10
1 တုၤဝ့ၢ်ယရူၤၡလ့ၣ်အစီၤပၤအဒိၤနံၤစ့ဒ့းနၢ်ဟူဝဲလၢစီၤယိၤၡူ မၤန့ၢ်ဒီးမၤဟးဂီၤဝ့ၢ်ဂဲလၢာ်လၢာ်ဆ့ဆ့ဒီးမၤသံအစီၤပၤဒ်အ မၤတ့ၢ်ဝဲလၢဝ့ၢ်ယရံၤဃိဒီးအစီၤပၤအသိး, ဒီးပှၤကံးဘိၣ်ဖိ တဖၣ်မၤဃူမၤဖိးအသးဒီးပှၤ အံၣ်စရ့လးဖိတဖၣ်ဒီးအိၣ်ဆိးလၢအဝဲသ့ၣ်အကျါလံန့ၣ်,
2 ပှၤဝ့ၢ်ယရူၤၡလ့ၣ်ဖိတဖၣ်ပျံၤ တၢ်ဖုးတၢ်ဒိၣ်မးလၢတၢ်ဂ့ၢ်အံၤအဃိန့ၣ်လီၤ. အဂ့ၢ်မ့ၢ်လၢကံးဘိၣ်မ့ၢ်ဝ့ၢ်လၢအဒိၣ်ထဲသိးဝ့ၢ်အဂၤတဖၣ်လၢ အအိၣ်ဒီးအစီၤပၤ, ဒီးမ့ၢ်ဝ့ၢ်လၢအဒိၣ်န့ၢ်ဒံးဝ့ၢ်ဂဲဒီးအပှၤတဖၣ်မ့ၢ်ပှၤလၢ အဒုးတၢ်သ့အဃိန့ၣ်လီၤ.
3 အန့ၣ်ဒီး, ဝ့ၢ်ယရူၤၡလ့ၣ်အစီၤပၤအဒိၤနံၤစ့ဒ့းဆှၢလီၤတၢ်ကစီၣ်ဆူဝ့ၢ်ဃ့ဘြိၣ်အစီၤပၤဟိဟၣ်, ဝ့ၢ်ယၢ်မူသးအစီၤပၤပံးရၣ်, ဝ့ၢ်လၤကံၣ်အစီၤပၤယၤဖံ, ဒီးဝ့ၢ်ဧ့းကလိၣ်အစီၤပၤဒဘံၢ်အအိၣ်ဒီးစံးဝဲ,
4 “ဟဲဒီးမၤစၢၤယၤဒ်သိးပကဒုးပှၤကံးဘိၣ်ဖိမ့ၢ်လၢအမၤ တၢ်ဃူတၢ်ဖိးဒီးစီၤယိၤၡူဒီးပှၤအံၣ်စရ့လးဖိတဖၣ်အဃိတက့ၢ်.”
5 အန့ၣ်ဒီး, ပှၤအမိၢ်ဖိအစီၤပၤယဲၢ်ဂၤလၢအမ့ၢ်ဝဲစီၤပၤတဖၣ်လၢဝ့ၢ် ယရူၤၡလ့ၣ်, ဃ့ဘြိၣ်, ယၢ်မူသး, လၤကံၣ်ဒီးဧ့းကလိၣ်ပာ်ဖှိၣ်အသုးမုၢ်တဖၣ်, ကဝီၤဃာ်ဝ့ၢ်ကံးဘိၣ်ဒီးဒုးအီၤန့ၣ်လီၤ.
6 ဒီးပှၤကံးဘိၣ်ဖိတဖၣ်ဆှၢလီၤတၢ် ကစီၣ်ဆူစီၤယိၤၡူလၢအသူၣ်ဒဲလၢဝ့ၢ်ကံးလကၤလးအအိၣ်ဒီးစံး ဝဲ, “တဘၣ်ပာ်တီၢ်ပှၤတဂ့ၤ. ဟဲတဘျီဃီဒီးမၤစၢၤပှၤတက့ၢ်. ဟဲမၤပူၤဖျဲးပှၤလၢပှၤအမိၢ်ဖိအစီၤပၤလၢအအိၣ်လၢကစၢၢ်ခံကလိ လိၤလၢအပာ်ဖှိၣ်အသးဒီးဒုးတၢ်ဒီးပှၤတဖၣ်အစုပူၤတက့ၢ်.”
