8
1 ဒီးခဲအံၤစီၤအလံၤၡါတဲဘၣ်ပိာ်မုၣ်လၢအအိၣ်ဆိးလၢဝ့ၢ်ၡူ န့ၣ်, လၢအဝဲမၤမူထီၣ်န့ၢ်က့ၤအဖိခွါလၢ, ယွၤကဒုးလီၤဘၣ်တၢ်သၣ် ဝံၤလီၤဒိတမံၤလၢကီၢ်န့ၣ်, လၢကယံာ်ဝဲနွံနံၣ်, ဒီးလၢအဝဲကဘၣ်ဟးထီၣ်ဃုာ်ဒီးအပှၤဟံၣ်ဖိဃီဖိ, ဒီးလဲၤဒီးအိၣ်ဆိးလၢတၢ်လီၢ်အဂၤတတီၤတီၤန့ၣ်လီၤ.
2 ပိာ်မုၣ်န့ၣ်ပိာ်ထွဲစီၤအလံၤၡါအတၢ်သိၣ်လိနဲၣ်ယုၤဒီးလဲၤ ဝဲဒီးအပှၤဟံၣ်ဖိဃီဖိလၢကလဲၤအိၣ်ဆိးဝဲဖဲကီၢ်ဖလ့ၡသးအ ပူၤ, လၢနွံနံၣ်အတီၢ်ပူၤန့ၣ်လီၤ.
3 ဖဲနွံနံၣ်အကတၢၢ်န့ၣ်အဝဲက့ၤကဒါက့ၤဝဲဆူကီၢ်အံၣ်စရ့လး, ဒီးလဲၤဝဲဆူစီၤပၤအအိၣ်, ဒ်သိးကဃ့က့ၤအဟံၣ်ဒီးအဟီၣ်ခိၣ် လၢကဘၣ်တၢ်ဟ့ၣ်က့ၤကဒါက့ၤအီၤအဂီၢ်န့ၣ်လီၤ.
4 အဝဲထံၣ်ဘၣ်စီၤပၤကတိၤတၢ်ဒီးစီၤအလံၤၡါအခ့အပှၤစီၤက့ၤဃ စံန့ၣ်လီၤ. စီၤပၤသးအိၣ်သ့ၣ်ညါဘၣ်တၢ်လီၤလးတဖၣ်လၢစီၤအလံၤ ၡါမၤဝဲအဂ့ၢ်န့ၣ်လီၤ.
5 ဖဲစီၤက့ၤဃစံတဲဘၣ်စီၤပၤလၢစီၤအလံၤၡါဒုးမူထီၣ်က့ၤပှၤ သံတဂၤဒ်လဲၣ်အဂ့ၢ်အခါန့ၣ်, ပိာ်မုၣ်န့ၣ်, သံကွၢ်ကညးထီၣ်အတၢ်ဂ့ၢ်ဆူစီၤပၤအအိၣ်န့ၣ်လီၤ. ဒီးစီၤက့ၤဃစံစံးဘၣ်စီၤပၤ, “တၢ်ဒိၣ်ကစၢ်စီၤပၤဧၢ, ကွၢ်ကွၢ်အအံၤမ့ၢ်ပိာ်မုၣ်ဒီးအအံၤမ့ၢ်အဝဲအဖိခွါလၢစီၤ အလံၤၡါမၤမူထီၣ်က့ၤအီၤန့ၣ်လီၤ.”
6 လၢတၢ်စံးဆၢက့ၤစီၤပၤအတၢ်သံကွၢ်အဂီၢ်န့ၣ်, ပိာ်မုၣ်န့ၣ်ပာ်ဂၢၢ်ပာ်ကျၢၤတၢ်လၢစီၤက့ၤဃစံတဲဝဲ, ဒီးလၢတၢ်န့ၣ်အဃိ စီၤပၤကိးဃီၤဝဲပဒိၣ်တဂၤဒီးတဲအီၤလၢကဟ့ၣ်ကဒါက့ၤပိာ် မုၣ်န့ၣ်လၢ, ကယဲၢ်တၢ်ခဲလၢာ်လၢအဘၣ်ဃးဒီးအီၤ, ဃုာ်ဒီးတၢ်အလုၢ်အပှ့ၤလၢကယဲၢ်တၢ်မုၢ်တၢ်ဘိလၢစံာ်ပျီ တဖၣ်ဟ့ၣ်ထီၣ်ဝဲလၢနွံနံၣ်အတီၢ်ပူၤဖဲအဝဲဟးယံၤဝဲအဆၢကတီၢ် န့ၣ်လီၤ.
