3
1 ယွၤစံးဝဲ, “ပှၤတဂၤမ့ၢ်ပာ်မၢ်အမါ, ဒီးအမါဟးသဒၣ်အီၤဒီး ကဲထီၣ်ပှၤအဂၤတဂၤအမါဒီး, အဝဲဟံးန့ၢ်က့ၤကဒီးအီၤတသ့ လၢၤဘၣ်. တၢ်အံၤကမၤဘၣ်အၢထံကီၢ်လၢာ်လၢာ်ဆ့ဆ့လီၤ. ဘၣ်ဆၣ်ဒီးကီၢ်အံၣ်စရ့လးဧၢ, နအိၣ်တ့ၢ်ဒီးပှၤလၢနအဲၣ်အီၤအါ ဂၤ, ဒီးအခဲအံၤတခီနအဲၣ်ဒိးဟဲက့ၤကဒါက့ၤဆူယအိၣ်လီၤ.
2 ကွၢ်ထီၣ်တၢ်ဆူတၢ်လူၢ်တဖၣ်အဒီခိၣ်န့ၣ်တက့ၢ်. မ့ၢ်တၢ်လီၢ် အိၣ်ဒံးတတီၤတီၤဖဲနတမၤနသးဒ်ပှၤဃဲသဲမုၣ်တဂၤအ သိးကစီဒီဧါ. နခိးတ့ၢ်ပှၤလၢကအဲၣ်နၤတဖၣ်လၢကျဲကပၤ, ဒ်ပှၤဧ့ရ့းဖိတဂၤအိၣ်ခိးပှၤလၢအကမၤနၢၤဝဲတဖၣ်လၢမဲး မုၢ်ခိၣ်ပူၤအသိးန့ၣ်လီၤ. နမၤဘၣ်အၢတ့ၢ်ထံကီၢ်ခီဖျိနဃဲသဲမုၣ်အတၢ်မၤအံၤန့ၣ်လီၤ.
3 လၢတၢ်န့ၣ်အဃိ, တၢ်တြီဃာ်တၢ်စူၤထံတဖၣ်ဒီးတၢ်စူၤထံလၢ တၢ်မဲထီၣ်အခါတဟဲလၢၤစ့ၢ်ကီးဘၣ်န့ၣ်လီၤ. ပကွၢ်နၤလီၤဂာ်ဒၣ်လဲာ်ဒီးဃဲသဲမုၣ်တဂၤ ဒီးနတၢ်မဲာ်ဆှးတအိၣ်ဘၣ်န့ၣ်လီၤ.
4 ဒီးခဲအံၤနစံးဘၣ်ယၤ, ‘နမ့ၢ်ယပၢ်ဒီးနအဲၣ်တ့ၢ်ယၤလၢယမ့ၢ်ဖိ သၣ်တဂၤလံၤလံၤန့ၣ်လီၤ.
5 တမ့ၢ်နကသးဒိၣ်ယၤထီဘိတထံၣ်ဃီဘၣ်. တမ့ၢ်နကသးဖျိးယၤ လီၤထူလီၤယိာ်ဘၣ်.’ ကီၢ်အံၣ်စရ့လးဧၢ, နစံးတ့ၢ်ယၤတၢ်ဒ်န့ၣ်, ဘၣ်ဆၣ်ဒီးနမၤတ့ၢ်တၢ်အၢလၢနမၤသ့ခဲလၢာ်န့ၣ်လီၤ.”
6 ဖဲစီၤယိၤၡံယၤကဲထီၣ်စီၤပၤအဆၢကတီၢ်န့ၣ်, ယွၤစံးဘၣ်တ့ၢ်ယၤ, “ကီၢ်အံၣ်စရ့လး, ပိာ်မုၣ်လၢအသးတတီတဂၤ, မၤတ့ၢ်တၢ်မနုၤ လဲၣ်န့ၣ်မ့ၢ်နထံၣ်တ့ၢ်လံစ့ၢ်ကီးဧါ. အဝဲဃၣ်ယံၤကွံာ်အသးလၢ ယၤဒီးလၢကယဲၢ်တၢ်လူၢ်အထီကိးလူၢ်ဒဲးအလိၤဒီးကယဲၢ်သ့ၣ်လါဟ့ ကိးထူၣ်ဒဲးအဖီလာ်န့ၣ်, အဝဲမၤတ့ၢ်အသးဒ်ဃဲသဲမုၣ်တဂၤအ သိးန့ၣ်လီၤ.