7 အန့ၣ်ဒီး,စီၤယိၤၡူဒီးအသုးမုၢ်ခဲလၢာ်လၢအပၣ်ဃုာ် ဒီးအသုးဖိလၢအဒုးတၢ်သ့ကတၢၢ်တဖၣ်ဟးထီၣ်လၢဝ့ၢ်ကံးလကၤလး န့ၣ်လီၤ.
8 ယွၤစံးဘၣ်စီၤယိၤၡူ, “တဘၣ်ပျံၤအဝဲသ့ၣ်တဂ့ၤ. ယဟ့ၣ်လီၤတ့ၢ်နၤတၢ်မၤနၢၤလံ. ပှၤလၢအဆၢထၢၣ်ထီဒါနၤသ့တအိၣ်နီတဂၤဘၣ်.”
9 စီၤယိၤၡူဒီးအသုးမုၢ်ဟးထီၣ်လၢဝ့ၢ်ကံးလကၤလးဒီးလဲၤဝဲ ဒီနၤညါဆူဝ့ၢ်ကံးဘိၣ်ဒီးသတူၢ်ကလာ်ဒုးပှၤအမိၢ်ဖိတဖၣ်န့ၣ်လီၤ.
10 ဒီးယွၤဒုးလီၤဘၣ်တၢ်ပျံၤတၢ်ဖုးလၢပှၤအမိၢ်ဖိတဖၣ်အလိၤဖဲ အထံၣ်ဘၣ်အံၣ်စရ့လးအသုးမုၢ်န့ၣ်လီၤ. ပှၤအံၣ်စရ့လးဖိ တဖၣ်မၤသံကွံာ်အဝဲသ့ၣ်ဖဲဝ့ၢ်ကံးဘိၣ်ဒီးလူၤလီၤအဝဲသ့ၣ် လၢကျဲလဲၤဆူဝ့ၢ်ဘ့ၤသဃိရိၣ်, ဒီးကျီကွံာ်အီၤပၢၢ်လၢဝ့ၢ်ဧစ့ ကၤဒီးဝ့ၢ်မးက့ဒၤန့ၣ်လီၤ.
11 ဖဲပှၤအမိၢ်ဖိတဖၣ်ဃ့ၢ်လီၤဝဲလၢပှၤအံၣ်စရ့လးဖိအသုးမုၢ်အ မဲာ်ညါန့ၣ်, ယွၤဒုးလီၤသူၣ်ဖးဒိၣ်တဖၣ်လၢမူခိၣ်ဆူအဝဲသ့ၣ်အဖီခိၣ်ဒီ ကျဲညါတုၤလီၤလၢဝ့ၢ်ဧစ့ကၤဒီးအဝဲသ့ၣ်သံဝဲလီၤ. ပှၤဘၣ်ဒိသံလၢသူၣ်တဖၣ်န့ၣ် အါန့ၢ်ဒံးပှၤလၢပှၤအံၣ်စရ့လးဖိမၤသံလၢနးတက့ၢ်န့ၣ်လီၤ.
12 မုၢ်တနံၤလၢယွၤဟ့ၣ်ပှၤအံၣ်စရ့လးဖိ တၢ်မၤနၢၤလၢပှၤအမိၢ်ဖိအဖီခိၣ်န့ၣ်, စီၤယိၤ ၡူကတိၤတၢ်ဒီးယွၤလၢပှၤအံၣ်စရ့လးဖိတဖၣ်အမဲာ်ညါဒီးစံးဝဲ,
“မုၢ်ဧၢ,အိၣ်ဂၢၢ်တပၢၢ်လၢဝ့ၢ်ကံးဘိၣ်အဖီခိၣ်ဒီးလါဧၢ, အိၣ်ကတီၢ်လၢအးယၤလိၣ်အကစၢၢ်ကဆူးအဖီခိၣ်န့ၣ်တက့ၢ်.”
