48
1 အအံၤမ့ၢ်တၢ်လၢ ယွၤသ့တၢ်လၢာ် စံးကတိၤတၢ်ဘၣ်ဃး ကီၢ်မိၤအးအဂ့ၢ် န့ၣ်လီၤ.
“သးကညီၤဘၣ် ဝ့ၢ်နဘိအပှၤဂီၢ်မုၢ်တက့ၢ်. အဝဲသ့ၣ်အဝ့ၢ်ဘၣ် တၢ်မၤဟးဂီၤကွံာ်အီၤလံ.
ဝ့ၢ်ကံးရယးသံၣ်ဘၣ် တၢ်ဒုးန့ၢ်ကွံာ်အီၤလံ.
အတိာ်ဖးဒိၣ်ဘၣ်တၢ်မၤလီၤပှီၢ်အီၤ ဒီးအပှၤဂီၢ်မုၢ်ဘၣ်တၢ်မၤမဲာ်ဆှးအီၤလံ.
2 ကီၢ်မိၤအးအတၢ်လီၤဘီလီၤမုၢ်တအိၣ်ဘၢၤဘၣ်.
ဒုၣ်ဒါဒုးန့ၢ်ကွံာ်လံ ဝ့ၢ်ဃ့ၡဘိၣ်
ဒီးကူၣ်ထီၣ်ဝဲလၢ ကမၤဟးဂီၤကွံာ် ကီၢ်မိၤအးအပှၤကလုာ်န့ၣ်လီၤ.
ဝ့ၢ်မးဒမၣ်ကဘၣ်တၢ်မၤဘှ့ၣ်ဘှီၣ်ကွံာ်အီၤ,
သုးမုၢ်တဖၣ်ကလဲၤထီၣ်ဒုးတၢ်ထီဒါအီၤလီၤ.
3 ဝ့ၢ်ဃိရနဲၣ်အပှၤဂီၢ်မုၢ်ကိးပသူထီၣ်ဝဲ,
တၢ်မၤဆူၣ်မၤစိး, တၢ်မၤဟးဂီၤအိၣ်ထီၣ်လံ.’
4 ကီၢ်မိၤအးဘၣ်တၢ်မၤဟးဂီၤကွံာ်အီၤလံ.
ဒိကနၣ်ဖိသၣ်တဖၣ် အတၢ်ကဲးပသူထီၣ်တက့ၢ်.
5 နၢ်ဟူအဝဲသ့ၣ် အတၢ်ဟီၣ်တၢ်ယၢၤအသီၣ်တဖၣ် လၢကျဲလဲၤထီၣ်ဆူ ဝ့ၢ်လူဃံး, ဒီးတၢ်ကိၢ်တၢ်ဂီၤအ
အတၢ်ကိးပသူထီၣ်တဖၣ်လၢကျဲလဲၤလီၤဆူ ဝ့ၢ်ဃိရနဲၣ်န့ၣ်တက့ၢ်.
6 အဝဲသ့ၣ် စံးဝဲဒၣ်, ‘မၤချ့ချ့ဃ့ၢ်ကွံာ်လၢသုသးသမူအဂီၢ်တက့ၢ်.
ဃ့ၢ်ဒ်မဲးမုၢ်ခိၣ်ကသ့ၣ်ယီၤမံၤတဒုအသိးန့ၣ်တက့ၢ်,’
7 ကီၢ်မိၤအးဧၢ, နနာ်လီၤန့ၢ်နဂံၢ်နဘါဒီးနတၢ်ထူးတၢ်တီၤန့ၣ်လီၤ.
ဘၣ်ဆၣ်ဒီး အခဲအံၤ, နၤဒၣ်လဲာ်နကဘၣ် တၢ်မၤနၢၤမၤန့ၢ်ကွံာ်နၤန့ၣ်လီၤ.
နကစၢ်ကမိၣ်ကဘၣ်လဲၤဆူ တၢ်မၢကဲကုၢ်အလီၢ်
ဃုာ်ဒီးပဒိၣ်ပပှၢ်တဖၣ်ဒီး အပှၤလုၢ်တၢ်အခိၣ်တဖၣ်န့ၣ်လီၤ.