7 ယဆိကမိၣ်တ့ၢ်လၢ, ဖဲအဝဲမၤတ့ၢ်တၢ်အံၤခဲလၢာ်ဝံၤန့ၣ်, အဝဲ ကဟဲက့ၤကဒါက့ၤဆူယအိၣ်သပှၢ်ကတၢၢ်လီၤ. ဘၣ်ဆၣ်ဒီး အဝဲတဟဲက့ၤကဒါက့ၤဘၣ်, ဒီးအဒီပုၢ်ဝဲၢ်မုၣ်ကီၢ်ယူဒၤ လၢအသးတတီဘၣ်, ထံၣ်တၢ်အံၤခဲလၢာ်န့ၣ်လီၤ.
8 ကီၢ်ယူဒၤထံၣ်ဘၣ်စ့ၢ်ကီးလၢယပာ်မၢ်ကွံာ်ကီၢ်အံၣ်စရ့လးဒီး ဆှၢဖျိးကွံာ်အီၤ, မ့ၢ်လၢအဝဲဃၣ်ကွံာ်အသးလၢယၤဒီး ကဲထီၣ်က့ၤပှၤဃဲသဲမုၣ်တဂၤအဃိလီၤ. ဘၣ်ဆၣ်ဒီး, ကီၢ်ယူဒၤ လၢအမ့ၢ်ကီၢ်အံၣ်စရ့လးအဒီပုၢ်ဝဲၢ်မုၣ်လၢအသးတတီဘၣ်န့ၣ်, တပျံၤဘၣ်တၢ်ဘၣ်. အဝဲဒၣ်စ့ၢ်ကီးကဲထီၣ်ပှၤဃဲသဲမုၣ်တဂၤ,
9 ဒီးအဝဲတမဲာ်ဆှးလ့ၤတက့ၤဘၣ်န့ၣ်လီၤ. အဝဲမၤဘၣ်အၢတ့ၢ်ထံ ကီၢ်, မၤတ့ၢ်တၢ်မၤကမၣ်မုၣ်ကမၣ်ခွါခီဖျိအဘူၣ်ထီၣ်ဘါထီၣ် လၢၢ်ဧိၤလ့ဧိၤဒီးသ့ၣ်ဧိၤဝၣ်ဧိၤတဖၣ်န့ၣ်လီၤ.
10 ဒီးတုၤတၢ်အံၤခဲလၢာ်ဝံၤအလီၢ်ခံ, ကီၢ်ယူဒၤလၢအမ့ၢ်ကီၢ်အံၣ်စရ့ လးအဒီပုၢ်ဝဲၢ်မုၣ်လၢအသးတတီန့ၣ်, ဟဲက့ၤကဒါက့ၤဆူယအိၣ်ထဲလၢတၢ် ပာ်မၤအသးအပူၤဧိၤန့ၣ်လီၤ. အဝဲပာ်အသးတတီတလိၤဘၣ်. ယၤ, ယွၤအံၤ, ကတိၤလံတၢ်လံ.”
11 အန့ၣ်ဒီး, ယွၤစံးဘၣ်တဲဘၣ်ယၤလၢ, ကီၢ်အံၣ်စရ့လးမ့ၢ်ဃၣ် ကွံာ်အသးလၢသါအိၣ်ဒၣ်လဲာ်, အဝဲအိၣ်ဖျါဂ့ၤဒိၣ်န့ၢ်ဒံးကီၢ်ယူဒၤ လၢအသးတတီန့ၣ်လီၤ.
12 အဝဲတဲဘၣ်တ့ၢ်ယၤလၢယကလဲၤဒီးစံးဘၣ်ကီၢ်အံၣ်စရ့လး, “ကီၢ်အံၣ်စရ့လးလၢအသးတတီဧၢ, ဟဲက့ၤကဒါက့ၤဆူ ယအိၣ်တက့ၢ်. ယသူၣ်ကညီၤသးကညီၤတၢ်သ့ဒီးယတသး ဒိၣ်ထီၣ်ယဲဘၣ်. ယတသးဒိၣ်နၤလီၤထူလီၤယိာ်ဘၣ်.
