23
(၂ကွဲး.၃၄:၃-၇, ၂၉-၃၃)
1 စီၤပၤယိၤၡံယၤကိးဖှိၣ်ကယဲၢ်ကီၢ်ယူဒၤဒီးဝ့ၢ်ယရူၤၡလ့ၣ် အခိၣ်အနၢ်ခဲလၢာ်,
2 ဒီးအဝဲသ့ၣ်လဲၤသကိးဝဲတပူၤဃီဆူယွၤအတၢ်လုၢ်ဟံၣ်, ဃုာ်ဒီးပှၤလုၢ်တၢ်အခိၣ်တဖၣ်, ဝံတဖၣ်, ဒီးကယဲၢ်ပှၤဂီၢ်မုၢ်ခဲ လၢာ်, ပှၤထူးပှၤတီၤမ့ၢ်ဂ့ၤ, ပှၤဖှီၣ်ဖိယာ်ဖိမ့ၢ်ဂ့ၤန့ၣ်လီၤ. လၢအဝဲသ့ၣ်ခဲလၢာ်အမဲာ်ညါန့ၣ်, စီၤပၤဖးထီၣ်ဝဲလံာ်တၢ်အၢၣ် လီၤအီလီၤဒီဘ့ၣ်ညါ, လၢအဘၣ်တၢ်ထံၣ်န့ၢ်အီၤလၢယွၤအတၢ်လုၢ်ဟံၣ်အပူၤ, လၢအကလုၢ်ဖးဒိၣ်န့ၣ်လီၤ.
3 အဝဲဆၢထၢၣ်လၢစီၤပၤအတၢ်ဆၢထၢၣ်အလီၢ်, ဒီးမၤတၢ်အၢၣ်လီၤအီလီၤတမံၤဒီးယွၤလၢအကစူၢ်အီၤ, လၢအကတိၢ်န့ၢ်ဖံးဃာ်အဝဲအတၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီး အတၢ်မၤလိာ်တဖၣ်လၢအသူၣ်ကံၢ်သးလဲဒီးအသးဒီဖျၢၣ်, ဒီးတၢ်တဖၣ်လၢကဘၣ်မၤဝဲလၢအအိၣ်ဘျးစဲအသး ဒီးတၢ်အၢၣ်လီၤအီလီၤဒ်အအိၣ်ကွဲးအသးလၢလံာ်အပူၤအသိးန့ၣ်, အဝဲကအိၣ်မူမၤထွဲဝဲန့ၣ်လီၤ. ဒီးကယဲၢ်ပှၤဂီၢ်မုၢ်ခဲလၢာ်အၢၣ်လီၤလၢကတိၢ်န့ၢ်ဖံးဃာ်တၢ်အၢၣ် လီၤအီလီၤန့ၣ်လီၤ.
4 ဝံၤဒီး, စီၤယိၤၡံယၤဟ့ၣ်လီၤအကလုၢ်ဆူပှၤလုၢ်တၢ်အခိၣ်အဒိၣ် ကတၢၢ်စီၤဃံးလကံယၤ, အဝဲအပှၤလုၢ်တၢ်အခိၣ်စၢၤတဖၣ်, ဒီးပှၤခိးတၢ်အိၣ်မူအိၣ်ဒါဖဲယွၤအတၢ်လုၢ်ဟံၣ်အကျဲစၢၤတဖၣ်လၢ အကဟဲစိာ်ထီၣ်ကယဲၢ်တၢ်ပီးတၢ်လီခဲလၢာ်လၢအဘၣ်တၢ်သူ အီၤလၢတၢ်ဘူၣ်ထီၣ်ဘါထီၣ်ဘဧၤလးအဂီၢ်, ကစၢ်မုၣ်အၡ့ရၤအဂီၢ်ဒီးဆၣ်ဧိၤဖီဧိၤအဂီၢ်, ဆူယွၤအတၢ်လုၢ်ဟံၣ်အချၢန့ၣ်လီၤ. စီၤပၤဒွဲၣ်အူထီၣ်ကွံာ်တၢ်သ့ၣ်တဖၣ်အံၤခဲလၢာ်လၢဝ့ၢ်အချၢ ဘူးဒီးကံဒြိၣ်အတၢ်တြီၤပူၤ, ဝံၤဒီးမၢပှၤစိာ်ထီၣ်ကွံာ်အချါတဖၣ်ဆူဝ့ၢ်ဘ့ၤသ့လးန့ၣ်လီၤ.