8 ဝ့ၢ်လၢအကပူၤဖျဲးလၢ တၢ်မၤဟးဂီၤန့ၣ်တအိၣ်ဘၣ် နီတဖျၢၣ်ဘၣ်.
တြီၤဒီးပျီတဖၣ်ကဘၣ်တၢ်မၤဟးဂီၤကွံာ်အီၤန့ၣ်လီၤ.
ယၤ, ယွၤအံၤ, ကတိၤလံတၢ်လံ.
9 သူၣ်ထီၣ်တၢ်သွၣ်ခိၣ်အလၢၢ်ထူၣ်တထူၣ်လၢ ကီၢ်မိၤအးအဂီၢ်တက့ၢ်.
တယံာ်လၢၤဘၣ်ဒီး တၢ်ကမၤဟးဂီၤကွံာ်အီၤလီၤ.
အဝ့ၢ်တဖၣ် ကအိၣ်သယုၢ်
ဒီးပှၤတအိၣ်ဆိးဝဲ ကဒီးဘၣ်လၢ အပူၤနီတဂၤဘၣ်.”
10 (ပှၤတဂၤလၢအတမၤယွၤအတၢ်မၤ လၢအသးဒီ ဖျၢၣ်ညါန့ၣ်, မ်အဘၣ်တၢ်ဆိၣ်အၢတက့ၢ်. ပှၤတဂၤလၢ အတကျီဒီး မၤသံတၢ်ဘၣ်န့ၣ်, မ်အဘၣ်တၢ်ဆိၣ်အၢတက့ၢ်.)
11 ယွၤစံးဝဲဒၣ်, “ကီၢ်မိၤအးအအိၣ်ဂၢၢ်ဆိးကျၢၤဝဲထီဘိ ဒီး တဘၣ်တၢ်စိာ်မၢကဲကုၢ်အီၤ နီတစုဘၣ်. ကီၢ်မိၤအးလီၤဂာ်ဒီး စပံးထံလၢတၢ်ပာ်အီၤဒီး တၢ်တမၤတံာ်တာ်အီၤအသိး, ဒီးတဘၣ်တၢ်လူလီၤအီၤလၢ ကတံၤတဖျၢၣ်ဆူအဂၤတဖျၢၣ်အပူၤနီတစုဘၣ်. အတၢ်ဝံၣ်တၢ်ဆၢန့ၣ်တဟးဂီၤကွံာ်နီတစုဘၣ်ဒီး အတၢ်ဘိၣ်တၢ်ဘဲ ဂ့ၤဒၣ်ထီဘိန့ၣ်လီၤ.
12 လၢတၢ်န့ၣ်အဃိဒီး, အခဲအံၤ, တၢ်ဆၢကတီၢ်ဟဲလံဝဲလံလၢ ယကမၢလီၤပှၤဂီၢ်မုၢ်လၢ ကလူလီၤကီၢ်မိၤအးဒ်စပံးထံအသိးန့ၣ်လီၤ. အဝဲသ့ၣ်ကလူလၢာ် စီကွံာ်စပံးထံအကတံၤတဖၣ်ဒီး မၤသ့ၣ်ဖးကွံာ်အီၤဆူ အက့အခီတဖၣ်န့ၣ်လီၤ.
13 အန့ၣ်ဒီး, ပှၤမိၤအးဖိတဖၣ် ကဘၣ်တၢ်မဲာ်ဆှးလၢ အတၢ်နာ်ကမၣ်အကစၢ်ကမိၣ်အဃိ, ဒ်ပှၤအံၣ်စရ့လးဖိတဖၣ် ဘၣ်မဲာ်ဆှးလၢ ဘ့ၤသ့လး, ကစၢ်တဂၤလၢ အဝဲသ့ၣ်နာ်ဝဲအဃိ, အသိးန့ၣ်လီၤ.