13 ဒီးမုၢ်န့ၣ်အိၣ်ဂၢၢ်တပၢၢ်ဒီးလါန့ၣ်အိၣ်ကတီၢ်ဝဲ တုၤလီၤလၢပှၤဂီၢ်မုၢ်မၤနၢၤကွံာ်အဒုၣ်အဒါတဖၣ်န့ၣ်လီၤ. တၢ်ဂ့ၢ်အံၤကွဲးအသးလၢလံာ်ယၤၡၣ်အပူၤလၢမုၢ်န့ၣ် ဆၢထၢၣ်ဂၢၢ်တပၢၢ်လၢမူခိၣ်အသးကံၢ်ပူၤဒီးဒီနံၤညါန့ၣ် တလီၤနုာ်ဝဲဘၣ်.
14 မုၢ်နံၤဒ်သိးအံၤလၢသီမ့ၢ်ဂ့ၤ, လၢခံမ့ၢ်ဂ့ၤတအိၣ်နီတဘျီဘၣ်. အဂ့ၢ်ဒ်အံၤယွၤဒိကနၣ်ပှၤကညီအကလုၢ်ဒီးဒုးတၢ်လၢပှၤအံၣ်စရ့လးဖိအဂီၢ် န့ၣ်လီၤ.
15 အန့ၣ်ဝံၤဒီး,စီၤယိၤၡူဒီးအသုးမုၢ်က့ၤကဒါက့ၤဆူသူၣ်ဒဲ အလီၢ်လၢဝ့ၢ်ကံးလကၤလးန့ၣ်လီၤ.
16 ပှၤအမိၢ်ဖိအစီၤပၤယဲၢ်ဂၤထွး ထီၣ်ဃ့ၢ်ဝဲဒီးအိၣ်ခူသူၣ်ဝဲလၢတၢ်ကအိပူၤဖဲဝ့ၢ်မးက့ဒၤန့ၣ်လီၤ.
17 ပှၤထံၣ်အဝဲသ့ၣ်ဒီးအဝဲသ့ၣ်အိၣ်ခူသူၣ်ဖဲလဲၣ်န့ၣ်ပှၤတဲဘၣ်စီၤယိၤၡူ န့ၣ်လီၤ.
18 ဒီးစီၤယိၤၡူစံးဝဲ, “တလ့ၢ်လၢၢ်ဖးဒိၣ်တဖၣ်လၢတၢ်ကအိ ပူၤအခိၣ်ထိးဒီးပာ်လီၤပှၤခိးတၢ်စှၤဂၤဖဲန့ၣ်တက့ၢ်.
19 ဘၣ်ဆၣ်ဒီးအိၣ်သုဝဲဖဲန့ၣ်တဂ့ၤ. လူၤထွဲသုဒုၣ်သုဒါတဖၣ်ဒီးဒုးအဝဲသ့ၣ်လၢအလီၢ်ခံတက့ၢ်. တဘၣ်ပျဲအဝဲသ့ၣ်က့ၤဆူအဝ့ၢ်တဖၣ်တဂ့ၤ. ယွၤသုကစၢ်ဟ့ၣ်လီၤသုလၢတၢ်မၤနၢၤအဝဲသ့ၣ်လံ.”
20 စီၤယိၤၡူဒီးပှၤအံၣ်စရ့လးဖိတဖၣ်မၤသံကွံာ်အဝဲသ့ၣ်ဘူးကလၢာ်, ဘၣ်ဆၣ်အဝဲသ့ၣ်အကျါတနီၤထံၣ်တၢ်ပူၤဖျဲးအလီၢ်ဖဲအက့ၤတုၤလၢ အဝ့ၢ်ခိၣ်ဒူတဖၣ်အပူၤန့ၣ်ဒီးတဘၣ်တၢ်မၤသံအီၤဘၣ်န့ၣ်လီၤ.
21 ဝံၤဒီးစီၤယိၤၡူအပှၤခဲလၢာ်ဟဲက့ၤက့ၤ ပူၤပူၤဖျဲးဖျဲးဆူအအိၣ်လၢသူၣ်ဒဲအလီၢ်ဖဲဝ့ၢ်မးက့ဒၤန့ၣ်လီၤ.
