8
(၂ကွဲး.၅:၂-၆:၂)
1 ဒီးစီၤပၤၡလိၤမိၤဒုးအိၣ်ဖှိၣ်ရိဖှိၣ်ကယဲၢ်ပှၤအံၣ်စရ့လး ဖိအဒူၣ်တဖၣ်ဒီးအဒူၣ်ထၢတဖၣ်, အခိၣ်အနၢ်တဖၣ်ဒ်သိးကဟဲဆူအဝဲအအိၣ်လၢဝ့ၢ်ယရူၤၡလ့ၣ်အပူၤ, လၢကဟဲစိာ်ယွၤအတၢ်အၢၣ်လီၤအီလီၤအတလါလၢဝ့ၢ်စံယိၣ်, စီၤဒၤဝံးအဝ့ၢ်ဆူယွၤအတၢ်လုၢ်ဟံၣ်န့ၣ်လီၤ.
2 အဝဲသ့ၣ်ခဲလၢာ်အိၣ်ဖှိၣ်ရိဖှိၣ်ဖဲတၢ်မၤဘူၣ်ဘူၣ်ဒဲအခါလၢ လါအ့သၤနံၣ်အပူၤန့ၣ်လီၤ.
3 တုၤပှၤခိၣ်ပှၤနၢ်တဖၣ်အိၣ်ဖှိၣ်ရိဖှိၣ်ဝဲန့ၣ်ပှၤလုၢ်တၢ်အခိၣ် တဖၣ်စိာ်ထီၣ်ယွၤအတၢ်အၢၣ်လီၤအီလီၤအတလါ,
4 ဒီးလဲၤစိာ်ဝဲဆူယွၤအတၢ်လုၢ်ဟံၣ်အပူၤန့ၣ်လီၤ. ပှၤလ့ၤဝံဖိဒီးပှၤလုၢ်တၢ်အခိၣ်တဖၣ်သုးစ့ၢ်ကီးဝဲယွၤအဒဲ လၢယွၤအိၣ်ဝဲဆိးဝဲဒီးအတၢ်အပီးအလီခဲလၢာ်ဆူယွၤအတၢ်လုၢ် ဟံၣ်န့ၣ်လီၤ.
5 စီၤပၤၡလိၤမိၤဒီးကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ် အိၣ်ဖှိၣ်ရိဖှိၣ်ဝဲလၢယွၤအတၢ်အၢၣ်လီၤအီလီၤအတလါအမဲာ်ညါ, ဒီးလုၢ်ထီၣ်ပာ်ထီၣ်သိ, ဒီးဂီၤဖံးအါအါကလဲာ်, အါတုၤဒၣ်လဲာ်တၢ်ဂံၢ်အီၤတသ့ဘၣ်န့ၣ်လီၤ.
6 ဒီးပှၤလုၢ်တၢ်အခိၣ်တဖၣ်လဲၤစိာ်နုာ်ယွၤအတၢ်အၢၣ်လီၤအီလီၤ အတလါစီဆှံဆူယွၤအတၢ်လုၢ်ဟံၣ်အပူၤဒီးပာ်လီၤဝဲလၢတၢ်လီၢ် စီဆှံကတၢၢ်ဖဲခ့ရူာ်တဖၣ်အဒံးဆ့အဖီလာ်န့ၣ်လီၤ.
7 ခ့ရူာ်အဒံးဆ့တဖၣ်လၢအသလၣ်ထီၣ်အသးန့ၣ်ကျၢၢ်ဘၢတလါဒီးနီၣ် ယိးဘိတဖၣ်လၢတၢ်ယိးအီၤန့ၣ်လီၤ.
8 နီၣ်ယိးဘိတဖၣ်အခိၣ်ထိးဘၣ်တၢ်ထံၣ်အီၤလၢပှၤတဂၤလၢ်လၢ်လၢ အအိၣ်ဆၢထၢၣ်လိၤလိၤဖဲတၢ်လီၢ်စီဆှံကတၢၢ်အမဲာ်ညါသ့ဝဲ, ဘၣ်ဆၣ်လၢတၢ်လီၢ်အဂၤန့ၣ်တၢ်ထံၣ်အီၤတသ့ဘၣ်. (နီၣ်ယိးဘိတဖၣ်အိၣ်ဒံးဖဲန့ၣ်တုၤမုၢ်မဆါတနံၤအံၤန့ၣ် လီၤ.)
9 လၢယွၤအတလါစီဆှံအပူၤန့ၣ်, မ့တမ့ၢ်လၢလၢၢ်ဘ့ၣ်ဘၣ်ခံဘ့ၣ်လၢ စီၤမိၤၡ့ဒၢနုာ်အီၤဖဲကစၢၢ်စံၤနါအလိၤ, ဖဲယွၤမၤတၢ်အၢၣ်လီၤအီလီၤဒီးပှၤအံၣ်စရ့လးဖိဖဲအဝဲသ့ၣ် ဟဲထီၣ်လၢကီၢ်အဲၤကူပတူးအပူၤအခါဘၣ်န့ၣ်တၢ်အဂၤတအိၣ်နီတမံၤဘၣ်.
