30
1-2 ယွၤ, အံၣ်စရ့လးအကစၢ်ယွၤ, စံးဘၣ်ယၤ, “ကွဲးတၢ်အံၤလံာ်တဘ့ၣ်အပူၤတက့ၢ်.
3 အဂ့ၢ်ဒ်အံၤ, တၢ်ဆၢကတီၢ်ဟဲဝဲဖဲ ယကပာ်ကဒါက့ၤယပှၤဂီၢ်မုၢ် လၢကီၢ်အံၣ်စရ့လးဒီးကီၢ်ယူဒၤလၢ အလီၢ်န့ၣ်လံ. ယကဟဲက့ၤစိာ် ကဒါက့ၤ အဝဲသ့ၣ်ဆူ ကီၢ်တဘ့ၣ်န့ၣ်လၢ ယဟ့ၣ်သါတ့ၢ်အဝဲသ့ၣ် အမိၢ်ပၢ်ဖံဖုလၢပျၢၤတဖၣ်, ဒီးအဝဲသ့ၣ်ကန့ၢ်ဘၣ်က့ၤကဒီးအီၤန့ၣ်လီၤ.
ယၤ, ယွၤအံၤ, ကတိၤလံတၢ်လံ.”
4 ယွၤစံးဘၣ်ကီၢ်အံၣ်စရ့လးဒီး ကီၢ်ယူဒၤအပှၤဂီၢ်မုၢ်ဒ်အံၤ,
5 “ယနၢ်ဟူတ့ၢ်တၢ်မၤပျံၤမၤဖုး အတၢ်ကိးထီၣ်,
တၢ်ကိးထီၣ် လၢတၢ်ပျံၤတၢ်ဖုးအပူၤဒီး တမ့ၢ်ဘၣ်
တၢ်ကိးထီၣ်လၢ တၢ်ဃူတၢ်ဖိးအပူၤဘၣ်.
6 ခဲကနံၣ်အံၤဆိကတီၢ်, ဒီးဆိကမိၣ်တၢ်တက့ၢ်.
ပှၤပိာ်ခွါတဂၤဆံးစၢ်ထီၣ်ဖိသၣ်တဂၤဘၣ် ကသ့ဧါ.
ဘၣ်မနုၤအဃိ, ယထံၣ်ဘၣ်ပိာ်ခွါကိးဂၤဒဲးပာ်
အစုလၢ အဟၢဖၢလိၤ,
ဒ်ပိာ်မုၣ်တဂၤလၢ အဟုးဆါဝဲအသိးန့ၣ်လဲၣ်.
ဘၣ်မနုၤအဃိ ပှၤကိးဂၤဒဲးအမဲာ်လီၤဝါထဲန့ၣ်
ညါလဲၣ်.
7 တၢ်လီၤပျံၤလီၤဖုးအမုၢ်တနံၤဟဲဝဲလံ.
မုၢ်နံၤအဂၤတၢ်ထိၣ်သတြီဒီး အီၤတသ့ဘၣ်.
မ့ၢ်တၢ်ဆၢကတီၢ်အကိၢ်အဂီၤလၢ ယပှၤဂီၢ်မုၢ်အဂီၢ်လီၤ.
ဘၣ်ဆၣ် အဝဲသ့ၣ်ကအိၣ်မူလီၤတဲာ်ဒံးဝဲလီၤ.”
8 ယွၤသ့တၢ်လၢာ်စံးဝဲဒၣ်, “ဖဲမုၢ်နံၤအဝဲန့ၣ်ဟဲဝဲဒီး, ယကမၤကၢ်ကွံာ်နီၣ်ယိးဘိလၢ အအိၣ်လၢ အဝဲ
သ့ၣ်အကိာ်လိၤဒီး သုးကွံာ် အဝဲသ့ၣ်အထးသွဲတဖၣ်
ဒီး အဝဲသ့ၣ်တကဲဘၣ်လၢၤပှၤတခီဘီမုၢ် ဖိတဖၣ်
အကုၢ်တဖၣ်န့ၣ်ဘၣ်.
9 ်အခိၣ်တလိာ်, အဝဲသ့ၣ်ကမၤယၤ, ယွၤအဝဲသ့ၣ် အကစၢ်ယွၤ, ဒီးစီၤဒၤဝံးအစၢၤ အသွဲၣ်လၢယကပာ်
ထီၣ်အီၤလၢ စီၤပၤအလီၢ်တဂၤ, အတၢ်မၤန့ၣ်လီၤ.
10 ယပှၤဂီၢ်မုၢ်သ့ၣ်ဧၢ, ပျံၤတၢ်ဖုးတၢ်တဂ့ၤ.
ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, အိၣ်ဒီး
တၢ်ပျံၤတၢ်ဖုးတဂ့ၤ.