13 ထဲ, သ့ၣ်ညါအၢၣ်လီၤလၢနမၤကမၣ်ဘၣ်တၢ်ဒီးနပူထီၣ်တၢ်ထီဒါ ယွၤ, နကစၢ်ယွၤန့ၣ်တက့ၢ်. အၢၣ်လီၤနတၢ်ကမၣ်လၢနဟ့ၣ်တ့ၢ် နတၢ်အဲၣ်ဆူတခီဘီမုၢ်အကစၢ်တဖၣ်လၢသ့ၣ်လါဟ့ကိးထူၣ်ဒဲး အဖီလာ်, ဒီးလၢနတစူၢ်ယတၢ်မၤလိာ်တဖၣ်ဘၣ်န့ၣ်တက့ၢ်. ယၤ, ယွၤအံၤ, ကတိၤလံတၢ်လံ.
14 ပှၤဂီၢ်မုၢ်လၢအသးတတီသ့ၣ်ဧၢ, ဟဲက့ၤကဒါက့ၤတက့ၢ်. သုဘၣ်ဃးဒီးယၤလီၤ. ယကဟံးန့ၢ်သုတဂၤစုာ်စုာ်လၢဝ့ၢ်တဝ့ၢ် ဘၣ်တဝ့ၢ်, ခံဂၤစုာ်စုာ်လၢဒူၣ်ထၢတဒူၣ်ဘၣ်တဒူၣ်, ဒီးယကဟဲစိာ်က့ၤသုဆူကစၢၢ်စံယိၣ်လီၤ.
15 ယကဟ့ၣ်လီၤသုလၢပှၤပၢတၢ်တဖၣ်လၢအစူၢ်ယၤ, ဒီးအဝဲသ့ၣ်ကပၢသုလၢတၢ်ကူၣ်သ့ဒီးတၢ် သ့ၣ်ညါနၢ်ပၢၢ်အပူၤန့ၣ်လီၤ.
16 ဒီးတုၤသုအါထီၣ်ဂီၢ်ထီၣ်လၢထံကီၢ်န့ၣ်အပူၤဒီး, ပှၤဂီၢ်မုၢ်တကတိၤလၢၤဘၣ်ဃးယတၢ်အၢၣ်လီၤအီလီၤအတလါအဂ့ၢ် လၢၤဘၣ်. အဝဲသ့ၣ်တဆိကမိၣ်မ့ၢ်ဂ့ၤ, တသ့ၣ်နီၣ်မ့ၢ်ဂ့ၤ, တၢ်အၢၣ်လီၤအီလီၤအတလါန့ၣ်လၢၤဘၣ်. အဝဲသ့ၣ်တလိၣ် ဘၣ်လၢၤဒၣ်လဲာ်အီၤမ့ၢ်ဂ့ၤ, မၤကဒီးဝဲအဂၤတခါမ့ၢ်ဂ့ၤလၢၤဘၣ်.
17 ဖဲတၢ်ဆၢကတီၢ်အဝဲန့ၣ်တုၤဃီၤဝဲဒီး, ဝ့ၢ်ယရူၤၡလ့ၣ်ကဘၣ် တၢ်ကိးအီၤလၢ, ‘ယွၤအလီၢ်ပစိာ်’, ဒီးကယဲၢ်ပှၤကလုာ်ခဲလၢာ် ကပာ်ဖှိၣ်အသးဖဲန့ၣ်လၢကဘူၣ်ထီၣ်ဘါထီၣ်ယၤအဂီၢ်လီၤ. တၢ်လၢအဝဲသ့ၣ်အသးလၢအကိၤဒီးအအၢတဖၣ်တဲဘၣ်အီၤန့ၣ်, အဝဲသ့ၣ်တမၤဝဲလၢၤဘၣ်.
18 ကီၢ်အံၣ်စရ့လးကပာ်ဖှိၣ်ဃုာ်အသးဒီးကီၢ်ယူဒၤဒီးအဝဲသ့ၣ်ကဟဲဝဲ တပူၤဃီလၢတၢ်စိာ်မၢကဲကုၢ်အလီၢ်လၢကလံၤစိးတခီဒီးအဝဲသ့ၣ် ကဟဲက့ၤကဒါက့ၤဆူထံကီၢ်လၢယဟ့ၣ်န့ၢ်သါတ့ၢ်အမိၢ်ပၢ်ဖံဖု လၢပျၢၤတဖၣ်ဒ်အမ့ၢ်အတၢ်န့ၢ်သါအဂၢၢ်အကျၢၤအသိးန့ၣ်လီၤ.”
19 ယွၤစံးဝဲဒၣ်,
“ကီၢ်အံၣ်စရ့လးဧၢ, ယသးအိၣ်တူၢ်လိာ်နၤဒ် ယဖိခွါဒၣ်ယဲအသိး
ဒီးဟ့ၣ်လီၤနၤလၢထံကီၢ်အမုာ်တဘ့ၣ်,
ထံကီၢ်လၢအဃံလၤကတၢၢ်လၢ ဟီၣ်ခိၣ်ချၢဒီဘ့ၣ်ညါန့ၣ်လီၤ.