10 ဖဲပှၤလုၢ်တၢ်အခိၣ်တဖၣ်ဟးထီၣ်လၢယွၤအတၢ်လုၢ်ဟံၣ်န့ၣ်သတူၢ်ကလာ် ယွၤအတၢ်လုၢ်ဟံၣ်ဘၣ်တၢ်လုၣ်ဘၢအီၤဒီးတၢ်အၢၣ်,
11 တၢ်အၢၣ်လၢအကပီၤကတြ့ၣ်ကတြိၣ်ဒီးယွၤအတၢ်အိၣ်ဆိးဝဲ, ဒီးအဝဲသ့ၣ်က့ၤနုာ်ဆူယွၤအတၢ်လုၢ်ဟံၣ်အပူၤလၢကမၤအမူအဒါ တဖၣ်အဂီၢ်န့ၣ်, တသ့ဘၣ်.
12 တုၤနုၤတစု, စီၤၡလိၤမိၤဘါထုကဖၣ်စံးဝဲ, “နဲဒၣ်ယွၤဧၢ, နပာ်လီၤမုၢ်လၢမူကပိာ်လိၤဒၣ်လဲာ်, နဃုထၢတ့ၢ်နဲလၢနကအိၣ် ကဆိးလၢတၢ်အၢၣ်တဖၣ်ဒီးတၢ်ခံးသူအပူၤန့ၣ်လီၤ.
13 ခဲကနံၣ်အံၤယသူၣ်ထီၣ်လံတၢ်လုၢ်ဟံၣ်လီၤဘီလီၤမုၢ်တဖျၢၣ်လၢနဂီၢ်, တၢ်လီၢ်တတီၤလၢနကအိၣ်ကဆိးလၢအပူၤလီၤထူလီၤယိာ်န့ၣ်လီၤ.”
(၂ကွဲး.၆:၃-၁၁)
14 ဖဲပှၤဂီၢ်မုၢ်ဆၢထၢၣ်ဝဲဖဲန့ၣ်အခါန့ၣ်, စီၤပၤစီၤၡလိၤမိၤ ဃၣ်ဃီၤအမဲာ်ဆူအဝဲသ့ၣ်အအိၣ်ဒီးအဝဲဃ့ဝဲလၢကစၢ်ယွၤအတၢ်ဆိၣ် ဂ့ၤကလီၤဘၣ်လၢအဝဲသ့ၣ်အလိၤန့ၣ်လီၤ.
15 အဝဲစံးဝဲ, “စံးထီၣ်ပတြၢၤယွၤ, အံၣ်စရ့လးအကစၢ်ယွၤန့ၣ်တ က့ၢ်. အဝဲဟံးဃာ်ဂၢၢ်ကျၢၤအတၢ်အၢၣ်လီၤလၢအမၤတ့ၢ်ဒီးယပၢ်စီၤဒၤဝံး, ဖဲအဝဲစံးဘၣ်အီၤ,
16 စးထီၣ်လၢယဒုးဟးထီၣ်ကွံာ်ယပှၤဂီၢ်မုၢ်လၢကီၢ်အဲၤကူပတူး အပူၤန့ၣ်, လၢကီၢ်အံၣ်စရ့လးအပူၤယတဃုထၢဘၣ်ဝ့ၢ်နီတဖျၢၣ်ဒ်သိးတၢ်လုၢ် ဟံၣ်တဖျၢၣ်ကဘၣ်တၢ်ဘှီထီၣ်အီၤလၢတၢ်ကဘူၣ်ထီၣ်ဘါထီၣ်ယွၤအဂီၢ် န့ၣ်ဘၣ်. ဘၣ်ဆၣ်ယဃုထၢထီၣ်နၤ, စီၤဒၤဝံးလၢကပၢယပှၤဂီၢ်မုၢ်န့ၣ်လီၤ.”
17 ဒီးစီၤၡလိၤမိၤစံးကဒီးဝဲဆူညါ, “ယပၢ်စီၤဒၤဝံးကူၣ် ကျဲၤဝဲလၢကသူၣ်ထီၣ်တၢ်လုၢ်ဟံၣ်တဖျၢၣ်လၢတၢ်ကဘူၣ်ထီၣ်ဘါထီၣ် ယွၤ, အံၣ်စရ့လးအကစၢ်ယွၤအဂီၢ်,
18 ဘၣ်ဆၣ်ယွၤစံးဘၣ်အီၤ, နသးအိၣ်သူၣ်ထီၣ်တၢ်လုၢ်ဟံၣ်တဖျၢၣ်လၢ ယဂီၢ်န့ၣ်ဘၣ်ဝဲလီၤ.
19 ဘၣ်ဆၣ်နတသူၣ်ထီၣ်ဘၣ်အီၤနီတစုဘၣ်. မ့မ့ၢ်ပှၤလၢအကသူၣ်ထီၣ်ယတၢ်လုၢ်ဟံၣ်န့ၣ်မ့ၢ်, နဖိခွါ, နကစၢ်ဒၣ်နဲအဖိခွါန့ၣ်လီၤ.
20 ဒီးခဲကနံၣ်အံၤယွၤဟံးဃာ်ဂၢၢ်ကျၢၤအတၢ်အၢၣ်လီၤန့ၣ်လံ. ယကဲထီၣ်လံအံၣ်စရ့လးအစီၤပၤလၢယပၢ်အလီၢ်ဒီးယသူၣ်ထီၣ်ဘၣ်လံ ယွၤအတၢ်လုၢ်ဟံၣ်တဖျၢၣ်လၢတၢ်ကဘူၣ်ထီၣ်ဘါထီၣ်ယွၤ, အံၣ်စရ့လးအကစၢ်ယွၤအဂီၢ်န့ၣ်လီၤ.
