ထဲ
တဂၤဧိၤန့ၣ်, နတပာ်လၢအမ့ၢ်တၢ်နီတမံၤဘၣ်ဧါ. တဲအီၤလၢအကဟဲမၤစၢၤယၤတက့ၢ်.”
41 ကစၢ်ယ့ၣ်ၡူးစံးဆၢအီၤ, “နီၢ်မၢ်သၤဧၢ, နီၢ်မၢ်သၤဧၢ, နဲဒၣ်အံၤ, နဘၣ်ကိၢ်ဘၣ်ဂီၤဒီးနသးဘၣ်တံာ်တာ်လၢတၢ်အါမံၤအဃိလီၤ.
42 ဘၣ်ဆၣ်ဒီးတၢ်လၢအလိၣ်အိၣ်ဝဲထဲတမံၤဧိၤလီၤ. နီၢ်မၤရံဃုထၢတ့ၢ်ဝဲတၢ်လၢအဂ့ၤအဘၣ်တမံၤဒီးပှၤ တဟံးထီၣ်ကွံာ်အီၤလၢအအိၣ်နီတဂၤဘၣ်လီၤ.”