10
(၂ကွဲး.၉:၁-၁၂)
1 ကီၢ်ၡဘၤအနီၢ်ပၤမုၣ်နၢ်ဟူဘၣ်စီၤၡလိၤမိၤအတၢ်မံၤဟူသၣ်ဖျါ ဒီးအဝဲလဲၤဝဲဆူဝ့ၢ်ယရူၤၡလ့ၣ်, လၢကမၤကွၢ်အီၤဒီးတၢ်သံကွၢ်အကီအခဲတဖၣ်အဂီၢ်န့ၣ်လီၤ.
2 အဝဲဟဲကိးဃုာ်အတၢ်ခ့တၢ်ပှၤအါအါဂီၢ်ဂီၢ်ဃုာ်ဒီးကီၤလၤအူး တဖၣ်လၢတၢ်ပဒၢးအီၤဒီးတၢ်နၢမူတဖၣ်, တၢ်မျၢ်ပလဲတဖၣ်ဒီးထူအါအါဂီၢ်ဂီၢ်န့ၣ်လီၤ.
တုၤအဝဲဒီးစီၤၡလိၤမိၤထံၣ်လိာ်အသးန့ၣ်, အဝဲသံကွၢ်အီၤ, ကယဲၢ်တၢ်သံကွၢ်လၢအဆိကမိၣ်ထီၣ်ဝဲသ့တဖၣ်ခဲလၢာ်န့ၣ်လီၤ.
3 စီၤၡလိၤမိၤစံးဆၢဝဲခဲလၢာ်, တၢ်လၢအကီကဲၣ်ဆိးလၢကစံးဆၢ ဝဲန့ၣ်တအိၣ်နီတမံၤဘၣ်.
4 ကီၢ်ၡဘၤအနီၢ်ပၤမုၣ်နၢ်ဟူတ့ၢ်စီၤၡလိၤမိၤအတၢ်ကူၣ်သ့အဂ့ၢ်, ဒီးထံၣ်ဘၣ်နီလၢအဝဲသူၣ်ထီၣ်ဝဲဒၣ်န့ၣ်လီၤ.
5 အဝဲထံၣ်ဘၣ်တၢ်အီၣ်တၢ်အီလၢအဘၣ်တၢ်ပာ်လီၤအီၤလၢအစီၢ်နီၤ ခိၣ်, အပဒိၣ်ပပှၢ်တဖၣ်အတၢ်အိၣ်တၢ်ဆိးအလီၢ်သ့ၣ်တဖၣ်, အဝဲအတၢ်ကရၢကရိထီၣ်ပှၤမၤတၢ်လၢနီပူၤတဖၣ်ဒီးတၢ်ကူတၢ်ကၤ
လၢအဒ်သိးသိးလၢအဝဲသ့ၣ်ကူသိးဝဲ, အခ့အပှၤတဖၣ်လၢအပာ်လီၤန့ၢ်အီၤလီခီတဖၣ်ဖဲအဝဲအီၣ်တၢ်အခါ
ဒီးတၢ်လုၢ်တၢ်ပာ်တဖၣ်လၢအဝဲလုၢ်ထီၣ်ဝဲလၢယွၤအတၢ်လုၢ်ဟံၣ်
အပူၤန့ၣ်လီၤ. တၢ်န့ၣ်မ့ၢ်တၢ်လၢအဒုးကမၢကမၣ်အီၤဒီးမၤသးလီၤကတုၤအီၤန့ၣ်
လီၤ.
6 အဝဲစံးဘၣ်စီၤပၤၡလိၤမိၤ, “တၢ်လၢယနၢ်ဟူဘၣ်တ့ၢ်အီၤလၢ ယထံယကီၢ်အပူၤဘၣ်ထွဲဒီးနတၢ်ကူၣ်သ့အဂ့ၢ်န့ၣ်မ့ၢ်ဝဲတီဝဲလီၤ.