21 လၢယွၤအတၢ်လုၢ်ဟံၣ်အပူၤန့ၣ်, ယကတဲာ်ကတီၤစ့ၢ်ကီးတၢ်လီၢ်တတီၤ လၢယွၤအတၢ်အၢၣ်လီၤအီလီၤအတလါစီဆှံအဂီၢ်န့ၣ်လီၤ. လၢတလါစီဆှံအံၤအပူၤန့ၣ်, တၢ်အၢၣ်လီၤအီလီၤလၢယွၤမၤတ့ၢ်ဝဲဒီးပမိၢ်ပၢ်ဖံဖုလၢပျၢၤ တဖၣ်ဖဲအဝဲထုးထီၣ်ကွံာ်အဝဲသ့ၣ်လၢကီၢ်အဲၤကူပတူးအပူၤ, အလၢၢ်ဘ့ၣ်ဘၣ်တဖၣ်အိၣ်ဝဲလီၤ.”
(၂ကွဲး.၆:၁၂-၄၂)
22 ဒီးလၢပှၤဂီၢ်မုၢ်အမဲာ်ညါန့ၣ်, စီၤၡလိၤမိၤလဲၤဂဲၤဆၢထၢၣ် လၢတၢ်လုၢ်လီၢ်အမဲာ်ညါ, ဒီးယူာ်ထီၣ်အစု, ဒီးဘါထုကဖၣ်တၢ်စံးဝဲ,
23 “ယွၤ, အံၣ်စရ့လးအကစၢ်ယွၤဧၢ, လၢမူခိၣ်လၢထးမ့ၢ်ဂ့ၤ, လၢဟီၣ်ခိၣ်လၢလာ်မ့ၢ်ဂ့ၤကစၢ်ဒ်သိးနၤတအိၣ်နီတဂၤဘၣ်. နဟံးဃာ်ဂၢၢ်ကျၢၤနတၢ်အၢၣ်လီၤဒီးနပှၤဂီၢ်မုၢ်ဒီးနဒုးနဲၣ် ဖျါထီၣ်နတၢ်အဲၣ်အဝဲသ့ၣ်, ဖဲအဝဲသ့ၣ်အိၣ်မူလၢတၢ်စူၢ်နၤလၢသူၣ်ဒီဖျၢၣ်သးဒီဖျၢၣ် အပူၤအကတီၢ်န့ၣ်လီၤ.
24 နဟံးဃာ်ဂၢၢ်ကျၢၤတ့ၢ်တၢ်အၢၣ်လီၤလၢနမၤဒီးယပၢ်စီၤဒၤဝံး န့ၣ်လီၤ. မုၢ်မဆါတနံၤအံၤတၢ်ကတိၤကိးထံၣ်ဒဲးလၢထီၣ်ပှဲၤထီၣ်ဝဲဒၣ် လံ.
25 ဒီးခဲကနံၣ်အံၤ, ယွၤ, ကီၢ်အံၣ်စရ့လးအကစၢ်ယွၤဧၢ, ယဃ့ကညးနၤလၢနကဟံးဃာ်ဂၢၢ်ကျၢၤစ့ၢ်ကီးတၢ်အၢၣ်လီၤအဂၤလၢ နမၤတ့ၢ်ဒီးယပၢ်, ဖဲနစံးဘၣ်တ့ၢ်အီၤလၢထီဘိအဝဲအစၢၤအသွဲၣ်အကျါတဂၤကပၢဘၣ် တၢ်ဒ်အံၣ်စရ့လးအစီၤပၤအသိးဖဲအဝဲဒုးစူၢ်အဝဲသ့ၣ်လၢနၤလီၤ တံၢ်လီၤဆဲးဒ်အဝဲစူၢ်ဝဲအသိး, အခါန့ၣ်လီၤ.
26 လၢတၢ်န့ၣ်အဃိ, ခဲကနံၣ်အံၤ, ကီၢ်အံၣ်စရ့လးအကစၢ်ယွၤဧၢ, မ်တၢ်လၢနအၢၣ်လီၤတ့ၢ်ဒီးနခ့နပှၤယပၢ်စီၤဒၤဝံးန့ၣ်လၢထီၣ် ပှဲၤထီၣ်ခဲလၢာ်တက့ၢ်.
27 ဘၣ်ဆၣ်ဒီးကစၢ်ယွၤဧၢ, မ့ၢ်နအိၣ်နဆိးနီၢ်နီၢ်လၢဟီၣ်ခိၣ်အံၤ ကသ့စ့ၢ်ကီးဧါ. ကယဲၢ်မူခိၣ်အလီၢ်ဒၣ်လဲာ်တလဲၢ်ဝဲလၢနကအိၣ်ကဆိးဘၣ်အဃိ, ယွၤအတၢ်လုၢ်ဟံၣ်လၢယဘှီ ထီၣ်အံၤတြီၢ်ဝဲလၢလၢလီၣ်လီၣ်လၢနဂီၢ်ကသ့ဒ်လဲၣ်.