14 ကီၢ်မိၤအးအပှၤပိာ်ခွါသ့ၣ်ဧၢ,
ဘၣ်မနုၤအဃိသုစံးလီၤသုသးလၢ သုမ့ၢ်ပှၤဒူပှၤဃိၤတဖၣ်,
ပှၤသုးဖိအဒူတဖၣ်လၢ အဘၣ်တၢ်မၤကွၢ်တ့ၢ်လံ
အီၤလၢ တၢ်ဒုးတၢ်ယၤအပူၤလံ, န့ၣ်လဲၣ်.
15 ကီၢ်မိၤအးဒီး အဝ့ၢ်တဖၣ် ဘၣ်တၢ်မၤဟးဂီၤကွံာ်အီၤဒီး
အပှၤပိာ်ခွါ သးစၢ်အဂ့ၤကတၢၢ်တဖၣ်ဘၣ်တၢ်မၤသံကွံာ်အီၤလံ.
ယမ့ၢ်စီၤပၤ, ယွၤသ့တၢ်လၢာ်,
ဒီးယကတိၤလံတၢ်လံ.
16 ကီၢ်မိၤအးအတၢ်ဘၣ်စံၣ်ညီၣ်ဃါ မနၤသုးဘူး
အသးလံ. တယံာ်လၢၤဘၣ်ဒီး အတၢ်ဟးဂီၤကဟဲ တုၤဝဲလီၤ.
17 သုဝဲလၢအအိၣ်ဘူးဒီးအီၤခဲလၢာ်,
သုဝဲခဲလၢာ်လၢ အသ့ၣ်ညါအတၢ်မံၤဟူသၣ်ဖျါသ့ၣ်ဧၢ,
ဟီၣ်တၢ်ယၢၤတၢ်လၢပှၤကလုာ်အဃိန့ၣ်တက့ၢ်.
စံးသုဝဲဒၣ်လၢ အတၢ်ပၢတၢ်လၢ တၢ်စိကမီၤအပူၤ
ဆိကတီၢ်အသးလံ.
အလၤကပီၤဒီး အဂံၢ်ဆူၣ်ဘါဆူၣ်တဖၣ် တအိၣ်
လၢၤဘၣ်န့ၣ်တက့ၢ်.
18 သုဝဲလၢအအိၣ်ဝဲဆိးဝဲလၢ ဝ့ၢ်ဒံၤဘိၣ်သ့ၣ်ဧၢ,
ဟဲလီၤလၢသုတၢ်လၤကပီၤအလီၢ်ဒီး ဆ့ၣ်နီၤလၢဟီၣ်ခိၣ်လိၤ
ဖၣ်ကမူၣ်အကျါတက့ၢ်.
အဂ့ၢ်ဒ်အံၤ, ပှၤမၤဟးဂီၤကီၢ်မိၤအး ဟဲတုၤလံ
ဒီးမၤဟးဂီၤကွံာ်အတိာ်ဧိၤတာ်ဧိၤခဲလၢာ်လံ.
19 သုဝဲလၢ အအိၣ်ဝဲဆိးဝဲလၢ ဝ့ၢ်ဧရိၤဧ့ၢ်သ့ၣ်ဧၢ,
ဆၢထၢၣ်လၢကျဲကပၤဒီးအိၣ်ခိးတၢ်တက့ၢ်. သံကွၢ်ပှၤတဖၣ်လၢအဃ့ၢ်ကွံာ် ဒီးသုကသ့ၣ် ညါတၢ်လၢ အမၤတ့ၢ်အသးန့ၣ်တက့ၢ်.
20 အဝဲသ့ၣ်ကစံးဆၢဝဲ, ‘ကီၢ်မိၤအးလီၤပှီၢ်လံ.
ဟီၣ်တၢ်ယၢၤတၢ်လၢအဃိတက့ၢ်. ဘၣ်တၢ်မၤမဲာ်ဆှးအီၤလံ.
ဘိးဘၣ်သ့ၣ်ညါလၢ ထံကျိအၢ်နိၢ်ဒီဘိညါ
လၢကီၢ်မိၤအးဘၣ်တၢ်မၤဟးဂီၤကွံာ်အီၤ လံန့ၣ်တက့ၢ်.’