5 လၢကီၢ်ယူဒၤအဝ့ၢ်တဖၣ်အပူၤဒီးလၢတၢ်လီၢ်တဖၣ်လၢအအိၣ်ဘူးဒီး ဝ့ၢ်ယရူၤၡလ့ၣ်အပူၤန့ၣ်, အဝဲသုးကွံာ်ပှၤလုၢ်တၢ်အခိၣ်တဖၣ်လၢတၢ်မၤအလီၢ်လၢကီၢ်ယူဒၤ အစီၤပၤဃုထၢပာ်လီၤတ့ၢ်အီၤဒ်သိးကလုၢ်ထီၣ်တၢ်လုၢ်တၢ်ပာ်တဖၣ် ဆူပှၤတစူၢ်တနာ်ယွၤအတၢ်လုၢ်လီၢ်တဖၣ်အဖီခိၣ်, ကယဲၢ်ပှၤလုၢ်တၢ်အခိၣ်တဖၣ်လၢအလုၢ်ထီၣ်တၢ်လုၢ်တၢ်ပာ်တဖၣ်ဆူဘဧၤ လးအအိၣ်, ဆူမုၢ်အအိၣ်, ဆူလါအအိၣ်, ဆူမူဖျၢၣ်တဖၣ်အအိၣ်ဒီးဆူဆၣ်ဧိၤဖီဧိၤတဖၣ်အအိၣ်န့ၣ်လီၤ.
6 ကစၢ်မုၣ်အၡ့ရၤအတၢ်ပနီၣ်လၢအအိၣ်လၢယွၤအတၢ်လုၢ်ဟံၣ်အပူၤန့ၣ်, အဝဲသုးကွံာ်ဝဲဒီးစိာ်ထီၣ်ဝဲဆူဝ့ၢ်အချၢဆူကံဒြိၣ်အတၢ်တြီၤပူၤ, ဒွဲၣ်အူထီၣ်ကွံာ်ဝဲ, တိၢ်လီၤကမူၣ်ဝဲတုၤအကဲထီၣ်ချါဖၣ်ဆါ ဒီးဖှံလီၤဝဲလၢကမျၢၢ်အတၢ်သွၣ်ခိၣ်အဖီခိၣ်န့ၣ်လီၤ.
7 တၢ်အိၣ်တၢ်ဆိးအလီၢ်တဖၣ်လၢယွၤအတၢ်လုၢ်ဟံၣ်အပူၤ, လၢတၢ်လုၢ်ဟံၣ်အဃဲသဲမုၣ်တဖၣ်အိၣ်ဆိးဝဲန့ၣ်, အဝဲမၤဟးဂီၤကွံာ်ဝဲန့ၣ်လီၤ. (ဖဲတၢ်လီၢ်အံၤန့ၣ်, ပှၤပိာ်မုၣ်တဖၣ်ထါဝဲဆ့ကၤဖးထီတဖၣ်လၢ အဘၣ်တၢ်သူအီၤလၢတၢ်ဘူၣ်ထီၣ်ဘါထီၣ်ကစၢ်မုၣ်အၡ့ရၤအပူၤန့ၣ် လီၤ.)