7 ဘၣ်ဆၣ်တချုးဒံးဘၣ်လၢယဟဲထံၣ်ဘၣ်အီၤခဲလၢာ်လၢယနီၢ်ကစၢ်ဒၣ် ယဲန့ၣ်ယနာ်အီၤတသ့ဘၣ်. ဒီးတၢ်လၢယနၢ်ဟူဘၣ်န့ၣ်, တထီၣ်ဘးဒၣ်လဲာ်တဝာ်ဘၣ်.
နတၢ်ကူၣ်သ့ဒီးနတၢ်ထူးတၢ်တီၤတဖၣ်အိၣ်အါန့ၢ်ဒံးတၢ်လၢပှၤတဲ
ဘၣ်တ့ၢ်ယၤန့ၣ်လီၤ.
8 နမါတဖၣ်အတၢ်ဘူၣ်တၢ်တီၢ်ဂ့ၤနးလဲၣ်. ဒီးနခ့နပှၤတဖၣ်လၢအအိၣ်လၢနမဲာ်ညါထီဘိဒီးအိၣ်ဒီးတၢ်ခွဲး တၢ်ယာ်လၢကနၢ်ဟူဘၣ်နတၢ်ကူၣ်သ့အတၢ်ကတိၤတဖၣ်န့ၣ်,
အတၢ်ဘူၣ်တၢ်တီၢ်ဂ့ၤနးလဲၣ်.
9 စံးထီၣ်ပတြၢၤယွၤ, နကစၢ်ယွၤတက့ၢ်. အဝဲဒုးနဲၣ်တ့ၢ်လၢအဘၣ်သူၣ်ဘၣ်သးနၤထဲလဲၣ်ခီဖျိဒုးကဲနၤ လၢကီၢ်အံၣ်စရ့လးအစီၤပၤန့ၣ်လီၤ.
မ့ၢ်လၢအဝဲအတၢ်အဲၣ်ကီၢ်အံၣ်စရ့လးမ့ၢ်တၢ်အထူအယိာ်အဃိ,
အဝဲဒုးကဲထီၣ်နၤလၢအဝဲသ့ၣ်အစီၤပၤဒ်သိးနပၢၤဃာ်တၢ်သိၣ်တၢ်
သီဒီးတၢ်စံၣ်ညီၣ်တီကသ့ဝဲအဂီၢ်န့ၣ်လီၤ.
10 အဝဲဟ့ၣ်လီၤစီၤပၤၡလိၤမိၤလၢတၢ်ဟ့ၣ်ကနၢၤတဖၣ်လၢအဝဲဟဲစိာ် ဝဲန့ၣ်လီၤ. တၢ်တဖၣ်န့ၣ်မ့ၢ်ဝဲထူလီၤတယၢၢ်အကံကၢ်တကယၤခံဆံ, ဒီးတၢ်နၢမူတဖၣ်ဒီးတၢ်မျၢ်တဖၣ်အါအါကလဲာ်န့ၣ်လီၤ.
တၢ်နၢမူအါအါဂီၢ်ဂီၢ်လၢအဝဲဟ့ၣ်စီၤၡလိၤမိၤန့ၣ်,
မ့ၢ်တၢ်ဟ့ၣ်အဒိၣ်အအါကတၢၢ်လၢစီၤၡလိၤမိၤဒိးန့ၢ်ဘၣ်တ့ၢ်အီၤ
တဖၣ်တဘျီဘၣ်တဘျီအကျါန့ၣ်လီၤ.
11 စီၤဃံရၣ်အကဘီတကရူၢ်လၢအဟဲစိာ်ထူဧိၤလွဲဧိၤလၢကီၢ်အိဖ့ၢ် န့ၣ်ဟဲစိာ်သ့ၣ်အလၤမူးအါအါကလဲာ်ဒီးတၢ်မျၢ်တဖၣ်လၢန့ၣ်စ့ၢ်
ကီးလီၤ.