28 ယွၤ, ယကစၢ်ယွၤဧၢ, ယမ့ၢ်နခ့နပှၤန့ၣ်လီၤ. ကနၣ်လၢ်ယတၢ်ထုကဖၣ်, ဒီးဟ့ၣ်လီၤလၢ်ယၤတၢ်တဖၣ်လၢယဃ့ကညးနၤ လၢမုၢ်မဆါတနံၤအံၤန့ၣ်တက့ၢ်.
29 အံးလီၤကွၢ်လီၤယွၤအတၢ်လုၢ်ဟံၣ်အံၤလၢမုၢ်ဆါဆဲးလၢမုၢ်နၤ, တၢ်လီၢ်အံၤလၢနဃုထၢတ့ၢ်အီၤလၢတၢ်ဘူၣ်ထီၣ်ဘါထီၣ်နၤအဂီၢ် န့ၣ်တက့ၢ်. ဒိကနၣ်ယၤ, ဖဲယဃၣ်ဃီၤယမဲာ်ဆူယွၤအတၢ်လုၢ်ဟံၣ်အံၤဒီးဘါထု ကဖၣ်အခါန့ၣ်တက့ၢ်.
30 ဒိကနၣ်လၢ်ယတၢ်ထုကဖၣ်တဖၣ်, ဒီးနပှၤဂီၢ်မုၢ်တဖၣ်အတၢ်ထု ကဖၣ်တဖၣ်ဖဲအဝဲသ့ၣ်ကွၢ်ဃီၤတၢ်လီၢ်အံၤဒီးဃ့ထုကဖၣ်အခါန့ၣ် တက့ၢ်. လၢနဟံၣ်အိၣ်ဝဲလၢမူခိၣ်အပူၤန့ၣ်, ဒိကနၣ်လၢ်ပှၤဒီးပျၢ်လၢ်ပတၢ်ကမၣ်န့ၣ်တက့ၢ်.
31 ဖဲပှၤတဂၤ, ဘၣ်တၢ်ပာ်တၢ်ကမၣ်လၢအလိၤလၢအမၤကမၣ်ဘၣ်ပှၤအဂၤတဂၤ, ဒီးဘၣ်တၢ်ဟဲစိာ်အီၤဆူနတၢ်လုၢ်လီၢ်လၢယွၤအတၢ်လုၢ်ဟံၣ်အံၤ အပူၤဒ်သိးကဆိၣ်လီၤအသးလၢအတၢ်ကမၣ်တအိၣ်ဘၣ်န့ၣ်,
32 အိယွၤဧၢ, ဒိကနၣ်လၢ်လၢမူခိၣ်ဒီးစံၣ်ညီၣ်နခ့နပှၤတဖၣ်န့ၣ်တ က့ၢ်. စံၣ်ညီၣ်ဃၣ်ပှၤလၢအတၢ်ကမၣ်အိၣ်တဂၤဒ်အကြၢးဒိးဘၣ်ဝဲအသိးဒီး ပျၢ်ဖျဲးကွံာ်ပှၤတဂၤလၢအတၢ်ကမၣ်တအိၣ်ဘၣ်န့ၣ်တက့ၢ်.
33 တုၤနပှၤဂီၢ်မုၢ်အံၣ်စရ့လးဘၣ်တၢ်မၤနၢၤအီၤလၢအဝဲသ့ၣ်အဒုၣ် အဒါတဖၣ်မ့ၢ်လၢအဝဲသ့ၣ်မၤတ့ၢ်တၢ်ဒဲးဘးထီဒါနၤအဃိဒီး, တုၤအဃၣ်က့ၤအသးဆူနအိၣ်ဒီးဟဲက့ၤဆူ ယွၤအတၢ်လုၢ်ဟံၣ်အံၤဒီးဘါထုကဖၣ်ဆူနၤလၢတၢ်ဆီၣ်လီၤသး အပူၤလၢတၢ်ပျၢ်တၢ်ကမၣ်အဂီၢ်န့ၣ်,
34 ဒိကနၣ်လၢ်အဝဲသ့ၣ်လၢမူခိၣ်န့ၣ်တက့ၢ်. ပျၢ်လၢ်နပှၤဂီၢ်မုၢ်အတၢ်ဒဲးဘးတဖၣ်ဒီးဟဲက့ၤစိာ်ကဒါက့ၤအီၤ ဆူကီၢ်လၢနဟ့ၣ်တ့ၢ်အမိၢ်ပၢ်ဖံဖုလၢပျၢၤတဖၣ်န့ၣ်တက့ၢ်.
35 ဖဲနတြီဃာ်တၢ်ဟဲစူၤ, မ့ၢ်လၢနပှၤဂီၢ်မုၢ်မၤတ့ၢ်တၢ်ဒဲးဘးထီ ဒါနၤအဃိ, ဒီးတုၤအဝဲသ့ၣ်ပီၢ်ယၢ်လီၤက့ၤအသးဒီးကွၢ်ဃီၤယွၤအတၢ်လုၢ် ဟံၣ်အံၤ, ဒီးဃ့ဘါထုကဖၣ်ဆူနအိၣ်လၢတၢ်ဆီၣ်လီၤသးအပူၤန့ၣ်,
36 ဒိကနၣ်လၢ်အဝဲသ့ၣ်လၢမူခိၣ်န့ၣ်တက့ၢ်. ပျၢ်လၢ်စီၤပၤဒီးကီၢ်အံၣ်စရ့လးအပှၤဂီၢ်မုၢ်အတၢ်ဒဲးဘးတဖၣ် ဒီးသိၣ်လိအဝဲသ့ၣ်လၢကမၤတၢ်လၢအဘၣ်န့ၣ်တက့ၢ်. အန့ၣ်ဒီးယွၤဧၢ, ဒုးစူၤလီၤတၢ်လၢနကီၢ်အံၤအဖီခိၣ်, ကီၢ်လၢနဟ့ၣ်တ့ၢ်နပှၤဂီၢ်မုၢ်ဒ်အတၢ်န့ၢ်သါအဂၢၢ်အကျၢၤအသိးန့ၣ် တက့ၢ်.