ယကအုၣ်က့ၤခီၣ်က့ၤသုလၢ ထံကီၢ်လၢအယံၤဝဲန့ၣ်,
ထံကီၢ်ဖဲသုမ့ၢ်ပှၤဘၣ်တၢ်စိာ်မၢကဲကုၢ်တဖၣ်န့ၣ်လီၤ.
သုကဟဲက့ၤကဒါက့ၤဆူ ဟံၣ်ဒီး အိၣ်မုာ်အိၣ်ခုၣ်
ဘၣ်န့ၣ်လီၤ.
တၢ်အၢတဘၣ်သုဘၣ်ဒီး ပှၤတမၤပျံၤမၤဖုးသု
နီတဂၤဘၣ်.
11 ယကဟဲဆူသုအိၣ်ဒီး အုၣ်က့ၤခီၣ်က့ၤသုန့ၣ်လီၤ. ယတမၤဟးဂီၤကွံာ်သုဘၣ်.
ယတပျဲပူၤသုလၢ တၢ်စံၣ်ညီၣ်ဘၣ်. ဘၣ်ဆၣ်ဖဲယစံၣ်ညီၣ်သုန့ၣ်,
ယကမၤအီၤဖဲ အတီအဘၣ်လီၤ.
ယၤ, ယွၤအံၤ, ကတိၤလံတၢ်လံ.”
12 ယွၤစံးဘၣ် အပှၤဂီၢ်မုၢ်,
“သုပူၤလီၢ်ပူၤကျဲတဖၣ် တၢ်မၤဘျါအီၤတန့ၢ်ဘၣ်,
သုတၢ်ဘၣ်ဒိဘၣ်ထံးတဖၣ် တၢ်မၤဘျါအီၤတသ့ဘၣ်.
13 ပှၤကကွၢ်သုတအိၣ်နီတဂၤဘၣ်,
ကသံၣ်ဖီၣ်တအိၣ်လၢ သုပူၤလီၢ်တဖၣ် အဂီၢ်ဘၣ်,
သုကဘျါက့ၤအဂီၢ်တၢ်မုၢ်လၢ်တအိၣ်ဘၣ်.
14 ပှၤလၢအအဲၣ်သုခဲလၢာ်သးပ့ၤနီၣ်ကွံာ်သုလံ.
အဝဲသ့ၣ်တကနၣ်ဃုာ်သုလၢၤဘၣ်.
ယဒုးတ့ၢ်သုဒ်ဒုၣ်ဒါအသိး,
သုဘၣ်စံၣ်ညီၣ်မ့ၢ်တၢ်လၢ အဆူၣ်ဝဲ,
မ့ၢ်လၢသုတၢ်ဒဲးဘးတဖၣ် အါဝဲ,
ဒီးသုတၢ်အၢတၢ်သီဒိၣ်ဝဲအဃိန့ၣ်လီၤ.
15 ကဒူးကဒ့ၣ်လၢၤလၢ သုတၢ်ဘၣ်ဒိဘၣ်ထံးတဖၣ်အဃိန့ၣ် တဂ့ၤ,
တၢ်မၤဘျါက့ၤသုတအိၣ်နီတမံၤဘၣ်.
ယစံၣ်ညီၣ်သုဒ်သိးအံၤ,
မ့ၢ်လၢသုတၢ်ဒဲးဘးတဖၣ် အါဝဲ,
ဒီးသုတၢ်အၢတၢ်သီဒိၣ်ဝဲအဃိန့ၣ်လီၤ.
16 ဘၣ်ဆၣ်ဒီး ခဲအံၤ, ပှၤလၢအအ့ၣ်အီၣ် သုခဲလၢာ် ကဘၣ်တၢ်အ့ၣ်အီၣ်ကွံာ်အီၤ,
ဒီးသုဒုၣ်သုဒါခဲလၢာ်, ကဘၣ်တၢ်စိာ်ကွံာ်အီၤ
ဒ်ပှၤဘၣ်တၢ်စိာ်မၢကဲကုၢ်အီၤတဖၣ် အသိးန့ၣ်လီၤ.
ပှၤလၢ အမၤနးမၤဖှီၣ်သုခဲလၢာ် ကဘၣ်
တၢ်မၤနးမၤဖှီၣ်အီၤ,
ဒီးပှၤလၢ အဂုာ်ဆူၣ်ပျီဆူၣ်သုတၢ်ခဲလၢာ်
ကဘၣ်တၢ်ဂုာ်ဆူၣ်ပျီဆူၣ်အီၤ န့ၣ်လီၤ.
17 ယကဒုးအိၣ်ဆူၣ်အိၣ်ချ့ကဒီးသုလီၤ.
ယကမၤဘျါက့ၤသု ပူၤလီၢ်ပူၤကျဲတဖၣ်န့ၣ်လီၤ.