8 ပှၤလုၢ်တၢ်အခိၣ်တဖၣ်လၢအအိၣ်ဝဲလၢကီၢ်ယူဒၤအဝ့ၢ်တဖၣ်အပူၤ န့ၣ်, အဝဲဟဲကိးဝဲဆူဝ့ၢ်ယရူၤၡလ့ၣ်, ဒီးလၢကီၢ်ဒီဘ့ၣ်ညါန့ၣ် အဝဲမၤဘၣ်အၢတၢ်လုၢ်လီၢ်တဖၣ်ဖဲအဝဲသ့ၣ်လုၢ်ထီၣ်တ့ၢ်တၢ်လုၢ်တၢ် ပာ်တဖၣ်န့ၣ်လီၤ. အဝဲမၤလီၤပှီၢ်ကွံာ်စ့ၢ်ကီးတၢ်လုၢ်လီၢ်လၢအဘၣ်တၢ်ပာ်စီဆှံ ထီၣ်အီၤဆူမဲာ်တဲးလဲးတၢ်ဝံတၢ်နါလၢအအိၣ်ဘူးဒီးတြဲၤလၢ အဘၣ်တၢ်ဘှီအီၤလၢဝ့ၢ်အပဒိၣ်စီၤဟိၤၡ့လၢအအိၣ်ဝဲဖဲတၢ်လဲၤ နုာ်ဆူဝ့ၢ်အတြဲၤဖးဒိၣ်အစုစ့ၣ်တခီန့ၣ်လီၤ.
9 ပှၤလုၢ်တၢ်အခိၣ်တဖၣ်အံၤတၢ်တပျဲအမၤတၢ်လၢယွၤအတၢ်လုၢ်ဟံၣ် အပူၤဘၣ်. ဘၣ်ဆၣ်အဝဲသ့ၣ်အီၣ်ကိၣ်တအိၣ်ဘၣ်ဒီးကိၣ်မံၣ်လၢအဘၣ်တၢ်ဟ့ၣ်လီၤ ဆူအဝဲသ့ၣ်အပှၤလုၢ်တၢ်အခိၣ်ကဒဲကဒဲ, သ့ဝဲန့ၣ်လီၤ.
10 ပှၤတစူၢ်တနာ်ယွၤအတၢ်လုၢ်လီၢ်စီဆှံတိဖ့းလၢအမ့ၢ်အဝဲသ့ၣ် အတၢ်ဘူၣ်ထီၣ်ဘါထီၣ်အလီၢ်လၢအအိၣ်လၢဃံနိၣ်အတၢ်တြီၤပူၤန့ၣ်, စီၤပၤယိၤၡံယၤမၤဘၣ်အၢဘၣ်သီကွံာ်အီၤ, ဒ်သိးပှၤလုၢ်ထီၣ်အဖိခွါမ့ၢ်ဂ့ၤ, အဖိမုၣ်မ့ၢ်ဂ့ၤဒ်တၢ်လုၢ်မ့ၣ်အူအသိး, ဆူကစၢ်မိလးအအိၣ်အသုတသ့လၢၤနီတဂၤတဂ့ၤအဂီၢ်န့ၣ်လီၤ.
11 အဝဲသုးကွံာ်စ့ၢ်ကီးကသ့ၣ်တဖၣ်လၢကီၢ်ယူဒၤအစီၤပၤတဖၣ်ပာ်စီ ဆှံတ့ၢ်အီၤလၢတၢ်ဘူၣ်ထီၣ်ဘါထီၣ်မုၢ်အဂီၢ်, ဒီးအဝဲဒွဲၣ်အူကွံာ်လ့ၣ်ကဟၣ်တဖၣ်လၢတၢ်သူအီၤလၢတၢ်ဘူၣ်ထီၣ်ဘါ ထီၣ်အံၤအပူၤန့ၣ်လီၤ. (တၢ်သ့ၣ်တဖၣ်အံၤဘၣ်တၢ်ပာ်အီၤလၢတၢ်လုၢ်ဟံၣ်အဂၢၤပူၤ, ဘူးဒီးတြဲၤ, ဒီးတယံၤဘၣ်ဒီးပဒိၣ်ဖးဒိၣ်တဂၤလၢအမ့ၢ်စီၤနၤ သၣ်မ့လ့း, အတၢ်အိၣ်တၢ်ဆိးအလီၢ်ဘၣ်န့ၣ်လီၤ.)