ပှၤကတိၤထီဒါပှၤအံၣ်စရ့လးဖိတဖၣ်တဘူၣ်နီတဂၤဒၣ်လဲာ်ဘၣ်န့ၣ် လီၤ.
22 အန့ၣ်ဒီးစီၤယိၤၡူစံးဝဲ, “အိးထီၣ်တၢ်ကအိပူၤအခိၣ်ထိးဒီးဟဲဆှၢထီၣ်စီၤပၤယဲၢ်ဂၤန့ၣ်ဆူ ယအိၣ်တက့ၢ်.”
23 ဒီးအဝဲသ့ၣ်မၤဒ်န့ၣ်, ဒီးဟဲဆှၢထီၣ်စီၤပၤယဲၢ်ဂၤန့ၣ်လၢတၢ်က အိပူၤဆူအအိၣ်, ဝ့ၢ်ယရူၤၡလ့ၣ်အစီၤပၤ, ဃ့ဘြိၣ်အစီၤပၤ, ယၢ်မူသးအစီၤပၤ, လၤကံၣ်အစီၤပၤ, ဒီးဧ့းကလိၣ်အစီၤပၤန့ၣ် လီၤ.
24 ဒီးဖဲအဝဲသ့ၣ်ဟဲဆှၢထီၣ်စီၤပၤတဖၣ်ဆူစီၤယိၤၡူအအိၣ်န့ၣ်, စီၤယိၤၡူကိးဖှိၣ်ပှၤအံၣ်စရ့လးဖိခဲ လၢာ်ဒီးစံးဘၣ်သုးခိၣ်သုးနၢ်လၢအလဲၤတၢ်ဒီးအီၤတဖၣ်လၢအကဟဲ ဒီးပာ်ထီၣ်အခီၣ်လၢစီၤပၤတဖၣ်အံၤအကိာ်လိၤန့ၣ်လီၤ. ဒီးအဝဲသ့ၣ်မၤဝဲဒ်န့ၣ်လီၤ.
25 ဝံၤဒီးစီၤယိၤၡူစံးဘၣ်အသုးခိၣ်တဖၣ်, “တဘၣ်ပျံၤတၢ်တဂ့ၤဒီးတဘၣ်တ့ၢ်စၢ်လီၤသုဂံၢ်သုဘါတဂ့ၤ. ပာ်ဆူၣ်သုသးဒီးအိၣ်ဒီးတၢ်သးဒူတက့ၢ်. အဂ့ၢ်ဒ်အံၤ, ယွၤကမၤတၢ်ဒ်သိးအံၤဒီးသုဒုၣ်သုဒါခဲလၢာ်န့ၣ်လီၤ.”
26 ဝံၤဒီးစီၤယိၤၡူမၤသံစီၤပၤတဖၣ်, ဒီးဘျးလီၤစဲၤအဝဲသ့ၣ်လၢသ့ၣ်ယဲၢ်ထံးအလိၤ, ဒီးအစိၣ်တဖၣ်အိၣ်ဝဲဖဲန့ၣ်တုၤမုၢ်ဟါလီၤန့ၣ်လီၤ.
27 တုၤမုၢ်လီၤနုာ်ဒီးစီၤယိၤၡူဟ့ၣ်လီၤအကလုၢ် ဒီးအဝဲသ့ၣ်အစိၣ်တဖၣ်ဘၣ်တၢ်စိာ်လီၤကွံာ်အီၤလၢသ့ၣ်အလိၤ ဒီးကွံာ်နုာ်အီၤဆူတၢ်လီၢ်ကအိအပူၤလၢအဝဲသ့ၣ်အိၣ်ခူသူၣ်တ့ၢ်ဝဲန့ၣ်လီၤ. လၢၢ်ဖးဒိၣ်တဖၣ်ဘၣ်တၢ်ပာ်လီၤအီၤလၢတၢ်လီၢ်ကအိအပူၤအခိၣ်ထိး ဒီးအိၣ်ဝဲဖဲန့ၣ်တုၤမုၢ်မဆါတနံၤအံၤန့ၣ်လီၤ.