37 လၢကီၢ်အံၤအပူၤဖဲတၢ်သၣ်ဝံၤလီၤဒိအိၣ်ထီၣ်အံၤမ့ၢ်ဂ့ၤ, တၢ်သံသတြိာ်တမံၤမၤအသးမ့ၢ်ဂ့ၤ, တၢ်မုၢ်တၢ်ဘိတဖၣ်ဘၣ်တၢ်မၤဟးဂီၤကွံာ်အီၤလၢကလံၤမုၢ်ကိၢ် အဃိမ့ၢ်ဂ့ၤ, လၢဒွဲၣ်အဖုအဂီၢ်အဃိမ့ၢ်ဂ့ၤ, ဒီးဖဲနပှၤဂီၢ်မုၢ်ဘၣ်တၢ်ထီဒါအီၤလၢအဝဲသ့ၣ်အဒုၣ်အဒါတဖၣ် အခါမ့ၢ်ဂ့ၤ,
38 ဖဲတၢ်တတၢးတနါမ့တမ့ၢ်တၢ်ဆူးတၢ်ဆါအိၣ်ဝဲလၢအဝဲသ့ၣ်အကျါ မ့ၢ်ဂ့ၤန့ၣ်, ပှၤလၢနပှၤဂီၢ်မုၢ်အံၣ်စရ့လးအကျါတဂၤဂၤ, မ့ၢ်ကွၢ်ဃီၤဆူယွၤအတၢ်လုၢ်ဟံၣ်အံၤ, ယူာ်ထီၣ်အစုလၢတၢ်ထုကဖၣ်အပူၤအိၣ်ဒီးတၢ်သူၣ်ကၢ်သးလီၤန့ၣ်,
39 ဒိကနၣ်လၢ်အဝဲသ့ၣ်အတၢ်ထုကဖၣ်န့ၣ်တက့ၢ်. ဒိကနၣ်လၢ်အဝဲသ့ၣ်လၢနဟံၣ်အိၣ်လၢမူခိၣ်, ပျၢ်လၢ်အဝဲသ့ၣ်အတၢ်ကမၣ်, ဒီးမၤစၢၤလၢ်အဝဲသ့ၣ်တက့ၢ်. နမ့ၢ်ပှၤထဲတဂၤဧိၤလၢအသ့ၣ်ညါပှၤကညီအသးအတၢ်ဆိကမိၣ်တဖၣ်န့ၣ် လီၤ. မၤဘၣ်ပှၤတဂၤဘၣ်တဂၤဒ်ကြၢးဝဲဘၣ်ဝဲဒီးအီၤအသိး,
40 ဒ်သိးနပှၤဂီၢ်မုၢ်ကစူၢ်နၤတစိၤသးဖဲအဝဲသ့ၣ်အိၣ်ဝဲဆိးဝဲ လၢကီၢ်လၢနဟ့ၣ်တ့ၢ်ပမိၢ်ပၢ်ဖံဖုလၢပျၢၤတဖၣ်, အပူၤန့ၣ်တက့ၢ်.
41 တုၤပှၤတခီဘီမုၢ်ဖိတဂၤလၢအအိၣ်ဆိးဝဲလၢကီၢ်အယံၤနၢ်ဟူ ဘၣ်နတၢ်မံၤဟူသၣ်ဖျါ, ဒီးတၢ်အဒိၣ်အမုၢ်တဖၣ်လၢနမၤတ့ၢ်လၢနပှၤဂီၢ်မုၢ်အဂီၢ်,
42 ဒီးမ့ၢ်ဟဲလၢကဘူၣ်ထီၣ်ဘါထီၣ်နၤအဂီၢ်ဒီးဘါထုကဖၣ်တၢ်လၢ ယွၤအတၢ်လုၢ်ဟံၣ်အံၤအပူၤန့ၣ်,
43 ဒိကနၣ်လၢ်အဝဲအတၢ်ထုကဖၣ်န့ၣ်တက့ၢ်. လၢမူခိၣ်ဖဲနအိၣ်နဲဆိးနဲအလီၢ်န့ၣ်, ဒိကနၣ်လၢ်အီၤဒီးမၤတၢ်လၢအဝဲဃ့ဝဲလၢနကမၤန့ၢ်အီၤဒ်သိး ကယဲၢ်ပှၤဂီၢ်မုၢ်အိၣ်လၢဟီၣ်ခိၣ်ချၢခဲလၢာ်, ကသ့ၣ်ညါနၤဒီးစူၢ်နၤဒ်နပှၤဂီၢ်မုၢ်အံၣ်စရ့လးဖိမၤဝဲအသိး န့ၣ်တက့ၢ်. တုၤနုၤတစု, အဝဲသ့ၣ်ကသ့ၣ်ညါဝဲဒၣ်လၢယွၤအတၢ်လုၢ်ဟံၣ်လၢ ယသူၣ်ထီၣ်တ့ၢ်လံအီၤအံၤမ့ၢ်တၢ်လီၢ်တတီၤလၢနကဘၣ်တၢ်ဘူၣ်ထီၣ် ဘါထီၣ်နၤအဂီၢ်န့ၣ်လီၤ.