12 တၢ်လုၢ်လီၢ်တဖၣ်လၢကီၢ်ယူဒၤအစီၤပၤတဖၣ်မၤထီၣ်က့ၤဝဲ လၢနူၢ်ဧိၤစီၤဧိၤအခိၣ်ဒုးလိၤ, လၢအအိၣ်ဝဲလၢစီၤပၤအၤဃး အိၣ်ဆိးအလီၢ်အဖီခိၣ်န့ၣ်, စီၤပၤယိၤၡံယၤမၤလီၤပှီၢ်ကွံာ်အီၤဃုာ်ဒီးတၢ်လုၢ်လီၢ်တဖၣ် လၢအဘၣ်တၢ်ပာ်ထီၣ်လၢစီၤပၤမနၤၡ့ၤ, လၢယွၤအတၢ်လုၢ်ဟံၣ်အဂၢၤအဂၤခံတီၤအပူၤန့ၣ်လီၤ. အဝဲမၤလီၤကလဲကွံာ်တၢ်လုၢ်လီၢ်တဖၣ်အံၤဆူအက့က့အခီခီ ဒီးတ့ၢ်လီၤအီၤဆူကံဒြိၣ်အတၢ်တြီၤအပူၤန့ၣ်လီၤ.
13 စီၤယိၤၡံယၤမၤဘၣ်အၢဘၣ်သီကွံာ်တၢ်လုၢ်လီၢ်တဖၣ်လၢစီၤပၤ စီၤၡလိၤမိၤဘှီထီၣ်တ့ၢ်ဝဲလၢအအိၣ်လၢဝ့ၢ်ယရူၤၡလ့ၣ်အမုၢ်ထီၣ်, ဒီးကစၢၢ်သ့ၣ်စၤယံးအကလံၤထံးလၢတၢ်ကဘူၣ်ထီၣ်ဘါထီၣ်တၢ်ဂီၤ တၢ်ဖီၣ်လီၤသးဘၣ်အၢတဖၣ်လၢအမ့ၢ်ပှၤစံဒိၣ်ဖိအကစၢ်မုၣ်ဧၤၡ တြိး, ပှၤမိၤအးဖိအကစၢ်ကမိၣ်, ဒီးပှၤဧၣ်မိၣ်ဖိအကစၢ်မိလးအဂီၢ်န့ၣ်လီၤ.
14 စီၤပၤယိၤၡံယၤမၤကၢ်ကွံာ်လၢၢ်အထူၣ်တဖၣ်ဆူအက့အခီ, ဒီးကူာ်လီၤကွံာ်ကစၢ်မုၣ်အၡ့ရၤအတၢ်ပနီၣ်တဖၣ်, ဒီးတၢ်လီၢ်လၢအဝဲသ့ၣ်အိၣ်ဆၢထၢၣ်ဝဲန့ၣ်အဝဲမၤဘၢကွံာ်ဒီး ပှၤကညီအဃံအကွဲသ့ၣ်တဖၣ်န့ၣ်လီၤ.
15 စီၤယိၤၡံယၤမၤလီၤပှီၢ်ကွံာ်စ့ၢ်ကီးတၢ်ဘူၣ်ထီၣ်ဘါထီၣ်အလီၢ် လၢဝ့ၢ်ဘ့ၤသ့လးအပူၤ, လၢအဘၣ်တၢ်ဘှီထီၣ်တ့ၢ်အီၤလၢစီၤနဘးအဖိခွါစီၤပၤယၤရၤ ဘၣ်, ပှၤလၢအဆှၢဃီၤကီၢ်အံၣ်စရ့လးဆူတၢ်ဒဲးဘးအပူၤန့ၣ်လီၤ. စီၤယိၤၡံယၤမၤလီၤပှီၢ်ကွံာ်တၢ်လုၢ်လီၢ်, မၤလီၤကလဲကွံာ်ဝဲအလၢၢ်တဖၣ်ဆူအက့အခီ, ဒီးတိၢ်လီၤကလဲကွံာ်အီၤဆူဖၣ်ကမူၣ်ဖၣ်ဆါန့ၣ်လီၤ. အဝဲဒွဲၣ်အူထီၣ်ကွံာ်စ့ၢ်ကီးအၡ့ရၤအဂီၤန့ၣ်လီၤ.