ယသးအိၣ်လၢနကကိးယၤလၢပၢ်
ဒီးနသုတဃၣ်ယံၤကွံာ်ကဒီးနသးလၢယၤ နီတစုတဂ့ၤန့ၣ်လီၤ.
20 ဘၣ်ဆၣ်ဒီး, ဒ်မါတဂၤလၢအသးတတီဘၣ်အသိး,
နတသးတီတ့ၢ်ဒီးယၤဘၣ်န့ၣ်လီၤ.
ယၤ, ယွၤအံၤ, ကတိၤလံတၢ်လံ.”
21 တၢ်ကလုၢ်တမံၤဘၣ်တၢ်နၢ်ဟူတ့ၢ်အီၤ လၢတၢ်လူၢ်တဖၣ်အဒီခိၣ်လီၤ.
မ့ၢ်ကီၢ်အံၣ်စရ့လးအပှၤဂီၢ်မုၢ်အတၢ်ဟီၣ်တၢ်ယၢၤဒီးအတၢ်ဃ့သ ကွံၢ်ကညးတၢ်,
မ့ၢ်လၢအဝဲသ့ၣ်အိၣ်မူတ့ၢ်လၢတၢ်ဒဲးဘးအပူၤ,
ဒီးသးပ့ၤနီၣ်တ့ၢ်ယွၤ, အဝဲသ့ၣ်အကစၢ်ယွၤ အဃိန့ၣ်လီၤ.
22 သုဝဲလၢအဃၣ်ယံၤကွံာ်အသးလၢယွၤခဲလၢာ်သ့ၣ်ဧၢ, ဟဲက့ၤ ကဒါက့ၤတက့ၢ်.
အဝဲဒၣ်ကမၤဘျါက့ၤသုဒီးဒုးသူၣ်တီသးရၤသုန့ၣ်လီၤ.
သုစံးသုဝဲ, “မ့ၢ်လီၤ, ပဟဲဆူယွၤအအိၣ်, မ့ၢ်လၢ အဝဲမ့ၢ်ကစၢ်ယွၤအဃိန့ၣ်လီၤ.
23 ပဘူၣ်ထီၣ်ဘါထီၣ်ပှၤတစူၢ်တနာ်ယွၤအတၢ်ဘူၣ်တၢ်ဘါလၢတၢ်လူၢ် တဖၣ်အဒီခိၣ်နာ်က့, ပတဘၣ်တၢ်မၤစၢၤတ့ၢ်ပှၤလ့ၤတက့ၤဘၣ်. တၢ်မၤစၢၤလၢကီၢ်အံၣ်စရ့လးအဂီၢ်, ဟဲဒၣ်ထဲလၢယွၤ, ပကစၢ်ယွၤအအိၣ်န့ၣ်လီၤ.
24 မ့မ့ၢ်တၢ်ဘူၣ်ထီၣ်ဘါထီၣ်ဘဧၤလး, တၢ်မဲာ်ဆှးအကစၢ်, ဒုးလီၤမၢ်ကွံာ်ပသိအဖုဒီးမဲာ်တဲးလဲးအဖုတဖၣ်, ဖိခွါတဖၣ်ဒီးဖိမုၣ်တဖၣ်, ကယဲၢ်တၢ်ခဲလၢာ်လၢပမိၢ် ပၢ်ဖံဖုလၢပျၢၤတဖၣ်မၤန့ၢ်တ့ၢ်ဝဲစးထီၣ်လၢပျၢၤလၢ ကစၢၤလံၤလံၤန့ၣ်လီၤ.
25 ပကြၢးမံလီၤလၢတၢ်မဲာ်ဆှးအပူၤဒီးပျဲတၢ်လၢအမၤမဲာ်ဆှးပှၤ ကးဘၢပှၤန့ၣ်လီၤ. ပဝဲဒီးပမိၢ်ပၢ်ဖံဖုလၢပျၢၤတဖၣ်မၤတ့ၢ် တၢ်ဒဲးဘးထီဒါယွၤ, ပကစၢ်ယွၤထီဘိတထံၣ်ဃီလီၤ. ပတစူၢ်တ့ၢ်အဝဲအတၢ်မၤလိာ်တဖၣ်နီတစုဘၣ်.”