44 ဖဲနမၤလိာ်နပှၤဂီၢ်မုၢ်တဖၣ်လၢကလဲၤဆူတၢ်ဒုးအပျီပူၤလၢ ကဒုးတၢ်ထီဒါအဒုၣ်အဒါတဖၣ်ဒီး, ဖဲအဝဲသ့ၣ်အိၣ်ဝဲတပူၤလၢ်လၢ်, မ့ၢ်ဃၣ်အသးဆူဝ့ၢ်လၢနဃုထၢဒီးယွၤအတၢ်လုၢ်ဟံၣ်လၢယသူၣ်ထီၣ် လၢနဂီၢ်, ဒီးမ့ၢ်ဃ့တၢ်ဆူနၤန့ၣ်,
45 ဒိကနၣ်လၢ်အဝဲသ့ၣ်အတၢ်ထုကဖၣ်တဖၣ်တက့ၢ်. ဒိကနၣ်လၢ်အီၤလၢမူခိၣ်ဒီးဟ့ၣ်လီၤအဝဲသ့ၣ်လၢတၢ်မၤနၢၤန့ၣ် တက့ၢ်.
46 တုၤနပှၤဂီၢ်မုၢ်မၤတၢ်ဒဲးဘးထီဒါနၤ, ဒီးပှၤလၢအတမၤဒဲးဘး တၢ်တအိၣ်ဘၣ်နီတဂၤအခါန့ၣ်, လၢနတၢ်သးထီၣ်အပူၤနမ့ၢ်ပျဲအဒုၣ်အဒါတဖၣ်မၤနၢၤအဝဲသ့ၣ်ဒီး စိာ်ကွံာ်အဝဲသ့ၣ်ဒ်ပှၤဘၣ်တၢ်စၢဃာ်တဖၣ်အသိးဆူထံကီၢ်အဂၤ တနီၤနီၤ, ဒီးထံကီၢ်န့ၣ်မ့ၢ်ယံၤကဲာ်ဆိးဒၣ်လဲာ်,
47 ဒိကနၣ်လၢ်နပှၤဂီၢ်မုၢ်အတၢ်ထုကဖၣ်တဖၣ်န့ၣ်တက့ၢ်. လၢထံကီၢ်တဖၣ်န့ၣ်အပူၤအဝဲသ့ၣ်မ့ၢ်ပီၢ်ယၢ်လီၤက့ၤအသးဒီးဘါ ထုကဖၣ်ဆူနအိၣ်, ဒီးအၢၣ်လီၤဝဲလၢအမၤတ့ၢ်တၢ်ဒဲးဘးဒီးမၤတ့ၢ်တၢ်အၢတၢ်သီ ထဲလဲၣ်ထဲလဲၣ်န့ၣ်ဒီး, ယွၤဧၢ, ဒိကနၣ်လၢ်အဝဲသ့ၣ်အတၢ်ထုကဖၣ်တဖၣ်န့ၣ်တက့ၢ်.
48 လၢကီၢ်တဖၣ်န့ၣ်အပူၤအဝဲသ့ၣ်မ့ၢ်ပီၢ်ယၢ်လီၤက့ၤအသးနီၢ်နီၢ် လၢတၢ်သူၣ်တီသးလိၤအပူၤဒီးဘါထုကဖၣ်ဆူနအိၣ်ဖဲ အဃၣ်ဃီၤအမဲာ်ဆူထံကီၢ်လၢနဟ့ၣ်လီၤတ့ၢ်ပမိၢ်ပၢ်ဖံဖု လၢပျၢၤတဖၣ်အံၤ, ဒီးဝ့ၢ်လၢနဃုထၢတ့ၢ်နဲအံၤ, ဒီးယွၤအတၢ်လုၢ်ဟံၣ်လၢယသူၣ်ထီၣ်လၢနဂီၢ်အံၤန့ၣ်ဒီး,
49 ဒိကနၣ်လၢ်အဝဲသ့ၣ်အတၢ်ထုကဖၣ်တဖၣ်န့ၣ်တက့ၢ်. လၢနဟံၣ်လၢမူခိၣ်အပူၤန့ၣ်ဒိကနၣ်လၢ်အဝဲသ့ၣ်ဒီးသူၣ်ကညီၤသး ကညီၤလၢ်အဝဲသ့ၣ်န့ၣ်တက့ၢ်.
50 ပျၢ်လၢ်အဝဲသ့ၣ်အတၢ်ဒဲးဘးဒီးအဝဲသ့ၣ်အတၢ်ပူထီၣ်ထီဒါနၤခဲ လၢာ်, ဒီးပျဲအဝဲသ့ၣ်အဒုၣ်အဒါတဖၣ်မၤဘၣ်အီၤလၢတၢ်သူၣ်ကညီၤသး ကညီၤအပူၤန့ၣ်တက့ၢ်.