16 ဝံၤဒီး, စီၤယိၤၡံယၤကွၢ်တၢ်ဝးဝးဒီးထံၣ်ဘၣ်လၢတၢ်သွၣ်ခိၣ် တနီၤအိၣ်ဝဲလၢတၢ်လူၢ်အဒီခိၣ်န့ၣ်လီၤ. အဝဲမၢပှၤထုးထီၣ်ကွံာ်တၢ်ဃံတၢ်ကွဲတဖၣ်လၢတၢ်သွၣ်ခိၣ်တဖၣ် အပူၤဒီးဒွဲၣ်အူကွံာ်အီၤလၢတၢ်လုၢ်လီၢ်အဖီခိၣ်န့ၣ်လီၤ. လၢကျဲဒ်သိးအံၤန့ၣ်, အဝဲမၤဘၣ်အၢဘၣ်သီကွံာ်တၢ်လုၢ်လီၢ်, ဒီးမၤတၢ်လၢဝံစံးပာ်ဆိတ့ၢ်ဝဲလၢပျၢၤ, ဖဲမူးဧိၤပွဲဧိၤအကတီၢ်လၢစီၤပၤယၤရၤဘၣ်ဆၢထၢၣ်ဝဲဖဲတၢ် လုၢ်လီၢ်အံၤအကပၤအခါန့ၣ်လီၤ. စီၤပၤယိၤၡံယၤကွၢ်တရံးတၢ်ဝးဝး, ဒီးထံၣ်ဘၣ်ဝံတဂၤလၢအတဲဆိတ့ၢ်တၢ်ဂ့ၢ်အံၤအတၢ်သွၣ်ခိၣ်န့ၣ်လီၤ.
17 အဝဲသံကွၢ်ဝဲ, “တၢ်အံၤမ့ၢ်မတၤအသွၣ်ခိၣ်လဲၣ်.”
ဝ့ၢ်ဘ့ၤသ့လးအပှၤဂီၢ်မုၢ်စံးဆၢဝဲ, “တၢ်အံၤမ့ၢ်ဝံတဂၤလၢ အဟဲလၢကီၢ်ယူဒၤဒီးတဲဆိတ့ၢ်ဝဲတၢ်သ့ၣ်တဖၣ်အံၤဒ်နမၤဘၣ် တ့ၢ်တၢ်လုၢ်လီၢ်အံၤ, အသွၣ်ခိၣ်န့ၣ်လီၤ.”
18 စီၤယိၤၡံယၤဟ့ၣ်လီၤအကလုၢ်စံးဝဲ, “ပာ်အီၤဒ်အအိၣ်ဝဲအသိးအံၤတက့ၢ်. အဝဲအဃံအကွဲ တဖၣ်မ်တၢ်သုတသုးကွံာ်အီၤတဂ့ၤ.”
လၢတၢ်န့ၣ်အဃိအဝဲအဃံအကွဲတဖၣ်မ့ၢ်ဂ့ၤ, ဝံလၢအဟဲထီၣ်လၢၡၤ မရံတဂၤအဃံအကွဲမ့ၢ်ဂ့ၤတဘၣ်တၢ်သုးကွံာ်အီၤနီတဂၤဘၣ်.
19 လၢကယဲၢ်ကီၢ်အံၣ်စရ့လးအဝ့ၢ်ကိးဖျၢၣ်ဒဲးအပူၤန့ၣ်, စီၤပၤယိၤၡံယၤမၤလီၤပှီၢ်ကွံာ်ကယဲၢ်ပှၤတစူၢ်တနာ်ယွၤအတၢ် ဘူၣ်ထီၣ်ဘါထီၣ်အလီၢ်တဖၣ်လၢအဘၣ်တၢ်ဘှီတ့ၢ်အီၤလၢကီၢ်အံၣ်စရ့ လးအစီၤပၤတဖၣ်, ပှၤတဖၣ်လၢအမၤဝဲဒ်န့ၣ်အဃိ, ထိၣ်ဂဲၤယွၤအတၢ်သးထီၣ်န့ၣ်လီၤ. အဝဲမၤတၢ်လုၢ်လီၢ်တဖၣ်အံၤ ခဲလၢာ်ဒ်အမၤတ့ၢ်ဝဲလၢဘ့ၤသ့လးအသိးန့ၣ်လီၤ.