7 စီၤအလံၤၡါလဲၤဝဲဆူဝ့ၢ်ဒၤမ့းစ့းဖဲကီၢ်စူၤရံအစီၤပၤ ဘ့ၣ်ဟဒးဘၣ်ဆူးဘၣ်ဆါဝဲအခါန့ၣ်လီၤ. ဒီးဖဲစီၤပၤဘၣ်တၢ်တဲဘၣ်အီၤလၢစီၤအလံၤၡါအိၣ်ဝဲဖဲန့ၣ်န့ၣ်,
8 စီၤပၤစံးဘၣ်စီၤဃစ့လးလၢအမ့ၢ်အဝဲအပဒိၣ်အကျါတဂၤဒ်အံၤ, “လဲၤစိာ်တၢ်ဟ့ၣ်တမံၤဆူဝံအအိၣ်, ဒီးမၢအသံကွၢ်ယွၤလၢတၢ် ကသ့ၣ်ညါဘၣ်လၢယကဘျါက့ၤဧါမ့တမ့ၢ်တဘျါက့ၤဘၣ်လဲၣ်အဂ့ၢ်န့ၣ် တက့ၢ်.”
9 လၢတၢ်န့ၣ်အဃိစီၤဃစ့လးဂီၤကၢ်ထီၣ်ကီၤလၤအူးအဒုလွံၢ်ဆံ ဒီးကယဲၢ်တၢ်ဟ့ၣ်အဂ့ၤကတၢၢ်အကလုာ်ကလုာ်လၢဝ့ၢ်ဒၤမ့ၤစ့းဒီး လဲၤဝဲဆူစီၤအလံၤၡါအအိၣ်န့ၣ်လီၤ. တုၤစီၤဃစ့လးထံၣ်စီၤအလံၤၡါန့ၣ်စံးဝဲဒၣ်, “နခ့နပှၤစီၤပၤဘ့ၣ်ဟဒးဆှၢလီၤယၤဒ်သိးယကသံကွၢ်နၤလၢမ့ၢ် အဝဲကဘျါက့ၤဧါမ့တမ့ၢ်တဘျါက့ၤလၢၤဘၣ်လဲၣ်အဂ့ၢ်န့ၣ်လီၤ.”
10 စီၤအလံၤၡါစံးဆၢဝဲဒၣ်, “ယွၤလီၣ်ဖျါထီၣ်န့ၢ်ယၤလၢအဝဲ ဒၣ်ကသံဝဲလီၤ. ဘၣ်ဆၣ်က့ၤဆူအအိၣ်ဒီးတဲဘၣ်အီၤလၢအဝဲ ကဘျါက့ၤန့ၣ်တက့ၢ်.”
11 အန့ၣ်ဝံၤဒီးစီၤအလံၤၡါကွၢ်စူၣ်အီၤလၢမဲာ်သၣ်လၢအလီၤပျံၤ လီၤဖုးတုၤစီၤဃစ့လးအသူၣ်ကိၢ်သးဂီၤဝဲန့ၣ်လီၤ. သတူာ်ကလာ်စီၤအလံၤၡါအမဲာ်ထံပုာ်ထီၣ်ယွၤလီၤဝဲန့ၣ်လီၤ.
12 စီၤဃစ့လးသံကွၢ်အီၤ, “တၢ်ဒိၣ်ဧၢ, ဘၣ်မနုၤအဃိလၢနမဲာ်ထံလီၤန့ၣ်လဲၣ်.”
စီၤအလံၤၡါစံးဆၢဝဲ, “မ့ၢ်လၢယသ့ၣ်ညါတၢ်လီၤပျံၤလီၤဖုးတဖၣ်လၢနကမၤအီၤထီဒါ ကီၢ်အံၣ်စရ့လးအပှၤဂီၢ်မုၢ်အဃိန့ၣ်လီၤ. နကဒွဲၣ်ကွံာ်အဝဲသ့ၣ်အတိာ်ဧိၤတာ်ဧိၤတဖၣ်လၢမ့ၣ်အူ, မၤသံကွံာ်အပှၤသးစၢ်တဖၣ်, ကီၢ်အဖိတဖၣ်ဒီးဖှဲးသ့ၣ်ဖးကွံာ် ပိာ်မုၣ်လၢအဒၢတဖၣ်အဟၢဖၢန့ၣ်လီၤ.”