51 အဝဲသ့ၣ်မ့ၢ်နပှၤဂီၢ်မုၢ်ဒၣ်နဲလၢနဟဲစိာ်ထီၣ်ကွံာ်အီၤလၢကီၢ် အဲၤကူပတူးလၢအလီၤဂာ်ဒ်မ့ၣ်အူဖၣ်ကွာ်အသိး, အပူၤန့ၣ်လီၤ.
52 ယွၤပၢဘၣ်တၢ်ခဲလၢာ်တဂၤဧၢ, ထီဘိမ်နကွၢ်နပှၤဂီၢ်မုၢ်အံၣ်စရ့ လးဒီးအစီၤပၤလၢတၢ်ကွၢ်မဲာ်အပူၤ, ဒီးဒိကနၣ်အဝဲသ့ၣ်အတၢ်ထု ကဖၣ်တဘျီလၢ်လၢ်ဖဲအဝဲသ့ၣ်ကိးထီၣ်နၤလၢတၢ်မၤစၢၤအဂီၢ်န့ၣ်တ က့ၢ်.
53 နဃုထၢအဝဲသ့ၣ်လၢကယဲၢ်ပှၤဂီၢ်မုၢ်အကျါဒ်သိးအဝဲသ့ၣ်ကကဲထီၣ် နပှၤဂီၢ်မုၢ်ဒၣ်နဲ, ဒ်နတဲတ့ၢ်အဝဲသ့ၣ်ခီဖျိနခ့နပှၤစီၤမိၤၡ့, ဖဲနထုးထီၣ်ကွံာ်ပမိၢ်ပၢ်ဖံဖုလၢပျၢၤတဖၣ်လၢကီၢ်အဲၤကူ ပတူးအပူၤအခါန့ၣ်လီၤ.”
54 ဖဲစီၤၡလိၤမိၤဘါထုကဖၣ်တၢ်ဆူယွၤအအိၣ်ဝံၤန့ၣ်, အဝဲဂဲၤဆၢထၢၣ်လၢတၢ်လုၢ်လီၢ်အမဲာ်ညါ, တၢ်လီၢ်ဖဲအဝဲချံးလီၤတ့ၢ်အခီၣ်အိၣ်ဒီးအစုယူာ်ထီၣ်အသးဆူ မူခိၣ်န့ၣ်လီၤ.
55 ဒီးလၢတၢ်ကလုၢ်သီၣ်ဖးဒိၣ်အပူၤ, အဝဲဃ့ဝဲလၢကစၢ်ယွၤအတၢ် ဆိၣ်ဂ့ၤကလီၤဘၣ်လၢပှၤဂီၢ်မုၢ်ခဲလၢာ်လၢအအိၣ်ဖှိၣ်ရိဖှိၣ်ဖဲ န့ၣ်အလိၤန့ၣ်လီၤ. အဝဲစံးဝဲ,
56 “စံးထီၣ်ပတြၢၤယွၤ, လၢအဟ့ၣ်တ့ၢ်အပှၤဂီၢ်မုၢ်လၢတၢ်ဃူ တၢ်ဖိးဒ်အအၢၣ်လီၤတ့ၢ်ဝဲအသိးအဃိန့ၣ်တက့ၢ်. အဝဲဟံးဃာ်ဂၢၢ်ကျၢၤတ့ၢ်အတၢ်အဲၣ်, တၢ်သးအိၣ်အတၢ်အၢၣ်လီၤတဖၣ်လၢအမၤတ့ၢ်ဝဲခီဖျိအခ့ အပှၤစီၤမိၤၡ့န့ၣ်လီၤ.
57 မ်ယွၤ, ပကစၢ်ယွၤအိၣ်ဒီးပှၤဒ်အဝဲအိၣ်တ့ၢ်ဒီးပမိၢ်ပၢ်ဖံဖု လၢပျၢၤတဖၣ်အသိးန့ၣ်တက့ၢ်. မ်အဝဲအသုတလဲၤသဒၣ်ပှၤ, ဒီးပာ်လီၤတဲာ်တ့ၢ်ပှၤနီတစုတဂ့ၤ.
58 မ်အဝဲဘိးဃၣ်ပသးဆူအအိၣ်လၢပကစူၢ်အီၤ, ဒ်သိးပကအိၣ်မူထီဘိဒ်အဝဲဘၣ်အသးလၢပကအိၣ်မူဝဲအသိး, တိၢ်န့ၢ်ဖံးဃာ်ကယဲၢ်ယွၤအတၢ်သိၣ်တၢ်သီတဖၣ်ဒီးတၢ်မၤလိာ်တဖၣ် လၢအဟ့ၣ်လီၤတ့ၢ်ပမိၢ်ပၢ်ဖံဖုလၢပျၢၤတဖၣ်န့ၣ်တက့ၢ်.
59 တၢ်ထုကဖၣ်အံၤဒီးတၢ်ဃ့သကွံာ်ကညးတဖၣ်အံၤလၢယဃ့ တ့ၢ်အီၤန့ၣ်, မ်ယွၤ, ပကစၢ်ယွၤသ့ၣ်နီၣ်ထီၣ်အီၤကိးဆၢကတီၢ် ဒဲးန့ၣ်တက့ၢ်. ထီဘိမ်အဝဲသူၣ်ကညီၤသးကညီၤအံၣ်စရ့လးအပှၤဂီၢ်မုၢ်ဒီးအစီၤ ပၤဒ်အဝဲသ့ၣ်အတၢ်လိၣ်အိၣ်ဝဲ တနံၤဘၣ်တနံၤအသိးန့ၣ်တက့ၢ်.