21 တၢ်စံၣ်ညီၣ်ဟဲလီၤဘၣ်လၢ ဝ့ၢ်တဖၣ်လၢတၢ်ပၢၤခိၣ်အလိၤလံ. ဝ့ၢ်တဖၣ်န့ၣ်မ့ၢ်ဝဲဃိလိၣ်, ယးဟစၤ, မ့ဖၤ,
22 ဒံၤဘိၣ်, နဘိ, ဘ့ၤသဒံးဘလၤသံၣ်,
23 ကံးယရးသံၣ်, ဘ့ၤသကၤမူလး, ဘ့ၤသမဧိၣ်,
24 ကရံးယိး, ဘိးစရၤန့ၣ်လီၤ. တၢ်စံၣ်ညီၣ်ဟဲ လီၤဘၣ်လၢ ကယဲၢ်ကီၢ်မိၤအးအဝ့ၢ်တဖၣ် လၢ အယံၤမ့ၢ်ဂ့ၤ, အဘူးမ့ၢ်ဂ့ၤ အလိၤန့ၣ်လီၤ.
25 ကီၢ်မိၤအးအစိဒိၣ် ကမီၤထီဘၣ်တၢ်ဆီၣ်သနံး အီၤလံ. အစိကမီၤဘၣ်တၢ်မၤဟးဂီၤကွံာ်အီၤလံ. ယၤ, ယွၤအံၤ, ကတိၤလံတၢ်လံ.”
26 ယွၤစံးဝဲဒၣ်, “ဒုးအီၤမူၤကီၢ်မိၤအးမ့ၢ် လၢအပူထီၣ်တၢ်ထီဒါတ့ၢ်ယၤအဃိ န့ၣ်တက့ၢ်. ကီၢ်မိၤအးကတလ့ၣ်အသး လၢအတၢ်ဘှိးဒၣ်ဝဲအပူၤဒီး ပှၤဂီၢ်မုၢ်ကနံၤဘၣ်ဖၣ် လဲအီၤန့ၣ်လီၤ.
27 ကီၢ်မိၤအးဧၢ, သ့ၣ်နီၣ်ထီၣ်က့ၤနကတိၤဆါ ကီၢ်အံၣ်စရ့လး ပှၤဂီၢ်မုၢ်ဒ်လဲၣ်န့ၣ်တက့ၢ်. နမၤတ့ၢ်အဝဲသ့ၣ်ဒ် ပှၤလၢအဘၣ်တၢ်ဖီၣ်န့ၢ် ဃုာ်အီၤဒီးတမျိၤတမျာ်အသိးန့ၣ်လီၤ.
28 သုဝဲပှၤဂီၢ်မုၢ်လၢ အအိၣ်ဆိးလၢ ကီၢ်မိၤအးအပူၤ သ့ၣ်ဧၢ, ဟးထီၣ်လၢသုဝ့ၢ်တဖၣ်အပူၤတက့ၢ်. လဲၤဒီးအိၣ်ဆိးလၢ လ့ကဘျၣ်ဖးထီတဖၣ်အလိၤတက့ၢ်. မၤသုသးဒ် ထိၣ်လွံၢ်လၢ အမၤအသွံလၢ တၢ်တြိအကပၤ အသိးန့ၣ်တက့ၢ်.
29 ကီၢ်မိၤအးပာ်ထီၣ်ထီအသးဒိၣ်မးလီၤ. ယနၢ်ဟူတ့ၢ်လၢ အပာ်ထီၣ်ထီအသးထဲလဲၣ်, ဒီးပာ်အသးကဖိလိ, ဒီးအပှၤဂီၢ်မုၢ်မ့ၢ်ပှၤတဖၣ်လၢအပာ်ကဖၢလၢအသးထဲလဲၣ်ဒီး ဆိကမိၣ်ဒိၣ်လီၤ အသးထဲလဲၣ်န့ၣ်လီၤ.