20 အဝဲမၤသံကွံာ်ကယဲၢ်ပှၤတစူၢ်တနာ်ယွၤအပှၤလုၢ်တၢ်အခိၣ်ခဲလၢာ် လၢတၢ်လုၢ်လီၢ်တဖၣ်ဖဲအဝဲသ့ၣ်မၤတ့ၢ်တၢ်မၤအလိၤ, ဒီးအဝဲဒွဲၣ်အူထီၣ်ပှၤကညီအဃံအကွဲတဖၣ်လၢကယဲၢ်တၢ်လုၢ်လီၢ် အဖီခိၣ်န့ၣ်လီၤ. ဝံၤဒီးအဝဲက့ၤကဒါက့ၤဝဲဆူဝ့ၢ်ယရူၤၡလ့ၣ်န့ၣ်လီၤ.
(၂ကွဲး.၃၅:၁-၁၉)
21 စီၤပၤယိၤၡံယၤဟ့ၣ်လီၤအကလုၢ်ဆူပှၤဂီၢ်မုၢ်လၢကမၤဘူၣ်လဲၤ ကပာ်, လၢတၢ်မၤလၤကပီၤယွၤ, အဝဲသ့ၣ်အကစၢ်ယွၤအဂီၢ်, ဒ်တၢ်ကွဲးအသးအိၣ်ဝဲလၢလံာ်တၢ်အၢၣ်လီၤအီလီၤအပူၤအသိးန့ၣ် လီၤ.
22 ဘူၣ်လဲၤကပာ်ဒ်သိးအံၤတခါန့ၣ်, တဘၣ်တၢ်မၤတ့ၢ်အီၤနီတဘျီလၢ ကီၢ်အံၣ်စရ့လးအစီၤပၤတဖၣ်မ့ၢ်ဂ့ၤ, ကီၢ်ယူဒၤအစီၤပၤတဖၣ်မ့ၢ်ဂ့ၤနီတဂၤ, စးထီၣ်လၢပှၤစံၣ်ညီၣ်ကွီၢ်တဖၣ်ပၢထံကီၢ်လံၤလံၤန့ၣ်လီၤ.
23 ဘူၣ်လဲၤကပာ်လၢတၢ်ကြၢးမၤတ့ၢ်အီၤလၢဝ့ၢ်ယရူၤၡလ့ၣ်အပူၤန့ၣ် ခဲအံၤဘၣ်တၢ်မၤဒၣ်အီၤဖဲစီၤယိၤၡံယၤပၢတၢ်တဆံဃိးနံၣ် တနံၣ်အပူၤန့ၣ်လီၤ.
24 လၢတၢ်ကမၤပိာ်ထွဲတၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢအဘၣ်တၢ် ကွဲးလီၤတ့ၢ်အီၤလၢလံာ်ပူၤလၢပှၤလုၢ်တၢ်အခိၣ်အဒိၣ်ကတၢၢ်စီၤ ဃံးလကံယၤထံၣ်န့ၢ်ဝဲလၢယွၤအတၢ်လုၢ်ဟံၣ်ပူၤအဂီၢ်န့ၣ်, စီၤပၤယိၤၡံယၤသုးကွံာ်ဝဲကယဲၢ်ပှၤအိၣ်ဒီးပှၤသံအကလၤ, ပှၤဖးတၢ်ဟဲဝံဟဲစိာ်တဖၣ်, ကစၢ်တဖၣ်လၢတၢ်ပာ်အီၤလၢ ဟံၣ်ပူၤ, တၢ်ဂီၤတၢ်ဖီၣ်တဖၣ်, ဒီးပှၤတစူၢ်တနာ်ယွၤအတၢ်ဘူၣ်ထီၣ်ဘါထီၣ် အလီၢ်အဂၤတဖၣ်လၢဝ့ၢ်ယရူၤၡလ့ၣ်ဒီးကီၢ်ယူဒၤတၢ်လီၢ်အဂၤတဖၣ် အပူၤန့ၣ်လီၤ.