60 ဒီးလၢတၢ်န့ၣ်အဃိ, ပှၤကလုာ်ခဲလၢာ်လၢဟီၣ်ခိၣ်ချၢကသ့ၣ်ညါဝဲ လၢယွၤထဲတဂၤဧိၤအံၤမ့ၢ်ကစၢ်ယွၤ, ဒီးကစၢ်ယွၤအဂုၤအဂၤတအိၣ်ဘၣ်န့ၣ်လီၤ.
61 မ်သုဝဲ, အပှၤဂီၢ်မုၢ်အိၣ်ဒီးတၢ်သူၣ်တီသးရၤဒီးယွၤ, ပကစၢ်ယွၤထီဘိ, စူၢ်ကယဲၢ်အဝဲအတၢ်သိၣ်တၢ်သီတဖၣ်ဒီးအတၢ်မၤလိာ်တဖၣ်, ဒ်သုမၤအီၤလၢမုၢ်မဆါတနံၤအံၤအသိးန့ၣ်တက့ၢ်.”
(၂ကွဲး.၇:၄-၁၀)
62 တုၤနုၤတစု, စီၤပၤၡလိၤမိၤဒီးကယဲၢ်ပှၤဂီၢ်မုၢ်ဖဲန့ၣ်ခဲလၢာ် လုၢ်ထီၣ်တၢ်လုၢ်တၢ်ပာ်တဖၣ်ဆူယွၤအအိၣ်န့ၣ်လီၤ.
63 အဝဲလုၢ်ထီၣ်ဂီၤဖံးအဒုခံကလးခံကထိ, ဒီးသိအဒုတကလီၢ်ခံ ကလးဒ်တၢ်လုၢ်မၤဃူမၤဖိးအသိးန့ၣ်လီၤ. လၢတၢ်န့ၣ်အဃိ, စီၤပၤဒီးကယဲၢ်ပှၤဂီၢ်မုၢ်ခဲလၢာ်ပာ်စီဆှံ ယွၤအတၢ်လုၢ်ဟံၣ်န့ၣ်လီၤ.
64 ဖဲမုၢ်တနံၤဃီအံၤန့ၣ်, အဝဲပာ်စီဆှံထီၣ်စ့ၢ်ကီးတၢ်လီၢ်လၢ ဂၢၤအခၢၣ်သးတတီၤ, တၢ်လီၢ်လၢအအိၣ်ဖဲယွၤအတၢ်လုၢ်ဟံၣ်အမဲာ်ညါ, ဝံၤဒီးဖဲန့ၣ်အဝဲလုၢ်ထီၣ်တၢ်လုၢ်တဖၣ်လၢတၢ်ဆူးကဲၤအီၤဒီတ ဒု,တၢ်လုၢ်ဘုဧိၤဟုဧိၤတဖၣ်ဒီးဆၣ်ဖိကီၢ်ဖိတဖၣ်အသိလၢတၢ် လုၢ်မၤဃူမၤဖိးအဂီၢ်န့ၣ်လီၤ. အဝဲမၤဝဲဒ်အံၤမ့ၢ်လၢတိၢ်ဘီတၢ်လုၢ်လီၢ်န့ၣ်ဆံးကဲာ်ဆိးလၢ တၢ်လုၢ်တဖၣ်အံၤခဲလၢာ်အဂီၢ်အဃိန့ၣ်လီၤ.
65 ဖဲန့ၣ်လၢယွၤအတၢ်လုၢ်ဟံၣ်န့ၣ်, စီၤၡလိၤမိၤဒီးကယဲၢ်ကီၢ်အံၣ် စရ့လးအပှၤဂီၢ်မုၢ်ခဲလၢာ်မၤဝဲဘူၣ်ဒဲလၢနွံသီအတီၢ်ပူၤ န့ၣ်လီၤ. ဖဲန့ၣ်, ပှၤဂီၢ်မုၢ်ဖးဒိၣ်အိၣ်ဝဲလၢအဟဲဝဲ, ယံၤမးလၢတၢ်လဲၤနုာ်ဆူဝ့ၢ်ဃမါသးဒီးလၢအဲၤကူပတူးအကီၢ် အဆၢလၢကလံၤထံးတခီန့ၣ်လီၤ.
66 လၢဃိးနံၤတနံၤန့ၣ်, စီၤၡလိၤမိၤပျၢ်ကွံာ်ပှၤဂီၢ်မုၢ်လၢ ကက့ၤဆူအဟံၣ်န့ၣ်လီၤ. အဝဲသ့ၣ်ခဲလၢာ်, စံးထီၣ်ပတြၢၤအီၤဒီးက့ၤက့ၤဝဲဆူအဟံၣ်ဒၣ် ဝဲလၢတၢ်သူၣ်ဖှံသးညီအပူၤ, လၢကယဲၢ်တၢ်ဆိၣ်ဂ့ၤတဖၣ်လၢယွၤဟ့ၣ်တ့ၢ်အခ့အပှၤစီၤဒၤဝံးဒီး အပှၤဂီၢ်မုၢ်အံၣ်စရ့လးအဃိန့ၣ်လီၤ.