12 စီၤၡလိၤမိၤသူဝဲသ့ၣ်န့ၣ်လၢကဘှီစုဖီၣ်ကျိၤတဖၣ်လၢယွၤ အတၢ်လုၢ်ဟံၣ်ပူၤဒီးလၢနီပူၤ,
ဒီးမၤန့ၢ်စ့ၢ်ကီးတနၢ်တဖၣ်ဒီးသီတူၢ်တဖၣ်လၢပှၤဒ့တၢ်အူတၢ်
ဖိတဖၣ်အဂီၢ်န့ၣ်လီၤ.
တၢ်တဖၣ်န့ၣ်မ့ၢ်သ့ၣ်အလၤမူးအဂ့ၤကတၢၢ်တဖၣ်လီၤ.
တၢ်ဂ့ၤဒ်န့ၣ်အသိးလၢညါတၢ်တဟဲစိာ်တ့ၢ်အီၤမ့ၢ်ဂ့ၤလၢခံ
တၢ်တဟဲစိာ်နုာ်လၢၤအီၤမ့ၢ်ဂ့ၤဆူကီၢ်အံၣ်စရ့လးအပူၤနီတစု
ဘၣ်.
13 လၢကယဲၢ်တၢ်ဟ့ၣ်ကနၢၤညီနုၢ်တဖၣ်လၢအဝဲဟ့ၣ်ကီၢ်ၡဘၤအနီၢ်ပၤ မုၣ်အါအါဂီၢ်ဂီၢ်အမဲာ်ညါန့ၣ်, စီၤပၤၡလိၤမိၤဟ့ၣ်လီၤစ့ၢ်ကီးအီၤလၢကယဲၢ်တၢ်ကိးမံၤဒဲး
လၢအဝဲဃ့ဝဲန့ၣ်လီၤ. အန့ၣ်ဝံၤဒီးအဝဲဒီးအခ့အပှၤတဖၣ်, က့ၤကဒါက့ၤဆူကီၢ်ၡဘၤန့ၣ်လီၤ.
(၂ကွဲး.၉:၁၃-၂၉)
14 ကိးနံၣ်ဒဲးစီၤပၤၡလိၤမိၤဒိးန့ၢ်ဘၣ်ဝဲထူလီၤတယၢၢ်ဃုကယၤ ဃုဆံကံကၢ်,
15 လၢတၢ်ခိတၢ်သွဲတဖၣ်လၢအဘၣ်တၢ်ဟ့ၣ်အီၤလၢပှၤကူၣ်တၢ်ကၤတၢ်တ ဖၣ်, လၢတၢ်မၤကူၣ်မၤကၤအတၢ်အါထီၣ်တဖၣ်ဒီးတၢ်ခိတၢ်သွဲတဖၣ်လၢ
အဘၣ်တၢ်ဟ့ၣ်အီၤလၢပှၤဧ့ရ့းဖိအစီၤပၤတဖၣ်ဒီးပှၤအံၣ်စရ့လး
ဖိအလီၢ်ကဝီၤတဖၣ်အပဒိၣ်ပပှၢ်တဖၣ်အမဲာ်ညါန့ၣ်လီၤ.
16 စီၤၡလိၤမိၤမၤဝဲကတီၤဖးဒိၣ်အဘ့ၣ်ခံကယၤ, ဒီးတဘ့ၣ်ဘၣ်တဘ့ၣ်န့ၣ်ကျးဘၢဝဲဒီးထူလီၤတယၢၢ်ၡက့လးဃုကယၤ န့ၣ်လီၤ.
17 အဝဲမၤစ့ၢ်ကီးကတီၤလၢအဆံးတစဲးအဘ့ၣ်သၢကယၤ, ကျးဘၢဝဲတဘ့ၣ်ဘၣ်တဘ့ၣ်ဒီးထူလီၤတယၢၢ်ၡက့လးသၢကယၤန့ၣ်လီၤ. ကယဲၢ်ကတီၤတဖၣ်အံၤအဝဲပာ်ဝဲလၢလဘၤနိၣ်အပှၢ်လၢ်ကျါအဒၢးဖး
ဒိၣ်အပူၤန့ၣ်လီၤ.