13 စီၤဃစ့လးသံကွၢ်ဝဲ, “ယအိၣ်ဒီးတၢ်စိတၢ်ကမီၤထဲထဲန့ၣ် ကသ့တဘျီဘျီဧါ. ယတမ့ၢ်တၢ်နီတမံၤဘၣ်.”
စီၤအလံၤၡါစံးဆၢဝဲ, “ယွၤဒုးနဲၣ်တ့ၢ်ယၤလၢနကကဲထီၣ်ကီၢ် စူၤရံအစီၤပၤန့ၣ်လီၤ.”
14 စီၤဃစ့လးက့ၤကဒါက့ၤဆူစီၤဘ့ၣ်ဟဒးအအိၣ်ဒီးစီၤဘ့ၣ်ဟဒး သံကွၢ်အီၤ, “စီၤအလံၤၡါစံးတၢ်မနုၤလဲၣ်.”
စီၤဃစ့လးစံးဆၢဝဲ, “စီၤအလံၤၡါစံးဘၣ်ယၤလၢနကဘျါက့ၤ သပှၢ်ကတၢၢ်န့ၣ်လီၤ.”
15 ဘၣ်ဆၣ်လၢခံတနံၤန့ၣ်, စီၤဃစ့လးဟံးန့ၢ်ယၣ်လုးတဘ့ၣ်, စုၣ်ဝဲလၢထံကျါဒီးပအၢသံကွံာ်စီၤပၤန့ၣ်လီၤ.
ဒီးစီၤဃစ့လးကဲထီၣ်ကီၢ်စူၤရံအစီၤပၤလၢစီၤဘ့ၣ်ဟဒးအလီၢ် န့ၣ်လီၤ.
(၂ကွဲး.၂၁:၁-၂၀)
16 လၢစီၤအၤဃာ်အဖိခွါကီၢ်အံၣ်စရ့လးအစီၤပၤစီၤယဟိရၣ်ပၢတၢ် ယဲၢ်နံၣ်တနံၣ်န့ၣ်စီၤယဟိၡၤဖးအဖိခွါစီၤယဟိရၣ်ကဲထီၣ်ကီၢ် ယူဒၤအစီၤပၤ,
17 ဖဲအသးအိၣ်ဝဲသၢဆံခံနံၣ်, ဒီးအဝဲပၢတၢ်လၢဝ့ၢ်ယရူၤၡလ့ၣ် အပူၤဃိးနံၣ်န့ၣ်လီၤ.
18 အဝဲအမါမ့ၢ်စီၤအၤဃာ်အဖိမုၣ်, ဒီးဒ်စီၤအၤဃာ်အဟံၣ်ဖိဃီဖိ အသိးန့ၣ်အဝဲပိာ်ထွဲကျဲအၢကျဲသီတဖၣ်လၢကီၢ်အံၣ်စရ့လး အစီၤပၤတဖၣ်ပိာ်တ့ၢ်ဝဲန့ၣ်လီၤ. အဝဲမၤတ့ၢ်တၢ်ဒဲးဘးထီဒါယွၤ,
19 ဘၣ်ဆၣ်ယွၤတသးအိၣ်လၢကမၤဟးဂီၤကီၢ်ယူဒၤဘၣ်. အဂ့ၢ်ဒ်အံၤ, ယွၤအၢၣ်လီၤတ့ၢ်အခ့အပှၤစီၤဒၤဝံးလၢအဝဲ အစၢၤအသွဲၣ်တဖၣ်ကပၢထွဲဒံးတၢ်ဆူညါထီဘိန့ၣ်လီၤ.
20 ဖဲစီၤယဟိရၣ်ပၢတၢ်အခါန့ၣ်, ကီၢ်အဒိၣ်ပူထီၣ်တၢ်ထီဒါကီၢ်ယူ ဒၤဒီးကဲထီၣ်ထံကီၢ်လၢအအိၣ်သဘျ့တဘ့ၣ်န့ၣ်လီၤ.
21 လၢတၢ်န့ၣ်အဃိ, စီၤယဟိရၣ်ဟးထီၣ်ဝဲဒီးကယဲၢ်အလ့ၣ်ကဟၣ်ခဲ လၢာ်ဒီးလဲၤဆူစၤဧံရၤ, ဒီးဖဲန့ၣ်ပှၤအဒိၣ်အသုးမုၢ်ကဝီၤဃးအဝဲသ့ၣ်န့ၣ်လီၤ. လၢမုၢ်နၤအကတီၢ်န့ၣ်အဝဲဒီးအလ့ၣ်ကဟၣ်သုးခိၣ်တဖၣ်ဟးထီၣ်ဒီး ဃ့ၢ်ပူၤဖျဲးအသးန့ၢ်ဝဲ, ဒီးအပှၤသုးဖိတဖၣ်ဃ့ၢ်ပြံပြါကွံာ်ဆူအဝဲသ့ၣ်အဟံၣ်ဒၣ်ဝဲန့ၣ်လီၤ.