30 ယၤ, ယွၤအံၤ, ယသ့ၣ်ညါအဝဲသ့ၣ် အတၢ်ပာ် ကဖၢလၢအသးန့ၣ်လီၤ. အဝဲသ့ၣ်အတၢ်ကတိၤ ဒိၣ်လီၤအကိာ်တဖၣ်မ့ၢ် တၢ်ကလီၤကလီဒီး တၢ်တဖၣ်လၢအဝဲသ့ၣ်မၤန့ၣ်တအိၣ်ဂၢၢ်ဆိးကျၢၤဘၣ်.
31 ဒီးလၢတၢ်န့ၣ်အဃိ, ယကဟီၣ်ကယၢၤလၢ ပှၤကိးဂၤ ဒဲးလၢ အအိၣ်လၢကီၢ်မိၤအးပူၤအဃိ ဒီးလၢဝ့ၢ်ကံၢ်ဃ့ရ့း အပှၤဂီၢ်မုၢ်အဃိန့ၣ်လီၤ.
32 ယကဟီၣ်လၢ ဝ့ၢ်ကံၢ်ဃ့ရ့းအပှၤဂီၢ်မုၢ်အဃိအါန့ၢ်ဒိၣ်န့ၢ်ဒံး, လၢဝ့ၢ်ယၤစ့ၢ်အပှၤဂီၢ်မုၢ်အဃိတက့ၢ်လီၤ. ဝ့ၢ်စံဘမၤဧၢ, နလီၤဂာ်ဒ်စပံးမုၢ်တမုၢ်လၢ အဒ့တဖၣ်လဲၤခီဂာ်ပီၣ်လဲၣ်သံဒီးလဲၤဝဲ ယံၤတုၤလဲၤဝ့ၢ်ယၤစ့ၢ်အသိးန့ၣ်လီၤ. ဘၣ်ဆၣ်အခဲကနံၣ်အံၤ, နတၢ်ကိၢ်ခါအတၤသၣ်တဖၣ်ဒီး နစပံးသၣ်တဖၣ် ဘၣ်တၢ်မၤဟးဂီၤကွံာ်အီၤလံ.
33 တၢ်သူၣ်ဖှံသးညီဒီး တၢ်သူၣ်ခုသးခုဘၣ်တၢ်ဟံး ထီၣ်ကွံာ်လၢ ကီၢ်မိၤအးအဟီၣ်ခိၣ်ညၣ်ထ့ၣ်အဂ့ၤ အပူၤလီၤ. ယဒုးဆိကတီၢ် စပံးထံအတၢ်ယွၤလီၤလၢ နီၣ်စံၢ်စပံးသၣ်တဖၣ်အပူၤန့ၣ်လီၤ. ပှၤတအိၣ်နီတဂၤဘၣ် လၢကယီၢ်စပံးသၣ်ဒီး ကိးထီၣ်လၢတၢ်သးခုအပူၤန့ၣ်ဘၣ်.
34 ပှၤဂီၢ်မုၢ်လၢဝ့ၢ်ဃ့ၡဘိၣ်ဒီး ဝ့ၢ်အ့လဧၤလ့ၤကိးထီၣ်ဝဲဒီး အဝဲသ့ၣ် အတၢ်ကိးထီၣ်န့ၣ်ဘၣ်တၢ်နၢ်ဟူအီၤသ့ဝဲတုၤလၢ ဝ့ၢ်ယၤစ့ၢ်န့ၣ်လီၤ. တၢ်န့ၣ်ဘၣ်တၢ်နၢ်ဟူစ့ၢ်ကီးအီၤလၢ ပှၤဂီၢ်မုၢ်လၢဝ့ၢ်စိဧၢ်, ဒီးတၢ်န့ၣ်ဘၣ်တၢ်နၢ်ဟူအီၤယံၤဝဲ တုၤလၢ ဝ့ၢ်ဃိရနဲၣ်, ဒီးအဲကလးၡလ့ၡၤန့ၣ်လီၤ. ဝ့ၢ်နံးမရံအထံကျိတဖၣ်ဒၣ်လဲာ်လီၤသံးဝဲလီၤ.