18 အဝဲမၤစ့ၢ်ကီးလီၢ်ပစိာ်ဖးဒိၣ်တဖျၢၣ်န့ၣ်လီၤ. လီၢ်ပစိာ်အံၤဘၣ်တၢ်မၤအီၤလၢကဆီမဲဒီးတၢ်ပီၤအီၤလၢထူစီန့ၣ်လီၤ.
19 လီၢ်ပစိာ်န့ၣ်အိၣ်ဒီးအဃီဃုသွါလၢခ့ယုၢ်အဂီၤအိၣ်ဝဲလၢဃီ သွါတသွါစုာ်စုာ်အကပၤခံခီယၢ်ဘး, ဒီးခ့ယုၢ်အိၣ်ဝဲတဆံခံဒုန့ၣ်လီၤ.
20 တၢ်သန့ၤလီၤအလီၢ်လၢလီၢ်ပစိာ်အချၢမ့ၢ်ဂီၤဖံးဖါတဒုအခိၣ် အက့ၢ်အဂီၤ, ဒီးလၢတၢ်ပာ်ထီၣ်စုတီၤအလီၢ်ခံခါအကပၤန့ၣ်, တကပၤစုာ်စုာ်အိၣ်ဒီးခ့ယုၢ်တဒုစုာ်စုာ်အက့ၢ်အဂီၤန့ၣ်လီၤ.
လီၢ်ပစိာ်ဒ်သိးအံၤ, တအိၣ်ထီၣ်တ့ၢ်ဘၣ်လၢဘီမုၢ်အဂၤနီတဘ့ၣ်အပူၤဘၣ်.
21 ကယဲၢ်စီၤၡလိၤမိၤအလီခီအီတၢ်တဖၣ်န့ၣ်ဘၣ်တၢ်ပိာ်အီၤလၢထူ, ဒီးကယဲၢ်တၢ်ပီးတၢ်လီတဖၣ်လၢအအိၣ်ဝဲလၢလဘၤနိၣ်အပှၢ်လၢ်ကျါ အဒၢးဖးဒိၣ်အပူၤန့ၣ်မ့ၢ်ထူစီခဲလၢာ်န့ၣ်လီၤ.
စ့တဘၣ်တၢ်သူအီၤနီတစဲးမ့ၢ်လၢ, စီၤၡလိၤမိၤအမုၢ်နံၤန့ၣ်, စ့တဘၣ်တၢ်ပာ်လုၢ်ပာ်ပှ့ၤအီၤဘၣ်အဃိန့ၣ်လီၤ.
22 အဝဲအိၣ်ဒီးကဘီတကရူၢ်လၢအလဲၤတၢ်လၢပီၣ်လဲၣ်ပူၤ, လဲၤဃုာ်တၢ်ဒီးစီၤဃံရၣ်အကဘီတကရူၢ်န့ၣ်လီၤ. သၢနံၣ်တဘျီန့ၣ်အဝဲအကဘီကရူၢ်ကဟဲက့ၤကဒါက့ၤ, ကဟဲက့ၤစိာ်ဝဲထူ, စ့, ကဆီမဲ, ကယူၤဖၣ်တဖၣ်ဒီးတၤအုးတဖၣ်န့ၣ်လီၤ.
23 စီၤပၤၡလိၤမိၤကဲဒိၣ်ဒီးကူၣ်တၢ်သ့အါန့ၢ်ဒံးစီၤပၤအဂုၤအဂၤ,
24 ဒီးပှၤအိၣ်လၢဟီၣ်ခိၣ်ဒီဘ့ၣ်ညါသးအိၣ်ဟဲဒီးဒိကနၣ်အဝဲ အတၢ်ကူၣ်သ့လၢကစၢ်ယွၤဟ့ၣ်လီၤတ့ၢ်အီၤန့ၣ်လီၤ.