22 စးထီၣ်လၢန့ၣ်လံၤလံၤကီၢ်အဒိၣ်သဘျ့ထီၣ်ကွံာ်လၢယူဒၤအဖီလာ် န့ၣ်လီၤ. ဖဲတကတီၢ်ဃီအပူၤအတ့ၤန့ၣ်, ဝ့ၢ်လံးဘနၤပူထီၣ်စ့ၢ်ကီးတၢ်န့ၣ် လီၤ.
23 ကယဲၢ်တၢ်အဂၤခဲလၢာ်လၢစီၤယဟိရၣ်မၤဝဲန့ၣ်ဘၣ်တၢ်ကွဲးနီၣ် အီၤလၢကီၢ်ယူဒၤအစီၤပၤအလံာ်တၢ်စံၣ်စိၤတဲစိၤအပူၤန့ၣ်လီၤ.
24 စီၤယဟိရၣ်သံဝဲ, ဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ် သွၣ်ခိၣ်တဖၣ်လၢအအိၣ်လၢစီၤဒၤဝံးအဝ့ၢ်ပူၤဒီးအဖိခွါစီၤအဃၤစယၤ ကဲထီၣ်စီၤပၤလၢအလီၢ်န့ၣ်လီၤ.
(၂ကွဲး.၂၂:၁-၆)
25 လၢစီၤအၤဃာ်အဖိခွါကီၢ်အံၣ်စရ့လးအစီၤပၤစီၤယဟိရၣ်ပၢတၢ် တဆံခံနံၣ်တနံၣ်အပူၤန့ၣ်, စီၤယဟိရၣ်အဖိခွါစီၤအဃၤစယၤကဲထီၣ်ကီၢ်ယူဒၤအစီၤပၤ,
26 ဖဲအသးအိၣ်ခံဆံခံနံၣ်, ဒီးအဝဲပၢတၢ်ဖဲဝ့ၢ်ယရူၤၡလ့ၣ်အပူၤ တနံၣ်န့ၣ်လီၤ. အဝဲအမိၢ်မ့ၢ်နီၢ်ဧသါလယၤလၢအမ့ၢ်ကီၢ်အံၣ်စရ့လးစီၤပၤအၤဃာ် အဖိမုၣ်ဒီးစီၤပၤဧိၣ်ရံၤအလံၤမုၣ်န့ၣ်လီၤ.
27 မ့ၢ်လၢစီၤအဃၤစယၤဒီဘူးဒီတံၢ်ဒီးစီၤပၤအၤဃာ်ခီဖျိတၢ် တ့တၢ်ဖျီအဃိန့ၣ်, အဝဲမၤတ့ၢ်တၢ်ဒဲးဘးထီဒါယွၤဒ်သိးဒၣ်စီၤ အၤဃာ်အဒူၣ်ဖိထၢဖိမၤတ့ၢ်ဝဲန့ၣ်လီၤ.
28 စီၤပၤအဃၤစယၤလဲၤပာ်ဖှိၣ်အသးဒီးကီၢ်အံၣ်စရ့လးအစီၤပၤ ယဟိရၣ်လၢတၢ်ဒုးတၢ်အပူၤထီဒါကီၢ်စူၤရံအစီၤပၤဃစ့လးန့ၣ် လီၤ. သုးမုၢ်တဖၣ်ဒုးလိာ်အသးဖဲဝ့ၢ်ရၤမိးလၢကီၢ်ကံးလဧးအပူၤ ဒီးစီၤယဟိရၣ်ဘၣ်ဒိဘၣ်ထံးလၢတၢ်ဒုးပျီပူၤန့ၣ်လီၤ.
29 အဝဲဟဲက့ၤကဒါက့ၤဆူဝ့ၢ်ယံးစရ့လးဒ်သိးအတၢ်ပူၤလီၢ်ပူၤ ကျဲတဖၣ်ကဘျါက့ၤဝဲအဂီၢ်, ဒီးစီၤပၤအဃၤစယၤလဲၤအိၣ်သကိးအီၤ ဖဲန့ၣ်လီၤ.