28 စီၤယိၤၡူဒုးဒီးမၤန့ၢ်ဝ့ၢ်မးက့ဒၤဒီးအစီၤပၤတနံၤဃီန့ၣ်လီၤ. အဝဲမၤသံပှၤလၢဝ့ၢ်ပူၤခဲလၢာ်ဒီးပှၤတအိၣ်မူတီၢ်နီတဂၤဘၣ်. ဒ်အမၤတ့ၢ်ဝ့ၢ်ယရံၤဃိအစီၤပၤအသိး, ဝဲမၤဝ့ၢ်မးက့ဒၤအစီၤပၤဒ်န့ၣ်အသိးလီၤ.
29 တၢ်အံၤဝံၤဒီး, စီၤယိၤၡူဒီးအသုးမုၢ်လဲၤထီၣ်လၢဝ့ၢ်မးက့ ဒၤဆူဝ့ၢ်လံးဘနၤဒီးဒုးတၢ်ဒီးပှၤဝ့ၢ်လံးဘနၤဖိန့ၣ်လီၤ.
30 ဒီးယွၤဟ့ၣ်လီၤစ့ၢ်ကီးဝ့ၢ်လံးဘနၤဒီးအစီၤပၤဆူပှၤအံၣ်စရ့လးဖိအစု ပူၤန့ၣ်လီၤ. အဝဲသ့ၣ်တဒုးပူၤဖျဲးပှၤနီတဂၤဘၣ်ဒီးမၤသံပှၤခဲ လၢာ်လၢဝ့ၢ်ပူၤန့ၣ်လီၤ. ဒ်အဝဲသ့ၣ်မၤတ့ၢ်ဝ့ၢ်ယရံၤဃိအစီၤပၤအသိး, မၤဝ့ၢ်လံးဘနၤအစီၤပၤဒ်န့ၣ်အသိးလီၤ.
31 တၢ်အံၤဝံၤဒီးစီၤယိၤၡူဒီးအသုးမုၢ်လဲၤထီၣ်လၢဝ့ၢ်လံးဘနၤဆူဝ့ၢ်လၤ ကံၣ်, ကဝီၤဃာ်ဝ့ၢ်ဒီးဒုးအီၤန့ၣ်လီၤ.
32 ဒီးယွၤဟ့ၣ်လီၤဝ့ၢ်လၤကံၣ်ဆူပှၤအံၣ်စရ့လးဖိအစုပူၤ ဒီးမၤန့ၢ်မၤနၢၤဝဲလၢတၢ်ဒုးခံသီ တသီန့ၣ်လီၤ. ဒ်အဝဲသ့ၣ်မၤတ့ၢ်ဝဲလၢဝ့ၢ်လံးဘနၤအသိး, တဒုးပူၤဖျဲးပှၤနီတဂၤဘၣ်ဒီးမၤသံပှၤခဲလၢာ်လၢဝ့ၢ်ပူၤန့ၣ်လီၤ.
33 ဝ့ၢ်က့စံၢ်အစီၤပၤဟိရၣ်ဟဲဝဲဒ်သိးအကမၤစၢၤပှၤဝ့ၢ်လၤကံၣ်ဖိ ဘၣ်ဆၣ်ဒီးစီၤယိၤၡူကျီကွံာ်အီၤဒီးအပှၤခဲလၢာ်ဒီးတပျဲအအိၣ်တီၢ်နီတဂၤဘၣ်န့ၣ်လီၤ.
34 ဝံၤဒီး, စီၤယိၤၡူဒီးအသုးမုၢ်လဲၤထီၣ်လၢဝ့ၢ်လၤကံၣ်ဆူဝ့ၢ်ဧ့းကလိၣ်, ကဝီၤဃာ်ဝ့ၢ်ဒီးဒုးအီၤန့ၣ်လီၤ.
35 တနံၤဃီအဝဲသ့ၣ်မၤန့ၢ်ဝ့ၢ်န့ၣ်ဒီးမၤသံပှၤဖဲန့ၣ်ကိးဂၤဒဲး, ဒ်အမၤတ့ၢ်ဝဲလၢဝ့ၢ်လၤကံၣ်အသိးန့ၣ်လီၤ.
36 တၢ်အံၤဝံၤဒီး, စီၤယိၤၡူဒီးအသုးမုၢ်ဟးထီၣ်လၢဝ့ၢ်ဧ့းက လိၣ်ဆူဝ့ၢ်ဃ့ဘြိၣ်ဒီးဒုးအီၤန့ၣ်လီၤ.