25 ကယဲၢ်ပှၤလၢအဟဲတဂၤလၢ်လၢ်န့ၣ်ဟဲစိာ်န့ၢ်အီၤတၢ်ဟ့ၣ်တမံၤမံၤ, လၢအမ့ၢ်ဝဲ, တၢ်ပီးတၢ်လီတဖၣ်လၢအမ့ၢ်စ့မ့တမ့ၢ်ထူ, ဆ့ကၤဖးထီတဖၣ်, တၢ်စုကဝဲၤတဖၣ်, တၢ်နၢမူနၢဆှီတဖၣ်, ကသ့ၣ်တဖၣ်ဒီးကသ့ၣ်လၤတဖၣ်န့ၣ်လီၤ.
တၢ်အံၤမၤထွဲအသးတနံၣ်ဝံၤတနံၣ်န့ၣ်လီၤ.
26 စီၤၡလိၤမိၤပာ်ဖှိၣ်ထီၣ်လ့ၣ်ကဟၣ်သုးတဖုလၢအနီၣ်ဂံၢ်အိၣ်ဝဲ အဆိတကထိလွံၢ်ကယၤဒီးပှၤဒိးကသ့ၣ်သုးဖိအိၣ်ဝဲအဂၤတကလးခံ
ကထိန့ၣ်လီၤ. တနီၤန့ၣ်အဝဲပာ်ဝဲလၢဝ့ၢ်ယရူၤၡလ့ၣ်အပူၤဒီးအဂၤတဖၣ်န့ၣ်အဝဲ
ပာ်လီၤဝဲလၢဝ့ၢ်အဂုၤအဂၤတဖၣ်အပူၤန့ၣ်လီၤ.
27 ဖဲအဝဲပၢတၢ်အစိၤန့ၣ်, လၢဝ့ၢ်ယရူၤၡလ့ၣ်အပူၤစ့ဘၣ်တၢ်ပာ်အီၤ ဒ်သိးဒၣ်ဒီးလၢၢ်ဧိၤလ့ဧိၤ, ဒီးလၢကီၢ်ယူဒၤအကစၢၢ်ခီၣ်ထံးတဖၣ်န့ၣ်သ့ၣ်ဆှိအ့ရ့းအိၣ်ဝဲ
အါအါဂီၢ်ဂီၢ်ဒ်သိးဒၣ်သ့ၣ်သိးဝံာ်ဒၢမုၢ်ဆ့ၣ်မုၢ်ဂီၤန့ၣ်လီၤ.
28 စီၤပၤအခၢၣ်စးတဖၣ်ပၢၤဃာ်ဝဲတၢ်ဟဲစိာ်နုာ်ဒီးဆါကသ့ၣ်တဖၣ် လၢကီၢ်မူၤစရံဒီးကံၤလကံ,
29 ဒီးတၢ်ဟဲစိာ်နုာ်ဒီးဆါလ့ၣ်ကဟၣ်တဖၣ်လၢကီၢ်အဲၤကူပတူးန့ၣ် လီၤ. အဝဲသ့ၣ်ဆါန့ၢ်ပှၤဃ့ၤသးဖိဒီးပှၤစူၤရံအစီၤပၤတဖၣ်လၢ
ကသ့ၣ်တဖၣ်ဒီးလ့ၣ်ကဟၣ်တဖၣ်န့ၣ်လီၤ.
လ့ၣ်ကဟၣ်တဆိစုာ်စုာ်အပှ့ၤမ့ၢ်ဝဲ, စ့ညၣ်အဘ့ၣ်ဃုကယၤ,
ဒီးကသ့ၣ်တဒုစုာ်စုာ်အပှ့ၤမ့ၢ်ဝဲစ့ညၣ်အဘ့ၣ်တကယၤယဲၢ်ဆံန့ၣ်လီၤ.