35 ယကဆိကတီၢ်ကွံာ်ကီၢ်မိၤအးအပှၤဂီၢ်မုၢ်လၢ အတၢ်ကလုၢ် ထီၣ်တၢ်လုၢ်မ့ၣ်အူလၢ အတၢ်ဘူၣ်ထီၣ်ဘါထီၣ်အလီၢ်တဖၣ်ဒီး လၢတၢ်လုၢ်ထီၣ်တၢ်လုၢ်တၢ်ပာ်တဖၣ် ဆူကစၢ်တဖၣ်အအိၣ် န့ၣ်လီၤ. ယၤ, ယွၤအံၤ, ကတိၤလံတၢ်လံ.
36 လၢတၢ်န့ၣ်အဃိ ယသးအတၢ်သးအုးအသီၣ်လၢ ကီၢ်မိၤအးအဂီၢ်ဒီးလၢဝ့ၢ်ကံၢ်ဃ့ရ့းအပှၤဂီၢ်မုၢ်အဃိန့ၣ်, လီၤဂာ်ဒ်ပှၤတဂၤအူတၢ်သံအတၢ်သးဝံၣ်တယုၢ်လၢပံအသိးန့ၣ်လီၤ. အဂ့ၢ်ဒ်အံၤ, တၢ်လၢအမ့ၢ်အဝဲသ့ၣ် အတၢ်ခဲလၢာ်န့ၣ်, လီၤမၢ်ကွံာ်လံ.
37 အဝဲသ့ၣ်ခဲလၢာ်န့ၣ်, လူၤကွံာ်အခိၣ်တဖၣ်ဒီး တံာ်ကွံာ်အခၣ်ဆူၣ်တဖၣ်လံ. အဝဲသ့ၣ်ခဲလၢာ်ဂဲာ်လီၤအစုတဖၣ်ဒီး ပှၤကိးဂၤဒဲးကူကၤ ထၢၣ်တၢ်ကံးယာ်န့ၣ်လီၤ.
38 လၢကယဲၢ်ကီၢ်မိၤအးအဟံၣ်ခိၣ်ခဲလၢာ်အလိၤဒီးလၢကမျၢၢ် အတၢ်လီၢ်လီၤပျီဖးလဲၢ်ခဲလၢာ်အပူၤန့ၣ်အိၣ်ဒၣ်ထဲ တၢ်ဟီၣ်တၢ်ယၢၤန့ၣ်လီၤ. အဂ့ၢ်ဒ်အံၤ, ယမၤသ့ၣ်ဖးကွံာ်ကီၢ်မိၤအး ဒ်ကတံၤတဖျၢၣ်လၢ ပှၤတသးလီအီၤနီတဂၤဘၣ်အသိးန့ၣ်လီၤ.
39 ဟီၣ်တၢ်ယၢၤတၢ်တက့ၢ်. ကီၢ်မိၤအးဘၣ်တၢ်မၤလီၤ ကလဲကွံာ်အီၤလံ. အိၣ်လၢတၢ်ဟးဂီၤအပူၤလံ. ဒီးပှၤ ကလုာ်အိၣ်ဝးတရံးအီၤတဖၣ် ကတိၤဒုၣ်ဒွဲၣ်အီၤလီၤ. ယၤ, ယွၤအံၤ, ကတိၤလံတၢ်လံ.”
40 ယွၤအၢၣ်လီၤတ့ၢ်ဝဲလၢ ပှၤတကလုာ်ကဟဲလီၤလၢကီၢ်မိၤအး အဖီခိၣ်လီၤဂာ်ဒီး လံာ်ကြီကြာ်တဘ့ၣ်လၢအဒံးဆ့တဖၣ်သလၣ် ထီၣ်အသးဒီး ယူၤလီၤဝဲန့ၣ်လီၤ.
41 ဒီးဝ့ၢ်တဖၣ်ဒီးတိာ်ဧိၤတာ်ဧိၤတဖၣ်ကဘၣ်တၢ်ဒုးန့ၢ်ကွံာ်အီၤန့ၣ်လီၤ. ဒီၤလၢနံၤအဝဲန့ၣ်, ကီၢ်မိၤအးအသုးဖိတဖၣ်ကပျံၤတၢ်ဒ်ပိာ်မုၣ်တဂၤလၢ အဟုးဆါအသိးန့ၣ်လီၤ.