37 ဒီးမၤန့ၢ်အီၤ, ဒီးကျီသံကွံာ်စီၤပၤဒီးပှၤကိးဂၤဒဲးလၢအအိၣ်လၢဝ့ၢ်ပူၤ ဃုာ်ဒီးဝ့ၢ်လၢအဘူးအတံၢ်တဖၣ်န့ၣ်လီၤ. အဝဲမၤဟးဂီၤဝ့ၢ်အံၤလၢာ်လၢာ်ဆ့ဆ့ဒ်အမၤတ့ၢ်ဝဲလၢဝ့ၢ် ဧ့းကလိၣ်အသိးန့ၣ်လီၤ. ပှၤတအိၣ်မူတီၢ်လၢဝ့ၢ်ပူၤနီတဂၤဘၣ်.
38 ဝံၤဒီး, စီၤယိၤၡူဒီးအသုးမုၢ်ဃၣ်ကဒါက့ၤဆူဝ့ၢ်ဒဘံၢ်ဒီးဒုးအီၤန့ၣ်လီၤ.
39 ဒီးမၤန့ၢ်အီၤဃုာ်ဒီးအစီၤပၤဒီးဝ့ၢ်လၢအဘူးအတံၢ်တဖၣ်ခဲလၢာ်န့ၣ်လီၤ. အဝဲသ့ၣ်မၤသံပှၤဖဲန့ၣ်ခဲလၢာ်လီၤ. စီၤယိၤၡူမၤဘၣ်ပှၤဝ့ၢ်ဒဘံၢ်ဖိဒီး အစီၤပၤဒ်အမၤဘၣ်တ့ၢ်ဝ့ၢ်ဃ့ဘြိၣ်ဒီးဝ့ၢ်လံးဘနၤအစီၤပၤအသိးန့ၣ်လီၤ.
40 စီၤယိၤၡူမၤန့ၢ်မၤနၢၤကီၢ်ဒီဘ့ၣ်ညါန့ၣ်လီၤ. မၤနၢၤစီၤပၤတ ဖၣ်လၢကစၢၢ်ကလိအကီၢ်, မုၢ်ထီၣ်တၢ်ပၢၤလီၤတဖၣ်, ဒီးမုၢ်နုာ်ကစၢၢ်ဂံၢ်ထံးတဖၣ်ဃုာ်ဒီးကလံၤထံးအကီၢ်လၢအဃ့ထီ ဝဲန့ၣ်လီၤ. တပျဲပူၤပှၤနီတဂၤဘၣ်. မၤသံပှၤကိးဂၤဒဲးန့ၣ်လီၤ. တၢ်အံၤမ့ၢ်တၢ်လၢယွၤအံၣ်စရ့လးအကစၢ်မၤလိာ်တ့ၢ်ဝဲန့ၣ်လီၤ.
41 စီၤယိၤၡူမၤနၢၤအဝဲသ့ၣ်စးထီၣ်လၢဝ့ၢ်ကၤဒ့ၣ်ဘၢ်န့တုၤလၢ ဝ့ၢ်ဂါစၤ, ဒီးကိၡ့ၣ်အကီၢ်ဒီဘ့ၣ်ညါတုၤလီၤလၢဝ့ၢ်ကံးဘိၣ်န့ၣ်လီၤ.
42 ဒီးစီၤယိၤၡူမၤန့ၢ်စီၤပၤတဖၣ်အံၤခဲလၢာ်ဃုာ်ဒီးအထံအကီၢ်တဘျီဃီ, မ့ၢ်လၢယွၤအံၣ်စရ့လးအကစၢ်ယွၤဒုးတၢ်လၢ အံၣ်စရ့လးအဂီၢ်အဃိန့ၣ်လီၤ.
43 တၢ်အံၤဝံၤဒီး, စီၤယိၤၡူဒီးအသုးမုၢ်က့ၤကဒါက့ၤဆူသူၣ်ဒဲအလီၢ်လၢ ဝ့ၢ်ကံးလကၤလးန့ၣ်လီၤ.