25 လၢအဝဲအမဲာ်ညါန့ၣ်, စီၤပၤဒ်သိးအီၤတဂၤလၢအမၤတ့ၢ်ယွၤအတၢ် လၢသူၣ်ကံၢ်သးလဲလၢသးဒီဖျၢၣ်ဒီးလၢာ်ဂံၢ်လၢာ်ဘါ, စူၢ်ကယဲၢ်ယူဒၤအတၢ်သိၣ်တၢ်သီလၢစီၤမိၤၡ့ဟ့ၣ်လီၤတ့ၢ်ဝဲ န့ၣ်တအိၣ်နီတဂၤဘၣ်. လၢအဝဲအလီၢ်ခံစ့ၢ်ကီး, ပှၤဒ်သိးအီၤတအိၣ်ထီၣ်ဘၣ်နီတဂၤဘၣ်.
26 ဘၣ်ဆၣ်ယွၤအတၢ်သးဒိၣ်ကဲၤထီၣ်ဒိၣ်ထီၣ်လၢအဘၣ်တၢ်ထိၣ်ဂဲၤထီၣ် အီၤထီဒါကီၢ်ယူဒၤခီဖျိတၢ်လၢစီၤပၤမနၤၡ့ၤမၤတ့ၢ်ဝဲန့ၣ်, တုၤခဲကနံၣ်အံၤဒၣ်လဲာ်တလီၤပံာ်ကွံာ်ဝဲဒံးဘၣ်.
27 ယွၤစံးဝဲဒၣ်, “တၢ်လၢယမၤတ့ၢ်ကီၢ်အံၣ်စရ့လးန့ၣ်ယကမၤကီၢ် ယူဒၤစ့ၢ်ကီးန့ၣ်လီၤ. ယကနီၣ်ထီၣ်ဟီထီၣ်ကွံာ်ယူဒၤအပှၤဂီၢ်မုၢ်လၢယမဲာ်ညါ, ဒီးယကညိကွံာ်ယရူၤၡလ့ၣ်ဝ့ၢ်လၢယဃုထၢတ့ၢ်အီၤဒီးယွၤအတၢ် လုၢ်ဟံၣ်, တၢ်လီၢ်လၢယစံးတ့ၢ်ယဲလၢယကဘၣ်တၢ်ဘူၣ်ထီၣ်ဘါထီၣ်ယၤန့ၣ်လီၤ.”
(၂ကွဲး.၃၅:၂၀-၃၆:၁)
28 ကယဲၢ်တၢ်အဂၤလၢစီၤပၤယိၤၡံယၤမၤတ့ၢ်ဝဲန့ၣ်ဘၣ်တၢ်ကွဲးနီၣ် အီၤလၢကီၢ်ယူဒၤအစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.
29 ဖဲစီၤယိၤၡံယၤမ့ၢ်စီၤပၤအခါန့ၣ်, ကီၢ်အဲၤကူပတူးအစီၤပၤ နကိၤဆှၢဃီၤသုးမုၢ်တဖုဆူထံကျိဖရၤသးလၢကမၤစၢၤကီၢ်အၤ ၡူၢ်အစီၤပၤအဂီၢ်န့ၣ်လီၤ. စီၤယိၤၡံယၤဂုာ်ကျဲးစၢးတြီပှၤအဲၤကူပတူးဖိအသုးမုၢ်ဖဲ ဝ့ၢ်မကံးဒိၤဒီးဘၣ်တၢ်မၤသံကွံာ်အီၤလၢတၢ်ဒုးအပူၤန့ၣ်လီၤ.
30 အဝဲသုးခိၣ်သုးနၢ်တဖၣ်ပာ်ထီၣ်အစိၣ်လၢလ့ၣ်ကဟ့ၣ်ပူၤဒီးဟဲ က့ၤစိာ်က့ၤအီၤဆူဝ့ၢ်ယရူၤၡလ့ၣ်ဖဲအဝဲဘၣ်တၢ်ခူၣ်လီၤကွံာ် အီၤလၢစီၤပၤအတၢ်သွၣ်ခိၣ်အပူၤန့ၣ်လီၤ. ကီၢ်ယူဒၤအပှၤဂီၢ်မုၢ်ဃုထၢထီၣ်စီၤယိၤၡံယၤအဖိခွါစီၤ ယဟိအါဃးဒီးဖှူအီၤဒ်စီၤပၤအသိးန့ၣ်လီၤ.