42 ကီၢ်မိၤအးကဘၣ်တၢ်မၤဟးဂီၤကွံာ်အီၤ ဒီးတမ့ၢ်လၢၤဘၣ်ထံကီၢ်တဘ့ၣ်ဘၣ်န့ၣ်လီၤ. အဂ့ၢ်ဒ်အံၤ, ပူထီၣ်တၢ်ထီဒါယၤအဃိန့ၣ်လီၤ.
43 တၢ်မၤပျံၤမၤဖုး, တၢ်ပူၤတဖၣ်, ဒီးပျံၤသကွီၤတဖၣ် အိၣ်ခိးပာ်စၢၤကီၢ်မိၤအးအပှၤဂီၢ်မုၢ်န့ၣ်လီၤ. ယွၤကတိၤလံတၢ်လံ.
44 ပှၤတဂၤဂ့ၤတဂၤဂ့ၤလၢ အကျဲးစၢးဃ့ၢ်ပူၤဖျဲးကွံာ်လၢ တၢ်မၤပျံၤမၤဖုးအံၤန့ၣ်, ကလီၤတဲာ်နုာ်ဆူတၢ်ပူၤတဖၣ်, ဒီးပှၤတဂၤဂ့ၤတဂၤဂ့ၤလၢ အပှာ်ထီၣ်က့ၤလၢ တၢ်ပူၤန့ၣ်, ကဘၣ်တၢ်ဖီၣ်န့ၢ်အီၤလၢ ပျံၤသကွီၤတဖၣ်န့ၣ်လီၤ. အဂ့ၢ်ဒ်အံၤ, ယွၤပာ်လီၤတၢ်ဆၢကတီၢ်လၢ ကီၢ်မိၤအးအတၢ်ဟးဂီၤအဂီၢ်လီၤ.
45 ပှၤဃ့ၢ်ပူၤဖျဲးအသးလၢအမၤစၢၤလီၤအသးတသ့တဖၣ် ကျဲးစၢးဃုထံၣ်န့ၢ်တၢ်အိၣ်ပှိၤမၤစၢၤလၢဝ့ၢ်ဃ့ၡဘိၣ်အပူၤ, ဝ့ၢ်တဝ့ၢ်လၢ တဘျီစီၤပၤစံဃိၣ်ပၢတ့ၢ်ဝဲအပူၤ, ဘၣ်ဆၣ် ဝ့ၢ်န့ၣ်မ့ၣ်အူကဲၤထီၣ်အီၣ်ကွံာ်အီၤလံ. မ့ၣ်အူအီၣ်ကွံာ်ကီၢ် မိၤအးအပှၤဂီၢ်မုၢ်လၢ အအဲၣ်ဒုးတၢ်တဖၣ် အထံဆၢကီၢ်ဆၢဒီး အကစၢၢ်ကလိအထီၣ်ထီတဖၣ်လံ.
46 သူၣ်ကညီၤသးကညီၤဘၣ် ကီၢ်မိၤအးအပှၤဂီၢ်မုၢ်တက့ၢ်. ပှၤဂီၢ်မုၢ်လၢ အဘူၣ်ထီၣ်ဘါထီၣ်ကမိၣ်ဘၣ်တၢ်မၤဟးဂီၤအီၤလံ. ဒီးအဖိခွါတဖၣ်ဒီး အဖိမုၣ်တဖၣ်ဘၣ်တၢ်စိာ်မၢကဲကုၢ်အီၤလံ.
47 ဘၣ်ဆၣ်လၢ မုၢ်နံၤတဖၣ်လၢ အကဟဲဝဲအပူၤန့ၣ်, ယွၤကဒုးဘီၣ်ထီၣ်ညီထီၣ် ကီၢ်မိၤအးကဒီးတဘျီန့ၣ်လီၤ. ကယဲၢ်တၢ်ခဲလၢာ်အံၤမ့ၢ် တၢ်လၢယွၤစံးတ့ၢ်ဝဲ လၢကမၤအသးဒီး ကီၢ်မိၤအးန့ၣ်လီၤ.