သုဒုၣ်သုဒါတဖၣ် မ့ၢ်စံးလၢ,
‘ဝ့ၢ်စံယိၣ်မ့ၢ်တၢ်ဘၣ်တၢၤကွံာ် အလီၢ်တပူၤ,
ပှၤတကနၣ်ဃုာ်အီၤ နီတဂၤလၢၤဘၣ်’ ဒၣ်လဲာ်န့ၣ်,
ယကမၤဘျါသုပူၤလီၢ်ပူၤကျဲ တဖၣ်လီၤ.
ယၤ, ယွၤအံၤ, ကတိၤလံတၢ်လံ.”
18 ယွၤစံးဝဲဒၣ်, “ယကပာ်ကဒါက့ၤ ယပှၤဂီၢ်မုၢ်လၢ အကီၢ်ဒၣ်ဝဲ, ဒီးအိၣ်ဒီး တၢ်သးကညီၤလၢ ဒူၣ်ဖိထၢဖိကိးဒူၣ်ဒဲးအဖီခိၣ်န့ၣ်လီၤ.
ဝ့ၢ်ယရူၤၡလ့ၣ် ကဘၣ်တၢ်ဘှီထီၣ်က့ၤအီၤ,
ဒီးအနူၢ်အစီၤကဘၣ် တၢ်ပာ်ထီၣ်ကဒါက့ၤအီၤန့ၣ်လီၤ.
19 ပှၤဂီၢ်မုၢ်လၢ အအိၣ်ဆိးဝဲဖဲန့ၣ်, ကသးဝံၣ်စံးထီၣ်ပတြၢၤတၢ်,
အဝဲသ့ၣ်ကကိးထီၣ်တၢ်လၢ တၢ်သးခုအပူၤန့ၣ်လီၤ.
လၢယတၢ်ဆိၣ်ဂ့ၤအဃိန့ၣ်, အဝဲသ့ၣ်ကအါထီၣ်ဝဲလၢ
အနီၣ်ဂံၢ်,
ယတၢ်ဆိၣ်ဂ့ၤ ကဟဲစိာ်န့ၢ်အဝဲသ့ၣ်လၢ တၢ်လၤကပီၤ
န့ၣ်လီၤ.
20 ယကဟ့ၣ်ကဒါက့ၤ ပှၤကလုာ်လၢ အတၢ်စိတၢ် ကမီၤဒ် လၢပျၢၤအသိး,
ဒီးဒုးအိၣ်ဂၢၢ်ဆိးကျၢၤက့ၤကဒီးအီၤန့ၣ်လီၤ.
ကယဲၢ်ပှၤခဲလၢာ်လၢ အမၤအၢမၤနးအဝဲသ့ၣ်
န့ၣ်ယကစံၣ်ညီၣ်အီၤလီၤ.
21 အဝဲသ့ၣ်အပှၤပၢတၢ် ကဟဲထီၣ်လၢ အပှၤကလုာ် ဒၣ်ဝဲအကျါ
ဒီးအစီၤပၤဖိလၢ အပှၤဂီၢ်မုၢ်ဒၣ်ဝဲအကျါလီၤ.
အဝဲကသုးဘူးအသးဆူ ယအိၣ်ဖဲ ယကွဲမုာ်အီၤလီၤ.
အဂ့ၢ်ဒ်အံၤ, ယမ့ၢ်တကွဲမုာ်ဘၣ်ဒီး မ့ၢ်မတၤဟဲကဘူၣ်တဂၤလဲၣ်.
22 အဝဲသ့ၣ်ကမ့ၢ်ယပှၤဂီၢ်မုၢ်,
ဒီးယကမ့ၢ်အဝဲသ့ၣ် အကစၢ်ယွၤန့ၣ်လီၤ.
ယၤ, ယွၤအံၤ, ကတိၤလံၤတၢ်လံ.”
23 ယွၤအတၢ်သးကဲၤထီၣ်မ့ၢ်ကလံၤမုၢ်, ကလံၤမုၢ်အဆူၣ်လၢ ကအူတပျုာ်တပျီၤတၢ်လၢပှၤအအၢအသီတဖၣ် အခိၣ်အဖီခိၣ်
န့ၣ်လီၤ.
24 တချုးလၢယွၤမၤဝံၤကွံာ် ကယဲၢ်တၢ်လၢ အဝဲတိာ်ပာ် မၤဝဲတဖၣ်ဒံးဘၣ်န့ၣ်, ကလံၤမုၢ်အံၤတဆိကတီၢ်အသး
ဘၣ်. လၢမုၢ်နံၤတဖၣ်လၢ အကဟဲဝဲအပူၤန့ၣ်, အပှၤဂီၢ်မုၢ်
ကနၢ်ပၢၢ်တၢ်အံၤ ထံထံဆးဆးန့ၣ်လီၤ.