(၂ကွဲး.၃၆:၂-၄)
31 စီၤယဟိအါဃးအသးအိၣ်ဝဲခံဆံသၢနံၣ်ဖဲအဝဲကဲထီၣ်ကီၢ်ယူ ဒၤအစီၤပၤဒီးအဝဲပၢတၢ်လၢဝ့ၢ်ယရူၤၡလ့ၣ်အပူၤသၢလါန့ၣ် လီၤ. အဝဲအမိၢ်မ့ၢ်ဝဲနီၢ်ဃမူတလး, စီၤယံးရမံယၤလၢဝ့ၢ်လံးဘနၤ အဖိမုၣ်န့ၣ်လီၤ.
32 ပိာ်ထွဲထီၣ်အပၢ်ဖးဒိၣ်လၢပျၢၤတဖၣ်အဒိအတဲာ်အခံန့ၣ်, အဝဲမၤတ့ၢ်တၢ်ဒဲးဘးထီဒါယွၤန့ၣ်လီၤ.
33 အဝဲအတၢ်ပၢကတၢၢ်ကွံာ်ဝဲဒၣ်, ဖဲကီၢ်အဲၤကူပတူးအစီၤပၤနကိၤ က့ၤကိးအီၤဆူဝ့ၢ်ရံးဘလၤလၢကီၢ်ဃမါသး, ဒ်ပှၤဘၣ်တၢ်စၢဃာ် တဂၤအသိးအခါ, ဒီးမၢကီၢ်ယူဒၤဟ့ၣ်စ့လီၤတယၢၢ်အကံကၢ် တကယၤဒီးထူလီၤတယၢၢ်တကံကၢ်ဒ်တၢ်ခိတၢ်သွဲအသိးန့ၣ်လီၤ.
34 စီၤပၤနကိးဒုးကဲထီၣ်စီၤယိၤၡံယၤအဖိခွါစီၤအ့ၤလယါကံၣ် လၢကီၢ်ယူဒၤအစီၤပၤဒ်ပှၤထီၣ်က့ၤစီၤယိၤၡံယၤအလီၢ်အသိး, ဒီးလဲလိာ်ကွံာ်ဝဲအမံၤဆူစီၤယဟိၤယါကံၣ်န့ၣ်လီၤ. စီၤယဟိအါဃးဘၣ်တၢ်က့ၤကိးအီၤဆူကီၢ်အဲၤကူပတူးလၢစီၤ ပၤနကိၤဒီးသံဝဲဖဲန့ၣ်လီၤ.
(၂ကွဲး.၃၆:၅-၈)
35 လၢတၢ်ဃုမၤန့ၢ်စ့ဒ်သိးတၢ်ကဟ့ၣ်တၢ်ခိတၢ်သွဲလၢအဘၣ်တၢ်ဃ့ အီၤလၢကီၢ်အဲၤကူပတူးအစီၤပၤအဂီၢ်န့ၣ်, စီၤပၤယဟိၤယါကံၣ်, ထၢဖှိၣ်တၢ်ခိတၢ်သွဲလၢပှၤဂီၢ်မုၢ်အအိၣ်, ဒ်အဝဲသ့ၣ်အတၢ်ထူးတၢ်တီၤအိၣ်ဝဲအသိးန့ၣ်လီၤ.
36 စီၤယဟိယါကံၣ်အသးအိၣ်ခံဆံယဲၢ်နံၣ်ဖဲအဝဲကဲထီၣ်ကီၢ်ယူဒၤ အစီၤပၤအဆၢကတီၢ်ဒီးအဝဲပၢတၢ်လၢဝ့ၢ်ယရူၤၡလ့ၣ်အပူၤတဆံ တနံၣ်န့ၣ်လီၤ. အဝဲအမိၢ်မ့ၢ်ဝဲနီၢ်စဘူဒၤ, စီၤပဒါယၤလၢဝ့ၢ်ရူမၤအဖိမုၣ် န့ၣ်လီၤ.
37 ပိာ်ထွဲထီၣ်အပၢ်လၢပျၢၤတဖၣ်အဒိအတဲာ်အခံန့ၣ်, စီၤယဟိၤယါကံၣ်မၤတ့ၢ်တၢ်ဒဲးဘးထီဒါယွၤန့ၣ်လီၤ.